“E bondat inmeresí di nos Señor Hesukristu sea ku boso pa e spiritu ku boso ta manifestá.”—FLM. 25.

1. Ki deseo Pablo a ekspresá den su kartanan na e kristiannan di promé siglo?

DEN e kartanan ku apòstel Pablo a skirbi e kristiannan di promé siglo, bes tras bes el a ekspresá e deseo pa e kongregashonnan manifestá un spiritu ku ta agradá Dios i Kristu. Por ehèmpel, el a bisa e galationan: “Rumannan, e bondat inmeresí di nos Señor Hesukristu sea ku boso pa e spiritu ku boso ta manifestá. Amèn.” (Gal. 6:18) Kiko Pablo tabata ke men ku e ekspreshon “e spiritu ku boso ta manifestá”?

2, 3. (a) Den algun kaso, kiko Pablo a referí na dje ora el a usa e palabra “spiritu”? (b) Ki preguntanan nos por hasi nos mes enkuanto e spiritu ku nos ta manifestá?

² E palabra “spiritu” den e teksto akí ta referí na hende su aktitut, òf manera di pensa. Esaki ta loke ta motivá nos pa bisa òf hasi kosnan na un sierto manera. Por ehèmpel, un hende por tin un karakter suave, e por ta un persona bondadoso, humilde, generoso òf ku ta kla pa pordoná. Beibel ta elogiá hende ku tin ‘un spiritu suave, trankil i kalmu.’ (1 Ped. 3:4; Pro. 17:27) Apesar di esei, tin hende ku ta sarkástiko, materialista, kla pa sinti nan ofendí òf ku kisas no ta gusta pa otro hende bisa nan kiko pa hasi. Pió ainda, tin hende inmoral, desobediente òf asta rebelde.

³ Pues, ora Pablo a skirbi, por ehèmpel, “Señor sea ku boso pa e spiritu ku boso ta manifestá,” e tabata animá su rumannan den fe pa imitá Kristu, esta, pa nan tin un aktitut ku ta agradá Dios. (2 Tim. 4:22; lesa Kolosensenan 3:9-12.) P’esei, ta bon pa nos puntra nos mes awe: ‘Ki klase di spiritu mi ta manifestá? Kon mi por manifestá un spiritu ku ta agradá Dios òf mehorá den esaki? Kon mi por enkurashá otronan den kongregashon pa nan tambe manifestá un aktitut  positivo?’ Imaginá bo un plantashon grandi di zòneblum. Kada flor ta kontribuí na e bunitesa di e plantashon, no ta bèrdat? Bo ta manera un di e flornan ei? Bo ta kontribuí na e bunitesa di bo kongregashon? Sin duda, nos tur tin ku hasi esfuerso pa ta asina. P’esei, laga nos wak kiko nos kada un tin ku hasi pa nos por manifestá un aktitut ku ta agradá Dios.

NO LAGA E SPIRITU DI MUNDU INFLUENSIÁ BO

4. Kiko “e spiritu di mundu” ta?

⁴ E Skritura ta bisa: “Nos a aseptá e spiritu ku ta bini di Dios—no e spiritu di mundu.” (1 Kor. 2:12) Kiko “e spiritu di mundu” ta? E ta e mesun spiritu ku Efesionan 2:2 ta papia di dje. E teksto ei ta bisa: “Boso un tempu tabata kana segun e sistema di e mundu akí, segun e gobernante di e outoridat di airu, e spiritu ku awor ta obra den e yunan di desobedensia.” E “airu” ku e teksto akí ta papia di dje ta e spiritu di mundu, esta, e aktitut di hende den e mundu malbado di Satanas. I e spiritu akí ta tur kaminda, meskos ku aire literal. Por ehèmpel, hopi hende awe tin e aktitut akí: ‘Niun hende no tin nada di bisa mi!’ Òf esun akí: ‘Bringa pa bo derechonan!’ Hende asina ta “yunan di desobedensia” di e mundu di Satanas.

