1, 2. Sortu problema miti furu sma? San den futuboi fu Gado wani?

WI E libi na ini muilek ten. Doronomo rampu de na grontapu. Furu libisma e pina fu di den kisi fu du nanga rampu soleki gronseki, tsunami, busi di e bron, frudu, bergi di e spiti faya, bigi draiwinti nanga hebi alen. Boiti dati, furu sma e sari èn den frede fu di den abi den eigi problema noso problema na ini na osofamiri. Bijbel e sori krin taki „ogri ten nanga sani di den no e fruwakti kan miti den alamala”.​—Preik. 9:11.

² A pipel fu Gado tan dini en nanga prisiri awinsi den de na ini muilek situwâsi. O moro a kaba e kon krosibei, o moro muilek a libi o kon de. Sobun, ibriwan fu wi wani de srekasreka gi iniwan problema di kan miti wi. Fa wi kan tan dini Gado nanga prisiri te ogri miti wi? San o yepi wi fu no frede te wi kisi problema?

3. Te wi e luku Romesma 15:4, dan fa wi kan kisi trowstu te wi abi seryusu problema?

³ A tru taki na ini a ten disi a libi moro muilek, ma ala ten problema ben de kaba. Meki wi luku san wi kan leri fu sonwan fu den futuboi fu Gado na ini owruten di no ben frede di den ben de na ini problema.​—Rom. 15:4.

4. Sortu problema miti David èn san yepi en?

⁴ Meki wi luku son problema di miti David. Kownu Saul ben wani kiri en. Feanti ben kon feti nanga en èn wan leisi den teki den wefi fu en srefi. Son sma na ini a legre fu en èn son famiriman nanga mati fu en bedrigi en. Son leisi, a ben firi brokosaka srefisrefi (1 Sam. 18:8, 9; 30:1-5; 2 Sam. 17:1-3; 24:15, 17; Ps. 38:4-8). Bijbel e sori fa David ben e pina fu den problema disi ede.  Ma den sani disi no meki taki en bribi na ini Yehovah kon swaki. Nanga wan tranga bribi a taki: „Yehovah na a leti fu mi èn na en e frulusu mi. Sobun, suma kan meki mi frede?”​—Ps. 27:1; leisi Psalm 27:5, 10.

5. San yepi Abraham nanga Sara fu no lasi-ati aladi den ben abi problema?

⁵ Abraham nanga Sara ben e libi na ini tenti pikinmoro den heri libi langa. Boiti dati, den no ben e libi na ini den eigi kondre èn a no ala ten sani ben e go bun nanga den. Fu eksempre, den kisi fu du nanga angriten èn den pipel na den lontu ben e tyari furu problema kon gi den. Ma toku den no ben frede èn den horidoro (Gen. 12:10; 14:14-16). Fa den ben man du dati? Gado Wortu e taigi wi taki Abraham „ben fruwakti a foto di abi trutru fondamenti. A sma di prakseri fa fu meki a foto dati èn di bow en, na Gado” (Hebr. 11:8-10). Abraham nanga Sara ben e poti prakseri na den sani di Gado pramisi den. Den no gi pasi taki problema meki den lasi-ati.

6. Fa wi kan teki na eksempre fu Yob?

⁶ Yob ben de wan man di pina srefisrefi. Prakseri fa a ben e firi di noti no ben e go bun na ini en libi (Yob 3:3, 11). San ben moro ogri, na taki a no ben e frustan fu san ede den sani dati ben e miti en. Toku a no lasi-ati noiti. A tan dini Gado èn a no lasi bribi. (Leisi Yob 27:5.) A no de fu taki dati Yob na wan moi eksempre gi wi!

7. San Paulus ondrofeni na ini en diniwroko gi Gado? San gi en deki-ati fu go doro?

⁷ Poti prakseri tu na a eksempre fu na apostel Paulus. A taki dati ’sma ben wani du en ogri na ini a foto, ogri ben kan miti en na ini a sabana èn na se’. A taki tu dati ’angri nanga watra ben e kiri en, a ben e kowru èn a no ben abi krosi fu tapu en skin’. Paulus taki tu dati wan tu leisi ’a sipi pe a ben de na ini sungu èn a pasa wan heri dei nanga neti na ini a se’ (2 Kor. 11:23-27). Srefi di a ben kan lasi en libi, a no lasi-ati. A taki wan leisi: „Disi pasa, so taki wi no ben o frutrow na tapu wisrefi, ma na tapu a Gado di e gi dede sma wan opobaka. A frulusu wi fu dede srefi èn wi de seiker taki a o frulusu wi baka” (2 Kor. 1:8-10). Furu sma no de di ondrofeni ala den sani disi di miti Paulus. Ma furu fu wi firi a srefi leki en son leisi. Sobun, te wi e prakseri a deki-ati di a sori, dan dati kan gi wi trowstu.

