1. Sano susulatan nen Pablo iray kapananisiaan to, antoy iilaloan to?

SANO susulatan nen apostol Pablo iray kapananisiaan to, mabetbet ton uuliten so ilalo ton abobonan komon na Dios tan Kristo so espiritun ipapanengneng da. Singa bilang, oniay insulat tod saray taga Galacia: “Niwala komon so agnaparaan a kaabigan na Katawan tayon Jesu-Kristo ed espiritun ipapatnag yo. Amen.” (Gal. 6:18) Antoy labay ya ibaga na saray balikas ya “espiritun ipapatnag yo”?

2, 3. (a) Sanen inusar nen Pablo so salitan “espiritu,” antoy tutukoyen to? (b) Anto ray nayarin tayon itepet ed sarili tayo nipaakar ed espiritun ipapatnag tayo?

² Say impangusar nen Pablo ed salitan “espiritu” ed sayan teksto et ontutukoy ed ugali odino paraan na panag-isip ya mamakiwas ed sikatayon ibaga odino gawaey sakey a bengatla. Nayarin say sakey a too et maong, makonsidera, mauyamo, maiter, odino mainomay toy mamerdona. Ibabaga na Biblia ya maabig no say sakey et walaay “mareen tan maulimek ya espiritu” tan “kalmado.” (1 Ped. 3:4; Uli. 17:27, NW) Balet wala met iray totoon mabalaw, materyalistiko, mabarong, odino walaay independentin ugali. Wala ni ra ingey imoral, agmatulok, odino rebelde.

³ Kanian nen inusar nen Pablo iray balikas ya ‘niwala komon so Katawan ed espiritun ipapatnag yo,’ papasesegen to iray agagin mangipatnag na espiritun mitunosan ed linawa na Dios tan mangipatnag na singa Kriston personalidad. (2 Tim. 4:22; basaen so Colosas 3:9-12.) Maabig no tepetan tayoy sarili tayo: ‘Anton klase na espirituy ipapatnag ko? Panon kon lalon nipatnag so espiritun mamaliket ed Dios? Wala ni kasi nagawaan ko pian napaaligwas so positibon espiritu na kongregasyon?’ Alimbawa, diad taneman na saray  sunflower, kada rosas et ontutulong pian ondakep so interon taneman. Kasin sakey tayod saray “rosas” a mangaarum ed karakpan na kongregasyon? Kaukolan tayon pansagpotan itan. Pantongtongan tayo natan no panon tayon nipatnag so espiritun mamaliket ed Dios.

4. Anto so “espiritu na mundo”?

⁴ Oniay ibabagad sikatayo na Kasulatan: “Inawat tayo so espiritu a nanlapud Dios, aliwan say espiritu na mundo.” (1 Cor. 2:12) Anto so “espiritu na mundo”? Satan lanlamang imay espiritun adeskribe ed Efeso 2:2: “Saratan a bengatla so gagawaen yo nensaman unong ed sistema na sayan mundo, unong ed say manuley na autoridad na dagem, say espiritu ya ipapatnag natan na saray agmatulok.” Sayan “dagem” et say espiritu na mundo, odino paraan na panagnonot na saray totoo ed mundo, tan wala itan ed amin a pasen a singa literal a dagem. Nipatnag itan ed saray ugalin ‘agmo ak didiktaan’ odino ‘ilaban moy kanepegan mo’ a maslak ed saray totoo natan. Papaneknekan da labat a sikaray “agmatulok.”

