“သူငယ်တို့၏နှုတ်ထဲမှ” အားပေးမှု
၂၀၀၉၊ ဒီဇင်ဘာလမှာ ရုရှားအထက်တရားရုံးက ထုတ်ပြန်လိုက်တဲ့ ဆုံးဖြတ်ချက်တစ်ခုကြောင့် ရုရှားနိုင်ငံ၊ တော့ဂန်ရော့စ်မှာရှိတဲ့ ယေဟောဝါသက်သေတွေရဲ့အဖွဲ့အစည်း အပိတ်ခံလိုက်ရတယ်။ သက်သေခံတွေရဲ့ ဝတ်ပြုရာခန်းမ အသိမ်းခံလိုက်ရပြီး သူတို့ရဲ့စာပေ ၃၄ မျိုးကိုလည်း အန္တရာယ်ရှိတဲ့စာပေတွေအဖြစ် သတ်မှတ်လိုက်တယ်။ တော့ဂန်ရော့စ်မှာရှိတဲ့ သက်သေခံ ကလေး၊ လူကြီးတွေရဲ့ ဓာတ်ပုံတွေနဲ့အတူ ဒီသတင်းကို ယေဟောဝါသက်သေတွေရဲ့ တရားဝင်ဝက်ဘ်ဆိုက်မှာ တင်လိုက်တယ်။
ဩစတြေးလျနိုင်ငံက ကလေးတွေ
လအနည်းငယ်အကြာမှာ ရုရှားမှာရှိတဲ့ ယေဟောဝါသက်သေတွေရဲ့ စီမံခန့်ခွဲရေးဌာနဟာ စက္ကူပုံးတစ်ပုံးနဲ့အတူ စာတစ်စောင်ကို လက်ခံရရှိခဲ့တယ်၊ ဒါတွေကို ပို့လိုက်တဲ့သူက တရားရုံးဆုံးဖြတ်ချက်နဲ့ပတ်သက်တဲ့သတင်းကို ဖတ်လိုက်ရတဲ့ ဩစတြေးလျနိုင်ငံ၊ ကွင်းစလန်မှာရှိတဲ့ သက်သေခံမိသားစုတစ်စုဖြစ်တယ်။ စာမှာ ဒီလိုဖော်ပြထားတယ်– “ချစ်လှစွာသောညီအစ်ကိုများ၊ ကျွန်တော်တို့ရဲ့ကလေးတွေဖြစ်တဲ့ ကိုဒီနဲ့ လာရီစာတို့ဟာ ရုရှားနိုင်ငံမှာရှိတဲ့မိတ်ဆွေတွေရဲ့ ယုံကြည်ခြင်းနဲ့ သူတို့ခံရတဲ့စမ်းသပ်မှုတွေကြောင့် စိတ်နှလုံးထိမိခဲ့တယ်။ သူတို့က ပို့စကတ်တွေလုပ်ပြီး စာတွေရေးပို့လိုက်တယ်၊ ဒါကို ကျွန်တော်တို့က လက်ဆောင်အဖြစ် တော့ဂန်ရော့စ်မှာရှိတဲ့ ကလေးတွေကို ပို့ပေးလိုက်ပါတယ်။ အလွန်ဝေးကွာတဲ့နေရာမှာရှိတဲ့ တခြားကလေးတွေလည်း ယေဟောဝါကို သစ္စာရှိရှိ ဝတ်ပြုကိုးကွယ်နေကြပြီး သူတို့ကိုသတိရနေတယ်ဆိုတာ သိစေချင်လို့ပါ။ သူတို့ရဲ့ ထွေးပွေ့ မှုနဲ့ မေတ္တာကို ပို့သလိုက်ပါတယ်။”
တော့ဂန်ရော့စ်မှာရှိတဲ့ကလေးတွေက လက်ဆောင်တွေကို လက်ခံရရှိတဲ့အခါ ရုပ်ပုံလေးတွေဆွဲ၊ စာတွေရေးပြီး ဩစတြေးလျက မိသားစုထံပြန်ပို့ပေးခဲ့ကြတယ်။ ရုရှားဌာနခွဲမှာ အမှုဆောင်နေတဲ့ သက်သေခံတစ်ယောက်က ကိုဒီနဲ့ လာရီစာရဲ့လုပ်ရပ်ကြောင့် စိတ်ထိမိခဲ့ပြီး သူတို့ဆီ စာတစ်စောင်ရေးခဲ့တယ်။ စာမှာ ဒီလိုဖော်ပြထားတယ်– “ကလေးပဲဖြစ်ဖြစ်၊ လူကြီးပဲဖြစ်ဖြစ် သူတို့မကျူးလွန်တဲ့အပြစ်တစ်ခုအတွက် ဒဏ်ပေးခံရတယ်ဆိုရင် ဘယ်လောက်ခံရခက်သလဲဆိုတာ စဉ်းစားကြည့်ပါ။ တော့ဂန်ရော့စ်မှာရှိတဲ့ ညီအစ်ကိုညီအစ်မတွေဟာ ဘာအမှားမှ မလုပ်ခဲ့ကြဘူး၊ ဒါပေမဲ့ သူတို့ရဲ့ဝတ်ပြုရာခန်းမ အသိမ်းခံရတယ်။ ဒါကြောင့် သူတို့ အရမ်းဝမ်းနည်းခဲ့ကြတယ်။ ကမ္ဘာ့ရဲ့နောက်တစ်ခြမ်းမှာရှိတဲ့သူတစ်ယောက်ယောက်က သူတို့ကိုသတိရနေတယ်ဆိုတာကို သိရလို့ သူတို့ အားရှိကြမှာဖြစ်တယ်။ သင်တို့ရဲ့ မေတ္တာနဲ့ ကြင်နာမှုအတွက် ကျေးဇူးတင်ပါတယ်။”—ဆာ. ၈:၂။
ပို့လိုက်တဲ့လက်ဆောင်တွေကို ရုရှားနိုင်ငံက ကလေးတွေ လက်ခံရရှိ
ကျွန်ုပ်တို့ဟာ တကယ်ပဲ ကမ္ဘာချီမိသားစုဝင်တွေဖြစ်ကြတယ်၊ ကျွန်ုပ်တို့ တစ်ယောက်အပေါ်တစ်ယောက်ထားတဲ့မေတ္တာက ဘဝပြဿနာတွေနဲ့ အခက်အခဲတွေကို ခံရပ်နိုင်ဖို့ ကူညီပေးတယ်။ ယေဟောဝါသက်သေတွေဟာ လူလူချင်းမုန်းတီးဖို့ အားပေးအားမြှောက်လုပ်နေတယ်လို့ စွပ်စွဲခံခဲ့ကြရတယ်။ ဒါပေမဲ့ ကျွန်ုပ်တို့ရဲ့ကလေးတွေဟာ တခြားနိုင်ငံတွေမှာရှိတဲ့သူတွေနဲ့ ယဉ်ကျေးမှုချင်းမတူတဲ့သူတွေကို မေတ္တာပြပြီး အချင်းချင်းအတွက် စိုးရိမ်ပူပန်ပေးကြတယ်။ သူတို့ရဲ့သဘောထားက ယေရှုရဲ့ဒီစကားတွေမှန်ကန်တယ်ဆိုတာ ဖော်ပြတယ်– “သင်တို့အချင်းချင်းချစ်ကြလျှင် ထိုချစ်ခြင်းမေတ္တာကိုထောက်၍ သင်တို့သည် ငါ၏တပည့်များဖြစ်ကြောင်း လူအပေါင်းတို့ သိရကြလိမ့်မည်။”—ယော. ၁၃:၃၅။