8. Fa den problema fu a ten disi kan meki wi firi? Fruteri wan ondrofenitori.

⁸ Na ini a grontapu disi, furu rampu e pasa èn sma abi furu problema nanga broko-ede. Dati meki furu sma feni taki a libi hebi tumusi gi den. Srefi sonwan fu den futuboi fu Gado ben e firi so. Lani * nanga en masra ben e pionier na ini Australia èn den ben e prisiri nanga a wroko disi. Ne wan dei datra taigi en taki a abi kanker na en bobi. A skreki srefisrefi di a yere disi. Lani taki dati a datrayepi di a ben e kisi ben meki a firi siki, èn a ben e firi tu taki a no ben warti noti. Na a srefi ten dati, a ben musu sorgu en masra di ben du wan oparâsi na en baka. San wi kan du efu wi de na ini so wan muilek situwâsi?

9, 10. (a) San wi no musu meki Satan du? (b) Tori 14:22 e taki dati wi musu pasa „furu banawtu”. San kan yepi wi fu horidoro?

⁹ Te ogri e miti wi, wi musu hori na prakseri taki Satan kan gebroiki den sani disi fu swaki wi bribi èn fu puru wi prisiri. Ma wi no musu gi en pasi fu du dati. Odo 24:10 e taki: „Yu e firi brokosaka te nowtu miti yu? Efu dati de so, dan yu no o abi furu krakti.” Wi musu denki dipi fu den eksempre na ini Bijbel, soleki den wan di wi taki fu den kaba. Te wi e du dati, dan dati o yepi wi fu no frede te wi e kisi problema.

 ¹⁰ A bun fu hori na prakseri tu taki wi no man wai pasi gi problema. Fu taki en leti, wi kan fruwakti taki wi o kisi problema (2 Tim. 3:12). Tori 14:22 e taki: „Wi musu pasa furu banawtu fu man go na ini a Kownukondre fu Gado.” Sobun, na presi fu lasi-ati te yu abi problema, yu musu si den problema leki okasi fu sori taki yu e bribi taki Gado o yepi yu.

11. San wi musu du efu wi no wani lasi-ati te problema miti wi?

¹¹ Sosrefi, wi musu tan prakseri den bun sani fu a libi. Gado Wortu e taki: „Wan ati di e prisiri e meki a fesi brenki, ma wan ati di e sari e meki wan sma firi brokosaka” (Odo 15:13). Datra sabi taki wan fu den sani di kan yepi wan siki sma fu kon betre, na te a e bribi taki a e kon betre. Son leisi den datra e gi wan siki sma wan perki fu swari, aladi a no de wan trutru dresi. Efu a siki sma e bribi taki a perki o dresi en, dan a e firi moro bun. Ma efu a siki sma e bribi taki den perki e meki en kon moro siki, dan na so a o firi tu. Na eksempre disi e sori taki te wi e prakseri soso den problema na ini wi libi di wi no man kenki, dan dati o meki wi lasi-ati. Wi de nanga tangi taki Yehovah e gi wi trutru yepi. Srefi te rampu miti wi, a o gi wi deki-ati nanga yepi fu en Wortu, den brada nanga sisa di e horibaka gi wi, èn en santa yeye di e gi wi krakti. Na den sani disi wi musu prakseri doronomo fu di dati o meki wi firi moro prisiri. Na presi fu prakseri soso den problema di yu abi, du muiti fu horidoro te yu abi problema èn pruberi fu prakseri den bun sani di yu abi na ini yu libi.​—Odo 17:22.

12, 13. (a) San yepi futuboi fu Gado fu horidoro di rampu miti den? Fruteri wan ondrofenitori. (b) Fa rampu kan meki wi si san na a moro prenspari sani na ini wi libi?

