¿Mun töita ño ye munta bämike tuare?

“Kukwe kwin ñaka nuain bä ni kräke akwa ni Däkien Jesukristo tä nuainne ni kräke, ye tädre munta ja töi mike kwin yebe.” (FILEM. 25, TNM)

¿KUKWE NE GARE MÄI?

¿Nikwe ja töi mikadre kwin ye ñobätä ütiäte?

¿Kukwe meden ñaka nuaindre, aune dre käkwe ni dimikai?

¿Ni raba ja töi mike ño kwin konkrekasionte?

1. ¿Pablokwe tärä tikani ye ngwane dre ribebare kwe?

APÓSTOL Pablo käkwe ribebare bati bobu tärä tikani kwe yebätä, konkrekasion kwatire kwatire nämene bämike töi nämene kwin ye Kristo aune Ngöbö rabadre kain ngäbiti. Ñodre, kukwe ne tikani kwe nitre gálatas yei: “Kukwe kwin ñaka nuain bä ni kräke akwa ni Däkien Jesukristo tä nuainne ni kräke, munta ja töi mike kwin ye munta bämike ja mräkätre. Amén” (Gál. 6:18, TNM). ¿Kukwe yebiti dre mikani gare kwe?

2, 3. a) ¿Pablokwe niebare ja töi mike kwin ye ngwane dre gäräbare kwe? b) ¿Kukwe meden meden ni raba ngwentari jai?

² Texto nebätä “ja töi mike kwin” niebare, ye abokän ni töita kukwe niere aune jondron ruäre nuainne meden gärätä. Ñodre, nitre ruäre tä kukwe kwin nuainne, blite jäme ni madabe, ni mada tarere, mantiame aune töita ni madabätä. Nire tä “ja töi amne ja moto mik[e] kuin” bätä ‘ñaka nemen rubun’ ye tä nuainne kwin nieta Bibliakwe (1 Ped. 3:4; Prov. 17:27). Nitre mada abokän tätre ñäke nierare ni madai, tätre jondron kä nebätä känene jai, ñan jumenebätä, töita jabebätä, arato ja mika gure metre ye ñaka tuin ütiäte ietre, ñaka ni mada kukwei mike täte aune tätre bike kri.

³ Ye medenbätä, Pablokwe niebare “munta ja töi mike kwin ye munta bämike, ye medenbätä Däkien tädre munbe”, ye ngwane nämene nitre kristiano nübaire ja töi mike Ngöbö töita ño ye erere aune ja ngwen ni kristiano erere (2 Tim. 4:22, TNM; ñäkädre Colosenses 3:9-12 yebätä). Kä nengwane, ni itire itire rabadre ngwentari jai: “¿Ti töita ño nieta nitre madakwe? ¿Tikwe dre nuaindre ne kwe Ngöbökwe ti kadre ngäbiti? ¿Ti raba dre nuainne ne kwe konkrekasion tädre keteitibe?”. Kri blü kädekata girasol mikata keteitibe angwane tä nemen tuin bä nuäre. ¿“Kri blü” ye erere mä  tuin konkrekasionte? Ni jökrä käkwe ja di ngwandre ne kwe ni rabadre ye erere. Ye medenbätä, nikwe dre nuaindre ja töi mikakäre kwin aune Ngöbökwe ni kadre ngäbiti, ye ani kädriere.

MURIE KÄ NEBÄTÄ ÑAKA KADRE NGÄBITI

4. “¿Ni kä nebätä murie” ye dre gärätä?

⁴ Biblia tä niere: “Nun ñan ni kä nebätä murie kain ngäbiti, akwa nunkwe Ngöbö murie [...] kani ngäbiti” (1 Cor. 2:12, NGT). ¿“Ni kä nebätä murie” ye dre gärätä? Ye arabe kädrieta Efesios 2:2 yebätä, texto ye tä niere “ni töi kämekäme tä nüne ño kä nebtä Ngöbö rüere, ye kwrere jire mun nämane nüne. Amne Satana tä [murie] gobrane [...]. Erere arato, nitre Ngöbö Kukwei kitaka temen, ye ngätäite Satana ara tä sribire. Ngöbö rüere abti kä nüke mtare Satana ye mden nämane mun töi mike nüne ño abko erere mun nämane nüne kena”. “Murie” nieta ye abokän nitre kä nebätä tä ja töi mike ño meden bämikata, aune murie ye tä mate kä jökräbiti tibien murie metrere ye kwrere. Ñodre, kä nengwane nitre kwati tä niere: “Dre nuaindre tikwe ye ni mada ñaka raba niere tie”, “Mä ñaka ja tuanmetre rätädre ni madai”. “Nitre Ngöbö Kukwei kitaka temen” tä ja mike Satanakri tätre kukwe ye nuainne.

