Liema Tip Taʼ Spirtu Turi Int?
“Il-qalb tajba mhix mistħoqqa tal-Mulej Ġesù Kristu tkun maʼ l-ispirtu li turu.”—FLM. 25.
TAF TWIEĠEB?
Għala rridu noqogħdu b’sebaʼ għajnejn għall-ispirtu li nuru?
X’attitudnijiet irridu nevitaw, u kif nistgħu nagħmlu dan?
X’nistgħu nagħmlu biex nuru spirtu inkuraġġanti fil-kongregazzjoni?
1. Pawlu x’tama esprima meta kien qed jikteb lil sħabu fit-twemmin?
META kien qed jikteb lil sħabu fit-twemmin, l-appostlu Pawlu darba wara l-oħra qal li kien jittama li Alla u Kristu kienu japprovaw l-ispirtu li wrew il-kongregazzjonijiet. Pereżempju, lill-Galatin kitbilhom: “Il-qalb tajba mhix mistħoqqa tal-Mulej tagħna Ġesù Kristu tkun maʼ l-ispirtu li turu, ħuti. Amen.” (Gal. 6:18) X’ried ifisser meta qal “l-ispirtu li turu”?
2, 3. (a) Xi kultant, Pawlu għal xiex kien ikun qed jirreferi meta uża l-kelma “spirtu”? (b) Liema mistoqsijiet nistgħu nistaqsu lilna nfusna rigward l-ispirtu li nuru?
2 Hawnhekk, Pawlu uża l-kelma “spirtu” biex jirreferi għall-attitudni tagħna, jew għall-mod kif naħsbuha. Dan iġegħelna nitkellmu jew naġixxu b’ċertu mod. Xi nies għandhom mnejn ikunu ġentili, jaħsbu f’oħrajn, ikunu ġwejdin, ġenerużi, jew lesti li jaħfru. Il-Bibbja tgħid li hu tajjeb li wieħed ikollu “spirtu kwiet u ġwejjed” u li “jżomm spirtu kalm.” (1 Pt. 3:4; Prov. 17:27) Min-naħa l-oħra, ħaddieħor għandu mnejn ikun sarkastiku, materjalistiku, jieħu għalih mix-xejn, jew ikollu attitudni indipendenti. Agħar minn hekk, hemm xi wħud li juru spirtu mhux nadif, diżubbidjenti, jew saħansitra ribelluż.
3 B’hekk, meta Pawlu uża espressjonijiet bħal “il-Mulej ikun maʼ l-ispirtu li turi,” hu kien qed jinkuraġġixxi lil ħutu biex juru spirtu fi qbil mar-rieda t’Alla u mal-personalità bħal taʼ Kristu. (2 Tim. 4:22; aqra Kolossin 3:9-12.) Illum, nagħmlu tajjeb jekk nistaqsu lilna nfusna: ‘Liema tip taʼ spirtu nuri jien? Kif nistaʼ nuri iktar bis-sħiħ spirtu li jogħġob lil Alla? Kif nistaʼ nħeġġeġ lil oħrajn fil-kongregazzjoni biex ikollhom attitudni li togħġob lil Alla?’ Pereżempju, f’għalqa mimlija ward tax-xemx, il-kulur jgħajjat taʼ kull fjura jgħin biex l-għalqa kollha kemm hi tkun sabiħa. Aħna bħal waħda minn dawn il-fjuri? Qed ngħinu biex insebbħu l-kongregazzjoni kollha? Żgur li għandna nistinkaw biex nagħmlu dan. Ejja naraw kif nistgħu nuru spirtu li jogħġob lil Alla.
EVITA L-ISPIRTU TAD-DINJA
4. X’inhu “l-ispirtu tad-dinja”?
4 L-Iskrittura tgħidilna: “Aħna ma rċivejniex l-ispirtu tad-dinja, imma l-ispirtu li ġej mingħand Alla.” (1 Kor. 2:12) X’inhu “l-ispirtu tad-dinja”? Hu l-istess spirtu msemmi f’Efesin 2:2, li jgħid: “Darba kontu timxu skond is-sistema taʼ din id-dinja, skond il-ħakkiem taʼ l-awtorità taʼ l-arja, l-ispirtu li issa qed jaħdem f’ulied id-diżubbidjenza.” Din “l-arja” hi l-ispirtu, jew l-attitudni mentali, tad-dinja u ninsabu mdawrin biha bħall-arja letterali. Tinsab kullimkien. Pereżempju, illum il-ġurnata ħafna nies għandhom l-attitudni taʼ ‘Ħadd mhu se jgħidli x’għandi nagħmel!’ jew, ‘Trid tiġġieled għad-drittijiet tiegħek!’ Dawn huma “wlied id-diżubbidjenza” tad-dinja taʼ Satana.
