“Kpep Mi Ndinam Uduak Fo”

“Kpep mi ndinam uduak fo, koro afo edide Abasi mi.”​—PS. 143:10.

MME AKPAN N̄KPỌ ORO IKPETIDE

Tịn̄ mme n̄kpọ emi ẹkewọrọde David, emi ẹwụtde ke ata akpan n̄kpọ emi ekebehede enye ekedi uduak Jehovah.

Nso ikan̄wam David ọfiọk uduak Abasi?

Nso idin̄wam nnyịn ika iso inyene mfọn Jehovah?

1, 2. Didie ke ndikere mban̄a uduak Abasi ekeme ndin̄wam nnyịn, ndien nso ke ikeme ndikpep nto Edidem David?

 YAK idọhọ ke oyom ndika ebiet emi akanam mûkaha. Asan̄a ye ufan fo emi enen̄erede ọdiọn̄ọ ebiet oro. Enye eteme fi nte edisan̄ade. Udusopke usụn̄ edieke etienede ndausụn̄ oro enye ọnọde fi. Ukem oro ke ikpanam ke ini iyomde ndinam akpan ubiere. Akpana itiene ndausụn̄ Jehovah Andibot nnyịn man ‘isan̄a ke usụn̄’ oro enye enyịmede.—Isa. 30:21.

² Edidem David ama esiwak ndikere mban̄a se idide uduak Abasi ke ini enye oyomde ndinam n̄kpọ. Ẹyak ineme ndusụk n̄kpọ oro ẹketịbede ẹnọ David man ise se ikemede ndikpep nto owo emi akanamde n̄kpọ Jehovah Abasi ke ofụri esịt mi.—1 Ndi. 11:4.

DAVID AMA OKPONO ENYỊN̄ JEHOVAH

3, 4. (a) Nso ikanam David aka en̄wan ye Goliath? (b) David ekese didie enyịn̄ Abasi?

³ Kere ban̄a ini emi David akan̄wanade ye akwa ata-an̄wanaekọn̄ Philistia emi ekekerede Goliath. Nso ikanam ekpri David aka en̄wan ye ata-an̄wanaekọn̄ emi okon̄de nte ufọk (n̄kpọ nte mita ita) emi onyụn̄ akamade ediwak n̄kpọekọn̄? (1 Sam. 17:4) Ndi ekedi ke ntak uko esie? Mîdịghe, ndi mbuọtidem akanam enye aka en̄wan ye owo emi? Edi akpanikọ ke uko ye mbuọtidem ẹma ẹtiene ẹnam enye enyene esịt aka en̄wan ye Goliath. Edi n̄kpọ oro ekenen̄erede anam ekedi nte enye okokponode Jehovah ye akwa enyịn̄ esie. David okobụp ke iyatesịt ete: “Anie ededi edụt Philistia emi, eke enye okposụn̄ide udịmekọn̄ odu-uwem Abasi?”—1 Sam. 17:26.

⁴ Ke ini ekpri David okosobode ye Goliath, enye ama ọdọhọ ete: “Afo ada akan̄kan̄ ye eduat ye enyịm etiene mi, edi ami nda enyịn̄ Jehovah mme udịm,  kpa Abasi udịmekọn̄ Israel, emi afo osụn̄ide, ntiene fi.” (1 Sam. 17:45) Mbuọtidem emi David ekenyenede ke ata Abasi ama an̄wam enye ada itiat kiet kpọt owot ata-an̄wanaekọn̄ Philistia emi. Idịghe ini oro kpọt ke David ọkọbuọt idem ye Jehovah, enye ama ọbuọt idem onyụn̄ enen̄ede okpono enyịn̄ Abasi ke ofụri eyouwem esie. David akakam ọdọhọ ekemmọ nditọ Israel ete ‘ẹda edisana enyịn̄ Jehovah ẹbụre mbụre.’—Kot 1 Chronicle 16:8-10.

