1. Pavua Paulo ufundila bena Kristo mikanda, uvua utekemena tshinyi?

PAVUA mupostolo Paulo ufundila bena Kristo nende mikanda, uvua ubaleja misangu yonso muvuaye ne ditekemena dia ne: Nzambi ne Kristo bavua ne bua kuanyisha lungenyi luvuabu nalu mu bisumbu. Tshilejilu, wakafundila bena Kristo ba mu Galatiya ne: “Bana betu, ngasa wa Mukalenge wetu Yezu Kristo ikale ne lungenyi lunudi nuleja. Amen.” (Gal. 6:18) Pavuaye wakula bua “lungenyi lunudi nuleja,” uvua usua kuamba tshinyi?

2, 3. a) Pavua Paulo muenze mudimu ne muaku “lungenyi,” uvua wakula bua tshinyi? b) Nnkonko kayi itudi mua kudiela bua lungenyi lutudi nalu?

² Padi Paulo wenza mudimu ne muaku “lungenyi” mu mvese eu, udi wakula bua bukole budi butusaka bua kuamba anyi kuenza malu mu mushindu kampanda. Muntu udi mua kuikala muena malu mimpe, uditatshisha bua bakuabu, mupole malu, wambuluishangana ne bintu anyi ufuilangana luse. Bible udi wanyisha bantu badi ne “meji mapole ne a ditalala” ne badi ne “lungenyi lupole.” (1 Pet. 3:4; Nsu. 17:27, NW) Kadi muntu mukuabu udi mua kuikala ne ngakuilu wa kupepeja bakuabu, munange bintu bia ku mubidi, ufiika munda lukasa anyi musue kuikala mudikadile. Bualu bubi mbua ne: kudi bantu badi ne lungenyi lua dipanga bukezuke, dibenga kutumikila anyi mene lua buntomboji.

³ Nunku, pavua Paulo muambe ne: “Mukalenge ikale ne lungenyi lunudi nalu,” uvua ubela bena Kristo nende bua kuikalabu ne lungenyi ludi lupetangana ne disua dia Nzambi ne bumuntu bua buena bua Kristo. (2 Tim. 4:22; bala Kolosayi 3:9-12.) Mbimpe yonso wa kutudi adiebeje ne: ‘Ntu ne lungenyi lua mushindu kayi? Mmunyi mundi mua kutamba kuleja lungenyi ludi lusankisha Nzambi? Ndiku mua kutungunuka ne kuenza bua tshisumbu tshilame lungenyi  luatshi luimpe anyi?’ Tshilejilu, mu budimi bua bilongo, dikala dia tshilongo tshionso didi diambuluisha bua budimi buonso buikale bulengele. Tutuku tshimue tshia ku “bilongo” bidi bienza bua tshisumbu tshikale tshilenga anyi? Bushuwa, tudi ne bua kudienzeja bua kuikala bu tshimue tshia ku bilongo ebi. Tumonayi tshitudi mua kuenza bua kuikala ne lungenyi ludi lusankisha Nzambi.

4. “Nyuma wa pa buloba” ntshinyi?

⁴ Bible udi utuambila ne: “Tuetu katuvua bitabe nyuma wa pa buloba to, kadi tudi bitabe nyuma wa kudi Nzambi.” (1 Kol. 2:12) “Nyuma wa pa buloba” ntshinyi? Nyuma eu ke udibu baleje mu Efeso 2:2. Mvese eu udi wamba ne: ‘Nuvua nuenda kumpala bilondeshile ndongoluelu wa malu wa pa buloba ebu, bilondeshile mukalenge wa bukokeshi bua kapepe, nyuma udi wenza malu mu bantu badi babenga kutumikila.’ “Kapepe” aka ke nyuma anyi lungenyi lua pa buloba. Lungenyi elu ndutunyunguluke anu bu kapepe kena dîna. Kapepe aka katu miaba yonso. Katu katamba kumuenekela mu meji adi nawu bantu ba bungi a ne: ‘Muntu kena mua kungambila tshia kuenza to,’ anyi a ne: ‘Bua manême anyi mfuafua.’ Bantu aba ke “bantu badi babenga kutumikila” ba mu bulongolodi bua Satana.

