• AFE A WƆWOO NO: 1963

• ƆMAN A OFI MU: BRITAIN

• DZA NNA ƆYƐ: NNA ƆYƐ EDWUMA KƐSE BI

ME NKAN ABRABƆ:

Wɔwoo me wɔ Croydon, South London. Nna yɛyɛ mbofra baakron, emi na me tsĩa esia. Beebi a m’awofo fi ankasa nye St. Vincent a ɔwɔ Caribbean supɔw do no. Nna me maame kɔ Methodist. Ɔwɔ mu dɛ mepɛ adzesua paa, naaso nna m’enyi nngye ho dɛ mubosũa Nyankopɔn ho adze. Nna nsutaae bi wɔ beebi a yɛtse no. Yɛma kwan a, nna ɔyɛ a mekɛtsena hɔ kenkan nwoma ahorow a makɛgye efi nwomakorabea.

Muwiee skuul mfe bi ekyir no, mubohun dɛ nna mepɛ dɛ moboa nyimpa a wɔyɛ mbɔbɔr. Menye ndwumakuw bi yɛɛ edwuma. Nna wɔboa hɔn a wonnyi beebi tse, hɔn a woedzi dzɛm na ɔyɛ dzen ma hɔn dɛ wobosũa adze. Afei, mokɔr skuulpɔn kosũaa apɔwmudzen ho adze. Muwiei no, minyaa dzibew akɛse pii, na midzii yie wɔ asetsena mu. Nna meyɛ mankasa m’edwuma. Nna nkorɔfo taa bɛfa me ma meyɛ edwuma ma hɔn. Ntsi, nna dza mihia ara nye kɔmpiwta nye intanɛt. Nna metaa tu kwan kɔ amanandze kedzi mber kakra. Nna mowɔ hotel ahorow bi a mepɛ hɔ tsena. Nna hɔ yɛ fɛ paa, na beebi so wɔ hɔ a wobotum atwetwe wo na atsentsen w’apɔw mu. Nna biribiara nnhia me wɔ asetsena mu. Ne nyina mu so, mo werɛ emmfir hɔn a wonnyi bi no.

MBRƐ BIBLE NO SESAA M’ABRABƆ:

Adze kor a nna modwen ho mfe pii nye dɛ, ‘Ebɛnadze ntsi na yɛwɔ wiadze, na yɛbɛyɛɛ dɛn wɔ ha?’ Naaso, mannyɛ m’adwen da dɛ mobɔhwehwɛ mbuae no efi Bible mu. Nna m’akyerɛbaa kakraba a wɔfrɛ no Margaret abɛyɛ Jehovah Dasefo. Da kor bi, ɔnye n’anyɛnkofo a hɔn so wɔyɛ Adasefo bɛseraa me. Nna ɔyɛ afe 1999. Wɔtseew hɔn enyim maa me nye me bɔɔ nkɔmbɔ. Mepeen do dɛ m’akyerɛbaa no ne nyɛnko no nye me nsũa adze. Naaso, mennya nkɔenyim ntsɛm. Siantsir nye dɛ, nna m’edwuma nye m’asetsena gye me ber pii.

Afe 2002 ɔhyew ber mu no, mutui kɛtsenaa England anee afamu. Mokɔr skuulpɔn bi wɔ hɔ dɛ morokosũa adze enya abɔdzin kɛse wɔ nyimpa asetsena mu nsɛm mu. Mehyɛɛ ase nye me babanyin kɔr asafo nhyiamu wɔ Ahendzi Asa do daa. Nna m’enyi gye nwomasua a ɔkɔ ekyir ho. Naaso, nna Bible a murusũa no ma muhu dza ɔma nyimpa hu amandze nye dza obeyi nyimpa amandzehu efi hɔ. Muhun dɛ asɛm a ɔwɔ Matthew 6:​24 no yɛ nokwar. Hɔ kã dɛ yerunntum nnsom ewuranom beenu, Nyankopɔn anaa ahonyadze. Muhun dɛ ɔwɔ dɛ muhu dza me dze bedzi kan wɔ m’asetsena mu.

