1, 2. Mɛni Yesu tsɔɔ e bɔfo ɔmɛ gbɔkuɛ nɛ e nɔ jena e ma gbo ɔ?

GBƆKUƐ nɛ e nɔ jena Yesu ma gbo ɔ, e kɛ e bɔfo ɔmɛ ya ye ní ngɛ mɔ ko nɔ ngɛ Yerusalem. Benɛ a ngɛ ní ɔ yee ɔ, Yesu te si ngɛ niye ní ɔ he nɛ e je e tade klɔii ɔ kɛ fɔ si. E ngɔ papami kɛ muɔ e mlɛ mi. Kɛkɛ nɛ e plɛ nyu ngɔ wo tsesi mi nɛ e fɔ kaseli ɔmɛ a nane he nɛ e kɛ papami ɔ tsu a nane ɔ he. Lɔɔ se ɔ, e kpale wo e tade klɔii ɔ. Mɛni heje nɛ Yesu tsu nítsumi nɛ nihi bui nɛ ɔ?—Yoh. 13:3-5.

² Yesu nitsɛ tsɔɔ nya ke: “Nɔ́ nɛ i pee ha nyɛ piɔ ɔ, nyɛ nu sisi lɛɛ? . . . Jehanɛ ɔ, imi nyɛ Nyɔmtsɛ, kɛ nyɛ Tsɔɔlɔ ɔ, ke i fɔ nyɛ nane he ɔ, e sa kaa nyɛ hu nyɛ fɔ nyɛ sibi a nane he. Imi lɛɛ i pee enɛ ɔ nɛ nyɛɛ hyɛ, nɛ nyɛ hu nyɛɛ pee ha nyɛ sibi.” (Yoh. 13:12-15) Yesu tsui mi nɛ e je kɛ tsu nítsumi nɛ nihi bui nɛ ɔ, ji nɔ hyɛmi nɔ́ nɛ e pee kɛ ha e bɔfo ɔmɛ nɛ a hɛ be nɔ jee. Enɛ ɔ maa wo mɛ he wami nɛ a ba a he si pee se.

3. (a) Mɛni blɔ nɔ Yesu gu kɛ tsɔɔ si enyɔ sɔuu kaa he si bami he hia? (b) Mɛni he wa ma susu ngɛ nikasemi nɛ ɔ mi?

³ Benɛ Yesu fɔ e bɔfo ɔmɛ a nane he ɔ, jamɛ a be ɔ mi ji kekleekle be nɛ e tsɔɔ bɔnɛ he si bami he hia ha. Be ko ɔ, bɔfo ɔmɛ a kpɛti ni komɛ sã nya ngɛ nɔ nɛ ji nɔmlɔ ngua pe kulaa ngɛ a kpɛti ɔ he. Yesu ngɔ jokuɛ nyafii ko kɛ ba da si ngɛ a hɛ mi nɛ e de mɛ ke: “Nɔ tsuaa nɔ nɛ ma he jokuɛ nyafii nɛ ɔ atuu ngɛ ye biɛ mi ɔ, imi e he atuu ɔ nɛ; nɔ tsuaa nɔ nɛ heɔ mi a tuu ɔ, nɔ nɛ tsɔ mi ɔ lɛ e he atuu ɔ nɛ. Ejakaa nɔ nyafii pe kulaa ngɛ nyɛ tsuo nyɛ kpɛti ɔ, lɛ ji nɔmlɔ ngua pe kulaa.” (Luka 9:46-48) Akɛnɛ Yesu le kaa Farisibi ɔmɛ susuɔ kaa a he hia pe ni kpahi heje ɔ, pee se ɔ, Yesu de ngɛ e fiɛɛmi nítsumi ɔ mi ke: “Ejakaa nɔ tsuaa nɔ  nɛ woɔ e he nɔ ɔ, a maa ba lɛ si, nɛ nɔ nɛ baa e he si ɔ, a ma wo e nɔ.” (Luka 14:11) E ngɛ heii kaa Yesu suɔ nɛ e se nyɛɛli ɔmɛ nɛ a ba a he si nɛ a ko wo a he nɔ loo a ko susu kaa a nɔ kuɔ pe ni kpahi. Nyɛ ha nɛ wa susu he si bami he nɔ hyɛmi nɔ́ nɛ Yesu pee ɔ he saminya konɛ wa nyɛ nɛ waa kase lɛ. Jehanɛ se hu ɔ, wa maa hyɛ bɔnɛ ni kpahi hu náa su nɛ ɔ he se ha.

