“Hanorin haʼu atu halo Ita-nia hakarak”
“Hanorin haʼu atu halo Ita-nia hakarak, tanba Ita mak haʼu-nia Maromak.”—SAL 143:10.
1, 2. Hodi buka-hatene Maromak nia hakarak, ida-neʼe bele ajuda ita atu halo saida? Liurai David fó ezemplu diʼak saida?
HANOIN toʼok se ita laʼo iha foho neʼebé ita seidauk hatene. Liutiha tempu balu, ita hasoru dalan rua. Dalan ida neʼebé mak ita sei hili? Atu bele hili dalan neʼebé loos, karik ita saʼe ba fatin ruma neʼebé aas liu no hateke tun ba kraik hodi haree didiʼak dalan rua neʼe lori ita ba neʼebé. Nuneʼe mós kuandu ita atu halo desizaun importante ruma, ita presiza buka-hatene Maromak Jeová nia haree no ninia hakarak kona-ba neʼe. Ida-neʼe sei ajuda ita atu halo tuir Jeová nia hakarak, no ‘laʼo tuir dalan’ neʼebé nia simu.—Isa 30:21.
2 Liurai David husi Israel antigu fó ezemplu diʼak tebes kona-ba buka-hatene Maromak nia haree iha situasaun oioin hodi bele halo tuir Ninia hakarak. David mak ema neʼebé fó ninia laran tomak ba Maromak Jeová. Tan neʼe, mai ita aprende husi buat neʼebé David halo kuandu nia hasoru situasaun susar balu.—1 Reis 11:4.
DAVID HAFOLIN JEOVÁ NIA NARAN
3, 4. (a) Saida mak book David atu hamriik hasoru Golias? (b) David sente oinsá kona-ba Maromak nia naran?
3 Hanoin toʼok kona-ba tempu neʼebé David hasoru asuwaʼin ida husi tropa Filístia, naran Golias, neʼebé ain-aas besik metru 2,9 no hatais funu nian ho kompletu. Saida mak book joven David atu hamriik hasoru jigante neʼe? (1 Sam 17:4) Aten-brani, ka fiar metin ba Maromak? Klaru katak hahalok rua neʼe importante tebes. Maibé, buat neʼebé book liu nia atu hamriik hasoru Golias mak respeitu ba Jeová no Ninia naran. David hatete: “Sé mak ema Filístia neʼe, neʼebé la hetan sirkunsizaun, neʼebé goza tropa Maromak moris nian?”—1 Sam 17:26.
4 David hatete ba Golias: “Ó mai hasoru haʼu ho surik no diman, maibé haʼu mai hasoru ó ho Jeová, Naʼi funu-naʼin nia naran, tropa Israel nia Maromak, neʼebé ó koʼalia aat.” (1 Sam 17:45) Hodi tau fiar ba Maromak neʼebé loos, David oho Golias hodi soe fatuk ida deʼit ho tali. David tau fiar ba Jeová no hafolin Maromak nia naran laʼós iha situasaun ida-neʼe deʼit, maibé iha ninia moris tomak. No David mós fó laran-manas ba ninia maluk ema Israel atu ‘gaba an iha Jeová nia naran santu’.—Lee 1 Crônicas 16:8-10. *
5. Ohin loron, ema hatudu hahalok saida deʼit hanesan Golias?
5 Ita mós gaba an tanba Jeová mak ita-nia Maromak ka lae? (Jer 9:24) Kuandu ita-nia viziñu, kolega serbisu ka eskola, ka ita-nia família koʼalia aat kona-ba Jeová no goza Ninia Testemuña sira, ita halo saida? Kuandu ema hatún Jeová hanesan Golias halo iha tempu uluk, ita defende Ninia naran hodi tau fiar ba Ninia ajuda ka lae? Sin, ita hatene katak “iha tempu atu nonook”, maibé ita labele moe tanba ita Testemuña ba Jeová no Jesus nia dixípulu. (Ecle 3:1, 7; Mc 8:38) Maski ita presiza uza matenek no hatudu respeitu kuandu koʼalia ba ema neʼebé la simu Jeová, maibé ita labele sai hanesan ema Israel sira neʼebé “nakdedar no taʼuk tebes” kuandu sira rona Golias nia liafuan. (1 Sam 17:11) Duké sai hanesan neʼe, mai ita hamriik metin hodi defende Jeová nia naran neʼebé santu. Ita hakarak duni ajuda ema seluk atu hatene Jeová mak Maromak oinsá loos. Tan neʼe, mai ita uza Maromak nia Liafuan no hakaʼas an atu ajuda ema hatene katak importante duni atu hakbesik ba Maromak.—Tgo 4:8.