5. Liema spirtu ħażin urew xi wħud f’Iżrael?
5 Mhix xi ħaġa ġdida li naraw attitudnijiet bħal dawn. Fi żmien Mosè, Koraħ ħadha kontra dawk li kellhom l-awtorità f’Iżrael. Tkellem partikularment kontra Aron u wliedu, li kellhom il-privileġġ li jaqdu bħala qassisin. Forsi ra l-imperfezzjonijiet tagħhom. Jew forsi saħaq li Mosè kien qed juri n-nepotiżmu—jiġifieri, kien qed jagħti privileġġi lil qrabatu. Kien x’kien il-każ, hu ovvju li Koraħ beda jħares lejn l-affarijiet minn lenti umana u tkellem kontra dawk maħturin minn Ġeħova. B’diżrispett qalilhom: “Biżżejjed għalikom, . . . Għala għandkom togħlew fuq il-kongregazzjoni taʼ Ġeħova?” (Num. 16:3) B’mod simili, Datan u Abiram ilmentaw kontra Mosè u qalulu li kien qed ‘jilgħabha taʼ prinċep fuqhom.’ Meta ntalbu jidhru quddiem Mosè, b’suppervja wieġbu: “M’aħniex se nitilgħu!” (Num. 16:12-14) Jidher ċar li Ġeħova xejn ma ħa pjaċir bl-ispirtu li wrew. Hu qered lir-ribelli kollha.—Num. 16:28-35.
6. Xi rġiel fl-ewwel seklu kif urew li kellhom attitudni ħażina, u x’setaʼ kien il-kaġun tagħha?
6 Xi rġiel fl-ewwel seklu wkoll bdew imaqdru lil dawk li kienu fdati bl-awtorità fil-kongregazzjoni u ‘injoraw lil min hu fuqhom.’ (Ġuda 8) Dawn l-irġiel x’aktarx li ma kinux sodisfatti bil-privileġġi tagħhom u pprovaw jinfluwenzaw lil oħrajn biex jiħduha kontra rġiel maħturin li kienu qed jagħmlu l-almu tagħhom biex iwettqu inkarigi mogħtijin lilhom minn Alla.—Aqra t-3 Ġwanni 9, 10.
7. Illum, f’liema sens jistaʼ jkollna noqogħdu b’sebaʼ għajnejn fil-kongregazzjoni?
7 Ovvjament, dan it-tip t’attitudni żgur li ma jkunx f’loku fil-kongregazzjoni Kristjana. Hu għalhekk li hemm bżonn li noqogħdu b’sebaʼ għajnejn f’dan ir-rigward. L-anzjani fil-kongregazzjoni mhumiex perfetti, l-istess bħalma ma kinux perfetti fi żmien Mosè u fi żmien l-appostlu Ġwanni. L-anzjani jistgħu jieħdu żbalji li jeffettwawna personalment. Jekk jiġri dan, tassew ma jkunx xieraq li kwalunkwe membru tal-kongregazzjoni jirreaġixxi fi qbil mal-ispirtu tad-dinja billi jinsisti ħafna għall-“ġustizzja” jew jgħid, “Dan il-ħu ma jixraqlux ikun anzjan.” Ġeħova għandu mnejn jagħżel li jinjora ċerti nuqqasijiet żgħar. Ma nistgħux aħna nagħmlu l-istess? Minħabba dawk li huma jqisu bħala difetti fl-anzjani, xi individwi li dinbu serjament fil-kongregazzjoni rrifjutaw li jidhru quddiem il-kumitat tal-anzjani li ġie inkarigat jgħinhom. Dan nistgħu nxebbhuh maʼ pazjent li jirrifjuta ċerta kura għall-marda tiegħu għax ikun hemm xi ħaġa li ddejqu fit-tabib.