4. Mɛni blɔ nɔ Mawu Bi kake ɔ je he si bami kpo loko e ba zugba a nɔ ngɛ?

⁴ Mawu Bi kake ɔ je he si bami kpo loko e ba zugba a nɔ. Yesu kɛ e Tsɛ ɔ hi hiɔwe jehahi babauu. Baiblo mi womi nɛ ji Yesaya a tu huɛ bɔmi gbagbanii nɛ hi Bi ɔ kɛ e Tsɛ ɔ a kpɛti ɔ he munyu ke: ‘Nyɔmtsɛ Yehowa tsɔɔ mi nɔ́ nɛ ma de, konɛ be nɛ sa mi ɔ, ma nyɛ ma wo nɔ nɛ pɔtɔ lɛ ɔ he wami. Daa mɔtu ɔ, e haa i hlaa kaa nɔ́ nɛ e maa tsɔɔ mi ɔ, ma bu tue kaa ní kaselɔ. Nyɔmtsɛ Yehowa bli ye tue; i tsɔ we atua, i kua we lɛ.’ (Yes. 50:4, 5) Mawu Bi ɔ ba e he si nɛ e bu nɔ́ nɛ Yehowa tsɔɔ lɛ ɔ tue saminya. E suɔ wawɛɛ kaa e maa kase ní kɛ je anɔkuale Mawu ɔ ngɔ. E ngɛ heii kaa Yesu yɔse bɔnɛ Yehowa baa e he si nɛ e naa adesahi nɛ a yi mluku ɔ mɔbɔ ɔ hulɔ!

5. Ngɛ mɛni blɔ nɔ Yesu, nɛ ji bɔfo nɔkɔtɔma Mikael ɔ ba e he si benɛ e kɛ Abosiami sã nya a?

⁵ Pi bɔ níhi tsuo nɛ a ngɛ hiɔwe ɔ nɛ a baa a he si kaa bɔnɛ Mawu Bi kake ɔ baa e he si ɔ. Bɔfo nɛ ba plɛ e he Satan Abosiami ɔ sume kaa e maa ba e he si nɛ e kase ní kɛ je Yehowa ngɔ, mohu ɔ, e wo e he nɔ nɛ e susu kaa e nɔ kuɔ pe bɔfo kpa amɛ. Enɛ ɔ ha nɛ e tsɔ Yehowa hɛ mi atua. Se Yesu lɛɛ e bua jɔ he blɔ nɛ a ha lɛ ngɛ hiɔwe ɔ he, nɛ e kɛ he blɔ nɛ e ngɛ ɔ tsu we ní ngɛ blɔ yayami nɔ. Benɛ Yesu nɛ ji bɔfo nɔkɔtɔma Mikael kɛ ‘Abosiami sã nya ngɛ Mose flɔ̃’ ɔ he ɔ, Yesu kɛ he blɔ nɛ e ngɛ ɔ tsu we ní ngɛ blɔ nɛ dɛ nɔ. Mohu ɔ, Mawu Bi ɔ ba e he si. E bua jɔ kaa e ma ha nɛ Yehowa nɛ ji je ɔ tsuo Kojolɔ Ngua a nɛ hyɛ sane ɔ mi bɔnɛ lɛ Yehowa a e suɔ ngɛ lɛ Yehowa a nitsɛ e be nɛ e sa mi.—Kane Yuda 9.

6. Mɛni blɔ nɔ Yesu gu kɛ je he si bami kpo ngɛ nítsumi nɛ a kɛ wo e dɛ kaa Mesia a nɛ e kplɛɛ nɔ ɔ mi?

⁶ Atsinyɛ jemi ko be he kaa níhi hu nɛ Yesu kase loko e ba zugba a nɔ ɔ ji níhi nɛ a gba fɔ si ngɛ e he kaa Mesia a ma ba pee ngɛ zugba a nɔ. Enɛ ɔ he ɔ, eko ɔ, e le haomihi nɛ e kɛ ma ba kpe ɔ momo loko e ba. Se kɛ̃ ɔ, Yesu kplɛɛ nítsumi nɛ a kɛ wo e dɛ kaa e ba zugba a nɔ nɛ e ba gbo kaa Mesia nɛ a wo e he si ɔ nɔ. Mɛni heje? Benɛ bɔfo Paulo ngɛ bɔnɛ Mawu Bi kake ɔ ba e he si ha a tsɔɔe ɔ, e ngma ke: “E hɛɛ Mawu su lɛɛ, se e pee we lɛ kaa doo ɔ, a na lɛ kaa e kɛ Mawu sɔ. Mohu ɔ, lɛ nitsɛ e suɔmi nya a, e ngmɛɛ blɔ nya tsuo nɛ e ngɛ ɔ he, nɛ e ba plɛ e he sɔmɔlɔ. E ba pee kaa nɔmlɔ, nɛ e je e he si kaa adesa.”—Filip. 2:6, 7.