5. Bamue bena Isalele bavua baleje lungenyi lubi kayi?

⁵ Meji aa ki mmatuadije lelu to. Mu tshikondo tshia Mose, Kola wakatombokela bantu bavua balombola tshisamba tshia Isalele. Wakaluisha nangananga Alona ne bana bende bavua benza mudimu bu bakuidi. Pamuapa bualu uvua mumanye bilema biabu, peshi uvua wela meji ne: Mose uvua mubapeshe midimu ya pa buayi bualu bavua balela bende. Nansha bu biobi nanku, bidi bimueneka patoke ne: Kola ukavua mutuadije kumona malu ne lungenyi lua buntu ne kujana bantu bavua Yehowa musungule. Kola wakaleja muvuaye kayi ubanemeka pakambaye ne: “Nudi nutamba kudienzela malu . . . Nuenu nudi nudibandisha ku mutu kua bantu ba Yehowa munyi?” (Nom. 16:3) Datana ne Abilama pabu bakadiabakena kudi Mose bamuamba muvuaye ‘musue kudibandisha bu mukalenge wabu.’ Pakababikila Mose bua kumonangana nabu, bakandamuna ne diambu dionso ne: ‘Katuena tulua to.’ (Nom. 16:12-14) Yehowa kavua musanke bua lungenyi luabu elu to. Wakashipa bantomboji bonso.​—Nom. 16:28-35.

6. Mmunyi muvua bamue bena Kristo ba mu bidimu lukama bia kumpala baleje muvuabu ne lungenyi lubi? Tshivua mua kuikala tshibasaka bua kuenza nunku ntshinyi?

⁶ Bamue bena Kristo ba mu bidimu lukama bia kumpala bakatuadija pabu kujana bantu bavua ne majitu mu tshisumbu, “bapetula bukokeshi.” (Yuda 8) Imue misangu bantu aba kabavua basanka bua majitu avuabu bobu nawu mu tshisumbu to, ne bavua basaka bakuabu bua kutombokela bantu bavua bakumbaja ne muoyo mujima mudimu uvua Nzambi mubapeshe.​—Bala 3 Yone 9, 10.

7. Ndungenyi kayi lutudi ne bua kudimukila mu tshisumbu lelu?

⁷ Bushuwa, lungenyi lua nunku kaluena ne bua kuikala mu tshisumbu tshia bena Kristo to. Ke bualu kayi tudi ne bua kuikala ne budimu. Bakulu kabatu bapuangane to, anu bu muvua ba mu tshikondo tshia Mose ne ba mu tshikondo tshia mupostolo Yone. Bakulu badi mua kuenza malu adi mua kutunyingalaja. Biobi bienzeke nanku, nebikale bibi bua kuidikija lungenyi lua bena panu lua ne: “Badi ne bua kungenzela anu malu mimpe” anyi lua ne: “bikengela kumunyoka.” Yehowa udi mua kubuikila mêsu pa tubilema tukese tudi bakulu mua kuenza. Katuenaku petu mua kumuidikija anyi? Bamue bantu badi benza bilema binene batu babenga bua kuya kuitaba mu komite wa dilumbuluisha udi mulongolola bua kubambuluisha anu bualu mbimanyine pa mapanga adi nawu bakulu. Badi anu bu mubedi udi ubenga kuangata  luondapu ludi mua kujikija disama diende anu bualu mmumone tshilema kampanda tshia munganga udi usua kumondopa.

