“Għallimni Nagħmel ir-Rieda Tiegħek”
“Għallimni nagħmel ir-rieda tiegħek, għax int Alla tiegħi.” —SALM 143:10.
PUNTI FUNDAMENTALI X’TIFTAKAR
Liema sitwazzjonijiet fil-ħajja taʼ David urew li hu kellu l-ħarsa taʼ Ġeħova?
X’għen lil David jifhem x’inhi r-rieda t’Alla?
Kif jistaʼ jibqaʼ jkollna l-approvazzjoni taʼ Ġeħova?
1, 2. (a) Kif nistgħu nibbenefikaw meta nitgħallmu x’inhi r-rieda t’Alla? (b) Kif se nibbenefikaw mill-eżempju tas-Sultan David?
META tivvjaġġa, ġieli tuża programm tal-mapep fuq il-kompjuter li jurik id-destinazzjoni tiegħek minn fuq? Jekk tara l-affarijiet mill-għoli jistaʼ jkun taʼ għajnuna biex tiddetermina l-aħjar rotta li għandek tieħu. B’mod simili, meta niġu biex nieħdu deċiżjonijiet importanti, nibbenefikaw jekk ikollna ħarsa aħjar tal-kwistjoni. Meta nħarsu lejn l-affarijiet mill-perspettiva għolja tal-Ħallieq, se nkunu nistgħu ‘nimxu fit-triq’ li Ġeħova japprova.—Is. 30:21.
2 Fil-biċċa l-kbira taʼ ħajtu, is-Sultan David taʼ Iżrael tal-qedem ħalla eżempju mill-aqwa billi pprova jara l-affarijiet kif jarahom Alla. B’hekk, David aċċerta ruħu li kien qed jagħmel ir-rieda t’Alla. Ħalli nirrivedu ċerti sitwazzjonijiet fil-ħajja taʼ David bl-iskop li nitgħallmu mill-kondotta taʼ raġel li kellu qalb sħiħa lejn Alla Ġeħova.—1 Slat. 11:4.
DAVID WERA RISPETT PROFOND LEJN ISEM ĠEĦOVA
3, 4. (a) X’qanqal lil David biex jiħodha kontra Gulija? (b) David kif kien iqis l-isem t’Alla?
3 Ikkunsidra meta David iffaċċja l-gwerrier Filisti Gulija. X’qanqal liż-żagħżugħ David biex jisfida ġgant armat sa snienu li kien fih disaʼ piedi u nofs (2.9 metri)? (1 Sam. 17:4) Kien il-kuraġġ taʼ David? Kienet il-fidi tiegħu f’Alla? Dawn iż-żewġ kwalitajiet kienu importanti. Però, ir-raġuni ewlenija li mmotivat lil David biex jiħodha kontra l-ġgant m’ogħla hawn kienet ir-rispett li kellu għal Alla u għal ismu l-kbir. B’rabja, David staqsa: “Min hu dan il-Filisti mhux ċirkonċiż biex jisfida lit-truppi taʼ l-Alla l-ħaj?”—1 Sam. 17:26.
4 Meta ġie wiċċ imb wiċċ maʼ Gulija, iż-żagħżugħ David qal: “Int ġej lejja b’sejf, b’lanza, u b’ġavellott, imma jien ġej lejk bl-isem taʼ Ġeħova taʼ l-armati, l-Alla tat-truppi taʼ Israel, li int sfidajt.” (1 Sam. 17:45) David straħ fuq l-Alla l-veru u qatel lill-gwerrier Filisti b’ġebla waħda bl-iżbandola tiegħu. David fada f’Ġeħova u wera rispett profond lejn l-isem divin mhux biss f’dik l-okkażjoni imma matul ħajtu kollha. Tabilħaqq, David ħeġġeġ lil sħabu l-Iżraelin biex ‘jiftaħru bl-isem qaddis taʼ Ġeħova.’—Aqra l-1 Kronaki 16:8-10.