7, 8. Ngɛ mɛni blɔhi a nɔ Yesu ba e he si benɛ e ji jokuɛ kɛ benɛ e tsu e zugba a nɔ sɔmɔmi nítsumi ɔ?

⁷ Paulo ngma ke benɛ Yesu ba zugba a nɔ kaa adesa a, “e ba e he si, nɛ e bu tue kɛ ya su gbeje tete; e gbo sɛumi tso nɔ gbenɔ.” (Filip. 2:8) Yesu ba e he si kɛ je e jokuɛ mi kɛ ya si e wami si, nɛ wa ma nyɛ maa kase lɛ. E ngɛ mi kaa Yesu fɔli nɛ ji Yosef kɛ Maria a yi mluku lɛɛ, se Yesu “ba e he si ha mɛ.” (Luka 2:51) Yesu pee nɔ hyɛmi nɔ́ kpakpa kɛ ha jokuɛwi. Ke a je a tsui mi nɛ a ba a he si ha a fɔli ɔ, Mawu maa jɔɔ mɛ!

⁸ Benɛ Yesu ba wa hu ɔ, e gu blɔhi fuu a nɔ kɛ tsɔɔ kaa e baa e he si. E kɛ Yehowa  suɔmi nya ní peemi pee nɔ́ titli ngɛ e si himi mi. (Yoh. 4:34) Ngɛ Yesu Kristo sɔmɔmi nítsumi ɔ mi ɔ, e kɛ Mawu biɛ ɔ tsu ní, nɛ e ye bua nihi nɛ a hɛɛ tsui kpakpa a nɛ a ná Yehowa suhi kɛ e yi mi tomi nɛ e ngɛ kɛ ha adesahi ɔ he anɔkuale nile. Yesu nitsɛ hu peeɔ Yehowa suɔmi nya ní kaa bɔnɛ e tsɔɔ nihi kaa a pee ɔ. Kaa nɔ hyɛmi nɔ́ ɔ, ngɛ sɔlemi nɛ Yesu tsɔɔ e kaseli ɔmɛ ɔ mi ɔ, kekleekle nɔ́ nɛ e wo ta ji: ‘Wa Tsɛ nɛ ngɛ hiɔwe; O biɛ ɔ he nɛ tsɔ.’ (Mat. 6:9) Yesu tsɔɔ e kaseli ɔmɛ kaa a kɛ Yehowa biɛ ɔ he nɛ a ma tsɔ ɔ nɛ pee nɔ́ titli ngɛ a si himi mi. Yesu nitsɛ hu pee jã. Benɛ e piɛ bɔɔ nɛ Yesu maa gbe e zugba a nɔ sɔmɔmi nítsumi ɔ nya a, e sɔle nɛ e de Yehowa ke: ‘I ha nɛ a le o biɛ ɔ, nɛ ma ya nɔ ma pee jã.’ (Yoh. 17:26) Jehanɛ se hu ɔ, Yesu pɔɔ demi ke, e pee we nɔ́ ko ngɛ lɛ nitsɛ e dɛhe, mohu ɔ, Yehowa ji nɔ nɛ yeɔ bua lɛ.—Yoh. 5:19.

