“Tesem, M̱ Er Ishima You”
“Tesem, M̱ Er Ishima You”
“Tesem, m̱ er ishima You, gadia We U ngu Aôndo wam.”—PS. 143:10.
ATÔAKAA A VESEN A I GBE U SE UMBUR YÔ
Ka akaa a nyi yange er Davidi a a tese ér mnenge u Yehova gba un kwagha?
Ka nyi yange i wase Davidi ve fa ishima i Aôndo?
Ka nyi ia wase se ve Yehova una lumun se?
1, 2. Aluer se mba eren kwagh sha ishima i Aôndo yô, a lu se a iwasen nena, man ka nyi se hen hen Tor Davidi sha gbaa nee?
TÔÔ wer u ngu zan ape u fe tsembelee ga yô. Maa gbenda za pav ker ihiar. Ka gbenda u han u zaa? Alaghga u pine or u nan fe ijiir la tsembelee wer nana tese u gbenda. Shighe u se lu tsuan akaa a hange hange a se er ken uma wase la kpa, aluer se er kwagh nahan yô, a wase se kpishi. Aluer se mba pinen Yehova u a fe akaa cii la ser a tese se kwagh u se er yô, kwagh ne una wase se u ‘zan sha gbenda’ u a lumun a mi la.—Yes. 30:21.
2 Davidi, Tor u Iserael u tsuaa la yange ver se ikyav i dedoo ken uma na cii, sha u eren kwagh sha ishima i Aôndo. De se time sha akaa agen a yange er ken uma u Davidi la, sha er se hen kwagh ken ieren na yô, gadia lu or u ishima na cii lu sha Yehova Aôndo yô.—1 Utor 11:4.
DAVIDI YANGE TESE ICIVIR SHA ITI I YEHOVA
3, 4. (a) Lu nyi i mgbegha Davidi ve tagher ishigh a Goliati? (b) Davidi yange nengen iti i Aôndo nena?
3 Nenge ase kwagh u yange er shighe u Davidi tagher ishigh a kurutya u Mbafiliti, Goliati la. Lu nyi i mgbegha Davidi u lu gumor la ve tagher ishigh a kurutya u tav kuma aseva ataratar cir tiôn shi lu a ikyav mbi utyaav laa? (1 Sam. 17:4) Lu ishimataver i Davidi i mgbegha un yee? Shin lu sha ci u jighjigh u na Aôndo laa? Ishimataver man jighjigh u nan cii ka aeren a dedoo, nahan cii kpa, kwagh u yange na ve Davidi nôngo ityav a ikyôror Goliati yô, lu sha ci u a tese icivir sha iti i Yehova. Ishima yange i vihi Davidi sha ci u Goliati lu lahan ior mba Aôndo. Davidi kaa ér: “Orfiliti oripusu ne ngu nyi je, man a bamen akumautya a Aôndo u uma?”—1 Sam. 17:26.
4 Gumor Davidi kporom ikyua a Goliati yô, Davidi kaa ér: “U ngu van her a mo a sanker man iwange kua dagi, kpa mo yô, m ngu van hen a we ken iti i TER u akum a Sha, Aôndo u akumautya a Iserael, u u bamen Un la.” (1 Sam. 17:45) Er Davidi suur sha Aôndo u mimi yô, a ta kurutya u Mbafiliti la iwen i môm tseegh gbihi inya. Lu hen shighe ne tseegh Davidi suur sha Yehova shi tese icivir sha iti i Aôndo ga, yange er kwagh ne ken uma na jimin cii. Sha kpôô yô, Davidi taver Mbaiserael mbagenev ishima ér ve ‘ta ihyagh sha icighanti u Yehova.’—Ôr 1 Kroniku 16:8-10.
5. Ior mba lahan iti i Yehova nyian, er Goliati nahan nena?
5 Ka ú kwagh u tan ihyagh er Yehova a lu Aôndo wou la kpa? (Yer. 9:24) Mbawan ndor a we man mba u eren tom a ve man mba u ze makeranta a ve kua mba hen tsombor wou ka vea ôr kwagh u dang sha iti i Yehova man Mbashiada nav nahan, u er nena? Ka a lam sha iti i Yehova dang nahan, u ôr kwagh sha u paase iti na, a jighjigh u nan wer una sue u kpa? Er shighe ugen ka i lu “shighe u huan ving” nahan kpa, gba kpee u kunya a kôr se u pasen mbagenev ser se mba Mbashiada mba Yehova man mbadondon Yesu ga. (Orpa. 3:1, 7; Mar. 8:38) Doo u se eren kwagh a mba ve kegh iyol u ungwan loho wase ga mbara kundu kundu man sha kwaghfan kpaa. Nahan cii kpa, se lu nen er Mbaiserael mba ve ungwa mkaanem ma Goliati ma sha ilyahan la ve “cier ve iyol, ve cia kpishi” la nahan ga. (1 Sam. 17:11) Kpa se ôr kwagh gbar gbar sha u tseghan iti i Yehova Aôndo. Isharen yase yô, ka u wasen ior ve fa imba Aôndo u Yehova a lu jim jim la. Sha ityôkyaa ne yô, ka se er tom a Bibilo sha u wasen ior ve nenge er i doo u vea kporom ikyua a Aôndo yô.—Yak. 4:8.
