¿Tukuya espíritu limasiyaya wix?
¿Tukuya espíritu limasiyaya wix?
«Tapaxkit nema ni kinkamininiyan xla kiMalanakan Jesucristo kakatatawilan xlakata espíritu nema wixin limasiyayatit.» (FILEM. 25, NM)
¿KATSIYA XTAKGALHTIN?
¿Tuku xlakata talakaskin kuenta natlawayaw tukuya tayat limasiyayaw?
¿Tukuya tayat ni nalimasiyayaw, chu la natlawayaw?
¿La tlan nalimasiyayaw akgtum tlan espíritu kcongregación?
1. ¿Tuku lichuwinalh Pablo kxcartas?
KXCARTAS, apóstol Pablo makglhuwa lichuwinalh pi Dios chu Cristo tlan akxilhkgolh espíritu nema xkgalhikgo congregaciones. Akgtum liʼakxilhtit, uma tuku katsokgnanilh natalan xalak Gálacia: «Tapaxkit nema ni kinkamininiyan xla kiMalanakan Jesucristo kakatatawilan xlakata espíritu nema wixin limasiyayatit. Chuna kalalh» (Gál. 6:18, NM). ¿Tukuya «espíritu» xlichuwinama?
2, 3. 1) ¿Tuku xlichuwinama apóstol Pablo akxni limaklakaskilh tachuwin espíritu? 2) ¿Tukuya takgalhskinin tlan natlawayaw?
2 Kʼuma texto tachuwin «espíritu» limasiya la likatsiyaw o la lakapastakaw, nema wi tuku kinkamatlawiyan o tuku nawanaw. Akgtum liʼakxilhtit, chatum tlan xapaxuwana nawan, tlan nalikatsi, xapaxkina, lhuwa tuku masta o xalakgalhamana. Biblia tlan lichuwinan xlakata tiku masiya akgtum espíritu «kakswa chu ni lakapala sitsi» chu tiku «kaks wi xʼespíritu» (1 Ped. 3:4, NM; Prov. 17:27). Nachuna wilakgo tiku kalikgalhkgamanan amakgapitsin, tiku lhuwa tuku kgalhiputun, tiku lakapala sitsikgo, akstu kapaxkikan o, tuku tlakg nitlan, tiku tlawakgo talakgxtumit xalimaxana, ni kgalhakgaxmatnankgo o lakluku.
3 Wa xlakata, akxni Pablo wa «kiMalanakan Jesucristo kakatatawilan xlakata espíritu nema wixin limasiyayatit», xkawanima xnatalan pi xlikatsikgolh la Dios chu xkgalhikgolh tayat la kstalaninanin Cristo (2 Tim. 4:22; kalikgalhtawakga Colosenses 3:9-12). La uku chatunu chatunu kilitlawatkan takgalhskinin la uma: «¿La klikatsi? ¿Tuku tlan lakgpali xlakata tlakg nakmakgapaxuwa Dios? ¿Tlan kmakgtayanan xlakata naʼanan akgtum tlan espíritu kcongregación?». Kʼakgtum tiyat niku wi lhuwa xanat, akgatunu xanat tlawa pi lilakgatit natasiya. ¿Litaxtuya akgtum «xanat» nema tlawa pi lilakgatit natasiya congregación? Kimputumkan kiliskujatkan xlakata chuna nawan. Wa xlakata, kaʼakxilhwi la tlan nakgalhiyaw akgtum espíritu nema namakgapaxuwa Dios.
KALAKGMAKGANTI XʼESPÍRITU KAKILHTAMAKU
4. ¿Tuku «ntalakapastakna ntu xala katuxawat»?
4 Biblia wan: «Nkin makgamakglhtinanitaw, ni wa ntalakapastakna ntu xala katuxawat, wampi wa spiritu ntu miniyacha Dios» (1 Cor. 2:12). ¿Tuku ama «ntalakapastakna [o espíritu] ntu xala katuxawat»? Watiya tuku talichuwinan kʼEfesios 2:2, niku wan «umincha nkilhtamaku, xtlawayatit xlapatit wa lantla ntalismanin ntu anan nkatuxawat, xtachuna lantla xlimapakgsin xapuxku xala kaʼunin, wa cha yama spiritu wantu asta chu skujma kxnakujkan lakgachixkuwimakgananin» o tiku ni kgalhakgaxmatnankgoy. Uma «kaʼunin» limasiya la lakapastakkgo kakilhtamaku, uma espíritu xtachuna la un kaniwa niku wi. La uku lhuwa tiku chuna wankgo «Akit niti kiwani tuku kilitlawat» o «Kaliskujti xlakata tuku lakgchanan». Tiku chuna lakpuwankgo wa tiku «lakgachixkuwimakgananin» xalak xkakilhtamaku Satanás.