5. Nso ke mme owo ẹkeme ndinam nnyịn, emi ebietde se Goliath akanamde?

⁵ Ndi enem fi ndinyene Jehovah nte Abasi fo? (Jer. 9:24) Didie ke esinam n̄kpọ ke ini mbọhọidụn̄ fo, mbon itieutom mbufo, nditọ ufọkn̄wed mbufo, m̀mê iman fo ẹtịn̄de idiọk ikọ ẹban̄a Jehovah ẹnyụn̄ ẹdade Mme Ntiense esie ẹnam mbubru? Ndi emesisioro uyo ke ini okopde nte ẹtịn̄de idiọk ikọ ẹban̄a Jehovah onyụn̄ enyene mbuọtidem ke enye ayan̄wam fi? Imọfiọk ke enyene ini emi anade owo ‘odop uyo,’ edi ikpanaha iyak bụt anam nnyịn ndidi Mme Ntiense Jehovah ye mbet Jesus. (Eccl. 3:1, 7; Mark 8:38) Kpa ye oro anade inam n̄kpọ ke mbufiọk inyụn̄ ifọn ido ye mbon emi mîmaha etop nnyịn, ikpanaha itie nte nditọ Israel emi ẹkenyekde idem ẹnyụn̄ ẹnen̄ede ẹkop ndịk ke ini mmọ ẹkekopde nte Goliath osụn̄ide Abasi. (1 Sam. 17:11) Utu ke oro, ana isọsọp inam n̄kpọ man inam enyịn̄ Jehovah Abasi asana. Nnyịn iyom ndinam mme owo ẹnen̄ede ẹdi ẹdifiọk owo emi Jehovah edide. Ndien nnyịn isida Ikọ Abasi in̄wam mme owo ẹkụt ntak emi anade mmọ ẹdian idem ye Abasi.—Jas. 4:8.

6. Nso ikedi akpan n̄kpọ oro ekebehede David ke ini enye akan̄wanade ye Goliath, ndien nso ikpedi akpan n̄kpọ oro ebehede nnyịn?

⁶ Mbụk David ye Goliath ekpep nnyịn ata akpan n̄kpọ en̄wen. Ke ini David ekefehede ekesịm iso ekọn̄, enye ama obụp ete: “Nso ke ẹdinam ẹnọ owo eke ediwotde owo Philistia oko onyụn̄ emen esuene emi ke Israel efep?” Mbon oro ẹma ẹtịn̄ se mmọ ẹketịn̄de akpa, ẹte: “Owo ekededi eke ediwotde [Goliath], edidem ayada ediwak inyene ofori enye, oyonyụn̄ ọnọ enye eyen esie an̄wan ọdọ.” (1 Sam. 17:25-27) Edi idịghe inyene oro ekenen̄ede ebehe David. Enyene akpan n̄kpọ emi ekebehede enye. David okoyom ndinọ ata Abasi ubọn̄. (Kot 1 Samuel 17:46, 47.) Nso kaban̄a nnyịn? Ndi akpan n̄kpọ oro ebehede nnyịn edi ndikọ inyene nnyụn̄ n̄wọrọ etop ke ererimbot emi man inam enyịn̄ inọ idem nnyịn? Ke akpanikọ, ọdọn̄ nnyịn ndikpebe David, emi ọkọkwọde ete: “O mbufo ẹtiene mi ẹnọ Jehovah ubọn̄, ẹyak nnyịn inyụn̄ itoro enyịn̄ esie ọtọkiet.” (Ps. 34:3) Mmọdo, ẹyak ibuọt idem ye Abasi inyụn̄ ikpono enyịn̄ esie utu ke ndinam enyịn̄ nnọ idem nnyịn.—Matt. 6:9.

7. Nnyịn ikeme ndisan̄a didie nnyene ọkpọsọn̄ mbuọtidem oro iyomde ke ini isobode mbon oro mîmaha etop nnyịn?

⁷ Ama oyom David enyene ọyọhọ mbuọtidem ke Jehovah man ekeme ndida uko n̄n̄wana ye Goliath. Ekpri David ama enyene ọkpọsọn̄ mbuọtidem. N̄kpọ kiet emi akanamde enye enen̄ede enyene mbuọtidem edi ke enye ama eberi edem ke Abasi ke ini emi enye ekedide ekpemerọn̄. (1 Sam. 17:34-37) Oyom nnyịn n̄ko inyene ọkpọsọn̄ mbuọtidem man ika iso inam utom ukwọrọikọ nnyịn, akpan akpan ke ini isobode mbon oro mîmaha etop nnyịn. Imekeme ndinyene utọ mbuọtidem oro edieke iberide edem ke Abasi ke kpukpru n̄kpọ oro inamde ke usen ke usen. Ke uwụtn̄kpọ, imekeme nditọn̄ọ nneme Bible ye mme owo oro ẹtiede ye nnyịn ke n̄kpọisan̄. Nnyịn ikponyụn̄ itreke ndinyene nneme ye mme owo oro isobode ke efak ke ini  ikwọrọde ikọ ke ufọk ke ufọk.—Utom 20:20, 21.

