1, 2. Timo miti pa Lubanga keliwa adwogi maber nining, dok gin ango ma wabipwonyo ki i lanen pa Kabaka Daudi?

 KET ni itye ka wot ka mo ma obedo godi godi ci yo opokke aryo ma pe ingeyo mene ma myero ikwany. Ngo ma ibitimo? Iromo ito i wi got mo acel wek inen ka ma yo magi gicito iye. Lapor man twero konyowa ka wamito moko tam ma pire tek. Ka waneno jami i kit ma Lacwec neno kwede, ci bikonyowa me ‘lubo yo’ ma Jehovah cwako.​—Ic. 30:21.

² Pi kare me kwone ducu, Kabaka Daudi oweko lanen maber me timo miti pa Lubanga. Kong wanenu jami mogo mutimme i kwo pa Daudi wek wanong pwony ki i kit ma en oketo kwede cwinye ducu i kom Lubanga Jehovah.​—1 Luker 11:4.

3, 4. (a) Ngo ma omiyo Daudi oye lweny ki Goliac? (b) Daudi onongo tero nying Lubanga nining?

³ Tam kong gin mutimme i nino ma Daudi omakke ki Goliac, oteka lweny me Piliciti. Ngo mumiyo Daudi oye lweny ki twon laco man ma borre kato futi 9 kulu dok tye ki jami lweny ducu-ni? (1 Cam. 17:4) Mono obedo tekcwiny pa Daudi? Tika obedo niyene i kom Lubanga? Kit aryo-ni ducu gubedo gin ma pigi tek. Ento, bedo ki woro i kom Jehovah ki pi nyinge omiyo tekcwiny bot Daudi me cito ka lweny ki twon oteka lweny man mabor-ri. Daudi openyo ma iye tye ka wang ni: “Lapiliciti ma pe ngeyo Lubanga-ni anga mono, ma myero obed ka taro Lubanga makwo-ni?”​—1 Cam. 17:26.

⁴ I kare ma tye ka romo ki Goliac, Daudi owaco ni: “In ibino bota ki pala lucwan ki tong ki tong  alwiro, ento an abino boti i nying Rwot [Jehovah] me mony, i nying Lubanga me mony pa jo Icrael ma ibedo ka tarone-ni.” (1 Cam. 17:45) Pien ojenge i kom Lubanga, Daudi oneko twon oteka lweny pa jo Piliciti ki lagweng lalingling acel keken. Pi kare me kwone ducu, Daudi ogeno Jehovah dok otero nyinge calo gin ma pire tek. Daudi ocuko cwiny jo Icrael luwote me ‘keto deyo i kom nying Jehovah.’​—Kwan 1 Tekwaro 16:8-10.

5. Gin ango ma itwero rwatte kwede ma kiromo porone ki lok anywar pa Goliac?

⁵ In tika itye ki awaka ni Jehovah obedo Lubangani? (Jer. 9:24) Ineno nining ka jiranini, luremi, lutino kwan luwoti, nyo wadini giloko marac i kom Jehovah dok ginywaro Lucadenne? Tika iloko ka kitye ka lok marac i kom nying Jehovah kun igeno ni en bikonyi? Obedo lok ada gire ni tye “kare me ling alinga,” ento pe myero wawek lewic omakwa me bedo Lucaden pa Jehovah ki lulub kor Yecu. (Latit. 3:1, 7; Mar. 8:38) Kadi bed ni omyero watii ki diro i tero jo ma pe gitye ki cwiny maber i komwa, omyero pe wabed calo jo Icrael ma “cwinygi oballe woko, gubedo ki lworo madwong twatwal” i kare ma guwinyo lwak lok anywar pa Goliac. (1 Cam. 17:11) Ma ka meno, omyero watimu gin ma weko nying Jehovah bedo leng. Mitiwa tye me konyo dano wek gunge ni Jehovah aye Lubanga kikome. Pi meno, watiyo ki Lokke me konyo dano me neno ni nyikke cok bot Lubanga pire tek.​—Yak. 4:8.