5. ¿Tuku nitlan tlawakgolh makgapitsi israelitas?
5 Uma talakapastakni ni aku tsukuma. Kxkilhtamaku Moisés, Coré ni kgalhakgaxmatli tiku xpulalinkgo congregación xalak Israel. Lakatayalh tuku xwankgo Aarón chu xkamanan, tiku skujkgo la sacerdotes. Max akxilhli tuku nitlan xkgalhikgo o lakpuwa pi Moisés xkamaxkinit tuku xlakgayakgo kaj xlakata xfamilia xwankgonit. Tuku liwana katsiyaw wa pi tsukulh lakpuwan la amakgapitsi latamanin chu nitlan kalichuwinalh lakchixkuwin tiku Jehová xkalaksaknit. Ni maxanalh chu wa: «Nialh wix kalakgchanan nakilapulalipinatit [...]. ¿Tuku xlakata tlakg lanka nakamakgkatsikanatit nixawa congregación Jehová?» (Núm. 16:3). Nachuna Datán chu Abiram wanikgolh Moisés: «Litaxtuputuna la chatum príncipe nema nakinkamapakgsiyan». Chu akxni katachuwinalh, xlakan kgalhtinankgolh: «¡Ni naʼanaw!» (Núm. 16:12-14). Liwana tasiya pi Jehová ni lakgatilh la kgalhtinankgolh, xlakata kamakgnilh putum tiku ni kgalhakgaxmatkgolh (Núm. 16:28-35).
6. ¿Tuku nitlan tayat masiyakgolh makgapitsi kstalaninanin Cristo kxapulana siglo, chu tuku xlakata chuna tlawakgolh?
6 Kxapulana siglo na tawilakgolh tiku ni tlan xlichuwinankgo amakgapitsin chu ni kgalhakgaxmatkgolh tiku xpulalinkgo congregación (Jud. 8). Max ni xlipaxuwakgo taskujut nema xkalakgayawakanit. Chu max xtlawaputunkgo pi amakgapitsi kstalaninanin Cristo, na ni xkgalhakgaxmatkgolh lakchixkuwin tiku Dios xkalaksaknit napulalinkgo xkachikin, maski uma lakchixkuwin lhuwa skujkgo xlakata xtlawakgolh xtaskujutkan chuna la Dios xkawaninit (kalikgalhtawakga 3 Juan 9, 10).
7. ¿Tukuya tayat kuenta natlawayaw ni naʼanan kcongregación?
7 Uma tayat ni xlilat naʼanan kcongregación. Wa xlakata talakaskin skgalalh natawilayaw. Lakgkgolotsin xala uku na kgalhikgo talakgalhin, xtachuna lakgkgolotsin xalak xkilhtamaku Moisés o xkilhtamaku apóstol Juan. Max natlawakgo tuku akinin nitlan nalimakgkatsiyaw. Komo chuna nala, nikxni nalikatsiyaw la kakilhtamaku, chu ni naskinaw katatlawalh «tuku lakpuwanaw pi tlan» o «kakamalakgaxokgeka». Komo Jehová ni kamalakgaxokge tuku nitlan tlawakgo, ¿tlan nachuna natlawayaw? Makgapitsi kstalaninanin Cristo tiku tlawakgonit akgtum talakgalhin ni ankgonit akxni katlawanikan comité xlakata nakamakgtayakan. ¿Tuku xlakata? Xlakata kaj akxilhkgo tuku max nitlan tlawakgonit lakgkgolotsin xla uma comité. Pero xtachuna la tiku ni waputun likuchun kaj xlakata nitlan talalin makuchina.
8. ¿Tukuya textos xalak Biblia kinkamakgtayakgoyan nakalimasiyaniyaw kakni lakgkgolotsin xalak congregación?
