Ki kalite leta lespri ou demontre?

“Ki lagras Senyer Zezi-Kri i avek [“sa leta lespri ki zot demontre,” NW].”​—FILEM. 25.

ESKI OU KAPAB REPONN?

Akoz nou bezwen veye ki kalite leta lespri nou demontre?

Ki latitid nou devret evite e ki mannyer nou kapab fer sa?

Ki mannyer nou kapab demontre en leta lespri ki batir kongregasyon?

1. Ki Pol ti swete kan i ti ekrir son bann konpanyon Kretyen?

KAN zapot Pol ti ekrir son bann konpanyon Kretyen, i ti dir plizyer fwa ki i swete ki Bondye ek Kris i aprouv sa leta lespri ki kongregasyon ti pe demontre. Par egzanp, i ti ekrir bann Galat: “Mon bann frer, ki lagras nou Senyer Zezi-Kri i avek [“sa leta lespri ki zot demontre,” NW]. Amenn.” (Gal. 6:18) Ki Pol ti oule dir par “sa leta lespri ki zot demontre”?

2, 3. (a) Parfwa ki Pol ti pe refer avek kan i ti servi sa mo “lespri”? (b) Ki kestyon nou kapab demande konsernan kalite leta lespri ki nou demontre?

² Parfwa Pol ti servi sa mo “lespri” pour refer avek sa lafors ki pous nou pour dir oubyen fer en keksoz dan en serten fason. En dimoun i kapab zantiy, dous, zenere, annan konsiderasyon pour lezot, e pare pour pardonnen. Labib i koz an byen lo “en lespri bon e trankil,” ek “en lespri kalm.” (1 Pyer 3:4; Prov. 17:27) De lot kote, en dimoun i kapab koz koze mirak, materyalis, ganny ofanse vitman, e annan en latitid endepandan. Pli pir ankor, i annan bann ki demontre en latitid imoral, dezobeisan, oubyen menm rebel.

³ Alor, kan Pol ti servi sa lekspresyon ki ‘Senyer Zezi-Kri i avek sa leta lespri ki zot demontre,’ i ti pe ankouraz son bann frer pour demontre en leta lespri ki an armoni avek lavolonte Bondye ek personnalite parey pour Kris. (2 Tim. 4:22; lir Kolosyen 3:9-12.) I byen pour demann nou lekor: ‘Ki kalite leta lespri mon demontre? Ki mannyer mon kapab pli byen demontre sa kalite leta lespri ki Bondye i kontan? Ki mannyer mon kapab ede pour annan en leta lespri pozitif dan kongregasyon?’ Annou pran legzanp en zarden tournsol. Dan sa zarden, sak sa bann fler  byen zonn i kontribye pour fer sa zarden zoli. Eski nou enn sa fler ki ede fer zoli kongregasyon? Sertennman nou devret fer zefor pour vin parey enn. Aprezan annou vwar ki nou kapab fer pour demontre sa leta lespri ki fer plezir Bondye.

REZET LETA LESPRI SA LEMONN

4. Kwa sa “Lespri dapre lemonn”?

⁴ Labib i dir nou: “Nou, nou pa’n ganny Lespri dapre lemonn, me nou’n ganny Lespri ki sorti kot Bondye.” (1 Kor. 2:12) Kwa sa “Lespri dapre lemonn”? I sa menm lespri ki ganny mansyonnen dan Efezyen 2:2 ki dir: “Zot ti pe viv dapre mannyer lemonn, an swivan sef pisans dan lespas, sa menm lespri ki aprezan pe travay dan bann zanfan dezobeisans.” Sa “lespas” i lespri sa lemonn oubyen fason panse sa lemonn ki otour nou parey ler ki nou respire. I ganny demontre par sa latitid, ‘personn pa pou dir mwan ki pour fer,’ oubyen ‘debat pour ou rezon.’ Sa i latitid bokou dimoun ozordi. Zot sa “bann zanfan dezobeisans” dan lemonn Satan.

