1. Ano an ginlalaoman ni Pablo nga iya iginpahayag han nagsurat hiya ha iya mga igkasi-tumuroo?

HAN nagsurat hi apostol Pablo ha iya mga igkasi-tumuroo, pauroutro nga iginpahayag niya nga naglalaom hiya nga uuyonan han Dios ngan han Kristo an espiritu nga iginpapakita han mga kongregasyon. Pananglitan, nagsurat hiya ha mga taga-Galasia: “Mga kabugtoan, an grasya han aton Ginoo Jesu-Kristo umupod ha iyo espiritu. Amen.” (Gal. 6:18) Ano an iya iginpapasabot han iya ginsiring nga “iyo espiritu”?

2, 3. (a) Ano an usahay iginpapasabot ni Pablo kon ginagamit niya an pulong nga “espiritu”? (b) Ano an mahimo naton ipakiana ha aton kalugaringon mahitungod han disposisyon nga aton iginpapakita?

² Hini nga konteksto, an paggamit ni Pablo han pulong nga “espiritu” nagtutudlok han aton disposisyon, o paagi han paghunahuna, nga nakakaaghat ha aton nga magyakan o gumios ha partikular nga paagi. May tawo nga bangin malumo, makonsiderasyon, buotan, mahinatagon, o mapinasayloon. An Biblia nasiring nga maopay an pagkaada “maaghop ngan mabuot nga espiritu” ngan “matugnaw nga espiritu.” (1 Ped. 3:4; Prob. 17:27) Kondi may-ada liwat tawo nga nakakainsulto magyakan, materyalistiko, madali mahiubos, o bangin may independente nga disposisyon. Mas maraot pa, may mga tawo nga nagpapakita hin imoral, matinalapason, o rebelyoso pa ngani nga disposisyon.

³ Salit han gin-gamit ni Pablo an mga pulong sugad han “an grasya han Ginoo nga Jesu-Kristo umupod ha iyo espiritu,” iya gin-aaghat an kabugtoan nga magpakita hin disposisyon nga uyon ha kaburut-on han Dios ngan ha personalidad han Kristo. (Fil. 4:23; basaha an Kolosas 3:9-12.) Yana, maopay nga pakianhan naton an aton kalugaringon: ‘Ano nga disposisyon an akon iginpapakita? Paonan-o ko mas maipapakita an disposisyon nga nakakapalipay ha Dios? Ano an akon mahihimo basi mas makabulig nga magkaada positibo nga disposisyon an bug-os nga kongregasyon?’ Ha pag-ilustrar, ha usa nga hardin hin mga sunflower, an maopay nga kolor  han tagsa nga bukad nakakabulig basi magin makaruruyag pagkit-on an bug-os nga hardin. Usa ba kita han “mga bukad” nga nakakabulig basi magin makaruruyag an bug-os nga kongregasyon? Sadang gud naton pangalimbasogan ito. Hisgotan naton yana kon ano an aton mahihimo basi maipakita an disposisyon nga nakakapalipay ha Dios.

4. Ano “an espiritu han kalibotan”?

⁴ An Biblia nagsusumat ha aton: ‘An aton kinarawat, diri an espiritu han kalibotan, kondi an espiritu nga tikang ha Dios.’ (1 Kor. 2:12) Ano “an espiritu han kalibotan”? Pariho ito han espiritu nga gin-unabi ha Efeso 2:2, nga nasiring: “Hadto nga panahon nanggawi kamo sugad han kahimtangan dinhi ha kalibotan, sugad ha prinsipe han mga kagamhanan han hangin, han espiritu nga niyan nagbubuhat dida ha mga anak han diri-masinugtanon.” Ini nga “hangin” amo an espiritu han kalibotan, o disposisyon han mga tawo ha kalibotan. Pariho han literal nga hangin, aada ito ha aton palibot ngan ha bisan diin. Pananglitan, damu nga tawo yana an may disposisyon nga, ‘Waray magbubuot ha akon!’ o, ‘Ipakig-away an imo mga katungod!’ Hira an ‘mga anak han pagkadiri-masinugtanon’ ha kalibotan ni Satanas.

