Er Se Tagher A Atsan Nyian Sha Ishimataver yô

“Aôndo ka ijiir yase i waren ker man agee ase kpaa, ka iwasen i i lu ikyua ikyua ken ican je.”—PS. 46:1.

Ú FATYÔ U NAN MLUMUN KPA?

Se er nan ve atsan a se ye la aa na se iyolkpen ga?

Se mba taver ishima sha ci u nyi?

Yehova wasen se u wan ishima a atsan nena?

1, 2. Ka atsan a nyi ior kpishi ve ye, kpa ior mba Aôndo yô soo u eren nyi?

 SE MBA ken ashighe a ican. Uaahe de ishar shin tar nyian. Tartenger man mngerem ma saren avenge man usu u hian akaa man mngerem ma deemee man iwo i bughur man bo-hiar kua ijeverahumbe gbihi ior kpishi ken ican. Heela tseegh ga, mbamzeyol mba hen tsombor man mba ior ve tagher a mi asange asange la na ior kpishi ule shi mba ken mcie kpaa. Ka di vough er Bibilo i kaa nahan ér, “shighe man aikyôr” mba tseren se cii.—Orpa. 9:11.

² Er ior mba Aôndo ve lu tagher a mbamtaver mban nahan kpa, ve za hemen u civir un saan saan. Nahan cii kpa, se soo ser se wa iyol se keghen a kegh sha er sea va tagher a nyityô ican ken hemen, er mkurtar a mgbôghom ne kpa, se wa ishima a mi yô. Se za hemen u civir Aôndo saan saan shighe u akaa a vihin a tser se la nena? Ka nyi ia wase se u wan ishima a atsan a se tagher a mi nyian laa?

HEN KWAGH HEN MBA VE TAVER ISHIMA LA

3. Er i tese ken Mbaromanu 15:4 nahan, ka nyi ia wase se u wan ishima a atsan a vesene?

³ Shin er nyian ne ior kpishi ve lu yan atsan seer a seer nahan kpa, uumace ndera yan atsan ka kwagh u nyian a mi ga. Mbacivir Aôndo mba tsuaa mbagenev yange ve kôrcio u wan ishima a atsan kpishi, nahan de se nenge nen kwagh u se fatyô u henen sha ikyav ve la yô.—Rom. 15:4.

4. Ka atsan a nyi Davidi yange wa ishima a mini, man lu nyi i wase unu?

⁴ Hen ase sha akaa agen a yange gba u Davidi una wa ishima a mi la. Tor Saulu yange soo u wuan un. Mbaihyomov kpa lu nôngon a na, shi ve kura kasev nav kwagen la kpa ve yem a mi. Mbautyaav nav mbagenev kua mba hen tsombor na mbagenev man ahuraior a na agen er  kwagh a na sha mimi ga. Akaa ne cii na yô, Davidi ure kpishi. (1 Sam. 18:8, 9; 30:1-5; 2 Sam. 17:1-3; 24:15, 17; Ps. 38:4-8) Bibilo pase er Davidi ya ican kpishi sha ci u mbamzeyol mban yô. Nahan kpa, mbamzeyol mban ve vihi ikyar i Davidi ya vea Yehova la ga. Er Davidi na jighjigh taveraa yô, a kaa ér: “TER ka agee a uma wam, ka an je nana wam mciem iyolo?”—Ps. 27:1; ôr Pasalmi 27:5, 10.

5. Er uma taver Aberaham vea Sara kpishi nahan kpa, lu nyi i wase ve u wan ishima?

⁵ Aberaham vea Sara yange ve tsaan ken atumbe sha ayange a ve yem shir ken ityar i ve fa i ga la cii. Uma yange a taver ve sha ashighe agen kpishi. U tesen ikyav yô, yange ve ya ican sha ci u ijen gba ken tar u ve lu shir ker la shi ior mba ve wa ndor a ve la kpa lu ubombaiorov. Nahan cii kpa, ve taver ishima, ve wa ishima a mbamtaver mbara cii. (Gen. 12:10; 14:14-16) Lu nyi i wase ve u wan ishima? Mkaanem ma Aôndo kaa a vese ér, Aberaham “lu keghen gar u a lu a imagh, u Aôndo A lu Orkaren man Ormaan un la.” (Heb. 11:8-10) Er uma taver Aberaham vea Sara kpishi nahan kpa, ve de ér kwagh la a yange ve u lun saan saan ga, kpa ve hemba veren ishima sha ityendezwa i Aôndo er a ve la.