5. Ki move leta lespri serten Izraelit ti demontre?

⁵ Bann tel latitid pa nouvo. Dan letan Moiz, Kora ti vir kont bann ki ti annan lotorite dan kongregasyon Izrael. I ti target Aaron ek son bann garson ki ti annan privilez pour servi konman pret. Petet i ti vwar zot lenperfeksyon oubyen i ti’n kapab panse ki Moiz ti pe donn privilez zis son bann fanmir. Nenport kwa ki Kora ti pe panse, i kler ki i ti’n konmans get keksoz dapre pwennvi en imen. I ti koz avek bann ki ti ganny apwente par Zeova san respe an dizan: “Nou’n ganny ase avek zot. . . . Akoz zot bezwen lev zot par lao kongregasyon?” (Nom. 16:3) Pareyman, Datann ek Abiram ti konplent kont Moiz e dir li ki i ti pe ‘esey zwe rol prens an tro lo zot.’ Kan zot ti ganny demande pour vin devan Moiz, zot ti reponn avek larogans: “Nou pa pe vini!” (Nom. 16:12-14) Definitivman Zeova pa ti dakor avek zot leta lespri. I ti egzekit tou sa bann rebel.​—Nom. 16:28-35.

6. Dan premye syek, ki mannyer serten ti montre ki zot ti annan en move latitid e kwa ki ti fer zot fer sa?

⁶ Serten dan premye syek ti osi kritik bann ki ti’n ganny konfye lotorite dan kongregasyon, zot ti “mepriz lotorite Bondye.” (Zid 8) Sa bann zonm pa ti satisfe avek privilez ki zot ti annan e zot ti esey enfliyans lezot pour al kont bann ki ti’n ganny apwente e ki ti pe fer sa travay ki Bondye ti’n donn zot avek devouman.​—Lir 3 Zan 9, 10.

7. Ki latitid nou merit evite annan dan kongregasyon?

⁷ I napa plas pour en tel leta lespri dan kongregasyon Kretyen, se pour sa rezon ki nou bezwen fer atansyon. Bann ansyen dan kongregasyon pa parfe, zis parey bann ansyen dan letan Moiz ek zapot Zan pa ti parfe. Bann ansyen i kapab fer fot ki afekte nou personnelman. Si sa i arive, i pa pou apropriye pour reazir dapre leta lespri lemonn par argimante. Ou pa pou dir, ‘mon oule ki lazistis i ganny fer’ oubyen ‘zot bezwen koz avek sa frer!’ Si Zeova i kapab les pase serten pti defo, eski nou pa kapab fer parey? Serten ki’n komet pese grav in refize pas devan komite ansyen ki’n ganny apwente pour ed zot zis akoz zot in rekonnet en pti defo ki bann ansyen i annan. Zot parey en pasyan ki refiz tretman medikal ki ti pou geri li, zis akoz i pa kontan en keksoz avek sa dokter.

8. Ki verse ki kapab ed nou annan en bon pwennvi lo bann ki pe diriz kongregasyon?

⁸ Pour evit annan sa kalite leta lespri  i byen ki nou rapel sa ki Labib i dir lo Zezi: “Dan son lanmen drwat ti annan set zetwal.” Sa bann “zetwal” i reprezant tou Kretyen swazir e pe osi refer avek bann ansyen dan kongregasyon. Zezi i kapab diriz sa bann “zetwal” ki dan son lanmen dan fason ki i vwar apropriye. (Rev. 1:16, 20) Konman sef kongregasyon Kretyen, i annan tou kontrol lo konsey ansyen. Si en dimoun lo konsey ansyen i vreman bezwen ganny disiplinen, sa Enn ki annan ‘lizye parey en laflanm dife’ pou fer sa ki devret ganny fer dan Son letan ek fason apropriye. (Rev. 1:14) Antretan, annou kontinyen demontre respe pour bann ki’n ganny apwente par lespri sen akoz Pol ti ekrir: “Obei zot bann dirizan e swiv zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.”​—Ebr. 13:17.

9. (a) Ki tes en Kretyen i kapab eksperyanse si i ganny korize oubyen disiplinen? (b) Ki pli bon fason pour reakte kan nou ganny korize?

