1. PHauloosi ba mala Kiristtaanetussi xaafiyo wode ay koyiyoogaa yootidee?

 KIITETTIDA PHauloosi ba mala Kiristtaanetuyyo xaafiyo wode, gubaaˈetu ayyaanay Xoossaynne Kiristtoosi nashshiyoogaa gidanaadan koyiyoogaa darotoo yootiis. Leemisuwau, i Galaatiyaa Kiristtaanetussi hagaadan giis: “Ta ishanttoo, nu Godaa Yesuus Kiristtoosa aaro kehatettai inttenaara [“intte ayyaanaara,” NW] gido. Amin77i.” (Gal. 6:18) PHauloosi ‘inttiyo deˈiya ayyaanaa’ giido qofay woygiyoogee?

2, 3. (a) “Ayyaanaa” giya qaalaa issi issitoo PHauloosi woyganau goˈettidee? (b) Nuuyyo deˈiya ayyaanaa xeelliyaagan nuna woygidi oychana danddayiyoo?

² Ha sohuwan PHauloosi nuuni issibaa haasayanaadan woy oottanaadan denttettiyaabaa qonccissanau “ayyaanaa” giya qaalaa goˈettiis. Issi uri ashkke, asau qoppiyaagaa, ashanqqa, keha woy atto giyaagaa gidana danddayees. Geeshsha Maxaafay issi uri “ashkkenne woppu giida” ayyaanaynne “woppa ayyaani” deˈiyoogaa gidiyoogaa nashshees. (1 PHe. 3:4; Lee. 17:27) Hara uri qassi, toochiyaagaa, miishshaa siiqiyaagaa, eesuwan hanqqettiyaagaa, woy i oottanabaa hara asi odanaadan koyennaagaa gidana danddayees. Qassi hegaappekka iitabay, amaridaageeti tuna eeshshay deˈiyoogeeta, azazettennaageeta, ubba qassi makkalanchata.

³ Yaatiyo gishshau, PHauloosi Goday “ne ayyaanaara gido” giyaagaa mala qofaa goˈettidoy, ba ishantti Xoossaa sheniyaara maayettiya ayyaanaynne Kiristtoosaagaa mala eeshshay deˈiyoogeeta gidanaadan zoranaassa. (2 Xim. 4:22; Qolasiyaasa 3:9-12 nabbaba.) Ha wodiyan nuunikka hagaadan nuna oychana koshshees: ‘Taayyo ay mala ayyaanay deˈii? Taayyo kaseegaappe aaruwan Xoossaa ufayssiya ayyaanay deˈana danddayiyoy ayba ogiyaanee? Gubaaˈiyan loˈˈo ayyaanay  deˈanaadan kaseegaappe loyttada maaddana danddayiyaanaa? Leemisuwau, suufiyaa zerido gadiyan deˈiya ubba suufee loˈˈiyaagaa gidiyoogee he gadee muleera loˈˈiyaagaa gidanaadan oottees. Nuuni he ciishshatuppe issuwaa malee? Nuuni kumetta gubaaˈee ufayssiyaagaa gidanaadan maaddiyoo? Yaatanau, nuuni baaxetana koshshees. Nuuyyo Xoossaa ufayssiya ayyaanay deˈanaadan nuuni ay oottana danddayiyaakko ane beˈoos.

4. ‘Saˈaa ayyaanay’ aybee?

⁴ Geeshsha Maxaafay, nuuni “[Xoossay] nuussi yeddido Ayyaanaa ekkidoogaappe attin, sa7aa ayyaanaa” ekkibeennaagaa yootees. (1 Qor. 2:12) ‘Saˈaa ayyaanay’ aybee? Efisoona 2:2n odettida ayyaanaara hegee issi mala. Ha xiqisee, “Intte ha sa7aa iita ogiyaa hemettideta; carkkuwaa giddon de7iya wolqqaama ayyaanatu halaqaayyo qassi Xoossaayyo azazettenna asaa ha77i haariya ayyaanaayyo azazettideta” yaagees. “Carkkuwaa” geetettidaagee alamiyaa ayyaanaa woy qofaa; hegee carkkuwaadan ubbasan deˈiyaaba. Ha wodiyan daro asay qoppiyo qofay hegaa bessiyaaba; eti taani oottanabaa ooninne taassi yootana koshshenna woy ne maatau baaxeta goosona. Hegeeti Seexaanaa alamiyan deˈiya, “Xoossaayyo azazettenna” asata.