6. Kuandu David hasoru Golias, saida mak importante liu ba David? Kona-ba saida mak ita presiza hanoin uluk?
6 Istória kona-ba David hasoru Golias mós hanorin ita buat ida tan neʼebé importante. Kuandu David halai ba parte oin iha fatin neʼebé tropa Israel atu halo funu hasoru tropa Filístia, nia husu: “Ema neʼebé oho ema Filístia iha neʼebá no halakon duni moe husi ema Israel, ema neʼe sei hetan saida?” Ema repete filafali buat neʼebé sira hatete ona, hodi dehan: “Ema neʼebé oho [Golias], liurai sei halo nia sai riku ho rikusoin barak, no fó ninia oan-feto rasik ba ema neʼe.” (1 Sam 17:25-27) Maibé, hetan rikusoin laʼós buat neʼebé importante liu ba David. Ninia hakarak mak atu fó glória ba Maromak neʼebé loos. (Lee 1 Samuel 17:46, 47. *) Oinsá ho ita? Ita hanoin uluk liu kona-ba ita rasik nia naran hodi hetan rikusoin barak ka naran-boot iha mundu neʼe ka lae? Klaru katak ita hakarak sai hanesan David, neʼebé kanta: “Mai imi hotu, mai fó glória ba Jeová hamutuk ho haʼu, no mai ita hamutuk hahiʼi nia naran.” (Sal 34:3) Tan neʼe, hanesan David, mai ita tau fiar ba Maromak no hanoin uluk kona-ba Ninia naran duké ita rasik nia naran.—Mt 6:9.
7. Saida mak bele ajuda ita atu hametin ita-nia fiar hodi bele kontinua haklaken maski ema la simu ita-nia mensajen?
7 Atu bele hasoru Golias ho aten-brani, David presiza iha fiar neʼebé metin ba Jeová. Dalan ida neʼebé David hametin ninia fiar mak hodi sadere ba Jeová iha ninia serbisu nuʼudar bibi-atan. (1 Sam 17:34-37) Ita mós presiza iha fiar neʼebé metin atu bele kontinua haklaken, liuliu kuandu ita hasoru ema neʼebé la simu ita-nia mensajen. Dalan ida neʼebé ajuda ita atu hametin ita-nia fiar mak hodi sadere ba Jeová iha ita-nia atividade loroloron nian. Porezemplu, kuandu ita saʼe bís ka mikrolet, ita bele koʼalia kona-ba lia-loos husi Bíblia ho ema neʼebé tuur iha ita-nia sorin. No mós, kuandu ita haklaken husi uma ba uma, diʼak atu koʼalia mós ho ema neʼebé ita hasoru iha dalan.—Apos 20:20, 21.
DAVID HANOIN TUIR JEOVÁ NIA HANOIN
8, 9. Kuandu Saul buka atu oho David, oinsá mak David hatudu katak nia hanoin tuir Jeová nia hanoin?
8 Dalan ida seluk neʼebé David hatudu ninia fiar ba Jeová mak hodi hanoin tuir Jeová nia hanoin kona-ba Saul, Israel nia liurai primeiru. Maski Saul koko atu oho David ba dala tolu tanba laran-moras, maibé David nunka hanoin selu fali aat ho aat. Ikusmai, David halai-sees husi Saul. (1 Sam 18:7-11; 19:10) Maibé, Saul hili soldadu naʼin-3.000 husi Israel tomak no bá buka David iha rai-fuik maran. (1 Sam 24:2) Loron ida, Saul tama iha fatuk-kuak ida neʼebé David ho ninia maluk sira subar hela. David bele haree ida-neʼe nuʼudar oportunidade atu oho Saul tanba Maromak hatete tiha ona katak David mak sei troka Saul nia fatin nuʼudar liurai. (1 Sam 16:1, 13) David nia maluk sira mós fó laran-manas ba nia atu oho Saul. Maibé David hatete: “Ba haʼu, husi Jeová nia haree, haʼu labele hanoin katak haʼu sei halo ida-neʼe ba haʼu-nia naʼi, ida neʼebé Jeová kose mina.” (1 Sam 24:4-7) Sin, tanba Jeová seidauk hasai Saul husi ninia pozisaun nuʼudar liurai, David lakohi hadau ninia fatin. Tan neʼe, David koʼa deʼit Saul nia roupa sorin hodi hatudu katak nia la hanoin atu halo aat ba Saul.—1 Sam 24:11.
