1, 2. Panon tayon nagunggonaan diad pangonsidera ed linawa na Dios, tan antoy naaralan tayod si Arin David?

KASIN asalim lay angusar na mapa pian nanengneng so lugar a laen mo? Say inengneng ed saray lugar panamegley na mapa so ontulong ed sikan makapampili na sankarakepan a rota. Niyaplika tayo met itan a prinsipyo sano manggagawa tayoy importante iran desisyon. Say pangonsidera ed saray bengatla unong ed panmoria na Amalsa et ontulong ed sikatayon ‘manakar ed dalan’ ya aabobonan nen Jehova.​—Isa. 30:21.

² Diad interon bilay nen Arin David, impanengneng toy maabig ya alimbawa diad impangonsidera ed linawa na Dios. Pantongtongan tayo so pigaran agawad bilay nen David pian makaaral tayod alimbawa to bilang sakey a nansiansian nagnap so puso tod si Jehova a Dios.​—1 Ara. 11:4.

3, 4. (a) Antoy amakiwas ed si David a milaban ed si Goliat? (b) Antoy panmoria nen David ed ngaran na Dios?

³ Imanoen tayo pay agawa sanen akilaban si David ed Filisteon si Goliat. Antoy amakiwas ed kalangweran a David ya milaban ed sayan naayuraan ya higante a say kaatagey to et siamera tan kapalduan piye? (1 Sam. 17:4) Kasin lapud inkakpel odino talek ed Dios? Akatulong iratan ed sikato. Balet, say talagan amakiwas ed si David et say respeto tod si Jehova tan ed masanton ngaran to. Oniay makpel ton imbaga: “Siopa so saya ya ag-ginalsiman a Filisteo, a mangaayat ed saray inayuraan na mabilay a Dios?”​—1 Sam. 17:26.

⁴ Sanen manlaban la ra nen Goliat, oniay imbaga  nen David: “Ondago ka ed siak ya akakampilan, tan pati gayang, tan pati kinlong, balet ondago ak ed sika dia ed ngaran nen Jehova na saray ehersito, say Dios na saray inayuraan na Israel, a sikato so inayat mo.” (1 Sam. 17:45) Lapud impanmatalek tod Dios, tinalo nen David si Goliat panamegley na sakey a bato tan palsot. Aliwan diad satan labat a pankanawnawa nanmatalek si David ed si Jehova tan nirespeto toy masanton ngaran na Dios noagta diad interon bilay to. Kanian, pinaseseg nen David iray kapara ton Israelita ya ‘igloria so masanton ngaran nen Jehova.’​—Basaen so 1 Awaran 16:8-10.

5. Anton situasyon so nayarin naeksperiensya tayo a mipara ed impan-angat nen Goliat?

⁵ Kasin ipapasirayew mon si Jehova so Dios mo? (Jer. 9:24) Antoy gawaen mo no papaugesen na saray kaabay, kaulop, kaklase, odino kanayon mo si Jehova tan saray manlilingkor ed sikato? Kasin idedepensam so ngaran nen Jehova no walay mamabalaw ed satan? Tua, walay “panaon ya ag-iyesel,” balet agtayo nepeg ya ibaing a sakey tayod Saray Tasi nen Jehova tan papatumbok tayo nen Jesus. (Ecl. 3:1, 7; Mar. 8:38) Anggaman kaukolan tayoy magmaliw a mataktika tan magalang diad pideneng ed saray totoo, aliwa itayon singa saray Israelita ya ‘apunaw tan tinmakot a mapalalo’ sanen arengel day impan-angat nen Goliat. (1 Sam. 17:11) Imbes, nepeg ya akaparaan tayon pasantosen so ngaran nen Jehova. Labay tayon tulongan iray totoon nakabat no siopan talaga si Jehova. Pian nagawaan itan, uusaren tayoy Biblia ya ontulong ed sikaran naamtaay kaimportantian na iyapit ed Dios.​—Sant. 4:8.

6. Antoy gagala nen David diad impilaban tod si Goliat, tan antoy nepeg a manunaan ed sikatayo?

⁶ Wala ni naaralan tayod impilaban nen David ed si Goliat. Oniay intepet nen David sanen sikatoy onla lan milaban: “Anto so nagawa ed laki a mamatey ed saya a Filisteo, tan ekalen to ed Israel so kabalaw?” Oniay inyebat na saray totoo: “Say laki a mamatey ed [Goliat], sikato so payamanen na ari ed saray dakel a kayamanan, tan iter to ed sikato so anak to a bii.” (1 Sam. 17:25-27) Balet, aliwan say materyal a tumang so manunan pilalek nen David. Mas importantid sikato so pangigloria ed tuan Dios. (Basaen so 1 Samuel 17:46, 47.) Sikatayo ey? Kasin manunad sikatayo so pantipon na kayamanan tan magmaliw a sikat ed mundo? Seguradon labay tayon aligen si David ya angibagan: “Itandoro tayo si Jehova, Igloria tayon amin so ngaran to.” (Sal. 34:3, NW) Komon ta manmatalek tayod si Jehova, tan iyunay pamasanto ed ngaran to, aliwan say sarili tayo.​—Mat. 6:9.