5. Liema sitwazzjoni li tistaʼ titqabbel mat-tgħajjir taʼ Gulija għandek mnejn tiffaċċja int?
5 Kburi int li Alla tiegħek hu Ġeħova? (Ġer. 9:24) Kif tirreaġixxi meta l-ġirien, il-kollegi, sħabek tal-iskola, jew il-qraba jitkellmu kontra Ġeħova jew iwaqqgħu għaċ-ċajt lix-Xhieda tiegħu? Tiddefendi int isem Ġeħova meta jkun qed jiġi mmaqdar u tafda fl-appoġġ tiegħu? Veru, hemm ‘żmien li noqogħdu kwieti,’ imma m’għandniex nistħu li aħna Xhieda taʼ Ġeħova u segwaċi taʼ Ġesù. (Ekk. 3:1, 7; Mk. 8:38) Għalkemm għandna nużaw it-tattika u l-korteżija meta nkellmu lil min mhuwiex favorevoli, ħalli ma nkunux bħal dawk l-Iżraelin li “twerwru u beżgħu ferm” meta semgħu t-tgħajjir taʼ Gulija. (1 Sam. 17:11) Minflok, ejja bla tlaqliq niddefendu isem Alla Ġeħova sabiex inqaddsuh. Ix-xewqa tagħna hi li ngħinu lin-nies isiru jafu x’tip taʼ Alla hu verament Ġeħova. Għalhekk, aħna nużaw il-Kelma tiegħu biex ngħinu lil oħrajn jaraw l-importanza li jersqu qrib lejn Alla.—Ġak. 4:8.
6. (a) X’kien it-tħassib ewlieni taʼ David meta tqabad maʼ Gulija? (b) X’għandu jkun it-tħassib ewlieni tagħna?
6 It-taqbida taʼ David maʼ Gulija tgħallimna lezzjoni vitali oħra. Meta David ħaffef lejn il-kamp tal-battalja, hu staqsa: “X’jagħmlulu r-raġel li joqtol lil dak il-Filisti u jneħħi l-għajb minn fuq Israel?” In-nies tennew dak li kienu qalu qabel: “Lir-raġel li joqtlu [lil Gulija], is-sultan jagħmlu għani b’rikkezzi kbar, u jagħtih lil bintu stess.” (1 Sam. 17:25-27) Imma t-tħassib ewlieni taʼ David ma kienx li jikseb premju materjali. Kien hemm xi ħaġa li kienet bil-wisq iktar importanti għalih. David ried jigglorifika lill-Alla l-veru. (Aqra l-1 Samwel 17:46, 47.) Xi ngħidu għalina? Huwa t-tħassib ewlieni tagħna li nagħmlu isem għalina nfusna billi niksbu r-rikkezzi u nsiru prominenti fid-dinja? Ċertament li rridu nkunu bħal David li kanta: “Faħħru bil-kbir lil Ġeħova miegħi, u ejjew ngħollu ismu flimkien.” (Salm 34:3) Għalhekk, ejja nafdaw f’Alla billi npoġġu lil ismu qabel ir-reputazzjoni tagħna stess.—Mt. 6:9.
7. Kif nistgħu nikkultivaw il-fidi soda li għandna bżonn meta niltaqgħu maʼ nies li ma jridux jisimgħu l-messaġġ tagħna?
7 David kellu bżonn fiduċja sħiħa f’Ġeħova biex bil-kuraġġ jiħodha kontra Gulija. Iż-żagħżugħ David kellu fidi soda. Mod wieħed kif bena din il-fidi kien billi straħ fuq Alla fix-xogħol tiegħu bħala ragħaj. (1 Sam. 17:34-37) Aħna wkoll għandna bżonn fidi soda sabiex inkomplu fil-ministeru, speċjalment meta niltaqgħu maʼ nies li ma jridux jisimgħu l-messaġġ tagħna. Nistgħu nikkultivaw fidi bħal din billi nistrieħu fuq Alla fl-attivitajiet taʼ kuljum. Pereżempju, nistgħu nibdew konversazzjonijiet dwar veritajiet Bibliċi maʼ nies li jinzertaw bilqiegħda maġenbna meta nużaw it-trasport pubbliku. U m’għandniex inżommu lura milli nitkellmu maʼ nies li niltaqgħu magħhom fit-triq waqt li nkunu qed nieħdu sehem fl-ippritkar minn dar għal dar.—Atti 20:20, 21.