5. ¿Nitre Israel ruäre ja töi mikani ño käme?

⁵ Nitre tä ja töi mike kä nengwane ye erere nuain nämene kirabe. Moisés näire Coré ja mikani nitre nämene kädekani ji ngwanka käne juta Israel ye rüere. Aarón bätä monsotre kwe nämene sribi sacerdote nuainne ye rüere ja mikani metrere kwe. Kukwe nämene nainte Aarón aune monsotre kwe yei ye mikani ñärärä kwe, arato Moisés mräkä ye aibe mikani sribi ütiäte nuainne niara namani nütüre. Niara ñaka ja töi mikani Ngöbö erere, ñakare aune nitre kädekani Jehovakwe ye rüere ñäkäbare kwe. Rubune kwärä niebare kwe: “Nun nibira nainte mun käne [...]. ¿Ñobätä mun rabadre ja mike bäri kri konkrekasion Jehovakwe yebiti ta?” (Núm. 16:3). Ye erere arato, Datán bätä Abiram rubune kwärä niebare kwetre Moisés ie: “¿Mä tö ja tuai bäri ütiäte nunbätä nemen mrä?”. Moisekwe niaratre käräbare ye ngwane ngrarete kwärä niebare kwetre: “¡Nun ñaka rikai känti!” (Núm. 16:12-14). Kukwe ye ñaka namani tuin kwin Jehovai, yebätä nitre nämene bike kri ye jökrä murie ketani kwe (Núm. 16:28-35).

6. ¿Nitre kristiano siklo kena ruäre ja töi mikani ño käme, aune ñobätä nuainbare kwetre?

⁶ Arato, siklo kena nitre ruäre käkwe ñäkäbare nitre nämene kädekani ji ngwanka konkrekasionte ye rüere aune ñan mikani ütiäte kwetre jai (Jud. 8). Ni raba niere sribi nämene mikani niaratre kisete ye ñan namani tuin ütiäte ietre. Arato, nitre ye tö namani nitre mada tuai ñäke blo nitre kädekani nämene ja di ngwen sribi Ngöbökwe ye nuainne kwin ye rüere (ñäkädre 3 Juan 9, 10 yebätä).

7. ¿Kukwe medenbätä nikwe ja ngwandre mokre konkrekasionte?

⁷ Ja töi mikadre ye erere konkrekasionte ye ñaka kwin. Aisete, ja ngwandre mokre. Nitre ji ngwanka Moisés näire bätä apóstol Juan näire, ye erere kä nengwane nitre umbre konkrekasionte tätre ja mike ngite arato. Niaratre raba kukwe ñaka debe nuainne abokän raba mate tare nibätä. Ye erere rabadre bare angwane nikwe ñaka ja töi mikadre nitre kä nebätä erere, aune ñaka niedre “kukwe ükadrete” ja mräkä yebe, bätä dre nuainbare kwe ye ererebätä mikadre “ja ngie nuin”. Kukweta nainte nie ye Jehovata juen ta nibiti, ¿ye erere ni raba nuainne arato? Ja mräkätre ruäre ja mikani ngite krubäte, akwa ñan tö näin nitre umbre kädekani konkrekasionte yekänti ja di käräkäre. ¿Ñobätä? Nitre umbre ye ie kukwe tä nainte ye aibe tä niaratre töite aune yebätä ñan töta nemen näin känti. Ni raba töbike ni ni  kräkäi mikaka yebätä, ni ye ñan mate kwin nibätä akwa tä ni kräkäi mike ye nita kain ngäbiti, ¿ñan ererea?

8. ¿Texto meden tä ni dimike nitre umbre konkrekasionte ye mike tuin ütiäte jai?

