1, 2. Dirava ena ura ita dibaia karana ese edena dala ai ita ia durua? Edena dala ai King Davida ena haheitalai ese ita ia durua?

 MANI oi laloa, oi be ororo gabuna ta dekenai oi raka lao, bena dala rua dekenai oi ginidae. Edena dala do oi abia hidi? Reana nadi badana ta latanai do oi daekau, bena atai amo unai dala rua idia lao gabuna do oi itaia. Unai hegeregerena, ita ura abia hidi badana ta ita karaia neganai, gau ibounai ita laloa namonamo bona Dirava ena lalohadai ita abia be namo. Unai ese ita ia durua iena ura ita diba totona. Unai neganai Iehova ena ura do ita karaia, eiava iena “dala” hegeregerena ai do ita raka.​—⁠Isa. 30:21.

² Israela ena King Davida be ena mauri lalonai hekwakwanai idia vara neganai, Iehova ena lalohadai ia tahua. Unai dala ia badinaia dainai, Dirava ena ura ia karaia. Ia be mai ena kudouna ibounai ida Iehova Dirava ia badinaia. Inai stadi ai, Davida be hekwakwanai badadia ia hamaoromaoroa dalana do ita stadilaia, bona ena sivarai amo ita idia durua gaudia haida do ita dibaia.​—⁠1 Kin. 11:4.

3, 4. (a) Dahaka dainai Davida ia laloa ia be Goliata ia tuari henia diba? (b) Davida ese Iehova ena ladana be edena bamona ia laloa?

³ Davida be mero matamata neganai, Pilistia ena tuari tauna badana Goliata ia tuari henia. Goliata ena lata be mita 2.9 bamona, bona ia be mai ena tuari kohudia. Dahaka dainai Davida ia laloa unai tau badana ia tuari henia diba? (1 Sam. 17:4) Davida be gari lasi tauna dainai, a? Eiava ia be Dirava ia abidadama henia dainai, a? Momokani, Dirava abidadama henia bona gari lasi karadia be mai anina bada. To, Davida ese Goliata ia tuari henia ena badina badana be inai: Davida ese Iehova bona Iena ladana helagana ia matauraia. Danu, Davida ia badu badina Goliata ese  Dirava ena taunimanima ia hereva dika henidia. Unai dainai ia gwau: “Inai Pilistia tauna, kopina utua lasi tauna, be daika, ia be Mauri ena Dirava ena tuari orea do ia hereva dika henia?”​—⁠1 Sam. 17:26.

⁴ Mero matamata Davida be Goliata dekenai ia gwau: “Oi be mai oiemu tuari kaia, bona mai oiemu io, bona mai oiemu auri labora io ta danu lau dekenai oi mai, to lau be Lohiabada Dirava ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava.” (1 Sam. 17:45) Davida be Iehova dekenai ia tabekau ia do ia durua totona. Ena vilipopo dekenai nadi ta ia udaia bona unai nadi tamona amo Goliata ia hamasea. Davida be ena mauri ibounai lalonai, Iehova bona Iena ladana helagana ia abidadama henia. Oibe, Davida ia ura Iehova ena ‘ladana helagana do ia hanamoa.’​—⁠1 Sivarai 16:35 duahia.

5. Taunimanima ese Iehova matauraia lasi herevadia idia gwauraia neganai, dahaka oi karaia be namo?

⁵ Oi moale badina Iehova be oiemu Dirava, a? (Ier. 9:24) Dahaka oi karaia bema emu neiba, gaukara turadia, sikuli turadia, eiava varavara be Iehova matauraia lasi herevadia idia gwauraia o Iehova ena Witnes taudia idia kirikirilaia? Oi be Iehova ena kahanai oi gini bona edia hereva oi hakoikoia, bona Iehova oi abidadama henia oi ia durua totona, a? Momokani, nega haida hereva ta ita gwauraia lasi be mai ena namo, to namo lasi ita be Iehova ena Witnes taudia eiava Iesu ena murinai ita raka taudia dainai ita hemarai. (Had. 3:1, 7; Mar. 8:38) Iehova bona iena hereva idia matauraia lasi taudia ita hereva henia neganai, hemataurai bona manau ita hahedinaraia be namo. To, ita ura lasi ita be Israela taudia bamona; idia be Goliata ena hereva idia kamonai bona ‘idia gari bada.’ (1 Sam. 17:11) Namona be Iehova ena ladana helagana ita abia isi totona ita hereva. Ita ura taunimanima ita durua, unai amo do idia diba Iehova be edena bamona Diravana. Unai dainai, Baibel amo taunimanima ita durua, unai amo do idia diba Dirava kahirakahira idia lao be mai anina bada.​—⁠Iam. 4:8.

