Jan waltʼäwinakar jan ajjsaras saykatapjjañäni

“Diosaw imantasiñasajja, chʼamañchirisasa, jupaw chijinakan [jan ukajj llakinakan] arjjatirisajja.” (SAL. 46:1.)

¿KAMSASAS QHANAÑCHTʼASMA?

¿Kunjamsa jan waltʼäwinakamp jan aynachtʼksna?

¿Kunatsa jan ajjsarañasäki?

¿Jan waltʼäwinakar saykatañatakejj kuna yanaptʼanaksa Jehová Diosajj churistu?

1, 2. ¿Kuna jan waltʼäwinakas jichhürunakan jila partejj utji, ukat Jehová Diosan yupaychirinakapajj kunsa muntanjja?

 KUNAYMAN jan waltʼäwinak utjir tiemponwa jaktanjja: oraq khathatinakasa, lamar qotat uma llumstäwinakasa, nina aqtäwinakasa, jallun wal purintatapasa, volcananakasa ukat lamar qotat mistunir jachʼa thayanakasa oraqpachanwa kunayman jan waltʼäwinak utjayi. Ukhamarusa, jaqenakajj kunayman jan waltʼäwinakanwa familiapansa jan ukajj jupanak pachpas uñjasipjje, ukanakaw llakita ukat ajjsarat jikjjatasiyi. Biblian aka arunakapajj cheqawa: “Jaqejj jan amuykay horasaw mä jan waltʼañan katuntat uñjasi” (Ecl. 9:12).

² Jehová Diosan markapajj kunayman jan waltʼäwinakaruw saykatawayapjje. Ukampisa, akapachan tukusiñap jakʼachasisinkipanjja, kunanakatï jutkani ukanakar saykatañatak wakichtʼatäñwa muntanjja. ¿Kunjamsa jan waltʼäwinakar jan aynachtʼas saykatsna? ¿Jan ajjsartʼas ukat jan sinti llakisisa saykatañatakejj kunas yanaptʼistani?

JAN WALTʼÄWINAKAR JAN AJJSARAS SAYKATAPKÄNA UKANAKAT YATEQASIPJJAÑÄNI

3. Romanos 15:4 qellqatarjamajja, ¿jan waltʼäwin uñjaskañäni ukhajj kunas chuymachtʼistaspa?

³ Jichhürunakanjja, jan waltʼäwinakajj jukʼamp jaqenakaruw jan walin uñjasiyi, ukampis jan waltʼäwinakajj nayratpachaw utjäna. Bibliajj qellqaskäna uka tiemponjja, kunjamsa Diosar servirinakapajj jan ajjsartʼasa ukat jan sinti llakisisa jan walinakar saykatapjjäna ukanakat jichhajj yatjjatañäni (Rom. 15:4).

4. ¿Davitajj kuna jan waltʼäwinakans jikjjatasïna, ukat kunas yanaptʼäna?

⁴ Nayraqatjja, David chachat amuytʼañäni. Jupajj reyin jiwayañatak arknaqataw uñjasïna, uñisirinakapan muyuntata, warminakapasa katuntatäpjjänwa, servirinakapas jupa  contraw saytʼasipjjäna ukat kunayman llakinakanwa jikjjatasirakïna (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8). Kunjamsa Davitajj tʼaqhesïna uk Bibliajj sum qhanañchi. Ukhamäkchïnsa, Diosar yupaychañ toqet janiw aynachtʼkänti. Ukatwa Jehová Diosar taqe chuyma atinisis akham arsüna: “[Jehová] Tatituw qhanajjasa, qhespiyasiñajjasa, ¿khitirurak ajjsarästi?” sasa (Sal. 27:1; Salmo 27:5, 10 liytʼasiñapawa).

5. ¿Abrahamampi Sarampirojj kunas jan waltʼäwinakar saykatañatak yanaptʼäna?

⁵ Jichhajj Abrahamampit Sarampit amuytʼarakiñäni. Jupanakajja, jila partejj sarir jaqenakjamaw carpanakan jakapjjäna. Ukham jakañajj jupanakatakejj awisajj chʼamakïnwa. Manqʼat pistʼañanakansa ukat marka jakʼankirinakapampis jan walin uñjasipkchïnjja, jan ajjsartʼasa ukat jan llakisisaw ukanakar saykatapjjäna (Gén. 12:10; 14:14-16). ¿Kunjamsa uk lurapjjäna? Bibliajj akham siwa: “Abrahamajj suytʼaskarakïnwa suma uttʼayata marka, uka markan luriripajja Diosawa” sasa (Heb. 11:8-10). Abrahamampi Sarampejja, akapachampi apayasiñat sipansa, kuntï jutïrin katoqapjjañapäkäna ukwa suyapjjäna.