5. Anton ugali so impanengneng na arum ya Israelita?

⁵ Aliwa lan balo itan ya ugali. Nen panaon nen Moises, nanrebelde si Core ed saray walaan na autoridad diad Israel. Sikatoy nansalita sumpad si Aaron tan saray ilalak to, a manlilingkor bilang saserdote. Nayarin say sankanengneng to et saray lingo ra. Odino ninonot ton inikdan ira nen Moises na balibalin pribilehyo lapud kakanayon to ra. Antokaman so rason, mapatnag ya minoria nen Core iray bengatla unong ed panmoria na too tan agto nirespeto iray tinuro nen Jehova, diad impangibagan: “Alabas la so panbalegbalegan yo . . . Akin ta sirin et manuna ya ipangta yo so inkasikayo dia ed duypo nen Jehova?” (Num. 16:3) Ontan met, nanreklamo si Datan tan Abiram ed si Moises, ya ibabaga ran ‘pagmamaliwen toy sarili ton pangulo ra.’ Sanen impatawag ira nen Moises, oniay mapaatagey ya inyebat da: “Agkami onla!” (Num. 16:12-14, NW) Talagan ag-aliketan si Jehova ed espiritu da. Kanian, dineral to irayan rebelde.​—Num. 16:28-35.

6. Anton ugali so impanengneng na arum nen inmunan siglo, tan akin?

⁶ Nen inmunan siglo, wala met iray nansalitay mauges ed saray mangidadaulod kongregasyon ya “agda bibidbiren so pananguley.” (Jud. 8) Sarayan lalaki et agkontentod saray pribilehyo ra tan iimpluensyaan day arum a manrebelde ed saray aturon lalaki ya manggagaway inter na Dios a kimey da.​—Basaen so 3 Juan 9, 10.

7. Anton ugali so nepeg tayon paliisan?

⁷ Satan ya ugali et agnepeg ya niwalad kongregasyon. Kanian kaukolan tayoy manalwar. Saray elder ed kongregasyon et agperpekto, a singa ed panaon di Moises tan apostol Juan. Nayarin makagawa iray elder na saray lingon personal a mangapektad sikatayo. No nagawa itan, talagan agmakatunongan parad sakey a membro na kongregasyon so pangalig ed espiritu na mundo, ya ipilit so pakawalaay “hustisya” odino “ipilit a kaukolan ya ipetek so agi”! Papalampasen nen Jehova iray angkelag a lingo. Kasin sarag tayo met itan a gawaen? Lapud iisipen dan wala ray kakapuyan na saray elder, arum ed saray akagawa na seryoson kasalanan et agla onaasingger ed ulop na mamatatken pian patulongan. Niyaliling irad sakey a pasyentin agto la labay so manpatambal lapud walay agto agustoan ed samay doktor.

8. Anto ran tekstoy makatulong ed sikatayo pian napansiansiay dugan panmoria ed saray mangidadaulo ed kongregasyon?

 ⁸ Napaliisan tayo itan ya espiritu no nonoten tayon walad ‘kawanan a lima nen Jesus so pitoran bitewen.’ Irerepresenta na ‘bitewen’ iray alanaan a manangasikaso, tan onaplika met itan ed saray manangasikaso ed kongregasyon. Igigiya nen Jesus iray ‘bitewen’ unong ed paraan a labay to. (Apo. 1:16, 20) Kanian, bilang Ulo na Kristianon kongregasyon, si Jesus et walaan na sigpot a kontrol ed saray ulop na mamatatken. No walay sakey a membro na ulop na mamatatken a kaukolan ya simbawaen, seguroen na samay Sakey a “saray mata to et singa mandarlang ya apoy” a naresolbe itan ed panaon tan paraan a labay To. (Apo. 1:14) Kaleganan to, kaukolan tayon respetoen iray elder ya tinuro na masanton espiritu, lapud ta oniay insulat nen Pablo: “Matulok kayo komon ed saramay mangidadaulo diad limog yo tan mapasakop kayo komon, ta babantayan da iray kamarerwa yo tan walay eebatan da ed saya; ta pian nagawaan da iya tekep na liket tan aliwan ermen, lapud makaderal iya ed sikayo.”​—Heb. 13:17.

9. (a) Panon a nasubok so sakey a Kristiano no sikatoy nasimbawa odino nadisiplina? (b) Antoy sankaabigan ya gawaen no akaawat tayoy simbawa?