DAVID AMA EBET JEHOVAH

8, 9. Didie ke David okowụt ke imọ imọfiọk uduak Jehovah ke nte enye akanamde n̄kpọ ye Saul?

⁸ Uwụtn̄kpọ en̄wen emi aban̄ade nte David akamade ndiberi edem ke Jehovah aban̄a Saul—akpa edidem Israel. Ufụp ama anam Saul odomo ndida eduat n̄kịm David ndian ke ibibene ikata, edi David ama efep utịm ikata oro, inyụn̄ isioho usiene. Ke akpatre, enye ama efehe mbak Saul ediwot enye. (1 Sam. 18:7-11; 19:10) Ekem Saul ama ada owo 3,000 oro ẹmekde ke otu ofụri Israel akasan̄a oyom David ke wilderness. (1 Sam. 24:2) Nte ini akakade, Saul ama edue okodụk abaitiat emi David ye ikọt esie ẹkedude. David akpakada ifet emi owot Saul emi okoyomde ndiwot enye. Idem n̄kpọ, n̄kọ Abasi okoyom David ada itie Saul nte edidem Israel. (1 Sam. 16:1, 13) Ke nditịm ntịn̄, edieke David okpokokopde item emi ikọt esie ẹkenọde enye, ẹkpekewot Saul. Edi David ọkọdọhọ ete: “Nsa mi-o! Koro ifọnke Jehovah ke enyịn ami ndinam n̄kpọ emi ye ọbọn̄ mi, kpa enye emi Jehovah eyetde aran.” (Kot 1 Samuel 24:4-7.) Saul okosụk edi owo emi Abasi ekeyetde aran. David ikoyomke ndibọ Saul itie ubọn̄, sia Jehovah ikosioho kan̄a Saul. David ndikesịbe isọn̄ anana-ubọk kod Saul kpọt okowụt ke enye ikoyomke ndiwot Saul.—1 Sam. 24:11.

⁹ David ama afiak owụt ukpono ọnọ enye emi Abasi eyetde aran ke akpatre ini emi enye okokụtde Edidem Saul. Ini oro ke David ye Abishai ẹkesịm ebiet emi Saul ekedịbede ẹnyụn̄ ẹkụt nte enye edede. Okposụkedi emi Abishai ekenịmde ke Abasi akayak asua David esịn enye ke ubọk onyụn̄ ọdọhọ yak ida eduat ikịm enye idian ke isọn̄, David ikenyịmeke. (1 Sam. 26:8-11) Sia David okoyomde ndausụn̄ Abasi kpukpru ini, enye iketreke ndinam n̄kpọ nte ekemde ye uduak Jehovah kpa ye oro Abishai ekeyịrede ete ẹwot Saul.

10. Nso idomo ke owo nnyịn kiet kiet ekeme ndisobo, edi nso idin̄wam nnyịn isọn̄ọ ida?

¹⁰ Mme owo ẹkeme ndinen̄ede nyom nnyịn inam n̄kpọ oro mmọ ẹmade utu ke ndisịn udọn̄ nnọ nnyịn inam uduak Jehovah. Ukem nte Abishai, ndusụk owo ẹkam ẹkeme ndisịn udọn̄ nnọ nnyịn ẹte inam n̄kpọ edi ikûkere iban̄a uduak Abasi. Man isọn̄ọ ida, ana inen̄ede ifiọk nte Jehovah esede n̄kpọ inyụn̄ inen̄ede  ibiere ndinam n̄kpọ nte ekemde ye uduak esie.

11. Nso ke afo ekpep oto David kaban̄a ediyak uduak Abasi edi ata akpan n̄kpọ?

¹¹ David ama ọbọn̄ akam ọnọ Jehovah Abasi ete: “Kpep mi ndinam uduak fo.” (Kot Psalm 143:5, 8, 10.) David ekenen̄ede oyom Abasi ekpep imọ n̄kpọ utu ke ndida ifiọk ibuot esie m̀mê ndinam se mbon en̄wen ẹdọhọde. Enye ama ‘enyịme nditie n̄kere utom ubọk Abasi.’ Nnyịn n̄ko imekeme ndifiọk uduak Abasi edieke idụn̄ọrede N̄wed Abasi inyụn̄ itie ikere ediwak mbụk Bible oro ẹban̄ade nte Jehovah akanamde n̄kpọ ye mme owo.