5. Ano nga maraot nga disposisyon an iginpakita han iba nga Israelita?

⁵ Maiha na nga an mga tawo may-ada sugad hito nga disposisyon. Ha panahon ni Moises, hi Kore nagrebelde ha mga ginpili nga manguna ha Israel. Ginkontra niya labi na hi Aaron ngan an iya mga anak, nga may pribilehiyo sugad nga mga saserdote. Bangin nakita ni Kore an ira mga kaluyahan. O bangin naghunahuna hiya nga gintagan hira ni Moises hin mga pribilehiyo kay iya hira mga paryente. Anoman an hinungdan, matin-aw nga gintagad niya an kahimtang uyon ha panhunahuna han tawo ngan ginkontra an mga pinili ni Jehova. Waray-pagtahod nga nagsiring hiya ha ira: “Nagpapakadaku kamo hinduro . . . Kay ano nga nagpahitaas kamo ha iyo ngahaw labaw han katirokan?” (Num. 16:3) Hira Datan ngan Abiram nagreklamo liwat kontra kan Moises ngan nagsiring ha iya nga ‘nanalinguha pa gud hiya ha paghimo ha iya ngahaw nga prinsipe labaw ha ira.’ Han iginpatawag hira ni Moises, mapahitas-on nga nagsiring hira: “Diri kami makada.” (Num. 16:12-14) Matin-aw nga waray malipay hi Jehova ha ira disposisyon. Iya ginpamatay an ngatanan nga rebelde.—Num. 16:28-35.

6. Paonan-o iginpakita han iba nga kalalakin-an han siyahan nga siglo nga maraot an ira disposisyon, ngan ano an posible nga hinungdan hito?

⁶ Han siyahan nga siglo, may-ada liwat kalalakin-an nga nagin kritiko ha mga gintagan hin awtoridad ha kongregasyon, ngan “iginsikway nira an kagamhanan.” (Jud. 8) Ini nga kalalakin-an posible gud nga diri kontento ha ira mga pribilehiyo ngan nangalimbasog pag-impluwensya ha iba nga pakarauton an kalalakin-an nga ginpili han Dios nga nagbubuhat han ira gimaopayi ha pagtuman han ira mga responsabilidad ha kongregasyon.—Basaha an 3 Juan 9, 10.

7. Ano nga disposisyon an sadang naton likyan?

⁷ Matin-aw nga an sugad nga disposisyon diri sadang makita ha sulod han kongregasyon. Salit kinahanglan mag-ikmat kita nga diri magkaada sugad hito nga panhunahuna. An mga tigurang diri hingpit, sugad la nga diri hingpit an tigurang nga kalalakin-an ha panahon ni Moises ngan ni apostol Juan. Bangin makahimo hin sayop an mga tigurang nga kita mismo an naaapektohan. Kon mahitabo ito, sayop gud para ha bisan hin-o nga membro han kongregasyon nga subaron an espiritu han kalibotan ngan mag-insister nga makakarawat hin “hustisya” o sumiring nga “diri angay magin tigurang ito nga bugto”! Mahimo pilion ni Jehova nga palabyon an pipira nga gudtiay nga sayop. Mahimo ba liwat naton buhaton ito? An iba nga kabugtoan nga nakabuhat hin dagku nga sala nadiri pag-atubang ha komite han mga tigurang nga gintokahan ha pagbulig ha ira, kay may nadidirian hira hito nga mga tigurang. Maipapariho hira ha usa nga pasyente nga nadiri magpatambal kay may nadidirian hiya ha doktor.

8. Ano nga mga teksto an makakabulig ha aton nga padayon nga magpakita hin husto nga disposisyon ha mga tigurang ha kongregasyon?

 ⁸ Basi malikyan an sugad nga disposisyon, hinumdoman naton nga ha Biblia hi Jesus iginhuhulagway nga ‘may-ada pito nga bitoon ha iya too nga kamot.’ An “mga bitoon” nagrirepresentar ha dinihogan nga mga paramangno, ngan mahimo liwat ito magrepresentar ha ngatanan nga paramangno ha mga kongregasyon. Mahimo giyahan ni Jesus an “mga bitoon” ha iya kamot ha bisan ano nga paagi nga iya ginhuhunahuna nga angayan. (Pah. 1:16, 20) Sugad nga Ulo han Kristiano nga kongregasyon, maaram gud hi Jesus han ngatanan nga nahitatabo ha mga tigurang. Salit kon an usa nga tigurang kinahanglan tadungon, sisiguruhon han Usa nga an “mga mata sugad hin laga han kalayo” nga buhaton ito ha Iya panahon ngan paagi. (Pah. 1:14) Samtang diri pa Niya ito ginbubuhat, padayon nga iginpapakita naton an pagtahod ha mga ginpili han baraan nga espiritu, kay hi Pablo nagsurat: “Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira in maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.”—Heb. 13:17.

9. (a) Ano nga pagsari an mahimo maeksperyensyahan han usa nga Kristiano kon gintatadong hiya o gindidisiplina? (b) Ano an pinakamaopay buhaton kon ginsasaway kita?