8. Mmvese kayi idi mua kutuambuluisha bua kuikala ne lungenyi luimpe bua bantu badi batulombola?

⁸ Bua kuepuka lungenyi lua mushindu eu, mbimpe tuvuluke ne: Bible udi uleja Yezu muikale ne “mitoto muanda mutekete mu tshianza tshiende tshia balume.” “Mitoto” eyi idi tshimfuanyi tshia bakulu bela manyi, kadi idi kabidi ileja bakulu bonso mu tshibungi. (Buak. 1:16, 20) Bu mudi Yezu muikale Mutu wa tshisumbu tshia bena Kristo, udi ukenketa bikole tusumbu tua bakulu. Bikalabi bikengela kunyoka mukulu kampanda, Eu udi ne ‘mêsu bu ludimi lua kapia’ mmumanye malu onso ne neafile dinyoka mu mushindu muakanyine ne pa dîba diakanyine. (Buak. 1:14) Ku luetu luseke, tudi ne bua kunemeka bantu badibu basungule kudi nyuma muimpe. Paulo wakafunda ne: “Nutumikile bantu badi balombola munkatshi muenu, nubakokele, bualu badi batungunuka ne kutabalela mioyo yenu bu bantu balua kubadila Nzambi malu; bua benze nunku ne disanka kabayi batua mikemu, tshianana bualu ebu budi mua kunukebela lutatu.”​—Eb. 13:17.

9. a) Muena Kristo udi mua kudimona mu diteta kayi padibu bamunyoka? b) Tudi mua kuenza tshinyi bobu batupeshe dinyoka?

⁹ Muena Kristo udi mua kuleja mudiye ne lungenyi luimpe anyi lubi padibu bamunyoka peshi bamumbusha majitu mu tshisumbu. Tshilejilu, bakulu bakabela ne mêyi mimpe muanetu wa balume kampanda utshivua nsonga bualu uvua ne tshibidilu tshia kunaya manaya a tshikisu ku ordinatere. Bia dibungama, muanetu au kakitaba mibelu to, ne wakajimija majitu avuaye  nawu bu musadidi wa mudimu bualu katshivua kabidi ukumbaja ngikadilu milomba. (Mus. 11:5; 1 Tim. 3:8-10) Pashishe, muanetu eu wakatuadija kuambila bantu bakuabu muvuaye kayi muitabe mapangadika a bakulu, wakafundila Betele mikanda misangu ya bungi ne uvua wakula bibi bua bakulu. Wakasaka bakuabu bua kuikalabu bafundila Betele mikanda. Kadi mu bulelela, tuetu tudibingisha bua malu mabi atudi tuenza, tudi tunyanga ditalala dia tshisumbu ne bualu ebu kabuena mua kuambuluisha muntu nansha umue to. Mbimpe tuitabe ne budipuekeshi buonso manyoka adibu batupesha ne tuangate bu mushindu wa kumona butekete buetu butuvua katuyi bamanye.​—Bala Muadi 3:28, 29.

10. a) Yakobo 3:16-18 udi utulongesha tshinyi bua lungenyi luimpe ne lubi? b) Tuetu tulonda “meji a muulu,” netupete tshinyi?

¹⁰ Yakobo 3:16-18 udi utulongesha bua kumanya lungenyi luimpe ne lubi ludi muntu mua kuikala nalu mu tshisumbu. Udi wamba ne: “Muaba wonso udi mukawu ne dikokangana newikale kabidi tshimvundu ne malu mabi a mishindu yonso. Kadi meji adi afumina muulu, tshia kumpala mmakezuke, pashishe nga ditalala, kaena ne malu makole, mmadiakaje bua kutumikila, mmuwule tente ne luse ne mamuma mimpe, kaena ne kansungasunga, kaena ne lubombo. Bualu bukuabu, badi bakuna ntete ya dimuma dia buakane mu ditalala bua bantu badi bakeba ditalala.” Tuetu tuenza malu ne “meji adi afumina muulu,” netuikale ne ngikadilu ya buena ya Nzambi yatuambuluisha bua kulama lungenyi luimpe mu tshisumbu.

