Tahan hasoru susar oioin ho aten-brani
“Maromak mak fatin protesaun no forsa mai ita, ajuda neʼebé ita bele hetan lalais durante tempu susar.”—SAL 46:1.
1, 2. Ema barak hasoru susar saida deʼit? Ita ida-idak presiza sai oinsá?
ITA moris iha tempu neʼebé nakonu ho susar oioin. Porezemplu, ohin loron, ema barak hasoru susar tanba dezastre hanesan rai-nakdoko, tsunami, udan boot, anin boot, ahi han foho no uma, no dezastre seluk tan. Liután neʼe, problema iha família laran no problema sira seluk mós halo ema barak sente taʼuk no triste. Hanesan Bíblia hatete, buat aat bele “mosu derrepente deʼit” ba ita hotu.—Ecle 9:11.
2 Iha situasaun susar hanesan neʼe, Maromak nia povu kontinua serbí nia ho laran-haksolok. Maski nuneʼe, nuʼudar mundu aat neʼe nia rohan besik daudauk, ita ida-idak presiza sai prontu atu hasoru susar naran deʼit neʼebé bele kona ita. Oinsá mak ita bele tahan hasoru susar sira-neʼe no nafatin serbí Maromak ho laran-haksolok? Saida deʼit mak bele ajuda ita atu tahan hasoru susar oioin ho aten-brani?
APRENDE HUSI EMA NEʼEBÉ TAHAN HASORU SUSAR HO ATEN-BRANI
3. Tuir Roma 15:4, saida mak bele fó ksolok mai ita kuandu ita hasoru susar ruma?
3 Maski ohin loron problema oioin kona ema barak liután, maibé iha tempu uluk mós ema hasoru susar. Tan neʼe, mai ita haree saida mak ita bele aprende husi Maromak nia atan balu iha tempu uluk neʼebé tahan hasoru susar oioin ho aten-brani.—Rom 15:4.
4. Susar saida deʼit mak David hasoru? Saida mak ajuda nia atu tahan hasoru susar sira-neʼe?
4 Hanoin toʼok kona-ba susar oioin neʼebé David hasoru. Porezemplu, Liurai Saul hakarak oho nia. David mós tenke halo funu hasoru inimigu sira, no dala ida, inimigu sira hadau ninia feen sira. Ema balu husi ninia tropa, ninia família no kolega rasik mós sai traidór. Dala ruma, nia sente laran-tun tebes. (1 Sam 18:8, 9; 30:1-5; 2 Sam 17:1-3; 24:15, 17; Sal 38:4-8) Bíblia hatudu katak problema sira-neʼe halo David sente laran-susar no triste tebes. Maski nuneʼe, David la husik ida-neʼe atu halo ninia fiar ba Jeová sai fraku. Ho fiar metin, nia hatete: “Jeová mak abrigu ba haʼu-nia moris. Ba sé mak haʼu sei taʼuk?”—Sal 27:1; lee Salmo 27:5, 10. *
5. Saida mak ajuda Abraão no Sara atu tahan hasoru susar oioin?
5 Abraão no Sara hela iha tenda nuʼudar ema laʼo-rai iha fatin neʼebé sira la koñese durante sira-nia moris tomak. Sira mós hasoru susar oioin, hanesan rai-hamlaha no perigu husi nasaun neʼebé haleʼu sira. Maski nuneʼe, sira tahan hasoru susar sira-neʼe ho aten-brani. (Gên 12:10; 14:14-16) Saida mak ajuda sira atu halo nuneʼe? Maromak nia Liafuan hatete katak sira “hein . . . sidade neʼebé Maromak harii”. (Ebr 11:8-10) Abraão no Sara hanoin nafatin kona-ba buat neʼebé Maromak promete ba sira no la husik moris susar atu halakon sira-nia haksolok.
6. Oinsá mak ita bele halo tuir Job nia ezemplu?
6 Ezemplu ida seluk mak Job, neʼebé hasoru terus barak. Hanoin toʼok oinsá nia sente kuandu nia haree katak buat hotu iha ninia moris sai aat. (Jó 3:3, 11) Liután neʼe, nia la hatene ho loloos tanbasá mak buat sira-neʼe akontese ba nia. Maski nuneʼe, nia nunka rende an. Nia nafatin laran-metin no tau fiar ba Maromak. (Lee Jó 27:5. *) Nia fó ezemplu diʼak tebes atu ita halo tuir!
