1. ¿Mbaʼépa heta vése heʼi Pablo umi kuatiañeʼẽ ohaivaʼekuépe?

 UMI kuatiañeʼẽ apóstol Pablo ohaivaʼekuépe heta vése heʼi oipotaitereiha Ñandejára ha Cristo oguerohory umi kongregasión. Pór ehémplo, ohai umi ermáno Galaciayguápe: “Che ermanokuéra, hiʼãite chéve ñande Ruvicha Jesucristo mbaʼeporã ijojahaʼỹva toĩ pene korasõme. Taupéicha” (Gál. 6:18, NM). ¿Mbaʼépa heʼise raʼe upérõ?

2, 3. a) ¿Mbaʼe rehépa apóstol Pablo oñeʼẽkuri Gálatas 6:18-pe? b) ¿Mbaʼépa iporã ñañeporandu?

² Pablo oñeʼẽkuri umi mbaʼe oĩvare ñande pyʼapýpe ha ñanemomýiva ñapensa ha jajapo hag̃ua peteĩ mbaʼe. Ikatu peteĩ tapicha hory, imbaʼerechakuaa, ipojera, oporohayhukuaa ha ontende hapichakuérape. La Bíbliape ojeguerohory umi ‘hekokirirĩ ha ipyʼaporãvape’ ha avei umi ‘ndaipyʼatarováivape’ (1 Ped. 3:4, BNP; Prov. 17:27). Péro oĩ avei umi oñembohorýva hapicháre, oikóva mbaʼerepy rapykuéri, ipirepererĩva, oikóva iñakãre, ha ivaiveha katu oĩ umi hekovaíva, naiñeʼẽrendúiva térã oñemoĩva umi omoakãvare.

³ Pablo heʼívo “hiʼãite chéve ñande Ruvicha Jesucristo mbaʼeporã ijojahaʼỹva toĩ pene korasõme”, omokyreʼỹ ermanokuérape opensa ha oiko hag̃ua Jehová oipotaháicha (2 Tim. 4:22; elee Colosenses 3:9-12). Upévare opavave jaservíva Jehovápe ñañeporanduvaʼerã: “¿Mbaʼeichagua persónapa che? ¿Mbaʼépa ajapo porãve vaʼerã Ñandejára cheguerohory hag̃ua? ¿Ikatúpa chekyreʼỹve aipytyvõ hag̃ua che kongregasiónpe?”. Ñapensamína: Oñeñotỹhápe hirasól, káda yvoty omoporã upe plantasión. ¿Ikatúpa ere rembojeguaha ne kongregasión pe yvotýicha? Enterovéva ñañehaʼãvaʼerã jajapo upéva. Jahechamína  mbaʼéichapa jaikovaʼerã ikatu hag̃uáicha Ñandejára ñandeguerohory.

4. ¿Mbaʼépa hína “pe espíritu iñasãiva yvytúicha”?

⁴ La Biblia heʼi: “Ñande jarresivi pe espíritu oúva Ñandejáragui, ndahaʼéi ko mundopegua espíritu” (1 Cor. 2:12, NM). ¿Mbaʼépa hína “ko mundopegua espíritu”? Efesios 2:2 oñeʼẽ avei upévare heʼívo: “Peteĩ tiémpope peẽ peikovaʼekue ko múndope ojeikoháicha ha pejapo ko múndo ruvicha oipotáva. Haʼe ogoverna pe espíritu iñasãiva yvytúicha opárupi ha omomýiva umi hénte naiñeʼẽrendúivape” (NM). “Pe espíritu iñasãiva yvytúicha” heʼise hína umi hénte opensa lája. Opárupi ningo ñahendu ojeʼe: “Ndaipóri heʼivaʼerã chéve mbaʼépa ajapóta”, térã: “Ani reheja ojehasapa nde ári, redefendevaʼerã nde derécho”. ‘Umi hénte naiñeʼẽrendúiva’ opensa upéicha ha oĩ Satanás poguýpe.