6. Lu nyi i hemba gban Davidi ishima ve nôngo ityav a Goliati, man ka nyi i gbe u ia hemba gban se ishima?
6 Kwagh u Davidi vea Goliati la tese se kwagh vesen ugen kpaa. Shighe u Davidi coon ayem za hen tangeutya la, a pine ér: “Á er a or u nana wua Orfiliti ne, man nana tôô ihyeen i Iserael kera la nana?” Ior gema ôr kwagh u ve vande ôron la, ér: “Aluer or nana wua [Goliati] yô, tor una na nan nana hingir ornyar kpishi, shi una na nan wan na u kwase” kpaa. (1 Sam. 17:25-27) Kpa lu inyaregh ki zuan a mi lu Davidi kwagh u vesen ga. Kwagh ugen yange hemba gban un ishima. Davidi yange soo u tesen icivir sha iti i Aôndo u mimi. (Ôr 1 Samuel 17:46, 47.) Se di ye? Ka hembe gban se ishima u duen iti shi lun a inyaregh kpishi shi hingir tagher tagher ken tara? Mimi yô, se soo u lun er Davidi nahan. Yange wa icam kaa ér: “Kehe nen iti i TER a mo imôngo; sé kende nen iti Na sha imôngo.” (Ps. 34:3) Yô, se suur nen sha Aôndo shi se tesen ser iti na hemba gban se kwagh a iti yase.—Mat. 6:9.
7. Se er nan ve se lu a jighjigh u nan taveraa, sha er zum u ior ve soo u ungwan loho wase ga kpa, se gba uwer u pasen kwagh ga?
7 Yange gba u Davidi una suur sha Yehova shi una lu a jighjigh u nan taveraa ve una tagher vanger a Goliati ye. Shighe u Davidi kuran ilev la, a hen u suur sha Yehova. Kwagh ne wase un lu a jighjigh u nan taveraa. (1 Sam. 17:34-37) Gba u se kpa se lu a jighjigh u nan taveraa ve se fatyô u zan hemen u pasen kwagh ye, hemban je yô, shighe u se tagher a ior mba ve soo u ungwan loho wase ga yô. Se fatyô u lun a imba jighjigh u nan ne sha u suur sha Aôndo sha hanma kwagh u se eren ayange ayange cii. U tesen ikyav yô, shighe u se nyer mato yô se fatyô u hiin iliam a ior mba ve tem ikyua a vese la sha ma kwagh u Bibilo i er yô. Shi doo u se lamen a ior mba se zough a ve sha godobi shighe u se lu pasen kwagh sha uya uya la kpaa.—Aer. 20:20, 21.
DAVIDI YANGE KEGH YEHOVA
8, 9. Shighe u Saulu lu keren u wuan Davidi la, Davidi tese ér un soo u eren ishima i Yehova nena?
8 Ikyav igen i tesen ér Davidi yange soo u suur sha Yehova yô, lu sha kwagh u Saulu, tor u Iserael u hiihii la. Saulu u lu eren Davidi iyuhe la, yange nôngo kwa tar ér una tume Davidi iwange i kar i za kôr ken kpekpe, kpa hanma kwa yô Davidi palegh, shi lumun u oron iyev ga. Ken masejime yô, a yevese Saulu. (1 Sam. 18:7-11; 19:10) Saulu maa mough a iorov 3,000, uicuwanmbaiorov mba i sange ve a sange ken Iserael cii, ve gba za keren Davidi ken taaikyôngo. (1 Sam. 24:2) Iyange igen yô, Saulu fa ga maa za nyôr ken bar, ape Davidi a ior nav lu la. Davidi yange una soo yô ma wua tor u lu keren un a ku ne. Kera kpa, lu ishima i Aôndo u Davidi a kar a tema tor sha Iserael sha ityough ki Saulu. (1 Sam. 16:1, 13) Sha kpôô yô, Davidi yange una ongo kwaghwan u ior mba ve lu vea na la yô, ma wua tor sha. Kpa Davidi kaa ér: “TER A̱ yangem er me er terem kwagh ne ga yô, ka or u TER, u i shigh un mkurem yô.” (Ôr 1 Samuel 24:4-7.) Saulu lu tor u Yehova shighe un mkurem yô. Nahan Davidi soo u ngohol un tor ga, sha ci u Yehova lu a dugh un tor kera ga. Er Davidi tôndo tsumbuikyondo u Saulu tseegh yô, tese ér Davidi lu a awashima u wuan Saulu ga.—1 Sam. 24:11.