6. Se dondo ikyav i Yobu la nena?

⁶ Yobu kpa yange ya ican tsung je. Hen er yange a lu un ken ishima shighe u lu inja er hanma kwagh ken uma na za kpe la. (Yobu 3:3, 11) Kwagh ugen yô, Yobu yange fa er i hii ve un lu yan ican jighilii ga. Nahan cii kpa, Yobu hide ijime ga. Yange za hemen u civir Aôndo sha mimi her. (Ôr Yobu 27:5.) Yobu ver se ikyav i dedoo, i i doo u se dondo yô.

7. Ka atsan a nyi nahan Paulu yange ya, er lu civir Aôndo laa, kpa lu nyi i na un ishimataver ve za hemene?

⁷ Shi hen ase sha ikyav i apostoli Paulu kpaa. Paulu yange ‘war ku ken gar man ken ikyôngo kua shin zegemnger.’ Paulu shi kaa ér, ‘m luun ijen, imura kpaa kôron mo, shi wuhe lu kôron mo, m lu idyelegh kpaa.’ Shi a kaa ér un ‘shi sha kwavmnger hen iv, un tsa her kpaa,’ alaghga lu ma shighe u tso ur a na yô, kwagh ne er un ye. (2 Kor. 11:23-27) Er Paulu ya atsan kpishi nahan cii kpa, yange lu a ishima i dedoo, sha ci u kwagh u yange ôr zum u a war ku la tese kwagh ne wang. A kaa ér: “Lu sha u se̱ de suur sha ayol a ase ga, kpa se̱ suur sha Aôndo u A nderen mbakpenev la. Un u A yima se sha imbaku i vesen ne shi Una yima se kpaa la.” (2 Kor. 1:8-10) Ka ior kpishi ve ye atsan a vihin tsung er Paulu nahan ga. Nahan cii kpa, ashighe agen se kpishi ka i lu se ken ishima er yange lu un nahan. Man ikyav na i ishimataver la ia fatyô u surun se asema.

MBAMZEYOL VE DE NE U IYOLKPEN GA

8. Mbamzeyol mba ainge mban vea fatyô u benden a vese nena? Tese ikyav.

⁸ Er uaahe man atsan man mbamtaver ve dumbur ken tar u ainge ne yô, ka i lu ior kpishi inja er mbamzeyol vev ngee shin kehe gande nahan. Mbakristu mbagenev je kpa ka i lu ve nahan. Anmgbian u kwase ugen u i yer un ér Lani * yô, yange lu eren tom u pasen kwagh hanma shighe la saan saan vea nom na ken tar u Australia. Anmgbian u kwase ne kaa ér, shighe u mbatwerev pase un ér kyansa mende un sha tumba yô, vihi un je zua ga. A kaa ér: “Twer u i sôrom la na yô, vihim iyol kpishi, shi lum er m gba kwagh ga nahan.” Heela tseegh ga, yange gba u una nengen sha nom na, u i pav un gwangerjime la. Aluer imba kwagh ne tser se nahan, se er nena?

9, 10. (a) Ka nyi i gbe u se de ser Satan a er a vese ga? (b) Aerenakaa 14:22 kaa ér gba u se wa ishima a “atsan kpishi,” nahan se er kwagh ne nena?

⁹ Doo u se umbur ser, Satan soo ér mbamtaver mba se tagher a mi la ve vihi jighjigh wase u nan. Nahan kpa, gba u se de ser a yange se u zuan a iember sha imba gbenda ne ga. Anzaakaa 24:10 kaa ér: “Aluer ú gba uwer sha iyange i ican yô, agee ou vese ga.” Aluer se mba gbidyen kwar sha kwagh u ior  mba i er kwagh ve ken Bibilo, er mba se vande ôron kwagh ve sha ijime la nahan yô, se fatyô u taver ishima hendan a atsan.