8. Liema skritturi jistgħu jgħinuna nżommu ħarsa xierqa lejn dawk li jieħdu t-tmexxija fil-kongregazzjoni?
8 Sabiex nevitaw dan it-tip taʼ spirtu, nistgħu niftakru li fil-Bibbja, Ġesù jiġi deskritt bħala li għandu ‘sebaʼ kwiekeb f’idu l-leminija.’ Il-“kwiekeb” jagħtu stampa tal-anzjani midlukin, imma dak li jintqal dwarhom jistaʼ jirreferi wkoll għall-anzjani kollha fil-kongregazzjonijiet. Ġesù jistaʼ jidderieġi lill-“kwiekeb” f’idu bi kwalunkwe mod kif jidhirlu li hu xieraq. (Riv. 1:16, 20) B’hekk, bħala l-Kap tal-kongregazzjoni Kristjana, Ġesù għandu kontroll sħiħ fuq il-ġemgħat tal-anzjani. Jekk xi ħadd fil-ġemgħa tassew ikollu bżonn korrezzjoni, il-wieħed li għandu “għajnejh bħal fjamma nar” se jara li tingħatalu fil-ħin Tiegħu u bil-mod kif irid Hu. (Riv. 1:14) Sadattant, aħna nibqgħu nuru rispett xieraq lejn dawk maħturin bl-ispirtu qaddis, għax Pawlu kiteb: “Kunu ubbidjenti lejn dawk li qed imexxu fostkom u kunu sottomessi lejhom, għax huma qed jgħassulkom ruħkom bħala dawk li għad iridu jagħtu kont; sabiex dan jagħmluh bil-ferħ u mhux bit-tnehid, għax inkella jkun taʼ ħsara għalikom.”—Ebr. 13:17.
9. (a) Minn liema prova jistaʼ jgħaddi Kristjan jekk jiġi koreġut jew dixxiplinat? (b) X’inhu l-aħjar mod kif wieħed jilqaʼ t-twiddib?
9 L-ispirtu taʼ Kristjan jistaʼ jgħaddi minn prova wkoll jekk hu jiġi koreġut jew jekk jitneħħewlu l-privileġġi fil-kongregazzjoni. Ħu li kien għadu żgħir ngħata parir bit-tattika mill-anzjani għax kien jilgħab logħob vjolenti tal-kompjuter. B’sogħba, ma tantx laqgħu tajjeb il-parir u ladarba ma kienx qed jagħmel dak li l-Bibbja tirrikjedi mill-qaddejja ministerjali, ma setax jibqaʼ jaqdi f’din il-kariga. (Salm 11:5; 1 Tim. 3:8-10) Wara, il-ħu xandar mal-erbat irjieħ li ma kienx jaqbel mad-deċiżjoni. Kiteb bosta ittri lill-uffiċċju tal-fergħa u fihom maqdar lill-anzjani, u saħansitra influwenza lil oħrajn fil-kongregazzjoni biex jagħmlu bħalu. Imma l-verità hi li jekk noqogħdu nivvintaw l-iskużi għall-għemil ħażin tagħna, inkunu qed inpoġġu fil-periklu l-paċi tal-kongregazzjoni kollha kemm hi, u dan mhu se jgħin lil ħadd. Kemm ikun aħjar jekk inħarsu lejn it-twiddib bħala mezz kif niftħu għajnejna biex naraw dgħufijiet li ma nkunux konxji tagħhom u mbagħad bil-kalma naċċettaw il-korrezzjoni.—Aqra Lamentazzjonijiet 3:28, 29.
10. (a) Ġakbu 3:16-18 x’jgħallimna dwar l-attitudni tajba u l-attitudni ħażina? (b) X’riżultat ikun hemm meta nuru “l-għerf li ġej minn fuq”?
10 Ġakbu 3:16-18 jgħallimna x’inhi l-attitudni tajba u x’inhi l-attitudni ħażina li xi ħadd juri fil-kongregazzjoni. Hemmhekk jgħid: “Fejn hemm l-għira u l-ġlied, hemm id-diżordni u kull ħaġa vili. Imma l-għerf li ġej minn fuq hu l-ewwelnett safi, imbagħad iġib il-paċi, hu raġunevoli, lest li jobdi, mimli ħniena u frott tajjeb, ma jagħmilx distinzjonijiet parzjali, mhux ipokrita. Barra minn hekk, il-frott tal-ġustizzja jinżeraʼ f’kundizzjonijiet paċifiċi għal dawk li qegħdin iġibu l-paċi.” Hekk kif naħdmu f’armonija mal-“għerf li ġej minn fuq,” il-kwalitajiet divini tagħna se jgħinuna nikkontribwixxu għal spirtu tajjeb fost l-aħwa.
