Yãmb tara yam-sõng bɩ?
Yãmb tara yam-sõng bɩ?
“Bɩ Zusoab a Zezi Kirist ning yam ning yãmb sẽn tarã barka.”—FILE. 25, MN.
WÃN TO LA Y NA N LEOKE?
Bõe yĩng tɩ d segd n bao n bãng yam ning d sẽn tarã?
Manesem bʋs la d pa segd n talle, la bõe n tõe n sõng-do?
Bõe la d tõe n maan n sõng tɩ yam-sõng zĩnd tigingã pʋgẽ?
1. Bõe la a Poll da nong n yet a lɛta wã pʋsẽ?
TƲM-TƲMD a Poll lɛta wã pʋsẽ, a ra nong n yeta tigimsã neb t’a sẽn dat yaa Wẽnnaam la Kiristã sũur yɩ noog ne yam ning b sẽn tarã. Wala makre, a gʋlsa Galat tigingã neb n yeel-b woto: “M ba-biisi, bɩ tõnd Zusoab a Zezi Kirist barkã zĩnd ne [yam ning yãmb sẽn tarã, MN]. Ãmina!” (Gal. 6:18) A gomdã võor yaa bõe?
2, 3. a) A Poll lɛta wã pʋsẽ, gom-bil ning b sẽn lebg tɩ “yamã” mi n dat n yeelame tɩ bõe? b) Sogs-bʋs la tõnd ned kam fãa segd n sok a menga?
2 “Yam” ning yell a Poll sẽn gomã yaa ned yel-manesem wall a sẽn get yɛlã to-to wã. Wala makre, nina yaa nin-bʋgsga, ned sẽn waoogd a taaba, sũ-mar soaba, kõta, la sugr soaba. Sɩd me, Biiblã yeelame tɩ “sũ-mare,” “sũ-bʋgsem la sũ-maasem” yaa sõma. (1 Pɩɛ. 3:4; Yel. 17:27) La nina tõe n yaa gom-põos soaba, ned sẽn nong ligdi, sũ-tʋʋlem soaba, bɩ ned sẽn dat n soog a menga. Kẽer tʋmda rẽgdo, n yaa wẽn-kɩɩsdb menga.
3 Dẽnd a Poll sẽn yeel a tẽed-n-taasã tɩ ‘Zusoabã barkã zĩnd ne yam ning b sẽn tarã,’ a ra sagend-b lame tɩ b rɩk Kiristã naoore, n mao tɩ b manesmã ket n tat Wẽnnaam yam. (2 Tɩm. 4:22, MN; karm-y Kolos rãmb 3:9-12.) Segdame tɩ tõnd ned kam fãa sok a meng woto: ‘Yam bʋg la mam tara? Wãn to la m tõe n sõng tɩ yam-sõng zĩnd tigingã pʋgẽ?’ Tɩɩg sã n ning puudu, yaa puug fãa sẽn yaa neerã yĩng n kɩt tɩ sakd gesgã. Rẽ yĩnga, tõnd ned kam fãa yaa wa tɩɩgã puugu, n kɩtdẽ tɩ zems-n-taar be tigingã pʋgẽ bɩ? Yaa vẽeneg tɩ d segd n mao n yɩɩ woto. Masã, bɩ d bao n bãng d sẽn tõe n maan to-to tɩ d yel-manesmã tat Wẽnnaam yam.
D ZÃAG D MENG NE DŨNIYÃ YAM
4. “Dũniyã sɩɩg” yaa bõe?
4 Gʋlsg Sõamyã yeta woto: “Tõnd ka reeg dũniyã sɩɩg ye, tõnd deega Sɩɩg Sõng sẽn yit Wẽnnaam nengẽ.” (1 Kor. 2:12) “Dũniyã sɩɩgã” yaa bõe? Yaa yẽ yell la b sẽn gomd Efɛɛz rãmb 2:2 wã. Be, b yeta woto: “Yãmb da kẽnda bãmb pʋgẽ wa dũniyã nebã sẽn kẽndã n sakd sẽn tar-a noor ne yĩngr yellã, la yãmb da sakda sɩɩg ning sẽn tʋmd zãgsdbã fãa pʋsã.” Sɩɩg ning sẽn tʋmd zãgsdbã pʋsẽ wã yaa dũniyã yamã. A bee zĩig fãa wa pemsmã. Wʋsg soo b mense, n pa rat tɩ ned wilg-b b sẽn segd n maane, wall b tagsdẽ tɩ b segd n maoome tɩ nebã bas-b tɩ b maan b sẽn date. Yaa bãmb la “zãgsdbã,” rat n yeel t’a Sʋɩtãan dũniyã nebã.
