• MATAITI ANAU: 1963

• ENUA ANAU: PERITANE

• ORAANGA: TURANGA NGATEITEI TANA ANGAANGA

TOKU ORAANGA I MUA ANA:

Anauia au i Croydon, South London, e toko iva tamariki matou e ko au te ono. Kua anauia toku nga metua i te enua Caribbean ko St. Vincent. Kua aere a mama ki te pure akonoanga Porotetani. Kare oku inangaro kia apii no runga i te Atua inara e āka inangaro toku kia rauka mai te kite. Me orote te apii, ka pou ua toku taime i te pae i te vai roto te tatau i taku au puka mei ko i te runanga puka.

I tetai au mataiti i muri ake i te akaruke anga au i te apii, kua kite mai au e kua inangaro au i te tauturu i te aronga tei ngere. Kua akamata au i te tauturu i te aronga kare o ratou kainga e te aronga pakipakitai. E oti, kua aere au ki te apii teitei no te apii i te au ravenga rapakauanga. Te rauka mai anga taku pepa apii teitei, kua kite mai au i te au turanga ngateitei i te angaanga, e maata taku moni i rauka mai e e meitaki atu toku oraanga. Kua angaanga au naku uaorai ei vaine tauturu e te kimi ravenga no te au pitiniti. E laptop ua e te Initaneti taku e anoano ra no te angaanga. Ka teretere au ki te au enua ke no tetai nga epetoma. Ka noo au i roto i te au otera manea e ka taangaanga au i ta ratou spa e te ngai akaetaeta uaua. Manako au e ko teia tikai te oraanga. Inara kare au i ngaropoina ana i toku inangaro i te tauturu i te aronga tei ngere.

KUA TAUI TE PIPIRIA I TOKU ORAANGA:

Kua roa toku manako anga, ‘Eaa to tatou akakoroanga i konei, e eaa te akakoroanga o te oraanga?’ Inara kare rava au i kimi ana i te pauanga mei roto i te Pipiria. Tetai rā i te 1999, kua atoro mai toku teina ko Margaret tei riro mai ei Kite no Iehova e tona oa Kite iaku. Kua akaari teia Kite i te tu oaoa kiaku. Umere au kua akatika au kia apii te oa o toku teina i te Pipiria kiaku. Inara, kare au i puapinga ana mei taku apii no te mea ka pou ua toku taime ki taku angaanga e toku oraanga.

I te 2002, kua neke au ki te tua tonga opunga o Peritane. I reira, kua aere akaou au ki te apii teitei kia rauka mai tetai pepa teitei rava atu. Kua akamata maua ko taku tamaiti meangiti i te aere putuputu ki te Are Uipaanga Patireia. Noatu e mataora ana au i te apii teitei, na toku apii Pipiria i oronga mai i te mārama no te au manamanata o te oraanga e te ravenga no te akatikatika i te reira. Kua mārama au i te tika o te tuatua i roto ia Mataio 6:​24, te karanga ra kare e tika i tetai tangata i te akono i nga pu e toko rua. Kare e tika i te akono i te Atua e te apinganui. Kite mai au e ka anoanoia au kia iki eaa te mea puapinga i roto i toku oraanga.

I te mataiti i mua atu ana, kua aere putuputu au ki tetai pupu apii Pipiria i ko i te ngutuare o tetai Kite e kua apii matou i te puka Is There a Creator Who Cares About You? * Mei teia apii, kua papu iaku e ko Tei Anga mai ia tatou ko Iehova anake te ka rauka i te akatikatika i te au manamanata o te tangata. Inara i ko i te apii teitei, kua apiiia au e e mea tupu ua te oraanga; kare i te mea angaia. Riri tikai au i teia apiianga. E rua marama i muri mai, kua akaruke au i te apii teitei e kua akapou maata atu i toku taime no te akavaitata atu ki te Atua.

Te irava tei akakeu iaku kia taui i toku oraanga, ko Maseli 3:5, 6: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” E puapinga roa atu te apii anga no runga i to tatou Atua aroa i tetai ua atu apinganui e te turanga ngateitei te ka rauka mai no te pepa apii teitei. Te maata atu taku i apii no runga i to Iehova akakoroanga no te enua e ta Iesu tuanga i te akaatinga i tona oraanga no tatou, te maata atu toku inangaro kia akatapu i toku oraanga ki Tei Anga mai ia tatou. Kua papetitoia au ia Aperira 2003. E i muri mai, kua akamāmā au i toku oraanga.

