Kũhiũrania na Mathĩna ma Rĩu Tũrĩ na Ũcamba
Kũhiũrania na Mathĩna ma Rĩu Tũrĩ na Ũcamba
‘Ngai nĩwe mũrahĩro witũ, ningĩ hinya ũrĩa twangagĩra; akoragwo e na ũteithio mũno, hingo ya mĩnyamaro.’—THAB. 46:1.
1, 2. Nĩ mathĩna marĩkũ andũ aingĩ macemanĩtie namo, no arĩa matungatagĩra Ngai meriragĩria ũndũ ũrĩkũ?
TŨRATŨŨRA matukũ ma mathĩna. Thĩ ĩkoretwo ĩkĩgũmĩrũo nĩ icanjama. Ithingithia, mĩtuthũko ya irĩma, tsunami, mĩaki, mĩiyũro, na ihuhũkanio nĩ ithĩnĩtie andũ mũno. Hamwe na ũguo, mathĩna ma famĩlĩ na ma mũndũ kĩũmbe nĩ marehete guoya na kĩeha. Nĩ ma biũ atĩ “ihinda na ũndũ ũterĩgĩrĩirũo” ikinyagĩrĩra andũ othe.—Koh. 9:11, NW.
2 Andũ a Ngai nĩ makoretwo makĩhota gwĩtiria maũndũ ta macio maritũ. O na kũrĩ ũguo, no twende gũkorũo twĩhaarĩirie kũhiũrania na thĩna o wothe tũngĩcemania naguo ihinda rĩrĩa rĩũkĩte o ũrĩa mũthia wa mũtabarĩre ũyũ ũrakuhĩrĩria. Tũngĩhiũrania atĩa na mathĩna macio tũtegũtoorio? Nĩ kĩĩ gĩgũtũteithia kũhiũrania na mathĩna ma rĩu tũrĩ na ũcamba?
WĨRUTE KUUMANA NA ARĨA MOONANIRIE ŨCAMBA
3. Kũringana na Aroma 15:4, nĩ kĩĩ kĩngĩtũmĩrĩria rĩrĩa tũrahiũrania na maũndũ maritũ?
3 O na gũtuĩka rĩu moritũ nĩ maragũmĩra andũ aingĩ gũkĩra hĩndĩ ĩngĩ o yothe, mathĩna ti hĩndĩ marambĩrĩria. Rekei tuone ũndũ ũrĩa tũngĩĩruta kuumana na ndungata imwe cia tene cia Ngai iria ciahotire kũhiũrania na ũtũũro irĩ na ũcamba.—Rom. 15:4.
4. Nĩ moritũ marĩkũ Daudi aakirĩrĩirie, na nĩ kĩĩ kĩamũteithirie?
4 Ta wĩcirie ũhoro wa Daudi. Mamwe ma maũndũ marĩa aahiũranirie namo nĩ, marakara ma mũthamaki, gũtharĩkĩrũo nĩ thũ, atumia ake gũtahwo, gũkunyanĩrũo nĩ andũ a famĩlĩ yake na arata, na kũigua akuĩte ngoro. (1 Sam. 18:8, 9; 30:1-5; 2 Sam. 17:1-3; 24:15, 17; Thab. 38:4-8) Ũhoro ũrĩa Bibilia ĩheanĩte wĩgiĩ ũtũũro wa Daudi nĩ wonanagia wega ruo rũrĩa moritũ macio maamũreheire. O na kũrĩ ũguo, matianiinire wĩtĩkio wake hinya. Aiyũrĩtwo nĩ wĩtĩkio, oigire ũũ: ‘Jehova nĩwe ũtheri wakwa, o gwata ũhonokio wakwa; ingĩgĩĩtigĩra ũ?’—Thab. 27:1; thoma Thaburi 27:5, 10.