¹⁰ Shi gba u se umbur ser, se fatyô u sôron hanma mzeyol ga. Jim yô, gba u se ver ishima ser mbamzeyol vea tser se. (2 Tim. 3:12) Aerenakaa 14:22 kaa ér: “Ka sha atsan kpishi keng je man sé nyôr ken tartor u Aôndo ye.” Doo u ú de wer mbamzeyol ve na u iyolkpen ga, kpa hemba doon u ú nenge ve wer, ka ian i u taver ishima sha ci u ú na jighjigh wer, Aôndo ngu a tahav mbu wasen we.

11. Se er nan ve atsan aa na se ishimayinan ga?

¹¹ Gba u se hemba veren ishima sha akaa a dedoo. Mkaanem ma Aôndo kaa a vese ér: “Ishima i saan saan i ne ishigh ki saan sha, kpa ishima i vihin yô, i ne ishima i yinan.” (Anz. 15:13) Mbatwerev kav ér, or ka nana henen ér angev mbu nan mbua bee yô, shi mbu bee kpaa. Ashighe kpishi, or ka nana mena icigh ki ki zough sha angev mbu nan jighilii ga, kpa nana hen ér kia wase nan yô, nan zua a guda. Kpa aluer oruange nan hen ér icigh ki nan lu menan la ki wasen nan ga yô, angev mbu nan mbua hemba gban a gba kera. Ka a kaa a oruange ér icigh ki nan lu menan la kia va nan a mbamzeyol mbagenev yô, i hemba vihin nan iyol cii. Aluer se zer henen sha mbamlu asev mba se lu a tahav mbu geman ve ga la yô, iyol ia kpe se. Se wuese kpishi er Yehova a ne se iwasen kpôô kpôô nahan. Shighe u kwagh a tser se je kpa, Yehova ka a taver se ishima ken Mkaanem nam, shi a sue se sha ikyev i anmgbianev asev mba sha tar cii, shi ngu a taver se sha icighan jijingi na kpaa. Aluer se hemba veren ishima sha akaa ne yô, ishima ia taver se. Er ma u lu henen sha akaa a vihin a a tser u la yô, er kwagh u i gbe u ú er sha u sôron mbamzeyol ou la, shi hemba veren ishima sha akaa a dedoo a u lu a mi la.—Anz. 17:22.

12, 13. (a) Ka nyi i wase mbacivir Aôndo u wan ishima a uaahe? Tese ikyav. (b) Uaahe vea wase se u fan kwagh u a hembe lun a inja ken uma la nena?

¹² Ken anyom a a sember karen ne, uaahe mba vihin tsung er ken ityar igen. Anmgbianev kpishi mba ve lu ken ityar ne la wa ishima a uaahe mban, man se fatyô u henen ishimawan hen a ve kpaa. Kpa ngula tese ér yange lu ve zange u wan ishima ga. Ken mhii u inyom i 2010 la, tar tenger taveraa shi mngerem sar avenge ken tar u Chile, vihi uya man akaa a anmgbianev asev, man mbagenev je yô, ve kera lu a tom u eren ga kuaa. Nahan cii kpa, anmgbianev za hemen u civir Aôndo her. Anmgbian ugen u ya na vihi kaca kaca yô, mba yer un ér Samuel, a kaa ér: “Sha shighe u taver kpishi ne je kpa, mo vea kwase wam se de u zan mbamkombo shi duen kwaghpasen ga. M na jighjigh mer, ieren ne yange i wase se se yina ishima ga.” Anmgbian ne vea kwase na kua mbagenev kpishi yange ve hungur a aahe ne, ve za a za hemen u civir Yehova.

¹³ Ken uwer u Setemba 2009 la, wura nôôr kpishi, kuwa gar u Manila, ken tar u Filipin (Philippines), mase shin cuku tseegh tsô. Ornyar ugen u akaa saa un kpishi yô, kaa ér: “Zegemnger la yange bende a hanma or cii, sha ci u yange va mbanyarev man mbaatsanev cii a mtaver man ican i yan.” Kwagh ne umbur se kwaghwan u injaa u Yesu yange wa se la, ér: “Koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la.” (Mat. 6:20) Ka sea de akaa cii sea keren uyôughyôughmbaakaav, mba ve tse gbem ga la yô, ashighe kpishi kwagh ne ngu a na se va ahenge. Nahan hemba doon u se tese ser se mba a kwaghfan, sha u veren ishima yase cii sha ikyaryan yase vea Yehova, i kwagh môm una fatyô u vihin i ga la!—Ôr Mbaheberu 13:5, 6.