⁸ Nikwe ñaka ja töi mikadre ye erere yekäre nikwe ngwandre törö jai Biblia tä niere Jesús “kise ruenkri abko te muke [tä] kwä kükü”. “Muke” ye tä nitre dianinkä nänkäre kä kwinbiti abokän tä sribire ni umbre erere bätä nitre umbre konkrekasionte ye bämike arato. “Muke” tä kisete ye niara raba jie ngwen töta nemen ye erere (Apoc. 1:16, 20). Niara tä Ji dokwä ngwanka konkrekasionte, yebätä tä nitre umbre jie ngwen. Biblia tä niere niara “okwä abko [...] trä ngitiekä ñukwä jutra kwrere”, ye medenbätä, ñongwane kukwe niedre nitre umbre yei töi ükatekäre aune nuaindre ño ye niara tä nuainne (Apoc. 1:14). Nitre umbre kädekani üai deme köböire, ye medenbätä nikwe niaratre kukwei mikadre jankunu täte, Pablokwe kukwe ne tikani: “Nitre mun jie ngwianka ye kukwei mika täte munkwe amne dre dre nuemna kwetre munye, yebtä abko munkwe ñan kukwei kita temen, ñobtä ñan angwane niaratre käre tä mun ngibiarebti [...]. Erere arato, kä rabadre nuäre btätre sribire munkrä, abkokäre niaratre kukwei mikadre täte munkwe. Amne munkwe ñan sribi mika tare krübäte niaratre kisete, ñobtä ñan angwane ye ñan rabadre kuin munkrä” (Heb. 13:17).

9. a) ¿Kukwe niedre nie ni töi ükatekäre ye raba mate ño nibätä? b) ¿Mäträdre nibätä ye nikwe kadre ngäbiti ño?

⁹ Ni kristiano ie kukwe niedre töi ükatekäre o sribi tädre kisete diandrekä kän  ye ñaka raba nemen nuäre kräke. Konkrekasionte ja mräkä bati nämene videojuegos känti ja metata krubäte yebiti ja denkä aune nitre umbre blitabare ben. Kukwe niebare ie ye ñaka kani ngäbiti kwe, aune Biblia tä kukwe ribere ye erere ñaka namanina nuainne yebätä ñaka namani sribire jankunu ni sribikä konkrekasionte erere (Sal. 11:5; 1 Tim. 3:8-10). Kukwe ye ñan namani tuin kwin ie ye mikani gare kwe nitre madai, tärä tikani kwe bati bobu sukursal ie kukwe yebätä, aune namani nitre mada konkrekasionte töi mike nuainne erere arato. Nikwe nuaindre ye erere angwane konkrekasion tä keteitibe ye ni raba juen ngwarbe. Mäträtä nibätä ye ngwane ni töita ño ye raba nemen gare nie, aune kukwe niedre nie ni töi ükatekäre ye nikwe kadre ngäbiti töi kwinbiti ye abokän bäri kwin (ñäkädre Lamentaciones 3:28, 29 yebätä).

10. a) ¿Santiago 3:16-18 tä mike gare ni rabadre ja töi mike ño aune dre abokän ñaka nuaindre? b) ¿“Kukwe töbtä era metre tä kite Ngöbökri” ye erere ja töi mikadre angwane dre kwin raba nemen nikwe?

¹⁰ Ni rabadre ja töi mike ño konkrekasionte ye Santiago 3:16-18 tä mike gare: “Ni mokrere krübäte jabe kwärikwäri amne ni jändrän nuene rükäre jirekäbe jabe kwärikwäri, ye känti käre kä nokre [...] amne kukwe kämekäme bätäkä ngwarbe nuenta [...]. Akwa kukwe töbtä era metre tä kite Ngöbökri abko bäri käta ni mike nüne kuin deme [...] amne tä ni mike nüne jäme. Erere arato, ni motota nebe kuin ni mda mdakrä amne nita nebe nuäre töi diandre. Erere arato, ni mda mda tä nebe ruentari tare nie amne ni jökrä nita kaen ngäbti ja kwrere jökrä amne, kore nita kukwe era erere niere amne nita jändrän kuinkuin nuene ni mda mdakrä. Amne ni nünanka jäme, käta ni mda mda die mike nüne jäme”. “Kukwe töbtä era metre tä kite Ngöbökri” ye erere ja töi mikata angwane ni rabai nüne keteitibe ja mräkätrebe.