6. Dahaka dainai Davida be Goliata ia tuari henia? Bona dahaka ita laloa bada be namo?

⁶ Davida bona Goliata edia sivarai amo mai anina bada gauna ma ta ita dibaia. Davida be tuari gabuna dekenai ia heau lao neganai, ia henanadai: “Inai Pilistia tauna do ia alaia mase bona inai hemarai, Israela dekena amo ia kokia tauna be dahaka do ia abia?” Israela taudia idia haere idia gwau, unai tauna ese “king ena moni momo do ia abia, bona king ena natuna kekeni do ia adavaia.” (1 Sam. 17:25-27) To Davida ia ura lasi unai ahuna do ia abia. Ia laloa bada gauna be inai: Ia ura Dirava ena ladana do ia abia isi. (1 Samuela 17:46, 47 duahia.) Ita be dahaka ita laloa bada? Ita ura sibona eda ladana ita hanamoa o abia isi, a? Eiava, ita ura taga taudia ai ita lao bona ladana bada ita abia, a? Lasi, to ita ura Davida ita tohotohoa, ia gwau: “Lau danu Lohiabada do ita hanamoa. Iena ladana do ita hanamoa hebou!” (Sal. 34:3) Namo lasi sibona eda ladana ita abia isi, to namona be Dirava ita abidadama henia bona Iena ladana ita abia isi bona hanamoa.​—⁠Mat. 6:9.

7. Dahaka dainai iseda abidadama ita hagoadaia be namo, bona edena dala ai unai ita karaia diba?

⁷ Mero matamata Davida be Iehova ia abidadama henia bona tabekau henia be namo, unai amo ia ese mai gari lasi ida Goliata ia tuari henia diba. Ia be mamoe naria tauna dainai dina ta ta ai Iehova ia tabekau henia, bona unai ese iena abidadama ia hagoadaia. (1 Sam. 17:34-37) Haida be idia ura lasi iseda haroro herevana idia kamonai. Unai dainai haroro gaukara ita karaia noho totona, iseda abidadama ia goada be gau badana. Bema dina ta ta ai ita karaia gaudia ibounai lalonai Iehova ita tabekau henia, iseda abidadama do ia goada. Hegeregere, PMV lalonai ita badinai idia helai taudia ita haroro henia diba. Eiava ruma-ta-ruma-ta haroro gaukara lalonai, dala dekenai ita davaria taudia danu ita haroro henia be namo.​—⁠Kara 20:20, 21.

8, 9. Saulo ia ura Davida ia hamasea neganai, edena dala ai Davida ia hahedinaraia ia be Iehova ena ura ia laloa bada?

⁸ Davida ese Iehova ia tabekau henia dalana ma ta be, ena lalohadai Israela ena king Saulo dekenai be Iehova ena lalohadai hegeregerena. To, Saulo be Davida ia mama henia. Nega toi ia ura io amo Davida ia hamasea, to ia gwadaia lasi. Davida ese Saulo ia heatu henia lasi, to ia heau boio. (1 Sam. 18:7-11; 19:10) Gabeai, Saulo be Israela tatau 3,000 ia abia hidi bona tano gagaena ai Davida idia tahua. (1 Sam. 24:2) Dina ta, Saulo be Davida bona ena tuari taudia idia hunia kohua lalonai ia vareai. Davida be Dirava ese ia abia hidi vadaeni king ai do ia lao dainai, bema Davida ia ura, unai nega ai Saulo ia hamasea diba. (1 Sam. 16:1, 13) Danu, Davida ena tatau ese ia idia doria Saulo ia hamasea totona. To, Davida ia gwau: “King hadikaia totona Lohiabada ese maoro ia henia lasi lau dekenai, badina ia be Lohiabada ese ia abia hidi tauna.” (1 Samuela 24:4-7 duahia.) Oibe, Saulo be Iehova ese ia horoa king bona Dirava ese ia do kokia lasi. Unai dainai Davida ese Saulo ena dabua ena kona ta ia utua, to ia hamasea lasi. Oibe, ena be Davida ese Saulo ia hamasea diba, to ia be unai bamona ia laloa lasi.​—⁠1 Sam. 24:11.

