1. Keman Pablo kijkuiloj amaixmej, ¿toni miakpa kinextij ke kinnejnekiliaya tokniuan?

ITECH amaixmej tein tatitanil Pablo kinijkuilouilij itatojtokakauan Cristo, miakpa kinextij ke kinekia maj Dios uan Cristo kinyolpaktiani tanemilil tein sejse nechikol kinextiaya. Kemej neskayot, akin nemiaj Galacia kinijkuilouilij: “Totekotsin Jesucristo ma namechyoliknelijtiu tech namotalnamikilis. Ma ijkon mochiutiu. Amén” (Gál. 6:18). ¿Toni kijtosnekik ika nejin tajtolmej?

2, 3. 1) Keman Pablo kikuik tajtol “tanemilil”, ¿toni kiteajsikamatiltij miakpa? 2) ¿Toni uelis timotajtaniskej ika totanemilil?

² Keman Pablo kikuik tajtol “tanemilil”, ika tajtouaya tein techolinia maj tikijtokan oso maj tikchiuakan teisa. Kemej neskayot, se taltikpaknenkej uelis kipias se tanemilil tein kichiua maj kualtakat, tapoujkaitakej, tetasojtakej oso teiknelijkej. Biblia kijtoua ke kuali tikchiuaj komo ‘tiyolyemankanentinemij’ uan ‘tiyolseujtokej’ (1 Ped. 3:4; Prov. 17:27). Oksekin uelis kipiaskej se tanemilil tein kichiua maj teyolxokolikan, maj kinekikan moteltomintiskej, maj niman moyolxokolikan, maj amo kinekikan maj nion akin kinilui keniuj monejnemiltiskej, oso tein okachi amo kuali, maj auilnemikan, maj amo tatakamatikan uan maj taixnamikikan.

³ Yejua ika, keman Pablo kikuik tajtolmej kemej nejin, “maj toTekotsin yeto itech tanemilil tein tiknextia”, kinyolchikaujtoya tokniuan maj kitojtokanij ineskayo Cristo uan maj kipiakan se tanemilil tein kiyolpaktia Dios (2 Tim. 4:22, TNM; xikonixtajtolti  Colosenses 3:9-12). Axkan tonalmej, tel kuali komo tisejsemej timotajtaniaj nejin: “¿Katiyejua tanemilil niknextia? ¿Toni uelis nikchiuas uan ijkon nikyektalis notanemilil kemej kiyolpaktis Dios? ¿Keniuj uelis nikinyolchikauas oksekin itech nechikol maj no kipiakan se kuali tanemilil?”. Kemej neskayot, tal kampa onkak miak xochit, sejse xochit takualtsintilia ompa. ¿Tiontamati tejuatsin kemej  semej nejon xochit tein kichiua maj kualtsin moita nechikol? Yekmelauj tinochin moneki timochikauaskej maj tonechikol kualtsin moita. Yejua ika, maj tikitakan keniuj uelis tikpiaskej se tanemilil tein kiyolpaktis Dios.

4. ¿Toni kijtosneki “talnamikilis ten poui nikan taltikpak”?

⁴ Biblia techiluia: “Dios amo techtayokolia ne talnamikilis ten poui nikan taltikpak san. Ta, Yejuatsin techtayokolij in Yektikatsin Espíritu ten kualkui talnamikilis de Dios” (1 Cor. 2:12). ¿Toni kijtosneki “talnamikilis ten poui nikan taltikpak”? Nejin no yejua tein ika tajtoua Efesios 2:2, kampa kijtoua ke sekin achto nentinemiaj “kemej in taltikpakuanij kichiujtinemij. Uan no [kitakamattinemiaj] ne tayekankej amokuali ejekat, [...] ten axkan takitskijtok ne ejekaixko uan nikan taltikpak. Uan ijkon ne Satanás kachi ok kinyoltekitilijtok nochi nekes ten axkan kixnamiktinemij Totajtsin Dios”. Nejon “ejekat” kiixnextia tanemilil tein poui nikan taltikpak, se tanemilil tein noyampa moajsi kemej yeskia ejekat. Kemej neskayot, miakej taltikpakneminij axkan kipiaj tanemilil kemej nejin, “Amo akin nechiluis toni nikchiuas” oso “Xitajtani maj mopoujkaita tein mitsnamiki tikpias”. Akin kipiaj nejin tanemilil yejuan akin “kixnamiktinemij Totajtsin Dios” itech nejin taltikpak kampa Satanás taixyekantok.