KUA PUAPINGAIA AU:

Mea akaperepere tikai kiaku toku pirianga oa kia Iehova. E ngakau ‘au toku e te rekareka no te mea kua kite au iaia. Pera katoa, mataora tikai au i te kapiti atu ki te aronga akamori i te Atua mou.

Kua pangia toku kaki kia rauka mai te kite mei taku i apii i roto i te Pipiria e i ko i te au uipaanga Kerititiano. E reka ana au i te tutu aere ki tetai ke. Ko teia taku angaanga ou, e ka tauturu tikai au i te tangata kia rauka mai te oraanga meitaki i teianei e te manakonakoanga manea no te oraanga i roto i te ao ou. Mei ia Tiunu 2008, kua rave au i te angaanga tutu aere tamou e kare e aite toku mataora e te merengo i teianei. Kua kite mai au i te akakoroanga tikai o te oraanga, e te akameitaki nei au ia Iehova.

• MATAITI ANAU: 1973

• ENUA ANAU: AUSTRIA

• ORAANGA: TANGATA PERE MONI

TOKU ORAANGA I MUA ANA:

Kua utuutuia au i tetai oire meangiti i Austria ko Braunau. E oire apinganui te reira e kare e maata ana te rave kino i reira. E aronga Katorika toku ngutuare tangata e kua utuutuia au i roto i te reira akonoanga.

Kua riro tetai tupuanga i toku tamarikianga ei taui i toku oraanga. I te 1984, e 11 oku mataiti, maara iaku te kangakanga tueporo tarape ra maua ko toku oa piri vaitata. I taua aiai rai, kua ū aia e te motoka e kua mate. Maromaroa tikai au i te mate anga toku oa. No tetai tuatau roa i muri ake i te reira, kua ui au eaa te tupu ana me mate tatou.

Te akaruke anga au i te apii, kua angaanga au ei tangata no te uira. Noatu kua putuputu au i te pere moni e e maata te moni taku ka akapou, kare oku manamanata i te pae moni. Kua akapou katoa au i te taime i roto i te angaanga tipoti e kua akariro i te imene turituri e te imene kino ei mea reka naku. E reka ana au i te aere ki te au ngai ura e te tamataora. E oraanga kimi navenave e te tau kore toku, inara e puapinga kore ua te reira.

KUA TAUI TE PIPIRIA I TOKU ORAANGA:

I te 1995, kua topapa tetai Kite pakarikari i toku ngutupa e kua oronga mai i tetai puka tei uriuri i te pauanga a te Pipiria ki te uianga, Eaa te ka tupu me mate tatou? Kua maromaroa rai au no te mate anga poitirere o toku oa, no reira kua rave au i te puka. Kua tatau au i te pene no runga i te mate e te katoaanga o te puka!

Kua pauia taku au uianga no runga i te mate. Inara e maata atu taku i apii mai. No te mea kua utuutuia au i roto i te akonoanga Katorika, kua akatumuia toku akarongo ki runga ia Iesu. Inara, na roto i toku apii Pipiria, kua rauka iaku i te akatupu i tetai pirianga vaitata ki te Metua o Iesu, te Atua ko Iehova. Kua umere tikai au i te apii e te inangaro maira a Iehova ia tatou e te akamaroiroi ra aia ia tatou kia kite iaia. (Mataio 7:​7-​11) Kua apii au e ka rekareka me kore ka taitaia a Iehova i ta tatou e rave ra. Apii katoa mai au e ka akatupu ua rai aia i tana i tuatua. No reira kua inangaro tikai au i te kite oonu i te au totou Pipiria e kia apii akapeea te reira i te akatupuia anga. Kua riro te reira ei akamatutu i toku akarongo i te Atua.

Kare i roa i muri mai, kua kite mai au e ko te Au Kite o Iehova anake te aronga tei tauturu i te tangata kia mārama i te Pipiria. Kua tata au i te au irava tei taikuia i roto i te au puka a te Au Kite e kua tatau i te reira i roto i taku Pipiria Katorika. Te maata atu i taku kimikimianga, kua papu roa iaku e kua kite au i te tuatua mou.

