TSË wata febrero killachömi, South Lansing (Nueva York) nishqan markaman chäyashqa kayarqan 122 precursorkuna Galaad Escuëlapa 17 kaq cläsenchö kayänampaq. Misionëronö kayänampaq kaq grüpochöqa këkäyarqan: Michigan markapitam Lowell Turner y William (Bill) Kasten kayarqan; Iowa markapitam Richard Kelsey; y California markapitanam Ramon Templeton. Chuskunmi alli amigo këman chäyarqan.

Pitsqa killa pasariptinmi, estudiantekunata parlapänampaq Jehoväpa Testïgonkunapa principal oficïnampita wawqi Nathan Knorr ëwanampaq kaqta willakuyarqan; alläpam shuyaräyarqan tsë visïtata. Chuskun wawqikunam niyashqa kayarqan, puëdekaptinqa, juk nacionllachö chuskun sirwita munayanqanta. ¿Më nacionchöpis sirwiyänampaq kaqta musyariyänan höranatsuraq karqan?

Masqa musyëta munariyarqan, estudiantekuna më nacionmampis sirweq ëwayänampaq kaqta wawqi Knorr parlar qallëkuptinmi. Puntataqa, tsë chuskun jövenkunatam plataformaman ëwayänampaq qayarirqan. Mantsakashqam ëwayarqan, pero tsënö karpis mana rakikäyänampaq kaqta musyarmi kushishqa këkäyarqan. Pero ¿mëmanraq ëwayänan karqan? Alemania nacionmanmi, tsëchö sirwiyänampaq kaqta musyarirmi estudiante mayinkuna kushishqa paqchiyarqan o taqllayarqan.

Hitlerpa mandonchö 1933 wata witsankunapita Alemaniachö cristiänokuna markäkïninkunachö alli tsarakuyanqanta musyarmi, entero Patsachö Jehoväpa testïgonkuna espantashqa këkäyarqan. Atskaq estudiantekunam yarpäyaq ishkë kaq jatun guerra ushariptin, Euröpachö cristiano mayinkunapaq röpata y más yanapakïkunata apatsiyanqanta. Alemaniachö cristiänokunaqa sinchi markäkïyoq, alli valoryoq y Jehoväman confiakoq kayanqampitam alli ejemplo kayarqan. Tsë höram Lowell wawqi kënö pensarqan: “¡Tsë kuyashqa wawqikunata y panikunataqa kikintsikmi reqishun!”. Tsë paqasqa alläpa kushishqam këkäyarqan y familiankunata y amïgonkunatam qayëta munayarqan.

1951 wata, 27 de julio killam, Homeland nishqan barco East River (Nueva York) markachö këkaq barcokuna chänampita, chuskun amïgokunata apakurkur Alemania nacionman yarqurqan, tsë viäjeqa 11 junaqkunapam kanan karqan. Galaad Escuëlachö  yanapakoq y tsëpita Jehoväpa Testïgonkunata Pushaqnö yanapakoq Albert Schroeder wawqim, juk ishkë palabrakunata Alemania idiömachö yachatsishqa kanaq. Tsë barcochö Alemania nacionpita pasajërokuna kayaptinmi, pensayarqan más palabrakunata alemán idiömachö yachakïta. Pero tsë nacionpita karpis juknöpam parlayaq, y ¡pantaratsiyarqanmi!

Viäjerëkur peqankuna o umankuna muyuptin y shonqunkuna tikranaptimpis, martes 7 de agosto qoyam o tutam Hamburgo nishqan markaman chäriyarqan. Guerra ushanqampita joqta watallaraq pasarishqa kaptinmi, imëkapis mana allillaraq karqan. Tukïta rikäyanqampita llakikurninmi, Wiesbaden nishqan markachö tsë witsampaq këkaq sucursalman juk trenwan paqaspa viajayarqan.

