1, 2. Uuwanawa wuni tatu ka mona ngele otwa kala hatu tala kutya ehalo lyaKalunga olini manga inaatu ninga etokolo, notatu ki ilonga shike moshiholelwa shaDavid?

MBELA owa longitha nale okaalita wu tale kutya ehala hoka wa hala okuya olya gama peni? Okulongitha okaalita ohaku kwathele omuntu a mone nuupu ondjila ndjoka e na okuya nayo. Okutula miilonga ekotampango lya fa ndyoka otaku vulu oku tu kwathela uuna tatu ningi omatokolo ga kwata miiti. Ngele ohatu tala ko iinima ngaashi Omushiti, otashi ke tu kwathela tu ‘landule ondjila’ ndjoka Jehova a hokwa. — Jes. 30:21.

² Konyala uule wonkalamwenyo ye ayihe, omukwaniilwa David gwaIsraeli shonale okwa kala ha tala kutya ehalo lyaKalunga olini, nokwe tu tulila po oshiholelwa oshiwanawa. Natu ka tale kiinima yimwe mbyoka David a li a ningi mbyoka tayi ke tu kwathela tu mone kutya okwa kala a dhiginina muJehova thiluthilu. — 1 Aak. 11:4.

3, 4. (a) Oshike sha li shi inyengitha omugundjuka David a kondjithe Goliat? (b) David okwa li a tala ko ngiini edhina lyaKalunga?

³ Oshikando shimwe sho David a li omugundjuka okwa li a kondjitha omutongolume Omufilisti, Goliat. Oshike sha li shi inyengitha David a kondjithe omutongolume ngoka a li a homata nokomayego gwothika yoometa ndatu? (1 Sam. 17:4) Mbela shoka okwa li e shi ningi omolwuulaadhi we? Nenge mbela omolweitaalo lye muKalunga? Eeno shili, okwa li a pumbwa uulaadhi neitaalo opo a kondje nuupenda. Ihe molwaashoka David okwa li a simaneka Jehova nosho wo edhina lye lya tumbala, osha li she mu inyengitha a kondjithe omutongolume ngoka. David okwa li a pula a geya a ti: “Omupagani nguka omufukolume oshike, sho ta nyana etangakwiita lyaKalunga omunamwenyo?” — 1 Sam. 17:26.

⁴ Omugundjuka David sho a li ta ka kondja naGoliat okwa  ti: “Oto ya, u kondjithe ndje u na egongamwele, omwele negonga, ihe ngame otandi ku kondjitha medhina lyOMUWA Omunankondoawike, Kalunga komatangakwiita gaIsraeli, ngoka we mu nyana.” (1 Sam. 17:45) Molwaashoka David okwa li i inekela muKalunga, okwa li a dhipaga omutongolume ngoka Omufilisti noshuumbitho shomamanya. Pompito mpoka hapo owala David a li i inekela muJehova, ihe okwa kala e mu inekela monkalamwenyo ye ayihe nokwa kala a lenga edhina lye. David okwa li wo a lombwele Aaisraeli ooyakwawo yi ‘isimanekele edhina lyaJehova eyelele.’ (OB-1954) — Lesha 1 Ondjalulo 16:8-10.

5. Otatu vulu okwiiyadha monkalo yini ndjoka tayi vulu okuyelekwa naasho Goliat a li ta sheke Jehova noshigwana she?

⁵ Mbela owu uvite ngaa uuntsa sho Jehova e li Kalunga koye? (Jer. 9:24) Oho inyenge ngiini ngele aashiinda shoye, aaniilonga pamwe nangoye, aanasikola ooyakweni nenge aatseyikile yoye taya popile Jehova muuwinayi nokusheka Oonzapo dhe? Mbela oho popile ngaa edhina lyaJehova uuna tali shekwa, nokukala wi inekela mekwatho lye? Odhoshili kutya opu na “ethimbo lyokumwena,” ihe katu na okukala twa sa ohoni sho tu li Oonzapo dhaJehova nosho wo sho tu li aalanduli yaJesus. (Omuuv. 3:1, 7; Mark. 8:38) Nonando otu na okukala twa kotoka nokuungaunga nesimaneko naantu mboka taye tu tamaneke, inatu ninga ngaashi Aaisraeli mboka ya li “ya haluka noya tila” sho yu uvu Goliat te ya sheke. (1 Sam. 17:11, OB-1954) Pehala lyaashono, natu katuke aluhe pandunge tu yapulithe edhina lyaJehova Kalunga. Otwa hala tu kwathele aantu ayehe ye mu tseye kutya oku li lela ngiini. Opo tu shi ninge, otu na okulongitha Oohapu dhe tu kwathele aantu ya mone kutya okuhedha popepi naye okwa simana shi thike peni. — Jak. 4:8.

