Ngan Yan u Fithik’ e Magawon nib Gel e Ngiyal’ Ney nib Mudugil Lanin’uy

“I Got e ir e manaf rodad me ir gelngidad, gubin ngiyal’ ni ke fal’eg rogon ke par ni ra yib e gafgow ngodad me ayuwegdad.”—PS. 46:1.

RAYOG NIM FULWEG?

Uw rogon ni ngad siyeged ni nge dabi mulan’dad nbochan e pi n’en ni be buch nri ma k’aring e kireban’?

Mang boch i fan ni nga i par nib mudugil lanin’dad?

Mang e pi n’en ni ke pi’ Jehovah ni nge ayuwegdad nge yag ni nga darod u fithik’ e magawon nib gel?

1, 2. Mang boch e magawon nib gel ni ke yib ngak boor e girdi’? Mang e gad baadag ni ngad rin’ed?

 GAD be par u ba ngiyal’ ni ma yib e magawon riy nib gel. Gafgow nib gel e ma yib nga fayleng e ngiyal’ ney nib peth peth. Rib gel e gafgow ni ma tay e girdi’ ni bochan e tsunami, nge nifiy, nge ran ni ke sug u daken e binaw, nge volcano, nge nanyor, nge yoko’. Magawon u tabinaw nge ku boch e magawon ni ma yib ngodad e ke k’aring e marus nge kireban’ ngak e girdi’. Ere, riyul’ ni “dariy be’ ni ra nang e ngiyal’ ni ke taw nga tol’.”—Ekl. 9:12, BT.

² Pi tapigpig rok Got e yad be ulul ko pigpig ngak ni yad ba felfelan’ u fithik’ e pi magawon ney. Machane, gad baadag ni ngad fal’eged rogodad u m’on ni nge yib boch e magawon nrayog ni nge yib ngodad e ngiyal’ ney ni ke chugur e tomur ko re m’ag ney. Uw rogon ni ngad ululgad ko pigpig ku Got u fithik’ e felfelan’ u nap’an ni ke yib e magawon ngodad nib gel? Mang e ra ayuwegdad nge yag ni nga darod u fithik’ e magawon nib gel nib mudugil lanin’dad?

NGAM FIL BAN’EN ROK E PIIN NI KE PAR NIB MUDUGIL LANIN’RAD

3. Rogon ni bay ko Roma 15:4, mang e ra fal’eg lanin’dad u nap’an ni ke yib e magawon ngodad nib gel?

³ Yugu aram rogon ni ke yoor e girdi’ ni ke yib e magawon ngorad nib gel e ngiyal’ ney ko kafram, machane pi magawon ney nib gel e gathi ka fini yib. Gad ra guy ko mang e gad ra fil rok boch e pi tapigpig rok Got kakrom ni ke yib e magawon ngorad, ma kar pared nib mudugil lanin’rad.—Rom. 15:4.

4. Mang boch e magawon nib gel e ke yib ngak David, ma mang e ke ayuweg?

⁴ Mu lemnag boch e magawon ni ke yib ngak David. Baadag Saul ni nge li’ ngem’. Ma pi toogor rok e kar chamgad  ngak, ma immoy ba ngiyal’ ni kan fek pi leengin nga bang. Ma boch ko pi salthaw rok nge girdien e tabinaw nge pi fager rok e kar egnaged. Yu ngiyal’ e ma kireban’ nib gel. (1 Sam. 18:8, 9; 30:1-5; 2 Sam. 17:1-3; 24:15, 17; Ps. 38:4-8) Thin nu Bible e be dag nrib gel e gafgow ni ke tay David ni bochan e pi magawon nem. Machane, de kirebnag e pi n’em e tha’ u thilrow Got. Yog u fithik’ e pagan’ ni gaar: “Somol e be yororiyeg rok urngin e riya’; ere dab gu tamdag.”—Ps. 27:1; mu beeg e Psalm 27:5, 10.