⁹ Mahimo liwat masarihan an disposisyon han usa nga Kristiano kon gintatadong hiya o gintatangtangan hin mga pribilehiyo ha kongregasyon. Usa nga batan-on nga brother an mataktika nga ginsagdonan han mga tigurang kay nag-uuyag hiya hin madarahog nga mga video game.  Makasurubo nga waray niya karawata an sagdon ngan kinahanglan tangtangon ha pagin ministeryal nga surugoon kay diri na niya nasusunod an mga kwalipikasyon han Biblia ha mga ministeryal nga surugoon. (Sal. 11:5; 1 Tim. 3:8-10) Katapos, ginpinanumat han brother nga diri hiya nauyon ha nagin desisyon han mga tigurang, ngan pauroutro nga nagsurat ha sanga nga opisina nga ginpapakaraot an mga tigurang ngan gin-aghat pa ngani an iba nga kabugtoan nga buhaton liwat ito. Kondi waray gud kaopayan nga mahihimo kon ibubutang naton ha peligro an kamurayawan han bug-os nga kongregasyon ha pangalimbasog nga pakamatadungon an aton ginbuhat. Mas maopay gud hunahunaon nga an pagsaway usa nga paagi nga makita an aton mga kaluyahan nga diri naton hinbabaroan hadto ngan katapos mapainubsanon nga karawaton an pagtadong.—Basaha an Pagtangis 3:28, 29.

10. (a) Isaysay kon ano an aton hibabaroan ha Jakobo 3:16-18 mahitungod han maopay ngan maraot nga disposisyon. (b) Ano an resulta kon nagios kita uyon ha “kinaadman nga tikang ha kahitas-an”?

¹⁰ An Jakobo 3:16-18 nabulig ha aton nga hibaroan an sayop ngan husto nga disposisyon nga makikita ha kongregasyon. Nasiring ito: “Kon diin an kaawa ngan pagkabahin, didto an kasamokan ngan an ngatanan nga mangil-ad nga buhat. Kondi an kinaadman nga tikang ha kahitas-an, siyahan putli, makigdaiton, matalunoy, mapuanguron, puno ha kalooy ngan mag-opay nga bunga, waray pagruhaduha, waray hin kasalingkapaw. Ngan an bunga han katadongan iginsabwag ha kamurayawan tungod ha ira nga magbuhat hin kamurayawan.” Kon nagios kita uyon ha “kinaadman nga tikang ha kahitas-an,” susubaron naton an mga kalidad han Dios ngan makakabulig kita nga magkaada maopay nga disposisyon an kongregasyon.

11. (a) Ano an aton malilikyan kon may-ada kita husto nga disposisyon? (b) Ano an aton hibabaroan ha ehemplo ni David?

¹¹ Sadang naton hinumdoman nga igintoka ni Jehova an mga tigurang basi mangnoan an kongregasyon han Dios. (Buh. 20:28; 1 Ped. 5:2) Salit maaram kita nga sadang naton tahuron an kahikayan han Dios, mga tigurang man kita o diri. An pagkaada husto nga disposisyon makakabulig ha aton nga malikyan an sobra nga pagpabili ha pribilehiyo. Han hi Hadi Saul naghunahuna nga hi David nagin tarhog ha iya pagkahadi, hi Saul nagin ‘maabugho ngan matinahapon kan David.’ (1 Sam. 18:9) Hi Saul nagkaada sayop nga disposisyon ngan karuyag pa ngani niya patayon hi David. Imbes nga sobra nga mabaraka ha katungdanan pariho kan Saul, mas maopay gud nga magin pariho kan David. Bisan pa han ngatanan nga kawaray-hustisya nga naeksperyensyahan ni David, padayon hiya nga nagpakita hin pagtahod ha mga ginhatagan han Dios hin awtoridad.—Basaha an 1 Samuel 26:23.

12. Ano an makakabulig ha pagkaurosa han kongregasyon?

¹² An pagkaiba-iba hin opinyon mahimo magin hinungdan han kaaringit butnga han mga membro han kongregasyon—bisan ha mga tigurang. May kalabotan hini, makakabulig ha aton an sagdon han Biblia: “Palabihon niyo an usa kag usa ha kadungganan” ngan, “Diri kamo magpaka-makinaadmananon ha iyo kalugaringon.” (Roma 12:10, 16) Imbes nga mag-insister nga kita an husto, sadang naton karawaton nga agsob nga diri la usa an husto nga paagi ha paghunahuna han usa nga sitwasyon. Kon mangangalimbasog kita nga sabton an panhunahuna han iba, makakabulig kita ha pagkaurosa han kongregasyon.—Fil. 4:5.