11. a) Kuikala ne lungenyi luimpe nekutuambuluishe bua kuepuka tshinyi? b) Tshilejilu tshia Davidi tshidi tshitulongesha tshinyi?

¹¹ Tudi ne bua kumanya ne: Yehowa mmusungule bakulu bua “kulama tshisumbu tshia Nzambi.” (Bien. 20:28; 1 Pet. 5:2) Nunku, mbimpe kunemeka mushindu udi Nzambi mulongolole malu nansha tuetu bikale anyi katuyi bakulu. Kuikala ne lungenyi luimpe kudi mua kutuambuluisha bua kubenga kumona majitu bu muanzu. Pavua mukalenge wa Isalele Shaula mumone ne: Davidi uvua mua kumupingana mu nkuasa, Shaula ‘wakatuadija kumvuila Davidi mukawu.’ (1 Sam. 18:9, MMM) Mukalenge wakapeta lungenyi lubi ne kujingaye too ne bua kumushipa. Pamutu pa kuikala bu Shaula uvua munange mianzu, tudi ne bua kuidikija tshilejilu tshimpe tshia Davidi. Nansha muvuabu bamukengesha njila ne njila, nsonga eu wakatungunuka ne kunemeka muntu uvua Nzambi musungule bua kukokesha.​—Bala 1 Samuele 26:23.

12. Ntshinyi tshidi mua kuenza bua tshisumbu tshikale mu buobumue?

¹² Dibenga kupetangana ku mêyi didi mua kufikisha bena mu tshisumbu ku difiikilangana munda, bidi mua kuenzeka nanku too ne munkatshi mua bakulu. Bible udi utubela mu tshilumbu etshi ne: “Nuikale ba kumpala mu dipesha bakuabu bunême.” Kabidi ne: “Kanudivuiji bena meji ku mêsu kuenu nkayenu.” (Lomo 12:10, 16) Pamutu pa kuleja ne: anu tshitudi tuamba ke tshilelela, tudi ne bua kumanya ne: kudi mishindu ya bungi ya kukosa tshilumbu kampanda. Tuetu tudienzeja bua kuteleja lungenyi lua bakuabu, netuambuluishe bua tshisumbu kuikalatshi mu buobumue.​—Filip. 4:5.

13. Mmushindu kayi utudi ne bua kuangata mmuenenu utudi nende? Ntshilejilu kayi tshia mu Bible tshitudi mua kulonda?

¹³ Bualu ebu budiku buleja ne: mbibi bua kuleja tshilema kampanda tshidi tshikengela kuakaja mu tshisumbu anyi? Tòo. Mu bidimu lukama bia kumpala, bualu kampanda buakajuka buvua bukebeshe dikokangana. Bena mu tshisumbu “bakangata dipangadika bua Paulo ne Bânaba ne bamue ba kudibu babande ku Yelushalema kuvua bapostolo ne bakulu bua dikokangana adi.” (Bien. 15:2) Kakuyi mpata, muena mu tshisumbu yonso uvua ne luende  lungenyi lua kufila mu tshilumbu atshi ne mushindu uvuabu mua kutshikosa. Muntu yonso wa kudibu wakaleja luende lungenyi. Panyima pa bamane kuangata dipangadika ku diambuluisha dia nyuma muimpe, bena mu tshisumbu kabakatungunuka ne kufila kabidi yabu ngenyi to. Pakafika mukanda uvua ne dipangadika mu bisumbu, “bakasanka bua dikankamija edi” ne bavua ‘bakoleshibue mu ditabuja.’ (Bien. 15:31; 16:4, 5) Bia muomumue lelu, patukadi bamane kufila tshilumbu mu bianza bia bakulu, tumanye ne: nebatshikonkonone bimpe ne kuangatabu dipangadika padibi bikengela.