5. Ki mal aktitut algun hende den Israel tabatin?

⁵ E aktitut akí no ta algu nobo. Den tempu di Moises, por ehèmpel, Koré a lanta kontra e personanan ku tabatin outoridat den e pueblo di Israel. E tabata spesialmente kontra Aron i su yunan, kendenan tabatin e privilegio di sirbi komo saserdote. Kisas e tabata enfoká riba nan imperfekshonnan. Òf podisé el a pensa ku Moises tabata praktiká nepotismo, esta, ku e tabata privilegiá miembronan di su famia. Sea kual sea e kaso, ta bisto ku Koré a kuminsá mira kosnan desde e punto di bista humano i a rebeldiá kontra esnan ku Yehova a nombra. E no tabatin rèspèt pa e hòmbernan akí; el a bisa nan: “Awor sí boso a bai muchu leu . . . Pakiko anto boso ta halsa boso mes riba e asamblea?” (Num. 16:3) Datan i Abiram tambe tabata kritiká Moises. Nan a bisa Moises ku e ‘ke manda riba nan.’ I ora Moises a manda yama nan, na un manera arogante nan a kontestá: “Nos no ta bin!” (Num. 16:12-14) Yehova no a gusta nan aktitut rebelde niun tiki, pasobra el a mata nan tur.—Num. 16:28-35.

6. Kon algun ruman den promé siglo a manifestá un mal aktitut, i kiko por tabata e motibu pa tal aktitut?

⁶ Algun ruman den promé siglo tambe tabata kritiká personanan ku tabatin responsabilidat den kongregashon. Sí, nan tabata “despresiá esnan ku tin outoridat.” (Hudas 8) Probablemente, e hòmbernan akí no tabata kontentu ku nan privilegionan i a purba di influensiá otronan pa lanta kontra e hòmbernan nombrá, kendenan tabata hasi nan bèst pa sirbi e kongregashon.—Lesa 3 Huan 9, 10.

7. Ki aktitut nos mester evitá?

⁷ Ta klaru ku den e kongregashon kristian no tin lugá pa un aktitut asina. P’esei, nos mester tene kuidou pa nos no kuminsá desaroyá mal aktitut. Meskos ku tabata e kaso den tempu di Moises i den tempu di apòstel Huan, ansianonan den kongregashon awe no ta perfekto. Nan tambe por kometé fayo ku por afektá nos personalmente. Si un ansiano faya kontra nos, nos no mester adoptá e spiritu di mundu i eksigí pa e kongregashon tuma medida kontra dje. Nos mester kòrda ku Yehova por skohe pa pasa por haltu di sierto fayonan chikitu. Nos no por hasi meskos? Algun ruman ku ta kometé piká serio ta nenga di presentá dilanti di un komité di ansiano, ku a ser formá pa yuda nan, djis  pasobra nan tin algu kontra e rumannan akí. Nan ta manera un pashènt ku ta nenga di aseptá un tratamentu ku por yud’é djis pasobra e tin algu kontra e dòkter.

8. Kua tekstonan por yuda nos sigui respetá esnan ku ta dirigí e kongregashon kristian?

⁸ Pa nos por evitá un aktitut asina, nos tin ku kòrda ku Beibel ta bisa ku Hesus tin ‘shete strea den su man drechi.’ E streanan akí primeramente ta representá e ansianonan ungí, pero nos por bisa ku tur otro ansiano den kongregashon tambe ta den man di Hesus. I Hesus por hasi loke e ke ku e “streanan” den su man. (Rev. 1:16, 20) Anto siendo ku e ta Kabes di e kongregashon kristian, e sa presis kiko ta sosodé den e kuerponan di ansiano. Pues, si un ansiano den e kuerpo mester di korekshon, Hesukristu, esun ku tin ‘wowo manera vlam di kandela’ lo sòru pa esaki sosodé na su debido tempu i na su manera. (Rev. 1:14) Mientrastantu, nos tin ku sigui mustra rèspèt na esnan ku Dios a nombra mediante spiritu santu. Pablo a skirbi: “Obedesé esnan ku ta dirigí boso i sea sumiso, pasobra nan ta vigilá boso alma i tin ku duna kuenta i rason pa esaki; pa nan por hasié ku goso i no ku suspiro, pasobra esei lo ta perhudisial pa boso.”—Heb. 13:17.

9. (a) Kon un kristian por reakshoná ora e haña korekshon òf disiplina? (b) Kon ta e mihó manera pa reakshoná ora nos haña korekshon?