JA TÖI MIKADRE KWIN KONKREKASIONTE

11. a) ¿Nikwe ja töi mikai kwin angwane ñaka dre nuaindi? b) ¿Davidkwe kukwe nuainbare ye tä dre driere nie?

¹¹ Jehovakwe nitre umbre kädekani konkrekasion “jie ngwankäre” ye ñaka käi kwitadrekä jabiti (Hech. 20:28, TNM; 1 Ped. 5: 2). Ye medenbätä, Ngöbökwe kukwe ükaninte ye ni jökrä käkwe mikadre ütiäte jai ye bäri kwin. Nikwe ja töi mikai kwin angwane nikwe ñaka töbikai krubäte sribi meden tä mikani ni kisete yebätä aune ja ñaka rabai ruin bäri ütiäte nie ni madabätä. Rei Saúl namani nütüre David tö namani gobran kwe diainkä kän, yebätä “okwä namani [...] jiebiti aune namani mokrere” ben (1 Sam. 18:9). Niara töi namani blo yebätä tö namani David murie ketai. ¿Ni abokän tä ja töi mike ño? Saúl tö nämene ja tuai kri ye erere nikwe ñaka nuaindre, ñakare aune ja töi mikadre David erere. Kukwe keta kabre nuainbare niarabätä, akwa Ngöbökwe kukwe ükaninte ye nämene käre mike ütiäte jai (ñäkädre 1 Samuel 26:23 yebätä).

12. ¿Ja töi mikadre ño ne kwe konkrekasion tädre keteitibe?

¹² Ja mräkätre tä konkrekasionte ye ñaka töbike ja erebe, ye medenbätä ruäre ngwane kukwe raba nakainkä kwetre jabätä. Kukwe ye erere raba nakainkä nitre ji ngwanka konkrekasionte yebätä arato. Texto nebiti Biblia tä ni dimike: “Munkwe ja mikadre bäri ütiäte jae kwärikwäri” aune “ja ñan rabadre ruen bäri töbtä ni mda mdabtä munye” (Rom. 12:10, 16). Ni ñaka rabadre nütüre kukwe nieta nikwe ye bäri kwin, ñakare aune nikwe ngwandre törö jai kukwe ükate raba jene jene. Ñobätä nitre mada ñaka töbike ni erere ye nikwe mikadre gare jai angwane ni rabai nüne keteitibe konkrekasionte (Filip. 4:5).

13. ¿Kukweta ni töite ye mikadre gare angwane dre nuaindre mada, aune kukwe meden kädrieta Bibliabätä raba ni dimike?

¹³ ¿Kukwe ye tä mike gare ni ñan rabadre blite jire kukwe ruäre tä ükadrete  konkrekasionte yebätä? Ñakare. Siklo kena, kukwe ñaka nuäre namani ükaninte ye ngwane ja mräkätre “Pablo, Bernabé amne ni mda mda dianinkä ja ngätäite, bti juani kwetre Jerusalén blite nitre Jesu kukwei ngwianka mda mdabe amne nitre ni jie ngwianka nämane Jerusalén yebe” (Hech. 15:2). Niaratre ye nämene töbike jene jene kukwe ye ükatekäre. Itire itire nämene töbike ño ye mikani gare kwetre aune üai deme köböire kukwe ye ükaninte kwetre. Ye bitikäre, niaratre ñaka namani kukwe ye kwite niaratre töi nämene ye erere. Kukwe ükaninte ye mikani gare konkrekasionte ye ngwane “kukwe namani tuen kuin ietre niaratre die mikakäre abko käi namani nuäre kri btätre” aune ye käkwe “die mik[ani] tödeke bäri Jesubti” (Hech. 15:31; 16:4, 5). Ye erere tä nemen bare kä nengwane, nita kukwe mike gare nitre ji ngwanka yei angwane niaratre oradi kukwe yebätä aune ükaite kwetre yei nikwe tö ngwandre.