8 Xlakata ni nalakpuwanaw la kakilhtamaku, kalakapastakwi pi Biblia kinkawaniyan pi «kxpakgstakat» Jesús kgalhi «akgtujun staku». Uma kilhchanikgo lakgkgolotsin tiku kalaksakkanit naʼankgo kʼakgapun chu na kilhchani putum lakgkgolotsin tiku wilakgo kcongregaciones. Xla tlan nakapulalin uma «staku» chuna la tlan naʼakxilha (Apoc. 1:16, 20). Xlakata xAkgxakga congregación xla kstalaninanin Cristo, pulalin putum lakgkgolotsin xalak congregaciones. Biblia masiya pi «xlakgastapu, xtachuna lhkuyat» uma wamputun pi akxilha putum tuku lama, wa xlakata, komo talakaskin nastakyawakan chatum kgolotsin, xla nalakkaxwili akxni xla nalakaskin natlawakan (Apoc. 1:14). Akinin chuntiyaku kamaxkiyaw kakni tiku kalilaksakkanit espíritu santo, xlakata Pablo tsokgli: «Nalakgachixkuwiyatit mimpuxkukan kxtaskujut Dios, na namaxkiyatit kakni, xampi wa makgskgala milistaknakan, ni natsankgay, xampi namastakgo nkuintaj mimpalakatakan. Kamakgtayakgotit, lakimpi paxuwat nalitlawakgo xtaskujutkan, na ni nalipuwankgoy, xampi ni chuna nkamininiyan» (Heb. 13:17).
9. 1) ¿Tuku tlan naliʼakxilhkan chatum kstalanina Cristo akxni stakyawakan? 2) ¿La kiliʼakxilhatkan tastakyaw?
9 Xtayat chatum kstalanina Cristo na taliʼakxilha akxni stakyawakan o makglhtikan tuku xlakgayawakanit kcongregación. Kʼakgtum congregación lakgkgolotsin tachuwinankgolh chatum tala kgawasa xlakata xlismaninit likgamanan videojuegos niku xlamakgnikan. Pero uma tala ni kgalhakgaxmatli tastakyaw nema maxkika wa xlakata nialh siervo ministerial litaxtulh xlakata nialh xmakgatsi tuku skin Biblia (Sal. 11:5; 1 Tim. 3:8-10). Alistalh tsukulh lichuwinan xlakatin amakgapitsin pi nitlan tuku xtlawanikanit, malakgachalh ksucursal maklhuwa cartas niku xwan pi nitlan tuku xtlawanikanit chu na kawanilh amakgapitsi natalan kcongregación pi nachuna xtlawakgolh. ¿Tlan katuwa nawiliyaw congregación kaj xlakata nalimasiyaputunaw pi ni xlikana tuku tlawaw? Tlakg tlan nawan naliʼakxilhaw tastakyaw la tuku nakinkamakgtayayan naliʼakxilhaw tuku nitlan tlawanitaw chu namakgamakglhtinanaw tuku nakinkawanikanan chu nitu nawanaw (kalikgalhtawakga Lamentaciones 3:28, 29).
10. 1) ¿Tuku kinkamasiyaniyan Santiago 3:16-18 xlakata tuku tlan tayat chu tuku ni? 2) ¿La kinkamakgtayayan nalimasiyayaw «ntastakat xala talhman»?
10 Santiago 3:16-18 kinkamakgtayayan naʼakxilhaw tuku tlan tayat nakgalhiyaw kcongregación chu tuku nitlan: «Xampi anta ntani anan ntaskgawit, chu ntakgslokgon, pus na anta anan ntakglhuwatna, chu ni lakwan tatlaw. Wampi wa ntastakat [o liskgalala] xala talhman, luwa xakgstitum chu na xakakswa, chu xasmalhwa, paxuwanaliyana, na litsama ntalakgalhaman, chu lakwan tatlaw, ni stokgopitsinan, na ni lakgaputiyuna. Wa xatawakat ntu mastay xaʼakgstitum latamat, wa lichankgoy xatalhtsi tapaxuwan wa nti nkgalhikgoy ntapaxuwan». Komo limasiyayaw «ntastakat xala talhman», kintayatkan la kstalaninanin Cristo natlawa pi tlan nakatalalinaw kinatalankan kcongregación.