Y miércoles qoyaran juk alemán Testïgota reqiriyarqan. Hans jutiyoq wawqim trenkuna chäyänan sitiopita Betelman pusharqan. Betelchömi juk edäna panitawan dejarirqan, tsë paniqa manam inglés idiömata parlaqtsu y imapis allilla yarqunantam munaq; pëqa ima idiömachöpis más sinchipa parlaptinqa entiendiyänampaq kaqtam pensaq. Pero más sinchipa parlaptinqa más mana allim sientekuyaq. Tsëpitanam sucursalta rikar yanapakoq Erich Frost wawqi chärirqan y inglés idiömachö kushishqa saludarirqan. ¡Tsëpitaqa ichik más allinam sientekuyarqan!

Agosto killa ushëpaqnam, alemán idiömachö “Adoración Limpia” tïtuloyoq punta kaq asamblëankunaman chuskun ëwayarqan, Francfort del Main nishqan markaman. Tsëchöqa juntakäyarqan 47.432 nunakunam y 2.373 nunakunam bautizakuyarqan, tsë asamblëam kë misionërokunata yanaparqan mana dejëta y kushi kushilla Diospita yachatsikuyänampaq. Pero juk ishkë junaqkuna pasariptinqa, Betelchö trabajayänampaq kaqtam wawqi Knorr willarirqan.

Puntatam, Estados Unïdospa sucursalninchö trabajanampaq Ramonta invitayaptin pëqa munarqantsu misionero këta munarnin. Y Richardwan Billqa manam imëpis Betelchö trabajëtaqa pensayarqantsu. Pero tsëchö këkar kushishqa kayanqanmi rikätsirqan Diosnintsikqa noqantsikpaq ima más alli kanqanta musyanqanta. Awmi, munënintsikllata  ruranapa rantinqa o trukanqa, Jehoväman markäkïmi o yärakuymi más alliqa. Mëchö y imanö Jehoväta sirwirpis, kushishqa kanapaqqa tsëta entiendinantsikmi alläpa precisan.

Betelchö wakin wawqikuna y panikunaqa alläpa kushishqam këkäyarqan inglés idiömata yachakuyänampaq Estados Unïdospita atskaq wawqikuna kayaptin. Tsënö kaptimpis, munëninkunaqa manam cumplikarqantsu, ¿imataq michärirqan? Juk junaqmi llapankuna comedorchö këkäyaptin, juk alläpa precisaqpita wawqi Frost, imëpis ruranqannö, sinchipa parlar qallëkurqan. Llapankunam, mantsakashqa plätonkunata rikararnin upällalla këkäyarqan. Chuskun americänokunaqa manam musyayarqantsu ima pasakunqanta, pero ichikllapa ichikllapam cuenta qokuriyarqan pëkunapaq parlëkanqanta. Y mana allim sientekuyarqan wawqi Frost sinchipa, “VERBOTEN!” niptin (tsëqa, “¡prohibido!” ninanmi). Tsëpitaqa más entiendeyänampaqmi más sinchiparaq yaparirqan. ¿Imata rurayanqampitataq tsënöqa piñakurqan?

Mikï o mikuy hora ushariptinqa, rasllam llapankuna cuartonkunata ëwakuyarqan. Tsëpitanam juk wawqi entiendiratsirqan kënö nir: “Yanapayämänëkipaqqa alläpam precisan alemán idiömata yachakuyänëki. Tsëmi wawqi Frost niyämashqa hasta yachakuyanqëkiyaq inglés idiömata qamkunawan parlëqa VERBOTEN kanqanta”.

Betel familiaqa cäsokurqanmi, manam alemán idioma parlëllatatsu tsëllaraq yëkoqkunata yanapayarqan, sinöqa, juk kuyakoq wawqi consejakuptin wiyakïqa qallananchö sasa o aja chaskikunan kaptimpis, biennintsikpaq kanqanta yachakuyarqan. Wawqi Frotsqa más yarpararqan Jehoväpa markampaq y cristiano mayinkunapaqmi. * Tsëchi tsë wawqitaqa chuskumpis alläpa kuyayarqan.

