1, 2. Olsem wanem pasin bilong tingim laik bilong God inap helpim yumi? Yumi inap kisim wanem skul long pasin bilong King Devit?

 OLSEM WANEM? Taim yu laik i go long narapela ples, yu bin yusim wanpela mep long pepa o long kompiuta bilong lukim gut hap yu laik go long en? Ating dispela i bin helpim yu long skelim wanem rot yu bai bihainim bilong kamap long dispela ples. Olsem tasol, yumi mas skelim gut ol samting taim yumi laik mekim ol bikpela disisen. Taim yumi skelim ol samting long wankain pasin olsem God i mekim, dispela bai helpim yumi long ‘wokabaut long rot’ em Jehova i orait long en.—Ais. 30:21.

² Long laip olgeta bilong King Devit bilong Israel bilong bipo, em i stap gutpela piksa long pasin bilong tingim laik bilong God. Yumi ken skelim na kisim skul long sampela samting i bin kamap long laip bilong Devit, em man husat i bihainim tru God Jehova.—1 Kin. 11:4.

3, 4. (a) Wanem samting i kirapim Devit long pait long Goliat? (b) Devit i gat wanem tingting long nem bilong God?

³ Tingim taim we Devit i bungim Goliat, em strongpela paitman bilong lain Filistia. Devit em yangpela man na wanem samting i kirapim em long pait long dispela traipela man em longpela bilong em klostu inap 3 mita? (1 Sml. 17:4) Yu ting Devit i mekim olsem, long wanem, em i gat strongpela bel? O yu ting bilip bilong em long God i kirapim em? Dispela tupela pasin wantaim i kirapim em long mekim dispela pait. Devit i rispektim Jehova na nem bilong Em, na dispela i kirapim em long pait long Goliat. Devit i kros na tok: “Dispela Filistia em i haiden man tasol. Em i bikhet tumas na i laik tok bilas long ol ami bilong God i stap oltaim.”—1 Sml. 17:26.

 ⁴ Taim Devit i go bungim Goliat, em i tok: “Yu holim bainat na ol spia na yu kam pait long mi. Tasol mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en.” (1 Sml. 17:45) Devit i bilip tru long God bai helpim em, na em i kilim i dai Goliat long rot bilong wanpela ston em i putim long katapel. Long laip olgeta bilong Devit, em i bilip long Jehova na rispektim tru nem bilong Em. Na Devit i kirapim ol wanlain Israel long “amamas na givim biknem” long Jehova.—Ritim 1 Stori 16:8-10.

5. Wankain olsem tok bilas bilong Goliat, wanem samting inap kamap long yu?

⁵ Yu amamas long larim Jehova i stap God bilong yu? (Jer. 9:24) Yu save mekim wanem taim ol neiba, ol wanwok, ol klasmeit, o ol wanblut i mekim ol tok i bagarapim gutnem bilong Jehova o tok bilas long ol Witnes bilong Em? Taim ol narapela i tok bilas long nem bilong Jehova, yu save sambai long nem bilong Em na bilip olsem Em bai helpim yu? Tru i gat “taim bilong pasim maus,” tasol yumi no ken sem long stap olsem ol Witnes Bilong Jehova na ol disaipel bilong Jisas. (Sav. 3:1, 7; Mak 8:38) Em tru olsem yumi mas bihainim savetingting na mekim gutpela pasin taim yumi bungim ol man i no amamas long harim tok yumi autim, tasol yumi no ken kamap olsem ol Israel husat i “pret nogut tru” taim ol i harim tok bilas bilong Goliat. (1 Sml. 17:11) Mobeta yumi holim wanpela tingting tasol long sambai long nem holi bilong God Jehova. Yumi laik tru long helpim ol manmeri long save long Jehova em i wanem kain God. Olsem na yumi mekim wok long Baibel long helpim ol arapela long save olsem em i bikpela samting long ol i mas go klostu long God.—Jems 4:8.