5. Yam bʋg la Israyɛll neb kẽer tall-yã?
5 Neb a woto buud sɩng n beeme. A Moiiz wakatẽ wã, a Koore kɩɩsa neb nins sẽn da lʋɩt Israyɛll buudã taoorã. A sẽn da kɩɩsd b rãmb n yɩɩd yaa Aarõ ne a kom-dibli wã sẽn da yaa maan-kʋʋdbã. Tõe t’a ra yãa b pãn-komsem, wall a ra tagsdame tɩ yaa b sẽn yaa a Moiiz roagdbã yĩng la a yãk-b tɩ b yaa maan-kʋʋdba. La sẽn yaa a soab me, yaa vẽeneg t’a Koore wa n pa le nand a Zeova sẽn sigl yɛlã to-to wã, n sɩng taoor lʋɩtbã wɩdg la b paoogre. A yeel-b-la woto: “Yãmb zẽkda y mens wʋsgo. . . . Bõe tɩ y zẽkd y mens n yetẽ tɩ y yɩɩda Zusoabã nebã?” (Sõd. 16:3) A Datã ne a Abiram me yẽgma ne a Moiiz n yeel t’a ‘soo bãmb ne pãnga.’ Wakat kãng t’a Moiiz tʋmame tɩ b tɩ bool-b tɩ b wa, tɩ b wuk b mens n yeel woto: “Tõnd ka na n kẽng ye.” (Sõd. 16:12-14) A Zeova sũur pa yɩɩ noog ne yam ning b sẽn da tarã ye. A kʋʋ tõtbã fãa.—Sõd. 16:28-35.
6. Wãn to la pipi kiris-neb kẽer tall yam-wẽnga, la tõe n yaa bõe n wa ne rẽ?
6 Pipi kiris-nebã wakat me, kẽer n wa n yik n pa le nand tigingã taoor lʋɩtbã, n “kɩɩsd neb nins sẽn tar noorã.” (Ziid 8) Wõnda b wa n pa le nand tʋʋm nins b sẽn da tar tigingã pʋgẽ wã, n dat n lʋɩ taoore. Sẽn paase, b ra tõgda b taabã n dat tɩ b kɩɩs taoor lʋɩtbã sẽn yaool n da get tigingã yell sõma wã.—Karm-y 3 Zã 9, 10.
7. Manesem bʋg la kiris-ned pa segd n talle?
7 Yam a woto pa segd n zĩnd tigingã pʋgẽ ye. Rẽnd tõnd ned kam fãa segd n gũusame n da wa tall a buud ye. Wa a Moiiz la tʋm-tʋmd a Zã wakatẽ kãsem-dãmbã sẽn da pa zems zãngã, rũndã-rũndã kãsem-dãmbã me pa zems zãng ye. Kãsem-soab tõe n wa tudgame n maan bũmb tɩ sãam d sũuri. A buudã sã n paam-do, segdame tɩ d ra rɩk dũniyã neb togs-n-taare, n yetẽ tɩ rẽnda b rok d sũuri, pa rẽ bɩ d yetẽ t’a pa segd n le yɩ kãsem-soab ye. A Zeova tõe n basa kongr ning taale. Bɩ tõnd me maan woto. Neb kẽer sẽn maan yel-wẽn-kãsems mi n tõdga kãsem-dãmbã sõngre, b sẽn get tɩ b sẽn yãk b rãmb tɩ b sõng-bã pa ta b yam yĩnga. Manesem a woto yaa wa bãad sẽn na n zãgs tɩbsg sẽn tõe n sãoog-a, a sẽn pa nong logtorã yĩnga.