ER I HII VE I DOO U SE TAVER ISHIMA YÔ

14. Gba u se taver ishima sha ci u nyi?

¹⁴ Yesu yange kaa ér mbamzeyol vea lu sha shighe u mve na la. Kpa shi a kaa ér: “De cie nen ga.” (Luka 21:9) Er a lu Tor wase shi Yehova u a gbe se la kpa a lu suen se yô, se mba a ityôkyaa i dedoo i taver ishima. Paulu yange taver Timoteu ishima, kaa ér: “Ka  jijingi u cian kwagh, Aôndo A ne se ga, kpa ka u ageegh man u dooshima man u kôron iyol tsaha.”—2 Tim. 1:7.

15. Pase kwagh u mbacivir Aôndo mbagenev yange ve ôr sha u tesen ér ve suur sha Aôndo vangertiôr yô. Se kpa se fatyô u suur sha Aôndo vangertiôr nena?

¹⁵ Bibilo ôr se akaa a mbacivir Aôndo mbagenev yange ve ôr sha u tesen ér ve suur sha a na yô. U tesen ikyav yô, Davidi yange kaa ér: “TER ka agee am je, man perutya wam kpaa, ishima yam suur sha a Na, m zough a iwasen, nahan yô, ishima yam ngi ember tsung.” (Ps. 28:7) Paulu di pase vangertiôr na, kaa ér: “Ken akaa ne cii se hemba tser tser sha ci u Un u se doo Un ishima la.” (Rom. 8:37) Kape Yesu kpa, yange zurum u una kpe ve pase mbadondon nav wang ér, un ya ikyar kôôsôô vea Aôndo je la. A kaa ér: “M ngu tswen ga, gadia Ter ngu vea Mo.” (Yoh. 16:32) Ka nyi se fatyô u nengen a mi tser tser ken mkaanem ma Davidi man ma Paulu kua ma Yesu maraa? Ve cii ve ôr kwagh u tesen ér ve suur sha Yehova a vangertiôr. Aluer se kpa se suur sha Aôndo nahan yô, kwagh ne una na se ishimataver shighe u se tagher a atsan nyian yô.—Ôr Pasalmi 46:1-3.

ZUA A MTSERA KEN IWASEN I AÔNDO A NE SE LA

16. Doo u se henen Mkaanem ma Aôndo sha ci u nyi?

¹⁶ Mbakristu mba zough a ishimataver sha tahav vev ga. Kpa ka ve zua a mi zum u ve fe Aôndo tsembelee, shi ve hen u suur sha a na kpaa yô. Se er kwagh ne sha u henen Bibilo, i i̱ lu Mkaanem nam la. Anmgbian u kwase ugen u lu a angev mbu ken ityou yô, pase kwagh u yange wase un yô. A kaa ér, “Ka m ôr avur a Bibilo a surun mo ishima acin imôngo, nahan m zua a mpeveryol.” Se mba eren kwagh u i kaa ér se eren mcivir u hen tsombor hanma shighe la kpa? Aluer se mba eren nahan yô, se lu eren vough er orpasalmi yange kaa nahan, ér: “Atindiakaa a Ou, doom ishima zee! Kam kwagh u shin henen sha mi didi.”—Ps. 119:97.

17. (a) Ka nyi ia wase se se lu a ishimatavera? (b) Pase ma ngeren u sha kwagh u uma u or u a wase u yô.