5. Mang e ke ayuweg Abraham nge Sarah ni nge yag ni ngar k’adan’row ko pi magawon ni ke yib ngorow?

⁵ Yooren e tayim ko yafas rok Abraham nge Sarah e kar parew u lan e tent. Ma ba ga’ ni yad ma par ko pi binaw ni gathi ri yow manang. Gathi gubin ngiyal’ nib mom e par rorow u rom. Bod ni, ke yib e gafgow ngorow ni bochan e uyungol nge girdi’ ni ma par ko pi nam u toobrow ni kar magawonnaged yow. (Gen. 12:10; 14:14-16) Uw rogon, ma ke yag rorow ni ngar k’adan’row? Thin rok Got e be gaar: “Abraham e i sonnag fare binaw ni Got e ke gonopiy yaan ke toy, ni fare binaw ni ba’ taan u but’ ndabi chuw biid.” (Heb. 11:8-10) Ur tiyan’row ko tin ni ke micheg Got ngorow, ma dar pagew e pi magawon nem ni nge warnag e michan’ rorow.

6. Uw rogon ni ngad folwokgad rok Job?

⁶ Rib gel e gafgow ni ke yib ngak Job. Mu lemnag feni gel e kireban’ rok u nap’an ni ke yib boor e magawon ngak. (Job 3:3, 11) Maku de nang fan ni ke yib e pi magawon nem ngak. Machane ke par nib yul’yul’ mab mich Got u wan’. (Mu beeg e Job 2:3.) Rib fel’ ni ngad folwokgad rok!

7. Mang boch e gafgow ni ke yib ngak Paul u nap’an ni be pigpig ku Got? Mang e ke pi’ e athamgil nga laniyan’ ni nge dabi tal?

⁷ Maku, mu lemnag e n’en ni buch rok apostal Paul. Immoy ba ngiyal’ ni ke ‘chugur ko riya’ u lan binaw i yan, ngu daken e ted, ngu lan e rigur.’ Me weliy ni ke ‘yim’ ko bilig nge belel; ma ke gafgow ko mad.’ Miki yog Paul ni bay boch e barkow ni ke pil ni bay u daken ma ba’ bayay ni i par u fithik’ e day u lan reb e rran. (2 Kor. 11:23-27) Machane, mu tay fanam i yan ko n’en ni ke yog u tomuren ni buch ban’en rok ni chugur ni nge yim’ ni yog ni gaar: “Ni yodoromnagmad ni bochan e gathi gamad e nggu torgad ngomad, ya ke mus ni Got ni ir e ma faseg e girdi’ ko yam’ e ir e nggu torgad ngak. Susun e nggu m’ad, machane ir e ayuwegmad nda gu m’ad, ma bay i ayuwegmad i yan.” (2 Kor. 1:8-10) De yoor e girdi’ ni ke buch ban’en rorad ni bod urngin ni ke buch rok Paul. Machane, boor i gadad e yu ngiyal’ ma gad ma lem ni bod Paul. Ere n’en ni ke rin’ e rayog ni nge fal’eg lanin’dad.

DAB MU TAL NI BOCHAN E PI MAGAWON NI KE YIB NGOM

8. Uw rogon ni ma gafgownagdad e pi magawon ni ma yib ngodad e ngiyal’ ney? Mu weliy.

⁸ Ngiyal’ ney e ri boor e gafgow nib gel ni ma yib ngak e girdi’ nge ku boch e magawon, ma arfan ni boor i yad e yad be lemnag ndabkiyog rorad. Maku bay boch e Kristiano ni aram rogon ni yad be lemnag. Lani * nge pumoon rok e yow ma machib u Australia ni polo’ e tayim rorow u nap’an ni ke nang ni bay e cancer ko thuth rok. Rib gel e kireban’ riy. Ma ke yog ni ke war nbochan e falay ni ke fanay ma ke thamiy ndakuriy fan. Maku ba t’uf ni nge ayuweg e pumoon rok ya kan sey e niw u keru’. Ere, faanra gadad e ke yib ngodad e magawon ni aram rogon, ma mang e rayog ni ngad rin’ed?

9, 10. (a) Mang e dab da paged Satan ni nge rin’ ngodad? (b) Mang e ra ayuwegdad nge yag ni ngad k’adan’dad ko “gafgow” ni be weliy e Acts 14:22 murung’agen?

⁹ Thingar da lemnaged ni ma fanay Satan e gafgow ni ma yib ngodad ya nge warnag e michan’ rodad. Machane, dab da paged e re n’ey ni nge chuweg e felfelan’ rodad. Proverbs 24:10, (BT) e be gaar: “Faanra ga ba meewar u nap’an ni aw e gafgow nib tomgin, ma rriyul’ ni ga ba meewar.” Faan gad ra fal’eg i lemnag e n’en ni  be yog e Bible u murung’agen e pi tapigpig rok Got kakrom ni bod ni kad weliyed faram, ma ra pi’ gelngidad u nap’an nra yib boch e magawon nib gel ngodad.