5. ¿Mbaʼépa ojapovaʼekue heta isrraelíta?

⁵ ¿Oñepensápa upéicha koʼág̃a rupínte? Nahániri. Moisés tiémpopema, Coré opuʼãvaʼekue umi omoakãvare Israel. Aarón ha itaʼyrakuéra oservi saserdóteramo, péro Coré oñemoĩ hesekuéra. Oiméne haʼe ojesarekoitereirakaʼe idefektokuérare, térã oimoʼã Moisés omeʼẽ hague chupekuéra upe tembiapo ihénte haguérente. Tahaʼe haʼeháicha, Coré ndohechái umi mbaʼe Jehová ohechaháicha, ha upévare otaky umi kuimbaʼe Ñandejára oiporavovaʼekuére. Hiʼariete heʼi hesekuéra: “¿Mbaʼe rehe piko peẽ peñembotuicha ha peñemoĩ opa Israel aty guasu rehe?” (Núm. 16:3, ÑÑB). Avei, Datán ha Abiram oñemoĩvaʼekue Moisés rehe ha heʼi: “¿Koʼág̃apa reikoséma avei ore ruvicha guasúramo?”. Ha Moisés ohenoikárõ guare chupekuéra, heʼi vai guasu hikuái: “¡Ndorohomoʼãi!” (Núm. 16:12-14). Jehovápe ndogustaiete umi mbaʼe oikóva, upévare ojuka opavave opuʼãvape umi kuimbaʼe haʼe oiporavovaʼekuére (Núm. 16:28-35).

6. ¿Mbaʼeichagua kristiánopa oĩvaʼekue avei síglo primérope, ha mbaʼéicha rupípa?

⁶ Síglo primérope oĩvaʼekue avei otaky ha odespresiáva umi ermáno omoakãvape kongregasión (Jud. 8). Ikatu oime oipotave raʼe hikuái priviléhio kongregasiónpe ha omboliga umi ermánope opuʼã hag̃ua ansianokuérare, jepe umi omotenondéva oñehaʼã okumpli porã pe tembiapo Ñandejára omeʼẽva chupekuéra (elee 3 Juan 9, 10).

7. ¿Mbaʼépa naiporãi jajapo?

⁷ Jaikuaaháicha, ñañatende porã vaʼerã ani hag̃ua koʼã mbaʼe oiko kongregasiónpe. Moisés ha apóstol Juan tiémpope umi ansiáno ndahaʼeivaʼekue perfékto. Koʼág̃a upéichante avei, ha umi mbaʼe heʼi ha ojapóva hikuái ikatu ñanemoñeñandu vai. Péro oikóramo upéva ndovaléi ñapensa ko múndope oñepensaháicha ha ñaimoʼã tekotevẽha katuete ojejapo “hustísia”, térã jaʼe: “¡Ndaipotái ojeheja rei ko ansiánope!”. Ñapensamína, Jehová jepe ombohasa rei umi ansiáno ojavyʼimíramo, ¿ha piko ñande ndajajapomoʼãi avei upéva? Oĩ kristiáno ojapóva peteĩ mbaʼe ivaietereíva ha tekotevẽ oñepytyvõ chupe peteĩ komite hudisiál rupive. Péro haʼe opensa umi ansiáno tuicha idefektoha, upévare noñepresentái pe komitépe. Umi ojapóva upéicha haʼete umi hasýva ha ndosegiséiva peteĩ tratamiénto ndogustáigui reínte chupe pe doktór.

8. ¿Mbaʼe téystopa ñanepytyvõta ñamombaʼe hag̃ua ansianokuérape?