Afe 2001 mu no, nna Jehovah Adasefo bi hyia mu wɔ obi ne fie sũa buukuu a wɔato dzin Is There a Creator Who Cares About You? *. Nna metaa kɔ bi. Mebɛgyee dzii dɛ Jehovah nye Ɔbɔadze no, na nankotsee na obotum eyi adasamba haw efi hɔ. Naaso, skuulpɔn a mokɔ no, nna wɔkyerɛkyerɛ hɛn dɛ onnhia dɛ yɛgye Ɔbɔadze bi dzi ana yeenya enyigye wɔ asetsena mu. Ɔhyɛɛ me ebufuw papaapa. Ntsi, abosoom ebien ekyir no, mifii skuulpɔn no mu, na misii m’adwen pi dɛ medze me ber pii bɔsom Nyankopɔn.

Bible mu asɛm a ɔwɔ Mbɛbusɛm 3:​5, 6 boaa me ma meyɛɛ nsesa wɔ m’asetsena mu. Hɔ kã dɛ: “Fa wo werɛ nyina hyɛ Ewuradze mu, na mma nntwer wankasa wo ntseasee. W’akwan nyinara mu ka no to mu, na ɔno na ɔbɛkyerɛ wo w’akwan.” Ber a musũaa ɔdɔ Nyankopɔn ho adze pii no, muhun dɛ mfaso wɔ do kyɛn ahonyadze nye abɔdzin biara a skuulpɔn bɛma menya no. Musũaa siantsir a Jehovah bɔɔ asaase nye mbrɛ Jesus dze noho bɔɔ afɔr maa hɛn no ho adze pii. Iyi maa moho peer me dɛ mibehyira moho do ama Ɔbɔadze no. Wonumaa me wɔ April 2003. Ofi dɛm aber no rokɔ no, memaa m’asetsena baa famu.

MBRƐ MENYA DO MFASO:

Murunntum mmfa biribiara nntoto ebusuabɔ a menye Jehovah wɔ no ho. Dɛm ebusuabɔ yi ama menya asomdwee na enyigye mapa. Afei so, Nyankopɔn no nokwar asomfo a menye hɔn bɔ no ama menya enyigye pii.

Dza mesũa efi Bible mu nye Christianfo nhyiamu ase no ama matse ndzɛmba pii ase. M’enyi gye dɛ mebɛkã me gyedzi ho asɛm akyerɛ nkorɔfo. Seseiara m’edwuma nye no. Edwuma a ɔma mutum boa afofor ma wonya asetsena pa ndɛ, na afei so wonya enyidado dɛ wobenya nkwa wɔ wiadze fofor no mu. Ofitsi June 2008, mabɛyɛ ber nyina somfo a medze ndɔnhwer pii kã asɛmpa no kyerɛ afofor. Enyigye na akomatɔyamu a mowɔ no, ɔkyɛn ber biara a abɛsen kɔ. Menya asetsena pa, na meda Jehovah ase papaapa wɔ ho.

• AFE A WƆWOO NO: 1973

• ƆMAN A OFI MU: AUSTRIA

• DZA NNA ƆYƐ: NNA ƆTOW KYAKYA

ME NKAN ABRABƆ:

Wɔtsetsee me wɔ Austria kurow ketseaba bi a wɔfrɛ no Braunau mu. Nna esikafo na wɔtse hɔ, na ewudzisɛm so nndɔɔ sõ wɔ hɔ. Nna m’awofo yɛ Catholicfo na wɔtsetsee me wɔ mu.

Asɛm bi sii wɔ mo mbofraber mu, na ɔkaa me papaapa. Afe 1984 mu, ber a nna medzi mfe 11 no, nna menye obi a mepɛ n’asɛm paa robɔ bɔɔl. Dɛm da noara ewiaber na kaar bɔɔ no kum no. Me nyɛnko no wu no kaa me papaapa. Akwanhyia no ekyir mfe pii no, mibisaa moho dɛ, sɛ yewu a, henfa na yɛkɔ?

Muwiee skuul no, meyɛɛ enyinam nkandzea ho edwuma. Nna meyɛ obi a mepɛ kyakyatow paa, ntsi nna medze sika pii hyɛ mu. Naaso, nna moho nnkyer me wɔ sikasɛm mu. Iyi da nkyɛn a, nna mesɛɛ ber pii wɔ agodzi ho. M’enyi bɛgyee ndwom a n’ano yɛ dzen so ho. Nna dza minyim ara nye disko na aponto. Nna enyigyedze na ɔbrakyew nko ara na mowɔ mu. Iyi nyina ekyir no, nna wiadze nnyɛ me dɛw.