6. Devit i gat wanem tingting taim em i pait long Goliat? Wanem samting i mas i stap namba 1 long tingting bilong yumi?

⁶ Pait bilong Devit na Goliat i skulim yumi long narapela bikpela samting. Taim Devit i kam long ples bilong pait, em i askim olsem: “Bai king i mekim wanem samting long man i kilim dispela Filistia na lusim yumi Israel long dispela bikpela sem i kamap long yumi?” Orait ol man i mekim gen wankain tok olsem ol i bin mekim long pastaim olsem: “King i tok, bai em i givim planti mani samting long man i kilim dispela Filistia [Goliat], na larim dispela man i maritim pikinini meri bilong en.” (1 Sml. 17:25-27) Devit i no tingting tasol long kisim samting, nogat. Em i gat narapela tingting, em i laik givim biknem long God tru. (Ritim 1 Samuel 17:46, 47.) Olsem wanem long yumi? Yumi yet i laik kisim gutnem long rot bilong bungim planti mani kago na kisim biknem long graun? Yumi laik kamap olsem Devit, em i tok: “Yumi tokaut long biknem bilong God. Yumi litimapim nem bilong em.” (Sng. 34:3) Olsem na yumi mas bilip long God na tingim nem bilong Em, na i no bilong yumi yet.—Mat. 6:9.

7. Olsem wanem yumi inap kisim strongpela bilip we inap helpim yumi long autim tok yet maski ol man i les long harim?

⁷ Devit i mas bilip tru long Jehova bambai em inap pait long Goliat. Devit i bin gat strongpela bilip. Em i mekim wok olsem wasman bilong sipsip, na dispela i bin helpim em long lain long bilip long Jehova. (1 Sml. 17:34-37) Yumi tu mas i gat strongpela bilip bambai yumi inap wok yet long autim tok, na moa yet long taim yumi bungim ol man husat i no amamas long harim tok yumi autim. Yumi inap kisim strongpela bilip taim yumi bilip long God bai helpim yumi long olgeta samting yumi mekim long olgeta wan wan de. Olsem: Taim yumi stap long PMV samting, yumi ken kirap toktok wantaim ol narapela long tok i tru bilong Baibel. Na taim yumi go autim tok long ol haus, yumi mas toktok tu wantaim ol man yumi bungim long rot.—Apo. 20:20, 21.

8, 9. Long samting Devit i mekim long King Sol, olsem wanem em i soim olsem em i tingim laik bilong Jehova?

⁸ Narapela rot em Devit i stap gutpela piksa long pasin bilong bilip long Jehova, em tingting em i gat long Sol, em namba 1 king bilong Israel. Sol i jeles long Devit na inap 3-pela taim em i traim long sutim Devit long spia bilong kilim em i dai, tasol long olgeta dispela taim Devit i abrusim spia na em i no bekim pait. Olsem na bihain em i ranawe long Sol. (1 Sml. 18:7-11; 19:10) Orait Sol i makim 3,000 man namel long lain Israel na ol i go painim Devit long ples drai nating. (1 Sml. 24:2) Wanpela taim, Sol i no save na em i go insait long hul bilong maunten we Devit na lain bilong em i hait long en. Long dispela taim, Devit inap kilim i dai dispela king husat i laik pinisim laip bilong em. Em inap mekim olsem, long wanem, God i makim pinis Devit long kisim ples bilong Sol olsem king bilong Israel. (1 Sml. 16:1, 13) Sapos Devit i bin harim tok bilong ol man i stap wantaim em, king Sol inap dai long dispela taim. Tasol Devit i tok: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king.” (Ritim 1 Samuel 24:4-7.) Long dispela taim, Sol i stap yet olsem king em God i makim. Devit i no laik rausim wok king bilong Sol, long wanem, Jehova i no bin rausim yet wok king bilong Sol. Olsem na Devit i katim tasol hap laplap long klos bilong Sol, na dispela i soim olsem em i no gat tingting long kilim Sol.—1 Sml. 24:11.