5. ¿Toni amo kuali tanemilil kinextijkej sekin israelitas?

⁵ Nejin tanemilil amo yankuik. Itech itonaluan Moisés, Coré kinixnamikik akin kiselijkej tanauatil itech nechikol Israel. Yejua okachi kinixnamikik Aarón uan ikoneuan, akin tekitiaj kemej tiopixkamej. Coré xa kiitak ininnepololuan oso xa kinemilij ke Moisés kinmakak nejon tatiochiualis sayoj porin katkaj ichankauan. Tein kemaj, moyekita ke amo tanemiliayaok kemej Jiova uan kinijijtoj takamej akin kinixtalijka, keman kiniluij: “Ximotsakuilikanya [...]. ¿Keyej nanmoajokuij kemej tayekananij itech inechikol Jiova?” (Núm. 16:3). No ijkon, Datán uan Abiram kiixnamikkej Moisés uan kiiluijkej: “Tiktemoua senkis timochiuas totayekankauj”. Uan keman yejua tanauatij maj kinnotsatij, yejuan amo kinextijkej se kuali tanemilil uan tanankilijkej: “¡Amo tipankisaskej!” (Núm. 16:12-14). Moyekita ke Jiova amo kiyolpaktij tanemilil tein kipiayaj, ta kinixpoloj nochin taixnamikinij (Núm. 16:28-35).

6. ¿Keniuj seki takamej itech yekinika siglo kinextijkej ke amo kipiayaj se kuali tanemilil, uan keyej xa ijkon kichiujkej?

⁶ Itech yekinika siglo seki takamej no kinijijtojkej uan kinixtopeujkej takamej akin kipiayaj tanauatil itech nechikol (Jud. 8). Nejin takamej xa kinemilijkej ke kinnamikia kipiaskej okachi tanauatil ke tein kinmakakaj. Uan kitemojkej kichiuaskej maj oksekin tokniuan no amo kinpoujkaitanij tayekananij, akin mochikauayaj kichiuaskej tekit tein Jiova kinmaktilijka (xikonixtajtolti 3 Juan 9, 10).

7. ¿Ika toni tanemilil moneki timopiaskej?

⁷ Nejin tanemilil amo moneki moajsis itech nechikol kampa kichiuaj kemej Cristo. Yejua ika, moneki timopiaskej maj amo peua ijkon titanemilikan. Tokniuan tein axkan techixyekanaj no tajtakouanij, ijkon kemej katkaj tajtakouanij tayekananij itech itonaluan Moisés oso tatitanil Juan. Tayekananij uelis mopoloskej itech se taman tein uelis techijtakos. Komo nejon panoskia, maj amo keman tikpiakan tanemilil tein poui nikan taltikpak uan maj amo titajtanikan maj monexti ke teisa amo mochiuak ika melaujkayot oso maj tikijtokan ke tokniuj amo kinamiki yeskiok tayekankej. Maj tikelnamikikan ke Jiova kemansa kiixpanauia seki nepololmej tein amo uejueyi tein kichiuaj tayekananij, yejua ika, ¿uelis no ijkon tikchiuaskej? Sekin tokniuan tein kichiujkej se ueyi tajtakol, amo kinekij mosentiliskej iniuan tayekananij akin kinixtalijkej maj kinpaleuikan, sayoj porin amo kiuelitaj teisa tein kichiuaj. Yejuan tamatij kemej aksa akin mokokoua, akin amo kineki kiselis pajti sayoj porin amo kiuelita teisa tein kichiua tapajtijkej.

8. ¿Katiyejua tajkuilolmej techpaleuiaj maj tiksentokakan tikinpoujkaitakan tayekananij itech nechikol?