6. Ngo ma Daudi onongo mito ni ecobi i romone ki Goliac, dok ngo ma myero pire obed tek botwa?

⁶ Romo pa Daudi ki Goliac pwonyowa gin mukene ma pire tek. I kare ma Daudi obino ki ngwec ka ma lumony ogony iye, en openyo ni: “Gin ango ma gibitimo ka dano mo oneko Lapiliciti-ni, okwanyo kwede cac woko ki i Icrael?” Lwak gudok iye kit ma guwaco con ni: “Ka ngat mo oneko, kabaka bimiye doko lalonyo madit, dok bimine nyare bene obed dakone.” (1 Cam. 17:25-27) Ento miti madit pa Daudi onongo pe obedo nongo lonyo. Mitine onongo tye i kom gin madit kato meno. Daudi onongo mito keto deyo i kom Lubanga me ada. (Kwan 1 Camuel 17:46, 47.) Wan kono? Mitiwa madit mono tye ni nyingwa myero ongene pi bedo ki lonyo madwong ki yweka i lobo-ni? Wamito ni wabed calo Daudi ma owero ni: “Wuribbe kweda me pako dit pa Rwot [Jehovah], wek wapaku nyinge kacel!” (Jab. 34:3) Pi meno, waketu wunu genwa i kom Lubanga kun waketo nyinge bedo mukwongo ma ka megwa.​—Mat. 6:9.

7. Wan watwero dongo niye matek nining ka warwatte ki dano ma pe gimaro ticwa-ni?

⁷ Tekcwiny ma Daudi obedo kwede i kom Goliac-ci onongo mito keto gen ducu i kom Jehovah. Daudi onongo tye ki niye matek. Yo acel ma en odongo kwede niyene obedo jenge i kom Lubanga i kare ma en tye lakwat. (1 Cam. 17:34-37) Wan bene omyero wabed ki niye matek pi medde i ticwa me pwony-nyi, tutwalle ka warwatte ki jo ma pe gimaro ticwa man. Watwero dongo niye ma kit meno ka wajenge i kom Lubanga i ticwa me nino ducu. Me laporre, waromo cako lok i kom ada me Baibul bot ngat ma obedo ka ngetwa ka watye ka wot me cito ka mo. Dok bene omyero walok ki jo ma warwatte kwedgi i nget yo kadi bed watye ka tito kwena i ot ki ot.​—Tic. 20:20, 21.

8, 9. I kit ma en otero kwede Kabaka Caulo, Daudi onyuto nining ni timo miti pa Jehovah pire tek?

⁸ Yo mukene ma Daudi onyuto ni egeno Jehovah obedo i kit ma en otero kwede Caulo​—kabaka mukwongo me Icrael. Tyen kideg kulu Caulo ma lanyeko-ni otemo guro Daudi i kor ot ki tong, ento Daudi obedo ka weyone woko dok pe otemme me dwokone. I agikkine, en oringo woko ki bot Caulo. (1 Cam. 18:7-11; 19:10) I ngeye, Caulo okwanyo co 3,000 mucwiny ki i kin jo Icrael ci ocako yenyo Daudi i dye tim. (1 Cam. 24:2) Lacen, labongo ngeyone, Caulo odonyo i boro ma Daudi ki jone onongo gitye iye. Daudi onongo romo tic ki kare man me neko kabaka ma onongo mito neke-ni. Onongo bene dong ngene kene ni Lubanga tye ki miti me leyo kawang Caulo ki Daudi macalo kabaka me Icrael. (1 Cam. 16:1, 13) Ada, ka onongo Daudi owiny tam pa jone, onongo kono kineko kabaka woko. Ento Daudi owacci: “Lubanga okwero ni pe atim gin macalo man i kom rwoda ma en dano ma Rwot [Jehovah] owiro.” (Kwan 1 Camuel 24:4-7.) Caulo onongo pud tye kabaka ma Lubanga owiro. Daudi onongo pe mito mayo ker ki bot Caulo, kit macalo Jehovah onongo peya okwanyo Caulo-ni. Daudi onyuto ni onongo pe emito wano Caulo i kare ma en ongolo dog jor nyo bongo pa Caulo.​—1 Cam. 24:11.