7. Susar saida deʼit mak Paulo hasoru? Saida mak ajuda nia atu kontinua serbí Maromak ho aten-brani?
7 Hanoin mós kona-ba apóstolu Paulo nia ezemplu. Nia hatete katak nia hasoru ‘perigu iha sidade laran, ai-laran, no iha tasi laran’. Nia mós sai “hamlaha no hamrook”, no dala ruma hasoru susar “iha rai-malirin”. Nia mós hatete katak nia “iha tasi laran kalan ida loron ida” karik tanba ró baku rahun. (2 Kor 11:23-27) Maski nuneʼe, Paulo nafatin tahan susar sira-neʼe no kontinua serbí Maromak ho aten-brani. Depois hasoru tiha situasaun ida neʼebé nia besik atu lakon ninia moris, nia dehan: “Neʼe halo ami la konfia ami-nia an, maibé fiar deʼit Maromak neʼebé halo ema mate moris hiʼas fali. Nia soi ami husi perigu boot mate nian, no Nia sei soi ami nafatin.” (2 Kor 1:8-10) Maski ita seidauk hasoru susar barak hanesan Paulo hasoru, maibé dala ruma ita mós sente hanesan nia, no ninia ezemplu kona-ba tahan hasoru susar ho aten-brani bele fó kmaan mai ita.
KETA RENDE AN IHA SUSAR LARAN
8. Susar neʼebé ita hasoru bele halo ita sente oinsá? Fó toʼok ezemplu.
8 Ohin loron, mundu neʼe nakonu ho dezastre no susar oioin, no ema barak sente katak sira la bele tahan susar sira-neʼe. Dala ruma, ema kristaun balu mós sente hanesan neʼe. Porezemplu, irmán Lani * iha rai-Austrália, nia uluk serbí nuʼudar pioneiru ho haksolok hamutuk ho ninia laʼen. Maibé kuandu nia hatene katak nia iha moras kankru iha ninia susun, ida-neʼe halo nia hakfodak no triste tebes hanesan rai-lakan xoke nia. Nia hatete: “Tratamentu neʼebé haʼu hetan halo haʼu moras tebes, no haʼu sente haʼu la iha folin.” Liután neʼe, nia mós presiza tau matan ba ninia laʼen, neʼebé hetan operasaun tanba moras iha ruin. Se ita hasoru situasaun hanesan neʼe, ita bele halo saida?
9, 10. (a) Ita labele husik Satanás atu halo saida? (b) Saida mak bele ajuda ita atu tahan hasoru “susar barak” hanesan temi iha Apostolu 14:22?
9 Kuandu susar ruma kona ita, ita presiza hanoin-hetan katak Satanás hakarak uza susar sira atu halakon ita-nia fiar no haksolok, maibé ita labele husik Satanás atu halo ida-neʼe. Provérbios 24:10 hatete: “Ó sente laran-tun iha tempu neʼebé susar ka lae? Ó-nia kbiit sei sai menus.” Hodi hanoin didiʼak kona-ba ezemplu sira husi Bíblia hanesan foin temi, ida-neʼe bele fó aten-brani mai ita atu tahan hasoru ita-nia susar.
10 Diʼak atu ita mós hanoin-hetan katak ita la bele halakon problema hotu neʼebé ita hasoru. Tuir loloos, ita hatene katak ita sei hetan susar oioin iha ita-nia moris. (2 Tim 3:12) Apostolu 14:22 hatete: “Ita tenke hetan susar barak atu tama iha Maromak nia reinu.” Tan neʼe, duké husik susar ruma halo ita sai laran-tun, ita bele haree ida-neʼe nuʼudar oportunidade atu hatudu katak ita fiar metin ba Maromak nia kbiit atu ajuda ita.