6. ¿Kunsa Job chachat yateqassna?

⁶ Maysa toqetjja, Job chachajj jan waltʼäwinakan jikjjatasirakïnwa. Jupatakejja, jan walinakan uñjasiñajj wali llakkañapunïpachänwa (Job 3:3, 11). Yamas kunatsa tʼaqhesiskäna uk jan yatiñaw jukʼampi llakkañapachänjja. Ukhamäkchïnsa, janipuniw aynachtʼkänti, jan ukasti taqe chuymaw Jehová Diosar atinisïna (Job 2:3 liytʼasiñapawa). ¡Ukajj wali yateqaskayapuniwa!

7. ¿Diosar servkasin kuna jan waltʼäwinakansa Pablojj jikjjatasïna, ukat kunas jan ajjsartʼas nayrar sartaskakiñatakejj yanaptʼäna?

⁷ Jichhajj apóstol Pablot yatjjatarakiñäni. Jupajja, “walja kutiw markanakan jan waltʼañanakan uñjas[ïna], ukhamaraki wasaranakansa, qotansa”. Ukhamarusa “manqʼats awtjata umats pharjataw sarnaqta; [...] thayansa thayjata, jan isin kuna” sasaw jupajj qhanañchäna. Ukat “mä arumampi mä urumpiw qotan qhantatïyätjja” sasaw sarakïna, ukjja inas qotanjam sarkasin barcot jalantatanakapat mayat amtasis sischïna (2 Cor. 11:23-27). Ukampis janipuniw llakimp aynachtʼkänti, ukjja jupan arunakapanwa amuysna. Kunapachatï Diosar serviñ layku niy jakäwip aptʼasirjamäkäna uka qhepatjja, akham sänwa: “Taqe ukanakajj Diosar katuyasiña yateqapjjañajjatakïtaynawa, jan nanakan chʼamanakajjarojja, uka Diosaw jiwatanaksa jaktayejja. Diosaw qhespiyapjjetu, jichhas qhespiyasipkakituwa uka jachʼa jiwañatjja” sasa (2 Cor. 1:8-10). Pabljam sinti jan waltʼäwinakanjja mä qhawqhanikiw jikjjatasipjjpachäna. Kunjamsa jupajj jikjjatasïna uk sumwa amuysna ukat ukham jan waltʼäwinakar jan ajjsaras saykatatapat yatjjatasajj chʼamañchtʼasiraksnawa.

JAN WALTʼÄWINAKAN UÑJASISAJJ JANIPUN AYNACHTʼAPJJAÑÄNITI

8. ¿Kuna llakinakansa uñjassna? Mä experienciat arstʼam.

⁸ Jichhürunakanjja, kunayman chijinaka, jan waltʼäwinaka ukat kunanakatï akapachan utjki ukanak uñjasajj jaqenakajj llakitakiw jikjjatasipjje. Yaqhep cristianonakajj ukhaman jikjjatasipjjarakiwa. Lani * kullakat amuytʼañäni, kunapachatï ñuñun canceranïtawa (cáncer de mama) sapkäna ukhajj walpun sustjasïna, jupajj Australia markanwa chachapamp chik sapürunjam Diosar servïna. Ukat akham siwa: “Qollanak umkayäta ukajj wal usuntayitu ukat janis kunatakëjjerista ukhamwa jikjjatasiyäta” sasa. Janiw ukakïkänti, chachaparojj jikhan chʼakhatwa operapjjäna ukat juparurakiw uñjañajj waktʼäna. Ukhaman uñjassna ukhajj ¿kuns lursna?

9, 10. 1) ¿Kunsa Supayamp jan apaqayasiñasäki? 2) ¿Hechos 14:22 qellqatajj kunjamsa yanaptʼistaspa?

⁹ Ak amtapuniñäni, kuna jan waltʼäwinakantï jikjjatasktan ukampiw Supayajj Diosat jitheqtayañ  munistu. Janipun kusisit jakasiñjja Supayampi apaqayasiñäniti. Proverbios 24:10 qellqatajj akham ewjjtʼistu: “Tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” sasa. Biblian utjki uka sarnaqäwinakat yatjjataniwayktan ukat yaqha ukham sarnaqäwinakat lupʼiñänejja, kuna jan walinakatï jakäwisan utjkani ukanakarojj jan ajjsartʼasa ukat jan sinti llakisisaw saykatañäni.