8. Vɛrse bʋs n tõe n sõng-d tɩ d sak tigingã taoor lʋɩtba?
8 D sã n tẽeg tɩ Biiblã wilgame t’a Zezi zãada ‘ãds a yopoe ne a rɩtgo,’ na n sõng-d lame tɩ d kell n tall yam-sõngo. Bala, “ãdsã” makda tigingã kãsem-dãmb nins sẽn paam vʋʋsem sõngã zaeebã, la b makda kãsem-dãmb a taabã me. A Zezi tõe n wilga “ãdsã” sẽn be a nugẽ wã sor tɩ b maan bũmb ning fãa a sẽn get tɩ segdame. (Wil. 1:16, 20) A sẽn yaa tigingã Zusoabã, a mii bũmb nins kãsem-dãmbã fãa sẽn maandã. A “ninã yaa wa bug-witim.” Rẽnd b nin-yend sã n segd ne saglgo, yẽ n na n ges tɩ b bãng wakat ning b sẽn segd n sagl-a, la a sẽn segd ne saglg ninga. (Wil. 1:14) La nand t’a welg yellã, d segd n ket n sakda neb nins vʋʋsem sõngã sẽn yãkã, bala a Poll yeela woto: “Bɩ y sak yãmb taoor dãmbã la y reeg bãmb goamã, tɩ bõe, bãmb gũuda yãmb sɩɩse, bãmb sẽn na n wilg yɛlã fãa Wẽnnaam taoorã yĩnga. Bɩ a yɩ woto tɩ b maan ne sũ-noogo, la ka ne sũ-sãoong sẽn ka na n yɩ yãmb nafr ye.”—Heb. 13:17.
9. a) Kiris-ned sã n kong tɩ b sagl-a, a manesem tõe n yɩɩ wãna? b) D sã n wa kong tɩ b sagl-do, d manesem segd n yɩɩ wãna?
9 Kãsem-dãmbã sã n wa sagl ned wall b reeg tʋʋmd a sẽn da tar tigingã pʋgẽ, tõe n kɩtame tɩ b bãng yam ning a sẽn tarã. Makre, bi-bɩɩg sẽn da yaa kãsem-sõngd n wa n yik n tãood ze-video rãmb sẽn wilgd nen-kɛglem. Bʋko, kãsem-dãmbã sagl-a lame t’a pa kelg ye. Woto kɩtame tɩ b reeg a tʋʋmdã, bala, a ra pa le tũud noy nins b sẽn tikd n yãkd kãsem-sõngdbã ye. (Yɩɩl 11:5; 1 Tɩm. 3:8-10) Rẽ poore, a sɩnga yẽgengo, n yetẽ tɩ b sẽn maan yẽ wã pa segde, la a gʋls lɛta n tool filiyallã n wɩd kãsem-dãmbã. A wa n pʋd n tõgda tigingã saam-biis kẽer n dat tɩ b rɩk a naoore. La ned sã n pa rat n sak n deeg a kongre, a sãamda zems-n-taar ning sẽn be tigingã pʋgẽ wã. Woto pa nafd ned baa a ye. D sã n wa kong tɩ b sagl-do, yɩta sõma tɩ d tags d kongrã zug n dɩk yam, la d sak saglgã tao-tao.—Karm-y Wiisg 3:28, 29.
10. a) Wãn to la Zak 3:16-18 goamã tõe n sõng-d tɩ d bãng yam-sõng la yam-wẽng n bake? b) D sã n tar “yam ning sẽn yit yĩngrã,” nafa bʋs la d paamda?
10 Zak 3:16-18 goamã tõe n sõnga tõnd tɩ d bãng yam-sõng ne yam-wẽng n bake. Be, b yeta woto: “Sũ-kiir ne no-koɛɛm sẽn be zĩig ninga, zũnglg ne tʋʋm-wẽns buud fãa bee beenẽ. Yam ning sẽn yit yĩngrã reng n yaa sõma, la a yaool n bee laafɩ la sũ-bʋgsem, n sakd nana, la a pida ne nimbãan-zoeer la sõmblem biisi. A ka be kãnegr ye, la a ka zãmbg ye. Neb nins sẽn baood laafɩ wã bʋta tɩrlem biis ne laafɩ.” Tõnd ned kam fãa sã n tar “yam ning sẽn yit yĩngrã,” d na n dɩka Wẽnnaam togs-n-taar tɩ d yel-manesmã yaa sõma. Woto na n kɩtame tɩ zems-n-taar kell n zĩnd tigingã pʋgẽ.
TALL-Y YAM-SÕNG TIGINGÃ PƲGẼ
11. a) D sã n tar yam-sõngo, bõe la d pa na n maane? b) Yam bʋg la d paamd a Davɩɩd mak-sõngã pʋgẽ?