6. David okwa li e na elalakano lyashike sho a tokola oku ka kondjitha Goliat, noshike tu na okukala tatu ipula nasho unene?

⁶ Moshiholelwa shaDavid sho a li a kondjitha Goliat otatu ilongo mo oshinima sha simanenena. Sho David a li e ya kolugodhi ta matuka okwa pula a ti: “Omuntu ngoka ta dhipaga Omufilisti nguka nota mangulula Israeli momukundu nguka, ota ningwa ngiini?” Aantu oye mu yamukula ngaashi ya popile nale ya ti: “Omukwaniilwa Saul oku uvaneke okugandja ofuto onene komuntu ngoka te mu dhipaga. Omukwaniilwa ote ke mu pa ishewe omwana omukadhona, e mu hokane.” (1 Sam. 17:25-27) Ihe David ka li ti ipula unene nondjambi ndjoka a li ta ka mona. Elalakano lye enene olya li okusimaneka Kalunga kashili. (Lesha 1 Samuel 17:46, 47.) Ongiini kombinga yetu? Mbela otwa hala okwiiningila edhina muuyuni mokwiikongela omaliko nokulalakanena esimano? Osha yela kutya inatu hala okukala ngaaka, ihe otwa hala okukala ngaashi David ngoka i imbi a ti: “Uvitheni pamwe nangame uunene wOMUWA; tu simanekeni atuhe edhina lye.” (Eps. 34:3) Ngaashi David, natu kale twi inekela muKalunga, nokukala tu na ko nasha nokusimanekitha edhina lye, pehala lyokwiikongela esimano. — Mat. 6:9.

7. Oshike tashi ke tu kwathela tu kale neitaalo lya kola ndyoka twa pumbwa okukala tu na uuna twa tsakaneke aantu mboka taye tu pataneke?

⁷ Opo David a kondjithe Goliat, okwa li e na okukala i inekela thiluthilu muJehova. Nonando David okwa li omugundjuka, okwa li e na eitaalo lya kola. Sho e li kuusita woonzi okwa kala i inekela muKalunga, naashoka osha li sha tungu eitaalo lye. (1 Sam. 17:34-37) Natse wo otwa pumbwa okukala neitaalo lya kola opo tu tsikile nuukalele wetu, unene tuu ngele aantu taye tu pataneke. Otatu vulu okukokeka eitaalo ndyoka mokukala twi inekela muKalunga miilonga yetu yesiku nesiku. Pashiholewa, otatu vulu okutameka oonkundathana kombinga yoshili yOmbiimbeli naantu mboka tashi vulika ya kuutumbe pamwe natse miiyenditho yaayehe. Mbela omolwashike itaatu popi naamboka hatu tsakanene nayo mepandaanda uuna tatu longo egumbo negumbo? — Iil. 20:20, 21.

8, 9. David okwa li u ulike ngiini kutya ina hala okuninga sha shoka kaashi li metsokumwe nehalo lyaJehova sho a li tu ungaunga nomukwaniilwa Saul?

⁸ Omukalo moka David a li u ungaunga naSaul, omukwaniilwa gwotango gwaIsraeli, ogu li oshiholewa shilwe shoka tashi ulike kutya okwa li e na ehalo lyokukala i inekela muJehova. Omukwaniilwa Saul okwa li a kambadhala lwiikando itatu okwaalela David negonga kekuma, ihe iikando ayihe David okwa li e li yanda noina kambadhala okugalulila Saul uuwinayi. David osho ngaa a ka ya Saul ontuku. (1 Sam. 18:7-11; 19:10) Saul okwa li a hogolola aalumentu 3 000 Aaisraeli, opo a ka konge David mombuga. (1 Sam. 24:2) Esiku limwe, mokwaaha shi sha Saul okwa li a yi mekololo moka David nosho wo aalumentu ye ya li ya holama. David okwa li ta vulu okulongitha ompito ndjoka a dhipage Saul ngoka a li e mu li mokashoko. Shimwe natango, Kalunga oye a li a hala David a pingene po Saul, omukwaniilwa gwaIsraeli. (1 Sam. 16:1, 13) Ando David okwa pulakenene kaalumentu ye mboka a li nayo, ando omukwaniilwa okwa dhipagwa shili. Ihe David okwa ti: “OMUWA na gamene ndje, ndaa ningile mwene gwandje uuwinayi washa; oye tuu ngoka OMUWA e mu hogolola omukwaniilwa!” (Lesha 1 Samuel 24:4-7.) Pethimbo mpoka, Saul okwa li natango omukwaniilwa a langekwa po kuKalunga. David ka li a kambadhala a yuge ko oshipundi komukwaniilwa Saul, ihe okwa li a tegelela Jehova oye e shi ninge. Pehala lyaashono, David okwa li i inyoweke e ta tete owala okalapi konguwo yaSaul. Kungawo, David okwa li u ulike kutya ina hala okuningila Saul uuwinayi washa. — 1 Sam. 24:11.