Na roto i taku apii Pipiria, kua kite mai au e ka inangaro a Iehova iaku kia akono i tana au akauenga. Kua tatau au i roto ia Ephesia 4:​22-​24 e ka anoanoia au kia kopae i “te tangata taito,” e “kia akatangata ou oki ko tei angaia kia tau i te Atua ra.” No reira kua akamutu au i te au peu tau kore. Pera katoa, kua kite mai au e ka anoanoia au kia akamutu i te pere moni no te mea te akamaroiroi ra te reira i te tu noinoi e te akaputu maata i te apinga. (1 Korinetia 6:​9, 10) Kua kite au e kia rave i teia au tauianga, ka akamutu au i te kapiti atu ki toku au oa taito e te kimi i te au oa ou te ka akamaroiroi mai iaku kia rave i te mea tika.

Kare i te mea māmā kia rave i teia au tauianga. Inara kua akamata au i te aere ki te au uipaanga a te Au Kite i ko i te Are Uipaanga Patireia, e kua rauka mai te au oa ou i roto i te putuputuanga. Pera katoa, kua rave au i taku uaorai apii i te Pipiria. Na teia i tauturu iaku kia taui i te au imene taku e akarongorongo ra, kia akanoo i tetai au akakoroanga ou e kia akatanotano i toku akamanea anga. I te 1995, kua papetitoia au ei Kite no Iehova.

KUA PUAPINGAIA AU:

Teianei, e manako tau toku no te moni e te apinga. I mua ana, e tangata riririri au inara i teianei e tu maru toku. Kare katoa au e apiapi maata i te tuatau ki mua.

E reka ana au i te riro mai ei tuanga no tetai pupu tangata i te ao katoa tei tavini ia Iehova. I roto ia ratou, e kite ana au i te aronga e manamanata to ratou, noatu ra, te tavini tiratiratu nei rai i te Atua. Mataora tikai au i teianei no te mea ka akapou au i te katoaanga o toku taime e te maroiroi kia akamori ia Iehova e kia rave i te meitaki no te tangata.

• MATAITI ANAU: 1963

• ENUA ANAU: PERITANE

• ORAANGA: KARE E AKAKOROANGA I ROTO I TE ORAANGA

TOKU ORAANGA I MUA ANA:

Anauia au i Peritane, inara e itu oku mataiti, kua neke toku ngutuare tangata ki Autireria. Kua noo matou i tetai ngai turoto i te Gold Coast i Queensland, Autireria. Noatu kare e maata ana te moni a toku ngutuare, kare matou i ngere ana.

Noatu kua utuutuia au i roto i tetai ngutuare meitaki, kare au i mataora ana. Kare oku akakoroanga i roto i te oraanga. E tangata kai kava toku papa. Kare oku aroa nona no tona inu kava e tona tu takinokino i toku mama. I muri roa mai i kite mai au eaa tei tupu kiaia i tona tuatau ei vaeau i Malaya, i reira au i mārama ai i te tumu i akapera ai aia.

Kua akamata au i te inu maata i te kava iaku i te apii tua rua. E 16 oku mataiti, kua akaruke au i te apii e kua rave i te angaanga vaeau i runga i te au paī tamaki. Kua akamata au i te kai apinga akakona e kua mātau ua i te kai avaava. Kua riro katoa te inu kava e mea inangaro tikai naku. I te akamataanga, kua inu maata au i te openga epetoma inara i muri mai kua inu maata au i te au rā katoatoa.

Muri mai, kua akamata au i te ui me e Atua rai tetai. Manako mai au, ‘Me e Atua tetai, eaa aia i akatika ai i te tangata kia mamae e kia mate?’ No reira kua tata au i te au peʼe ei akaapa i te Atua no te au kino e tupu ra i teianei ao.