⁹ Taim Devit i lukim Sol long laspela taim, em i soim gen rispek long dispela king em God i bin makim. Long dispela taim, Devit na Abisai i kamap long kem bilong Sol na ol i lukim em i slip i stap. Maski Abisai i kisim tingting olsem God yet i putim dispela birua long han bilong Devit na em i tok long sutim Sol long spia na kilim em i dai, Devit i no larim em long mekim olsem. (1 Sml. 26:8-11) Maski Devit i wet long Jehova bai soim rot long em, Devit i tingting strong yet long bihainim laik bilong Jehova maski Abisai i mekim dispela tok.

10. Wanem hevi inap painim yumi? Wanem samting inap helpim yumi long sanap strong?

¹⁰ Yumi tu inap bungim wankain hevi olsem taim ol wanlain bilong yumi i putim presa long yumi long bihainim tingting bilong ol, na ol i no helpim yumi long bihainim laik bilong Jehova. Olsem Abisai, sampela inap kirapim yumi long mekim ol samting paslain long yumi skelim tingting bilong Jehova long ol dispela samting. Bilong yumi ken sanap strong, yumi mas holim tingting bilong Jehova long ol  dispela samting na tingting strong long mekim ol samting em i laik yumi mas mekim.

11. Yu kisim wanem skul long pasin bilong Devit long putim laik bilong God i stap namba 1?

¹¹ Devit i beten long God Jehova na tok: “Skulim mi gut bai mi bihainim laik bilong yu.” (Ritim Song 143:5, 8, 10.) Devit i no bihainim tingting bilong em yet o bihainim tingting bilong narapela, nogat, em i laik tru long God bai skulim em. Em i ‘tingting long ol samting God i bin mekim na long ol gutpela wok bilong em.’ Yumi yet inap painimaut laik bilong God taim yumi stadi gut long Baibel na tingim tingim long bel ol stori bilong Baibel long ol samting Jehova i mekim long ol man.

12, 13. Bilong wanem Devit i kapsaitim wara em 3-pela strongpela soldia i bringim i kam long em?

¹² Devit i kliagut long ol stiatok i stap long Lo na em i laik tru long bihainim ol dispela stiatok, na i gutpela long yumi bihainim pasin bilong em. Skelim samting i kamap taim Devit i tok em i laik tru long “dring sampela wara bilong hul wara i stap klostu long dua bilong banis bilong Betlehem.” Tripela strongpela soldia bilong Devit i go long Betlehem, em long dispela taim ol Filistia i was long Betlehem, na ol dispela soldia i kisim wara na bringim i kam long Devit. “Tasol em i no laik dring dispela wara. Nogat. Em i kisim na kapsaitim olsem ofa long Bikpela.” Bilong wanem? Devit i tok: “Long nem bilong God, mi tok tru tumas, mi no ken dring dispela wara. Sapos mi dring bai i olsem mi dring blut bilong ol dispela man, long wanem, ol inap tru long painim i dai long taim ol i bin go na kisim wara.”—1 Sto. 11:15-19.

¹³ Devit i save long tok bilong Lo olsem ol i mas kapsaitim blut long graun olsem ofa long Jehova na ol i no ken kaikai. Em i save tu long as na ol i mas mekim olsem. Devit i save olsem “blut i save givim laip long olgeta man na animal.” Tasol samting em i kapsaitim em wara, na i no blut. Bilong wanem Devit i no laik dring dispela wara? Em i kliagut long stiatok i stap long Lo. Long tingting bilong Devit, dispela wara i dia tumas wankain olsem blut bilong ol dispela 3-pela man. Olsem na i no stret long em i dring dispela wara. Nogat.  Em i kisim dispela wara na kapsaitim long graun.—Wkp. 17:11; Lo 12:23, 24.