¹² No so langa pasa, wan tu kondre kisi fu du nanga bigi rampu. Son brada nanga sisa ben de na ini den rampu disi èn a no ben makriki gi den. Ma wi kan leri fu a fasi fa den horidoro. Na a bigin fu 2010 wan bigi gronseki nanga tsunami ben de na Chili. Furu brada nanga sisa fu wi lasi den oso nanga den gudu fu den, èn sonwan fu den lasi den wroko srefi. Ma srefi na ini a situwâsi dati, den tan dini Yehovah fayafaya. Samuel di lasi en oso, taki: „Aladi sani ben muilek srefisrefi, toku mi nanga mi wefi no tapu fu go na den konmakandra èn fu preiki. Mi e bribi taki na disi yepi wi fu no bruya.” A trowpaar disi nanga furu tra brada nanga sisa no gi pasi taki a rampu meki den lasi-ati. Na presi fu dati, den tan dini Yehovah fayafaya.

¹³ Na ini september 2009 bigi alen fadon na den Filippijnen. A moro bigi pisi fu a foto Manila ben sungu. Wan gudu man di lasi furu sani taki dati a frudu pori sma libi trutru. A taki: „Ala sma, a no abi trobi efu den gudu noso pôti, de na nowtu èn den e pina fu a sani disi ede.” Disi e meki wi prakseri a koni rai di Yesus gi wi. A taki: „Kibri yu gudu na ini hemel pe woron nanga frustu no man pori en èn pe fufuruman no man go fufuru en” (Mat. 6:20). Moni nanga gudu kan lasi gowe makriki. Sma di e si den sani disi leki den moro prenspari sani na ini den libi, e lasi-ati nofo tron te den no abi den moro. Dati meki a moro bun fu poti Yehovah na a fosi presi na ini wi libi. Awinsi san e pasa, wi kan tan mati fu Yehovah ala ten.​—Leisi Hebrewsma 13:5, 6.

14. Fu san ede wi no abi fu frede?

¹⁴ Yesus taigi den disipel fu en taki problema ben o de na grontapu te a ben o kon baka. Ma a taki tu: „No skreki” (Luk. 21:9). Wi no abi fu frede nowan sani fu di wi abi Yesus leki Kownu èn fu di a Mekiman fu hemel nanga grontapu e horibaka  gi wi. Paulus gi Timoteyus a deki-ati disi: „A santa yeye di Gado gi wi no meki wi tron fredeman, ma a e gi wi krakti, a e meki wi sori lobi èn a e meki wi de nanga krin frustan.”​—2 Tim. 1:7.

15. San son futuboi fu Gado taki fu a frutrow di den abi na ini Gado? San wi kan leri fu den?

¹⁵ Luku san son futuboi fu Gado na ini Bijbel ten taki fu a frutrow di den abi na ini Gado. David ben taki: „Na Yehovah e gi mi krakti. A de wan skelt gi mi. Na tapu en mi e frutrow nanga mi heri ati èn mi ati e firi prisiri, fu di a yepi mi” (Ps. 28:7). Paulus taki: „Awansi ala den sani disi e pasa nanga wi, toku wi o wini krinkrin nanga yepi fu a sma di lobi wi” (Rom. 8:37). Di Yesus ben sabi taki heri esi sma ben o grabu en èn kiri en, a taki wan sani di sori krin taki a ben abi wan bun matifasi nanga Gado. A taigi den apostel fu en: „Mi no de mi wawan, fu di a Tata de nanga mi” (Yoh. 16:32). San wi kan leri fu den sani di den futuboi disi taki? Ibriwan fu den sori taki den ben e frutrow dorodoro tapu Yehovah. Te wi e leri fu frutrow tapu Gado na a srefi fasi, dan wi no o frede, ma wi o horidoro awansi sortu problema miti wi.​—Leisi Psalm 46:1-3.

16. Fu san ede a prenspari taki wi e studeri Gado Wortu?

¹⁶ A deki-ati di wan Kresten abi, no e kon fu en srefi, ma a e kon fu di a e frutrow tapu Gado. Wi kan kisi a deki-ati disi te wi e studeri Bijbel doronomo. Na so wi o leri sabi Gado èn wi o leri fu frutrow na en tapu. Wan sisa di e firi brokosaka doronomo taki dati ibri tron baka a e leisi son Bijbeltekst di e gi en trowstu èn disi e meki a firi moro bun. A de so taki wi e hori na Osofamiri Anbegi ibri wiki, soleki fa wi kisi a rai fu du? Te wi e studeri Gado Wortu, dan wi kan kisi a srefi denki leki a psalm skrifiman di taki: „Mi lobi a wèt fu yu srefisrefi. Heri dei mi e poti prakseri na en.”​—Ps. 119:97.