11. Saida deʼit mak ita presiza halo atu la husik ita-nia susar halo ita laran-tun?
11 Ita presiza hanoin nafatin kona-ba buat neʼebé halo ita-nia laran kontente. Maromak nia Liafuan hatete: “Laran neʼebé haksolok halo oin midar, maibé tanba laran neʼebé kanek mak hamosu laran-kraik.” (Prov 15:13) Doutór sira hatene katak buat ida neʼebé ajuda ema moras atu sente diʼak mak se ema moras neʼe hanoin katak nia sei sai isin-diʼak. Porezemplu, dala barak kuandu ema moras ida hemu ai-moruk musan neʼebé tuir loloos masin-midar deʼit, maibé nia hanoin katak ai-moruk neʼe bele kura ninia moras, ida-neʼe halo nia sente diʼak. Maibé se ema ida hanoin katak nia hemu ai-moruk neʼebé halo nia sai moras liután, ida-neʼe halo nia sente moras duni maski tuir loloos ai-moruk neʼe la halo aat ba ninia saúde. Ezemplu neʼe hatudu katak se ita hanoin beibeik kona-ba problema sira neʼebé ita la bele hadiʼa, ida-neʼe halo ita sai laran-tun. Maibé, ita bele haksolok tanba Jeová ajuda duni ita. Maski susar boot ruma kona ita, Jeová sei fó laran-manas mai ita liuhusi ninia Liafuan, maluk kristaun sira, no forsa husi ninia espíritu santu. Hodi hanoin nafatin kona-ba buat sira-neʼe, ida-neʼe sei ajuda ita atu sente haksolok. Duké hanoin beibeik kona-ba buat aat iha ita-nia moris, ita presiza halo buat neʼebé ita bele halo hodi tahan hasoru susar ida-idak no tau ita-nia atensaun ba buat neʼebé diʼak iha ita-nia moris.—Prov 17:22.
12, 13. (a) Saida deʼit mak ajuda Maromak nia atan sira atu tahan hasoru susar oioin kuandu dezastre kona sira? Fó toʼok ezemplu. (b) Dezastre sira halo ita hanoin saida kona-ba buat neʼebé importante liu iha ita-nia moris?
12 Ohin loron, rai balu kona dezastre oioin neʼebé boot tebes. Ita-nia irmaun-irmán barak tahan hasoru susar sira-neʼe maski la fasil. Porezemplu, iha fulan-Fevereiru 2010, rai-nakdoko no tsunami kona rai-Xile, no ita-nia irmaun-irmán barak lakon sira-nia uma, sasán, no serbisu. Maski nuneʼe, sira kontinua badinas atu halaʼo sira-nia serbisu ba Jeová. Irmaun Samuel, neʼebé lakon ninia uma, hatete: “Maski ami hasoru susar boot, haʼu ho haʼu-nia feen nunka para atu tuir reuniaun no haklaken. Haʼu fiar katak kaer metin ba ami-nia toman neʼe ajuda ami atu la laran-tun demais.” Sira no mós irmaun-irmán barak la husik dezastre atu halo sira laran-tun, maibé sira kontinua serbí Jeová ho laran-manas.
13 Iha fulan-Setembru 2009, udan boot kona rai-Filipinas no udan-been sai nakonu iha área barak iha sidade Manila. Ema riku ida neʼebé lakon sasán barak hatete: “Udan boot neʼe . . . lori susar ba ema riku no ema kiak hotu.” Ida-neʼe halo ita hanoin-hetan Jesus nia konsellu neʼebé dehan: “Imi halibur ba imi an rikusoi iha lalehan, iha neʼebé ular no ferrujen la hamohu sira, naʼok-teen sira mós la sobu hodi naʼok.” (Mt 6:20) Ema neʼebé buka uluk osan no sasán, kuandu sira lakon buat sira-neʼe derrepente deʼit, ida-neʼe bele halo sira sai laran-tun tebes. Nuneʼe, diʼak liu atu ita tau uluk Jeová iha ita-nia moris, tanba maski ita hasoru dezastre ka susar saida deʼit, ita sei la lakon ita-nia relasaun diʼak ho nia.—Lee Ebreu 13:5, 6.