5. Beni Israaˈeele biittan issotu issotuyyo deˈiya ufayssenna ayyaanay aybee?

⁵ Hegaa mala qofay oorattaba gidenna. Muuse wodiyan, Qoraahi Israaˈeela yaaˈan aawatettay deˈiyoogeeta eqettiis. I keehi eqettidoogeeti, he wode qeese gididi oottiya Aaroonanne a naata. I geella eta balaa akeekennan aggenna. Woy Muusee eti ba dabbo gidiyo gishsha xallau, etau aawatettaa immidabadan qoppennan aggenna. Ayba gaasuwaaninne gido, Qoraahi Yihoowagaadan xeelliyoogaa aggidoogee qoncce. I Yihooway sunttidoogeeta, “Intte darissideta! . . . Yaatin GODAA maabaraa bolli inttena aissi xoqqu xoqqu ootteetii?” yaagidi, eta toochiyoogaa bessiis. (Qoo. 16:3) Daataaninne Abiiraamikka hegaadan, “Neeni nu bolli halaqa gidanau koyai?” yaagidi, Muusa amassalidosona. Muusekko baanaadan yootin eti otoruwan, “Nuuni bookko!” yaagidosona. (Qoo. 16:12-14) Etau deˈiya ayyaanay Yihoowa ufayssibeennaagee qoncce. I makkalanchata ubbaa woriis.—Qoo. 16:28-35.

6. Issoti issoti koyro xeetu layttan banttau iita qofay deˈiyoogaa waati bessidonaa, qassi hegaa gaasoy ayba gidanee?

⁶ Koyro xeetu layttankka issoti issoti aawatettay deˈiyoogeeta boriyoogan ‘godatettaa karidosona.’ (Yih. 8) He asati banttau imettida maatan waayi ufayttana; qassi Xoossay etau immido oosuwaa maara oottiya asatu bolli hara asay denddanaadan oottidosona.—3 Yohaannisa 9, 10 nabbaba.

7. Nuuyyo ay mala qofay deˈennaadan naagettana koshshii?

⁷ Hegaa mala ayyaanay Kiristtaane gubaaˈiyan deˈana bessenna. Hegaa mala ayyaanay deˈenna mala nuuni naagettana koshshiyoy hegaassa. Muuse wodeegaadaaninne kiitettida Yohaannisa wodeegaadan, ha wodiyan deˈiya gubaaˈe cimatikka polo asa gidokkona. Cimati balidi oottiyoobay nuna qohana danddayees. Hegaa malabay nu bolli gakkikko, nuuni alamiyaa asaagaadan, “tau pirddettana bessees” woy “ha ishay qaxxayettana bessees” mule gaana koshshenna. Yihooway guutta balaa aggibayana danddayees. Nuuni shin hegaadan oottana danddayokkoo? Gita nagaraa oottida issoti issoti cimati oottiyoobaa balabadan qoppiyo gishshau, cimati eta maaddanau koyiyo wode eeno gookkona. Hegee issi hargganchay dottoriyaa ixxiyo gishshau an akkamettanau koyennaagaara issi mala.