¹⁰ Ma kub fel’ ndab da paged talin ndabiyog ni ngad chuweged urngin e magawon. Bin riyul’ riy e gad manang nrayog ni nge yib reb ngodad. (2 Tim. 3:12) Be yog e Acts 14:22 ngodad ni gaar: “Thingar danod u fithik’ boor e gafgow ma gadad yan ko gin nsuwon Got.” Dab da paged ni nge mulan’dad nbochan e magawon ni ma yib ngodad, ma ngad lemnaged ni pi n’ey e ke bing e kanawo’ ngodad ya nge yag ni ngad daged ni be pagan’dad ngak Got ni bay gelngin ni nge ayuwegdad.

11. Faanra dubdad ni nge mulan’dad nbochan e magawon nib gel ni ke yib ngodad, ma mang e rayog ni ngad rin’ed?

¹¹ Ba t’uf ni ngad tedan’dad ko tin nib fel’ ko yafas rodad. Thin rok Got e be gaar: “Nap’an nra felfelan’ e girdi’ ma ra siminmingad, ma nap’an nra kireban’rad, me gafgow yaarad.” (Prov. 15:13, BT) Ra ngad tedan’dad ko pi n’en ko yafas rodad ndabiyog ni ngad thilyeged ma ra mulan’dad. Gad ba felfelan’ ni ma pi’ Jehovah e ayuw ngodad nriyul’ ni ba’ angin. Nap’an nra yib e gafgow nib gel ngodad, ma ra pi’ e athamgil nga lanin’dad u daken e Thin rok, nge ayuw ni ma pi’ e pi walagdad, ma ma pi’ Got gelngidad u daken gelngin nib thothup. Ireray e pi n’en nthingar da lemnaged ni gubin ngiyal’, ya ra ayuwegdad ni nge gel boch e felfelan’ rodad. Ere ngad rin’ed e tin rayog rodad nge yag ni ngad k’adan’dad ko magawon ni ke yib ngodad, ma ngad tedan’dad ko tin nib fel’ ni bay rodad, ko bin ni ngad tedan’dad ko magawon rodad.—Prov. 17:22.

12, 13. (a) Mang e ke ayuweg e pi tapigpig rok Got ni nge yag ni ngar k’adan’rad u nap’an ni ke yib e gafgow nib gel ngorad? Mu weliy. (b) Uw rogon ni nge gagiyel e n’en nth’abi ga’ fan ko yafas rok be’ u nap’an ni ke yib e gafgow ngak nib gel?

¹² Dawori n’uw nap’an, ma bay boch e nam ni ke yib e gafgow ngorad nib gel. Ma pi walagdad ko pi nam nem e kar k’adan’rad ko pi magawon nem. Machane gathi mom e re n’em. U tabolngin e duw ni 2010, me yib e durru’ nge tsunami nga Chile me kirebnag boor e naun, nge chugum, nge maruwel rok e pi walagdad. Yugu demtrug ni ke yib e pi magawon nem ngorad ma kar ululgad ko pigpig ku Got. Ke kireb e naun rok Samuel ma dabkiyog ni ngan par riy, me yog ni gaar: “Nap’an ni ke yib e re magawon ney nrib gel, ma gamow e ppin rog e da gu talgow ko muulung nge machib. Ke mich u wan’ug ni pi n’ey e ke ayuwegmow ndabi mulan’mow.” Yow nge pi walag u rom e kar ululgad ko pigpig ngak Jehovah nyugu aram rogon ni ke yib e gafgow nib gel ngorad.

¹³ U nap’an e pul ni September ko duw ni 2009, ma 80 pasent ko pi binaw u Manila, Philippines e ke magawon u nap’an ni ke yib e n’uw nib ga’ mab n’uw nap’an. Reb e pumoon nib fel’ rogon ma ri boor e chugum rok ni ke kireb e yog ni fare ran e “ke gafgownag e girdi’ nib fel’ rogon nge girdi’ nib gafgow.” Re n’ey e be puguran ngodad ko fare fonow nib fel’ ni pi’ Jesus ni gaar: “Ngam ulunguyed e flaab romed u tharmiy, ya dabi kirebnag e ngal nge t’ay, ma dabi yib e moro’ro’ nga naun nge iring.” (Matt. 6:20) Salpiy nge chugum e ra m’ay nib papey, ere girdi’ ni ma tay e pi n’ey nib m’on ko yafas rorad e ba ga’ nra mulan’rad. Ere kab fel’ ni ngad ted e tha’ u thildad Got nib m’on ko yafas rodad ya demtrug e n’en nra buch u toobdad ma ra i par nib fel’!—Mu beeg e Hebrews 13:5, 6. 