9. Mɛni Zakaria gba kɛ kɔ Mesia a he, nɛ kɛ Yesu plɛ kɛ ha nɛ gbami nɛ ɔ ba mi kɛɛ?

⁹ Zakaria de kɛ kɔ Mesia a he ke: “Zion, nyá oo, nyá! Yerusalem, mo he ose! Hyɛ, o matsɛ ɔ ma! E ma kɛ agbo jemi kɛ kunimi yemi. E ba e he si, nɛ e hi teji okpɔngɔ nɔ; ee, e hi teji okpɔngɔ bi nɔ.” (Zak. 9:9) Gbami nɛ ɔ ba mi benɛ Yesu ya Yerusalem loko a ye Hetsɔmi gbijlɔ ɔ ngɛ jeha 33 M.B. Nihi babauu ngɔ a tadehi ngɔ ha blɔ ɔ nɔ, nɛ ni komɛ hu poo tso kɔnihi ngɔ pue blɔ ɔ nɔ. Ngɛ anɔkuale mi ɔ, benɛ e sɛ ma a mi ɔ, ma a tsuo hwɔ hoo. Benɛ nihi ngɛ e he nyae kaa Matsɛ po ɔ, Yesu ba e he si.—Mat. 21:4-11.

10. Tue bumi nɛ Yesu je e tsui mi nɛ e pee kɛ ya si benɛ e gbo ɔ tsɔɔ mɛni?

¹⁰ Benɛ Yesu Kristo ba zugba a nɔ ɔ, e ba e he si nɛ e pee tue bumi hluu kɛ ya si benɛ e gbo ngɛ sɛumi tso nɔ. Enɛ ɔ nɛ e pee ɔ tsɔɔ kaa ke adesahi kɛ si himi nɛ mi wa kpe po ɔ, a ma nyɛ maa ya nɔ maa ye Yehowa anɔkuale. Enɛ ɔ nɛ Yesu pee ɔ hu tsɔɔ kaa nɔ́ nɛ Satan de kaa níhi nɛ adesahi ngɛ náe ngɛ Yehowa dɛ ɔ heje nɛ a jaa lɛ ngɛ ɔ ji lakpa. (Hiob 1:9-11; 2:4) Anɔkuale nɛ Kristo ye kɛ pi si ɔ  hu maa nɔ mi kaa Yehowa ji nɔ nɛ sa kaa e yeɔ je mluku ɔ nɔ, nɛ e nɔ yemi ɔ hu hi pe nɔ yemihi tsuo. E ngɛ heii kaa Yehowa bua jɔ benɛ e na kaa e Bi nɛ baa e he si ɔ ye anɔkuale kɛ pi si ɔ.—Kane Abɛ 27:11.

11. Yesu Kristo kpɔmi afɔle sami ɔ bli mɛni blɔ kɛ ha adesahi nɛ a ngɛ hemi kɛ yemi ngɛ e mi ɔ?

¹¹ Gbomi nɛ Yesu gbo ngɛ sɛumi tso nɔ ɔ hu peeɔ kpɔmi nɔ́ kɛ ha adesahi. (Mat. 20:28) Kpɔmi nɔ́ nɛ ɔ ha adesahi nɛ a yi mluku ɔ he blɔ kaa ke a pee nɔ́ nɛ da a, a maa hi si kɛ ya neneene. Paulo ngma ke: “Lɔɔ he ɔ, kaa bɔnɛ yayami kake he ɔ, a bu nihi tsuo fɔ ɔ, jã nɔuu kpakpa kake he ɔ, Mawu maa wo nihi tsuo nguɔ, nɛ a ma he a yi wami.” (Rom. 5:18) Yesu gbenɔ ɔ bli blɔ kɛ ha Kristofoli nɛ a pɔ mɛ nu ɔ konɛ a ná wami nɛ gbenɔ be mi ngɛ hiɔwe, kɛ “to kpa” amɛ hu konɛ a ná neneene wami ngɛ zugba a nɔ.—Yoh. 10:16; Rom. 8:16, 17.