11 D pa segd n yĩm tɩ yaa a Zeova n yãk kãsem-dãmbã sẽn na yɩl tɩ b “rɩlg [a] tẽedbã” ye. (Tʋʋ. 20:28; 1 Pɩɛ. 5:2) Woto yĩnga, d yaa kãsem-soab tɩ d pa kãsem-soab me, segdame tɩ d waoog neb nins Wẽnnaam sẽn yãkã. D sã n tar yam-sõngo, baa d pa kãsem-soab wall kãsemb-sõngda, d pa na n yẽgemd rẽ yĩng ye. Rĩm a Sayull sẽn wa n tagsdẽ t’a Davɩɩd tõe n wa reega a zĩigã, ‘sũ-kiir yõk-a lame, t’a sɩng a Davɩɩd gũusgu.’ (1 Sãm. 18:9) Rĩmã wa n lebga wẽnga, hal n wa rat n kʋ a Davɩɩd menga. D ra rɩk a Sayull togs-n-taare, n nong naam ye. D yɩ wa a Davɩɩde. Baa a Sayull sẽn nams-a wã, a kell n waoog-a lame, a sẽn da mi tɩ yaa Wẽnnaam n yãk-a t’a yaa rĩmã.—Karm-y 1 Sãmwɛll 26:23.
12. Bõe la d tõe n maan tɩ zems-n-taar kell n zĩnd tigingã pʋgẽ?
12 D sẽn get yɛlã to-to wã sẽn pa ye wã, tõe n wa yɩɩ sabab tɩ mo-yõs zĩnd tigingã pʋgẽ. Baa kãsem-dãmbã ne taab meng moor tõe n wa yõsgame. La Biiblã sagls tõe n sõng-d-la rẽ wɛɛngẽ. Wala makre, a sagend-d lame tɩ ‘d waoogd taaba,’ la tɩ d ‘ra tags tɩ d tara yam wʋsg ye.’ (Rom 12:10, 16) Woto wilgdame tɩ yell ning taoore, wall tɩ d rat tɩ d taabã sak n deeg tɩ tõnd sẽn yetã la sɩdã, segdame tɩ d tẽeg tɩ bãmb me tõe n tara bʋʋm. D sã n kelgd d taabã neer la d sakd b sẽn yetã, na n sõngame tɩ tigingã neb ket n zemsd taaba.—Fil. 4:5, MN.
13. D sa n wa yã yell n togs kãsem-dãmbã, d manesem segd n yɩɩ wãna, la kiba-bʋg n tõe n sõng-do?
13 La rat n yeelame tɩ d sã n yã yell ning tigingã pʋgẽ n tagsdẽ tɩ yaa kɛgre, d pa tar sor n na n gom bɩ? Ayo. Pipi kiris-nebã wakate, no-koeemd n da wa n zĩnd saam-biisã sʋka. Woto kɩtame tɩ b ges t’a “Poll ne a Barnabas la bãmb neb kẽer kẽng Zerizalɛm tʋm-tʋmdbã ne kãsem-dãmbã nengẽ n tɩ ges yell kãng yelle.” (Tʋʋ. 15:2) Yaa vẽeneg tɩ nin-kãensã sẽn zĩnd n na n welg yellã, b ned kam fãa wilga a sẽn tagsde. La b sẽn kelg taab n tik Gʋlsg Sõamyã zug n yã yellã tɩɩmã, no-koɛɛmã saame. Rẽ poore, b gʋlsa lɛta n tool tigimsã n wilg sard ning b sẽn dɩkã. Kibarã wilgame tɩ saam-biisã “sũy yɩɩ noogo, bãmb sẽn paam belsgã yĩnga,” la tɩ b “paama pãng tẽeb pʋgẽ.” (Tʋʋ. 15:31; 16:4, 5) Woto me, d sã n wa yã yell d sẽn get tɩ yaa kɛgr n togs kãsem-dãmbã, segdame tɩ d kɩs sɩd tɩ b na n tagsa d gomdã zug sõma.
