1, 2. Dicon semper ta bon pa nos busca manera pa sa kico ta Dios su punto di bista, y kico nos lo siña for di e ehempel di Rey David?

IMAGINA cu bo ta canando den un teritorio cu bo no conoce bon. Dado momento, bo ta yega un caminda cu bo tin cu scoge entre dos direccion. Awor, cua di nan bo tin cu scoge? Probablemente bo ta puntra un persona cu conoce e teritorio bon pa yuda bo. Ora di tuma decision importante den bida, nos tin cu haci mescos. Nos mester acudi na Jehova, nos Creador, kende sa tur cos, anto e lo yuda nos ‘cana den e caminda’ cu e ta aproba.​—Isa. 30:21.

² Rey David di antiguo Israel tabata un bon ehempel pa nos. Semper el a busca manera pa sa kico tabata Jehova su punto di bista. Di e forma ey, el a demostra cu su curason tabata completamente dedica na Jehova. Pesey, laga nos analisa algun suceso den David su bida y siña for di e manera cu el a trata cu situacion dificil.​—1 Rey. 11:4.

3, 4. (a) Kico a motiva David pa enfrenta Goliat? (b) Ki balor e nomber di Dios tabatin pa David?

³ Pensa riba e ocasion cu David a enfrenta e Filisteo Goliat. Kico a motiva e hoben aki pa enfrenta un gigante di mas o menos 2,9 meter kende tabata bon arma? (1 Sam. 17:4) Su curashi kisas? Of tabata su fe den Dios? Wel, e dos cualidadnan aki sigur a hunga un rol importante, pero loke specialmente a motiva David pa enfrenta e gigante aki tabata e respet cu e tabatin pa Jehova y pa Su gran nomber. Indigna, David a puntra: “Ken e Filisteo incircuncida aki ta, cu e ta reta e ehercitonan di e Dios bibo?”​—1 Sam. 17:26.

⁴ David a bisa Goliat: “Bo ta bin riba mi cu spada,  cu lansa y cu jabalina, ma ami ta bin riba bo den e nomber di e SEÑOR di ehercitonan, e Dios di e ehercitonan di Israel, kende bo a reta.” (1 Sam. 17:45) David a depende riba e Dios berdadero y a tumba e gigante cu un solo piedra. No ta na e ocasion ey so David a confia den Jehova y a mustra respet pa Su nomber; el a haci esey henter su bida. David a urgi su compañeronan Israelita pa nan sinti nan orguyoso di Jehova su nomber santo.​—Lesa 1 Cronicanan 16:8-10, BPK. *

5. Con hende awe ta mustra falta di respet pa Jehova, manera Goliat a haci, y con nos mester reacciona den un caso asina?

⁵ Abo ta orguyoso di ta un Testigo di Jehova? (Jer. 9:24) Con bo ta reacciona ora coleganan di trabou, compañeronan di scol, famia of bisiñanan ta papia malo di Jehova y ta haci cherche di su Testigonan? Bo ta defende e nomber di Jehova y confia cu E lo sostene bo? Ta berdad cu tin ora nos mester “keda keto.” Pero nos no mester tin berguensa di ta Testigo di Jehova y siguidor di Hesus. (Ecl. 3:1, 7; Mar. 8:38) Pues, maske nos ta uza tacto y ta keda cariñoso cu hende cu no ta respeta Jehova ni su mensahe, nos no kier ta manera e Israelitanan kendenan a spanta y “a haya hopi miedo” ora nan a tende e palabranan di Goliat. (1 Sam. 17:11) Mas bien, nos mester ta semper cla pa defende e nomber santo di Jehova, pasobra nos deseo ta pa yuda hende haya sa ki clase di Dios Jehova ta realmente. Pa logra esey, nos ta uza Bijbel pa laga hende mira dicon ta importante pa nan hala cerca Dios, esta, cultiva un bon relacion cu ne.​—Sant. 4:8.

6. Kico tabata e motibo principal pakico David a enfrenta Goliat, y kico mester ta nos meta principal?

⁶ E relato di David y Goliat ta siña nos un otro les importante. Ora David a core yega e campo di bataya, el a puntra: “Kico lo wordo haci pa e homber cu mata e Filisteo aki y kita e reproche for di Israel?” E pueblo a bis’e e mesun cos cu nan a bisa anteriormente, esta, cu “e homber cu [mata Goliat], esey rey lo enrikece cu gran rikesa, y lo dun’e su yiu muher.” (1 Sam. 17:25-27) Pero David su interes primordial no tabata e recompensa. E tabatin algo mas importante na mente: E kier a halsa e nomber di e Dios berdadero. (Lesa 1 Samuel 17:46, 47.) Kico di nos? Kico ta nos meta principal? Nos kier traha un nomber pa nos mes, acumulando rikesa y bira un persona importante den mundo? Siguramente nos kier ta manera David, kende a canta: “O engrandece SEÑOR cu mi, y laga nos halsa su nomber hunto.” (Sal. 34:3) Pues, laga nos confia den Dios, mustrando mas interes den su nomber cu den esun di nos.​—Mat. 6:9.