7. Panon tayon napabiskeg so pananisia tayo sano wala ray ag-interesadod ipupulong tayo?

⁷ Say inkakpel nen David et mankaukolan na sigpot a panagmatalek ed si Jehova. Mabiskeg so pananisia to. Resulta itan na impanmatalek tod si Jehova diad kimey to bilang pastol. (1 Sam. 17:34-37) Kaukolan tayo met so mabiskeg a pananisia pian nitultuloy so ministeryo tayo lalo la no wala ray ag-interesadod ipupulong tayo. Napabiskeg so pananisia tayo diad panmatalek ed Dios diad inagew-agew a kimey tayo. Singa bilang, nigapo tayoy tongtongan nipaakar ed Biblia sano manaalagar tayoy luganan. Sarag tayo met ya pulongan iray nasabat tayod dalan legan na panagkabkaabungan.​—Gawa 20:20, 21.

8, 9. Diad impideneng nen David ed si Arin Saul, panon ton impanengneng a naynay ton ikokonsidera so panlabayan nen Jehova?

⁸ Sakey nin paneknek na impanmatalek nen David ed si Jehova et say impideneng tod si Saul​—say inmunan ari na Israel. Amitlon sinali nen Saul ya ipanek si David ed padir, balet apaliisan iratan nen David, tan sikatoy agbinmales. Kayari na satan, tinmaynan si David. (1 Sam. 18:7-11; 19:10) Kanian amili si Saul na 3,000 a lalaki ed Israel pian anapen si David ed kalawakan. (1 Sam. 24:2) Balet, agnaamamtaan nen Saul a sikatoy linmoob ed mismon ungib a kawalaan nen David tan saray lalakin kaiba to. Pankanawnawa la iya komon nen David a pateyen so ari a malabay a mamatey ed sikato. Lalo la ta gagala met lanlamang na Dios a sikatoy onsalat ed si Saul bilang ari na Israel. (1 Sam. 16:1, 13) No dinmengel si David ed imbaga na saray kakaiba to, apatey to la komon so ari. Balet oniay imbaga nen David: ‘Si Jehova isebel to a gawaen ko so saya a bengatla ed katawan ko, a nilanaan to.’ (Basaen so 1 Samuel 24:4-7.) Siansia nin si Saul et arin nilanaan na Dios. Aglabay a samsamen nen David so inka-ari nen Saul, ta sikatoy agni inekal nen Jehova. Diad impamilat tod saloy na kawes nen Saul, impanengneng nen David ya agto labay a sakitan so ari.​—1 Sam. 24:11.

⁹ Impatnag lamet nen David so respeto tod nilanaan na Dios sanen anengneng toy ari. Asabian nen David tan Abisai si Saul a naugip ed kampo to. Anggaman inisip nen Abisai ya inter la na Dios ed si David so mauges ya Ari tan sikatoy namboluntaryon mamatey ed si Saul, ag-inmabuloy si David. (1 Sam. 26:8-11) Lapud naynay a manpapaigiyad Dios, agkinmapuy so determinasyon ton gawaey linawa nen Jehova anggan sikatoy sinugsogan nen Abisai.

10. Anton mairap a situasyon so nayarin naeksperiensya tayo, tan antoy ontulong ed sikatayon agbastabasta natangguyor?

¹⁰ No maminsan, ompan desdesen itayo met na saray kaulop tayon unoren so ibabaga ra imbes a say panlabayan nen Jehova. Singa ed ginawa nen Abisai, ompan desdesen da itayon mandesisyon anta agtayo ni nikonsideray panmoria na Dios nipaakar ed sakey a bengatla. Pian ag-itayo bastabasta natangguyor, kaukolan a mansiansiad nonot tayoy panmoria nen Jehova, tan determinadon unoren iray ganggan to.

11. Antoy naaralan tayod si David nipaakar ed impangiyuna tod linawa na Dios?

 ¹¹ Oniay impikasi nen David ed si Jehova: “Ibangat mo ak a mangunor na linawam.” (Basaen so Salmo 143:5, 8, 10.) Imbes a manmatalek ed dilin kakabatan to odino paimpluensyaan ed ibabaga na arum, nampaibangat si David ed Dios. ‘Dinalepdep to iray amin a ginawa nen Jehova tan ninonot ton lanang iray kimey na Dios.’ Naamtaan tayoy linawa na Dios diad panaral a maong ed Kasulatan, tan pandalepdep ed saray rekord na Biblia nipaakar ed impideneng nen Jehova ed totoo.

12, 13. Akin et inyibung nen David so danum ya inala na saray taloran sundalo parad sikato?

¹² Say apresasyon nen David ed saray prinsipyo na Ganggan tan say pilalek ton manbilay unong ed saratan et balibalin aligen. Imanoen no antoy agawa sanen imbaga nen David a labay toy oninum na “danum manlapud bobon na Betlehem.” Linma so talora ed saray sundalo tod syudad a kawalaan na saray Filisteo, tan angala ra na danum. Balet, “ag-itan ininum nen David noagta inyibung to parad si Jehova.” Akin? Oniay imbaga nen David: “Agkon balot sarag a gawaen iya, ta walay respetok ed Dios! Inumen ko kasi so dala na sarayan lalaki ya angipeligro na bilay da?”​—1 Awa. 11:15-19, NW.