⁹ Nega ginigabena Davida ese Saulo ia itaia neganai, ia matauraia badina ia be ‘Lohiabada ese ia abia hidi king.’ Davida bona Abisai be Saulo ena kamepa dekenai idia ginidae neganai, idia davaria Saulo be ia mahuta noho. Abisai ia laloa Dirava ese unai gabu dekenai Saulo ia mailaia, unai amo Davida ese ia hamasea diba. Unai dainai, Abisai ia ura ena io amo Saulo do ia gwadaia, to Davida ese ia koua. (1 Sam. 26:8-11) Ena be Abisai ese ia doria, to Davida be Iehova ena ura ia badinaia dainai, ia ura lasi Iehova ese ia abia hidi king ia hamasea.

10. Edena bamona hekwakwanai ita davaria diba? Dahaka ese ita do ia durua Iehova ena ura ita karaia totona?

¹⁰ Reana ita danu be unai bamona hekwakwanai ita davaria. Hegeregere, ma haida ese ita idia hagoadaia lasi Iehova ena ura ita karaia totona, to ita idia doria edia lalohadai kereredia do ita badinaia. Eiava, idia ura ita ese abia hidi ita karaia haraga bona Iehova ena lalohadai ita tahua lasi. Abisai be Davida dekenai unai bamona ia karaia. Taunimanima ese iseda lalona idia veria lasi totona, namona be Iehova ena lalohadai ita diba bona eda lalona ita hadaia iena ura ita karaia totona.

11. Edena dala ai Davida ia hahedinaraia ia be Dirava ena ura ia laloa bada? Bona edena dala ai ia ita tohotohoa diba?

¹¹ Davida be Iehova Dirava dekenai ia guriguri, ia gwau: “Oiemu ura ena kara, be lau dekenai mani do oi hadibaia.” (Salamo 143:5, 8,  10 duahia.) Davida be sibona ena ura ia badinaia lasi, bona ma haida edia hereva ia badinaia kava lasi. To, ia ura dikadika Dirava ese ia do ia hadibaia. Ia gwau: “Oiemu kara gunadia ibounai lau laloa noho. Oiemu imana edia kara badadia ibounai lau laloatao noho.” Davida hegeregerena, ita ese Dirava ena ura ita dibaia diba bema Baibel ita stadilaia namonamo, bona Iehova ese guna taunimanima ia kara henia sivaraidia ita laloa dobu.

12, 13. Dahaka dainai Davida ese ena tuari taudia toi ese idia abia ranuna be tano dekenai ia bubua?

¹² Davida ena kara amo gau ma ta ita dibaia. Ia be hakaua herevadia edia anina ia lalopararalaia, bona ia ura ena mauri lalonai ia badinadia. Hakaua herevadia be ita idia durua abia hidi maorodia ita karaia, bona Iehova ena lalohadai ita dibaia totona. Davida hegeregerena, Iehova ena taravatu ta amo ita ese hakaua herevana ta ita dibaia diba. Hegeregere, dina ta Davida ia gwau ia ura ‘Betelehema ena ranu guri amo ranu sisina ia inua.’ To, Betelehema be Pilistia taudia ese idia biagua. Davida ena tuari taudia toi be edia mauri idia laloa lasi, to ranu idia abia totona Betelehema dekenai idia lao. To, Davida ia ura lasi idia mailaia ranuna do ia inua. Ia ese “unai ranu ia bubua ore, Lohiabada dekenai ia henia, boubou gauna” bamona. Dahaka dainai? Davida ia gwau: “Lau ese inai ranu lau inua diba lasi. Bema lau inua, unai be unai tau goadadia edia rarana do lau inua bamona, badina be unai ranu abia totona, edia mauri idia negea bamona.”​—⁠1 Siv. 11:15-19.

¹³ Davida ia diba Taravatu ia gwau rara be do idia ania lasi, to Iehova dekenai do idia bubua. Danu, Davida ia laloparara dahaka dainai unai bamona do idia karaia. Ia diba “mauri gaudia ibounai edia mauri be rara” lalonai ia noho. To, iena tuari taudia toi be ranu idia abia mai, rara idia mailaia lasi. Dahaka dainai Davida ia ura lasi unai ranu ia inua? Badina ia ese Taravatu amo hakaua herevana ta ia laloatao. Ia diba Iehova ena matanai rara be helaga, bona unai tuari taudia ese ranu idia abia totona, edia mauri idia haboioa diba. Unai dainai, Davida ese unai ranu ia inua lasi, badina ia laloa bema unai ranu ia inua, anina be ia ese edia rara ia matauraia lasi.​—⁠Lev. 17:11; Deu. 12:23, 24.