⁹ Un otro situashon den kua un ruman por demostrá ki aktitut e tin ta ora ansianonan korigié òf e pèrdè sierto privilegio den kongregashon. Laga nos tuma por ehèmpel un ruman hòmber ku a haña konseho bondadoso di ansianonan pasobra e  tabatin e kustumber di hunga wega di vidio violento. Lamentablemente, e no a hasi kaso di nan konseho. I komo ku e no tabata kumpli mas ku e rekisitonan bíbliko pa sirbi komo sirbidó ministerial, el a pèrdè su privilegio. (Sal. 11:5; 1 Tim. 3:8-10) El a kana bisa vários ruman ku e no ta di akuerdo ku e desishon ku e ansianonan a tuma. El a asta skirbi vários karta pa sukursal, kritikando e ansianonan i a influensiá otronan den kongregashon pa hasi meskos. Pero realidat ta ku si nos ta kana hustifiká nos mal echonan, nos por perturbá e pas ku tin den kongregashon, i esaki no ta benefisiá niun hende. P’esei, ta muchu mas mihó pa ora nos haña disiplina, nos rekonosé nos debilidatnan i aseptá e korekshon akí sin rebeldiá.—Lesa Lamentashonnan 3:28, 29.

10. (a) Segun Santiago 3:16-18, ki aktitut nos mester tin i ki aktitut nos mester evitá? (b) Kiko ta e resultado ora nos ta komportá nos di akuerdo ku “e sabiduria djariba”?

¹⁰ Santiago 3:16-18 ta mustra bon kla ki aktitut un persona mester tin den kongregashon i ki aktitut e mester evitá. Einan, Beibel ta bisa: “Pasobra kaminda tin yalursheit i e spiritu di pleitu, ei lo tin tambe desòrdu i tur sorto di kos baho. Ma e sabiduria djariba ta na promé lugá puru, despues pasífiko, rasonabel, kla pa obedesé, yen di miserikòrdia i bon fruta, imparsial i sin hipokresia. Ademas, hende ku ta hasi pas lo sembra kaminda tin pas i lo kosechá e fruta di hustisia.” Si nos ta komportá nos di akuerdo ku “e sabiduria djariba,” nos lo desplegá kualidatnan ku ta agradá Dios i esaki lo kontribuí na e bon spiritu den kongregashon.

MUSTRA RÈSPÈT DEN KONGREGASHON

11. (a) Kiko nos por evitá si nos tin un aktitut korekto? (b) Kiko nos ta siña for di e ehèmpel di David?

¹¹ Nos mester kòrda ku ta Yehova ta nombra ansianonan pa “pastoriá e kongregashon di Dios.” (Echo. 20:28; 1 Ped. 5:2) Pues, sea ku nos ta ansiano òf nò, nos mester respetá Dios su manera di hasi kosnan. Si nos tin e aktitut korekto, nos lo tin un punto di bista balansá enkuanto outoridat òf responsabilidat den kongregashon. Ora Rei Saul di Israel a sinti ku e tabata kore peliger di pèrdè su puesto komo rei, el a kuminsá “wak David ku deskonfiansa.” (1 Sam. 18:9) Saul tabatin un mal aktitut; e tabata asta buska manera pa mata David. Sin duda, nos no mester ta manera Saul, kende tabata demasiado interesá den posishon; mas bien, nos mester imitá David. Apesar di a sufri hopi inhustisia, semper el a keda mustra e debido rèspèt na esnan ku Dios a pone den puesto di outoridat.—Lesa 1 Samuel 26:23.

12. Kiko nos por hasi pa yuda mantené union den kongregashon?

¹² Diferensia di opinion, asta entre superintendentenan, tambe por kousa problema den kongregashon. Pero Beibel ta yuda nos mira ki aktitut nos mester tin; e ta bisa: “Pa loke ta mustra onor na otro, tuma e inisiativa” i “no bira sabí den boso mes bista.” (Rom. 12:10, 16) En bes di para riba nos punto di bista, nos mester rekonosé ku tin mas ku un manera pa atendé un asuntu. Ora nos ta hasi esfuerso pa komprondé e punto di bista di otronan, nos por yuda mantené union den kongregashon.—Flp. 4:5.