URI SPIRTU TAʼ RISPETT FIL-KONGREGAZZJONI
11. (a) Jekk ikollna attitudni tajba, x’m’aħniex se nagħmlu? (b) X’nitgħallmu mill-eżempju taʼ David?
11 Għandna niftakru li Ġeħova ħatar ’l-anzjani ‘biex jirgħu l-kongregazzjoni t’Alla.’ (Atti 20:28; 1 Pt. 5:2) B’hekk, inkunu għaqlin jekk nirrispettaw l-arranġament t’Alla, kemm jekk għandna l-privileġġ li naqdu bħala anzjani u kemm jekk le. Jekk ikollna attitudni tajba, m’aħniex se nagħtu wisq importanza lejn il-fatt li jkollna xi awtorità jew xi responsabbiltà. Meta s-Sultan Sawl t’Iżrael ħaseb li David setaʼ jsir sultan floku, Sawl “baqaʼ jissuspetta f’David.” (1 Sam. 18:9) Is-sultan żviluppa spirtu ħażin u saħansitra ried joqtol lil David. Minflok ma nkunu moħħna fil-pożizzjoni kif kien Sawl, kemm ikun aħjar li nkunu bħal David. Minkejja l-inġustizzja kollha li ħabbat wiċċu magħha, dan iż-żagħżugħ dejjem wera rispett lejn dawk li ngħataw l-awtorità mingħand Alla.—Aqra l-1 Samwel 26:23.
12. Kif nistgħu ngħinu biex il-kongregazzjoni tibqaʼ unita?
12 Il-Malti jgħid mitt bniedem mitt fehma u dan jistaʼ jkun sors taʼ irritazzjoni fil-kongregazzjoni—anke fost l-anzjani. F’dan ir-rigward jistgħu jgħinuna l-pariri tal-Bibbja: “Kunu minn taʼ quddiem biex tonoraw lil xulxin” u, “Tkunux għaqlin f’għajnejkom stess.” (Rum. 12:10, 16) Minflok ma ninsistu li għandna raġun, għandna nagħrfu li spiss ikun hemm iktar minn mod wieħed aċċettabbli kif tħares lejn sitwazzjoni. Jekk nipprovaw naraw l-affarijiet mil-lenti taʼ ħaddieħor, nistgħu ngħinu biex il-kongregazzjoni tibqaʼ unita.—Flp. 4:5.
13. Kif għandna nqisu l-opinjonijiet tagħna stess, u liema eżempju Bibliku jenfasizza dan?
13 Ifisser dan li nagħmlu ħażin jekk nesprimu l-opinjoni tagħna meta naraw xi ħaġa fil-kongregazzjoni li naħsbu li għandha tiġi koreġuta? Le. Fl-ewwel seklu qamet kwistjoni li dwarha saru ħafna dibattiti. L-aħwa ddeċidew “li Pawlu u Barnaba u xi oħrajn minn fosthom jitilgħu għand l-appostli u l-anzjani f’Ġerusalemm rigward dan l-argument.” (Atti 15:2) Bla ebda dubju, kull wieħed minn dawn l-aħwa kellu opinjoni dwar is-suġġett u idea dwar kif messhom jirranġaw il-kwistjoni. Madankollu, wara li kull wieħed minnhom esprima l-opinjoni tiegħu u ttieħdet deċiżjoni bl-għajnuna tal-ispirtu, l-aħwa ma baqgħux isemmu l-opinjonijiet individwali tagħhom. Wara li waslet ittra bid-deċiżjoni għand il-kongregazzjonijiet, huma “ferħu bl-inkuraġġiment” u ‘ssodaw fil-fidi.’ (Atti 15:31; 16:4, 5) Bl-istess mod illum, ladarba nkunu tkellimna mal-anzjani dwar xi ħaġa li tkun qed tkiddna, għandna l-fiduċja li huma se jaħsbu bis-serjetà fuq dak li nkunu għednielhom u jiddeċiedu jekk ikunx hemm bżonn li ssir xi ħaġa dwarha.
