1, 2. Momo be dahaka hekwakwanai idia davaria? Bona dahaka ita karaia be namo?

 ITA BE nega aukadia ai ita noho bona tanobada ai disasta momo idia vara. Taunimanima be tano mareremarere, sunami, lahi, abata, volkeino, bona lai badadia hegeregere, saiklon amo dika bada idia davaria. Danu, ruma bese lalonai hekwakwanai idia vara, bona taunimanima ta ta sibodia be mai edia hekwakwanai dainai, momo be idia lalohekwarahi bona lalohisihisi noho. Baibel ia hahedinaraia hegeregerena, ita ibounai dekenai dika do idia vara kava.​—Had. 9:11.

² To, Dirava ena taunimanima be inai nega aukadia lalonai, mai moale ida Ia idia hesiai henia noho. Inai tanobada ena dokona ia kahirakahira lalonai, namona be ita noho hegaegae inai dika idauidau ita hanaia totona. Ena be dika ita davaria, to edena dala ai mai moale ida Dirava ita hesiai henia noho diba? Dahaka ese ita do ia durua ita haheauka totona?

3. Roma 15:4 ena hereva hegeregerena, hekwakwanai badadia ita davaria neganai, dahaka ese ita ia durua diba?

³ Momokani, idaunegai amo ema bona hari, taunimanima be hekwakwanai idia davaria. To, hari hekwakwanai badadia momo idia vara noho. Mani ita itaia, edena dala ai guna Dirava ena hesiai taudia ese hekwakwanai idia haheaukalaia, bona edia haheitalai ese ita ia durua diba.​—Roma 15:4.

4. Davida be dahaka hekwakwanai haida ia haheaukalaia, bona dahaka ese ia durua?

⁴ Mani Davida ita laloa. King ta ia ura Davida ia hamasea, ena inai taudia ese idia tuari henia, bona nega ta ena adavana idia abidia. Danu, ena tuari taudia haida, ruma bese taudia haida, bona turadia ese ia idia koia. Bona nega haida ia lalometau. To, Davida be unai gaudia ibounai ia haheaukalaia.  (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Baibel ese ia hahedinaraia Davida be unai hekwakwanai idauidau dainai, ia lalohisihisi bada. To, unai gaudia ese ena abidadama Iehova dekenai idia hamanokaia lasi. Ia gwau: “Lohiabada ese mase gaudia ibounai dekena amo, lau ia gimaia noho. Daika garina do lau gari?”​—Sal. 27:1; Salamo 27:5, 10 duahia.

5. Dahaka ese Aberahamo bona Sara ia durua, idia haheauka totona?

⁵ Aberahamo bona Sara be edia mauri ibounai lalonai palai rumadia ai idia noho. Idia diba lasi gabudia ai idau taudia bamona idia noho, bona mauri be auka. Hegeregere, hitolo bada ia vara bona idau bese taudia ese idia dagedage henidia, to mai gari lasi ida idia haheauka. (Gen. 12:10; 14:14-16) Dahaka ese idia ia durua idia haheauka totona? Baibel ia gwau, Aberahamo “be taoni mai ena badina aukana ia naria noho, unai taoni ena palani ia karaia tauna bona ia haginia tauna be Dirava.” (Heb. 11:8-10) Aberahamo bona Sara be unai mauri aukana dainai idia lalohisihisi lasi, to Iehova ese ia gwauhamatalaia gaudia idia laloa noho.

6. Edena dala ai Iobu ita tohotohoa diba?

⁶ Iobu danu be dika bada ia davaria. Iena mauri lalonai hekwakwanai badadia idia vara dainai, ia lalohisihisi bada. (Iobu 3:3, 11) Danu, ena be ia laloparara lasi dahaka dainai unai hekwakwanai be ia dekenai idia vara, to ia lalomanoka lasi. Ia be Dirava ia badinaia bona abidadama henia noho. (Iobu 27:5 duahia.) Ita dekenai ia be haheitalai namona!

7. Paulo ena hesiai gaukara lalonai dahaka hekwakwanai ia davaria? Dahaka ese Paulo ia hagoadaia ia haheauka noho totona?

⁷ Mani aposetolo Paulo ena haheitalai ita laloa danu. Ia be taoni ai, tano gagaena ai, bona davara dekenai dika ia davaria. Bona nega momo ia ‘hitolo, ranu mase, keru bona ena dabua be hegeregere lasi.’ Danu, nega haida ia guia bouti be ia mutu, bona nega ta ia be dina ta bona hanuaboi ta gadobada dekenai ia hure kava. (2 Kor. 11:23-27) Ena be kahirakahira ia mase, to lalohadai maorona ia dogoatao noho. Ia gwau: “Unai bamona ia vara, ai sibona do ai abidadama henia lasi totona, to mase taudia ia hatorea isi lou Diravana do ai abidadama henia. Toana be ia ese mase amo ai ia hamauria.” (2 Kor. 1:8-10) Ita momo be Paulo ese ia davaria dika ita davaria lasi. To, ia mamia bamona ita mamia danu. Unai dainai, iena haheauka karana ese ita ia hagoadaia diba.