9 Kwa u masetyô u Davidi nenge a tor la kpa, a tese icivir sha or u Aôndo shighe un mkurem la. Davidi vea Abishai, za ape Saulu haa afo la, nahan ve kohol un lu yaven. Shin er Abishai kaa ér Aôndo na orihyom u Davidi sha ikyev na, nahan a de una tume un iwange i kar i kôr shin inya nahan kpa, Davidi lumun ga. (1 Sam. 26:8-11) Er Davidi lu keghen Yehova, shi soo ér Aôndo a hemen un yô, a venda u wuan tor u Yehova shighe un mkurem la, shin er Abishai soo ér a wua un nahan kpaa.
10. Ka zayol u nyi alaghga se tagher a mini, man ka nyi ia wase se ve se tile dông-nô?
10 Se kpa alaghga azende a ase a soo u kighir se ér se dondo mhen ve, aa kera wa se kwagh ér se er ishima i Yehova ga. Alaghga mbagenev vea taver se ishima ér se nenge sha ma zayol sha gbenda u u doo Aôndo ga je kpaa, er Abishai nahan. Aluer se soo u tilen dông yô, gba u se fa mnenge u Yehova a lu a mi sha zayol wase la wang, shi se kange ishima ser se dondo igbenda na kpaa.
11. Ka nyi u hen hen Davidi sha kwagh u eren ishima i Aôndo?
11 Davidi yange er msen hen Yehova Aôndo ér: “Tesem, m̱ er ishima You.” (Ôr Pasalmi 143:5, 8, 10.) Davidi suur sha mbamhen nav shin de ér orgen nana tuur un u eren ishima i nan ga, kpa a kegh iyol ér Aôndo a tese un kwagh u una er yô. Davidi yange ‘hen kwagh sha aeren a Yehova cii, a hen kwagh ken ishima sha tom u ave a Aôndo je.’ Se kpa se fatyô u fan ishima i Aôndo sha u timen ken Ruamabera shi gbidyen kwar sha avur a Bibilo a a er kwagh u igbenda i Yehova a eren kwagh a uumace la.
DAVIDI YANGE FA U DONDON AKAAWAN A KEN TINDI
12, 13. Davidi yange haa mngerem ma ior nav utar kese va na un la hen inya sha ci u nyi?
12 Shi mfe u Davidi yange fa u dondon akaawan a ken tindi, man gbashima u lu a mi u dondon akaawan shon la kpa ka ikyav i dedoo i i doo u se dondo yô. Nenge ase kwagh u yange er shighe u Davidi kaa ér sar un u man “mngerem ma shin ijôr i Betelehem” la. Hen shighe ne Betelehem lu gar u Mbafiliti. Iorov utar ken ior mba ve lu vea na la mough za nyôr ken gar ne sha agee, za kese mngerem mara va na un. Nahan kpa, “Davidi kera lumun u man ma ga, a gema a haa ma inya sha ishigh ki TER.” Sha ci u nyi? Davidi pase ér: “Aôndo wam A̱ yangem er me er nahan ga yô; kera ka awambe a ior mba ve te uma ve kera gaa? Gadia ka sha icihi i uma ve je ve ve a ma ye.”—1 Kron. 11:15-19.
13 Davidi yange fa er Tindi kaa ér i de ye awambe ga, kpa i haa a inya sha ishigh ki Yehova yô. Shi a fa ityôkyaa i hii ve gba u a lu nahan yô. Yange fa er “uma u inyam yô, [i lu] ken awambe a lu” yô. Nahan kpa, ngun lu mngerem, lu awambe ga. Tsô hii nan ve Davidi venda u man ma? Yange fa kwaghwan u lu ken tindi ne yô. Davidi ti yô nenge ér mngerem mara lu er awambe a iorov mba utar mbara nahan. Sha nahan yô, doo un u man mngerem mara ga. Er ma ma mngerem mara yô, a gema ma a haa hen inya.—Lev. 17:11; Dut. 12:23, 24.
14. Lu nyi i wase Davidi ve lu a mnenge u Yehova?
14 Davidi yange de tindi u Aôndo hemen un vindi vindi. A wa icam ér: “Doom u eren ishima You, Aôndo wam; atindiakaa a Ou ngam ken ishima.” (Ps. 40:8) Davidi hen tindi u Aôndo shi gbidye kwar sha mi tsung. A suur sha kwaghfan u lu ken atindi a Yehova la. Sha nahan yô, a ver ishima u kuran Tindi u Mose tseegh ga, kpa a ver ishima u dondon akaawan a ker la kpaa. Shighe u se lu henen Bibilo yô, doo u se gbidye kwar sha kwagh u se lu ôron la, shi se koso kwagh shon ken ishima sha er shighe u i gbe se u eren kwagh yô, se fa kwagh u se er ve a doo Yehova yô.