JA TÖI MIKADRE KWIN NITRE MADABE

14. ¿Kukwe meden känti ni raba ja töi mike kwin nitre madabe?

¹⁴ Nita blite ni madabe ye ngwane ni raba ja töi mike kwin kräke. Ñodre, ni mada ñäkädre nie ye ngwane ni raba ja töi mike jäme aune töbike kwin ni mada yebätä. Kukwe Ngöbökwe tä mäträre nibätä: “Ni mda mda tä kukwe nuene mun rüere ne ngwane, munkwe ñan ja ngie mika amne, kukwe tärä ja rüere kwärikwäri munkwe ne ngwane, munkwe kukwe ye dian jabti ta kwärikwäri. Ye abko, ni Dänkien käkwe mun ngite diani munbti ta, ye kwrere munkwe nuen jakrä kwärikwäri” (Col. 3:13). “Kukwe tärä ja rüere kwärikwäri” nieta ye kätä mike gare ruäre ngwane ni rabai rubun ja mräkätre mada kräke. Akwa, kukwe ñaka kwin nuainbare kwetre ye ñan rabadre kwekebe ni töite, ye ñaka raba ni töi mike jäme konkrekasionte, Jehovata ngite juen ta nibiti ye erere nikwe nuaindre ne kwe sribidre gwairebe kräke.

15. a) ¿Job ngite juani ta ni madabiti ye tä dre driere nie? b) ¿Oradre ye raba ni dimike ño ja töi mike kwin?

¹⁵ Job kukwe nuainbare yebiti mikani gare kwe ngite juandre ta ni madabiti ye ütiäte krubäte. Nitre nimä ja ketaka ben käkwe kukwe kwin niedre ie dimikakäre, akwa jerekäbe ñäkäbare tare kwetre niara rüere. Kukwe yebiti ta “nitre kukwe niebare Job rüere ye kräke Jobkwe orabare” aune ngite juani ta biti kwe (Job 16:2; 42:10). Nikwe oradre ni mada kräke ye ngwane ni rabai töbiketa kwin niarabätä. Nita orare ja mräkätre jökrä kräke angwane nita ja töi mike ni kristiano erere (Juan 13:34, 35). Arato, ni rabadre üai deme kärere (Luc. 11:13). Ngöbö üai deme ye käkwe ni dimikai ja ngwen ni kristiano erere ni mada yebe (ñäkädre Gálatas 5:22, 23 yebätä).

JA TÖI MIKADRE KWIN JUTA NGÖBÖKWE YETE

16, 17. ¿Mä töita kwin ye mäkwe bämikadre ño?

¹⁶ Nibira gare nie ni itire itire käkwe ja töi mikadre kwin konkrekasionte angwane nitre jökrä konkrekasionte yekwe kukwe kwin rabai. Ja tötika ne miri gare nie ni rabadre ja töi ükete. Ye erere nü gare mäi angwane mäkwe töbika dre nieta Kukwe Ngöbökwe yebätä (Heb. 4:12). Pablo nämene ja di ngwen kukwe kwin bämike konkrekasionte, niarakwe niebare: “Ti ne abko, ie ja ruen ngite ñakare, akwa ñan ti töi metre jökrä tita niere, akwa [Jehová] aibe käkwe ti ngite ya [...] niedre tibtä” (1 Cor. 4:4).

¹⁷ Kukwe nieta Ngöbökwe ye rabadre ni jie ngwen aune kukwe nieta nikwe ye ni ñaka mikadre bäri ütiäte bätä ñaka ja rabadre ruin “bäri kri” ni madabätä nie, ye köböire nünain keteitibe konkrekasionte. Nikwe ngite juandre ta ja mräkätre yebiti bätä töbikadre kwin niaratre yebätä, angwane ni rabai nüne jäme bentre (Filip. 4:8). Ne madakäre, Jehová aune Jesús yebätä kä rabai juto ni töita kwin yebätä (Filem. 25).

[Kukwe ngwantarita]

[Jondron üai bämikani página 12]

[Jondron üai bämikani página 14]

Sribita Jesús kisete ye rükadre gare nie aune nitre umbre kukwe niedre ni töi ükatekäre ye ngwane, ¿nikwe ja töi mikadre ño?