IR-RIEDA T’ALLA KIENET L-IKTAR ĦAĠA IMPORTANTI GĦAL DAVID
8, 9. Meta Sawl hedded lil David, David kif wera li żamm ir-rieda taʼ Ġeħova f’moħħu?
8 Eżempju ieħor li juri kemm David kien lest li jafda f’Ġeħova kien jinvolvi lil Sawl, l-ewwel sultan t’Iżrael. L-għajjur Sawl ipprova jsammar lil David mal-ħajt b’lanza tliet darbiet, imma David żgiċċa kull darba mingħajr ma rritalja. Fl-aħħar, hu ħarab minn Sawl. (1 Sam. 18:7-11; 19:10) Sawl imbagħad ħa 3,000 raġel magħżulin minn Iżrael kollu u mar ifittex lil David fix-xagħri. (1 Sam. 24:2) Eventwalment, bla ma ntebaħ, Sawl daħal proprju fl-istess għar li kienu fih David u l-irġiel tiegħu. David setaʼ uża din l-opportunità biex jelimina lis-sultan li heddidlu ħajtu. Wara kollox, kienet ir-rieda t’Alla li David jieħu post Sawl bħala s-sultan taʼ Iżrael. (1 Sam. 16:1, 13) Tabilħaqq, li kieku David semaʼ mill-pariri tal-irġiel tiegħu, is-sultan kien jinqatel. Imma David qal: “Ma jgħaddilix minn moħħi, mill-ħarsa taʼ Ġeħova, li nagħmel ħaġa bħal din lil sidi, il-midluk taʼ Ġeħova.” (Aqra l-1 Samwel 24:4-7.) Sawl kien għadu s-sultan midluk t’Alla. David ma riedx jaħtaf is-saltna mingħand Sawl, ladarba Ġeħova kien għadu ma neħħiehx. Peress li qataʼ biss tarf il-libsa bla kmiem taʼ Sawl, David wera li ma kellu ebda intenzjoni li jweġġgħu.—1 Sam. 24:11.
9 David reġaʼ wera rispett lejn il-midluk t’Alla l-aħħar darba li ra lis-sultan. Dakinhar, David u Abisaj waslu fil-post fejn kien ikkampjat Sawl u sabuh rieqed. Għalkemm Abisaj ikkonkluda li Alla kien reħa l-għadu f’idejn David u offra li jsammru mal-art b’lanza, David ma ħalliehx. (1 Sam. 26:8-11) Minħabba li David baqaʼ jfittex il-gwida t’Alla, hu żamm sod id-determinazzjoni tiegħu biex jaġixxi fi qbil mar-rieda taʼ Ġeħova minkejja t-tħeġġiġ taʼ Abisaj.
10. Liema sitwazzjoni taʼ sfida nistgħu niffaċċjaw personalment, u x’se jgħinna nibqgħu sodi?
10 Aħna wkoll għandu mnejn niffaċċjaw sitwazzjoni taʼ sfida li fiha sħabna jipprovaw jagħmlulna pressjoni biex insegwu r-raġunar tagħhom minflok ma jappoġġawna biex nagħmlu r-rieda taʼ Ġeħova. Bħal Abisaj, xi wħud jistgħu saħansitra jinkuraġġuna naġixxu mingħajr ma nikkunsidraw ir-rieda t’Alla f’xi kwistjoni partikulari. Biex nibqgħu sodi, jeħtieġ li jkollna ċar f’moħħna l-mod kif Ġeħova jħares lejn il-kwistjoni u nkunu determinati li nżommu mar-rieda tiegħu.