 ⁸ Komo tiknekij tikixtopeuaskej nejon tanemilil, moneki tikelnamikiskej ke Biblia kijtoua ke “niyekmakopaka [Jesús] maaktok chikome sitalinme”. Nejin sitalimej kinixnextia tokniuan tayekananij akin taixpejpenalmej, uan no kinixnextia nochin tayekananij itech nechikolmej. Uan yejua kimati keniuj kinixyekanas “sitalinme” akin moajsij imako (Apoc. 1:16, 20). Yejua ika, kemej yejua Jesús kiixyekana nechikol, kuali kimati toni panoua iniuan tayekananij. Biblia kijtoua ke “niixtololouan [...] keme yeskia tit” tein kijtosneki ke nochi kiita, yejua ika, komo se tayekankej moneki kimelauaskej yejua kiitas kemanian uan keniuj mochiuas (Apoc. 1:14). Sayoj ke tejuan moneki tiksentokaskej tikinpoujkaitaskej takamej akin kinixtalijkej ika yektikatsin espíritu porin Pablo kijkuiloj: “Xikintakamatiyakan namotayekankauan [...] uan ximotekauilikan ma namechyekanakan, porin yejuan namechyolyekantinemij uan kiyekpixtinemij namotalnamikilis. Uan [...] kimatij ke se tonal kipiaj de kitemakatitiue cuenta iuan Dios. Uan [...] [ijkon] uelis tekititinemiske ka yolpakilis uan amo ka ne yolkuejmololis. Porin komo namejuan nankinyolkuejmolojtinemij [...], ijkuakon namejuan amo teyi nanmoseliltiaj ten kuali” (Heb. 13:17).

9. 1) ¿Toni tanemilil uelis kinextis se tokniuj keman kimelauaskej? 2) ¿Keniuj moneki tikitaskej keman techmelauaskej?

⁹ Se tokniuj uelis kinextis ox kipia se kuali tanemilil oso amo keman kimelauaj oso kikuiliaj tekit tein kichiuaya itech nechikol. Itech se nechikol tayekananij tajtojkej iuan se tokniuj telpoch  akin katka tapaleuijkej porin tel mauiltiaya ika videojuegos kampa moitaya neteuilis. Tetayokoltij tikijtoskej ke tokniuj amo kinekik kiselis tayolmajxitilis, uan kemej amo kichiujtoyaok tein Biblia kintajtania tapaleuianij, yejua amo ueliskiaok kisentokas kichiuas nejon tekit (Sal. 11:5; 1 Tim. 3:8-10). Satepan tokniuj peuak kiniluia oksekin tokniuan ke amo kiseliaya tein tayekananij kiixejekojkej, uan no kijkuiloj miak amamej tein kititanik sucursal kampa amo kuali ininka tajtouaya tayekananij, uan kinyolchikauak oksekin tokniuan maj no ijkon kichiuakan. Sayoj ke tein melauj, komo tiktemouaj keniuj timopaleuiskej ika tein amo kuali tein tikchiuaj, uelis tikchiuaskej maj amo onka yolseuilis itech nochi nechikol. Okachi kuali, keman techmelauaskej maj tikitakan kemej se teisa tein ika uelis tikitaskej tonepololuan uan maj kuali tikselikan (xikonixtajtolti Lamentaciones 3:28, 29).

10. 1) ¿Keniuj techpaleuia Santiago 3:16-18 maj tikitakan katiyejua kuali tanemilil uan katiyejua amo? 2) ¿Keniuj techpaleuia komo tiknextiaj “tamachilis [oso tamatilis] ten ualeutok de Dios”?

¹⁰ Santiago 3:16-18 techpaleuia maj tikitakan katiyejua tanemilil moneki tiknextiskej itech nechikol uan katiyejua amo. Kijtoua: “Kampa ongak ne nejxikolot no ompa ongak ne moueyinekayot, uan no ompa tapeualtijtinemij uan kichiutinemij ka miak tataman pitsotik chiualisme. Pero nekes ten kipiaj in tamachilis [oso tamatilis] ten ualeutok de Dios, [...] kitenextilijtinemij ninchipaukanemilis. Uan de ompa yejuan teyoltaliaj, uan teyeknojnotsaj porin yejuan yolkualime ya. Uan yejuan yolyemanke ya uan kichiuaj ten kuali. Uan yejuan tajtoaj sayo ika ten melau uan amo tekajkayauaj. Uan nochi nekes ten tekititinemij para ma [...] [onka] ne neyolseuilis iuan Dios, [...] kichiutinemij ma in taltikpakuani ma kipiakan se yolchipaualis”. Komo tejuan tiknextiaj ke tikpiaj “tamachilis [oso tamatilis] ten ualeutok de Dios”, tiktojtokaskej ikualneskayouan uan nejon tapaleuis maj onka yolseuilis itech nechikol.