MBRƐ BIBLE NO SESAA M’ABRABƆ:

Afe 1995 no, Ɔdasefo bi a ne mfe akɔ enyim bɔbɔɔ m’abow mu na ɔdze buukuu bi kyerɛɛ me. Nna buukuu no ka mbuae a Bible no dze ma wɔ asɛmbisa yi ho: Sɛ nyimpa wu a, henfa na ɔkɔ? Nna me nyɛnko no wu no da ho ara haw me, ntsi megyee buukuu no. Ɔnnyɛ ɔfã a ɔkã ewufo ho asɛm nko na mekenkanee, mbom mekenkaan buukuu no nyinara!

Dza mekenkanee no maa minyaa owu ho nsɛm a nna mibisa no ho mbuae. Musũaa ndzɛmba pii so kaa ho. Wɔtsetsee me wɔ Catholic som mu, ntsi nna Jesus na megye no dzi paa. Naaso, Bible no a musũaa no yie no boaa me ma menye Jesus ne papa Jehovah Nyankopɔn benyaa ebusuabɔ a no mu yɛ dzen. Mubohun dɛ Jehovah mmfa noho nsɛm nnsuma nyimpa. Mbom, ɔma hɔn a wɔhwehwɛ n’ekyir kwan no nyinara hu no. (Matthew 7:​7-​11) Muhun dɛ Jehovah wɔ atsenka. Afei so, muhun dɛ odzi n’anohoba do aber nyina. Iyi maa m’enyi bɛgyee Bible nkɔnhyɛ ho paa, na mohwehwɛɛ mbrɛ osi ba mu no ho nsɛm pii kɔr ekyir. Dza musũa no hyɛɛ me gyedzi dzen papaapa.

Annkyɛr na muhun dɛ Jehovah Adasefo nkotsee nye nkorɔfo a hɔn enyi gye ho paa dɛ wɔbɔboa afofor ma wɔaatse Bible no ase. Mohwɛɛ kyerɛwnsɛm a ɔwɔ Jehovah Adasefo nwoma ahorow no mu, na mekenkaan ne nyina wɔ me Catholic Bible mu. Ber a mohwehwɛɛ mu kɔr ekyir no, mubohun dɛ dza murusũa no nye nokwar no.

Bible a musũae no maa muhun dɛ Jehovah hwehwɛ dɛ medze n’Asɛm bɔ me bra. Dza mekenkanee wɔ Ephesusfo 4:​22-​24 maa muhun dɛ, ɔwɔ dɛ mesesa mo suban na mehyɛ “nyimpa fofor no a wɔbɔɔ no Nyame do wɔ tsenenee nye ahotsew mu no.” Dɛm ntsi, migyaa ɔbra bɔn a nna mobɔ no. Afei so, mubohun dɛ ɔwɔ dɛ migyaa kyakyatow, osiandɛ nna ɔhyɛ ahonya mbordo nye enyiber ho nkuran. (1 Corinthfo 6:​9, 10) Muhun dɛ, sɛ mubotum ayɛ nsakyer a ɔtse dɛm a, ɔwɔ dɛ motwe moho fi m’anyɛnkofo adadaw no ho, na mohwehwɛ anyɛnkofo afofor a wɔpɛ dɛ wɔdze Nyankopɔn n’Asɛm bɔ hɔn bra.

Dɛm nsakyer yi annyɛ mberɛw amma me koraa. Naaso, mehyɛɛ ase kɔr asafo nhyiamu wɔ Jehovah Adasefo Ahendzi Asa do na minyaa anyɛnkofo afofor wɔ asafo no mu. Afei so, mankasa megyee ber kɔr do sũaa Bible no. Iyi maa migyaa ndwom a nna mitsie no, na mesesaa botae a nna osi m’enyi do no. Bio so, mehyɛɛ ase siesiee moho yie. Afe 1995 mu no, wonumaa me ma mebɛyɛɛ Jehovah Adasefo no mu kor.