¹³ Amta nen David ya unong ed ganggan, kaukolan ya iyibung ed dalin so dala parad si Jehova tan agnepeg a kanen. Amta to met no akin a kaukolan iyan gawaen. Amta ton “say bilay na laman wala ed dala.” Balet, danum itan, aliwan dala. Akin et ag-itan ininum nen David? Inapresya toy prinsipyo na satan a ganggan. Parad si David, say danum et mabli a singa say dala na saraman a taloran lalaki. Kanian, agto nitepel ya inumen so danum. Imbes, inyibung to itan ed dalin.​—Lev. 17:11; Deu. 12:23, 24.

14. Antoy tinmulong ed si David a naamtaay panmoria nen Jehova?

 ¹⁴ Inaral a maong nen David so ganggan na Dios. Oniay inkanta to: “Say panggaway linawam, O Dios ko, so panliliketan ko, Tan say ganggan mo et walad pusok.” (Sal. 40:8, NW) Inaral nen David iray ganggan na Dios tan dinalepdep to iratan. Sikatoy nanmatalek ed kakabatan a walad saray ganggan nen Jehova. Kanian bilang resulta, aglabat tinulok nen David so ganggan noagta tinebek to met so prinsipyo na Mosaikon Ganggan. No aaralen tayoy Biblia, kaukolan ya dalepdepen tayoy babasaen tayo tan pansiansiaen itan ed puso pian nagawaan no antoy makapaliket ed si Jehova.

15. Antoy ginawa nen Solomon a mangipapatnag ya agto tinulok so Ganggan na Dios?

¹⁵ Inad-aro nen Jehova si Solomon ya anak nen David. Balet, sinmabi panaon ya agto la tinulok so ganggan nen Jehova ed saray ari na Israel ya ‘agmangaasawa na dakel.’ (Deu. 17:17) Diad tua, angasawa si Solomon na dakel a sangkailin bibii. Sanen sikatoy masiken la, “say puso to et sinagyat na saray asawa to a manlingkor ed arum a dirios.” Antokaman so nayarin irason to, si Solomon et “ginmapon manggaway mauges ed imaton nen Jehova, tan agto sigpot a tinumbok si Jehova a singa si David ya ama to.” (1 Ara. 11:1-6, NW) Talagan importante so itulok ed saray ganggan tan prinsipyon walad Salita na Dios! Lalo la no plaplanoen tayoy miasawa.

16. Akin a say pakatebek ed prinsipyo na ganggan a miasawa “dia labat ed Katawan” et importantid saray manplaplanon miasawa?

¹⁶ No walay onggugusto ed sikan agmandadayew ed si Jehova, kasin say reaksion mo et miparad si David odino ed si Solomon? Nasisimbawa iray tuan Kristiano a miasawa “dia labat ed Katawan.” (1 Cor. 7:39) No miasawa so sakey a Kristiano, kaukolan a diad kapananisiaan to. Tan no natebek toy prinsipyo na saray Makasulatan a kakaukolanen, agto labat la paliisay piasawa ed agmananisia, noagta agto met mangipapanengneng na interes ed agmananisia.

17. Antoy ontulong ed sikatayon napaliisay patit na pornograpiya?

¹⁷ Imanoen tayo met no panon a say alimbawa nen David ed impangunor tod panangigiya na Dios so ontulong ed sikatayon nalabanay tukson manbantay na pornograpiya. Basaen irayan teksto, nonoten iray prinsipyon karga na saraya, tan tebeken no antoy panmoria nen Jehova ed sayan bengatla. (Basaen so Salmo 119:37; Mateo 5:28, 29; Colosas 3:5.) Say pandalepdep ed sarayan prinsipyo et ontulong ed sikatayon napaliisay patit na pornograpiya.

18, 19. (a) Anggan agperpekto, antoy akatulong ed si David a mansiansiad panangaro na Dios? (b) Antoy determinadom a gawaen?

¹⁸ Anggan dakel iray maabig ya alimbawa nen David, sikatoy akagawa na pigaran seryoson kasalanan. (2 Sam. 11:2-4, 14, 15, 22-27; 1 Awa. 21:1, 7) Balet, nagbabawian to iray kasalanan to. Sikatoy nanakar a kaibay Dios a walay “katooran na puso.” (1 Ara. 9:4) Akin et nibaga tayo itan? Lapud ginawa nen David so anggaay nayarian ton unoren so linawa nen Jehova.

¹⁹ Anggan ag-itayo perpekto, makapansiansia tayod panangaro nen Jehova. Pian nagawaan itan, maseet tayon aralen so Salita na Dios, dalepdepen, tan iyaplika iratan a tampol. Diad ontan, naalig tayoy pikakasi na salmista ya: “Ibangat mo ak a mangunor na linawam.”