¹⁰ Cheqas janipuniw kuna jan walis paskitaniti sasin janiw suyañasäkiti (2 Tim. 3:12). Kunattejj Biblia pachpaw Hechos 14:22 qellqatan akham sistu: “Diosan [reinopar] mantañatakejja, tʼaqhesiñajj wakisipuniwa” sasa. Ukanakamp aynachtʼañat sipansa, Jehová Diosaw yanaptʼitani sasin jupar taqe chuyma confiyataswa uñachtʼayañasa.

11. ¿Kunjamsa llakinakamp jan aynachtʼksna?

¹¹ Kunanakatï wali wakiskirïki ukanakaruw chuym churañasa. Bibliajj akham siwa: “Kusisit chuyman jaqesti ajanupanjja kusisitarakiwa; llakit chuyman jaqesti llakita ajanuniwa” sasa (Pro. 15:13). Jiwasatï jan askichirjamäktan ukanakatak llakisiskakiñäni ukhajja, jukʼampikiw aynachtʼañäni. Ukampis Jehová Diosaw ukanakar saykatañatak cheqpach yanaptʼanak churistu ukanakatwa wal yuspärañasa. Kunapachatï jan waltʼäwinakan jikjjatastan ukhajja, Arup toqe, jilat kullakanak toqe ukat qollan ajayup toqew chuymachtʼistu ukat chʼamañchtʼistu. Uka kimsa yanaptʼanakatwa chʼamañchtʼäwi jikjjatsna. Ukhamasti jan waltʼäwinakat lupʼiñat sipansa, kunjamsa jan walinakar saykatsna ukwa amtañasa ukat kuna askinakatï jakäwisan utjki ukanakaruw chuym churañasa (Pro. 17:22).

12, 13. 1) ¿Kunas Jehová Diosan yupaychirinakaparojj jan waltʼäwinakar saykatañatak yanaptʼawayi? Mä experienciampi qhanañchtʼam. 2) Jan waltʼäwinak utjki ukhajja, ¿kunjamsa jakäwisan kunatï wali wakiskirïki ukajj uñachtʼayasi?

¹² Aka qhepa maranakanjja, walja markanakaw jan waltʼäwinakan uñjasiwayapjje. Ukat kawkïr jilat kullakanakatï uka markanakan jakapki ukanakajj musparkañapuniw aguantawayapjje. Amuytʼañäni, febrero 2010 maranjja, Chile markanjj jachʼa oraq khathati ukat lamar qotat umajj llumstanisinwa walja jilat kullakanakan utanakap qʼal tukjawayi. Jupanakat waljanejja, yänakapwa aptʼasiwayapjje ukat yaqhepasti jan kunaniw uñjasiwayapjje. Ukhamansa jikjjatasipkchïnjja, jupanakajj janipuniw Diosar yupaychañan aynachtʼapkänti. Samuel jilatan utapajj qʼala tukjatänwa, jupajj akham siwa: “Ukham jan walinsa jikjjatasipkchiyätjja, warmijamp nayampejj tantachäwinakarusa ukat yatiyiris sarapjjapuniyätwa. Ukanakaw jan sinti llakisiñatakejj yanaptʼawayapjjetu” sasa. Jupanakajj jilat kullakanakamp chikajj Diosar yupaychasipkakïnwa.

¹³ Septiembre 2009 maranjja, Manila markaruw jallojj wal purintatayna ukat niya markpachwa qʼal apatayna, uka markasti Filipinas markan capitalapawa. Walja yänakap aptʼasir mä qamir chachajj akham siwa: “Umajja taqeniruw mä khuskhar tukuyawäpjjetu. Qamirinakasa, pisinkirinakas pachpa jan waltʼäwinakanwa jikjjatasipjjta” sasa. Ukajja, Jesusan aka ewjjtʼapwa amtayistu: “Jumanakajj alajjpacharu suma yänaka imasipjjam, ukansti janiw kharus thuthantkiti ni ina chʼusarus tukuskarakiti, janirakiw lunthatanakas lunthatkarakispati” sasa (Mat. 6:20). Khitinakatï yänaka jikjjatañataki wal chʼamachasipki ukanakajja, chuyma pʼakintataw jikjjatasipjje, kunattejj ukanakajj jankʼakiw chhaqti. Ukampis Jehová Diosamp sum apasiñasataki chʼamachasiñäni ukhajja, kunas pasaskpan janipuniw kunäkipansa chhaqtkaniti (Hebreos 13:5, 6 liytʼasiñapawa).