KAMASTA KAKNI KCONGREGACIÓN
11. 1) ¿Tuku taʼakglhuwit ni nakgalhiyaw komo kgalhiyaw tlan talakapastakni? 2) ¿Tuku kinkamasiyaniyan xliʼakxilhtit David?
11 Talakaskin nalakapastakaw pi Jehová kalaksaknit lakgkgolotsin xlakata «napuxkunanikgo[...] xtamakgstokgnin [o xcongregación]» (Hech. 20:28; 1 Ped. 5:2). Wa xlakata tlakg tlan nakamaxkiyaw kakni tuku Dios lakkaxwilinit, maski wi tuku lakgayaw kcongregación o ni. Komo tlan talakapastakni kgalhiyaw ni xlakaskinka naʼakxilhaw komo wi tuku lakgayaw congregación o ni. Akxni mapakgsina Saúl lakpuwa pi David xmakglhtiputun xlimapakgsin tsukulh «lakpuwan pi wi tuku nitlan xlakkaxwilima» (1 Sam. 18:9). Xlakata, ni tlan xtayat xkgalhi asta xmakgniputun. ¿Tuku tlan wanaw kimpalakata? Ni nalikatsiyaw la Saúl chu lu naskujaw xlakata wi tuku nakgalhiputunaw, tlakg tlan nawan nalakpuwanaw la David. Maski lhuwa tuku nitlan akgspulalh, putum kilhtamaku kuenta tlawalh tuku Dios xlakkaxwilinit (kalikgalhtawakga 1 Samuel 26:23).
12. ¿La tlan makgtayananaw xlakata congregación akxtum natawila?
12 Akxni tanu tanu tuku lakpuwankan tlawa pi kaʼanalh taʼakglhuwit kcongregación, chu nachuna lakgkgolotsin latakgalhikgo taʼakglhuwit. Xlakata uma kinkamakgtayakgoyan uma tastakyaw xalak Biblia: «Chu xlakata nalamaxkiyatit kakni, wixin pulana katlawatit», chu «Ni kalakpuwantit pi tlan likatsiyatit» (Rom. 12:10, 16). Ni nawanaw pi kaj akinin katsiyaw la tatlawa, tlakg tlan nalakpuwanaw pi pulaklhuwa la tlan natlawakan. Komo kuenta tlawayaw tuku wankgo amakgapitsin, namakgtayananaw tlan natawila congregación (Filip. 4:5).
13. ¿La kiliʼakxilhatkan tuku wanaw, chu tuku liʼakxilhtit xalak Biblia chuna limasiya?
13 ¿Wamputun uma pi nila wanaw pi wi tuku talakaskin natalakgpali kcongregación? Nichuna. Kxapulana siglo, akxni tawilalh akgtum taʼakglhuwit natalan akxilhkgolh pi «tiwankgolh natalanin mpi naʼankgoy mPablo, chu Bernabé kJerusalén, chu amakgapitsin natalanin, mpi nalakgankgoy [apóstoles], chu mpuxkunanin lakkgolun nalixakgatlikgoy xpalakata yuma» (Hech. 15:2). Max xputumkan tanu tanu tuku xwankgo xlakata taʼakglhuwit chu la tlan xtalakkaxtlawalh. Chatunu chatunu wa tuku xlakpuwan, chu laksakka tuku xʼama tatlawa chuna la espíritu kapulalilh. Kʼama kilhtamaku, nialh tiku wa pi xtatlawalh chuna la xlakaskinkgo. Chu akxni carta nema xwan tuku xʼama tatlawa chilh kcongregaciones, putum «likgalhtawakgaka ncarta, luwa makgtsiyajkgolh» chu chuntiya «xtakgatanksakgoy kxtakanajlakan nkgamputunu nkanajlanin, na chali chali xtaliwakatilhama» (Hech. 15:31; 16:4, 5). La uku nachuna la: akxni wi tuku kawaniyaw natalan tiku pulalinkgo xkachikin Dios, lipawanaw pi xlakan liwana naʼakxilhkgo tuku natatlawa.