5. Nĩ kĩĩ gĩateithirie Iburahimu na Sara kũhiũrania na ũtũũro mũritũ?
5 Matukũ marĩa maingĩ ma ũtũũro wao, Iburahimu na Sara maatũũrire hema-inĩ marĩ ageni kũndũ matooĩ. Ũtũũro ndwakoragwo wĩ mũhũthũ hĩndĩ ciothe. Ĩndĩ, nĩ meyũmĩrĩirie makĩhiũrania na maũndũ ta ng’aragu na mogwati kuuma kwĩ ndũrĩrĩ iria ciamathiũrũrũkĩirie. (Kĩam. 12:10; 14:14-16) Maahotire gwĩka ũguo atĩa? Kiugo kĩa Ngai gĩtwĩraga atĩ Iburahimu “nĩaatanyĩte kuona itũũra rĩrĩa rĩakĩtwo gĩtina kĩrũmu, o rĩo mwaki warĩo na mũthondeki nĩ Ngai.” (Ahib. 11:8-10) Iburahimu na Sara maikarire macũthĩrĩirie maũndũ marĩa maarĩ mbere, mategũtoorio nĩ maũndũ marĩa maacemanagia namo.
6. Tũngĩĩgerekania na Ayubu atĩa?
6 Ayubu nĩ aacemanirie na mathĩna maritũ mũno. Ta wĩcirie ũrĩa aiguire rĩrĩa maũndũ mothe ũtũũro-inĩ wake moonekire ta maharagana. (Ayub. 3:3, 11) Gũthũkia mũno, ndaamenyaga wega kĩrĩa gĩatũmaga maũndũ macio mothe mamũkore. Ĩndĩ, ndaigana gũkua ngoro. Nĩ aatũũririe wĩkindĩru na wĩtĩkio wake harĩ Ngai. (Thoma Ayubu 27:5.) Githĩ kĩu ti kĩonereria kĩega gĩa kwĩgerekania nakĩo!
7. Paulo aacemanirie na maũndũ marĩkũ agĩtungatĩra Ngai, no nĩ kũmenya ũndũ ũrĩkũ kwamũheaga ũcamba?
7 Ningĩ, ta wĩcirie kĩonereria kĩa mũtũmwo Paulo. Nĩ aacemanirie na “ũgwati matũũra-inĩ, o na werũ-inĩ, o na iria-inĩ.” Nĩ arĩtie ũhoro wa ‘kũhũta na kũnyota, kũigua heho na gũikara njaga.’ Ningĩ Paulo nĩ oigĩte atĩ ‘kwĩ hĩndĩ aararire iria-inĩ, na akĩroka gũtinda kuo’ hihi nĩ ũndũ wa gũthũkĩrũo nĩ meri ĩrĩa aathiaga nayo. (2 Kor. 11:23-27) O na acemanĩtie na macio mothe, ta rora mwerekera ũrĩa onanirie hĩndĩ ĩmwe thutha wa kũng’ethanĩra na gĩkuũ nĩ ũndũ wa gũtungatĩra Ngai: “Nĩ getha tũtikae gũikara twĩhokete ũhoro witũ ithuene, tiga o tũikarage twĩhokete Ngai ũrĩa ũriũkagia arĩa akuũ: o we watũhonokirie kũrĩ ũhoro wa gĩkuũ mũnene ũũ, na nowe ũrĩtũhonokagia.” (2 Kor. 1:8-10) Ti andũ aingĩ marĩ macemania na maũndũ maingĩ maritũ ta Paulo. O na kũrĩ ũguo, aingĩ aitũ no tũmenye ũrĩa aaiguaga na tũũmĩrĩrio nĩ kĩonereria gĩake.
NDŨKAREKE MATHĨNA MATŨME ŨKUE NGORO
8. Mathĩna marĩa tũracemania namo mangĩtũhutia atĩa? Heana ngerekano.
8 Thĩinĩ wa thĩ ĩno ĩiyũrĩte mathĩna na hatĩka, andũ aingĩ nĩ maiguaga maritũhĩirũo. O na Akristiano amwe nĩ maiguaga ũguo. Lani, a ũrĩa warĩ ũtungata-inĩ wa mahinda mothe marĩ na mũthuriwe bũrũri-inĩ wa Australia, oigire atĩ rĩrĩa aathimirũo akĩrũo arĩ na kansa, ũndũ ũcio nĩ wamũniinire hinya mũno na ũkĩmũhũũra o ta rũheni. Oigire ũũ: “Ũrigitani ũcio nĩ watũmire ndware mũno, na ũkĩndiga ngĩĩigua itarĩ kĩene.” Makĩria ma ũndũ ũngĩ o wothe-rĩ, nĩ aabataraga kũrũmbũiya mũthuriwe ũrĩa wathĩnjĩtwo mũnyiginyigi. Tũngĩĩkora ũndũ-inĩ ta ũcio-rĩ, tũngĩka atĩa?