⁸ Ani hag̃ua ñapensa upéicha, ñanemanduʼavaʼerã la Biblia heʼiha “ipo  akatúape” Jesús oguerekoha “siete mbyja”. ¿Mbaʼépa orrepresenta umíva? Orrepresenta umi ansiáno unhídope ha avei opavave umi ansiáno oĩvape kongregasionkuérape. Haʼe ikatu oiporu koʼã “mbyja” oĩva ipópe opyta porãveháicha chupe (Rev. 1:16, 20). Jesús omoakã kongregasión ha oguerekopaite ipoguýpe umi ansiánope. La Biblia heʼi hese: “Umi hesa haʼete tata rendy”. Upéva heʼise oikuaapaiteha oikóva kongregasiónpe, ha tekotevẽramo okorrehi peteĩ ansiánope, ojapo itiempoitépe ha iporãveháicha (Rev. 1:14). Upe aja, ñamombaʼevaʼerã umi oñenombrávape espíritu sánto rupive omoakã hag̃ua kongregasión. Pablo ohaivaʼekue: ‘Peneñeʼẽrendúke umi penemoakãvape ha peñemoĩ ipoguypekuéra. Haʼekuéra ningo oñangareko penderehe kaneʼõʼỹre, oikuaágui ojechavaʼerãha Ñandejára ndive opa ojapovaʼekuére. Peñehaʼã taivevýi chupekuéra hembiapo, ani ipohýi. Ndapejapóirõ upéicha, naiporãichéne peẽme’ (Heb. 13:17).

9. a) ¿Mbaʼépa ikatu oiko peteĩ kristiáno ojekorrehírõ? b) ¿Mbaʼépa jajapovaʼerã jajekorrehíramo?

⁹ Peteĩ kristiáno ikatu ohechauka oĩva ikorasõme ojekorrehi jave térã ojepeʼárõ chugui ipriviléhio. Ñapensamína ko kásore: Peteĩ siérvo ministeriál imitãva ojepokuaa ohuga umi videohuégo violénto, upémarõ ansianokuéra oñemoñeʼẽ chupe. Péro haʼe nohendúi pe konsého ha ojepeʼa chugui ipriviléhio nokumplivéima rupi oñehaʼarõva peteĩ siérvo ministeriálgui (Sal. 11:5; 1 Tim. 3:8-10). Upéi  haʼe oiko omombeʼu opárupi ndogustaiha chupe pe ojedesidíva, ha oguerahauka heta kárta sukursálpe oñeʼẽ vaihápe umi ansiánore. Hiʼarive omboliga umi ermánope ohai hag̃ua avei sukursálpe. ¿Iporã piko japerhudika ñane kongregasión nañarrekonoseséi rupi jajavyha? Jajekorrehíramo ñanemanduʼavaʼerã upéva ñanepytyvõha jahechakuaa hag̃ua umi defékto yma ndajahechaivaʼekue, ha jajeplagea rangue, jaaseptavaʼerã (elee Lamentaciones 3:28, 29).

10. a) ¿Mbaʼépa ohechauka Santiago 3:16-18? b) ¿Mbaʼéichapa ñanepytyvõ jahechaukáramo pe “arandu Ñandejáragui oúva”?

¹⁰ Santiago 3:16-18 ñanepytyvõ jahechakuaa hag̃ua mbaʼéichapa jaikovaʼerã kongregasiónpe ha mbaʼépa naiporãi jajapo: “Peẽnteséramo ha pepuʼã ojuehe, oĩta sarambi ha opaichagua teko aña. Umi oguerekóva arandu [Ñandejáragui] oúva katu hekopotĩ, ndaipochykuaái, ipyʼaporã ha iñeʼẽrendukuaa. Upéicha avei, oporoporiahuverekokuaa, iñeʼẽ añete, ndahovamokõiri, ha ojapo iporãva. Ha umi oñehaʼãva oporomoingo porã hag̃ua, ku oñotỹvaramoguáicha pyʼaguapy omonoʼõ chugui tekojoja”. Jahechaukáramo pe “arandu Ñandejáragui oúva”, katuete ñaipytyvõta oĩ hag̃ua pyʼaguapy kongregasiónpe.