⁹ Leta lespri en Kretyen i kapab ganny teste si i ganny disiplinen oubyen perdi en privilez dan kongregasyon. En zenn frer ti ganny konseye avek lanmour par bann ansyen akoz bann zwe video vyolan. Malerezman, i pa ti aksepte konsey e i ti bezwen ganny tire konman asistan ministeryel akoz i ti nepli kalifye. (Ps. 11:5; 1 Tim. 3:8-10) Apre sa, sa frer ti montre ki i pa ti dakor par kontinyelman ekrir biro brans e menm ankouraz lezot  dan kongregasyon pour fer parey. Me nou, nou pa pou kas lape dan kongregasyon zis akoz nou anvi zistifye nou lekor. Pa i ti pou pli byen pour vwar disiplin konman en fason pour rekonnet en febles ki nou pa ti realize nou annan e aksepte ler nou ganny korize!​—Lir Lamantasyon 3:28, 29. *

10. (a) Eksplike ki nou kapab aprann konsernan sa bon e move leta lespri dan Zak 3:16-18. (b) Ki rezilta nou ekspekte si nou demontre “lasazes ki sorti dan lesyel”?

¹⁰ Zak 3:16-18 i ed nou konpran ki savedir demontre en bon leta lespri oubyen en move leta lespri dan kongregasyon. I dir: “Kot i annan zalouzi ek lanbisyon egois, i annan dezord ek tou sort move keksoz. Me lasazes ki sorti dan lesyel i premyerman pir, answit i kontan lape, i modere, pare pour met dakor, i ranpli avek pitye ek bon laksyon, san fer preferans e san lipokrizi. Fri lazistis i ganny senmen dan lape par bann ki viv dan lespri lape.” Anmezir ki nou travay an armoni avek “lasazes ki sorti dan lesyel,” nou bann bon kalite pou ed nou annan en bon leta lespri parmi nou bann frer ek ser.

ANNAN EN LETA LESPRI KI DEMONTRE RESPE DAN KONGREGASYON

11. (a) Annan en leta lespri ki demontre respe pou ed nou evit kwa? (b) Ki nou aprann atraver legzanp David?

¹¹ Nou devret gard antet ki Zeova ki’n apwent bann ansyen pour ‘pran swen kongregasyon Bondye.’ (Akt 20:28; 1 Pyer 5:2) Alor, nou realize ki i pli saz pour respekte laranzman Bondye ki swa nou annan privilez pour servi konman ansyen oubyen non. Mentenir en bon leta lespri i kapab ed nou evite vin tro sansib konsernan privilez dan kongregasyon. Kan Sail, lerwa Izrael, ti realize ki David ti en menas pour son rwayote, Sail ti “kontinyelman get David avek mefyans.” (1 Sam. 18:9) Sa lerwa ti devlop en move leta lespri e i ti menm anvi touy David. Olye konsantre lo privilez parey Sail, pa i ti pou pli bon fer parey David. Malgre tou sa lenzistis ki i ti pas ladan, sa zenn onm ti mentenir en leta lespri respektab anver bann ki Zeova ti’n donn lotorite.​—Lir 1 Samyel 26:23. *

12. Kwa ki pou ede mentenir linite dan kongregasyon?

¹² Vi ki nou annan diferan pwennvi, parler nou kapab irit kanmarad. Sa i kapab arive menm parmi bann sirveyan. Labib i donn nou sa konsey: “Setaki montre plis respe pour kanmarad” e “pa bezwen annan en tro gran lopinyon lo oumenm.” (Rom. 12:10, 16) Dan plas ensiste ki nou ki byen, nou bezwen admet parfwa ki i annan plizyer fason akseptab pour vwar en sityasyon. Si nou esey konpran fason panse lezot sa i kapab ede pour annan linite dan kongregasyon.​—Fili. 4:5.