¹⁷ Shi se mba a ityakerada i pasen Bibilo, i i lu a mkaanem ma taver vangertiôr u se lu a mi ken Yehova la. Anmgbianev kpishi ôr ngeren mba sha kwagh u uma u ior ken umagazin asev, nahan ve zua a iwasen kpishi je. Anmgbian u kwase ugen ken veghertar u Ashia, u lu a angev mbu ken ityou mbu vihin tsung yô, yange ôr ngeren u sha kwagh u anmgbian u nomso ugen u vande eren tom u mishen, u un kpa lu a imba uange la, kpa wa ishima a mi tsembelee yô. Nahan a nger ér: “Ngeren u sha kwagh u uma u anmgbian u nomso la yange wasem u kaven angev av, shi m zua a ishimaverenkeghen kpaa.”

18. Doo u se eren msen hanma shighe cii sha ci u nyi?

¹⁸ Msen una fatyô u wasen se ken hanma  mlu cii. Apostoli Paulu yange pase er msen a lu a inja yô, a kaa ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Fil. 4:6, 7) Se mba eren msen hanma shighe sha er se zua a tahav mbu wan ishima a atsan kpa? Anmgbian u nomso ugen ken tar u Ingila yange lu a angev mbu ken ityou anyom kpishi, mba yer un ér Alex. A kaa ér: “Yange mea lamen a Yehova ken msen shi mea keghen ato a na, shighe u m lu ôron Mkaanem nam la yô, m zua a iwasen kpishi.”

19. Gba u se nengen mbamkombo mba zan nena?

¹⁹ Mbamkombo mba zan ka gbenda ugen u Yehova a wasen se yô. Orngeren pasalmi ugen yange kaa ér: “Ityembe i sha ishigh ki iyou i TER sarem ken ishima je, iyol i kpem cii.” (Ps. 84:2) Kape se kpa ka i lu se laa? Lani, u se vande ôron kwagh na sha ijime la pase mnenge na sha kwagh u mbamkombo mba Mbakristu ér: “Yange m bunden mbamkombo ga. Yange m fa mer, aluer m soo mer Yehova a wasem u wan ishima a angev av yô, a gba u me zaan mbamkombo.”

20. Aluer se mba eren tom u pasen kwagh yô, a wase se nena?

²⁰ Tom u pasen loho u Tartor la ka gbenda ugen u Yehova a wasen se yô. (1 Tim. 4:16) Anmgbian u kwase ugen ken tar u Australia, u yange tagher a mbamzeyol kpishi yô, kaa ér: “Kwaghpasen yange gbam uwer kpishi, kpa ortamen ugen kaa ér una due kwaghpasen vea mo, nahan m lumun. A̱ shi nan kpa, Yehova lu wasen mo, sha ci u hanma kwa u yange mea due kwaghpasen yô, i saan mo iyol kpishi.” (Anz. 16:20) Ior kpishi kav ér, ka vea wasen mbagenev ér ve na Yehova jighjigh yô, ve taver jighjigh ve u nan kpaa. Ka vea eren nahan yô, ve de u henen sha mbamzeyol vev, ve gema ve ver ishima sha akaa a a hembe lun a inja la.—Fil. 1:10, 11.

21. Ka vangertiôr u nyi se lu a mi sha kwagh u atsan a se tagher a mi laa?

²¹ Yehova wasen se sha igbenda kpishi, sha er se fatyô u wan ishima a atsan a se tagher a mi nyian la vangertiôr yô. Aluer se lumun iwasen i Yehova a ne se la yô, sea lu a mbamzeyol nan nan kpa, se wa ishima a mi. Aluer se gbidye kwar sha akav a mbacivir Aôndo mba i er kwagh ve la, shi se dondo ikyav i ve ver la kpaa yô, se hen u wan ishima a atsan. Er tar ne u lu zan u za kuusu ne, adooga se tagher a atsan kpishi a hemba er se lu tagher a mi hegen ne. Nahan cii kpa, se fatyô u lun a mnenge u Paulu kpa lu a mi ne, a kaa ér: “Mba kôron se tan inya, kpa i wua se ga. . . . Asema kera nga yinan se ga.” (2 Kor. 4:9, 16) Sha iwasen i Yehova yô, se fatyô u tagher a atsan vangertiôr.—Ôr 2 Mbakorinte 4:17, 18.

[Ngeren u shin kpe]

[Mbampin Mba Ngeren u Henen]

[Ufoto mba sha peeji 10 la]

Shighe u ú lu yan ican yô, lumun iwasen i Yehova a ne se la