KUNATSA JAN AJJSARAÑASÄKI

14. ¿Kunatsa jan ajjsarañasäki?

¹⁴ Jesusajj jan wali tiemponak utjañapat arkirinakapar yatiyjjänwa, ukajj apnaqäwipankjjasin jiwasampëjjani uka tiemponwa pasañapäna, ukat akham sarakïnwa: “Jan sustjasipjjamti” sasa (Luc. 21:9). Jesucristo Reyisampi ukat taqe kun Lurir Jehová Diosan yanapapampejja,  jan waltʼäwinakar jan ajjsarasa ukat jan sinti llakisisa saykatañatakejj walja razonanakaw utjistu. Pablojj aka arunakampiw Timoteor chʼamañchtʼäna: “Diosajj janiw ajjsarañ ajayu churkistuti, jan ukasti chʼamani, munasiñani, cheqapar amuytʼaña ajaywa churistu” sasa (2 Tim. 1:7).

15. ¿Khitinakas Diosar taqe chuyma confiyapjjatap uñachtʼayapjjäna, ukat kunjamsa jupanakjam jan ajjsarirïkaraksna?

¹⁵ Jehová Diosan walja yupaychirinakapajj Jupar taqe chuyma confiyatapwa arsuwayapjjäna. Davitajj akham sänwa: “Tatituw chʼamajjajja, arjjatirejjasa: juparuw taqpach chuymamp iyawsta, jupasti yanaptʼituwa. Chuymajjajj kusisitawa” sasa (Sal. 28:7). Pablojj akham sarakïnwa: “Taqe akanakansti atipirinakat sipansa jukʼampïtanwa jiwasar munkistus ukan yanapapampi” sasa (Rom. 8:37). Kunapachatï Jesusajj jan walinakan jikjjataskäna ukhajja, Awkipampi sum apasitapjja aka arunakapanwa qhanstayäna: “Janiw nayajj sapakïkti jan ukasti Awkiw nayampïski” sasa (Juan 16:32). Uka arsutanakatjja, qhanwa Jehová Diosar taqe chuyma confiyapjjatap amuysna. Ukhamarakitï jiwasajj Jehová Diosar taqe chuyma confiyañäni ukhajja, jan ajjsarasa ukat jan sinti llakisisarakiw kunayman jan waltʼäwinakar saykatañäni (Salmo 46:1-3 liytʼasiñapawa).

JEHOVÁ DIOSAW JAN AJJSARAÑATAK YANAPTʼISTU

16. ¿Kunatsa Diosan Arupat yatjjatañasapuni?

¹⁶ Jan ajjsarirïñajj janiw jiwasan chʼamasar atinisitasat jutkiti, jan ukasti Jehová Diosar uñtʼatasata ukat Jupar confiyatasatwa juti. Ukatakisti Bibliatwa yatjjatañasa, ukaw mä yanaptʼajja. Mä kullakajj llaki usuniwa, ukat kunas jupar yanaptʼi uk akham sasaw qhanañchtʼi: “Kawkïr tʼaqanakas chuymachtʼitu uk kutin kutiniw liytʼta” sasa. ¿Familiana Diosar Yupaychañataki Aruma jan jaytasa apapjjam sasin ewjjtʼkistu uk phoqhasktanti? Ukhamtï luraskstanjja, salmo qellqerjamarakiw akham sañäni: “Yatichäwimarojj walpun munasta: ¡Sapüruw ukjjat lupʼiskta” sasa (Sal. 119:97).

17. 1) ¿Llakimpi jan aynachtʼañatakejj kunas yanaptʼistani? 2) Jumarojj kuna sarnaqäwit liytʼañas yanaptʼawaytam uk qhanañchtʼam.

¹⁷ Yaqha yanaptʼajj Bibliat apstʼat qellqatanakawa, ukanakaw Jehová Diosar taqe chuyma confiyañatak yanaptʼistu. Walja jilat kullakanakarojja, yaqhep jilat kullakanakan sarnaqäwipat revistanakasan mistki uka experiencianakaw yanaptʼawayi. Asia markankir mä kullakat parltʼañäni, jupajj trastorno bipolar sat llaki usuniwa. Jupajja, uka pachpa usuni mä misionero jilatan sarnaqäwipat liytʼatayna, uka jilatajja ukham usunïkasasa taqe chuymaw Diosar serviskakïna. Uka kullakajj akham sänwa: “Uka sarnaqäwiwa kunjamansa nayajj jikjjatasiyäta uk amuytʼasiñataki ukat mä suytʼäwinïñatakis yanaptʼawayitu” sasa.

