«Le mejen paalaloʼ» ku líiʼskoʼob u yóol máak

Tu mesil diciembre tiʼ 2009, le Tribunal Supremo tiʼ Rusiaoʼ tu yaʼalaj unaj u xuʼulul u yantal le múuchʼulil yaan tu kaajil Taganrogoʼ (Rusia), ka kʼaʼalak u Najil Reino yéetel tu yaʼaleʼ 34 tiʼ le jóoʼsaʼaniloʼob ku beetik u j-jaajkunajoʼob Jéeobaoʼ jach ku píitmáan yéetel baʼax ku kaʼansik. Tiʼ Interneteʼ u j-jaajkunajoʼob Jéeobaeʼ tu yeʼesoʼob le baʼax jach maʼ maʼalob ku yúuchloʼ. Teʼeloʼ eʼesaʼab u foto sukuʼunoʼob yéetel mejen paalal ku máanskoʼob le talamilaʼ.

Ka máan wa jaypʼéel meseʼ, u Centro Administrativo u j-Jaajkunajoʼob Jéeoba yaan Rusiaeʼ tu kʼamaj junpʼéel carta yéetel jujunpʼéel baʼax tu túuxtaj junpʼéel familia j-Jaajkunajoʼob tu kaajil Queensland (Australia), letiʼobeʼ tu xokoʼob le baʼax aʼalaʼab teʼ Internetoʼ. Le cartaoʼ ku yaʼalik: «Sukuʼuneʼex: Cody yéetel Larissa, k-paalaleʼ, péeknaj u yóoloʼob ka tu yojéeltoʼob le fe yéetel le chúukaʼan óolal tu yeʼesaj le sukuʼunoʼob yaan Rusiaoʼ. Yaan jujunpʼéel baʼal tu tsʼíibtoʼob yéetel táan u túuxtikoʼob siibaloʼob utiaʼal le mejen paalal yaan Taganrogoʼ. Letiʼobeʼ u kʼáatoʼob ka u yojéeltoʼobeʼ tak tuláakʼ juntséel yóokʼol kaabeʼ yaan mejen paalal chúukaʼan u yóol u meyajtoʼob Jéeoba yéetel ku tuukuloʼob tu yoʼolaloʼob. Yéetel yaabilaj ku túuxtikoʼob saludos».

Ka tsʼoʼok u kʼamkoʼob le siibaloʼ, le mejen paalal yaan Taganrogoʼ tu túuxtoʼob cartaʼob yaan u mejen dibujoil utiaʼal u tsʼáaikoʼob u diosboʼotikil tiʼ le familia yaan Australiaoʼ. Tumen kiʼimak u yóol tu yoʼolal le baʼax tu beetaj «le mejen paalaloʼ», juntúul sukuʼun ku meyaj tu Betelil Rusiaeʼ tu tsʼíibtaj tiʼ Cody yéetel Larissa: «¿Máasaʼ kex chichnoʼon wa tsʼoʼok k-nojochtaleʼ, ken castigartaʼakoʼon yoʼolal junpʼéel baʼax maʼ k-beetmeʼ ku yaatal k-óol? Bey xan le sukuʼunoʼob yaan Taganrogoʼ jach yaat u yóoloʼob, tumen kex mix baʼal kʼaas u beetmoʼobeʼ luʼsaʼabtiʼob u Najil Reino. Baʼaleʼ jach yaan u kiʼimaktal u yóoloʼob ken u yojéeltoʼob yaan sukuʼunoʼob ku tuukuloʼob tu yoʼolaloʼob tuláakʼ juntséel le yóokʼol kaabaʼ. ¡Jach diosboʼotik tu yoʼolal a wutsileʼex!» (Sal. 8:2).

U jaajileʼ tiaʼanoʼon ichil le yaʼab sukuʼunoʼob yaan tuláakal yóokʼol kaaboʼ, yéetel le yaabilajoʼ ku yáantkoʼon k-aktáant le talamiloʼoboʼ. Le táan u yilik le tribunaloʼob wa ku beetik u pʼektikuba máak le jóoʼsaʼaniloʼoboʼ, le mejen paalaloʼ kex jeʼel tuʼuxak u taaloʼobeʼ ku yeʼeskoʼob ku tuukuloʼob tu yoʼolal u sukuʼunoʼob yéetel ku yeʼeskoʼob jaaj le baʼax tu yaʼalaj Jesusaʼ: «Wa ka yaabiltikabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaanbaleʼex» (Juan 13:35).

[Foto yaan teʼ táan juʼun 32]

Le mejen paalal yaan Rusia (x-tsʼíik) tu kʼamoʼob le siibaloʼob tu túuxtaj le mejen paalal yaan Australiaoʼ (x-noʼoj)