RAZAUN ATU ITA HATUDU ATEN-BRANI
14. Ita iha razaun saida deʼit atu hatudu aten-brani?
14 Jesus fó-hatene nanis ba ninia dixípulu sira katak problema oioin sei mosu bainhira nia komesa ninia ukun iha lalehan, maibé nia mós hatete: “Keta taʼuk.” (Lc 21:9) Ita iha razaun diʼak atu hatudu aten-brani tanba ita hetan ajuda husi ita-nia Liurai Jesus Kristu no mós Maromak Jeová, neʼebé kria buat hotu-hotu iha lalehan no rai. Paulo fó laran-manas ba Timóteo hodi dehan: “Maromak nia prezente neʼe laʼós ema taʼuk-teen nia neon, maibé espíritu kbiit, domin no ukun an nian.”—2 Tim 1:7.
15. Maromak nia atan balu hatete saida kona-ba sira-nia fiar? Oinsá mak ita mós bele hatudu aten-brani hanesan sira?
15 Iha Bíblia laran iha liafuan husi Maromak nia atan neʼebé hatudu sira-nia fiar metin ba nia. Porezemplu, David hatete: “Jeová mak haʼu-nia forsa no haʼu-nia eskudu. Iha nia mak haʼu-nia laran tau fiar, no haʼu hetan ajuda, ho nuneʼe haʼu-nia laran haksolok.” (Sal 28:7) Paulo hatudu ninia fiar metin hodi dehan: “Iha buat hotu neʼe ita . . . manán husi Nia neʼebé hadomi ita.” (Rom 8:37) Jesus mós hatudu sai katak nia iha relasaun metin ho Maromak hodi dehan: “Haʼu sei la mesak, basá Aman hela hamutuk ho haʼu.” (Joao 16:32) Liuhusi Maromak nia atan naʼin-tolu neʼe nia liafuan, saida mak sira hatudu? Sira hatudu katak sira tau sira-nia fiar tomak ba Jeová. Se ita mós hametin ita-nia fiar ba Maromak hanesan sira, ita bele hatudu aten-brani iha susar laran.—Lee Salmo 46:1. *
SIMU MAROMAK NIA AJUDA ATU HATUDU ATEN-BRANI
16. Tanbasá mak importante atu estuda Maromak nia Liafuan?
16 Ita bele tahan hasoru susar oioin ho aten-brani laʼós hodi fiar ba ita-nia an rasik maibé hodi hatene didiʼak Maromak no tau fiar ba nia. Dalan ida neʼebé ita bele halo nuneʼe mak hodi estuda ninia Liafuan, Bíblia. Irmán ida neʼebé iha moras depresaun hatete kona-ba buat neʼebé ajuda nia hodi dehan: “Haʼu lee beibeik eskritura sira neʼebé fó kmaan mai haʼu.” Ita mós halaʼo adorasaun família nian semana-semana hodi halo tuir matadalan husi atan laran-metin no matenek ka lae? Estuda Maromak nia Liafuan ajuda ita atu iha hanoin hanesan ho ema neʼebé hakerek salmu ida, neʼebé dehan: “Haʼu hadomi tebes Ita-nia ukun-fuan! Loron tomak ida-neʼe mak haʼu-nia hanoin.”—Sal 119:97.
17. (a) Jeová mós ajuda ita liuhusi saida? (b) Konta toʼok esperiénsia ida husi ita-nia livru sira neʼebé ajuda ona Ita.
17 Maromak Jeová mós ajuda ita atu iha aten-brani liuhusi ita-nia livru sira neʼebé esplika kona-ba Bíblia hodi hametin liután ita-nia fiar ba nia. Porezemplu, irmaun-irmán barak hetan ona ajuda husi maluk kristaun sira-nia esperiénsia neʼebé fó sai iha ita-nia livru sira. Irmán ida iha Ásia neʼebé iha moras depresaun neʼebé halo nia emosaun tun-saʼe, nia hetan laran-manas husi esperiénsia kona-ba irmaun ida neʼebé uluk serbí nuʼudar misionáriu no ikusmai hetan moras hanesan ninian, maibé nafatin serbí Jeová ho laran-metin. Irmán neʼe hatete: “Ida-neʼe ajuda haʼu atu komprende haʼu rasik nia situasaun no fó esperansa mai haʼu.”
