APA ga tjangerere vapuli vakwawo, mupositoli Paurusa kwa rugwilire kutumbura ehuguvaro lyendi asi Karunga naKristusa kwa hafera mpepo ezi da likida nombungakriste. Pasihonena, koVagarata age kwa tjenge asi: “Hompa gwetu Jesus Kristusa a mu fire nkenda namuvenye [kumwe nompepo ezi mwa likida, NW], vakwetu! Amen.” (Gar. 6:18) Yisinke ga tembe pokuuyunga asi ‘mpepo ezi mwa likida’?

2, 3. (a) Yisinke ga tembe Paurusa apa ga ruganesere nkango ‘mpepo’? (b) Mapuro musinke twa hepa kulipura kuhamena nkareso zetu?

² Paurusa kwa ruganesere nkango ‘mpepo’ pokutamba konkareso zetu ndi eyi ayi tu ninkisa tu uyunge ndi tu rugane yininke monkedi zongandi. Gumwe kuvhura a kare nonkareso zougomoki zepakerombili zougavi ndi zokugusira po. Bibeli kwa uyunga asi ya wapa mokukara ‘nompepo za tenda zombili.’ (1 Pet. 3:4) Gwapeke kuvhura a kare nonkareso ezi nazi mu ninkisa a uyunge eyi nayi handukisa vakwawo ndi a dowokere unene yimaliwa ndi a handuke usimbu ndi a dire kuhara kumutantera eyi na rugana. Vamwe kuvhura va kare nonkareso zokuvaninkisa va kare nomagazaro gokunyata ndi va rwanese Karunga.

³ Yipo nye, apa Paurusa ga ruganesere nonkango edi ‘Hompa a kare none kumwe nompepo ezi mwa likida,’ age kwa korangedere vanavazina va honene Kristusa nokulikida nkareso ezi azi hafesa Karunga. (2 Tim. 4:22, NW; resa  Vakorosi 3:9-12.) Ya wapa tu lipure asi: ‘Mpepo musinke ani likida? Ngapi omu nani wapukurura nkareso zange yipo ni hafese Karunga? Ngapi omu nani korangeda vakwetu mombungakriste va kare nonkareso ezi azi hafesa Karunga?’ Pasihonena, mosipata  sonombya, nkenye mbya kugwederera kouwa wonombya nonkwawo edi dina pongo kumwe. Ose kwa fana mbya ezi azi gwederere kouwa womombungakriste ndi? Yosili, twa hepa kukondja tu kare ngwendi mbya. Ngesi tu konakoneni eyi natu vhura kurugana tu likide mpepo ezi azi hafesa Karunga.

4. Yisinke “mpepo zouzuni”?

⁴ Bibeli kututantera asi: “Ose kapi va tu pa mpepo zouzuni, kwa tu pa Mpepo zokutunda mwaKarunga.” (1 Kol. 2:12) Yisinke “mpepo zouzuni”? Azo kuna kara mpepo ezi va tumbura moVaefeso 2:2, ezi za tanta asi: “One ngomu kwama nzira zouzuni zondona. Ngomu pura yomupangeli gonompepo dononkondo mompepo. Age yige mpepo ezi zina kurugana ntaantani movantu ava ava dili kulimburukwa kwaKarunga.” “Mpepo zouzuni” kuna kara nkareso ezi ava likida vantu womouzuni. Ano mpepo ezi kwa tu kundurukida. Mpepo ozo kuzilikida monkareso zokuuyunga asi kwato ogu na tantera nge eyi na hepa kurugana ndi zoumanguruki wokurugana eyi vana hara kurugana. Awo kuna kara ‘vantu ava ava dili kulimburukwa kwaKarunga’ mouzuni ou waSatana.