⁹ Nasubok met so Kristianon kondukta na sakey no sikatoy nasimbawa odino naekalan na pribilehyo. Sakey a brother so maaron sinimbawa na saray elder nipaakar ed panggagalaw to na saray bayulentin video game. Makapaermen ta agto inawat  so simbawa tan kaukolan ya ekalen bilang ministeryal a lingkor lapud agto la nipapatnag iray espiritual a kualipikasyon. (Sal. 11:5; 1 Tim. 3:8-10) Kayari na satan, inistorya na brother ya sikatoy ag-onabobon ed desisyon na saray elder, aminpiga ton insulat ed branch office so pangikritiko tod saray elder, tan iimpluensyaan toy arum ed kongregasyon ya ontan met so gawaen da. Say pangikatunongan ed aliwan ginawa tayo et maneral ed kareenan na kongregasyon. No nasimbawa tayo, mas maabig no mapaabeban awaten itan, tan ipasen a pankanawnawa itan pian namoria iray kakapuyan tayo.​—Basaen so Tagleey 3:28, 29.

10. (a) Ipaliwawa no antoy naaralan tayod Santiago 3:16-18 nipaakar ed duga tan mauges ya espiritu? (b) Anto ray maabig a resulta na pangipanengneng na “karunongan a manlalapud tagey”?

¹⁰ Natulongan itayo na Santiago 3:16-18 pian naamtaan no antoy duga tan mauges ya espiritun nipatnag na sakey ed kongregasyon. Oniay nabasa: “No iner so kawalaan na imon tan pankokolkol, diman so kawalaan na gulo tan amin a mauges a bengatla. Balet say karunongan a manlalapud tagey, unona ed amin et malinis, insan mareen, makatunongan, akaparaan ya ontulok, napno na panangasi tan maong a bungabunga, agmanangidumaduma, agmansimpisimpitan. Niarum ni, say bukel na bungay inkatunong et intanem diad mareen iran kipapasen parad saramay mikakareenan.” No onkiwas tayo unong ed “karunongan a manlalapud tagey,” napaseseg tayoy sakey tan sakey a mangipanengneng na dugan espiritu, tan niwalay kareenan ed kongregasyon.

11. (a) Antoy napaliisan tayo no pansiansiaen tayoy dugan espiritu? (b) Antoy naaralan tayod ehemplo nen David?

¹¹ Nepeg tayon tandaan ya tinuro nen Jehova iray elder ‘pian pastolan day kongregasyon na Dios.’ (Gawa 20:28; 1 Ped. 5:2) Kanian amta tayo a makabat so itulok ed uksoyan na Dios, elder itayo man odino andi. No pansiansiaen tayoy dugan espiritu, ontulong iyad sikatayon napaliisay alablabas a pampagad pakawalaay autoridad odino responsabilidad. Sanen alikna nen Arin Saul a sikatoy nayarin salatan nen David bilang ari, “inimatonan to si David nanlapud saman ya agew.” (1 Sam. 18:9) Abayuboan na ari so mauges ya espiritu tan labay to ni ingen ya pateyen si David. Imbes ya aligen si Saul ya alablabas a mapaga ed posisyon to, mas maabig no say aligen tayo et si David. Anggaman dakel ya ag-inkahustisya so naeksperiensya nen David, pinansiansia toy respeto tod saray tinuro na Dios a mangidaulo.​—Basaen so 1 Samuel 26:23.

12. Antoy makatulong pian napansiansiay pankakasakey ed kongregasyon?

¹² No maminsan, lapud nandurumay opinyon tayo, nayarin pansengegan itan na agpantatalosan anggan diad saray manangasikaso. Oniay simbawa na Biblia: “Idaulo yoy pangipanengneng na galang ed balang sakey” tan “Agkayo komon magmaliw a makabat ed saray mata yon dili.” (Roma 12:10, 16) Imbes ya ipilit a duga tayo, kaukolan tayon nonoten ya aliwan saksakey lambengat so solusyon ed problema. No ikonsidera tayoy panmoria na arum, makatulong itayod pankakasakey na kongregasyon.​—Fil. 4:5.