11. a) ¿Mbaʼépa ndajajapomoʼãi jarrespetáramo Jehová odesidíva? b) ¿Mbaʼépa ñanemboʼe David ehémplo?

¹¹ Aníkena ñanderesarái Jehová omoĩ hague umi ansiánope “oñangareko hag̃ua ovecharerekuáicha Ñandejára kongregasiónre” (Hech. 20:28, NM; 1 Ped. 5:2). Upévare, oiméramo ñande ansiáno térã nahániri, iporãve jarrespeta Jehová odesidíva. Jajapóramo péicha, ndajaikomoʼãi jajesarekoiterei umi priviléhiorente. Rréi Saúl oimoʼãrõ guare David oipeʼaseha chugui ipuésto, ou “ndojeroviavéi David rehe” (1 Sam. 18:9). Hiʼarive opensa rupi upéicha, amo ipahápe ojukase voi chupe. Ha ñande, ¿mbaʼépa ñamotenondeñaína? Jaiko rangue jajepyʼapyeterei peteĩ puéstorente Saúl ojapo haguéicha, ikuentave jasegi David ehémplo. Chupe ningo heta oñembohasa asy, upéicharõ jepe akóinte orrespeta pe autorida Ñandejára omoĩvaʼekue (elee 1 Samuel 26:23).

12. ¿Mbaʼéichapa ikatu ñaipytyvõ ojeiko hag̃ua peteĩ ñeʼẽme kongregasiónpe?

¹² Ñande ningo nañapensái peteĩchapa ha sapyʼánte ikatu jajoavy ñane ermanokuérandi, ha upéva ikatu oiko avei umi ansiáno apytépe. Péro ko konsého oĩva la Bíbliape ikatu ñanepytyvõ: “Peñehaʼã peẽ raẽ pehechauka pemombaʼeha pende rapichápe” ha “ani pepensa pendevaletereiha” (Rom. 12:10, 16, NM). Jaiko rangue ñaimoʼã ñande jaʼévante iporãveha, ñarrekonosevaʼerã umi ótro opensáva ikatuha oĩ porã avei. Ñañehaʼãramo ñantende ñande rapichakuérape, ñaipytyvõta ojeiko hag̃ua peteĩ ñeʼẽme kongregasiónpe (Filip. 4:5).

13. ¿Mbaʼe ehémplopa ohechauka tekotevẽha jajerovia umi ansiánore?

¹³ ¿Heʼisépa upéva ndovaleiha jaʼe mbaʼeve jahechakuaáramo tekotevẽha oñekambia peteĩ mbaʼe kongregasiónpe? Nahániri. Síglo primérope oikovaʼekue peteĩ provléma ijetuʼúva, upémarõ umi ermáno ohecha “iporãtaha omondóramo Pablo, Bernabé ha ótro ermánope umi apóstol ha ansianokuéra rendápe Jerusalénpe, oñeʼẽ hag̃ua upe oikovaʼekuére” (Hech. 15:2, NM). Upépe oiméne káda apóstol ha ansiáno opensa mbaʼéichapa iporãvéta oñesolusiona upe provléma.  Káda uno heʼi opensáva ha upe rire espíritu sánto rupive oñemoĩ peteĩ ñeʼẽme. Upe guive haʼekuéra voi orrespeta pe ojedesidivaʼekue ha ndoikói oñemohatã opensávapente. Ha oñemondórõ guare umi kárta kongregasionkuérape oñemombeʼu hag̃ua mbaʼépa ojedesidi, enterove umi ermáno “ovyʼaiterei oñemokyreʼỹ haguére chupekuéra” ha “ojerovia mbareteve” (Hech. 15:31; 16:4, 5, NM). Koʼág̃a upéicha avei, ñamombeʼúramo ansianokuérape umi mbaʼe ñandepyʼapýva, jahejavaʼerã ipopekuéra pe situasión. Haʼekuéra oñemboʼéta Jehovápe ha ojapóta ikatúva guive osolusiona hag̃ua upe provléma.