⁹ Oshikando shahugunina sho David a li a adha Saul a kotha okwa li u ulike kutya okwe mu simaneka e li omukwaniilwa a langekwa po kuKalunga. Pethimbo ndyoka, David nosho wo Abisai, oya li ye ya pehala mpoka Saul a yunga ontanda ye, ihe oye mu adha a pwila moomposi. Nonando Abisai okwa li e wete kutya Kalunga okwa gandja Saul miikaha yaDavid nokwa a li a pula e mu tse egonga li tunukile mevi polumwe aluke, David ka li e shi zimine. (1 Sam. 26:8-11) Molwaashoka David okwa li ha pula ewiliko kuKalunga, okwa kala a tokola toko a katuke metsokumwe nehalo lyaKalunga, nonando Abisai okwa li te mu ulumike a dhipage Saul.

10. Onkalo yini tashi vulika tu iyadhe muyo, noshike tashi ke tu kwathela tu kale aadhiginini?

¹⁰ Otashi vulika natse tu iyadhe monkalo moka yalwe taye tu thiminike tu landule omadhiladhilo gopantu, pehala lyoku tu ambidhidha tu longe ehalo lyaJehova. Ngaashi Abisai, yamwe otashi vulika ye tu ladhipike tu ninge oshinima shontumba, nopwaahe na okutala kutya Jehova okwe shi tala ko ngiini. Opo tu kale aadhiginini,  otwa pumbwa okukaleka etaloko lyaashoka Jehova a hala tu ninge momadhiladhilo getu nokukala twa tokola toko tu dhiginine oondjila dhe.

11. David okwa li u ulike ngiini kutya okwa lenga ehalo lyaKalunga, nongiini tatu vulu oku mu holela?

¹¹ David okwa li a galikana kuJehova Kalunga a ti: “Longa ndje okugwanitha ehalo lyoye.” (Lesha Episalomi 143:5, 8, 10.) Pehala lyokulandula omadhiladhilo ge mwene nenge a pulakene kwaamboka taye mu tsitsimike, David okwa li a halelela okulongwa kuKalunga. Okwa li ‘a tedhatedha kwaayihe mbyoka Jehova a ninga, nokwa dhiladhila iilonga Ye ayihe.’ Otatu vulu okutseya ehalo lyaKalunga mokukonakona nokumona uuyelele mOmanyolo nokutedhatedha komahokololo gOmbiimbeli ogendji nkene Jehova a li u ungaunga naantu.

12, 13. Omolwashike David a li a tilehi omeya ngoka a li e etelwa kaakwiita ye yatatu?

¹² David okwa li e hole omakotampango ngoka ge li momanyolo nokukala metsokumwe nago. Okwe tu tulila po wo oshiholelwa oshiwanawa moshinima shoka. Tala kwaashoka sha li sha ningwa po sho David a li a hala “omeya gokunwa ga za momuthima gwoposheelo shaBetlehem.” Aakwiita ye yatatu oya li ya tula oomwenyo dhawo moshiponga sho ya taakana moshilando shoka sha li sha kwatwa ko kAafilisti noya li ye mu etele omeya okuza momuthima ngoka. Ihe ‘David ka li a hala oku ga nwa, okwe ga tile owala koshipala shOMUWA omayambo.’ Omolwashike David a li inaa hala oku ga nwa? Okwa popi a ti: “Itandi vulu oku ga nwa, ote ningi ndi nwe ombinzi yaamboka ya li ya hupula oomwenyo dhawo.” — 1 Ondjal. 11:15-19.

¹³ David okwa li e shi shoka sha nyolwa mOmpango kutya ombinzi oyi na okuyambelwa Jehova, ihe kayi na okuliwa. Okwa li wo e shi kutya omolwashike shi na okuningwa. David okwa li e shi kutya “omwenyo gwomomayulu ogwa kala mombinzi.” Shoka a li e etelwa kashi shi ombinzi, ihe omeya. Omolwashike nduno David a li a tindi oku ga nwa? Okwa li e shi nawa ekotampango ndyoka Kalunga a tula po. Omeya ngoka David okwa li e ga tala ko ga fa ombinzi yi na ondilo yaakwiita mboka yatatu. Onkee ano, okwa li a tindilile oku ga nwa nokwe ga tilehi pevi. — Lev. 17:11; Deut. 12:23, 24.