13. Kiko nos mester hasi despues ku nos duna nos opinion, i ki ehèmpel bíbliko ta mustra esaki?

¹³ Akaso esaki ta nifiká ku ta malu pa duna bo opinion di algu den kongregashon ku, segun bo, mester di atenshon? Nò. Den promé siglo, por ehèmpel, a lanta un kuestion ku a trese desakuerdo entre e rumannan. P’esei, nan “a apuntá Pablo, Bárnabas i algun otro ruman pa bai serka e apòstelnan i e ansianonan na Herúsalèm pa papia  tokante e punto di diskushon.” (Echo. 15:2) Sin duda, kada un di e rumannan ei lo mester tabatin nan mes punto di bista tokante e asuntu i nan mes manera pa resolv’é. Pero, despues ku nan kada un a duna nan opinion i konhuntamente a yega na un desishon ku yudansa di spiritu santu, nan no a sigui insistí riba nan opinion. Ora e kongregashonnan a risibí e karta ku a informá nan di e desishon, nan “a keda masha kontentu ku e palabranan di animashon” i “a sigui bira firme den fe.” (Echo. 15:31; 16:4, 5) Awe nos mester hasi meskos: Unabes nos pone e rumannan responsabel na haltura di un asuntu, nos mester konfia ku nan lo pensa riba e asuntu i tuma medida si ta nesesario.

TRATA OTRO BON

14. Kon nos por desplegá un bon aktitut den nos trato ku otro hende?

¹⁴ Den nos trato ku otro hende, nos ta haña hopi oportunidat pa desplegá un bon aktitut. Por ehèmpel, ora un hende ofendé nos, ta bon pa nos pordoná. E Palabra di Dios ta bisa: “Sigui soportá otro i pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos.” (Kol. 3:13) E ekspreshon “si un di boso tin motibu pa keha un otro” ta indiká ku tin biaha nos tin bon motibu pa sinti nos iritá pa loke otronan ta hasi. Pero nos no mester laga kosnan chikitu molestiá nos ni perturbá e pas den kongregashon. Mas bien, nos mester hasi esfuerso pa imitá Yehova i pordoná otro libremente i sigui sirbié huntu ku nos rumannan.

15. (a) Kiko nos por siña for di Yòb enkuanto pordoná otro? (b) Kon orashon por yuda nos desplegá un aktitut korekto?

¹⁵ Yòb a pone un bon ehèmpel den pordoná otro hende. Ta asina ku tres supuesto konsoladó a ofend’é en bes di konsol’é. No opstante, Yòb a pordoná nan. Kiko a yud’é hasi esei? Beibel ta bisa ku “el a hasi orashon pa su amigunan.” (Yòb 16:2; 42:10) Ora nos ta hasi orashon pa otro hende, esei por yuda nos kambia nos punto di bista di nan. Ora nos ta hasi orashon pa tur nos rumannan den fe ta bira mas fásil pa nos mira nan manera Kristu ta mira nan. (Huan 13:34, 35) Ademas, nos mester resa pidi Yehova su spiritu santu. (Luk. 11:13) E spiritu di Dios lo yuda nos desplegá kualidatnan kristian den nos trato ku otro hende.—Lesa Galationan 5:22, 23.

KONTRIBUÍ NA E BON SPIRITU DEN KONGREGASHON

16, 17. Ki aktitut bo ta determiná pa manifestá?

¹⁶ Ora kada un di nos ta hasi nos bèst pa manifestá un bon aktitut, henter e kongregashon ta benefisiá. Kisas e artíkulo akí a yuda bo mira ku bo tin ku hasi sierto kambionan na bo aktitut pa bo por ta un persona mas edifikante. Si ta asina, e Palabra di Dios lo yuda bo mira unda bo tin ku hasi kambio. (Heb. 4:12) Pablo, kende tabata ke ta un bon ehèmpel pa su rumannan den fe, a bisa: “Mi konsenshi ta limpi den tur sentido. Pero esei no ta un prueba ku mi ta hustu; esun ku ta husga mi ta Yehova.”—1 Kor. 4:4.

¹⁷ Pues, segun ku nos ta hasi esfuerso pa biba di akuerdo ku sabiduria djariba i ta desplegá un punto di bista balansá di nos mes i nos privilegionan, nos ta kontribuí na e spiritu positivo di nos kongregashon. Ademas, nos mester ta kla pa pordoná otro i pensa bon di otro. E aktitut akí lo yuda nos tin un bon relashon ku nos rumannan den fe. (Flp. 4:8) Es mas, si nos ta hasi e kosnan akí, nos por tin sigur ku ‘e spiritu ku nos ta manifestá’ ta agradá tantu Yehova komo Hesus.—Flm. 25.

[Preguntanan di Estudio]

[Plachi na página 20]

Kon meditashon riba e papel di Hesus por yuda nos ora nos risibí konseho di ansianonan?