18. Tanbasá mak ita presiza halo orasaun beibeik?
18 Orasaun mós bele ajuda ita iha situasaun naran deʼit. Kona-ba neʼe, apóstolu Paulo hatete: “Imi keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak. Nuneʼe, Maromak dame nian sei rai hela imi-nia fuan no laran iha Kristu Jesus.” (Flp 4:6, 7) Ita halo orasaun beibeik hodi husu ajuda atu tahan hasoru susar oioin ka lae? Irmaun Alex iha rai-Bretaña, neʼebé kleur ona hetan moras depresaun, hatete: “Koʼalia ba Jeová liuhusi orasaun no rona ba nia hodi lee ninia Liafuan mak buat neʼebé ajuda haʼu atu tahan.”
19. Tanbasá mak importante atu ita tuir reuniaun kristaun sira?
19 Reuniaun sira mak dalan ida seluk neʼebé Jeová ajuda ita. Ema neʼebé hakerek salmu ida hatete katak nia hakarak tebes atu bá Jeová nia templu. (Sal 84:2) Ita mós sente hanesan neʼe ka lae? Irmán Lani, neʼebé temi uluk, nia hatete katak importante tebes ba nia atu tuir reuniaun hotu no hamutuk ho irmaun-irmán sira. Nia hatutan tan: “Haʼu hatene katak se haʼu hakarak Jeová nia ajuda, haʼu tenkesér tuir reuniaun.”
20. Oinsá mak nafatin badinas iha serbisu haklaken bele ajuda ita?
20 Ita mós hetan aten-brani hodi nafatin badinas iha serbisu haklaken. (1 Tim 4:16) Irmán ida iha rai-Austrália neʼebé hasoru problema barak iha ninia moris hatete: “Maski haʼu lakohi bá haklaken, maibé kuandu katuas ida konvida haʼu atu bá haklaken hamutuk ho nia, haʼu bá. Haʼu fiar katak Jeová ajuda duni haʼu, tanba kuandu haʼu koʼalia ba ema hodi haklaken, ida-neʼe halo haʼu sente kontente tebes.” (Prov 16:20) Ita barak hatene ona katak kuandu ita ajuda ema seluk atu fiar ba Jeová, ida-neʼe mós hametin ita rasik nia fiar. Hodi halo nuneʼe ajuda ita atu la hanoin tan kona-ba ita rasik nia problema no tau ita-nia atensaun ba buat neʼebé importante liu.—Flp 1:10, 11.
21. Maski ita hasoru susar oioin, ita bele fiar saida?
21 Liuhusi dalan oioin neʼe, Jeová ajuda ita atu tahan hasoru susar ho aten-brani. Hodi aproveita ajuda hotu neʼebé Jeová fó mai ita, ita bele haksolok nafatin maski hasoru susar ruma. No mós, hodi hanoin didiʼak no halo tuir Maromak nia atan sira-nia ezemplu, ida-neʼe sei fó aten-brani mai ita atu tahan susar naran deʼit. Nuʼudar mundu nia rohan besik daudauk, karik ita sei hetan susar barak liután iha futuru, maibé ita mós bele sente hanesan Paulo, neʼebé hatete: “Ami terus oioin, maibé ami bele book an. . . . Ami la lakon aten-barani.” (2 Kor 4:8, 9, 16) Sin, ho Jeová nia ajuda, ita bele duni tahan hasoru susar oioin ho aten-brani.—Lee 2 Korinto 4:17, 18.
^ par. 4 Salmo 27:5, 10: “5 Tanba nia sei subar haʼu iha ninia abrigu iha tempu susar; nia sei subar haʼu iha fatin segredu iha ninia tenda; nia sei tau haʼu iha fatin aas iha fatuk boot.” “10 Se haʼu-nia aman rasik no inan rasik husik haʼu, Jeová rasik sei simu haʼu.”
^ par. 6 Jó 27:5: “Ba haʼu, haʼu la bele duni atu dehan sai katak imi mak ema neʼebé loos! Toʼo haʼu mate, haʼu sei nunka lakon haʼu-nia hahalok loos!”
^ par. 8 Naran balun laʼós naran neʼebé loos.
^ par. 15 Salmo 46:1: “Maromak mak fatin protesaun no forsa mai ita, ajuda neʼebé ita bele hetan lalais durante tempu susar.”