FAN NRA MUDUGIL LANIN’UY

14. Mang fan nsusun dab da rusgad?

¹⁴ Ke yog Jesus ni nap’an e tin tomuren e rran ma ra yib e magawon ngodad, machane ki yog ni gaar: “Dab mu rusgad.” (Luke 21:9) Bochan ni Jesus ni Pilung rodad nge fa En ni ke Sunmiy e palpalth’ib e yow bay rodad ni yow be ayuwegdad ere ri bay fan ni dab da rusgad. Ke yog Paul ngak Timothy ni Got e ma ayuwegdad ma “dar ma ngongliydad ni ngad rusgad” ya “ma pi’  gelngidad, ma ma fal’egdad nge t’uf Got rodad nge girdi’, ma ma pi’ gelngidad nge yog nda t’ared lanin’dad.”—2 Tim. 1:7.

15. Mang e ke yog boch e tapigpig rok Got u murung’agen e pagan’ rorad ngak Got? Uw rogon ni nge mudugil lanin’dad ni bod yad?

¹⁵ Mu tay fanam i yan ko thin ni ke yog e pi tapigpig rok Got nib gel e michan’ rorad. I gaar David: “Somol e ayuw rog ma yoror rog; ma ir e ba pagan’ug ngak. Ma pi’ e ayuw nge felfelan’ ngog.” (Ps. 28:7, BT) I weliy Paul nri ma pagan’ ngak Got ni gaar: “Cha’nem ni gadad ba t’uf rok e ir e ke pi’ gelngidad kad gelgad u fithik’ e pi n’ey ni gubin!” (Rom. 8:37) Nap’an ni nang Jesus ni dabki n’uw nap’an ma yira kol min li’ ngem’, me yog boch e thin ni be dag nrib fel’ e tha’ u thilrow Got, ya gaar: “Gathi goo gag ni bay gu wan gu par, ya en ni Chitamangiy e ba’ rog.” (John 16:32) Mang e be tamilangnag e pi thin rorad nem? Ra bagayad ma be dag nri ma pagan’ ngak Jehovah. Faanra ke yag ngodad e pagan’ ni bod yad ma rayog ni nga darod u fithik’ e magawon nib mudugil lanin’dad.—Mu beeg e Psalm 46:1-3.

ANGIN NRA YIB NI BOCHAN E AYUW NI MA PI’ GOT NGOM

16. Mang nib ga’ fan ni ngaud filed e Thin rok Got?

¹⁶ Pi Kristiano e ke mudugil lanin’rad ni gathi bochan ni yad ma pagan’rad ngorad. Danga’, ya re n’ey e bochan ni kar nanged Got ma be pagan’rad ngak. Ra ngad filed e Bible, maku rayog ni ngad nanged Got, me pagan’dad ngak. Reb e walag ni ppin ni ke kireban’ nib gel e ke yog nnap’an ni ke beeg u bayay nge bayay e thin nu Bible ni ma fal’eg lanin’uy ma ke fel’ rogon. Gur, gad ma tay e fol Bible ni tabinaw ni gubin e wik ya gad be fol ko n’en ke yog fare tapigpig nib yul’yul’ mab gonop ngodad? Gad ra fil e Thin rok Got ma ra ayuwegdad ni nge yag ngodad e lem rok fare psalmist ni gaar: “Rib t’uf rog e motochiyel rom! Gu ma par ni gu ma lemnag ni polo’ e rran.”—Ps. 119:97.

17. (a) Mang reb e kanawo’ ni ma ayuwegdad Jehovah riy ni nga i mudugil lanin’dad? (b) Uw rogon ni ke ayuwegem reb e chep u murung’agen reb e walag?