9 Liutiha tempu balu kuandu David haree Saul ba dala ikus, David hatudu nafatin respeitu ba nia nuʼudar liurai neʼebé Maromak hili. Iha tempu neʼebá, David ho Abisai toʼo iha fatin neʼebé Saul ho ninia tropa mak harii tenda, no sira haree Saul toba hela. Tan neʼe, Abisai hanoin katak Maromak mak entrega inimigu neʼe iha David nia liman, no nia husu ba David atu husik nia oho Saul ho diman hodi borus toʼo rai. Maibé, David la husik Abisai halo ida-neʼe. (1 Sam 26:8-11) Tanba David hein nafatin ba Jeová, nia lakohi halo aat ba liurai neʼebé Jeová hili maski Abisai hakaʼas nia atu oho Saul.
10. Dala ruma, ita hasoru situasaun saida? Saida mak bele ajuda ita atu hamriik metin?
10 Dala ruma, ita mós hasoru situasaun neʼebé ema seluk hakaʼas ita atu halo tuir sira rasik nia hanoin duké ajuda ita atu halo tuir Jeová nia hakarak. Hanesan Abisai halo ba David, karik sira mós fó laran-manas mai ita atu halo buat ruma hodi la hanoin oinsá Maromak haree situasaun neʼe. Maibé atu hamriik metin, ita presiza hatene ho klaru Jeová nia haree kona-ba situasaun neʼe no hakaʼas an atu halo tuir Jeová nia hakarak.
11. Oinsá mak David hatudu katak nia hanoin uluk Maromak nia hakarak? Oinsá mak ita bele halo tuir David nia ezemplu?
11 Liuhusi orasaun, David husu Maromak Jeová: “Hanorin haʼu atu halo Ita-nia hakarak.” (Lee Salmo 143:5, 8, 10. *) David la tau fiar ba ninia hanoin rasik ka tuir deʼit ema seluk nia hakarak, maibé ninia hakarak mak atu simu hanorin husi Maromak. Nia hatete: “Haʼu hanoin kleʼan kona-ba Ita-nia hahalok hotu; ho hakarak rasik haʼu hanoin kona-ba serbisu neʼebé Ita halo ho Ita-nia liman rasik.” Hanesan David, ita mós bele hakaʼas an atu buka-hatene Maromak nia hakarak hodi estuda Bíblia no hanoin kleʼan kona-ba oinsá Jeová ajuda ninia atan sira iha tempu uluk.
DAVID KOMPRENDE MAROMAK NIA HANOIN
12, 13. Tanbasá mak David fakar bee neʼebé ninia soldadu naʼin-tolu lori ba nia?
12 Ita mós bele aprende buat seluk tan husi David nia ezemplu. Husi Maromak nia ukun-fuan sira, David komprende Jeová nia hanoin iha situasaun oioin hodi bele halo desizaun neʼebé diʼak. Porezemplu, loron ida, David hatete katak nia hakarak hemu bee husi “bee-posu iha Belém”. David nia soldadu naʼin-tolu hakaʼas an hodi tama iha sidade Belém neʼebé ema Filístia mak okupa, no sira lori fali bee ba David. Maski nuneʼe, “David lakohi hemu bee neʼe, maibé fakar ba rai hodi fó fali ba Jeová”. Tanbasá? David hatete: “Ba haʼu, kuandu haʼu hanoin kona-ba haʼu-nia Maromak, haʼu labele halo ida-neʼe! Haʼu sei hemu raan husi ema sira-neʼe neʼebé tau sira-nia an iha perigu ka lae? Tanba hodi tau sira-nia moris iha perigu mak sira lori ida-neʼe.”—1 Crôn 11:15-19.