8. Hekwakwanai ita davaria neganai, reana edena bamona do ita mamia? Haheitalai ta gwauraia.

⁸ Hari inai negai, taunimanima be idia lalometau badina disasta bona hekwakwanai momo idia davaria, bona idia mamia idia hegeregere lasi edia hekwakwanai idia hamaoromaoroa totona. Dirava ena hesiai taudia haida danu be unai bamona idia mamia. Hegeregere, Australia ai Lani a bona ena adavana be mai moale ida ful-taim hesiai gaukara idia karaia. To nega ta, doketa idia davaria Lani be ratana dekenai kensa gorerena ia abia. Lani bona ena adavana be idia lalohisihisi bada. Lani ia gwau ia abia muramura ese ena tauanina idia hamanokaia, bona ia laloa iena mauri be anina lasi. Danu, unai nega ai Lani ena adavana be doruna turiana dekenai opereisen ia abia, bona Lani ese ia naria. Bema ita be unai bamona hekwakwanai ita davaria, dahaka do ita karaia?

9, 10. (a) Dahaka dainai Satani ena dala ita koua be namo? (b) Kara 14:22 ese ia herevalaia “hisihisi idauidau” ita haheaukalaia totona, dahaka lalohadai maorona ita abia be namo?

⁹ Ita dekenai gau dikadia idia vara neganai, namona be ita laloatao, Satani ese unai gaudia ia gaukaralaia iseda abidadama ia hamanokaia bona eda moale ita haboioa totona. To, namo lasi Satani ena dala ita kehoa. Aonega Herevadia 24:10 ia gwau bema ita lalomanoka, eda goada be do ia hegeregere lasi hekwakwanai ita haheaukalaidia totona. Namona be ita herevalaia vadaeni taudia edia haheitalai ita laloa dobu. Unai ese ita  do ia durua, ita davaria hekwakwanai idauidau ita haheaukalaia totona.

¹⁰ Namona be ita laloatao hekwakwanai ibounai ita kokia diba lasi, badina hekwakwanai be do idia vara noho. (2 Tim. 3:12) Kara 14:22 ia gwau: “Dirava ena Basileia lalonai ita vareai totona, hisihisi idauidau [do] ita abia.” Namona be inai lalohadai maorona oi abia: Hekwakwanai oi davaria neganai, unai be nega namona do oi hahedinaraia, oi abia dae momokani Dirava ese oi do ia durua.

11. Ita lalomanoka lasi totona, dahaka ita karaia be namo?

¹¹ Iseda mauri lalonai gau namodia ita laloa noho be namo. Baibel ia gwau iseda “kudouna ia moale neganai” ita kiri, to bema ita “lalohisihisi,” ita lalomanoka diba. (Aon. 15:13) Doketa idia gwau, bema gorere tauna ta ia laloa do ia namo, ena gorere amo ia namo diba. Nega haida doketa ese dala idauna ma ta idia tohoa, hegeregere gorere tauna dekenai muramura korikorina lasi, to ia lalonai ranu bona suga sibona ia noho muramura ta idia henia. Nega momo doketa taudia idia itaia, bema gorere tauna ia abia dae unai muramura ese ia do ia durua, iena gorere do ia namo. To, bema ia laloa unai muramura ese do ia durua lasi, iena gorere do ia bada ia lao. Unai haheitalai ese ia hahedinaraia, eda mauri lalonai do ita haidaua diba lasi gaudia ita laloa momo neganai, ita lalomanoka diba. To, ita moale badina Iehova ese ita dekenai heduru korikorina ia henia. Disasta badadia idia vara neganai, Iehova ese Baibel, tadikaka taihu bona lauma helaga amo ita ia hagoadaia. Namona be unai gaudia ita laloa noho, badina idia ese ita dekenai moale do idia havaraia. Namo lasi eda mauri lalonai idia vara hekwakwanai ita laloa momo, to namona be dala ita tahua unai hekwakwanai ita haheaukalaidia totona.​—Aon. 17:22.

12, 13. (a) Dahaka ese Dirava ena hesiai taudia ia durua, disasta idia haheaukalaia totona? Haheitalai ta gwauraia. (b) Disasta idia vara neganai, edena dala ai ita laloparara dahaka be mai anina bada?