7. Con nos por cultiva un fe fuerte pa por enfrenta hende cu no kier scucha nos mensahe?

⁷ Pa David por a enfrenta Goliat cu curashi, e mester tabatin un fe fuerte y pleno confianza den Jehova. Un di e cosnan cu a yud’e edifica un fe fuerte ta e echo cu, como wardador di carne, semper el a depende riba Dios. (1 Sam. 17:34-37) Nos tambe mester tin un fe fuerte pa nos por sigui predica, specialmente ora nos topa hende cu no kier scucha nos mensahe. Pesey, nos tambe mester depende riba Jehova den nos bida diario. Con? Por ehempel, nos por cuminsa un combersacion cu hende cu ta sinta banda di nos den transporte publico. Y pakico no papia cu hende cu nos topa riba caya ora nos ta predica di cas pa cas?​—Echo. 20:20, 21.

8, 9. Ora Rey Saul tabata busca David pa mata, con David a mustra cu e boluntad di Jehova tabata e cos di mas importante p’e?

⁸ Un otro ehempel cu a mustra cu David tabata confia den Jehova tin di haber cu Saul​—e prome rey di Israel. Saul tabata jaloers riba David. Na tres ocasion, el a tira lansa riba dje pa peg’e den muraya. Pero tur biaha David a scapa y no a tuma represaya tampoco. Finalmente, David a huy pa Saul. (1 Sam. 18:7-11; 19:10) Despues, Saul a scoge 3.000 homber di Israel y a bay busca David den desierto. (1 Sam. 24:2) Y tabatin un biaha cu Saul, sin cu e tabata sa, a drenta net den e cueba caminda David y su hombernan tabata scondi. David por a probecha di e oportunidad ey pa mata Saul. Al fin y al cabo, tabata Dios su boluntad pa e reemplasa Saul como rey di Israel. (1 Sam. 16:1, 13) David su hombernan a hasta conseh’e pa mata Saul. Pero David a bisa: “Cu esaki sea leu di mi di haci un cos asin’aki cu mi señor, SEÑOR su ungi, di lanta mi man contra dje, siendo cu e ta SEÑOR su ungi.” (Lesa 1 Samuel 24:4-7.) Si, e tempo ey ainda Saul tabata Dios su rey ungi. Y David no kier a kita e trono for di Saul, siendo cu Jehova mes no a haci esey ainda. Anto e echo cu David a corta solamente un pida di e mantel di Saul a mustra cu e no kier a hacie daño.​—1 Sam. 24:11.

⁹ E ultimo biaha cu David a mira Saul, el a bolbe mustra respet pa Dios su ungi. Ora David y Abisai a yega e campamento di Saul, nan a hay’e drumi. Abisai a pensa cu ta Dios a entrega Saul den man di David. El a hasta ofrece pa e mes mata Saul cu su lansa, pero David no a permitie. (1 Sam. 26:8-11) David a keda spera riba Jehova, cu otro palabra, el a sigui busca Jehova su guia. E tabata determina pa haci Jehova su boluntad y no esun di Abisai, kende kier a mata Saul.

10. Ki situacion dificil nos por haya nos aden, y kico por yuda nos para firme?

¹⁰ Nos tambe por haya nos cu hende cu ta presiona nos pa haci loke nan ta haya ta bon en bes di anima nos pa haci Jehova su boluntad. Mescos cu Abisai, algun hende kisas ta hasta anima nos pa dal cierto pasonan sin tene cuenta cu e boluntad di Dios. Pero pa nos por para firme den un situacion asina, nos mester sa kico ta Jehova su punto di bista tocante e asunto y nos mester ta determina pa cumpli cu su boluntad.

11. Con David a sigui demostra cu e boluntad di Dios tabata e cos di mas importante p’e, y con nos por imit’e?

 ¹¹ David a pidi Jehova Dios: “Siña mi haci bo boluntad.” (Lesa Salmo 143:5, 8, 10.) Si, David no a depende riba su mes ideanan ni tabata djis haci loke otronan ta bisa. E tabata kier pa Dios siñ’e. Pesey, e tabata ‘medita riba tur Jehova su obranan y tabata reflexiona riba e obra di Su mannan.’ Nos tambe por discerni kico ta e boluntad di Dios si nos ta studia e Scritura cuidadosamente y medita riba e relatonan cu ta mustra con Jehova a trata hende den pasado.

12, 13. Dicon David a basha e awa cu e tres hombernan a trece p’e riba suela?

¹² Tin un otro cos cu nos por siña for di e ehempel di David: El a actua na harmonia cu e principionan cu tin tras di e Ley. Tuma nota por ehempel di loke a pasa ora David a bisa cu e tabatin gana di ‘bebe awa di e pos di Betlehem.’ Tres di su hombernan a risca nan bida pa drenta e stad, cu e tempo ey tabata teritorio di e Filisteonan, y a saca awa for di e pos y trece pa David. Pero “David no kier a beb’e, ma a dram’e pa SEÑOR.” Dicon? David a splica: “Leu sea di mi, o mi Dios, di haci e cos aki. Lo mi bebe e sanger di e hombernan aki cu a risca nan bida pa bay? Pasobra nan a risca nan bida pa trec’e.”​—1 Cro. 11:15-19.