14. Wanem samting i helpim Devit long kisim tingting bilong Jehova long skelim ol samting?

¹⁴ Lo Bilong God i stap olsem bikpela samting long laip bilong Devit. Em i singsing olsem: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Sng. 40:8) Devit i stadi gut long Lo Bilong God na em i tingim tingim long bel. Em i bilip tru olsem ol Lo Bilong Jehova bai helpim em. Olsem na Devit i laik tru long bihainim gut Lo Bilong Moses na ol stiatok bilong en. Taim yumi stadi long Baibel, i gutpela long tingim tingim ol samting yumi ritim na putim gut long bel na bai yumi inap amamasim Jehova long ol samting yumi mekim.

15. Olsem wanem Solomon i no rispektim Lo Bilong God?

¹⁵ God Jehova i laikim tru Solomon, pikinini man bilong Devit. Tasol bihain, Solomon i no rispek moa long Lo Bilong God. Em i no bihainim lo i tok olsem i tambu long king bilong Israel i “maritim planti meri.” (Lo 17:17) Tasol Solomon i maritim planti meri bilong ol narapela kantri. Taim em i kamap lapun, “ol dispela meri bilong en i pulim tingting bilong en i go long ol giaman god.” Maski Solomon i gat wanem tingting long ol samting em i mekim, em “i mekim pasin nogut long ai bilong Bikpela. Em i lusim gutpela pasin bilong Devit, na em i no bihainim tru Bikpela.” (1 Kin. 11:1-6) Em i bikpela samting long yumi mas bihainim ol lo na ol stiatok i stap long Baibel! Yumi mas mekim olsem taim yumi laik makim poroman bilong maritim.

16. Yumi kisim wanem skul long lo bilong Jehova long “maritim man i bihainim Bikpela”?

¹⁶ Sapos wanpela husat i no wanbilip i soim olsem em i gat laik long yu, yu bai bihainim pasin olsem bilong Devit o Solomon? Ol manmeri i stap long lotu i tru ol i mas “maritim man i bihainim Bikpela.” (1 Kor. 7:39) Sapos wanpela Kristen i laik marit, em i mas maritim wanpela husat i wanbilip bilong em. Sapos yumi kliagut long stiatok i stap long dispela skripsa, yumi bai i no maritim wanpela husat i no wanbilip, na tu, yumi bai sakim ol samting ol i mekim bilong soim olsem ol i gat laik long prenim yumi.

17. Wanem samting inap helpim yumi long sakim pasin bilong lukim ponografi?

¹⁷ Pasin bilong Devit long wok strong long kisim tingting long lo bilong God inap helpim yumi long sakim traim bilong lukim ol piksa bilong ponografi. Ritim ol dispela skripsa, tingim ol stiatok i stap long en, na traim long kisim tingting bilong Jehova long dispela samting. (Ritim Song 119:37; Matyu 5:28, 29; Kolosi 3:5.) Taim yumi tingim tingim ol lo bilong Jehova, dispela bai helpim yumi long sakim ol traim bilong lukim ponografi.

18, 19. (a) Maski Devit em i sinman, em i mekim wanem na God i orait yet long em? (b) Yu tingting strong long mekim wanem?

¹⁸ Maski Devit i stap gutpela piksa long planti samting, em i bin mekim sampela bikpela rong. (2 Sml. 11:2-4, 14, 15, 22-27; 1 Sto. 21:1, 7) Tasol oltaim Devit i soim olsem em i tanim bel tru taim em i mekim sin. Devit i “bihainim olgeta lo” bilong God. (1 Kin. 9:4) Bilong wanem yumi tok olsem? Long wanem, Devit i traim long mekim ol samting i stret wantaim laik bilong Jehova.

¹⁹ Maski yumi sinman, Jehova inap orait yet long yumi. Olsem na yumi mas wok yet long stadi gut long Tok Bilong God, tingim tingim ol samting yumi kisim skul long en, na bihainim stret ol samting yumi lain long en. Taim yumi mekim olsem, yumi inap mekim beten long Jehova olsem man bilong raitim song i bin mekim, olsem: “Skulim mi gut bai mi bihainim laik bilong yu.”