KALIMASIYANI XATLAN TAYAT TIKU TALALIPINA
14. ¿La tlan nalimasiyayaw xatlan tayat kkilatamatkan?
14 Kilatamatkan na tlan nalimasiyayaw xatlan tayat. Akgtum liʼakxilhtit, akxni wi tiku nitlan kinkalichuwinanan, tlan natlawayaw pi ni kaʼanalh taʼakglhuwit akxni akgatekgsaw, o makgachakgxiya, tuku xlakata chuna tlawalh. Xtachuwin Dios kinkawaniyan: «Kalapaxuwanalipinitit, chu na nalamatsankgananiyatit, [o nalatapatiyatit] nchatunu amakgapitsin lapi wi nti lamakgasitsiyatit; xtachuna lantla nkamatsankgananin [...] [Jehová], na chuna wixin nkatlawatit» (Col. 3:13). Tachuwin «nti lamakgasitsiyatit» limasiya pi max wi tuku natlawa pi nakasitsiniyaw amakgapitsin. Pero ni kaj kaʼakxilhwi tuku nitlan tlawakgo chu uma natlawa kaʼanalh taʼakglhuwit kcongregación, nachuna katlawaw la Jehová chu katapatiw, xlakata chuna chuntiya akxtum naskujniyaw.
15. 1) ¿Tuku kinkamasiyaniyan Job xlakata nakatapatiyaw amakgapitsin? 2) ¿La kinkamakgtayayan oración nakgalhiyaw tlan tayat?
15 Xliʼakxilhtit Job kinkamasiyaniyan pi lu xlakaskinka natapatinanaw. Uma chatutu tiku xwankgo pi xʼamigos ni makgtayakgolh wata nitlan lichuwinankgolh. Maski chuna xla «tlawalh oración xpalakata xcompañeros» chu katapatilh (Job 16:2; 42:10). Xlikana akxni tlawayaw oración xpalakata amakgapitsin tlan lakgpali tuku lakpuwanaw xpalakatakan. Chuna, komo skinaw xlakata putum kinatalankan, nakgalhiyaw tayat xla kstalaninanin Cristo (Juan 13:34, 35). Nachuna talakaskin naskinaw espíritu santo (Luc. 11:13). Chu xʼespíritu santo Dios nakinkamakgtayayan nalimasiyayaw tayat xla kstalaninanin Cristo akxni nakatalalinaw amakgapitsin (kalikgalhtawakga Gálatas 5:22, 23).
KAMAKGTAYANAW XLAKATA NAʼANAN AKGTUM TLAN ESPÍRITU KXKACHIKIN DIOS
16, 17. ¿Tukuya tayat limasiyaputuna wix?
16 Chuna la akxilhnitaw, akxni chatunu chatunu tiku an tamakxtumit liskuja xlakata naʼanan akgtum tlan espíritu putum congregación litamakgtaya. Max akxni nalikgalhtawakgakgoyaw uma artículo naʼakxilhaw la tlan tayat nakgalhiyaw. Komo wix chuna titaxtupat, kaʼakxilhti tuku wan xTachuwin Dios (Heb. 4:12). Pablo tiku xliskuja xlakata xkamaxkilh lu tlan liʼakxilhtit congregaciones wa: «Nilay kmalulokga pi nitu ktlawanit ntalakgalhin, xampi kaj xman wa Dios kimpuchina stalanka katsiy pala kkgalhiy talakgalhin» (1 Cor. 4:4, Hua Xasasti Talaccaxlan, 1999).
17 Komo mastayaw talakaskin nakinkapulalinan xliskgalala Dios chu ni lu xlakaskinka akxilhaw tuku lakpuwanaw o tuku lakgayaw kcongregación, namakgtayananaw xlakata tlan natawila congregación. Chu komo tapatiyaw kinatalankan chu tlan kalikatsiniyaw namakgtayananaw ni naʼanan taʼakglhuwit chu xatapaxuwan natawilayaw (Filip. 4:8). Komo chuna Jehová chu Jesús nalipaxuwakgo espíritu nema nalimasiyayaw (Filem. 25).
[Takgalhskinin]
[Dibujo xla página 14]
Komo lakapastakaw taskujut tuku tlawa Jesús, ¿tuku natlawayaw akxni lakgkgolotsin nakinkastakyawakgoyan?