DAVID AMA ỌFIỌK NDIDA EDUMBET NDU UWEM

12, 13. Nso ikanam David ọduọk mmọn̄ oro owo ita ke otu ikọt esie ẹkekoide ẹsọk enye?

¹² N̄kpọ en̄wen oro ikemede ndikpep nto David edi nte enye ọkọfiọkde edumbet Abasi onyụn̄ adade mmọ odu uwem. Mme edumbet emi ẹkenam ẹnọ Ibet. Kere ban̄a se iketịbede ke ini David ọkọdọhọde ke ọdọn̄ imọ ndin̄wọn̄ “mmọn̄ emi otode obube udọn̄ mmọn̄ Bethlehem.” Owo ita ke otu ikọt esie ẹma ẹsụhọde ẹka obio oro—emi mbon Philistia ẹkedude ini oro—ẹkekoi mmọn̄ ẹda ẹsọk enye. Edi “David inyịmeke ndin̄wọn̄, edi an̄wan̄a enye ọduọk ọnọ Jehovah.” Ntak-a? David ama ọbọrọ ete: “Nsa mi-o, ndinamke utọ n̄kpọ emi ke ntak Abasi mi! Nte ndin̄wọn̄ iyịp mbon emi ẹkesịnde ukpọn̄ mmọ ke itiendịk? Koro mmọ ẹkesịnde ukpọn̄ mmọ ke itiendịk ndikada enye ndi.”—1 Chron. 11:15-19.

¹³ Ibet ama anam David ọfiọk ke owo ikpadiaha iyịp edi ke ẹkpenyene ndiduọk iyịp ke isọn̄ nnọ Jehovah. Enye ama ọfiọk n̄ko ntak emi ẹkpenamde ntre. David ama ọfiọk ke “uwem unam odu ke iyịp.” Edi mmọn̄ ke ẹkekoi ẹsọk David, idịghe iyịp. Ntak emi David mîkọn̄wọn̄ke mmọn̄ oro? Enye ama ọfiọk edumbet emi akanamde ẹnọ ibet oro aban̄ade iyịp. David akada mmọn̄ oro nte iyịp owo ita oro. Ke ntre, enye ama akpan̄a nsa ndin̄wọn̄ mmọn̄ oro. Enye ikọn̄wọn̄ke  mmọn̄ oro edi ama ọduọk enye ke isọn̄.—Lev. 17:11; Deut. 12:23, 24.

14. Nso ikan̄wam David ọfiọk nte Jehovah esede n̄kpọ?

¹⁴ David ama odomo ndiyak ibet Abasi akara kpukpru se enye anamde. Enye ama ọkwọ ete: “Mmadat esịt ndinam uduak fo, O Abasi mi, ibet fo onyụn̄ odu mi ke ọwọn̄esịt.” (Ps. 40:8) David ama ekpep ibet Abasi onyụn̄ enen̄ede etie ekere aban̄a enye. Enye ama enịm ke imọ iyọbọ ufọn edieke inamde mme ewụhọ Jehovah. Emi ama anam David enen̄ede ama ndinịm Ibet Moses ye mme edumbet emi ẹkenamde ẹnọ Ibet oro. Ke ini nnyịn ikpepde Bible, ọfọn itie ikere se nnyịn ikotde inyụn̄ iyak enye osụhọde odụk nnyịn esịt man ifiọk se Jehovah amade.