14. Mmunyi mutudi mua kuleja lungenyi luimpe mu nsombelu wetu ne bantu bakuabu?

¹⁴ Kudi malu a bungi atudi mua kuenza bua kuleja mutudi ne lungenyi luimpe. Yonso wa kutudi neenze bimpe yeye uleja lungenyi lua kufuilangana luse padi bantu bakuabu bamuenzela malu mabi. Dîyi dia Nzambi didi diamba ne: “Nutungunuke ne kulejangana lutulu, nufuilangana luse ne muoyo mujima nansha muntu yeye muikale tshilumbu ne mukuabu. Anu bu mudi Yehowa munufuile luse ne muoyo mujima, nudi ne bua kuenza penu nanku.” (Kolos. 3:13) Tshiambilu tshia ne: “Muntu yeye muikale tshilumbu ne mukuabu” tshidi tshileja ne: kudi malu adi mua kutufikisha ku difikila bakuabu munda. Kadi katuena mua kulekela bua mushindu kampanda utu muntu wenza malu utufikishe ku difika munda to. Kuenza nunku kudi mua kunyanga ditalala dia mu tshisumbu. Nunku, tudi ne bua kudienzeja bua kuidikija Yehowa ne kufuila bana betu luse ne muoyo mujima ne kutungunuka ne kuenzela Nzambi mudimu pamue nabu.

15. a) Tshilejilu tshia Yobo tshia kufuilangana luse tshidi tshitulongesha tshinyi? b) Mmushindu kayi udi disambila mua kutuambuluisha bua kuikala ne lungenyi luimpe?

¹⁵ Tudi mua kulonga mushindu wa kufuilangana luse ku tshilejilu tshia Yobo. Bantu basatu bavua balue kumusamba bakamuamba mêyi avua anyingalaja. Nansha nanku, Yobo wakabafuila luse. Mushindu kayi? ‘Wakabalombela Nzambi.’ (Yobo 16:2; 42:10) Kusambidila bantu bakuabu kudi mua kushintulula mushindu utudi tubamona. Kusambidila bena Kristo netu bonso kudi kutuambuluisha bua kuikala ne lungenyi lua buena lua Kristo. (Yone 13:34, 35) Pa kumbusha kusambidila bena Kristo netu, tudi kabidi mua kulomba nyuma muimpe. (Luka 11:13) Nyuma wa Nzambi neatuambuluishe bua kuikala ne ngikadilu mimpe ya bena Kristo yatuambuluisha bua kusomba bimpe ne bantu bakuabu.​—Bala Galatiya 5:22, 23.

16, 17. Bua tshilumbu tshia ‘lungenyi lutudi nalu,’ udi mudisuike bua kuenza tshinyi?

¹⁶ Muena Kristo yonso yeye mudifundile tshipatshila tshia kulama lungenyi luimpe lua tshisumbu nebiambuluishe bua kuikalatshi tshimpe. Tshiena-bualu etshi tshidi mua kuikala tshikuambuluishe bua kuakaja lungenyi luebe ne kukolesha bantu bakuabu. Bikalabi nanku, enza bua Dîyi dia Nzambi dikuambuluishe bua kuenza mashintuluka. (Eb. 4:12) Paulo uvua uditatshisha bikole bua malu avuaye wenza mu bisumbu. Wakamba ne: “Tshiena mumanye bualu nansha bumue budi bumpisha. Nansha nanku tshiena mbingishibua bua bualu ebu to, kadi Yehowa ke udi undumbuluisha.”​—1 Kol. 4:4.

¹⁷ Patudi tuditatshisha bua kuenza malu adi apetangana ne meji a muulu, katuyi tudiangata ne mushinga mupitshidile ne tujinga bua bakuabu balonde anu tshitudi tuamba, nebiambuluishe bua tshisumbu kuikalatshi ne lungenyi luimpe. Tuetu tufuilangana luse ne tumona bakuabu mu mushindu muimpe, netuikale mu ditalala ne bena Kristo netu. (Filip. 4:8) Tuikale bajadike ne: tuetu tuenza malu aa, Yehowa ne Yezu nebasanke bua ‘lungenyi lutudi nalu.’​—Filem. 25.