Iha Dezembru 2009, iha rai-Rúsia, Tribunál Aas Liu fó sai desizaun ida neʼebé lori rezultadu hanesan governu taka organizasaun Testemuña ba Jeová iha sidade Taganrog, hadau Reuniaun-Fatin, no fó sai katak ita-nia livru hamutuk 34 mak livru neʼebé iha hanorin fanátiku. Akontesimentu neʼe fó sai iha sítiu ofisiál husi Testemuña ba Jeová iha internét, no hatudu foto kona-ba Testemuña sira neʼebé hetan susar tanba desizaun neʼe, inklui mós labarik sira.

Liutiha fulan balu, Sentru Administrasaun husi Testemuña ba Jeová iha Rúsia simu kaixa ida ho karta husi família Testemuña ida iha Queensland, Austrália, neʼebé haree relatóriu kona-ba Tribunál iha Rúsia nia desizaun. Karta neʼe dehan: “Irmaun doben sira, fiar neʼebé ita-nia maluk sira iha Rúsia hatudu no susar neʼebé sira hasoru book duni ami-nia oan Cody no Larissa nia laran. Ami-nia oan hakerek karta balu no ami prepara prezente balu atu haruka ba maluk labarik sira iha sidade Taganrog, hodi fó-hatene deʼit ba sira katak iha rai dook mós iha labarik seluk neʼebé serbí Jeová ho laran-metin no hanoin sira. Ami-nia oan haruka sira-nia domin boot ba labarik sira-neʼe.”

Labarik sira iha Taganrog neʼebé simu prezente hakerek fali karta ho dezeñu oioin atu fó obrigadu ba família iha Austrália. Hodi haree oinsá mak liafuan “husi labarik sira-nia ibun” bele fó laran-manas ba maluk sira, irmaun ida iha sukursál Rúsia hakerek karta ba Cody no Larissa hodi dehan: “Karik imi bele hanoin kona-ba susar neʼebé labarik no ema boot sira hasoru hodi hetan kastigu maski sira la halo sala. Ita-nia irmaun-irmán sira iha Taganrog lakon Reuniaun-Fatin, no ida-neʼe halo sira triste tebes. Bainhira sira hatene katak maluk husi rai dook mós hanoin sira, ida-neʼe sei fó laran-manas ba sira. Obrigadu ba imi-nia domin no laran-luak!”—Sal 8:2.

Sin, ita parte husi família boot ida iha mundu tomak, no domin neʼebé ita hatudu ba malu ajuda ita hotu atu tahan hasoru susar oioin iha ita-nia moris. Maski ema iha tribunál duun Testemuña ba Jeová katak ita-nia livru sira halo ema odi malu, maibé ita-nia labarik sira hatudu katak sira hanoin sira-nia maluk neʼebé iha rai seluk no mós kultura la hanesan. Hodi halo nuneʼe, sira hatudu katak Jesus nia liafuan tuirmai mak loos: “Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.”—Joao 13:35.