11. 1) Komo tikpiaj se kuali tanemilil, ¿toni amo tikchiuaskej? 2) ¿Toni techmachtia neskayot tein kikauak David?

¹¹ Maj amo tikelkauakan ke yejua Jiova akin kinnauatijtok tayekananij maj ‘kinyekyekantiyakan nochi in taneltokani tokniuan’ (Hech. 20:28; 1 Ped. 5:2). Yejua ika, tiknextiskej tamatilis komo tikpoujkaitaj itanejnekilis Dios, yeski titayekananij oso amo. Komo tikpiaj kuali tanemilil, amo tikitaskej ke motelneki tikpiaskej tanauatil itech nechikol. Keman tekiuaj Saúl kinemilij ke David kikuiliskia tekiuajyot “peuak nochipa amo kuali kiitaya” (1 Sam. 18:9). Nejon amo kuali tanemilil kiuikak maj kitemo kimiktis David. Tejuan maj amo tikchiuakan kemej Saúl. Maj amo timoteltekipachokan komo amo tikpiaj taixyekanalis, okachi kuali maj tikchiuakan kemej David. Maski kijyouij miak taman tein amo kuali, nochipa kipoujkaitak akin Dios kimakaka tanauatil (xikonixtajtolti 1 Samuel 26:23).

12. ¿Keniuj uelis titapaleuiskej maj tisenyetokan itech nechikol?

¹² Kemej tinochin tataman titanemiliaj, kemansa uelis tikpiaskej kuejmol iuan aksa itech nechikol, uan nejin no uelis kinpanos tayekananij. Biblia techmaka tataman tayolmajxitilis tein kinextia katiyejua tanemilil moneki tiknextiskej: “Ximomouiskapoutinemikan se uan okse”, uan “Amo ximopouakan ke semi nankiueyimatij” (Rom. 12:10, 16). Nejin kijtosneki ke amo tikteltemoskej maj mochiua tein tikijtouaj, ta moneki tikelnamikiskej ke moajsi miak taman keniuj mochiuas teisa. Okachi kuali maj tiktemokan tikajsikamatiskej tein kinemiliaj oksekin uan nejon tapaleuis maj tisenyetokan itech nechikol (Filip. 4:5).

13. ¿Toni moneki tikchiuaskej satepan ke tikijtojkej tein tiknemiliaj, uan toni neskayot tein moajsi itech Biblia kinextia toni moneki tikchiuaskej?

¹³ ¿Kijtosneki nejin ke amo kuali yetok komo tikijtouaj ke teisa moneki moyektalis itech nechikol? Amo. Itech yekinika siglo, keman mochiuak  se kuejmol kampa tataman tanemilil kipiayaj, tokniuan “kinijitakke Pablo uan Bernabé uan oksekin taneltokani para ma yakan kampa ne pueblo Jerusalén. Uan [...] ompa kisepanixejekojke iuan in tatitanilme de Cristo uan inuan [...] ueuentsitsin” (Hech. 15:2). Nochin nejin tokniuan xa kipiayaj tataman tanemilil kemej moyektaliskia kuejmol. Sejse tokniuj kijtoj tein kinemiliaya uan ika inepaleuil yektikatsin espíritu kiixpejpenkej toni kichiuaskej. Keman moijtoj nejin, nion se kisentokak ika tajtojtoya tein kinemiliaya. Keman itech nechikolmej kinixtajtoltilijkej amat tein kijtouaya toni moixpejpenka, nochin “moyolpaktijke porin nojon amat kinualkuilia[ya] se yolseuilis uan se yolmajxitilis” uan “kachi ok yek takuautamatke” (Hech. 15:31; 16:4, 5). Axkan no ijkon panoua, keman tikiniluiaj tayekananij se taman tein techyolkuejmoloua, moneki titakuaujtamatiskej ke yejuan kiitaskej ika nejmachkayot tein tikiniluijkej.