13. Ki mannyer nou devret vwar nou lopinyon e ki legzanp dan Labib ki eksplik sa?

¹³ Eski sa i vedir i mal pour donn nou lopinyon si nou santi ki i annan en keksoz dan kongregasyon ki bezwen ganny aziste? Non. Dan premye syek, i ti annan en gran diskisyon ki ti leve. Bann frer “ti deside ki Pol ek Barnabas, akonpannyen avek detrwa lezot frer, i . . . mont Zerizalenm pour diskit sa problenm avek bann zapot ek bann ansyen.” (Akt 15:2) San okenn dout sak sa  bann frer ti annan zot prop lopinyon lo sa size e fason ki i devret ganny rezourd. Kan sakenn ti’n eksprim son panse e en desizyon ti ganny fer avek led lespri sen, sa bann frer pa ti kontinyen enpoz zot prop lopinyon. Apre ki sa let konsernan sa desizyon ti ariv kot bann kongregasyon, “zot ti ranpli avek lazwa pour sa mesaz lankourazman” e zot “ti grandi e vin pli for” dan lafwa. (Akt 15:31; 16:4, 5) Pareyman ozordi, kan nou fer bann ansyen konn en problenm nou devret les sa problenm dan zot lanmen e annan konfyans ki avek led lespri sen zot pou kapab regle sa problenm.

DEMONTRE EN BON LETA LESPRI ANVER LEZOT

14. Ki mannyer nou kapab demontre en bon leta lespri?

¹⁴ Nou annan bokou loportinite pour demontre en bon leta lespri. Sakenn ant nou i kapab fer bokou dibyen si nou demontre en leta lespri ki pare pour pardonnen kan nou ganny ofanse. Parol Bondye i dir nou: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.” (Kol. 3:13) Sa lekspresyon “sak fwa ki enn ant zot i ofans en lot” i vedir ki i kapab annan rezon pour nou irite avek lezot. Par kont, dan plas tro sansib anver zot bann pti manni e gat lape dan kongregasyon, nou merit fer zefor pour imit Zeova par volonterman pardonn lezot e kontinyen dan nou servis ansanm.

15. (a) Ki nou kapab aprann atraver legzanp Zob? (b) Ki mannyer lapriyer i kapab ed nou demontre en bon leta lespri?

¹⁵ Konsernan pardonnen, nou kapab aprann avek legzanp Zob. Son trwa swadizan konsolater ti ofans li par bann parol blesan. Kantmenm sa, Zob ti pare pour pardonn zot. Ki mannyer sa? “I ti priy pour son bann konpanyon.” (Zob 16:2; 42:10) Priy pour lezot i kapab sanz nou latitid anver zot. Priy pour tou nou bann frer ek ser pou ed nou devlop sa leta lespri parey pour Kris. (Zan 13:34, 35) An plis ki priy pour nou bann frer ek ser, nou devret priy pour ganny lespri sen. (Lik 11:13) Lespri sen Bondye pou ed nou demontre vre kalite Kretyen dan nou fason azir anver lezot.​—Lir Galat 5:22, 23.

KONTRIBYE POUR ANNAN EN BON LETA LESPRI DAN LORGANIZASYON BONDYE

16, 17. Konsernan ‘sa leta lespri ki nou demontre’ ki ou determinen pour fer?

¹⁶ Pa i pou annan en bon latmosfer dan kongregasyon si sakenn ant nou i demontre en bon leta lespri! Apre ki nou’n egzamin sa bann pwen dan sa lartik, petet ou’n vwar kote ou kapab amelyor lafason ki ou pe demontre en bon leta lespri pour batir kongregasyon. Si sa i le ka, annou les Parol Bondye ed nou fer bann azisteman neseser. (Ebr. 4:12) Pol ti vreman konsernen avek lafason ki i ti azir dan kongregasyon. I ti dir: “Mon annan en konsyans kler, me sa, pa rann mwan inosan, se Senyer limenm ki ziz mwan.”​—1 Kor. 4:4.

¹⁷ Anmezir ki nou fer bokou zefor pour azir an armoni avek lasazes ki sorti dan lesyel, nou pa pou ensiste lo nou prop lopinyon oubyen mazinen ki nou merit ganny plis privilez, me o kontrer nou pou kontribye ki i annan en bon leta lespri dan kongregasyon. Par annan en leta lespri ki pare pour pardonnen e annan bann panse pozitif lo lezot, nou pou anpe avek nou bann frer ek ser. (Fili. 4:8) Anmezir ki nou fer sa bann keksoz, nou kapab annan konfyans ki Zeova ek Zezi pou apresye ‘sa leta lespri ki nou demontre.’​—Filem. 25, NW.

[Not anba lo paz]

[Kestyon]

[Portre lo paz 20]

Si nou medit lo rol Zezi, ki lefe sa pou annan lo lafason ki nou reazir kan nou ganny konseye?