14. Oshike sha li sha kwathele David a kale e na etaloko lya fa lyaJehova?

 ¹⁴ David okwa kambadhala okukala omudhiginini gwompango yaKalunga. Okwi imbi a ti: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” (Eps. 40:8) David okwa li ha konakona ompango yaKalunga nokutedhatedha kombinga yayo muule. Okwa li e na einekelo kutya okulandula iipango yaJehova otaku ke mu etela uuwanawa. Shoka osha li she mu ningitha kaa landule owala shoka sha nyolwa mOmpango, ihe oku mone wo kutya oti ilongo mo shike. Uuna tatu konakona Ombiimbeli, oshi li pandunge tu tedhatedhe kwaashoka tatu lesha noku shi pungula momitima dhetu tu vule okumona kutya oshike tashi opalele Jehova moshinima shontumba shokondandalunde.

15. Omoshinima shini Salomo a li u ulike kutya ina simaneka Ompango yaKalunga?

¹⁵ Jehova Kalunga okwa li e hole noonkondo omwanamati gwaDavid, Salomo. Ihe konima, Salomo okwe ke etha po okusimaneka Ompango yaKalunga. Ina vulika koshipango shaJehova shoka tashi ti kutya ‘omukwaniilwa gwaIsraeli ina kala e na aanyekadhi oyendji.’ (Deut. 17:17) Salomo okwa li a hokana ondumba yaakiintu aakwiilongo. Sho a kulupa, “oye mu pilamenitha Kalunga.” Kutya nduno etompelo lye olya li lini, aakiintu mbono oya li ye mu ningitha a ‘simaneke iikalunga iikwiilongo, noina dhiginina OMUWA, Kalunga ke, ngaashi he David a ningile.’ (1 Aak. 11:1-6) Inashi simana tuu tu kale hatu landula iipango nomakotampango ngoka ge li mOohapu dhaKalunga! Shika osha simanenena unene tuu ngele tatu dhiladhila okuya mondjokana.

16. Mompango yaJehova ndjoka tayi ti natu ‘hokane owala mOmuwa’ otatu ilongo mo shike?

¹⁶ Mbela ngele omuntu ngoka kee shi omwiitaali ta ningi iinima mbyoka tayi tu kokele miihole mbela ohatu ningi ngaashi David nenge ongaashi Salomo? Aalongelikalunga yashili otaya lombwelwa ya hokane “owala mOmuwa.” (1 Kor. 7:39, NW) Ngele Omukriste okwa tokola a ye mondjokana, oku na owala okuya mo nomwiitaali omukwawo. Ngele otu uvite ko shoka Enyolo ndika tali ti, itatu ka henuka owala okuya mondjokana nomuntu ngoka kee shi omwiitaali, ihe otatu ka yanda wo kehe shimwe shoka tashi hilile mokukala tu na iihole nomuntu ngoka.

17. Oshike tashi ke tu kwathela kaatu ye momwigo gwokutala omathano giipala?

¹⁷ Natu taleni wo nkene oshiholelwa shaDavid shokukonga ewiliko lyaKalunga tashi tu kwathele tu kondjithe emakelo lyokutala omathano giipala. Lesha omanyolo taga landula, e to dhiladhila kombinga yomakotampango ngoka ge li mo, e to kambadhala wu mone etaloko lyaJehova moshinima shika. (Lesha Episalomi 119:37; Mateus 5:28, 29; Aakolossa 3:5.) Ngele ohatu tedhatedha komanyolo ngoka tage tu kwathele tu kale tu na etaloko lyOmushiti, otashi ke tu kwathela kaa tu ye momwigo gwokutala omathano giipala.

18, 19. (a) Oshike sha li sha ningitha David a kale a hokiwa kuJehova, nonando okwa li inaa gwanenena? (b) Owa tokola toko okuninga shike?

¹⁸ Nonando David okwe tu tulila po oshiholelwa oshiwanawa miinima oyindji, okwa li a yono sha kwata miiti lwiikando yontumba. (2 Sam. 11:2-4, 14, 15, 22-27; 1 Ondjal. 21:1, 7) Ihe oku ulike eitedhululo mokukalamwenyo kwe akuhe. Okwa kala ha “vulika” aluhe kuKalunga. (1 Aak. 9:4) Omolwashike tatu tile ngaaka? Omolwaashoka David okwa li a kambadhala aluhe okukala metsokumwe nehalo lyaJehova.

¹⁹ Jehova ota vulu okukala e tu hokwa, nonando inatu gwanenena. Onkee ano, natu konakoneni aluhe oohapu dhe nuudhiginini, nokutedhatedha muule kwaashoka tatu ilongo mo, nokukatuka metsokumwe nadho. Ngele tatu shi ningi otatu ka kala twa fa omupisalomi ngoka i indile Jehova neifupipiko a ti: “Longa ndje okugwanitha ehalo lyoye.”