14. ¿Mbaʼéichapa ikatu jahechauka jaikoseha pyʼaguapýpe ñande rapichándi?

¹⁴ Sapyʼánte oĩramo ñanemoñeñandu vaíva, jajapovaʼerã ikatúva guive ñantende hag̃ua ñande rapichápe, upéicha jaikóta pyʼaguapýpe hendive. Ñandejára Ñeʼẽ omeʼẽ ko konsého iporãitereíva: “Pesegíkena peñoaguanta ha peñoperdona pende pyʼaite guive, pejapo upéva oĩramo jepe penembopochýva. Jehová peneperdona haguéicha ipyʼaite guive, upéicha avei pejapovaʼerã peẽ” (Col. 3:13, NM). Heʼívo “oĩramo jepe penembopochýva”, ohechauka sapyʼánte oĩtaha ñanemoñeñandu vaíva. Péro jaiko rangue jajesarekoiterei ñane ermáno deféktore ha ñamoñepyrũ provléma kongregasiónpe, ikuentave ñahaʼanga Jehovápe ha ñaperdona chupe ikatu hag̃uáicha jaservi porã Ñandejárape oñondivepa.

15. a) ¿Mbaʼéichapa Job ehémplo ohechauka tekotevẽha ñaporoperdona? b) ¿Mbaʼéichapa ñanepytyvõta ñañemboʼéramo Jehovápe?

¹⁵ Job ehémplo ohechauka ñandéve mbaʼeichaitépa iñimportánte ñaporoperdona. Umi mbohapy iñamígo guaʼu okonsola rangue Jóbpe, omoñeñandu vai chupe. Upéicharõ jepe, “oñemboʼe [...] iñirũnguéra rehehápe” ha operdona chupekuéra (Job 16:2; 42:10, ÑÑB). Ñande avei ñañemboʼéramo ñande ermanokuérare, ikatu okambia umi mbaʼe ñapensáva hesekuéra ha jajoayhuvéta (Juan 13:34, 35). Avei jajerurevaʼerã espíritu sánto (Luc. 11:13). Upéva ñanepytyvõta jatratakuaa hag̃ua ñande rapichakuérape (elee Gálatas 5:22, 23).

16, 17. ¿Mbaʼépa nde redesidi rejapo rehesaʼỹijo rire ko artíkulo?

¹⁶ Jahecha haguéicha, káda ermáno oñehaʼãramo oiko porã opavavéndi ha opororrespeta, enterovéva oñevenefisiáta kongregasiónpe. Ñahesaʼỹijo rire ko artíkulo, ikatu hína jahechakuaa mbaʼépa tekotevẽ jajapo porãve. Oiméramo upéicha, jajapovaʼerã umi kámbio ha jaheja Ñandejára Ñeʼẽ ñanepytyvõ (Heb. 4:12). Apóstol Pablo oñehaʼãmbaite vaʼekue omoĩ ehémplo porã umi kongregasiónpe, haʼe heʼi: “Che konsiénsia ipotĩ, péro upéva ndohechaukái cherekojojaha; Jehová hína upe chehusgáva” (1 Cor. 4:4, NM).

¹⁷ Jahejáramo ñanesãmbyhy pe arandu oúva Ñandejáragui ha nañañemohatãi jaʼévapente térã nañapensái umi priviléhiorente, ikatúta ñaipytyvõ oĩ hag̃ua pyʼaguapy kongregasiónpe. Avei ñaperdonáramo ñane ermanokuérape ha ndajajesarekói ideféktore, jaikóta pyʼaguapýpe hendivekuéra ha ñaimembáta peteĩ ñeʼẽme (Filip. 4:8). Hiʼarive Jehová ha Jesús ovyʼaitereíta ñañehaʼã haguére jajapo iporãva (Filem. 25).