8. Nuuni gubaaˈiyan sintta xeera gididi kaalettiyaageeta loˈˈo ayfiyan xeellanaadan maaddiya xiqiseti awugeetee?

 ⁸ Hegaa mala ayyaanay nuuyyo deˈenna mala, Geeshsha Maxaafay Yesuusi leemiso hanotan, “ba ushachcha kushiyan laappun xoolintteta” oyqqidoogaa yootiyoogaa hassayana danddayoos. ‘Xoolintteti’ ayyaanan tiyettida cimatu leemiso; shin eta xeelliyaagan odettidabay gubaaˈiyan deˈiya cimatu ubbaassi haniyaaba. Yesuusi ba kushiyan deˈiya “xoolintteta” i loˈˈo giidi qoppiyo ogiyan kaalettana danddayees. (Ajj. 1:16, 20) Yaatiyo gishshau, Yesuusi Kiristtaane gubaaˈiyau Huuphe gidiyoogaadan, cimati ubbay oottiyoobaa loytti erees. Cimatuppe issuwau seeray koshshikko, a ‘ayfee tama laco milatiyo’ Yesuusi, ba koyido wodiyaaninne ogiyan a seerana. (Ajj. 1:14) Yesuusi yaatana gakkanaashin, nuuni geeshsha ayyaanan sunttettidaageeta bonchana bessees. Ayssi giikko, PHauloosi hagaadan giis: “Inttena kaalettiyaageetuyyo azazettite; qassi eti azaziyoogaakka oottite. Eti bantta oottidobaa Xoossau yootana gishshau, intte shemppuwaa mintti naagoosona; intte etau azazettikko, bantta oosuwaa ufaittidi oottana; hegee xayikko, eti yiillotiiddi oottana; hegee inttena ainne maaddenna.”—Ibr. 13:17.

9. (a) Issi Kiristtaaniyaa seeriyo wode a qofay ay mala gidana danddayii? (b) Harati nuna seeriyo wode ay oottiyoogee loˈˈoo?

⁹ Issi Kiristtaaniyaa seeriyoogee woy a maataappe wottiyoogee, au deˈiya ayyaanay loˈˈokko iitakko bessiyaaba gidana danddayees. Cimati issi yelaga ishay makkalabaa bessiya biiduwaa kaassaa kaaˈido  gishshau hiillan zoridosona. Azzanttiyaabay, i he zoriyaa siyibeenna; qassi Geeshsha Maxaafay gubaaˈiyau oottiyaageetuppe aybi koyettiyaakko yootiyoobaa polibeenna gishshau, he maatay appe ekettiis. (Maz. 11:5; 1 Xim. 3:8-10) Hegaappe simmin, i hegaa maayennaagaa darotuyyo yootiis; ubba qassi cimata toochidi macara biiruwau darotoo xaafiis, qassi haratikka hegaadan oottanaadan denttettiis. Gidoppe attin, issi uri ba mooruwaa genttanau gaaso shiishshiyoogee gubaaˈiyaa sarotettaa mooriyaaba; hegee qassi oonanne maaddiyaaba gidenna. Seeray nuuni akeekibeenna balabaa akeekanau maaddiyaabadan xeellidi, amassalennan hegaa oosuwan peeshshiyoogee daro loˈˈo.—Ermmaasa Zilaassaa 3:28, 29 nabbaba.

10. (a) Loˈˈo ayyaanaabaanne ufayssenna ayyaanaabaa, Yaaqooba 3:16-18ppe ay tamaarana danddayiyaakko qonccissa. (b) Nuuyyo “bollappe yiya aadhdhida eratettai” deˈiyoogee ay demissii?

¹⁰ Yaaqooba 3:16-18y, gubaaˈiyan issi urau deˈana koshshiya loˈˈo ayyaanaynne deˈana koshshenna ufayssenna ayyaanay aybakko yootees. Ha xiqisee hagaadan gees: “Qanaateenne yiiqee de7iyoosan ooshshainne iita ooso ubbai de7ees. SHin bollappe yiya aadhdhida eratettai ubbaappe kase geeshsha. Qassi sarotetta, ashkkenne ero giyaagaa; qassi maarotettinne lo77o aifee kumidoogaa. Sireenne lo77o milatiya iitatetti bainnaagaa. Xillotettaa aifee sarotettaa oottiyaageeti sarotettan zerido zerettaappe beettiis.” Nuuni ‘bollappe yiya aadhida eratettaara’ maayettiyaabaa oottiyo wode, Xoossay nashshiyo eeshshay ishanttu giddon loˈˈo ayyaanay deˈanaadan oottees.