URI SPIRTU MILL-AĦJAR FIR-RELAZZJONIJIET PERSUNALI
14. Kif nistgħu nuru spirtu mill-aħjar fir-relazzjonijiet tagħna m’oħrajn?
14 Fir-relazzjonijiet tagħna m’oħrajn, hemm diversi opportunitajiet biex nuru spirtu mill-aħjar. Kull wieħed u waħda minna jistaʼ jagħmel ħafna ġid jekk ikun ħafif biex jaħfer meta xi ħadd jirfislu l-kallu. Il-Kelma t’Alla tgħidilna: “Komplu ssaportu lil xulxin u aħfru lil xulxin mill-qalb jekk xi ħadd għandu għalxiex jilmenta kontra ħaddieħor. Bħalma Ġeħova ħafrilkom mill-qalb, agħmlu hekk intom ukoll.” (Kol. 3:13) L-espressjoni “jekk xi ħadd għandu għalxiex jilmenta” tagħti x’tifhem li jistaʼ jkollok raġunijiet validi għala tħossok xi ftit imweġġaʼ. Però, minflok ma nkunu konċernati żżejjed dwar in-nuqqasijiet żgħar t’oħrajn, u b’hekk infixklu l-paċi tal-kongregazzjoni, aħna nipprovaw nimitaw lil Ġeħova u naħfru mill-qalb u nkomplu naqdu lil Alla spalla maʼ spalla magħhom.
15. (a) Minn Ġob, x’nistgħu nitgħallmu dwar il-maħfra? (b) It-talb kif jistaʼ jgħinna nuru l-attitudni tajba?
15 Minn Ġob nistgħu nitgħallmu dwar il-maħfra. It-tliet hekk imsejħin farraġa tiegħu qalulu ħafna kliem iebes. Xorta waħda, Ġob wera l-maħfra. Kif? “Talab għal sħabu.” (Ġob 16:2; 42:10) Jekk nitolbu għal oħrajn nistgħu nibdew inbiddlu l-attitudni tagħna lejhom. Meta nitolbu għal ħutna kollha, ikun eħfef li nħarsu lejhom bil-mod kif iħares Ġesù. (Ġw. 13:34, 35) Ukoll, għandna nitolbu lil Alla għall-ispirtu qaddis tiegħu. (Lq. 11:13) L-ispirtu t’Alla se jgħinna nuru kwalitajiet Kristjani fir-relazzjonijiet tagħna m’oħrajn.—Aqra Galatin 5:22, 23.
IKKONTRIBWIXXI GĦAL SPIRTU BNIN FL-ORGANIZZAZZJONI T’ALLA
16, 17. X’int determinat li tagħmel personalment fejn jidħol ‘l-ispirtu li nuru’?
16 Kemm ikun hemm riżultati mill-isbaħ meta kull membru tal-kongregazzjoni jagħmilha l-mira tiegħu li jikkontribwixxi għall-ispirtu bnin tal-kongregazzjoni! Issa li kkunsidrajna dan is-suġġett forsi niddeċiedu li nistgħu nitjiebu personalment f’li nuru spirtu inkuraġġanti. Jekk nistgħu, m’għandniex naħsbuha darbtejn biex inħallu l-Kelma t’Alla turina kif nistgħu nitbiddlu. (Ebr. 4:12) Pawlu, li kien konċernat ferm dwar l-aġir tiegħu fil-kongregazzjonijiet, qal: “Il-kuxjenza tiegħi hi nadifa f’kollox. Iżda dan ma jurix li jien ġust, imma dak li jistħarriġni hu Ġeħova.”—1 Kor. 4:4.
17 Nistgħu lkoll ninkuraġġixxu lil xulxin biex inżommu spirtu tajjeb fil-kongregazzjoni billi nimitaw il-kwalitajiet t’Alla u ma ninsistux fuq l-opinjonijiet tagħna jew ma naħsbux li jistħoqqilna iktar responsabbiltajiet. Jekk inkunu ħfief biex naħfru u naħsbu tajjeb f’ħaddieħor se ngawdu relazzjonijiet paċifiċi maʼ sħabna fit-twemmin. (Flp. 4:8) Aħna u nagħmlu dawn l-affarijiet, nistgħu nkunu fiduċjużi li Ġeħova u Ġesù se jieħdu pjaċir ‘bl-ispirtu li nuru.’—Flm. 25.
[Mistoqsijiet ta’ Studju]
[Stampa f’paġna 14]
X’għandna niftakru meta ningħataw xi parir mingħand l-anzjani?