11. David kif wera li r-rieda t’Alla kienet l-iktar ħaġa importanti f’ħajtu, u kif nistgħu nimitawh?
11 David talab lil Alla Ġeħova: “Għallimni nagħmel ir-rieda tiegħek.” (Aqra Salm 143:5, 8, 10.) Minflok ma straħ fuq l-ideat tiegħu stess jew ċeda għat-tħeġġiġ taʼ ħaddieħor, David kien ħerqan biex jiġi mgħallem minn Alla. Hu ‘mmedita fuq l-attività kollha taʼ Ġeħova u minn qalbu baqaʼ jikkunsidra xogħol idejh.’ Aħna nistgħu nifhmu x’inhi r-rieda t’Alla billi nħaffru fl-Iskrittura u nimmeditaw fuq il-ħafna rakkonti Bibliċi dwar kif Ġeħova ttratta mal-bnedmin.
DAVID FEHEM KIF GĦANDU JUŻA L-PRINĊIPJI
12, 13. David għala ferrgħu fl-art l-ilma li kienu ġabulu t-tlett irġiel?
12 L-apprezzament taʼ David għall-prinċipji li jinsabu fil-Liġi u x-xewqa tiegħu li japplikahom huma wkoll taʼ min jimitahom. Ikkunsidra x’ġara meta David esprima x-xewqa tiegħu biex jixrob “l-ilma mill-ġiebja li hemm f’Betlehem.” Tlieta mill-irġiel taʼ David daħlu fil-belt—li dak iż-żmien kienet f’idejn il-Filistin—u ġabulu ftit ilma. Però, “David ma riedx jixorbu, imma sawbu quddiem Ġeħova.” Għala? David spjega: “Lanqas biss jgħaddili minn moħħi, rigward Alla tiegħi, li nagħmel dan! Għandi jien nixrob id-demm taʼ dawn l-irġiel li ssograw ħajjithom? Għax huma ssograw ħajjithom biex iġibuh.”—1 Kron. 11:15-19.
13 David kien jaf li skont il-Liġi d-demm għandu jiġi mferraʼ quddiem Ġeħova u ma jittikilx. Fehem ukoll għala dan kellu jsir. David kien jaf li “r-ruħ tal-laħam hi fid-demm.” Imma dan ilma kien, mhux demm. David għala rrifjuta li jixorbu? Hu fehem il-prinċipju taʼ x’kienet teħtieġ il-Liġi. Għal David, l-ilma kien prezzjuż daqs id-demm tat-tlett irġiel. Għalhekk, lanqas biss għaddielu minn moħħu li jixrob l-ilma. Minflok, ikkonkluda li kellu jferrgħu fl-art.—Lev. 17:11; Dt. 12:23, 24.
14. X’għen lil David jieħu deċiżjonijiet li għoġbu lil Ġeħova?
14 David ipprova jkun medhi fil-liġi t’Alla. Hu kanta: “Jien tgħaxxaqt nagħmel ir-rieda tiegħek, O Alla tiegħi, u l-liġi tiegħek qiegħda fil-ġewwieni tiegħi.” (Salm 40:8) David studja l-liġi t’Alla u mmedita fil-fond fuqha. Hu fada fl-għerf tal-kmandamenti taʼ Ġeħova. B’hekk, David mhux biss ried isegwi r-regoli fil-Liġi Mosajka, imma wkoll il-prinċipji li setaʼ tgħallem minn dawk ir-regoli. Meta aħna nistudjaw il-Bibbja, ikun għaqli li nimmeditaw fuq dak li naqraw u nniżżluh f’qalbna sabiex inkunu nistgħu niddeterminaw x’jogħġob lil Ġeħova f’ċirkustanzi differenti.