15. Lu sha gbenda u nyi Solomon tese icivir sha Tindi u Aôndo ga?
15 Kwagh u Solomon, wan u Davidi, yange doo Yehova ishima kpishi. Nahan kpa, shighe kar yô, Solomon kera tese icivir sha Tindi u Aôndo ga. Yange kura tindi u Yehova wa ér tor u ken Iserael nana de “seer kasev kpishi ga” la ga. (Dut. 17:17) Mimi yô, Solomon er kasev mba ken akuraior agen kpishi. Va been iyol yô, “kasev nav gema un ishima, a dondo mbaaôndo mbagenev.” A lu nyi je Solomon hen ken ishima kpa, yange “er kwagh u a lu u bo sha ishigh ki TER, a dondo TER jighilii, er ter na Davidi nahan ga.” (1 Utor 11:1-6) Nahan ka a inja u se dondon atindi man akaawan a a lu ken Mkaanem ma Aôndo la. Ikyav i tesen yô, kwagh ne ngu hange hange shighe u se soo u vôson kwase shin nom yô.
16. Aluer mba ve we ishima u va eren nom shin kwase la kav inja i tindi u i we ér se er nom shin kwase “ken Ter tseegh” la yô, kwagh ne una wase ve nena?
16 Aluer or u nan civir Yehova a vese imôngo ga nan pine se ishiôr nahan, mlumun u se na nan la una tese ér se mba a mnenge u Davidi lu a mi laa, shin se mba a mnenge u Solomon laa? Bibilo kaa a mbacivir Aôndo mba mimi ér ve vôso kwase shin nom “ken Ter tseegh.” (1 Kor. 7:39) Aluer Orkristu soo u vôson kwase shin nom yô, nana vôso or shin kwase u ve civir Aôndo imôngo yô. Shi aluer se kav inja i kwaghwan u ken Ruamabera ne tsembelee yô, se venda u vôson or u nan civir Yehova a vese ga la tseegh ga, kpa shi se lumun ser or shon nana sôôr se sha ma gbenda ga.
17. Ka nyi ia wase se ve se gba ken imeen i nengen ufoto mba jimbagh la ga?
17 Shi nenge er ikyav i Davidi a ver i dondon gbenda u Aôndo sha gbashima la ia fatyô u wasen se u palegh imeen i nengen ufoto mba jimbagh yô. Ôr avur a Bibilo a a dondo ne, shi hen sha akaawan a a lu ker la, nahan nôngo fa kwagh u a lu ishima i Yehova sha ikyaa ne yô. (Ôr Pasalmi 119:37; Mateu 5:28, 29; Mbakolose 3:5.) Aluer se mba gbidyen kwar sha atindi a wang ne yô, aa wase se u palegh imeen i nengen ufoto mba jimbagh la.
LU A MNENGE U AÔNDO HANMA SHIGHE CII
18, 19. (a) Shin er Davidi yina nahan kpa, lu nyi i wase un ve Aôndo lumun unu? (b) U kange ishima wer u er nyi?
18 Shin er Davidi ver ikyav i dedoo sha igbenda kpishi nahan kpa, yange er asorabo a vesen imôngo. (2 Sam. 11:2-4, 14, 15, 22-27; 1 Kron. 21:1, 7) Nahan kpa, hanma kwa Davidi una er isholibo yô a gema ishima. Yange zenden sha ishigh ki Aôndo “a ishima i wang.” (1 Utor 9:4) Se ôr nahan sha ci u nyi? Sha ci u Davidi nôngon u eren kwagh sha ishima i Yehova.
19 Shin er se yen nahan kpa, se fatyô u eren kwagh u Yehova una lumun se yô. Er i lu awashima wase ne yô, de se henen nen Mkaanem ma Aôndo sha gbashima, shi se gbidyen kwar tsung sha kwagh u se hen ker la, shi se eren sha kwagh u se koso ken ishima yase la. Aluer se er nahan yô, se lu eren msen hen Yehova er orpasalmi kpa yange hide a iyol na ijime, er msen ér: “Tesem, m̱ er ishima You” nahan.
[Mbampin Mba Ngeren u Henen]
[Foto u sha peeji 5 la]
Ka nyi yange i na ve Davidi venda u wuan Saulu shighe u zua a ian i wuan un laa?
[Foto u sha peeji 6 la]
Kwagh u Davidi yange venda u man mngerem ma ior nav mbagenev va na un la tese se nyi?