11. (a) Nuuyyo ubbatoo loˈˈo ayyaanay deˈiyoogee ay oottenna mala maaddii? (b) Daawita leemisuwaappe ay tamaariyoo?

¹¹ ‘Xoossaa woosa keettaa naaganaadan’ Yihooway cimata sunttidoogaa nuuni ubbatoo hassayana koshshees. (Oos. 20:28; 1 PHe. 5:2) Yaatiyo gishshau, nuuni gubaaˈe cima gidin aggin, Yihooway giigissidobaa bonchiyoogee aadhida eratetta gidiyoogaa akeekoos. Nuuyyo ubbatoo loˈˈo ayyaanay deˈiyoogee maataa bessiyaagaappe aattidi xeellennaadan maaddees. Israaˈeela Kawuwaa Saaˈooli Daawiti ba sohuwan kawotana giidi qoppido wode, a “qanaate aifiyan xeelliis.” (1 Sam. 18:9) Saaˈooli iita qofaa qoppidi, Daawita woranau koyiis. Saaˈoolaagaadan bessiyaagaappe aattidi maataabaa qoppiyoogaappe, Daawita mala gidiyoogee keehi loˈˈo. Daro naaqoy a gakkishinkka, Daawiti Xoossay sunttidoogaa ubbatoo bonchiis.—1 Sameela 26:23 nabbaba.

12. Gubaaˈiyan issippetettay deˈanaadan maaddiyaabay aybee?

¹² Issuwaa qofay haraagaappe dummatiyoogee gubaaˈiyan deˈiyaageeti, ubba cimatikka ufayttennaadan oottana danddayees. Geeshsha Maxaafay, “Issoi issuwaa bonchchiyoogan ufaittite,” qassi “inttena intte huuphen aadhdhida eranchcha giidi qoppoppite” yaagidi zoriyo zoree hegaara gayttidaagan nuna maaddana danddayees. (Roo. 12:10, 16) Nuuni likke giidi palamettiyoogaappe, likke gidida dumma dumma qofay deˈiyoogaa hassayana bessees. Haraatu qofaa akeekanau maliyaaba gidikko, gubaaˈiyaa issippetettau maaddiyaabaa oottoos.—Pili. 4:5.

13. Nu qofaa yooti simmidi waatana koshshii, qassi hegaa qonccissiya Geeshsha Maxaafaa leemisoy awugee?

¹³ Hegaadan giyoogee gubaaˈe giddon giigana bessiya issibay deˈiyaabadan qoppikko, nuuni hegaa yootiyoogee bala giyoogee? Akkay. Koyro xeetu layttan, daroti palamettido issibay merettiis. He wode, “issi issi hara asati he palamaa gishshau, PHauloosaaranne Barnnaabaasaara Yerusalaame biidi, Yesuusi kiittidoogeetuuranne cimatuura gaittanau qofai qashettiis.” (Oos. 15:2) He  yohuwaa makkiyo ogiyaanne he allaalliyaa xeelliyaagan ishanttussi dumma dumma qofay deˈiyoogee qoncce. SHin, ubbaykka bantta qofaa qofaa yootin geeshsha ayyaanaa kaaletuwan kuuyi simmin, ishantti bantta qofaa zaarettidi yootibookkona. Kuuyidobaa erissiya dabddaabbee gubaaˈeta gakki simmin, “eti he minttettiya dabddaabbiyaa nabbabido wode, ufaittidosona”; qassi ‘ammanuwan minnidosona.’ (Oos. 15:31; 16:4, 5) Ha wodiyankka hegaadan, nuuni issibaa aawatettay deˈiyo ishanttussi yooti simmidi, eti he yohuwaa xeelliyaagan woossanaagaanne akeekan qoppanaagaa ammanettana bessees.