⁹ Daudi dok onyuto woro i kom ngat ma Lubanga owiro i kare ma oneno kabaka tyen me agikkine. I kare meno, Daudi gin ki Abicai gucito ka ma Caulo onongo ogony iye ki lumonye ci gunongo en onino woko. Kadi bed Abicai owaco ni Lubanga ojalo Caulo i cing Daudi dok en Abicai odyere me guro Caulo ki tong i ngom, Daudi pe oye. (1 Cam. 26:8-11) Pien obedo ka medde ki yenyo tira pa Lubanga, Daudi pe odok cen ki ngeye i moko tamme me tic ma lubbe ki tira pa Lubanga kadi bed Abicai obedo ka diye.

10. Jami matego mene ma waromo rwatte kwede, dok ngo ma bikonyowa me cung matek?

¹⁰ Wan bene waromo rwatte ki jami mogo matego ma luwotwa gitwero diyowa me lubo tamgi, ma ka konyo korwa i timo miti pa Jehovah. Calo Abicai, jo mukene i kingi guromo cuko cwinywa me timo jami labongo paro pi miti pa Lubanga ma lubbe ki gin moni-ni. Wek  wacung matek, omyero wanen jami kit ma Jehovah neno kwede dok wacung i yone.

11. Ngo ma ipwonyo ki bot Daudi ma lubbe ki keto miti pa Lubanga bedo mukwongo?

¹¹ Daudi olego bot Lubanga Jehovah ni: “Pwonya wek ati gin ma imito.” (Kwan Jabuli 143:5, 8, 10.) Ma ka jenge i kom tamme kene nyo ye dic pa jo mukene, miti pa Daudi onongo tye ni Lubanga opwonye. En ‘obedo ka lwodo lok i kom gin ducu ma dong Jehovah otiyo; gin ducu ma otiyo obino i tamme.’ Wan bene watwero niang miti pa Lubanga ka wakwano Ginacoya kun walwodo jami mutimme i Baibul ma lubbe ki kit ma Lubanga obedo ka tero kwede dano.

12, 13. Pingo Daudi oonyo pii ma jone adek gukelo bote-ni?

¹² Pore bene me lubo lanen pa Daudi pien en obedo ki pwoc i kom cik pa Jehovah dok mitine onongo tye me kwo ma lubbe kwede. Nen kong gin mutimme i kare ma Daudi onongo mito mato pii ma ki twomo “ki i wang it Beterekem.” Lulweny adek pa Daudi guketo kwogi ka mading gucito gukelo pii ki i boma meno ma onongo jo Piliciti gugamo woko-ni. Ento, “Daudi pe omato; otingo oliyo piny i nyim Rwot [Jehovah].” Pingo? Daudi otito ni: “Pe obed kumeno ki i nyim Lubangana, an pe myero atim kit man. An aye dok amato remo pa jo-ni? Pien gukelo pi dyero komgi.”​—1 Tekwaro 11:15-19.

¹³ Daudi onongo ngeyo ki i Cik ni remo omyero kiony woko piny bot Jehovah ento pe kicam. En bene oniang tyen lok mumiyo omyero kitim kumeno. Daudi onongo ngeyo ni “kwo pa ringo tye i remo.” Ento man onongo obedo pii, pe remo. Pingo Daudi okwero matone? En oniang tyen lok ma tye i cik meno, ni Jehovah tero remo calo gin ma pire tek. Ki bot Daudi, pii meno onongo rom aroma ki remo pa co adek-ki. Pi meno, piine onongo pe matte ki tung bote. Ma ka matone, en omoko tamme  me onyone woko i ngom.​—Levi. 17:11; Nwo. 12:23, 24.