5. Nkareso musinke zondona va likidire Vaisraeli vamwe?

⁵ Nkareso zangoso kapisi mpe. Mosiruwo soMosesa, Kora kwa rwanesere ava va pere upangeli moVaisraeli. Age kwa rwanesere Arona novana vendi, ava va kere nositumbukira soupristeli. Nampo age kwa mwene mapuko gawo. Ndi nampo kwa gazarere asi Mosesa kwa va pere yitumbukira oyo yokulikarera morwa yeeyi va kere vekoro lyendi. Yi kare asi magazaro musinke ga kere nago Kora, ayo kwa likidire asi age kwa tamekere kukara nomutaro gosintu nokurwanesa vantu ava ga horowere Jehova, pokuvauyunga asi: “Tomu litwara mo unene! . . . Ano ove Mosesa eyi o lizerwire po ngesi o pitakane mbunga zaHOMPA yinke nye?” (Num. 16:3) Mokulifana, Datani naAbiramu kwa tangwisire Mosesa pokumutantera asi ‘ove kuna kulipaka uhompa asi o tu pangere.’ Apa Mosesa ga va tuminine va wize, awo kwa limbwilire nelinenepeko asi: “Kapi natu wiza ko ose.” (Num. 16:12-14) Jehova kapi za mu hafesere nkareso ezi va likidire, makura yipo ga dipagere varwanesi vena navenye.—Num. 16:28-35.

6. Ngapi omu Vakriste vamwe womosiruwo somupositoli Johanesa va likidire nkareso zondona, ntani yisinke va gazarere?

⁶ Vakriste womosiruwo somupositoli Johanesa nawo kwa tamekere kupangura owo va pere nonkondo dokupitisira mombungakriste ‘pokuswaura epangero lyaKarunga.’ (Juda 8) Vagara owo nampo kwa gazarere asi va fira nawo kugwana yitumbukira yipo va hetekerere ko kupukisa vapeke va dire kulikida efumadeko kowo ga pere Karunga yitumbukira mombungakriste.—Resa 3 Johanesa 9, 10.

7. Nkareso musinke twa hepa kutakamesa?

⁷ Nkareso zangoso kapisi zi kare mombungakriste. Yipo nye twa hepera natuvenye kutakamesa mokudira kukara nazo. Vakuronambunga kapi va sikilira mo, ngwendi moomu ga dilire kusikilira mo masimbi gomosiruwo saMosesa nomosiruwo somupositoli Johanesa. Vakuronambunga kuvhura va rugane mapuko aga naga tu kundama. Nsene yi tu horokera oyo, kapisi tu honene nkareso zovantu womouzuni ava ava tanta asi: “Na kara nononkondo dokurugana ko yuma” ndi “munazinyetu ogu ga hepa episuro”! Twa hepa kudiworoka asi Jehova kuvhura a ncenune mapukogona aga ana rugana mukuronambunga. Nose kuvhura tu honene Jehova. Vamwe ava ava tura nonzo dononene kapi  ava tambura evatero lyovakuronambunga morwa kudira kuhara yikara yawo yimwe makura tava hendauka vakuronambunga. Awo kwa fana ngwendi muveli ogu a nyoka uhaku morwa kapi ga hara yikara yimwe yandokotora.

8. Matjangwa musinke naga tu vatera tu kare nonkareso zongwa kovakuronambunga?

⁸ Mokunyokera po nkareso zangoso, twa hepa kudiworoka asi Jesus ‘mokuwoko kwendi korulyo kwa kara mo nombungururu ntano-nambali.’ “Nombungururu” kufanekesa vakuronambunga wovagwavekwa, ntani hena kutamba kovakuronambunga navenye womombungakriste. Jesus kuvhura a ruganese “nombungururu” demewoko lyendi moomu ana hara. (Ehor. 1:16, 20) NgoMutwe gombungakriste, Jesus ga diva nawa-nawa eyi yina kuhoroka mombunga zovakuronambunga. Jesus ‘meho gendi kwa fana ngwendi makara gomundiro’ ntani kumona nayinye, yipo nye, nsene mukuronambunga gumwe ana hepa evyukiso, nga divilisa asi a gwane evyukiso olyo posiruwo souhunga. (Ehor. 1:14) Posiruwo esi, ose twa hepa kulikida efumadeko kovakuronambunga ava za horowora mpepo zokupongoka, morwa Paurusa kwa tjanga asi: “Omu limburukwe oku tomu zuvhu vapitisili veni, yeeyi awo kutakamesa nomwenyo deni, ngwendi vava ava di zeresere Karunga. Nsene mu va limburukwa, tava yi rugana nehafo, kapisi nomutjimakoka, yeeyi kapi yi mu kwafe.”—Heb. 13:17.

9. (a) Nkareso musinke ava likida vamwe apa ava va pe evyukiso? (b) Ngapi twa hepa kutara episuro?