14. Haratuura deˈiya dabbotan nuuyyo loˈˈo ayyaanay deˈiyoogaa waati bessana danddayiyoo?

¹⁴ Haratuura deˈiya dabbotan nuuyyo loˈˈo ayyaanay deˈiyoogaa bessiyo daro hanotati deˈoosona. Harati nuna yiilloyiyo wode atto giyaaba gidikko, keehi goˈˈiyaabaa oottoos. Xoossaa Qaalay, “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. Kiristtoosi [“Yihooway,” NW] intteyyo atto giidoogaadan, inttekka atto giite” yaagees. (Qol. 3:13) “Ooninne ba laggiyaa bolli hanqqettidobai de7ikko” giya qofay haratu bolli hanqqettanaadan oottiyaabi merettana danddayiyoogaa qonccissees. Gidikkokka, harati oottiyo, nuuni dosenna pattennabaa qoriyoogan gubaaˈiyaa sarotettaa mooriyoogaappe, Yihoowa leemisuwaa kaallidi atto giyoogan etaara issippe Yihoowayyo oottiyoogan sinttau sugoos.

15. (a) Atto giyoogaa xeelliyaagan Iyyooba leemisuwaappe ay tamaarana danddayiyoo? (b) Ufayssiya ayyaanay deˈiyoogeeta gidanaadan woosay nuna maaddiyoy ayba ogiyaanee?

¹⁵ Atto giyoogaa xeelliyaagan Iyyooba leemisuwaappe tamaarana danddayoos. A minttettana bessiya heezzu asati a minttettiyoogaa aggidi qohiya darobaa haasayidosona. Gidikkokka, Iyyoobi etau atto giis. Ayba ogiyan? “Iyyoobi ba laggetuyyo” woossiis. (Iyy. 16:2; 42:10) Haratuyyo woossiyo wode, eta kaseegaappe dumma ogiyan xeellana danddayoos. Nu ishanttunne michonttu ubbaassi woossiyoogee nuuyyo Kiristtoosaagaa mala ayyaanay deˈanaadan maaddees. (Yoh. 13:34, 35) Nuuni ishanttussi woossana koshshiyoogaadan, geeshsha ayyaanaa demmanaukka woossana koshshees. (Luq. 11:13) Haratuura deˈiya dabbotan nuuyyo Xoossaa ufayssiya eeshshay deˈanaadan Xoossaa ayyaanay maaddees.—Galaatiyaa 5:22, 23 nabbaba.

16, 17. Nuuyyo deˈiya “ayyaanaara” gayttidaagan ay oottanau murttadii?

¹⁶ Nuuni ubbay loˈˈo ayyaanay deˈiyoogeeta gidanau baaxetiyoogee kumetta gubaaˈiyau anjjuwaa demissees. Ha huuphe yohoy, neeyyo kaseegaappe minttettiya ayyaanay deˈanaadan baaxetanau qoppanaadan nena maaddennan aggenna. Hegaadaana gidikko, neeni laamettanaadan maaddiya, Xoossaa Qaalan deˈiya zoriyaa oosuwan peeshsha. (Ibr. 4:12) Gubaaˈetussi loˈˈo leemiso gidanau koyiya PHauloosi hagaadan giis: “Taani ta huuphiyan ainnekka eriyoobi baawa; shin tana hegee xillissenna. Tana pirddiyaagee Godaa.”—1 Qor. 4:4.

¹⁷ Nu qofaanne nu maataa bessiyaagaappe aattidi xeellennan aggiyoogan, bollappe yiya aadhdhida eratettai deˈiyoogeeta gidikko, gubaaˈiyaa ayyaanay loˈˈo gidanaadan maaddoos. Haratussi atto giyoogaaninne etabaa loˈˈobaa qoppiyoogan, nuugaadan Yihoowau goynniyaageetuura sarotettan deˈana danddayoos. (Pili. 4:8) Nuuni hegaadan oottiyaaba gidikko, Yihoowaynne Yesuusi nuuyyo deˈiya ‘ayyaanan’ ufayttanaagaa ammanettana danddayoos.—Pilm. 25.