14. Ngo ma okonyo Daudi me neno jami kit ma Jehovah neno kwede?

¹⁴ Daudi otemme i yo ducu me lubo cik pa Lubanga. En owero ni: “Cwinya bedo yom me tiyo gin ducu ma imito, ai Lubanga; amako cikki dok agwoko tye i cwinya.” (Jab. 40:8) Daudi okwano cik pa Lubanga dok olwodo matut. Man oweko en ogeno cik pa Jehovah. Macalo adwogine, Daudi onongo tye ki miti pe me lubo cik-ki ki woko keken ento pwony ma en onongo ki i Cik ma kimiyo bot Moses. Ka wakwano Baibul, bedo me ryeko ka walwodo lok i kom gin ma wakwano kun wagwoko bedo i cwinywa wek waniang gin ma yomo cwiny Jehovah i lok moni-ni.

15. I yo ango ma Solomon pe onyuto woro i kom Cik pa Lubanga?

¹⁵ Solomon, wod pa Daudi, onongo cwak madit ki bot Lubanga Jehovah. Ento motmot, Solomon pe obedo ki woro i kom Cik pa Lubanga. En pe olubo cik ma Jehovah omiyo ni kabaka me Icrael omyero “pe onyom mon mapol.” (Nwo. 17:17) Ento Solomon onyomo mon mapol ma gubedo lurok. I kare ma en dong otii, “monne guloko cwinye odok i kom lubanga mogo mukene.” Labongo parone, “Solomon otiyo gin ma nen marac i wang Rwot [Jehovah], pe dong tiyo gin ma Rwot mito ki cwinye ducu, kit ma yam wonne Daudi otiyo-ni.” (1 Luker 11:1-6) Pire tek adada ni omyero walub cik ma nonge i Lok pa Lubanga! Man pire tek adada ka ngat moni tye ki tam me nyomme.

16. Niang tyen lok ma tye i cik me nyom “i kin jo pa Rwot keken” gudo jo ma gitye ki cwiny me nyom nining?

¹⁶ Ka jo ma pe luye gucako nyuto miti i komwa i yo me mit, tika wadok iye calo Daudi nyo Solomon? Kiwacci jo ma gitye i woro me ada myero gunyomme “i kin jo pa Rwot keken.” (1 Kor. 7:39) Ka Lakricitayo mo mito nyom, omyero onyom laye calo en. Ka waniang tyen lok me Ginacoya-ni, ci man bigengowa ki nyomo ngat ma pe laye ki dok me gwokke ki i miti me mit ma ngat meno nyuto i komwa.

17. Ngo ma twero konyowa me loyo ki i abita me neno cal ki coc ma tugo miti me buto?

¹⁷ Lanen ma Daudi onyuto i yenyo tira pa Lubanga twero konyowa bene me lweny ki atematema me neno cal ma tugo miti me buto. Kwan ginacoya magi, tam i kom cik ma tye i igi, ci yelle me niang miti pa Jehovah. (Kwan Jabuli 119:37; Matayo 5:28, 29; Jo Kolocai 3:5.) Lwodo lok i kom cik pa Jehovah bikonyowa me genge ki i abita me neno cal ki coc ma tugo miti me buto.

18, 19. (a) Kadi bed Daudi onongo tye ki roc, ngo ma okonye me bedo ki cwak pa Lubanga? (b) Imoko tammi me timo gin ango?

¹⁸ Kadi bed Daudi onyuto lanen maber i yo mapol, en otimo bal madongo. (2 Cam. 11:2-4, 14, 15, 22-27; 1 Tekwaro 21:1, 7) I kare me kwone ducu, Daudi obedo ka ngut ka otimo bal. En okwo ma ‘iye leng dok cwinye atir’ i nyim Lubanga. (1 Luker 9:4) Pingo wawaco kumeno? Pien Daudi otemme me timo jami ma lubbe ki miti pa Jehovah.

¹⁹ Kadi bed watye ki roc, pud waromo bedo ki cwak pa Jehovah. Waketu tam man i wiwa kun wakwano Lok pa Lubanga ki cwinywa ducu, walwodu lok iye dok waketu jami ma wapwonyogi i tic. Man bimiyo walego bot Jehovah calo laco Jabuli ma olego ki mwolo ni: “Pwonya wek ati gin ma imito.”