¹³ David tabata sa cu e Ley a prohibi hende di come sanger; mas bien, sanger mester a ser basha riba suela. Ademas, el a compronde pakico mester a haci esaki. Si, David a compronde cu “bida di e carni ta den e sanger.” Pero ta awa David a rechasa y no sanger. Dicon el a haci esey? Pasobra el a compronde e principio cu tin tras di e ley: Sanger ta precioso den bista di Jehova. Anto siendo cu e tres hombernan ey por a muri ora nan a bay saca awa p’e, David a sinti cu lo tabata un falta di respet pa nan sanger precioso si el a bebe e awa. Pesey, en bes di beb’e, el a bash’e riba suela.​—Lev. 17:11; Deu. 12:23, 24.

14. Con bin David por a tuma decisionnan cu a agrada Jehova?

 ¹⁴ David a ocupa su mes diariamente cu e ley di Dios. El a canta: “Pa haci bo boluntad, o mi Dios, ta un delicia pa mi; bo Ley ta den mi curason.” (Sal. 40:8) David tabata studia e ley di Dios y medita profundamente riba dje. E tabata convenci cu si e cumpli cu Jehova su mandamentonan lo bay bon cu ne. Pesey, e tabata ansioso pa cumpli cu e reglanan di e Ley y tambe cu e principionan cu tin tras di esakinan. Ora nos ta studia Bijbel, ta sabi pa medita riba loke nos ta lesa. Dicon? Pasobra ora nos ta medita, loke nos a siña ta baha den nos curason. Y esey ta pone cu nos por tuma decisionnan cu ta agrada Jehova.

15. Con Salomon a desobedece e Ley di Dios?

¹⁵ Salomon, yiu di David, a ricibi hopi bendicion for di Jehova Dios. Sinembargo, despues di tempo, Salomon a cuminsa desobedece e Ley di Dios. E no a haci caso di Jehova su mandamento cu a bisa cu un rey Israelita “no mester tuma hopi esposa pa su mes.” (Deu. 17:17) Salomon a casa cu hopi muher stranhero. Y ora el a bira bieu, “su esposanan a haci su curason desvia pa sigui tras di otro diosnan.” Maske Salomon por a bin cu yen di excuus, echo ta cu e tabata “haci loke tabata malo den bista di SEÑOR, y no tabata sigui SEÑOR completamente, manera su tata David a haci.” (1 Rey. 11:1-6) Pesey ta masha importante pa obedece e ley- y principionan cu nos ta siña den e Palabra di Dios. Por ehempel, esaki ta masha importante si nos tin pensa di casa.

16. Con e spirito cu tin tras di e ley pa casa “basta ta den Señor” ta yuda nos?

¹⁶ Con nos ta reacciona ora un persona cu no ta Testigo di Jehova mustra interes romantico den nos? Nos ta reacciona manera David, of nos ta haci manera Salomon? Bijbel ta bisa cu adoradornan berdadero ta liber pa casa “basta ta den Señor.” (1 Cor. 7:39) Pues, si un Testigo di Jehova kier casa, e mester casa cu un Testigo di Jehova. Ademas, si nos ta compronde e spirito cu tin tras di e ley aki, nos lo no ni permiti un persona cu no ta sirbi Jehova mustra interes romantico den nos.

17. Kico por yuda nos evita di cay den e trampa di pornografia?

¹⁷ E ehempel di David, kende a busca Jehova su guia, por yuda nos resisti tentacion pa wak pornografia tambe. Lesa e siguiente textonan, pensa riba e principionan cu tin nan tras y purba di saca afo kico Jehova ta pensa tocante pornografia. (Lesa Salmo 119:37; Mateo 5:28, 29; Colosensenan 3:5.) Ora nos ta medita riba Jehova su normanan eleva, nos lo no cay den e trampa di pornografia.

18, 19. (a) A pesar cu David tabata imperfecto, kico a yud’e keda cu Dios su aprobacion? (b) Kico abo ta determina pa haci?

¹⁸ Aunke David tabata un bon ehempel den hopi aspecto, el a yega di comete varios pica serio. (2 Sam. 11:2-4, 14, 15, 22-27; 1 Cro. 21:1, 7) No obstante, semper el a arepenti di su picanan. David a cana “den integridad di curason.” (1 Rey. 9:4) Dicon nos por bisa esey? Pasobra semper el a haci esfuerso pa agrada Jehova.

¹⁹ A pesar cu nos ta imperfecto, nos por tin Jehova su aprobacion. Pesey, laga nos studia e Palabra di Dios diligentemente, medita profundamente riba loke nos ta siña y laga esaki baha den nos curason y aplic’e mesora. Si nos ta haci e cosnan aki, nos lo ta manera e salmista kende humildemente a pidi Jehova den oracion: “Siña mi haci bo boluntad.”