18. ¿Kunatsa Diosat mayisiñasapuni?

¹⁸ Diosat mayisiñawa kunayman jan waltʼäwinakan jikjjatasiñäni ukhajj yanaptʼistani.  Kunja wakiskiris Diosat mayisiñajj uk akham ewjjtʼasaw Pablojj qhanstayäna: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpjjatam layku” sasa (Fili. 4:6, 7). ¿Kunapachatï jan waltʼäwinakan jikjjatasktan ukhajj chʼam jikjjatañatak Diosar mayisipuntanti? Gran Bretaña markankir Alex jilatajj llaki usumpiw walja tiempo tʼaqhesiski, jupajj akham siwa: “Jehová Diosar oracionan parlañasa ukat Biblia liytʼas arup istʼañasa nätakejj wali yanaptʼapuniwa” sasa.

19. Tantachäwinakar sarañjja, ¿kunjamsa uñjañasa?

¹⁹ Tantachäwinakajj yaqha yanaptʼarakiwa. Salmo qellqerinakat maynejj akham sänwa: “Taqpach almajjampiw temploman uyupankañ munta, taqpach chuymajjampiw jakkir Diosar kusisit qʼochta” sasa (Sal. 84:2). ¿Jupjamat jiwasajj jikjjatasiraktanjja? Lani, qalltan parlaniwayktan uka kullakatakejj tantachäwinkañasa ukat jilat kullakanakampïñasa wali wakiskirïnwa. Jupajj akham siwa: “Diosan yanaptʼap katoqañatakejj tantachäwinkañajäpunïnwa, uk sum yatiyäta” sasa.

20. ¿Kunjamsa yatiyir sarañajj yanaptʼistu?

²⁰ Diosan reinopat jan jaytasa yatiyañaw jan waltʼäwinakarojj jan ajjsarasa ukat jan sinti llakisisa saykatañatak yanaptʼarakistani (1 Tim. 4:16). Australia markankir mä kullakajj kunayman jan waltʼäwinakanwa jikjjatasitayna, jupajj akham siwa: “Mä irpir chuymaniw yatiyir sarañatak invittʼitu, nayajj janis yatiyir sarañ munkchïyatjja, iyaw sistwa. Jehová Diosaw yanaptʼaskpachïtäna, kunattejj sapa kuti yatiyir mistkayäta ukhajj wali kusisitaw jikjjatasiyäta” sasa (Pro. 16:20). Kunapachatï Jehová Diosar confiyañatak yaqhanakar yanaptʼapki ukhajja, jupanak pachpaw chʼamañchtʼasipjjaraki, ukwa waljanejj amuyawayapjje. Ukhamarusa jan waltʼäwinakapat armtʼasipjjewa ukat kunatï wakiskirïki uk lurañatakiw chʼamachasipjje (Fili. 1:10, 11).

21. ¿Kuna toqetsa janipun pächasiñasäki?

²¹ Jan waltʼäwinakar jan ajjsarasa ukat jan sinti llakisisa saykatañatakejj walja yanaptʼanakwa Jehová Diosajj churistu. Uka yanaptʼanakat askinak apsuñäni ukat Diosan servirinakapat khitinakatï jan ajjsartʼasa jan walinakar saykatapkäna ukanakat lupʼiñäni ukat jupanakat yateqasiñäni ukhajja, jan waltʼäwinakarojj jan ajjsarasaw saykatarakiñäni. Akapachan tukusiñap jakʼachasisinkipanjja, inas jan waltʼäwinakan jikjjataschiñäni. Ukampisa Pabljamaw sarakiñäni: “Oraqerus takisipkchitu ukasa, janipuniw tukjatäpktsa [...]. Ukatwa janipuni nanakajj mayjtʼasipkti” sasa (2 Cor. 4:9, 16). Cheqas Jehová Diosan yanaptʼapampejj jan ajjsarasaw kuna jan waltʼäwinakarus saykatañäni (2 Corintios 4:17, 18 liytʼasiñapawa).

[Qhanañchäwi]

[Jiskt’anaka]

[10, 11 jananakan fotonakapa]

Jan waltʼäwinakan jikjjataskañäni ukhajja, kuna yanapanaktï Diosajj churkistu ukanakatwa askinak apsuñasa