YAM-SÕNG WATA NE ZEMS-N-TAARE
14. Tõnd ne taab sʋkã, wãn to la d tõe n wilg tɩ d tara yam-sõngo?
14 Tõnd ne taab sʋkã, d paamda segb wʋsg n tõe n wilg tɩ d tara yam-sõngo. D ned kam fãa sã n sakd n kõt a taabã sugr tao-tao, sõngda wʋsgo. Wẽnnaam Gomdã yeta woto: “Bɩ y maan sũ-mar ne taab la y kõ taab sugri, ned sã n tar yell ne a to, a wa [a Zeova, MN] sẽn kõ yãmb sugrã, bɩ yãmb me kõ taab sugr woto.” (Kol. 3:13) B sẽn yeel tɩ “ned sã n tar yell ne a to” wã, rat n yeelame tɩ wakat ninga, d to tõe n maana bũmb tɩ d sũur yiki. La d pa tog n yikd d sũur tao-tao d taabã kong-bõoneg yĩng ye. Sã n pa rẽ, tõe n wa yɩɩ sabab tɩ laafɩ ning sẽn be tigingã neb sʋkã sãame. D rɩkd a Zeova togs-n-taar n kõt d tẽed-n-taasã sugri, n ket n tʋmd Wẽnnaam tʋʋmdã ne taaba.
15. a) Sugrã wɛɛngẽ, yam bʋg la d tõe n dɩk a Zoob kibarã pʋgẽ? b) Wãn to la pʋʋsgã tõe n sõng-d tɩ tall yam-sõngo?
15 Sugrã wɛɛngẽ, d tõe n dɩka yam a Zoob kibarã pʋgẽ. A zo-rãmb a tãabã sẽn da wa tɩ b na n bels-a wã wẽneg n gom-a lame n sãam a sũuri. La ne rẽ fãa, a Zoob kõ-b-la sugri. Bõe n sõng-a t’a tõog n kõ sugri? A ‘pʋʋsa a zo-rãmbã yĩngã.’ (Zoob 16:2; 42:10) Sɩd me, d sã n pʋʋs d to yĩnga, tõe n kɩtame tɩ d tags a zʋg-sõmã wã yelle. D sã n pʋʋsd d tẽed-n-taasã fãa yĩnga, na n sõng-d lame tɩ d nong-b wa a Zezi sẽn nong-dã. (Zã 13:34, 35) Sẽn paase, d segd n pʋʋsda Wẽnnaam n kot a vʋʋsem sõngã. (Luk 11:13) Wẽnnaam vʋʋsem sõngã na n sõng-d lame tɩ d paam zʋg-sõma nins kiris-ned hakɩk sẽn segd n tallã.—Karm-y Galat dãmb 5:22, 23.
YÃMB YAM-SÕNGÃ NAFDA TIGINGÃ NEB FÃA
16, 17. Yam bʋg la yãmb dat n talle?
16 Ned kam fãa sã n modgd n dat tɩ yam-sõng kell n zĩndi, nafda tigingã neb gilli. Tõe tɩ sõs-kãngã sõng-y lame tɩ y bãng tɩ y segd n manega yam ning y sẽn tarã n tõog n kengd y taabã raoodo. Sã n yaa rẽ, bɩ y bas tɩ Wẽnnaam Gomdã wilg-y zĩis nins sẽn dat manegrã. (Heb. 4:12) A Poll sẽn da tʋll n kõ tigingã neb mak-sõngã yeela woto: “Mam ka mi mam sẽn kong ne bũmb ning ye, la yãoã ka kõt maam bʋʋm ye. Yaa Zusoabã n bʋʋd mam bʋʋdo.”—1 Kor. 4:4.
17 Tõnd ned kam fãa tõe n sõngame tɩ yam-sõng kell n zĩnd tigingã pʋgẽ. Rẽ baoodame tɩ d tall yam ning sẽn yit yĩngrã. D pa na n dat tɩ wakat fãa bɩ yaa tõnd sẽn yeel n be, wall n getẽ tɩ tõnd n tõe n tʋm sõma n yɩɩg d taabã ye. Sẽn paase, d sã n sakd n kõt d taabã sugr la d tagsd b zʋg-sõma wã yelle, zems-n-taar na n zĩnda d sʋka. (Fil. 4:8) D sã n maand woto, d tõe n kɩsa sɩd t’a Zeova ne a Zezi sũur na n yɩɩ noog ne yam ning d sẽn tarã.—File. 25, MN.
[Zãmsgã sogsgã]
[Foto seb-neng 20]
D sã n tẽeg t’a Zezi la tigingã Zusoaba, d manesem yɩta wãn ne kãsem-dãmbã saglsã?
