1. Ki deseo Pablo a expresa den su cartanan na e cristiannan di prome siglo?

DEN e cartanan cu apostel Pablo a skirbi e cristiannan di prome siglo, bes tras bes el a expresa e deseo pa e congregacionnan manifesta un spirito cu ta agrada Dios y Cristo. Por ehempel, el a bisa e Galationan: “Rumannan, e bondad inmereci di nos Señor Hesucristo sea cu boso pa e spirito cu boso ta manifesta. Amen.” (Gal. 6:18) Kico Pablo tabata kiermen cu e expresion “e spirito cu boso ta manifesta”?

2, 3. (a) Den algun caso, kico Pablo a referi na dje ora el a uza e palabra “spirito”? (b) Ki preguntanan nos por haci nos mes encuanto e spirito cu nos ta manifesta?

² E palabra “spirito” den e texto aki ta referi na hende su actitud, of manera di pensa. Esaki ta loke ta motiva nos pa bisa of haci cosnan na un cierto manera. Por ehempel, un hende por tin un caracter suave, e por ta un persona bondadoso, humilde, generoso of cu ta cla pa pordona. Bijbel ta elogia hende cu tin ‘un spirito suave, trankil y calmo.’ (1 Ped. 3:4; Prov. 17:27) Di otro banda, tin hende cu ta sarcastico, materialista, cla pa sinti nan ofendi of cu kisas no ta gusta pa otro hende bisa nan kico pa haci. Pio ainda, tin hende inmoral, desobediente of hasta rebelde.

³ Pues, ora Pablo a skirbi, por ehempel, “Señor sea cu boso pa e spirito cu boso ta manifesta”, e tabata anima su rumannan den fe pa imita Cristo, esta, pa nan tin un actitud cu ta agrada Dios. (2 Tim. 4:22; lesa Colosensenan 3:9-12.) Pesey, ta bon pa nos puntra nos mes awe: ‘Ki clase di spirito mi ta manifesta? Con mi por manifesta un spirito cu ta agrada Dios of mehora den esaki? Con mi por encurasha otronan den congregacion pa nan tambe manifesta un actitud  positivo?’ Imagina bo un plantacion grandi di zonnebloem. Cada flor ta contribui na e bunitesa di e plantacion, no ta berdad? Bo ta manera un di e flornan ey? Bo ta contribui na e bunitesa di bo congregacion? Sin duda, nos tur tin cu haci esfuerso pa ta asina. Pesey, laga nos wak kico cada un di nos tin cu haci pa nos por manifesta un actitud cu ta agrada Dios.

4. Kico “e spirito di mundo” ta?

⁴ E Scritura ta bisa: “Nos a acepta e spirito cu ta bin di Dios​—no e spirito di mundo.” (1 Cor. 2:12) Kico “e spirito di mundo” ta? E ta e mesun spirito cu Efesionan 2:2 ta papia di dje. E texto ey ta bisa: “Boso un tempo tabata cana segun e sistema di e mundo aki, segun e gobernante di e autoridad di aire, e spirito cu awor ta obra den e yiunan di desobediencia.” E “aire” cu e texto aki ta papia di dje ta e spirito di mundo, esta, e actitud di hende den e mundo malbado di Satanas. E spirito aki ta tur caminda, mescos cu aire literal. Por ehempel, hopi hende awe tin e actitud aki: ‘Niun hende no tin nada di bisa mi!’ Of esun aki: ‘Bringa pa bo derechonan!’ Hende asina ta “yiunan di desobediencia” di e mundo di Satanas.

5. Ki mal actitud algun hende den Israel tabatin?

⁵ E actitud aki no ta nada nobo. Den tempo di Moises, por ehempel, Core a lanta contra e personanan cu tabatin autoridad den e pueblo di Israel. E tabata specialmente contra Aaron y su yiunan, kendenan tabatin e privilegio di sirbi como sacerdote. Kisas e tabata enfoca riba nan imperfeccionnan. Of podise el a pensa cu Moises tabata practica nepotismo, esta, cu e tabata privilegia miembronan di su famia. Sea loke sea e caso, ta bisto cu Core a cuminsa mira cos desde e punto di bista humano y a rebela contra esnan cu Jehova a nombra. E no tabatin respet pa e hombernan aki; el a bisa nan: “Awor si boso a bay mucho leu . . . Pakico anto boso ta halsa boso mes riba e asamblea?” (Num. 16:3) Datan y Abiram tambe tabata critica Moises. Nan a bisa Moises cu e ‘kier manda riba nan.’ Y ora Moises a manda yama nan, na un manera arogante nan a contesta: “Nos no ta bin!” (Num. 16:12-14) Jehova no a gusta nan actitud rebelde niun tiki, pasobra el a mata nan tur.​—Num. 16:28-35.

6. Con algun ruman den prome siglo a manifesta un mal actitud, y kico por tabata e motibo pa tal actitud?

⁶ Algun ruman den prome siglo tambe tabata critica personanan cu tabatin responsabilidad den congregacion. Si, nan tabata “desprecia esnan cu tin autoridad.” (Judas 8) Probablemente, e hombernan aki no tabata contento cu nan privilegionan y a purba di influencia otronan pa lanta contra e hombernan nombra, kendenan tabata haci nan best pa sirbi e congregacion.​—Lesa 3 Juan 9, 10.

7. Ki actitud nos mester evita?

⁷ Ta claro cu den e congregacion cristian no tin luga pa un actitud asina. Pesey, nos mester tene cuidou pa nos no cuminsa desaroya e mal actitud ey. Mescos cu tabata e caso den tempo di Moises y den tempo di apostel Juan, ancianonan den congregacion awe no ta perfecto. Nan tambe por comete fayo cu por afecta nos personalmente. Si esey sosode, nos no mester adopta e spirito di mundo y exigi pa e congregacion tuma medida contra dje. Nos mester corda cu Jehova por scoge pa pasa por halto di cierto fayonan chikito. Nos no por haci mescos? Algun ruman cu ta comete pica serio ta nenga di presenta dilanti di un comite di anciano, cu a ser forma pa yuda nan, djis pasobra  nan tin algo contra e rumannan aki. Nan ta manera un pashent cu ta nenga di acepta un tratamento cu por yud’e djis pasobra e tin algo contra e dokter.

8. Cua textonan por yuda nos sigui mustra respet na esnan cu ta dirigi e congregacion cristian?

⁸ Pa nos por evita un actitud asina, nos tin cu corda cu Bijbel ta bisa cu Hesus tin ‘shete strea den su man drechi.’ E streanan aki primeramente ta representa e ancianonan ungi, pero nos por bisa cu tur otro anciano den congregacion tambe ta den man di Hesus. Y Hesus por haci loke e kier cu e “streanan” den su man. (Rev. 1:16, 20) Anto siendo cu e ta Cabes di e congregacion cristian, e sa precies kico ta sosode den e cuerponan di anciano. Pues, si un anciano den e cuerpo mester di coreccion, Hesucristo, esun cu tin ‘wowo manera vlam di candela’ lo percura pa esaki sosode na su debido tempo y na su manera. (Rev. 1:14) Mientrastanto, nos tin cu sigui mustra respet na esnan cu Dios a nombra mediante spirito santo. Pablo a skirbi: “Obedece esnan cu ta dirigi boso y sea sumiso, pasobra nan ta vigila boso alma y tin cu duna cuenta . . . pa esaki; pa nan por hacie cu goso y no cu suspiro, pasobra esey lo ta perhudicial pa boso.”​—Heb. 13:17.

9. (a) Con un cristian por reacciona ora e haya coreccion of disciplina? (b) Con ta e mihor manera pa reacciona ora nos haya coreccion?

⁹ Un otro situacion den cua un ruman por demostra ki actitud e tin ta ora ancianonan corigie of e perde cierto privilegio den congregacion. Laga nos tuma por ehempel un ruman homber cu a haya conseho bondadoso di e ancianonan pasobra  e tabatin e custumber di hunga video game violento. Lamentablemente, e no a haci caso di nan conseho. Y como cu e no tabata cumpli mas cu e rekisitonan biblico pa sirbi como sirbidor ministerial, el a perde su privilegio. (Sal. 11:5; 1 Tim. 3:8-10) El a cana bisa varios ruman cu e no ta di acuerdo cu e decision cu e ancianonan a tuma. El a hasta skirbi varios carta pa sucursal, criticando e ancianonan y a influencia otronan den congregacion pa haci mescos. Pero e realidad ta cu si nos ta cana hustifica nos mal echonan, nos por perturba e paz cu tin den congregacion, y esaki no ta beneficia ningun hende. Pesey, ta mucho mas mihor pa ora nos haya disciplina, nos reconoce nos debilidadnan y acepta e coreccion aki sin rebela.​—Lesa Lamentacionnan 3:28, 29.

10. (a) Segun Santiago 3:16-18, ki actitud nos mester tin y ki actitud nos mester evita? (b) Kico ta e resultado ora nos ta comporta nos mes di acuerdo cu “e sabiduria di ariba”?

¹⁰ Santiago 3:16-18 ta mustra bon cla ki actitud un persona mester tin den congregacion y ki actitud e mester evita. Eynan, Bijbel ta bisa: “Pasobra caminda tin jaloersheid y e spirito di pleito, ey lo tin tambe desorden y tur sorto di cos baho. Ma e sabiduria di ariba ta na prome luga puro, despues pacifico, rasonabel, cla pa obedece, yen di misericordia y bon fruta, imparcial y sin hipocresia. Ademas, hende cu ta haci paz lo sembra caminda tin paz y lo cosecha e fruta di husticia.” Si nos ta comporta nos mes di acuerdo cu “e sabiduria di ariba”, nos lo desplega cualidadnan cu ta agrada Dios y esaki lo contribui na un bon spirito den congregacion.

11. (a) Kico nos por evita si nos tin un actitud corecto? (b) Kico nos ta siña for di e ehempel di David?

¹¹ Nos mester corda cu ta Jehova ta nombra anciano pa “pastorea e congregacion di Dios.” (Echo. 20:28; 1 Ped. 5:2) Pues, sea cu nos ta anciano of no, nos mester respeta Dios su manera di haci cos. Si nos tin e actitud corecto, nos lo evita di cay den e trampa di duna demasiado importancia na puesto di autoridad den congregacion. Ora Rey Saul di Israel a sinti cu e tabata core peliger di perde su puesto como rey, el a cuminsa “wak David cu desconfianza.” (1 Sam. 18:9) Saul tabatin un mal actitud; e tabata hasta busca manera pa mata David. Sin duda, nos no mester ta manera Saul, kende tabata demasiado interesa den posicion; mas bien, nos mester imita David. A pesar di a sufri hopi inhusticia, semper el a keda mustra e debido respet na esnan cu Dios a pone den puesto di autoridad.​—Lesa 1 Samuel 26:23.

12. Kico nos por haci pa yuda mantene union den congregacion?

¹² Diferencia di opinion, hasta entre superintendentenan, tambe por causa problema den congregacion. Pero Bijbel ta yuda nos mira ki actitud nos mester tin; e ta bisa: “Pa loke ta mustra honor na otro, tuma e iniciativa” y “no bira sabi den boso mes bista.” (Rom. 12:10, 16) En bes di para riba nos punto di bista, nos mester reconoce cu tin mas cu un manera pa atende un asunto. Ora nos ta haci esfuerso pa compronde e punto di bista di otronan, nos por yuda mantene union den congregacion.​—Flp. 4:5.