9, 10. (a) Nĩ ũndũ ũrĩkũ tũtagĩrĩirũo gwĩtĩkĩria Shaitani eke? (b) Tũngĩhiũrania atĩa na mathĩna marĩa magwetetwo thĩinĩ wa Atũmwo 14:22?
9 Nĩ tũbatiĩ kũririkana atĩ Shaitani endaga kũhũthĩra mathĩna marĩa tũcemanagia namo gũthũkia wĩtĩkio witũ. O na kũrĩ ũguo, tũtiagĩrĩirũo kũmwĩtĩkĩria aniine gĩkeno gitũ na njĩra ĩyo. Thimo 24:10 yugaga ũũ: “Ũngĩtuĩka wa kũũrũo nĩ hinya mũthenya wa mĩnyamaro-rĩ, hinya waku no mũnyinyi.” Gwĩcũrania cionereria cia Bibilia, ta icio ciarĩrĩirio hau igũrũ, nĩ gũgũtũteithia kũgĩa na ũcamba rĩrĩa twacemania na mathĩna.
10 Ningĩ nĩ wega kũririkana atĩ tũtingĩhota kweheria mathĩna mothe. Ma nĩ atĩ, nĩ twĩrĩgagĩrĩra gũcemania namo. (2 Tim. 3:12) Rĩandĩko rĩa Atũmwo 14:22 rĩtwĩraga ũũ: “Ũthamaki wa Ngai ndũngĩtonyeka nĩ ithuĩ tiga o twambire kuona mathĩna maingĩ.” Handũ ha gũkua ngoro-rĩ, ĩ ti kaba wonage magerio marĩ mweke wa kuonania ũcamba nĩ ũndũ wa gwĩtĩkia atĩ Ngai no ahote gũgũteithia?
11. Tũngĩĩthema atĩa gũtoorio nĩ mathĩna ma ũtũũro?
11 Tũbatiĩ kũiga meciria harĩ maũndũ marĩa mega. Kiugo kĩa Ngai gĩtwĩraga ũũ: ‘Ngoro ngenu ĩtũmaga gĩthiithi kĩa mwene gĩthere, ĩndĩ ngoro yatũũra na kĩeha nĩ ĩthuthaga mũndũ roho.’ (Thim. 15:13) Atuĩria a maũndũ ma ũrigitani nĩ monete atĩ gwĩciria maũndũ mega nĩ kũrĩ ũguni harĩ ũgima wa mwĩrĩ. Arũaru aingĩ arĩa maheagwo mbũrũgũtũ cia cukari (placebos) nĩ maiguaga wega nĩ ũndũ wa gwĩciria atĩ nĩ maathondekwo. No ũgima wa mwĩrĩ wa arũaru nĩ ũthũkaga nĩ ũndũ wa kwĩrũo atĩ ndawa iria maranyua nĩ ikũmathũkĩra. Gũikaraga tũgĩĩciragia ũhoro wa maũndũ tũtangĩhota gũcenjia no gũtũũragire ngoro. No wega nĩ atĩ, Jehova ndatũheaga “mbũrũgũtũ cia cukari.” Ithenya rĩa ũguo, o na hĩndĩ ya mathĩna, atũheaga ũteithio wa ma kũgerera Kiugo gĩake, ariũ a Ithe witũ, na hinya ũrĩa umanaga na roho mũtheru. Gwĩciragia ũhoro wa maũndũ macio nĩ kũrĩtwĩkagĩra hinya. Handũ ha gũtindĩrĩra maũndũ moru-rĩ, ĩkaga ũndũ ũrĩa ũngĩgũteithia kũhiũrania na thĩna o wothe na ũigage meciria harĩ maũndũ marĩa mega ũtũũro-inĩ waku.—Thim. 17:22.
12, 13. (a) Nĩ kĩĩ gĩteithĩtie ndungata cia Ngai gũkirĩrĩria moritũ marĩa moimanaga na icanjama? Heana ngerekano. (b) Hĩndĩ ya icanjama-rĩ, kũmenyekaga atĩa kĩrĩa mũndũ onaga kĩrĩ kĩa bata makĩria ũtũũro-inĩ wake?