14. ¿Keniuj uelis tiknextiskej se kuali tanemilil itech touikalis iniuan oksekin?

¹⁴ Itech touikalis iniuan oksekin, uelis tiknextiskej ke tikpiaj se kuali tanemilil. Kemej neskayot, tisejsemej uelis tikchiuaskej maj onka yolseuilis, komo niman titetapojpoluiaj keman aksa techyolxokolia. ITajtol Dios techiluia: “Xiksentokakan ximoxikojtiyakan se iuan okse uan ijsiujka ximotapojpoluikan se iuan okse komo aksa kiyolxokolijkej. Kemej Jiova ijsiujka namechtapojpoluij namejuan, no ijkon xikchiuakan namejuan” (Col. 3:13, TNM). Keman moijtoua “komo aksa kiyolxokolijkej”, kinextia ke moajsis se taman tein kichiuas maj iuan tikualanikan aksa. Sayoj ke maj amo tikauakan maj techkuejmolo tsikitsitsin nepololmej tein kipiaj oksekin porin nejin uelis kijtakos yolseuilis itech nechikol. Okachi kuali maj tiktojtokakan ineskayo Jiova uan maj niman titetapojpoluikan, uan ijkon tiksentokaskej tiksentekitilijtoskej.

15. 1) ¿Toni techmachtia neskayot tein kikauak Job keman tetapojpoluij? 2) ¿Keniuj techpaleuia netataujtil maj tikpiakan se kuali tanemilil?

¹⁵ Neskayot tein kikauak Job techelnamiktia ke moneki titetapojpoluiskej. Keman eyi takamej tein kijtouayaj katkaj itasojikniuan amo kiyolseuijkej, ta kiiluijkej miak taman tein ika kiyolkokojkej, yejua “kitataujtij [Jiova] maj kinpaleuiani itasojikniuan” uan kintapojpoluij (Job 16:2; 42:10). Keman itech tonetataujtiluan titajtanij maj oksekin kiselikan nepaleuil, techpaleuis maj tikinyekitakan. Uan komo titajtanij maj nochin tokniuan kiselikan nepaleuil, uelis tikinitaskej kemej Jesús kinita (Juan 13:34, 35). Uan no, moneki titajtaniskej yektikatsin espíritu (Luc. 11:13). Ichikaualis Dios tein tekititok techpaleuis maj tiknextikan ikualneskayouan Cristo itech touikalis iniuan oksekin (xikonixtajtolti Gálatas 5:22, 23).

16, 17. ¿Katiyejua tanemilil tiknekij tiknextiskej?

¹⁶ Kemej tikitakejya, keman tisejsemej timochikauaj tiknextiskej se kuali tanemilil itech nechikol, tinochin tikseliaj nepaleuil. Nejin tamachtilis xa techpaleuia maj tikitakan ke moneki tikyektaliskej totanemilil. Komo nejon mitsonpanoua, xikonkaua maj iTajtol Dios mitsonnextili keniuj uelis tionmopatas (Heb. 4:12). Pablo, akin mochikauaya kitemakas se kuali neskayot itech nechikolmej, kijtoj: “Notalnamikilis amo teyi ika nechtenextia ke nitajtakole. Pero amo por nojon Dios nechpouas de ke nejua kuali nitayekankatekitike. [...] Sayo Totekotsin san Yejuatsin nechixkomakas ke kox melau kuali nitayekankatekitike” (1 Cor. 4:4).

¹⁷ Komo timochikauaj maj techyekana tamatilis tein Dios techmaka, uan amo tikteltemouaj maj mochiua tein tikijtouaj oso amo tiknemiliaj ke motelneki tikpiaskej tanauatil, titapaleuiskej maj onka se kuali tanemilil itech nechikol. Uan komo tikintapojpoluiaj tokniuan uan tikinyekitaj, tikpiaskej yolseuilis uan tisenyetoskej (Filip. 4:8). Komo ijkon tikchiuaj, Jiova uan Jesús tel yolpakiskej keman kiitaskej tanemilil tein tiknextiaj (Filem. 25).