13 David hatene katak Ukun-Fuan bandu atu labele han raan no haruka atu fakar raan ba rai hodi fó fali ba Jeová. David mós hatene tanbasá mak nia tenke halo tuir ukun-fuan neʼe. Nia hatene katak “raan mak reprezenta kriatura nia moris”. Maibé, buat neʼebé soldadu sira lori mak bee, laʼós raan. Se nuneʼe, tanbasá mak David lakohi hemu bee neʼe? Tanba husi Maromak nia ukun-fuan kona-ba raan David komprende Maromak nia hanoin. Nia hatene katak Jeová haree raan nuʼudar buat neʼebé iha folin boot. No tanba soldadu sira tau sira-nia moris iha perigu laran atu lori bee, David sente katak bee neʼe folin boot hanesan sira-nia raan. Tan neʼe, duké hemu bee neʼe, David halo desizaun atu fakar fali ba rai.—Lev 17:11; Deut 12:23, 24.
14. Saida deʼit mak ajuda David atu halo desizaun neʼebé halo Jeová kontente?
14 David buka atu komprende ho loloos Maromak nia ukun-fuan. Nia kanta: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.” (Sal 40:8) David estuda Maromak nia ukun-fuan no hanoin kleʼan kona-ba neʼe. Nia fiar katak hodi halo tuir Jeová nia ukun-fuan lori rezultadu diʼak, no ida-neʼe book David laʼós deʼit atu halo tuir buat neʼebé hakerek iha Moisés nia Ukun-Fuan, maibé mós atu halo tuir Jeová nia hakarak neʼebé fó sai iha ukun-fuan sira-neʼe. Kuandu ita estuda Bíblia, ita mós presiza hanoin kleʼan kona-ba buat neʼebé ita lee tanba hodi halo nuneʼe sei ajuda ita atu moris tuir Jeová nia hakarak no halo desizaun neʼebé halo nia kontente.
15. Iha dalan saida mak Salomão la halo tuir Maromak nia Ukun-Fuan?
15 Maromak Jeová mós fó bensaun barak ba David nia oan Salomão. Maibé, neineik-neineik, Salomão la hatudu respeitu ba Maromak nia Ukun-Fuan. Nia la halo tuir Jeová nia ukun-fuan neʼebé haruka Israel nia liurai atu “labele iha feen barak”. (Deut 17:17) Liután neʼe, Salomão mós kaben ho feto barak husi rai seluk. Ikusmai, kuandu nia sai katuas ona, “ninia feen sira book nia laran atu tuir maromak sira seluk”. Maski nia karik fó razaun oioin tansá nia la halo tuir Maromak nia Ukun-Fuan, maibé realidade mak “Salomão komesa halo buat neʼebé aat iha Jeová nia matan, no nia la halo tuir loloos Jeová hanesan ninia aman, David”. (1 Reis 11:1-6) Tan neʼe, importante duni atu ita halo tuir ukun-fuan no matadalan husi Maromak nia Liafuan! Porezemplu, ida-neʼe importante kuandu ita hanoin atu kaben.
16. Ita bele aprende saida husi Jeová nia ukun-fuan atu kaben deʼit “iha Naʼi”?
16 Se ema ida neʼebé fiar la hanesan mak hatudu sentimentu gosta ba ita, ita sei halo saida? Ita sei halo tuir David nia ezemplu hodi buka-hatene Jeová nia haree no hakarak kona-ba neʼe? Ka ita sei la halo tuir Jeová nia ukun-fuan kona-ba neʼe hanesan Salomão? Maromak nia Liafuan haruka ita atu kaben deʼit “iha Naʼi”. (1 Kor 7:39) Neʼe katak kuandu ema kristaun ida hanoin atu kaben, nia tenke kaben deʼit ho maluk kristaun neʼebé dedika an ona ba Jeová no hetan batizmu. No mós, se ita komprende ho loloos Jeová nia ukun-fuan no ninia hanoin kona-ba neʼe, ita sei la kaben ho ema neʼebé fiar la hanesan, maibé laʼós neʼe deʼit, ita mós lakohi namora ka haburas sentimentu gosta ba malu ho ema neʼebé fiar la hanesan.