12 Mahinda-inĩ ma ica ikuhĩ, mabũrũri mamwe nĩ magũmĩirũo nĩ icanjama nene. No ariũ a Ithe witũ a mabũrũri macio nĩ monanĩtie ũkirĩrĩria mũnene. Ũguo ti kuuga atĩ ũkoretwo ũrĩ ũndũ mũhũthũ. Februarĩ mwaka wa 2010, gĩthingithia kĩnene na tsunami nĩ ciathũkangirie mĩciĩ na indo nyingĩ cia ariũ a Ithe witũ bũrũri-inĩ wa Chile, na amwe makĩũrũo nĩ mawĩra mao. O na kũhaana ũguo, ariũ a Ithe witũ matiacokire na thutha kĩĩroho. Samueli, ũrĩa mũciĩ wake wathũkirio biũ, oigire ũũ: “O na hĩndĩ ĩyo maũndũ maarĩ moru mũno, niĩ na mũtumia wakwa tũtiigana gũtiga gũthiĩ mĩcemanio na kũhunjia. Ndĩna ma atĩ maũndũ macio nĩ maatũteithirie kwaga gũkua ngoro.” Marĩ hamwe na angĩ aingĩ, nĩ maaregire gũtindanĩra na mathĩna macio na magĩthiĩ na mbere gũtungatĩra Jehova.
13 Mweri-inĩ wa Septemba 2009, makĩria ma gĩcunjĩ kĩa 80 harĩ 100 gĩa taũni ya Manila, bũrũri-inĩ wa Filipino, nĩ kĩagũmĩirũo nĩ mbura nene. Mũthuri ũmwe mũtongu worirũo nĩ indo nyingĩ oigire atĩ, “Kĩguũ kĩu kĩaigananirie andũ othe, gĩkĩrehe mathĩna na mĩnyamaro harĩ itonga o hamwe na athĩni.” Ũndũ ũcio ũratũririkania ũtaaro ũyũ wa ũũgĩ Jesu aaheanire: “Mwĩigagĩrei ũtonga Igũrũ, kũrĩa indo itarĩagwo nĩ memenyi, na itarotaga, na kũrĩa gũtarĩ aici matũrĩkagia makaiya.” (Mat. 6:20) Kũiga mwĩhoko harĩ indo cia kĩĩmwĩrĩ, iria itamenyagĩrũo, kaingĩ nĩ kũũragaga mũndũ ngoro. Githĩ ti ũndũ wa ũũgĩ makĩria gũcaria ũkuruhanu mwega na Jehova, ũrĩa ũngĩĩtiria o na twacemania na maũndũ marĩkũ!—Thoma Ahibirania 13:5, 6.
ITŨMI CIA KUONANIA ŨCAMBA
14. Tũrĩ na itũmi irĩkũ cia kuonania ũcamba?
14 Jesu nĩ onanirie atĩ nĩ kũngĩgaakorũo na mathĩna hĩndĩ ĩrĩa angĩgoka, no akiuga ũũ: “Mũtikanetigĩre.” (Luk. 21:9) Jesu arĩ Mũthamaki witũ nake Mũũmbi wa igũrũ na thĩ agĩtũnyitaga mbaru, tũrĩ na itũmi nyingĩ cia kũũmĩrĩria. Paulo eekĩrire Timotheo ngoro na ciugo ici: “Ngai ndaigana gũtũhe roho wa gũtũma tũiguage guoya, no makĩria nĩ wa gũtwĩkĩra hinya na wendani na ũũgĩ wa ngoro.”—2 Tim. 1:7.
15. Heana ngerekano cia ũrĩa ndungata cia Ngai cionanirie nĩ imwĩhokete, na ũtaarĩrie ũrĩa tũngĩgĩa na ũcamba ta ũcio.
15 Ta rora ciugo imwe cia ũũmĩrĩru ciaaririo nĩ ndungata cia Ngai. Daudi oigire ũũ: “Jehova-rĩ, nĩwe hinya wakwa na nowe ngo yakwa; ngoro yakwa nĩwe ĩĩhokete, na ndĩ mũteithĩku: tondũ ũcio ngoro yakwa ĩgagĩkengeũka mũno.” (Thab. 28:7) Paulo nake onanirie ũũmĩrĩru wake mũrũmu, akiuga ũũ: ‘Maũndũ-inĩ macio mothe, gũtooria-rĩ, tũrĩ atooria o makĩria nĩ ũndũ wa ũcio watwendire.’ (Rom. 8:37) No taguo, rĩrĩa ũgwati wakuhĩrĩirie, Jesu ndaigana gũtiga athikĩrĩria ake na nganja atĩ aarĩ na ũkuruhanu mwega na Ngai rĩrĩa oigire ũũ: “Ndirĩ nyiki, nĩ gũkorũo twĩ na Ithe witũ.” (Joh. 16:32) Nĩ ũndũ ũrĩkũ wĩyumĩrĩtie wega ciugo-inĩ icio? Ciothe ironania wĩtĩkio mũrũmu harĩ Jehova. O na ithuĩ tũngĩĩhoka Ngai ũguo no tũgĩe na ũcamba wa kũhiũrania na mathĩna o mothe ma rĩu.—Thoma Thaburi 46:1-3.