13. Ano an sadang naton magin panhunahuna ha aton opinyon, ngan ano nga ehemplo ha Biblia an nag-iilustrar hini?

¹³ Karuyag ba sidngon nga sayop an pagpahayag han aton opinyon kon ha aton hunahuna may sadang tadungon ha kongregasyon? Diri. Han siyahan nga siglo, nagkaada isyu nga ginlantugian gud. An kabugtoan ‘nagkaurosa nga hi Pablo ngan hi Bernabe, ngan an iba pa ha ira, sumaka ha Jerusalem ngadto ha mga apostol ngan ha mga ansiano tungod hini nga ginlalarisan.’  (Buh. 15:2) Sigurado nga an tagsa hito nga kabugtoan may opinyon mahitungod hito nga isyu ngan kon paonan-o ito tutuhayon. Kondi katapos maipahayag han kada tagsa an iya panhunahuna ngan nakahimo na hin desisyon ha bulig han baraan nga espiritu, waray na hisguti han kabugtoan an ira tagsa nga opinyon. Han nakarawat han mga kongregasyon an surat mahitungod han desisyon, “nalipay hira tungod han laygay” ngan “nagmarig-on ha pagtoo.” (Buh. 15:31; 16:4, 5) Yana liwat, kon naisumat na naton ha mga tigurang an usa nga butang nga aton nababarak-an, sadang kita sumarig nga ira ito pamumurubuuton hin maopay ngan didesisyonan kon may-ada ba sadang buhaton hito.

14. Paonan-o naton maipapakita an maopay nga disposisyon ha aton relasyon ha iba?

¹⁴ Ha aton relasyon ha iba, damu an aton higayon nga magpakita hin maopay nga disposisyon. Daku nga kaopayan an mahihimo han kada tagsa ha aton kon mapinasayloon kita kon an iba nakakasayop ha aton. An Pulong han Dios nasiring: “Mag-inantosay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo.” (Kol. 3:13) An mga pulong nga “kon may-ada usa ka tawo nga may igsusumbong” nagpapakita nga bangin may angayan kita nga mga rason nga maaringit ha iba. Kondi imbes nga maaringit ha talagudti nga butang nga aton nadidirian ha personalidad han iba ngan ibutang ha peligro an kamurayawan han kongregasyon, nangangalimbasog kita pagsubad kan Jehova pinaagi han pagin andam magpasaylo ngan padayon nga nag-aalagad ha Dios kaupod nira.

15. (a) Ano nga leksyon mahitungod ha pagpasaylo an aton hibabaroan tikang kan Job? (b) Paonan-o an pag-ampo makakabulig ha aton nga magpakita hin maopay nga disposisyon?

¹⁵ Mahitungod ha pagpasaylo, mahibabaro kita hin leksyon tikang kan Job. An tulo nga lalaki nga sadang unta magliaw ha iya nagyakan lugod hin nakakasakit nga mga pulong. Bisan pa hito, ginpasaylo niya hira. Paonan-o? ‘Nag-ampo hiya para ha iya tulo nga sangkay.’ (Job 16:2; 42:10) An pag-ampo para ha iba mahimo makagbag-o han aton panhunahuna ha ira. An pag-ampo para ha ngatanan nga kabugtoan nabulig ha aton nga magkaada disposisyon nga pariho han kan Kristo. (Juan 13:34, 35) Dugang pa ha pag-ampo para ha kabugtoan, sadang kita mag-ampo ha pangaro han baraan nga espiritu. (Luk. 11:13) An espiritu han Dios mabulig ha aton nga magpakita hin Kristiano nga mga kalidad ha aton relasyon ha iba.—Basaha an Galasia 5:22, 23.

16, 17. May kalabotan ha disposisyon nga aton iginpapakita, ano an imo determinasyon?

¹⁶ Makalilipay gud an resulta kon ginhihimo nga tumong han tagsa nga membro han kongregasyon nga makabulig basi magkaada maopay nga disposisyon an kongregasyon! Katapos hisgotan ini, bangin masantop naton nga may mapapauswag pa kita ha aton disposisyon basi magin mas makapadasig ha iba. Kon amo, diri kita sadang mag-alang paggamit han Pulong han Dios ha pag-usisa ha aton kalugaringon. (Heb. 4:12) Hi Pablo, nga karuyag magin maopay nga susbaranan ha mga kongregasyon, nagsiring: “Waray ko hinbabaroan nga bisan ano kontra ha akon ngahaw; kondi diri ba tungod hini nga ginpakamatadong ako; kondi an naghuhukom ha akon amo an Ginoo.”—1 Kor. 4:4.

¹⁷ Samtang nangangalimbasog kita nga gumios uyon ha kinaadman tikang ha kahitas-an—diri gin-iinsister an aton mga opinyon o ginhuhunahuna nga angayan kita tagan hin dugang nga mga responsabilidad—makakabulig kita nga magkaada maopay nga disposisyon an kongregasyon. Pinaagi han pagin mapinasayloon ngan paghunahuna hin positibo ha iba, magigin murayaw an aton relasyon ha kabugtoan. (Fil. 4:8) Samtang ginbubuhat naton ini, makakasiguro kita nga hi Jehova ngan hi Jesus malilipay ha “espiritu,” o disposisyon, nga aton iginpapakita.—Filem. 25.