17. Saida mak bele ajuda ita atu hasees an husi pornografia?
17 Liután neʼe, hanoin toʼok oinsá mak David nia ezemplu kona-ba buka-hatene Maromak nia hanoin ajuda ita atu tahan hasoru tentasaun atu haree pornografia. Entaun, mai ita lee eskritura sira tuirmai neʼe, no hanoin didiʼak hodi buka-hatene Jeová nia hanoin kona-ba neʼe. (Lee Salmo 119:37; * Mateus 5:28, 29; Koloso 3:5.) Sin, atu hasees an husi pornografia, ita tenke hanoin kleʼan kona-ba Maromak nia matadalan sira.
BUKA-HATENE MAROMAK NIA HANOIN
18, 19. (a) Maski David ema sala-naʼin, maibé saida deʼit mak ajuda nia atu Jeová nafatin simu nia? (b) Saida mak Ita-nia hakarak?
18 Maski David hatudu ezemplu diʼak, nia mós halo sala boot balu. (2 Sam 11:2-4, 14, 15, 22-27; 1 Crôn 21:1, 7) Maibé, kuandu David halo sala, nia sempre arrepende an ho laran. Sin, David laʼo nafatin “ho laran-metin” ba Maromak. (1 Reis 9:4) Tanbasá mak ita bele hatete nuneʼe? Tanba David hakaʼas an atu hanoin tuir Jeová nia hanoin no moris tuir Ninia hakarak.
19 Maski ita ema sala-naʼin, ita bele halaʼo ita-nia moris iha dalan neʼebé Jeová simu. Tan neʼe, mai ita estuda Maromak nia Liafuan ho badinas, hanoin kleʼan kona-ba buat neʼebé ita aprende, no halo tuir iha ita-nia moris. Hodi halo nuneʼe, ita bele sai hanesan David neʼebé ho haraik-an halo orasaun ba Jeová hodi dehan: “Hanorin haʼu atu halo Ita-nia hakarak.”
^ par. 4 1 Crônicas 16:8-10: “8 Fó-agradese ba Jeová, bolu ninia naran, fó-hatene ninia hahalok sira iha ema nia leet! 9 Kanta ba nia, halo melodia ba nia, hanoin didiʼak kona-ba ninia hahalok furak hotu. 10 Imi gaba an bá iha ninia naran santu, ema neʼebé buka Jeová laran-haksolok bá.”
^ par. 6 1 Samuel 17:46, 47: “46 Ohin neʼe, Jeová sei saran ó iha haʼu-nia liman, no haʼu sei oho ó no koʼa ó-nia ulun; no ohin haʼu sei fó tropa Filístia nia mate-isin ba manu fuik sira iha lalehan no animál fuik sira iha rai; no ema iha mundu tomak sei hatene katak iha Maromak ida neʼebé Israel nian. 47 No ema-lubun neʼe hotu sei hatene katak Jeová lori salvasaun laʼós ho surik ka diman, tanba funu neʼe mak Jeová nian, no nia sei entrega imi iha ami-nia liman.”
^ par. 11 Salmo 143:5, 8, 10: “5 Haʼu hanoin fali kona-ba loron sira husi tempu uluk; haʼu hanoin kleʼan kona-ba Ita-nia hahalok hotu; ho hakarak rasik haʼu hanoin kona-ba serbisu neʼebé Ita halo ho Ita-nia liman rasik.” “8 Iha dadeer, fó-hatene haʼu kona-ba Ita-nia laran-diʼak neʼebé nakonu ho domin, tanba haʼu tau haʼu-nia fiar ba Ita. Halo haʼu hatene dalan neʼebé haʼu presiza laʼo, tanba haʼu hasaʼe haʼu-nia moris ba Ita hodi halo orasaun.” “10 Hanorin haʼu atu halo Ita-nia hakarak, tanba Ita mak haʼu-nia Maromak. Ita-nia espíritu mak diʼak; espíritu neʼe lori haʼu ba rai justisa nian.”
^ par. 17 Salmo 119:37: “Keta husik haʼu-nia matan atu haree buat neʼebé la iha folin; halo haʼu moris nafatin tuir Ita-nia dalan.”