Diosta mana dejaq amïgokuna imanö kayanqanqa, yanapamashwanmi Dioswan amigo kënintsikta más sinchiyätsinapaq. Këllaman yarpärishun, kë chuskun wawqikunaqa, Diosta shonqupita patsë kuyaq Alemaniachö wawqinkunapitam yachakuyarqan, jina yachakuyarqanmi yanaqinkunapitapis. Rïchardmi kënö willakun: “Lowell wawqiqa alemán idioma parlëta alliran yachaq, pero wakinnïkunaqa ichikllatam parlayaq kayä. Mayornïkuna kaptinmi idioma asunto ima tapukïnïkunapis kaptinqa, pëta tapuyaq kayä y imatapis qallatsinampaq niyaq kayä”. Ramonnam kënö nin: “Suiza nacionpita juk wawqim awniyämarqan vacacionnïkunachö, nacionninchö këkaq chakra  wayinchö quedakuyänäpaq. Alemaniachö juk wata kayanqäpitam tsëraq punta vacacionnïkuna karqan ¡Imanö kushikïpaqmi karqan! ¡Ishkë semänapam tsë idioma yachakïpita librakäriyänä karqan! Pero manam musyayarqätsu Lowell churapakanqantaqa, llapan qoyakunam o tutakunam Llapan junaqkuna Bibliapita yachakunapaq follëtota alemán idiömachö leiyänäpaq niyämarqan. Manam gustökunawanqa dejayämarqantsu. Pero noqakunapaq alli kaqta munar imatapis rurëkäyaptinqa, mana fácil kaptimpis wiyakunan alläpa precisanqantam yachakuyarqä. Watakuna pasanqanmanqa tsënö rurayanqämi alläpa yanapayämashqa y Diospa kaqta wiyakuyänäpaqpis fácil-lla kashqa”.

Kë chuskun amïgokunaqa, Filipenses 2:3 texto ninqannömi, ‘qollmi shonquncunawan waquincunata mas presisaqta’ rikarnin, yanaqinkuna imachö más yachayanqan kaqkunata precisaqpaq churayarqan. Këllaman pensarishun, Lowell, Richard y Ramonqa alleqmi musyayaq ima problëmapis kaptinqa, pëkunapitapis más, Bill altsëta yachanqanta. Lowell wawqim kënö nin: “Sasa o aja altsanam problema kaptinqa, y tsë altsakänampaq tukïkunata rurayänä kaptinqa, Billtam yanapayämänampaq niriyaq kayä. Pëqa imatapis altsananrëkurqa manam ima rurëtapis mantsaqtsu”.

Chuskunkunam qati qatilla casakuyarqan. Jehoväta kuyayanqampita y Diospita llapan tiemponkunawan yachatsikuyanqampita amigo këninkuna kashqa kaptinmi, llapan puëdeyanqanmannö Jehoväta sirweq panikunata akrayarqan casakuyänampaq. Llapan tiemponkunawan yachatsikoq kayanqanmi yachatsirqan chaskeq kaqpitaqa yanapakoq kaq más kushishqa kanqanta, y kikinkunapa munëninkunapitaqa Diospa kaqta más puntaman churayänampaq kaqta. Tsëmi, llapan tiemponkunawan Jehoväta sirwikaq panikunawan casakuyarqan, tsëmi casado kawakïninkunaqa alläpa sinchi y kushikïpaq karqan.

Amigo kë o casado kawakï mana imëpis ushakänampaqqa, Jehovätam cuentaman churayänan (Ecl. 4:12). Billpawan Ramonpa majankuna wanukuyashqana kayaptimpis, casado kawakïninkunachöqa warminkunapa yanapakïninkunata allipam chaskiyarqan. Lowell y Richardqa jinallaran casado kawakïninkunachö kushishqa pasëkäyan, y Billqa, llapan tiemponwan Jehoväta sirwir sïguinampaqmi juk alli panita akrarqan yapë casakunampaq.