GUNĨKA NĨ ŨTEITHIO ŨRĨA NGAI ATŨHEAGA
16. Kwĩruta Kiugo kĩa Ngai nĩ kwa bata harĩ ithuĩ nĩkĩ?
16 Ũcamba wa Gĩkristiano ti mũndũ kwĩĩhoka. Ithenya rĩa ũguo, umanaga na kũmenya Ngai na kũmwĩhoka. No twĩke ũguo na njĩra ya kwĩruta Kiugo gĩake, Bibilia. Mwarĩ ũmwe wa Ithe witũ ũkoragwo na mũrimũ wa gũthuthĩka ngoro ataarĩirie ũũ kĩrĩa kĩmũteithagia, “Thomaga icunjĩ iria ingĩnyũmĩrĩria na ngacicokera maita maingĩ.” Hihi nĩ tũhũthagĩra ũtaaro ũrĩa tũheetwo wa gũkoragwo na ihinda rĩa ũthathaiya wa famĩlĩ tũtegũtĩĩrĩria? Gwĩka maũndũ macio nĩ gũgũtũteithia kũgĩa na mwerekera ta wa mwandĩki wa Thaburi ũrĩa woigire ũũ: “Kĩrĩra gĩaku-rĩ, kaĩ nĩndĩkĩendete-ĩ! ndindaga ngĩtarania ũhoro wakĩo mũthenya wothe.”—Thab. 119:97.
17. (a) Nĩ ũteithio ũrĩkũ ũngĩtũhotithia gũtũũria ũcamba? (b) Heana ngerekano ĩgiĩ ũrĩa rũgano rwa ũtũũro mabuku-inĩ maitũ rwagũteithirie.
17 Ningĩ-rĩ, tũrĩ na mabuku mehocetie harĩ Bibilia marĩa marĩ na ũhoro ũngĩkĩra hinya mwĩhoko witũ harĩ Jehova. Ariũ aingĩ a Ithe witũ nĩ monete ng’ano cia ũtũũro ngathĩti-inĩ citũ irĩ na ũteithio mũnene. Mwarĩ ũmwe wa Ithe witũ wa Asia ũrĩa ũkoragwo na mũrimũ wa gũikara akĩnyitagwo nĩ marakara (bipolar mood disorder), nĩ aakenire mũno rĩrĩa aathomire rũgano rwa ũtũũro rwa mũrũ ũmwe wa Ithe witũ warĩ mũmishonarĩ, wahotire kũhiũrania na mũrimũ ũcio. Aandĩkire akiuga, “Rũgano rũu nĩ rwandeithirie gũtaũkĩrũo nĩ thĩna wakwa na rũkĩhe kĩĩrĩgĩrĩro.”
18. Nĩkĩ nĩ twagĩrĩirũo nĩ kũhũthĩra ũteithio wa mahoya?
18 Mahoya no matũteithie maũndũ-inĩ mothe. Mũtũmwo Paulo nĩ onanirie bata wa ũteithio ũcio, akiuga: “Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu nakuo thĩinĩ wa Kristo Jesu.” (Afil. 4:6, 7) Hihi nĩ tũhũthagĩra biũ ũteithio ũcio nĩguo tũgĩe na hinya hĩndĩ ya mathĩna? Alex, mũrũ wa Ithe witũ kuuma Ngeretha ũrĩa ũkoretwo na mũrimũ wa gũthuthĩka ngoro, oigire ũũ: “Kwaria na Jehova kũgerera mahoya na kũmũthikĩrĩria na njĩra ya gũthoma Kiugo gĩake nĩguo ũndũ ũrĩa ũndeithagia.”