E 23 oku mataiti, kua akaruke au i te angaanga vaeau. E tukeke toku au ngai angaanga e kua tere au ki tetai enua ke no tetai mataiti, inara kua vai maromaroa ua au. Kare oku inangaro i te akanoo i tetai au akakoroanga noku e te rave i tetai ua atu angaanga. Kia rauka mai toku uaorai are, tetai ngai angaanga meitaki e te tutaki maata, e puapinga kore ua te reira au mea kiaku. Ko toku uaorai “akapumaana,” ko te inu kava e te akarongo ki te imene.

Maara iaku te taime i pakari tikai ei toku inangaro kia kite i te akakoroanga o te oraanga. I tera atianga, tei Poland au te turoto ra i te puakapa tamamaeanga i Auschwitz. I tatau ana au i te au mea vinivini tei tupu i reira. Inara i taua taime, te tu ua ra au i reira e kua kite au i te maatamaata o te puakapa, kua tukia toku ngakau. Kare au e mārama i te tumu ka takinokino maata te tangata i tetai ke. Maara iaku te aere anga na roto i te puakapa ma te aue e te ui anga, ‘Eaa te tumu?’

KUA TAUI TE PIPIRIA I TOKU ORAANGA:

Toku oki anga mai mei te enua ke i te 1993, kua akamata au i te tatau i te Pipiria ei kimi i te au pauanga. Kare i roa, kua topapa tetai nga Kite o Iehova i toku ngutupa e kua pati iaku kia aere ki tetai uruoaanga i ko i te ngai tarekareka i te pae mai iaku. Kua iki au kia aere.

Kua aere ana au ki teia ngai tarekareka i nga marama i topa no te akarakara i te tarekareka tipoti. Inara e tuke tikai teia uruoaanga. E manea tikai te Au Kite, to ratou kakau e to ratou tu, e pera katoa ta ratou tamariki. Kua umere tikai au i taku i kite i te ora kaikai. E anere ua atu Au Kite tei kai manga i runga i te ngai tarekareka inara kia oki ratou ki to ratou nooanga, kare okotai tita taku i kite mai! E te mea oki, me akara au i teia au tangata, e tu mataora tikai to ratou e te ‘au ua​—ko taku i anoano tikai. Kare i maara iaku te au akoanga i tera rā, inara kua umere tikai au i te tu meitaki o te Au Kite.

I tera aiai, kua akamanako au i tetai o toku kopu tangata tei tatau i te Pipiria e tei apii i te au akonoanga tukeke. I te au mataiti i topa, kua akakite mai aia kiaku e kua karanga a Iesu e ka kite koe i te akonoanga mou i ta ratou e ua maira. (Mataio 7:​15-​20) Manako mai au kia kimikimi i te tumu i tuke ei te Au Kite. No te taime mua i roto i toku oraanga, kua manako papu au e kua rauka te manakonakoanga.

I tera mai epetoma, kua oki mai te nga Kite tei pati iaku ki te uruoaanga. Kua pati raua iaku kia apii i te Pipiria, e kua āriki au. Kua akamata katoa au i te aru ia raua ki te au uipaanga Kerititiano.

Iaku e apii ra i te Pipiria, kua taui takiri toku manako no runga i te Atua. Apii mai au e kare nana i akatupu i te au kino e te mamae e ka mamae katoa aia me rave te tangata i te au mea kino. (Genese 6:6; Salamo 78:40, 41) Kua tauta pakari au auraka kia rave i tetai ua atu mea te ka akatupu i te mamae kia Iehova. Inangaro au kia akarekareka i tona ngakau. (Maseli 27:11) Kua akamutu au i te inu maata i te kava e te kai avaava, e kua akamutu au i te rave i te ainga tau kore. Ia Mati 1994, kua papetitoia au ei Kite no Iehova.

KUA PUAPINGAIA AU:

Mataora tikai au i teianei. Kare au e inu kava akaou ei akatikatika i toku au manamanata. Mari ra, kua apii au kia tuku i taku apainga kia Iehova.​—Salamo 55:22.

I roto i te tai ngauru mataiti i topa, kua akaipoipo au i tetai Kite manea ko Karen, e te utuutu nei maua i tana tamaine meitaki ko Nella. E mataora ana matou toko toru i te akapou maata i te taime i roto i te angaanga tutu aere, e te tauturu i te tangata kia apii i te tuatua mou no runga i te Atua. Teianei, e akakoroanga toku.