12. Benɛ Yesu kɛ adesahi nɛ a yi mluku ɔ hi si ɔ, mɛni blɔ nɔ e gu kɛ tsɔɔ kaa e he jɔ nɛ e baa e he si?

¹² Yesu fɔ nihi tsuo nɛ a “tloo tlomi nɛ pɔ tɔ” mɛ ɔ nine ke a ba e ngɔ. E de mɛ ke: “Nyɛɛ ngɔ ye kuɛpã tso ɔ ngɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee jã a, nyɛ ma ná he jɔmi.” (Mat. 11:28, 29) Akɛnɛ Yesu ba e he si nɛ e he jɔ heje ɔ, e kɛ adesahi nɛ a yi mluku ɔ hi si saminya. E de we e kaseli ɔmɛ nɛ a pee níhi nɛ a be nyɛe maa pee. Yesu je a yi nɛ e wo mɛ he wami. E ha we nɛ e kaseli ɔmɛ nɛ a nu he kaa a bɔɛ mɔde aloo se nami be a he. Yesu fi we a nɔ, nɛ e pee we e he nɔ nɛ sane he wa hulɔ. Mohu ɔ, Yesu ma nɔ mi ha e se nyɛɛli ɔmɛ kaa ke a ha nɛ huɛ bɔmi gbagbanii hi e kɛ mɛ a kpɛti, nɛ a kɛ níhi nɛ e tsɔɔ mɛ ɔ tsu ní ɔ, a he maa jɔ mɛ, ejakaa e kuɛpã tso ɔ tloomi yi, nɛ e tlomi ɔ hu jiɔ we. Nyumuhi, yihi, nikɔtɔmahi kɛ jokuɛwi tsuo nɛ a ba Yesu ngɔ ɔ a he jɔ mɛ.—Mat. 11:30.

13. Mɛni blɔ nɔ Yesu gu kɛ na nihi nɛ si himi mi wa ha mɛ ɔ mɔbɔ?

¹³ Yesu mi mi sã lɛ ngɛ nihi nɛ a ngɛ Israel nɛ si himi mi wa ha mɛ ɔ a he, nɛ e bɔ mɔde nɛ e ye bua mɛ. Benɛ e piɛ bɔɔ nɛ e maa sɛ Yeriko ma a mi ɔ, e kɛ nyumu enyɔ komɛ nɛ a hɛngmɛ yu nɛ a baa sika nɛ a tsɛɛ nɔ kake ke Bartimeo ɔ kpe. Mɛ ni enyɔ ɔmɛ tsuo a bi Yesu nɔtonɔto ke e ye bua mɛ, se nimli asafo ɔ kpa ngmlaa wo a yi nɛ a de mɛ ke a ma a nya. Jinɛ Yesu ma nyɛ maa pee kaa nɔ́ nɛ e nui pɛɛ nɛ hɛngmɛ yuyuili ɔmɛ ngɛ lɛ kpae ɔ, se e pee we jã! Mohu ɔ, Yesu de ni ɔmɛ ke a kɛ nihi nɛ a hɛngmɛ yu ɔ nɛ ba. E mi mi sã lɛ ngɛ a he nɛ e tsa mɛ, nɛ a bɔni nɔ́  hyɛmi ekohu. Niinɛ, Yesu kase e Tsɛ Yehowa kɛ gu e he si nɛ e ba nɛ e na ohiatsɛmɛ mɔbɔ ɔ nɔ.—Mat. 20:29-34; Mar. 10:46-52.

14. Mɛni se nami je Yesu he si nɛ e ba a mi kɛ ba?

¹⁴ Yesu Kristo he si nɛ e ba a ha nɛ nihi fuu ná e he se wawɛɛ nɛ a ná bua jɔmi. Yehowa bua jɔ benɛ e na kaa e Bi nɛ e suɔ lɛ ɔ ba e he si nɛ e pee Mawu suɔmi nya ní ɔ. Akɛnɛ Yesu he jɔ nɛ e baa e he si kɛ jeɔ e tsui mi heje ɔ, e bɔfo ɔmɛ kɛ e kaseli ɔmɛ a he jɔ mɛ. Nɔ hyɛmi nɔ́ nɛ e pee kɛ ha e kaseli ɔmɛ, ní nɛ e tsɔɔ mɛ, kɛ a yi nɛ e je ɔ wo mɛ he wami nɛ a nyɛ ya a hɛ mi ngɛ Mawu jami mi. Nihi nɛ a bui mɛ ɔ ná Yesu he si nɛ e ba a he se, ejakaa e ye bua mɛ, nɛ e tsɔɔ mɛ ní, nɛ e wo mɛ he wami. Ngɛ anɔkuale mi ɔ, kɛ gu Yesu afɔle sami ɔ nɔ ɔ, adesahi tsuo nɛ a ngɛ hemi kɛ yemi ɔ ma ná jɔɔmi kɛ ya neneene.