MBRƐ MENYA DO MFASO:

Sesei, menya adwen a ɔtsen wɔ sika nye ahonyadze ho. Mber bi a abɛsen kɔ no, nna meyɛ obi a mo bo fuw ntsɛntsɛm. Naaso, sesei dze, mowɔ abotar papaapa. Afei so, dza obesi daakye no nngye me adwendwen bio.

Ɔyɛ me dɛw paa dɛ meka enuanom a wofi aman ahorow mu a wɔrosom Jehovah no ho. Sɛ mohwɛ mu a, obiara wɔ ne haw, naaso wɔda ho ara dze nokwardzi rosom Nyankopɔn. Ɔyɛ me dɛw papaapa ma dɛm ntsi, medze me ber nye m’ahoɔdzen nyina rosom Jehovah. Afei so, medze bi reyɛ nkorɔfo papa kyɛn dɛ medze bɛyɛ dza mara mepɛ.

• AFE A WƆWOO NO: 1963

• ƆMAN A OFI MU: ENGLAND

• DZA NNA ƆYƐ: NNA ONNHU ABRABƆ ENYI DO

ME NKAN ABRABƆ:

Wɔwoo me wɔ England. Naaso, ber a midzii mfe esuon no, yetui kɛtsenaa Australia. Beebi a yɛkɛtsenae wɔ Queensland, Australia no, nna wɔfrɛ hɔ Gold Coast. Ɔyɛ beebi a ahɔho taa ba hɔ nserahwɛ. Nna yennyi sika pii dze, naaso nna biribiara nnhia hɛn.

Mennhu ohia dze, naaso nna minnyi enyigye ankasa. Nna munnhu ɔbra n’enyi do koraa. Nna me papa we nsã dɛ biribi. Ne nsanom nye adze a nna ɔdze yɛ me maame ntsi, nna memmpɛ n’asɛm koraa. Ekyir yi mubohun dɛ, aber a nna ɔyɛ sogyanyi wɔ Malaya no, tsebea a ɔfaa mu no ntsi na ɔma ɔyɛ n’adze dɛm no. Iyi maa metsee no ase kakra.

Ber a nna mokɔ ntoado skuul no, mehyɛɛ ase wee nsã. Midzii mfe 16 no, migyaa skuul, na medze moho kɔdɔɔm po do nsordaafo kuw. Mehyɛɛ ase noom ndubɔn na motɔɔ mu ntentan. Afei so, odur beebi no, mebɛyɛɛ nsahweam. Ekyir yi dze, nna nsã abɛyɛ m’edziban.

Midzii bɛyɛ mfe 20 no, mibenyaa adwen dɛ Nyankopɔn nnyi hɔ. Mibisaa moho dɛ, ‘Sɛ Nyankopɔn wɔ hɔ ankasa a, ebɛnadze ntsi na ɔma kwan ma nyimpa hũ amandze na wowuwu?’ Mekyerɛɛw anwensɛm mpo dze kyerɛɛ dɛ ndzebɔnyɛ a ɔrokɔ do wɔ wiadze no, ne nyina fi Nyankopɔn.

Midzii mfe 23 no, migyaa sogya edwuma no. Iyi ekyir no, meyɛɛ ndwuma pii na mutuu kwan mpo kɔr amanandze kedzii afe. Naaso, iyi mu biara amma m’enyi aanngye. Nna biribiara mpo nnka me dɛ memfa botae bi nsi m’enyi do. Nna m’enyi nngye biribiara ho. Nna onnhia me dɛ mibenya mankasa me dan, edwuma pa anaa dzibew wɔ edwuma mu. Sɛ minya nsã nom na minya ndwom tsie a, nna monndwen hwee bio.

Mber bi mu, ɔbaa m’adwen mu paa dɛ mepɛ dɛ muhu siantsir a yɛbaa wiadze. Dɛm aber no, nna mowɔ Poland a makɔ nserahwɛ wɔ ndaduadan a ɔwɔ Auschwitz no. Mekenkaan etsirmɔdzensɛm a ɔkɔr do wɔ hɔ no ho nsɛm. Ber a mukodur hɔ na muhun mbrɛ ndaduadan no sõ no, mo werɛ hoow papaapa. Manntse ase dɛ nyimpa tum yɛ ne nyɛnko nyimpa ayakayakadze dɛm. Aber a menenam ndaduadan no mu nyina no nna murusu, na mibisaa moho dɛ, ‘Ebɛnadze ntsi a?’