 ⁹ Apa vakuronambunga ava vyukisa muntu ndi va mu guse yitumbukira yendi, ayo kuninkisa muntu a horore nkareso zendi. Mudinkantugara gumwe kwa mu pere mavyukiso vakuronambunga kuhamena kudana maudano gonyanya kotivi ndi koselefoni. Age kapi ga tambwire mavyukiso ogo makura tava mu gusa situmbukira sendi soukwafimbunga. (Epis. 11:5; 1 Tim. 3:8-10) Konyima zosiruwo, munazinyetu ogo kwa tamekere kutantera vakwawo asi kapi ana kwatesa ko matokoro govakuronambunga, yipo ga tjangerere nombilive komberewa zomutayi nokuuyunga momudona vakuronambunga ntani ta tumangeda vakwawo va rugane yokulifana. Nsene tu lipopera nyamwetu pokugava usima kovakuronambunga, ose ngoso kuna kuzonagwisa po mbili zomombungakriste. Yipo nye ya wapera kutambura episuro nokulitara ngompito zokudimburura mapuko getu.—Resa Malirankali 3:28, 29.

10. (a) Yisinke Jakopo 3:16-18 azi tu rongo kuhamena nkareso zongwa nezi zondona? (b) Yitundwamo musinke ngayi kara nsene tu rugana kuliza ‘nounongo ou wa tunda meguru’?

¹⁰ Jakopo 3:16-18 kuturonga eyi ayi retesa po nkareso zongwa nezi zondona mombungakriste. Azo kwa tanta asi: “Oku kwa kara mfudu nomakoto, yiko hena kwa kara epiyagano noyikara nayinye yoyidona. Nye unongo ou wa tunda meguru, muhoverera, kwa kuhuka, ntani kwa hara mpora, kwa kara nombili, kwa lizuvha novakwawo. Kwa zura nkenda noyiyimwa yoyirugana yoyiwa, kapi wa paka mpongo ndi uyilipaki. Uhungami, muzangu ogu agu tundu mombuto zava ava reta po mbili.” Nsene tu rugana kuliza ‘nounongo ou wa tunda meguru,’ ose ngatu honena yikara yaKarunga eyi ngayi tu vatera tu gwederere konkareso zongwa zomombungakriste.

11. (a) Yisinke ngatu dira kurugana nsene tu kara nonkareso zongwa? (b) Yisinke natu lirongera ko kosihonena saNdafita?

¹¹ Twa hepa kudiworoka asi Jehova kwa pa vakuronambunga situmbukira ‘sokukara vasita wombungakriste zendi.’ (Yirug. 20:28; 1 Pet. 5:2) Twa hepa kufumadeka ewapaiko lyaKarunga, yi kare asi tu vakuronambunga ndi hawe. Nsene tu kara nonkareso zongwa kapi ngatu demenena tupu kokugwana yitumbukira. Apa hompa Sauru goVaisraeli ga tamekere kugazara asi Ndafita ta kara hompa, “Sauru nga tara Ndafita nomeho gomadona.” (1 Sam. 18:9) Sauru kwa tungire po nkareso zondona nokuhara kudipaga Ndafita. Mevango lyokukara ngwendi Sauru ogu ga demenenene tupu koupangeli, twa hepa kukara ngwendi Ndafita. Nampili ngomu ga hepere unene, Ndafita kwa likidire efumadeko kogu ga horowere Karunga.—Resa 1 Samwere 26:23.

12. Ngapi natu gwederera ko kouumwe womombungakriste?

¹² Morwa natuvenye twa kara nomagano gokulisiga, poyiruwo yimwe kuvhura tu handukise wopeke. Eyi kuvhura kuhoroka nampili mokatji kovakuronambunga. Mapukururo goBibeli kuvhura kutuvatera moyuma eyi: “Omu gave sihonena sokulifumadeka-fumadeka” ntani “walye omu lipaka kounandunge.” (Rom. 12:10, 16) Mevango lyokusininika asi mouhunga tuna kara, twa hepa kudimburura asi pwa kara nonkedi dononzi dokukohonona po udigu. Nsene tu kwata egano omu ava gazara vakwetetu, ngayi tu vatera tu gwederere ko kouumwe womombungakriste.—Fil. 4:5.