¹⁷ Maku bay e pi babyor rodad ni kan fek u Bible ni bay e thin riy ni ma gelnag e pagan’ rodad ngak Jehovah. Boor e walag ni ke ayuwegrad e thin ko pi magazine rodad ni be weliy murung’agen e n’en ni buch rok e pi walagdad. Reb e walag ni ppin u Asia ni ke yib e m’ar ngak ni bipolar mood disorder e kari felfelan’ u nap’an ni ke beeg u murung’agen reb e walag ni pumoon ni missionary ni ki yib e m’ar ngak ni aram rogon. Yugu aram rogon ni ke yib e re magawon nem ngak, ma ke yag ni nge ulul ko pigpig ku Got u fithik’ e yul’yul’. Me yoloy fare walag ni ppin ni gaar, “Re babyor nem e ke ayuwegeg ni nggu nang u murung’agen e magawon rog ma ke pi’ e athap ngog.”

18. Mang fan nthingar da meybilgad?

¹⁸ Rayog ni nge ayuwegdad e meybil ko urngin e magawon ni ma yib ngodad. Ke tamilangnag  Paul feni ga’ fan e meybil u nap’an ni yog ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Gur, gad ma meybil ni gubin ngiyal’ u nap’an ni ke yib e magawon ngodad nib gel? Alex ni reb e walag u Britain ni ke n’uw nap’an ni ma yib e kireban’ nib gel ngak e ke yog ni n’en ni kari ayuweg e “ma non ngak Jehovah u daken e meybil ma ma beeg e Bible.”

19. Uw feni ga’ fan ni ngan un ko muulung?

¹⁹ Ngan chag ngak e pi walagdad u nap’an e pi muulung rodad e ku ra ayuwegdad ko tirok Got ban’en. Reb e psalmist e yoloy ni gaar: “Kug tawrengnag lan e yoror ko tempel rok Somol.” (Ps. 84:2) Gur, ku gad ma thamiy ni aram rogon? Lani, ni kan weliy murung’agen faram e ke weliy nrib ga’ fan ngak ni nge un ko urngin e muulung ko Kristiano me chag ngak e pi walag. Me gaar: “Gu manang ni thingar gu un ko muulung nfaanra gu baadag ni nge ayuwegeg Jehovah.”

20. Uw rogon, ma machib ni gad ma tay e ra gelnag e michan’ rodad?

²⁰ Maku rayog ni nge gel e michan’ rodad nfaanra ngaud uned ko machib u fithik’ e pasig. (1 Tim. 4:16) Reb e walag ni ppin u Australia ni ke yib boor e magawon ngak e ke yog ni gaar: “Machib e aram e bin tomur ni gu baadag ni nggu rin’, machane ke piningeg reb e piilal ko machib. Ma kug un ngak. Gu be lemnag ni Jehovah e be ayuwegeg; ya gubin ngiyal’ ni gu ra un ko machib, ma gu ma felfelan’.” (Prov. 16:20) Boor e walag ni kar pirieged nnap’an ni yad be ayuweg boch e girdi’ ni nge mich Jehovah u wan’rad maku be gelnag e michan’ rorad. Yad ra rin’ ni aram rogon, ma dakur lemnaged e magawon rorad mar tedan’rad ko tin nrib ga’ fan.—Fil. 1:10, 11.

21. Mang e kan micheg ngodad u murung’agen e pi magawon ni ma yib ngodad?

²¹ Boor e ayuw ni ma pi’ Jehovah ngodad ya nge yag ni ngad k’adedan’dad ko pi magawon ni ma yib ngodad. Faanra ngad paged ni nge ayuwegdad, ma rayog ni ngad felfelan’gad nyugu aram rogon ni bay e magawon rodad. Maku, rayog ni nge par nib mudugil lanin’dad nfaanra ngad fal’eged i lemnag e n’en ni ke rin’ e pi tapigpig rok Got, ma ngad folwokgad rorad. Yugu aram rogon nrayog ni nge yoor e magawon rodad ya be chugur i yan e tomur ko re m’ag ney, ma rayog ni ngad thamiyed e n’en ni ke thamiy Paul ya ke yog ni gaar: “Ba gel e maad’ad ni yibe tay ngomad yu ngiyal’, machane dawor nthang e fan romad. . . . Ereray fan nri der mulan’dad. (2 Kor. 4:9, 16) Daken e ayuw rok Jehovah, ma rayog ni nga darod u fithik’ e pi magawon nib mudugil lanin’dad.—Mu beeg e 2 Korinth 4:17, 18.

Boch e thin nra tamilangnag murung’agen]

[Study Questions]

[Sasing ko page 14]

Nap’an ni ke yib e magawon nib gel ngom, ma ngam fanay e ayuw ni ke pi’ Jehovah ngom