17. (a) San na wan tra sani di Yehovah e gebroiki fu gi wi deki-ati? (b) Fa wan ondrofenitori na ini den buku fu wi yepi yu?

¹⁷ Wan tra sani di Yehovah e gebroiki fu gi wi deki-ati, na den buku fu na organisâsi fu wi. Den buku disi e leri wi sani fu Gado Wortu èn den e yepi wi fu frutrow moro na en tapu. Fu eksempre, na ini den tijdschrift di wi e kisi, ondrofenitori de di yepi furu brada nanga sisa. Wan sisa na ini Asia di abi wan siki di e meki a firi brokosaka doronomo, kisi deki-ati fu wan ondrofenitori di a ben leisi. A ben de wan ondrofenitori fu wan brada di ben de wan zendeling èn di ben abi a srefi siki. Toku a brada ben e dini Gado nanga en heri ati. A sisa skrifi: „Na ondrofenitori yepi mi fu frustan a siki fu mi moro bun èn fu no lasi howpu.”

18. Fu san ede wi musu begi so furu leki wi man?

 ¹⁸ Begi kan yepi wi tu awinsi na ini sortu situwâsi wi de. Na apostel Paulus ben sori krin o prenspari begi de, di a taki: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Fil. 4:6, 7). Te wi de na ini muilek situwâsi, wi e begi so furu leki wi man? Alex na wan brada fu Ingrisikondre di e firi brokosaka doronomo, èn a abi a problema disi wan langa ten kaba. A taki: „Te mi e begi, mi e taki nanga Yehovah èn te mi e leisi Bijbel, a de leki mi e arki en. Den tu sani disi yepi mi trutru na ini a libi.”

19. O prenspari a de fu go na den gemeente konmakandra?

¹⁹ Den gemeente konmakandra na wan tra prenspari sani di Yehovah e gebroiki fu gi wi deki-ati. Wan psalm skrifiman taki dati a ben angri trutru fu de na ini a tempel fu Yehovah (Ps. 84:2). Na so wi e firi tu? Lani, di wi ben kari na ini paragraaf 8, taki dati a prenspari srefisrefi gi en fu go na ala den konmakandra èn fu de nanga den brada nanga sisa. A taki: „Mi sabi taki mi musu fu de drape efu mi wani taki Yehovah yepi mi.”

20. Fa a preikiwroko e yepi wi?

²⁰ Wi kan kisi deki-ati tu te wi e du a Kownukondre preikiwroko fayafaya (1 Tim. 4:16). Wan sisa na ini Australia di kisi bun furu problema, taki: „Mi no ben firi fu go na ini a preikiwroko srefisrefi, ma wan owruman ben aksi mi fu go nanga en. Sobun, mi go. Mi de seiker taki na so Yehovah yepi mi, bika ibri tron te mi ben go na ini a preikiwroko, mi ben e firi koloku trutru” (Odo 16:20). Furu brada nanga sisa kon si taki den bribi e kon moro tranga te den e yepi trawan fu kisi moro bribi na ini Yehovah. Te den e yepi trawan, dan den no abi ten fu prakseri den eigi problema doronomo. Na presi fu dati, den e poti prakseri na den moro prenspari sani na ini a libi.​—Fil. 1:10, 11.

21. Sortu dyaranti wi abi srefi te wi abi problema?

²¹ Yehovah gi wi furu sani di kan yepi wi fu horidoro te wi abi problema. Efu wi e teki a yepi fu en, dan wi o de koloku awinsi wi abi problema. A prenspari tu fu prakseri san wi kan leri fu den futuboi fu Gado na ini Bijbel ten. Te wi e du leki den, dan wi no o frede te wi e kisi problema. A kan taki wi o kisi moro problema fu di a kaba e kon moro krosibei. Ma toku wi musu abi a srefi denki fu Paulus di taki: „Den naki wi trowe, ma wi no dede. . . . Wi no e gi abra” (2 Kor. 4:9, 16). Yehovah o yepi wi fu no frede te problema e miti wi na ini a ten disi.​—Leisi 2 Korentesma 4:17, 18.