Kay 2009 watapi diciembre killapi, Rusiamanta Tribunal Supremo nisqanman jina, Taganrog llajtapi Jehovaj testigosnin niña religión jina kanankuta nikorqa. Chantapis Tantakuna Wasinkuta qhechukorqa, 34 publicacionesninkutaj mana allin yuyayniyoj willaykunawan kasqanta nikorqa. Chayta ruwasqankutaj, Internetpi Jehovaj testigosninpa cheqankupi willakorqa. Chay cheqapeqa chay llakiypi rikukoj hermanospa fotosninkuta, ashkha wawaspa fotosninkuta ima churakorqa.

Pisi killasninmantaj, Rusia Betelman uj apachiku chayarqa. Queensland (Australia) llajtamanta uj familia, Internetpi willakusqanta leeytawan uj cajata, cartatawan apachikorqanku. Chay cartapi jinata qhelqasqanku: “Munasqa hermanos: Wawasniyku Codywan Larissawan, Rusiamanta hermanos creeyninkurayku pruebasta muchusqankuta yachaspa mayta llakikunku. Chayrayku, papelpi qhelqasqasta, regalostawan Taganrog llajtamanta wawaspaj apachikamunku. May chhika karupi tiyakoj wawaspis Jehovata cheqa sonqowan sirvisqankuta, paykunamanta llakikusqankuta ima yachanankuta munanku. Paykunaman jatun napaykuyta apachimunku”, nispa.

Taganrog llajtamanta wawasqa chay regalosta japʼisqankutawan, mayta agradecekusqankuta rikuchinankupaj chay familiaman dibujosniyoj cartasta apacherqanku. Uj hermano, pichus Rusia sucursalpi sirvin, “juchʼuy wawaspis” sonqochasqankuta rikuspa Codyman Larissamanwan, jinata qhelqarqa: “Qhasillamanta pipis kʼamiwajtinchej tukuypis llakikunchej, ¿icharí? Taganrog llajtamanta hermanospis may llakisqa kashanku, Tantakuna Wasinkuta qhasillamanta qhechusqankurayku. Chaywanpis, may karupi tiyakoj hermanos paykunamanta llakikusqankuta yachaspa mayta kusikonqanku. Ajina kʼachas, munakuyniyojtaj kasqaykichejmanta mayta agradecekuykichej”, nispa (Sal. 8:2).

Arí, Jallpʼantinmanta hermanos uj familia jinalla kanchej, purajmanta munanakusqanchejtaj llakiykunata atipanapaj yanapawanchej. Jehovaj testigosnin wajkunata chejninachiymanta tumpasqa kajtinchejpis, wawasninchejqa maymanta kaspapis, ima layamanta kaspapis hermanosninkumanta llakikusqankuta rikuchinku. Ajinamanta Jesuspa nisqan cheqapuni kasqan sutʼi rikukun, pay nerqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35).