15. Salamun kif wera nuqqas taʼ rispett lejn il-Liġi t’Alla?
15 Ġeħova bierek bil-kbir lil iben David, Salamun. Però, maż-żmien, Salamun wera nuqqas taʼ rispett lejn il-Liġi t’Alla. Hu m’obdiex il-kmand taʼ Ġeħova li sultan Iżraeli ma kellux “ikollu ħafna nisa.” (Dt. 17:17) Infatti, Salamun iżżewweġ ħafna nisa barranin. Meta xjaħ, “in-nisa tiegħu dawrulu qalbu biex imur wara allat oħrajn.” Kien x’kien ir-raġunar tiegħu, “Salamun beda jagħmel dak li hu ħażin f’għajnejn Ġeħova, u ma mexiex għalkollox wara Ġeħova bħal David missieru.” (1 Slat. 11:1-6) Kemm hu importanti li ngħixu fi qbil mal-liġijiet u l-prinċipji misjubin fil-Kelma t’Alla! Pereżempju, dan hu vitali meta nikkunsidraw iż-żwieġ.
16. X’nistgħu nitgħallmu mil-liġi taʼ Ġeħova biex niżżewġu “biss fil-Mulej”?
16 Jekk xi ħadd mhux tal-istess twemmin juri li hu interessat fina b’mod romantiku, ir-reazzjoni tagħna se tkun bħal taʼ David, jew bħal taʼ Salamun? L-aduraturi veri jintqalilhom biex jiżżewġu “biss fil-Mulej.” (1 Kor. 7:39) Jekk Kristjan jagħżel li jiżżewweġ, għandu jiżżewweġ lil xi ħadd tal-istess twemmin. U jekk nifhmu l-liġi taʼ Ġeħova dwar dan, mhux talli se nżommu lura milli niżżewġu lil xi ħadd li mhuwiex tal-istess twemmin, imma talli lanqas inħalluh ikompli juri interess romantiku fina.
17. X’jistaʼ jgħinna biex ma ninqabdux fin-nassa tal-pornografija?
17 L-eżempju taʼ kif David fittex bil-ħeġġa l-gwida t’Alla jistaʼ jgħinna nirreżistu t-tentazzjoni biex inħarsu lejn il-pornografija. Aqra l-iskritturi li ġejjin, aħseb dwar il-prinċipji li fihom, u agħmel sforz biex tifhem ir-rieda taʼ Ġeħova f’dan ir-rigward. (Aqra Salm 119:37; Mattew 5:28, 29; Kolossin 3:5.) Jekk nimmeditaw fuq il-livelli għoljin tiegħu se nkunu ppreparati biex inżommu ’l bogħod min-nassa tal-pornografija.
DEJJEM ŻOMM F’MOĦĦOK IL-ĦARSA T’ALLA
18, 19. (a) Għalkemm kien imperfett, x’għen lil David ikollu l-approvazzjoni t’Alla? (b) X’int determinat li tagħmel?
18 Għalkemm David kien eżemplari f’ħafna modi, hu kkommetta diversi dnubiet serji. (2 Sam. 11:2-4, 14, 15, 22-27; 1 Kron. 21:1, 7) Però, matul ħajtu, David wera l-indiema kull meta dineb. Hu mexa “bl-integrità tal-qalb” quddiem Alla. (1 Slat. 9:4) Għala nistgħu ngħidu dan? Għax David ipprova jaġixxi fi qbil mar-rieda taʼ Ġeħova.
19 Minkejja l-imperfezzjoni tagħna jistaʼ jkollna l-approvazzjoni t’Alla. B’dan f’moħħna, ejja nkomplu nistudjaw il-Kelma t’Alla, nimmeditaw fil-fond fuq dak li nitgħallmu minnha, u naġixxu minnufih biex napplikaw dak li nitgħallmu. Jekk nagħmlu hekk, inkunu qed nitolbu lil Ġeħova bħalma talab bis-sinċerità s-salmista: “Għallimni nagħmel ir-rieda tiegħek.”
[Mistoqsijiet ta’ Studju]
[Stampa f’paġna 5]
Lil David x’żammu lura milli jieħu ħajjet Sawl meta kellu l-opportunità li jagħmel dan?
[Stampa f’paġna 6]
X’nistgħu nitgħallmu mill-fatt li David irrifjuta li jixrob l-ilma li ġabulu l-irġiel tiegħu?