MBRƐ BIBLE NO SESAA M’ABRABƆ:

Wɔ 1993 mu no, mifi amanandze bae na mehyɛɛ ase kenkaan Bible no dze hwehwɛɛ me nsɛmbisa ho mbuae. Annkyɛr biara na Jehovah Adasefo beenu bi bɔbɔɔ m’abow mu. Wɔtoo nsa frɛɛ me dɛ membra ehyiadzi a wɔbɛyɛ wɔ agodzibea bi a ɔbɛn beebi a metse no. Medze ɔse yɛɛ ɔyɛ.

Nna mokɔr agodzibea hɔ nnkyɛr pii, naaso dza muhunii wɔ ehyiadzi no ase no yɛ soronko koraa. Muhun dɛ Adasefo no bu adze, wosiesie hɔnho kama, na hɔn mba so nnyɛ basabasa. Na odur ewiaber ahomgye ber no, dza muhunii no yɛɛ me nwanwa papa. Adasefo beberee tsenaa agoprama no do dzidzii. Naaso, wofii hɔ kɛtsenaa ase no, mennhu nwura kortsee mpo wɔ agoprama no do! Dza ɔkyɛn ne nyina no, muhun dɛ Adasefo no wɔ akomatɔyamu na enyigye mapa. Iyi nye adze a nna morohwehwɛ. Ɔkasa ahorow a wɔmae dɛm da no, mennkaa no mu kor mpo. Naaso, suban a Adasefo no daa no edzi no kaa m’akoma papaapa.

Dɛm da no ewimbir no, mekaa mo nuabanyin bi a nna ɔkenkan Bible no na osũa ɔsom pii ho adze. Mfe bi a nna abɛsen kɔ no, ɔkãa kyerɛɛ me dɛ Jesus se dza yɛdze bohu nokwar asomfo nye hɔn aba. (Matthew 7:​15-​20) Meyɛe dɛ mobɔhwehwɛ dza ɔma Adasefo no yɛ soronko dɛm no ho. Dɛm ber no nye ber a odzi kan wɔ m’asetsena mu a minyaa awerɛhyɛmu nye enyidado kakra.

Dapɛn a odzi hɔ no, Adasefo beenu no a wɔtoo nsa frɛɛ me no sanee bɛseraa me. Wɔkãa dɛ wɔpɛ dɛ wɔnye me sũa Bible no, na megyee too mu. Afei so, mehyɛɛ ase nye hɔn kɔr Christianfo nhyiamu.

Ber a mugu do rusũa Bible no, Nyankopɔn ho adwen a mowɔ no sesae koraa. Mubohun dɛ ɔnnyɛ ɔno na ɔdze bɔn na amandzehu ba. Afei so, sɛ nyimpa yɛ ndzɛmba bɔn a, odzi yaw. (Genesis 6:6; Ndwom 78:40, 41) Misii mo bo dɛ merennyɛ biribiara a ɔbɛma Jehovah edzi yaw. Nna mepɛ dɛ meyɛ dza ɔbɛma n’akoma atɔ ne yamu. (Mbɛbusɛm 27:11) Megyaa nsanom beberebe nye sigarɛt nom, na mammbɔ bra bɔn bio. March 1994 mu no, wonumaa me ma mebɛyɛɛ Jehovah Adasefo no mu kor.

MBRƐ MENYA DO MFASO:

Menya enyigye na akomatɔyamu mapa. Monnom nsã mmfa nndzi me haw ho dwuma bio. Mbom, mehu dɛ ɔwɔ dɛ motow me dadwen nyina kyen Jehovah do.​—Ndwom 55:22.

Mfe du nye yi a mowaree Ɔdasefo baa bi a a wɔfrɛ no Karen; noho yɛ fɛw papa. Menye no wɔ abanoma kamakama bi a wɔfrɛ no Nella. Hɛn baasa no nyina fi enyigye mu dze hɛn ber pii yɛ ɔsom edwuma no. Yɛboa nkorɔfo ma wosũa Nyankopɔn ho nokwasɛm. Afei dze, menya enyigye mapa wɔ m’asetsena mu.