15. Didie ke Solomon mîkenịmke Ibet Abasi?

¹⁵ Jehovah Abasi ama enen̄ede ama Solomon eyen David. Nte ededi, nte ini akakade, Solomon ikenịmke Ibet Abasi. Enye ikanamke ewụhọ Jehovah emi ọkọdọhọde ndidem Israel ete ‘ẹkûdọ ediwak iban.’ (Deut. 17:17) Ke nditịm ntịn̄, Solomon ama ọdọ ediwak esen iban. Ke ini enye ọkọsọn̄de, “iban esie [ẹma] ẹwọn̄ọde enye esịt ẹtiene mme abasi efen.” Inamke n̄kpọ m̀mê nso ikedi ekikere Solomon, enye ama “anam se idiọkde ke enyịn Jehovah . . . inyụn̄ itieneke Jehovah ọyọhọ ọyọhọ nte David ete esie eketienede.” (1 Ndi. 11:1-6) Enen̄ede oyom ida ibet ye mme edumbet oro ẹdude ke Ikọ Abasi idu uwem. Ke uwụtn̄kpọ, emi edi ata akpan n̄kpọ ke ini iyomde ndidọ ndọ.

16. Nso ke ikeme ndikpep nto ewụhọ oro ọdọhọde ẹdọ ndọ “ke Ọbọn̄ ikpọn̄-ikpọn̄”?

¹⁶ Edieke mbon oro mînịmke ke akpanikọ ẹtọn̄ọde ndiwụt ke imama nnyịn, ndi nte nnyịn inamde n̄kpọ owụt ke ikere n̄kpọ nte David m̀mê nte Solomon? Ẹdọhọ mbon oro ẹtuakde ibuot ẹnọ ata Abasi ẹdọ ndọ “ke Ọbọn̄ ikpọn̄-ikpọn̄.” (1 Cor. 7:39) Edieke Christian oyomde ndidọ ndọ, enye ekpenyene ndidọ Christian n̄ko. Ndien edieke ifiọkde edumbet emi akanamde ẹnọ ibet N̄wed Abasi emi, nnyịn ididọhọ owo oro mînịmke ke akpanikọ idinyụn̄ imaha mme utọ owo oro ẹbre mbre ima ye nnyịn.

17. Nso ikeme ndin̄wam nnyịn ifep afia n̄wed ye ndise idan̄?

¹⁷ David ama enen̄ede oyom Abasi ada imọ usụn̄. Kere n̄ko ban̄a nte uwụtn̄kpọ esie ekemede ndin̄wam nnyịn ikan idomo edise ndise idan̄. Kot mme itie N̄wed Abasi oro ẹtienede mi, kere ban̄a mme edumbet oro ẹdude do, nyụn̄ domo ndifiọk se idide uduak Jehovah kaban̄a n̄kpọ emi. (Kot Psalm 119:37; Matthew 5:28, 29; Colossae 3:5.) Nditie n̄kere n̄kokon̄ edumbet emi an̄wam nnyịn ifep afia n̄wed ye ndise idan̄.

DOMO NDISE N̄KPỌ KPUKPRU INI NTE ABASI ESEDE

18, 19. (a) Okposụkedi emi David ekedide anana mfọnmma, nso ikanam enye osụk enyene mfọn Abasi? (b) Nso idi ubiere fo?

¹⁸ Okposụkedi emi David akawakde ndinịm eti uwụtn̄kpọ, enye ama anam ediwak ikpọ idiọkn̄kpọ. (2 Sam. 11:2-4, 14, 15, 22-27; 1 Chron. 21:1, 7) Edi enye ama esiwak ndikabade esịt ke ini anamde idiọkn̄kpọ. Enye akasan̄a ke iso Abasi “ye esịt eke ọsọn̄ọde ada.” (1 Ndi. 9:4) Ntak emi idọhọde ntre? Sia David ama odomo ndinam n̄kpọ nte ekemde ye uduak Jehovah.

¹⁹ Kpa ye oro idide mme anana mfọnmma, imekeme ndisụk nnyene mfọn Jehovah. Ke ntak emi, ẹyak isịn ifịk ikpep Ikọ Abasi, inen̄ede itie ikere se ikpepde, inyụn̄ ida se ikpepde oro isịn ke edinam. Edieke inamde oro, ediwọrọ ke nnyịn ibiet andiwet psalm emi okosụhọrede idem eben̄e Jehovah ete: “Kpep mi ndinam uduak fo.”

[Mme Mbụme Ukpepn̄kpọ]

[Ndise ke page 5]

Nso ikanam David okowot Saul ke ini enye ekenyenede ifet ndinam oro?

[Ndise ke page 6]

Nso ke nnyịn ikpep ito David ke emi enye mîkamaha ndin̄wọn̄ mmọ oro ikọt esie ẹkekoide ẹsọk enye?