13. Yisinke twa hepa kurugana konyima zokurapota udigu, ntani sihonena musinke somoBibeli asi yi likida eyi?

¹³ Eyi ngesi kutanta asi epuko kugava magano nsene tuna dimburura asi koyili yina dili kuwapa mombungakriste ndi? Hawe.  Momazuva gaPaurusa, pwa kere madiro kulizuvha mombungakriste. Vanavazinyetu kwa ‘tokwere asi Paurusa naBaranabasa novakwaawo vamwe va ze koJerusarema nokovakurona, va ka likunde yininke oyo novapositoli novakurona.’ (Yirug. 15:2) Navenye va kere nomagano gokulisiga kuhamena omu nava kohonona po madiro kulizuvha ogo. Nye konyima zapa ga pwagesere nkenye gumwe egano lyendi nokutulisa po etokoro mevatero lyompepo zokupongoka, vanavazinyetu vena va hagekere kuuyunga magano gavene. Apa nombungakriste da gwene mbilive zomatokoro ‘tadi hafere ekorangedo eli va di pere’ ntani “kwa di korekere mepuro.” (Yirug. 15:31; 16:4, 5) Mokulifana, nsene tuna rapota udigu kovakuronambunga, twa hepa kuusiga momawoko gawo.

14. Ngapi natu likida nkareso zongwa kwava wopeke?

¹⁴ Melikwatakano lyetu kumwe nava wopeke, pwa kara nompito dononzi dokulikida nkareso zongwa. Nkenye gumwe gwetu kuvhura a gwederere ko konkareso zongwa nsene a gusira po ava ava mu handukisa. Nonkango daKarunga kututantera asi: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” (Koros. 3:13) Nonkango edi “nsene muna lizono namukweni” kulikida asi poyiruwo yimwe kuvhura va tu handukise wopeke. Twa ha pulisira yininke yoyinunu yi tu handukise morwa ayo kudonganesa po mbili zomombungakriste. Nye twa hepa kuhetekera ko kuhonena Jehova pokugusira po vanavazinyetu nokutwikira kuruganena kumwe nawo.

15. (a) Yisinke natu lirongere ko konkareso zaJoba zokugusira po? (b) Ngapi omu ekanderero nali tu vatera tu likide nkareso zongwa?

¹⁵ Kuvhura tu lirongere ko konkareso zaJoba zokugusira po. Vakaume vendi vatatu ava va ya mu hengagwidire kwa mu handukisire nononkango donondona. Nye Joba ga va gusilire po. Yisinke ya mu vaterere? ‘Age kwa kandererere po vakwawo vatatu.’ (Joba 16:2; 42:10) Kukanderera po wopeke kuvhura kutjindja nkareso zetu kwawo. Kukanderera po vanavazinyetu ngayi tu vatera tu va tare monkedi omu a va tara Kristusa. (Joh. 13:34, 35) Twa hepa hena kuhundira Karunga mpepo zendi zokupongoka. (Ruk. 11:13) Mpepo zokupongoka ngazi tu vatera tu likide yikara yoSikriste melikwatakano lyetu nava wopeke.—Resa Vagarata 5:22, 23.

16, 17. Nkareso musinke twa hepa kulikida?

¹⁶ Apa nkenye gumwe gwetu a kondjo a kare nonkareso zongwa, mbungakriste kugwanena mo uwa. Sirongwa esi kuvhura si ku vatere o tokore kuwapukurura nkareso zoge. Nsene yimo ngoso, pulisira Nonkango daKarunga di ku likide omu no tura po marunduruko. (Heb. 4:12) Paurusa ogu ga here kugava sihonena sosiwa monombungakriste kwa tanta asi: “Ame negima ko si komutjima gwange, nye kapisi yiyo oyo nayi hungameka nge, nye ogu a hungameke nge ame Hompa, mupanguli gwange,” Jehova.—1 Kol. 4:4.

¹⁷ Natuvenye kuvhura tu likorangede-korangede tu kare nonkareso zongwa mombungakriste, kuvhura tu yi rugane eyi pokuhonena yikara yaKarunga kapisi tu sininike magano getu ndi kugwana yitumbukira yoyinzi. Pokukara nonkareso zokugusira po nokugazarera vakwetetu yoyiwa, ose ngatu hafera elikwatakano lyombili novanavazinyetu. (Fil. 4:8) Nsene tu yi rugana oyo, ose tatu kara nehuguvaro asi Jehova naJesus ngazi va hafesa ‘mpepo ezi atu likida.’—Fir. 25, NW.