13. Antoy nepeg a panmoria tayod saray personal ya opinyon tayo, tan anton alimbawa ed Biblia so mangiyilustra ed saya?

¹³ Kabaliksan kasi na saya ya aliwan maabig so pangibagad saray naoobserbaan tayod kongregasyon a kaukolan ya ipetek? Andi. Nen inmunan siglo, walay linmesan agpantatalosan. “Nandesisyon iray agagi ya ibaki si Pablo tan Bernabe tan say arum  ed sikara diad saray apostol tan mamasiken ed Jerusalem pian pantongtongan iyan nansasangsangan da.” (Gawa 15:2) Seguradon nandurumay opinyon da pian solusyonan so isyu. Balet, sanen nibaga lan amin so opinyon da tan wala lay agawan desisyon, agda la impilit iray personal ya opinyon da. Sanen nipawit lay desisyon ed saray kongregasyon, “nanliketan day panamaseseg” tan ‘nantultuloy iran binmiskeg ed pananisia.’ (Gawa 15:31; 16:4, 5) Ontan met natan, no nibaga tayo lay problema ed saray elder, kaukolan ya ipalima tayo la itan ed sikara tan manmatalek ed desisyon da.

14. Panon tayon nipanengneng so maabig ya ugali diad pidedeneng tayod arum?

¹⁴ Dakel so pankanawnawa tayon nipatnag so maabig ya ugali diad pidedeneng tayod arum. Oniay ibabagad sikatayo na Salita na Dios: “Mantultuloy kayon manaanosan tan mabulos a manpeperdonaan no wala man so sengegan na panreklamo na sakey ed sananey. No panon a mabulos si Jehova ya amerdona ed sikayo, ontan met so gawaen yo.” (Col. 3:13) Idadanet na saray balikas ya “no wala man so sengegan na panreklamo” a nayarin walay makatunongan a rason no akin ya onsanok tayo. Balet, imbes a pampagaan iray kakapuyan da a maneral ed deen na kongregasyon, aligen tayoy Jehova tan mabulos iran perdonaen, insan mankimey a saniiba.

15. (a) Antoy naaralan tayod si Job nipaakar ed panamerdona? (b) Panon itayon natulongan na pikakasi pian nipanengneng so maabig ya ugali?

¹⁵ No nipaakar ed panamerdona, makaaral tayod si Job. Sikatoy agniligliwa na taloran kakaaro to. Anggaman ontan, pinerdona to ra. Panon? Sikatoy “nampikasi nipaakar ed saray kaaro to.” (Job 16:2; 42:10) No ipikasi tayoy arum, nayarin manguman so panmoria tayod sikara. Say pangipikasi ed saray agagi tayo et ontulong pian nabayuboan tayoy singa Kriston ugali. (Juan 13:34, 35) Kaukolan tayo met so onkerew na masanton espiritu diad pikakasi. (Luc. 11:13) Tulongan itayo na espiritu na Dios ya mangipatnag na saray Kristianon kualidad diad pidedeneng tayod arum.​—Basaen so Galacia 5:22, 23.

16, 17. No nipaakar ed ‘espiritun ipapatnag tayo,’ antoy determinado tayon gawaen?

¹⁶ No mansagpot so balang sakey pian ipatnag so maabig ya ugali, nagunggonaan so kongregasyon. Nayarin apakiwas tayo na sayan artikulo a paaligwasey ugali tayo tan magmaliw a mas makapaseseg. Sirin, abuloyan tayoy Salita na Dios a mangibangat ed sikatayo no panon itayon makapanguman. (Heb. 4:12) Oniay imbaga nen Pablo a malabay a magmaliw ya ehemplo ed kongregasyon: “Anggapoy nanonotan kon ginawak a makapuy. Ingen diad saya et agak napapaneknekan a matunong, balet say manguusisa ed siak et si Jehova.”​—1 Cor. 4:4.

¹⁷ Legan tayon mansasagpot ya onkiwas unong ed karunongan a manlalapud Dios, ya agtayo alablabas a pampapagaay sarili tan pribilehyo tayo, makatulong itayo pian napansiansiay dugan espiritu ed kongregasyon. Diad pagmaliw tayon manamerdona tan pakawalaay positibon panmoria ed arum, napansiansia tayoy kareenan ed saray agagi tayo. (Fil. 4:8) Legan tayon gagawaen iraya, makaseguro tayon napaliket tayoy Jehova tan si Jesus ed ‘espiritun ipapatnag tayo.’​—Filem. 25.