15. Mɛni se Yesu ná ngɛ e he si nɛ e ba a heje?

¹⁵ Nɛ Yesu nɛɛ? Anɛ e ná e he si nɛ e ba a he se lo? Ee, ejakaa e de e kaseli ɔmɛ ke: “Nɔ nɛ baa e he si ɔ, a ma wo e nɔ.” (Mat. 23:12) Munyu nɛ ɔ ba mi ngɛ Yesu nitsɛ e blɔ fa mi. Paulo tsɔɔ nya ke: “Enɛ ɔ heje nɛ Mawu wo [Yesu] nɔ gojoo, nɛ e ha lɛ biɛ nɛ kle pe biɛhi tsuo. Kɛkɛ ɔ, he tsuaa he nɛ a maa wo e biɛ ta ngɛ ɔ, nihi nɛ ngɛ hiɔwe kɛ ni nɛmɛ nɛ ngɛ zugba a nɔ, kɛ ni nɛmɛ nɛ ngɛ zugba a sisi ɔ, mɛ tsuo a ma kpla si ha Yesu, nɛ a maa jaje paa ke, Yesu ji Nyɔmtsɛ; a maa pee jã kɛ wo Tsɛ Mawu hɛ mi nyami.” Akɛnɛ Yesu ba e he si nɛ e ye anɔkuale benɛ e ba zugba a nɔ heje ɔ, Yehowa Mawu wo e nɔ nɛ e ha lɛ he blɔ konɛ e ye nibɔ níhi nɛ ngɛ hiɔwe kɛ zugba a nɔ ɔ a nɔ.—Filip. 2:9-11.

16. Mɛni tsɔɔ kaa Mawu Bi ɔ maa ya nɔ maa ba e he si ngɛ níhi tsuo nɛ e maa pee ɔ mi?

¹⁶ Mawu Bi ɔ maa ya nɔ maa ba e he si ngɛ níhi tsuo nɛ e ma tsu ɔ mi. A gba fɔ si ngɛ Baiblo ɔ mi la womi ɔ eko mi ke, ke a wo Yesu Matsɛ ngɛ hiɔwe ɔ, e kɛ Mawu he nyɛli ɔmɛ maa to ní. La polɔ ɔ la ke: ‘Yaa! Hii okpɔngɔ nɔ kɛ ya ye kunimi, nɛ o kɔsɔ. Yaa nɛ o ya fã anɔkuale, kɛ he si bami, kɛ dami sane yemi he! Ngɔɔ o he wami ɔ kɛ tsu nyakpɛ ní nguanguahi!’ (La 45:4) Yesu Kristo ma fã nihi nɛ yeɔ anɔkuale, nɛ a baa a he si, nɛ a peeɔ dami ní ɔ a he Harmagedon. Nɛ mɛni maa ba ngɛ e Jeha Akpe Nɔ Yemi ɔ nyagbe benɛ Mesia Matsɛ ɔ “maa ye mumi mi nɔ yeli, kɛ blɔ nyahi, kɛ he wami tsuo a nɔ” ɔ? Anɛ e maa ba e he si lo? Ee, e maa ba e he si, ejakaa “e maa ngɔ matsɛ yemi ɔ ngɔ ha mawu nɛ ji Tsɛ ɔ.”—Kane 1 Korintobi 15:24-28.

17, 18. (a) Mɛni heje nɛ e he hia nɛ Yehowa sɔmɔli nɛ a kase Yesu nɛ mɛ hu a ba a he si ɔ? (b) Mɛni he wa ma susu ngɛ munyu nɛ a maa kase nɛ nyɛɛ se ɔ mi?

¹⁷ Wɔ hu nɛɛ? Anɛ wa maa kase Yesu nɛ wa maa ba wa he si lo? Ke Matsɛ Yesu Kristo ba nɛ e ba kojo ngɛ Harmagedon ɔ, mɛni maa ba wa nɔ? Akɛnɛ e baa e he si nɛ e peeɔ nɔ́ nɛ da heje ɔ, e ma he nihi nɛ mɛ hu a baa a he si nɛ a peeɔ dami ní ɔ pɛ a yi wami. Lɛɛ e he hia nɛ waa ba wa he si konɛ a he wa yi wami. Jehanɛ se hu ɔ, kaa bɔnɛ nihi ná Yesu Kristo e he si bami ɔ he se nɛ lɛ nitsɛ hu e ná he se ɔ, ke wɔ hu wa ba wa he si ɔ, jã nɔuu kɛ̃ nɛ wɔ hu wa ma ná he se, nɛ ni kpahi hu ma ná he se.

¹⁸ Mɛni maa ye bua wɔ nɛ́ waa ba wa he si kaa bɔnɛ Yesu hu pee ɔ? Ngɛ haomihi nɛ eko ