1. San Paulus taki furu leisi na ini den brifi di a skrifi gi den gemeente?

NA INI den brifi di na apostel Paulus skrifi gi den Kresten gemeente, a taki furu leisi dati a ben howpu taki Gado nanga Krestes ben o agri nanga a fasi fa den ben e denki. Fu eksempre, a skrifi gi den Galasiasma: „Brada, meki wi Masra Yesus Krestes sori unu bun-ati, fu di unu abi a yoisti fasi fu denki. Amen” (Gal. 6:18). San a ben wani taki nanga den wortu: „Unu abi a yoisti fasi fu denki”?

2, 3. (a) Sortu krakti a fasi fa wan sma e denki kan abi na en tapu? (b) Te wi e luku a fasi fa wi e tyari wisrefi, dan sortu sani wi kan aksi wisrefi?

² A fasi fa wi e denki kan abi krakti tapu a fasi fa wi de. Dati meki son sma abi switifasi, den e broko den ede nanga trawan, den abi safri-ati, den lobi fu gi sma sani, noso den lobi fu gi trawan pardon. Bijbel e taki dati a bun fu de wan sma di abi „wan tiri èn safri fasi” èn di „no e bruya esi” (1 Petr. 3:4; Odo 17:27). Ma son leisi a denki fu wan sma kan meki taki a abi fasi di no bun. Fu eksempre, kande a lobi spotu tra sma, kande a lobi moni, kande en ati e bron esi, noso kande a no lobi te sma e taigi en san fu du. A denki fu wan sma kan meki a du moro ogri sani tu soleki hurudu. A kan trangayesi noso drai baka gi Gado srefi.

³ Sobun, di Paulus ben taki sani soleki „meki Masra de nanga yu, fu di yu abi a yoisti fasi fu denki”, dan a ben gi den brada nanga sisa fu en deki-ati fu abi den fasi fu Krestes èn fu denki na wan fasi di Gado feni bun. (2 Tim. 4:22; leisi Kolosesma 3:9-12.) Dati meki a bun fu aksi yusrefi: ’Te mi e luku a fasi fa mi e tyari misrefi, dan sortu denki mi abi? Fa mi kan sori moro krin taki mi e denki na wan fasi di Gado feni bun? Fa mi kan gi trawan na ini a gemeente deki-ati fu denki na wan fasi di Gado feni bun?’ Na ini wan bigi dyari di furu nanga bromki, ibriwan  fu den bromki e meki taki a dyari moi. Wi de leki wan fu den bromki dati? Wi e yepi fu meki a heri gemeente kon moi? A no de fu taki dati ibriwan fu wi musu meki muiti fu du dati. Meki wi luku san wi kan du fu sori taki wi e denki na wan fasi di Gado feni bun.

4. San na „a yeye fu grontapu”?

⁴ Bijbel e taigi wi: „Wi no kisi a yeye fu grontapu, ma wi kisi a yeye di komoto fu Gado” (1 Kor. 2:12). San na „a yeye fu grontapu”? Dati na a srefi yeye di kari na Efeisesma 2:2. Drape skrifi: „Fosi, unu ben e du den sani disi, fu di unu ben e libi leki den sma fu a grontapu disi. Unu ben e gi yesi na a tiriman fu a yeye fu grontapu. A yeye disi na a denki fu grontapu di de leki loktu na wi lontu èn di de na ini den sma di e trangayesi Gado.” A „loktu” disi noso a „yeye fu grontapu”, na a fasi fa den sma fu a grontapu disi e denki. Neleki loktu, a denki disi de na ala sei. Fu eksempre, furu sma na ini a ten disi e denki na a fasi disi: ’Nowan sma musu kon taigi mi san fu du!’, noso ’Yu musu feti gi yu reti!’ Den sma disi na fu a grontapu fu Satan èn dati meki den „e trangayesi Gado”.

5. Sortu fowtu denki son Israelsma ben abi?

⁵ Langa ten kaba sma ben e denki na a fasi disi. Na ini a ten fu Moses, Korak opo ensrefi teige den wan di ben e teki fesi na ini Israel. A ben abi en spesrutu nanga Aron èn nanga den manpikin fu en, fu di den ben abi a grani fu dini leki priester. Kande Korak ben si taki den ben e meki fowtu son leisi. Noso kande a ben feni taki Moses ben meki den tron priester fu di den ben de famiri fu en. Awinsi san Korak ben e denki, a de krin taki a no ben e denki moro soleki fa Yehovah e denki. Korak no ben abi lespeki gi den man di Yehovah ben poti fu tiri a pipel. A taki: „A sani fu unu musu kaba now! . . . Fu san ede un musu prei basi gi a pipel?” (Num. 16:3) Sosrefi Datan nanga Abiram ben e krutukrutu nanga Moses èn den taigi en taki a ben wani ’prei basi gi den’. Di Moses aksi den fu kon miti en, den taki: „Wi no o kon kwetikweti!” (Num. 16:12-14) A no de fu taki dati Yehovah no ben lobi a fasi fa den man disi ben e denki. Dati meki a kiri den.​—Num. 16:28-35.

6. Fa son man na ini a fosi yarihondro sori taki a denki fu den no bun? Fu san ede den ben abi a denki dati kande?

⁶ Son man na ini a fosi yarihondro ’no ben abi lespeki gi den wan di ben e tiri’ a gemeente èn den ben e krutukrutu nanga den (Yud. 8). Soleki fa a sori, dan den man disi ben feni taki den ben musu kisi moro frantwortu na ini a gemeente. Den pruberi fu kori trawan, so taki den trawan no ben o abi lespeki moro gi den brada di Gado ben poti fu teki fesi èn di ben e wroko tranga gi a gemeente.​—Leisi 3 Yohanes 9, 10.

7. Gi sortu denki wi musu luku bun?

⁷ A no de fu taki dati nowan sma na ini a gemeente musu abi a denki disi. Dati meki wi musu luku bun taki wi no kisi denki di no bun. Neleki fa a ben de na ini a ten fu Moses èn na ini a ten fu na apostel Yohanes, na so den owruman na ini a ten disi e meki fowtu son leisi fu di den na sondu libisma. Kande den owruman e du wan sani di e hati wi srefi. Efu dati pasa, wi no musu teki a denki fu grontapusma di e meki dyugudyugu taki den musu kisi san den abi reti na tapu. Sobun, wi no musu de nomonomo taki den tra brada musu du wan sani nanga na owruman, soso fu di wi feni taki sani no pasa nanga reti. Wi musu hori na prakseri taki son leisi Yehovah e bosroiti fu no luku den pikinpikin fowtu di den owruman e meki. A ben o bun fu du a srefi tu, a no so? Son sma di du seryusu sondu no lobi son maniri fu den owruman di kisi a wroko fu yepi den. Dati meki nofo tron den no wani sidon taki nanga den owruman dati. Den sma disi de leki sikisma di no wani teki a dresi di kan meki den kon betre, soso fu  di den feni taki den no lobi son maniri fu a datra.

8. Sortu tekst kan yepi wi fu abi a yoisti denki fu den wan di e teki fesi na ini a gemeente?

⁸ Efu wi wani sorgu taki wi no kisi a denki disi, wi musu hori na prakseri taki Bijbel e taki dati Yesus e hori ’seibi stari na ini en reti-anu’. Den „stari” na den salfu owruman. Ma den sani di Bijbel e taki fu den abi fu du tu nanga ala owruman na ini den gemeente. Yesus kan du san a wani nanga den „stari” di de na ini en anu (Openb. 1:16, 20). Leki Edeman fu a gemeente, Yesus sabi soifri san den owruman e du. En ’ai de leki faya’ èn a man si ala sani. Sobun, efu wan owruman du wan sani di no bun, Yesus o sorgu taki a kisi yepi na a reti ten èn na a reti fasi (Openb. 1:14). Dati meki wi musu wakti èn wi musu tan sori lespeki gi den owruman di de na ini Yesus „reti-anu”. Paulus skrifi: „Gi yesi na den wan di e teki fesi na un mindri èn saka unsrefi na den ondro, bika na den e luku unu leki sma di o abi fu gi Gado frantwortu fu san den e du. Dan den o sorgu unu nanga prisiri èn no nanga geme, bika disi no ben o bun gi unu.”​—Hebr. 13:17.

9. (a) Sortu denki wan Kresten kan abi efu a e kisi rai noso piri-ai? (b) San na a moro bun sani fu du te wi e kisi rai noso piri-ai?

⁹ Te den owruman e gi wan sma piri-ai noso te den e puru wan frantwortu na wan sma anu, dan a kan kon na krin efu a sma abi wan bun denki noso wan denki di no bun. Wan leisi den owruman gi wan yongu brada rai na wan switi fasi. Den taigi en taki a no musu prei den video game di abi ogridu. A de wan sari sani taki a yongu brada no teki a rai èn te fu kaba den puru en leki dinari  ini a diniwroko fu di a no ben e tyari ensrefi soleki fa Bijbel taki (Ps. 11:5; 1 Tim. 3:8-10). Baka dati, a yongu brada go taigi tra sma taki a no e agri nanga a bosroiti fu den owruman. A skrifi furu brifi go na a bijkantoro srefi fu fruteri ala sortu ogri fu den owruman. Boiti dati, a pruberi fu meki tra sma na ini a gemeente skrifi wan lo ogri fu den owruman tu. Ma te yu luku en bun, dan a no e tyari nowan wini kon te wi e suku ala sortu fasi fu sori taki wi no fowtu aladi wi du wan sani di no bun. Wi e pori a freide di de na ini a gemeente èn wi no e yepi nowan sma. Te wi kisi rai noso piri-ai, dan a moro bun fu luku san wi kan leri fu dati. Den brada gi wi a rai fu yepi wi fu si san na den swakifasi fu wi. Sobun, a moro bun fu teki a rai èn fu no taki noti.​—Leisi Sari singi 3:28, 29.

10. (a) Sortu denki wi musu abi èn sortuwan wi no musu abi, soleki fa Yakobus 3:16-18 e taki? (b) San o de a bakapisi te wi e du sani nanga a koni di Gado e gi?

¹⁰ Yakobus 3:16-18 na wan heri moi tekst di e sori sortu denki wan sma musu abi na ini a gemeente èn sortu denki a no musu abi. A tekst e taki: „Pe dyarusu de èn pe sma lobi fu meki trobi, na drape bruya nanga ibri sortu ogri de. Ma na a fosi presi, a koni fu hemel de soifri, a lobi freide, a no e hori nomo na san a e prakseri, a de klariklari fu gi yesi, a de klariklari fu sori sari-ati èn fu du bun. A no lobi a wan sma moro a trawan èn a no e hoigri. Boiti dati, den wan di e libi bun nanga trawan, e sai na ini bun ten èn a froktu di den e koti na retidu.” Te wi abi „a koni fu hemel” noso a koni di Gado e gi, dan dati o yepi wi fu sori taki wi abi den fasi fu en. Te wi abi den fasi disi, dan wi o gi makandra deki-ati fu abi wan bun denki. Na so freide o de na ini a gemeente.

11. (a) San wi no o du efu wi abi a yoisti fasi fu denki? (b) San wi kan leri fu David?

¹¹ Wi musu hori na prakseri ala ten taki Yehovah poti den owruman „leki skapuman fu teki fesi na ini a gemeente fu Gado” (Tori 20:28; 1 Petr. 5:2). Sobun, wi musu frustan taki a de wan koni sani fu du sani soleki fa Gado wani, awinsi wi na owruman noso awinsi wi no de owruman. Efu wi abi a yoisti denki, dan frantwortu noso posisi no o de a moro prenspari sani gi wi. Di Kownu Saul bigin denki taki David ben o tron kownu na presi fu en, a „no ben e frutrow David moro” (1 Sam. 18:9). Saul no ben abi wan bun denki èn a ben wani kiri David srefi. Na presi fu de leki Saul di ben lobi a hei posisi fu en, a moro bun fu de leki David. Ala sortu ogri miti en aladi a no ben frudini dati. Ma toku a sori lespeki ala ten gi den wan di Gado poti fu tiri.​—Leisi 1 Samuel 26:23.

12. San o de wan yepi fu meki freide tan na ini a gemeente?

¹² Fu di wi alamala abi difrenti fasi fu si sani, meki ten na ten wi o du noso taki sani di trawan no lobi. Disi kan pasa srefi nanga den owruman. Ma Bijbel e gi wan tu rai di kan yepi wi. A e taki: „De a fosiwan fu sori trawan lespeki.” A e taki tu: „No prakseri fu unsrefi taki unu koni” (Rom. 12:10, 16). Na presi fu denki taki wi wawan abi a yoisti fasi fu si sani, a moro bun fu hori na prakseri taki nofo tron moro leki wán fasi de fu si wan sani. Efu wi e du muiti fu frustan fa wan tra sma e denki, dan disi o de wan yepi fu meki freide tan na ini a gemeente.​—Fil. 4:5.

13. San wi musu du efu wi feni taki wan sani no bun na ini a gemeente?

¹³ Ma disi wani taki dati a fowtu fu taki wan sani te wi feni taki wan sani no bun na ini a gemeente? Nôno. Na ini a fosi yarihondro furu gemeente no ben agri nanga wan sani. Fu dati ede den brada „meki Paulus, Barnabas, nanga wan tu trawan go na den apostel nanga den owru man na ini Yerusalem fu taki fu a tori disi” (Tori 15:2). A no de fu taki dati ibriwan fu den brada dati ben abi den eigi denki fu a tori disi èn kande den  ben abi den eigi fasi fa den ben o lusu a tori disi. Ma baka di ibriwan fu den taki san a ben e denki, èn baka di den meki a santa yeye tiri den fu teki wan bosroiti, nowan fu den brada ben feni taki a denki fu en moro bun. Baka dati den skrifi a bosroiti na ini brifi di den seni gi den gemeente. Den gemeente ben ’prisiri fu di den kisi deki-ati’ èn disi „tranga a bribi” fu den (Tori 15:31; 16:4, 5). Na so sani musu de na ini a ten disi. Te wi fruteri wan owruman fu wan sani di wi no feni bun, dan wi musu abi a frutrow taki den o denki seryusu fu dati èn den o bosroiti efu a de wan sani di musu kenki noso wan sani di no musu kenki.

14. Fa wi kan sori taki wi abi a yoisti denki na ini a fasi fa wi e libi nanga trawan?

¹⁴ Wi e kisi furu okasi fu sori taki wi abi a yoisti denki te wi e luku a fasi fa wi e libi nanga trawan. Fu eksempre, ibriwan fu wi kan du furu bun efu wi de klariklari fu gi trawan pardon te den du wi wan hati sani. Gado Wortu e taigi wi: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu” (Kol. 3:13). Den wortu „te wan sma feni taki wan trawan du wan hati sani nanga en” e sori taki son leisi wi abi leti fu atibron nanga wan trawan. Ma wi ati no musu bron nanga wan trawan, soso fu di a abi son maniri di wi no lobi. Disi kan pori a freide na ini a gemeente. A moro bun fu de klariklari fu gi trawan pardon neleki fa Yehovah e gi sma pardon. Na so wi o man tan dini Gado na ini wánfasi.

15. (a) Te wi e luku a tori fu Yob, dan san wi kan leri fu a fasi fa wi musu gi pardon? (b) Fa begi kan yepi wi fu abi a yoisti denki?

¹⁵ Te wi e luku a tori fu Yob, dan wi kan leri wan moi sani fu a fasi fa wi musu gi pardon. Den dri man di ben musu trowstu en taigi en furu hati sani. Ma toku Yob gi den pardon. San yepi en fu du disi? A „begi gi den mati fu en” (Yob 16:2; 42:10). Te wi e begi gi trawan, a kan taki wi o denki tra fasi fu den bakaten. Te wi e begi gi ala wi brada nanga sisa, dan a o moro makriki fu si den leki fa Yesus e si den (Yoh. 13:34, 35). Boiti dati, wi musu begi Gado fu gi wi santa yeye (Luk. 11:13). Gado en yeye o yepi wi fu abi den fasi di wan Kresten musu abi èn na so wi o libi bun nanga trawan.​—Leisi Galasiasma 5:22, 23.

16, 17. Sortu fasi fu denki yu wani abi?

¹⁶ Te ibriwan fu wi e du muiti fu abi a yoisti denki, dan a heri gemeente o kisi wini fu dati. Kande na artikel disi yepi yu fu du moro muiti fu tyari yusrefi na wan moro bun fasi èn fu gi trawan moro deki-ati. Efu yu wani du disi trutru, dan meki Gado Wortu sori yu sortu kenki yu musu tyari kon (Hebr. 4:12). Paulus di ben wani de wan bun eksempre gi den gemeente, taki: „Mi abi wan krin konsensi na ini ala sani. Toku dati no wani taki dati mi na wan reti-ati sma. Ma a sma di e ondrosuku mi na Yehovah.”​—1 Kor. 4:4.

¹⁷ Ibriwan fu wi kan gi makandra deki-ati na ini a gemeente te wi e du muiti fu abi a yoisti denki. Wi kan du disi te wi e du muiti fu abi den fasi fu Gado, te wi no feni taki wi wawan abi a yoisti denki fu sani, èn te wi no de nomonomo taki wi musu kisi moro frantwortu na ini a gemeente. Te wi de klariklari fu gi trawan pardon èn te wi e denki bun fu den, dan wi o tan libi bun nanga den brada nanga sisa fu wi (Fil. 4:8). Te wi e du den sani disi, dan wi kan de seiker taki Yehovah nanga Yesus o breiti nanga wi fu di wi „abi a yoisti fasi fu denki”.​—Fileim. 25.