13. Kico nos mester haci despues cu nos duna nos opinion, y ki ehempel biblico ta mustra esaki?

¹³ Acaso esaki ta nifica cu ta malo pa duna bo opinion tocante algo den congregacion cu, segun bo, mester di atencion? No. Den prome siglo, por ehempel, a lanta un cuestion cu a trece desacuerdo entre e rumannan. Pesey, nan “a apunta Pablo, Barnabas y algun otro ruman pa bay cerca  e apostelnan y e ancianonan na Jerusalem pa papia tocante e punto di discusion.” (Echo. 15:2) Sin duda, cada un di e rumannan ey lo mester tabatin nan mes punto di bista tocante e asunto y nan mes manera pa resolv’e. Pero, despues cu cada un di nan a duna nan opinion y conhuntamente a yega na un decision cu yudansa di spirito santo, nan no a sigui insisti riba nan opinion. Ora e congregacionnan a ricibi e carta cu a informa nan di e decision, nan “a keda masha contento cu e palabranan di animacion” y “a sigui bira firme den fe.” (Echo. 15:31; 16:4, 5) Awe nos mester haci mescos: Unabes nos pone e rumannan responsabel na haltura di un asunto, nos mester confia cu nan lo pensa riba e asunto y tuma medida si ta necesario.

14. Con nos por desplega un bon actitud den nos trato cu otro hende?

¹⁴ Den nos trato cu otro hende, nos ta haya hopi oportunidad pa desplega un bon actitud. Por ehempel, ora un hende ofende nos, ta bon pa nos pordona. E Palabra di Dios ta bisa: “Sigui soporta otro y pordona otro libremente, hasta si un di boso tin motibo pa keha un otro. Mescos cu Jehova a pordona boso libremente, boso tambe mester haci mescos.” (Col. 3:13) E expresion “si un di boso tin motibo pa keha un otro” ta indica cu tin biaha nos tin bon motibo pa sinti nos irita pa loke otronan ta haci. Pero nos no mester laga cosnan chikito molestia nos ni perturba e paz den congregacion. Mas bien, nos mester haci esfuerso pa imita Jehova y pordona otro libremente y sigui sirbie hunto cu nos rumannan.

15. (a) Kico nos por siña for di Job encuanto pordona otro? (b) Con oracion por yuda nos desplega un actitud corecto?

¹⁵ Job a pone un bon ehempel den pordona otro hende. Dado momento tres supuesto consolador a ofend’e en bes di consol’e. No obstante, Job a pordona nan. Kico a yud’e haci esey? Bijbel ta bisa cu “el a haci oracion pa su amigonan.” (Job 16:2; 42:10) Ora nos ta haci oracion pa otro hende, esey por yuda nos cambia nos punto di bista di nan. Ora nos ta haci oracion pa tur nos rumannan den fe, ta bira mas facil pa nos mira nan manera Cristo ta mira nan. (Juan 13:34, 35) Ademas, nos mester resa pidi Jehova pa su spirito santo. (Luc. 11:13) E spirito di Dios lo yuda nos desplega cualidadnan cristian den nos trato cu otro hende.​—Lesa Galationan 5:22, 23.

16, 17. Ki actitud bo ta determina pa manifesta?

¹⁶ Ora cada un di nos ta haci nos best pa manifesta un bon actitud, henter e congregacion ta beneficia. Kisas e articulo aki a yuda bo mira cu bo tin cu haci cierto cambionan na bo actitud pa bo por ta un persona mas edificante. Si ta asina, e Palabra di Dios lo yuda bo mira unda bo tin cu haci cambio. (Heb. 4:12) Pablo, kende tabata kier ta un bon ehempel pa su rumannan den fe, a bisa: “Mi consenshi ta limpi den tur sentido. Pero esey no ta un prueba cu mi ta husto; esun cu ta husga mi ta Jehova.”​—1 Cor. 4:4.

¹⁷ Pues, segun cu nos ta haci esfuerso pa biba di acuerdo cu sabiduria di ariba y ta desplega un punto di bista balansa di nos mes y nos privilegionan, nos ta contribui na e spirito positivo di nos congregacion. Ademas, nos mester ta cla pa pordona otro y pensa bon di otro. E actitud aki lo yuda nos tin un bon relacion cu nos rumannan den fe. (Flp. 4:8) Si nos ta haci e cosnan aki, nos por tin sigur cu ‘e spirito cu nos ta manifesta’ ta agrada tanto Jehova como Hesus.​—Flm. 25.