Tiempowannam, Jehoväta sirwirnin tukï cargoyoq kayanqan tukï nacionkunachö täräyänampaq o tiyapäkunampaq rakirirqan, y masqa Alemaniachö, Austriachö, Luxemburgochö, Canadächö y Estados Unïdoschömi täräyarqan. Gustayanqanmannö atska tiempo junto këta munayaptimpis karuchö kayanqanmi permitirqantsu, tsënö kaptimpis kushikïninkunata y llakikïninkunataqa imëkanöllapapis willanakuyaqmi (Rom. 12:15). Tsënö amïgokunaqa Jehoväpa shumaq qarëninmi y manam ichikllapaq churarishwantsu (Prov. 17:17). Rasumpa alli amïgokunaqa manam fácil tarinantsu, pero Jehoväpa testïgonkunapaqqa entero Patsapam rasumpa kuyakoq wawqikuna y panikuna kan, y tsëpitapis masqa Jehoväwan Jesucristum.

 Musyanqantsiknömi, kë chuskun amïgokunapaqqa imëkapis sasaran o ajaran kashqa. ¿Imanir? Majankunata oqrayanqanrëkur, alläpa qeshyayanqanrëkur, awkinna o chakwanna teytankunata rikäyanqanrëkur, llapan tiemponkunawan yachatsikïkarpis wamrankunata wätayanqanrëkur, mushoq cargokunata chaskiyanqanrëkur y edäna kayanqanrëkurmi tukïkunata pasayashqa karnin. Pero pasayanqankunam yachatsishqa junto kar o mana junto këkarpis rasumpa amïgokunaqa, Jehoväta kuyaqkunawan imëpis këkäyanqanta y tukï problëmakunachö yanapayänampaq listo këkäyanqanta.

Jehovällapaqna kawayänampaq awnikuyanqanqa alläpa allim kashqa, tsëta rurayanqan witsanqa kayarqan Lowell 18 watayoq, Ramon 12 watayoq, Bill 11 watayoq y Richard 10 watayoqmi, y llapan tiemponkunawan sirwiyänampaq churapakäyanqan witsanqa 17-21 watayoqmi kayarqan. “Kanan joven kënikichö yarpë Kamashoqnikipaq” nir Eclesiastés 12:1 consejakunqantam wiyakuyarqan.

Cristiano ollqu joven kaptikiqa, Jehovämi invitashunki llapan tiempïkiwan sirwinëkipaq. ¿Tsë invitacionta chaskikïta puëdenkiku? Tsënö kaptinqa capazchi Jehoväpa kuyakïninwan kë chuskun amïgokunanöpis, congregacionkunata watukaqnö, congregacionkunata watukaqta rikaqnö, sucursalkunata watukaqnö, betelïtanö, Sucursalta Rikaqnö; Anciänokunapaq y Siervo Ministerialkunapaq Escuëlachö o Precursorkunapaq Escuëlachö yachatsikoqnö, o asamblëachö discursaqnöpis yanapakïta puëdenkiman. Kë chuskun wawqikunaqa alläpam kushikuyaq rurëkäyanqanwan atska waranqa cristiänokunata yanapëkäyanqanta musyar. Tsë llapankunachöqa yanapakuyarqan joven këninkunapita shonqupita patsë Jehoväta sirwiyänampaq invitacionta chaskikuyanqampitam (Col. 3:23).

Kanankunaqa Alemania nacionpa Selters markachö këkaq Sucursalchömi Lowell, Richard y Ramon yapë junto yanapakïkäyan. Llakikïpaqqa, Estados Unïdoschö precursor especialnö yanapakïkar 2010 watachö Bill wanukunqanmi. Y pë wanuriptinqa alläpam llakikuyarqan, porque 60 watakunapanömi amigo kayarqan. Pero Diosnintsik Jehoväqa manam imëpis amïgonkunataqa qonqanqatsu. Diospa Gobiernonchöqa, wanïrëkur rakikashqa kayanqampita amïgokunaqa, yapëmi juntakäyanqa.

Wanukunampaqna këkarmi Bill kënö qellqarqan: “Kë 60 watakuna pasanqanchöqa manam jukllëllatapis yarpätsu amigo kënïkunata imallapis rakita puëdenqanta. Amigo kënïkunaqa noqapaq imëpis alläpa shumaqmi kashqa”. Tsëmannam kiman amïgonkunaqa, mushoq Patsaman yarpararnin kënö niyan: “Pero qallananllaraqmi”.