14. Dahaka ese Davida ia durua ena abia hidi amo Iehova ita hamoalea totona?

 ¹⁴ Davida ena mauri dinadia ibounai lalonai, Dirava ena taravatu ia laloa bada. Ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” (Sal. 40:8) Davida ese Dirava ena Taravatu ia stadilaia bona ia dibaia gaudia ia laloa dobu. Ia diba Iehova ena hahegani ia badinadia neganai, namo do ia davaria. Davida be Mose ena Taravatu ia abia dae, bona ena hakaua herevadia ia badinaia danu. Ita danu be Baibel ita stadilaia neganai, ita duahia gaudia ita laloa dobu be namo. Unai amo ita dibaia hakaua herevadia be dina ta ta ai do ita badinaia, bona eda abia hidi amo Iehova do ita hamoalea.

15. Edena dala ai Solomona ese Dirava ena Taravatu ia utua?

¹⁵ Iehova ese Davida ena natuna Solomona dekenai hahenamo momo ia henia. To, gabeai Solomona be Dirava ena Taravatu ia matauraia lasi. Ia ese Iehova ena hahegani, king be adavana momo do idia abia lasi haheganina, ia badinaia lasi. (Deu. 17:17) Solomona be idau bese hahinedia momo ia adavaia. Ia buruka neganai, iena adavana ese iena lalona idia veria “dirava idaudia” ia tomadiho henia totona. Herevana dahaka ekskius dainai Solomona ese Dirava ena Taravatu ia utua, to ia “be Lohiabada ena vairanai ia kara dika, bona ia ese Lohiabada ia badinaia momokani lasi, iena tamana Davida ese ia badinaia bamona.” (1 Kin. 11:1-6) Baibel amo ita dibaia taravatu bona hakaua herevadia ita badinadia be namo! Bema ta ia ura ia headava, unai hereva be mai anina bada.

16. Iehova ena taravatu, “Lohiabada lalonai sibona” do ita headava, amo dahaka ita dibaia?

¹⁶ Bema murimuri mero o kekeni ta be oi ia ura henia, dahaka do oi karaia? Oi be Davida bamona, Dirava ena lalohadai do oi tahua, a? Eiava, Solomona bamona Iehova ena hahegani do oi dadaraidia? Baibel ese Keristani taudia ia sisiba henidia, “Lohiabada lalonai sibona” do idia headava. (1 Kor. 7:39) Anina be, bema Keristani tadikaka ta ia ura headava, namona be Keristani taihu sibona ia adavaia. Unai taravatu amo ita laloparara, Iehova ia ura lasi murimuri tauna o hahinena ta ita ura henia. Anina be unai murimuri tau o hahine do ita dadaraia, bona danu namo lasi dala ita kehoa ia ese ita ia ura henia totona.

17. Dahaka ese ita ia durua diba ponografi laulaudia itaia karana ita dadaraia totona?

¹⁷ Danu, Davida ese Iehova ena lalohadai ia badinaia karana ese ita ia durua, ponografi laulaudia itaia karana ita dadaraia totona. Mani henunai idia noho siridia oi duahia, edia hakaua herevadia oi laloa dobu, bona Iehova ena lalohadai ponografi itaia karana dekenai oi laloa. (Salamo 119:37; Mataio 5:28, 29; Kolose 3:5 duahia.) Iehova ena kara maoromaoro taravatudia ita laloa dobu be namo, unai amo ponografi laulaudia itaia karana ita dadaraia diba.

18, 19. (a) Ena be Davida be goevadae lasi tauna, to edena dala ai Dirava ese ia lalonamo henia? (b) Oi be dahaka do oi karaia?

¹⁸ Ena be Davida be haheitalai namona, to ia ese kara dika badadia haida ia karaia danu. (2 Sam. 11:2-4, 14, 15, 22-27; 1 Siv. 21:1, 7) To Davida be ia kara dika neganai, nega ibounai ia helalo-kerehai. Ia be “mai maoromaoro bona momokani” ida, eiava mai ena kudouna ibounai ida Iehova ia hesiai henia. (1 Kin. 9:4) Dahaka dainai unai bamona ita hereva? Badina Davida be ena hekwakwanai ibounai lalonai Iehova ena lalohadai ia abia, bona ia ura ia karaia gauna ese Iehova ia hamoalea.

¹⁹ Ena be ita be goevadae lasi taudia, to Dirava ese ita ia lalonamo henia diba. Namona be Baibel ita stadilaia noho, ita dibaia gaudia ita laloa dobu bona ita badinaia. Bema unai bamona ita karaia, ita be Salamo torea tauna ita tohotohoa, ia gwau: “Oiemu ura ena kara, be lau dekenai mani do oi hadibaia.”