¹² Vanegai lagani lalodiai, tano haida ai disasta badadia idia vara. Herevana unai be nega aukana, to iseda tadikaka ese unai hekwakwanai idia haheaukalaia, bona edia haheitalai amo gau momo ita dibaia diba. Lagani 2010 ai, Chile dekenai tano mareremarere badana bona sunami ese iseda tadikaka taihu momo edia ruma bona kohu idia hadikaia. Haida be edia moni gaukara idia haboioa danu. To unai nega aukana lalonai, tadikaka taihu be Iehova ena hesiai gaukara idia goadalaia noho. Tadikaka ta ladana Samuel, be ena ruma ia haboioa, to ia gwau: “Ena be unai hekwakwanai badana ai davaria, to lau bona egu adavana be hebou bona haroro gaukara ai hadokoa lasi. Lau abia dae momokani, unai bamona ai karaia dainai ai daradoko lasi.” Idia bona tadikaka taihu momo be unai dika badadia ese idia koua lasi, to mai boga auka ida Iehova idia hesiai henia noho.

¹³ September 2009 ai, Philippines dekenai medu bada herea ia diho bona Manila siti dekenai abata ia vara. Ena kohu momo ia haboioa taga tauna ta ia gwau, unai abata ese “taga taudia bona ogogami taudia ia hadikaia bona idia lalohisihisi bada.” Unai ese Iesu ena hereva ia hamomokania, ia gwau: “Guba dekenai umui sibona totona dava bada kohu do umui haboua, unuseniai manumanu bona raraka ese do idia hadikaia lasi, bona henaohenao taudia ese do idia henaoa lasi.” (Mat. 6:20) Moni bona kohu be idia boio haraga diba, unai dainai edia mauri lalonai unai gaudia idia atoa guna taudia be nega momo idia lalohisihisi. Unai dainai, eda mauri lalonai Iehova ita atoa guna be aonega karana, badina herevana dahaka ia vara to eda hetura karana Ia ida be ia dika diba lasi.​—Heberu 13:5, 6 duahia.

14. Dahaka dainai ita haheauka diba?

¹⁴ Iesu ese ena hahediba taudia ia hamaoroa, ia giroa mai neganai hekwakwanai momo do idia vara. To ia gwau: “Umui gari lasi.” (Luka 21:9) Oibe, ita haheauka diba badina iseda King, Iesu Keriso bona Iehova, iunives ia Havaraia Tauna,  be ita idia durua noho. Paulo ese Timoteo ia hagoadaia, ia gwau: “Dirava ese ita dekenai ia henia lauma helaga ese gari ia havaraia lasi, to siahu, lalokau, bona laloa maoromaoro karana ia havaraia.”​—2 Tim. 1:7.

15. Davida, Paulo bona Iesu ese Dirava abidadama henia karana idia herevalaia neganai, dahaka idia gwau? Edena dala ai idia ita tohotohoa diba?

¹⁵ Baibel lalonai hesiai taudia haida ese Dirava idia abidadama henia karana ena sivarai idia noho. Hegeregere, Davida ia gwau: “Lohiabada be egu goada bona egu kesi. Lau ese ia lau abidadama henia noho. Ia ese lau ia durua noho, bona egu kudouna ia hamoalea noho.” (Sal. 28:7) Paulo ia gwau: “Ai ia lalokau henia tauna dainai, unai gaudia ibounai lalonai, ai be ai kwalimu momokani.” (Roma 8:37) Iesu ia diba kahirakahira ia do idia dogoatao bona hamasea neganai, ena aposetolo taudia dekenai ia gwauraia herevana ta amo ia hahedinaraia, iena hetura karana Dirava ida be ia goada. Ia gwau: ‘Lau be sibona lau noho lasi, badina Tamana be lau ida.’ (Ioa. 16:32) Unai hesiai taudia edia hereva amo dahaka ita dibaia? Ita dibaia gauna be inai: Idia ibounai be Iehova idia abidadama henia momokani. Unai hegeregerena, bema ita danu be Iehova ita abidadama henia, nega aukadia ai do ita haheauka.​—Salamo 46:1-3 duahia.