19. Twagĩrĩirũo gũkorũo na mawoni marĩkũ megiĩ gũthiĩ mĩcemanio ya Gĩkristiano?
19 Kũnyitanĩra na ariũ a Ithe witũ mĩcemanio-inĩ nĩ ũteithio ũngĩ. Mwandĩki wa Thaburi aandĩkire ũũ: “Roho wakwa wĩ na mĩĩto mũno, ĩĩ-ni, o na ũkorũo nĩ hinya, nĩ kwĩrirĩria nja cia Jehova.” (Thab. 84:2) Hihi nĩ tũiguaga take? Lani, ũrĩa ũgwetetwo hau mbere, nĩ ataarĩirie ũrĩa onaga ngwatanĩro ya Gĩkristiano: “Gũthiĩ mĩcemanio kwarĩ o mũhaka. Nĩ ndaamenyaga atĩ no nginya ngorũo kuo angĩkorũo nĩ nderĩgagĩrĩra Jehova andeithie gũtooria.”
20. Gũkorũo na itemi wĩra-inĩ wa kũhunjia gũtũteithagia atĩa?
20 Ningĩ nĩ tũgĩaga na ũcamba twerutanĩria wĩra-inĩ wa kũhunjia Ũthamaki. (1 Tim. 4:16) Mwarĩ ũmwe wa Ithe witũ wa Australia ũcemanĩtie na mathĩna maingĩ oigire ũũ: “Kũhunjia nĩguo ũndũ ũrĩa itangĩendire kũigua atĩ no njĩke, no mũthuri ũmwe wa kĩũngano akĩnjĩra tũkahunjie nake. Na tũgĩthiĩ. No mũhaka Jehova akorũo nĩ aandeithagia, amu rĩrĩa rĩothe ndathiĩ kũhunjia, ndaiguaga ngenete mũno.” (Thim. 16:20) Andũ aingĩ nĩ meyoneire atĩ rĩrĩa marateithia angĩ kũgĩa na wĩtĩkio harĩ Jehova, nĩ mekagĩra hinya wĩtĩkio wao ene. Na njĩra ĩyo, nĩ meheragia meciria harĩ mathĩna mao na magathingata maũndũ marĩa ma bata makĩria.—Afil. 1:10, 11.
21. Tũrĩ na ũũma ũrĩkũ ũhoro-inĩ wĩgiĩ moritũ marĩa tũracemania namo?
21 Jehova nĩ atũheete ũteithio mũingĩ wa gũtũhotithia kũhiũrania na mathĩna tũrĩ na ũcamba. Tũngĩhũthĩra biũ ũteithio ũcio wothe tũheetwo, na twĩcũranagie na tũkegerekania na cionereria cia ndungata cia Ngai iria ciarĩ na ũcamba, nĩ tũrĩkoragwo na ma atĩ no tũhote kũhiũrania na mathĩna. O na gũtuĩka maũndũ maingĩ moru no mekĩke o ũrĩa mũthia wa mũtabarĩre ũyũ ũrakuhĩrĩria, no tũigue o ta Paulo ũrĩa woigire ũũ: “Kũrũndwo nĩtũrũndagwo na tũtininwo biũ. . . . Tũtirĩ hingo tũũragwo nĩ hinya ngoro.” (2 Kor. 4:9, 16) Nĩ ũndũ wa ũteithio wa Jehova, no tũhote kũhiũrania na mathĩna ma rĩu tũrĩ na ũcamba.—Thoma 2 Akorintho 4:17, 18.
[Kohoro ka magũrũ-inĩ]
a Marĩĩtwa mamwe nĩ macenjetio.
HIHI NO ŨHOTE GŨCOKIA?
Tũngĩĩthema atĩa gũtoorio nĩ maũndũ maritũ?
Tũrĩ na itũmi irĩkũ cia kuonania ũcamba?
Nĩ ũteithio ũrĩkũ Jehova atũheete nĩguo tũhote kũhiũrania na mathĩna?
[Ciũria cia wĩruti]
[Mbica karatathi ka 10]
Rĩrĩa wacemania na moritũ, hũthagĩra ũteithio ũrĩa Jehova atũheete
[Mbica karatathi ka 11]
Ona mahinda marĩa ũgũmĩirũo nĩ mathĩna marĩ mĩeke ya kuonania wĩtĩkio thĩinĩ wa ũhoti wa Ngai wa gũgũteithia