16. Dahaka dainai Baibel ita stadilaia be gau badana?

¹⁶ Dirava abidadama henia karana ese ita ia hagoadaia, hekwakwanai ita haheaukalaidia totona. Baibel ita stadilaia hanaihanai karana ese ita ia durua diba. Unai ita karaia neganai, Dirava do ita dibaia bona eda abidadama ia dekenai do ia goada. Lalometau gorerena ia davaria taihu ta ia gwau, Baibel lalonai hagoadaia siridia ia duahia loulou neganai, lalogoada ia abia. Igui hesiai tauna mai ena kamonai oreana ena hakaua herevana hegeregerena, wiki ta ta ai ruma bese ena tomadiho ita karaia, a? Baibel ita stadilaia karana ese ita ia durua, Salamo torea tauna hegeregerena do ita gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.”​—Sal. 119:97.

17. (a) Iehova ese ita ia durua dalana ma ta be dahaka? (b) Iseda magasin ai idia noho mauri sivaraina ta ese edena dala ai oi ia durua?

¹⁷ Iehova ese ita ia durua dalana ma ta be, orea ese ia halasia buka bona magasin ita duahia neganai, ita idia durua Baibel ita lalopararalaia bona eda abidadama Dirava dekenai ita hagoadaia. Hegeregere, iseda magasin lalodiai mauri sivaraidia ese momo idia durua. Asia dekenai bipolar gorerena ia abia taihu ta be iseda magasin ta ai mauri sivaraina ta ia duahia, bona unai ese ia hagoadaia bada. Unai be guna misinari gaukara ia karaia tadikaka ta ena sivarai. Ia danu be bipolar gorerena ia abia, to ena hesiai gaukara ia rakatania lasi. Unai sivarai ia duahia murinai, taihu ia gwau: “Unai ese lau ia durua egu gorere lau lalopararalaia, bona lau dekenai helaro ia henia.”

18. Dahaka dainai hanaihanai ita guriguri be namo?

 ¹⁸ Iehova ese guriguri karana amo ita ia durua danu. Herevana dahaka hekwakwanai ita davaria, to guriguri karana ese ita ia hagoadaia diba. Aposetolo Paulo ese ia hahedinaraia guriguri karana be mai anina bada. Ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7) Hekwakwanai negadiai ita haheauka totona, nega ibounai ita guriguri, a? Britain ai, tadikaka ta ladana Alex be nega daudau lalonai lalometau gorerena ia abia. To ia gwau: “Guriguri amo Iehova lau hereva henia bona Baibel amo iena hereva lau duahia karana ese lau ia hagoadaia bada.”

19. Dahaka dainai Keristani heboudia ita lao henia be mai anina bada?

¹⁹ Dala ma ta be, Iehova ese Keristani heboudia amo ita ia durua. Salamo torea tauna ta ia gwau, ia ura bada Iehova ena dubu dekenai do ia noho. (Sal. 84:2) Ita danu be unai bamona ita laloa, a? Lani, matamanai ita herevalaia taihu, ia gwau: “Lau dekenai hebou ibounai do lau lao be mai anina bada. Lau diba bema lau ura Iehova ena heduru lau abia, hebou dekenai lau lao be namo.”

20. Edena dala ai haroro gaukara ese ita ia durua diba?

²⁰ Ita haheauka totona, haroro gaukara goadalaia karana ese ita ia durua diba. (1 Tim. 4:16) Australia ai hekwakwanai momo ia davaria taihu ta ia gwau: “Lau ura lasi haroro gaukara do lau karaia, to elda ta ese lau ia noia haroro gaukara ai ia lau bamoa totona. Nega ta ta haroro gaukara lau karaia neganai lau moale, badina lau mamia Iehova be lau ia durua.” (Aon. 16:20) Momo idia davaria idia ese ma haida idia durua Iehova idia abidadama henia neganai, idia sibona edia abidadama idia hagoadaia danu. Unai ese idia ia durua edia hekwakwanai idia laloaboio, bona “mai anina bada gaudia” idia laloa totona.​—Fili. 1:10, 11.

21. Hekwakwanai ita davaria neganai, dahaka ita laloatao be namo?

²¹ Iehova ese ita dekenai heduru daladia momo ia henia eda hekwakwanai ita haheaukalaidia totona. Bema iena heduru ita abia dae, ena be hekwakwanai idia vara, to do ita moale noho. Danu, Dirava ena hesiai taudia edia haheitalai namodia ita laloa dobu bona tohotohoa neganai, haheauka karana do ita dibaia. Ena be inai tanobada ena dokona ia kahirakahira dainai hekwakwanai momo do ita davaria, to namona be Paulo ena lalohadai ita abia, ia gwau: “Hisihisi idauidau ese ai idia hametaua, to ai idia hadikaia ore lasi. . . . Unai dainai ai hesiku lasi.” (2 Kor. 4:9, 16.) Momokani, Iehova amo goada ita abia eda hekwakwanai ita haheaukalaidia totona.​—2 Korinto 4:17, 18 duahia.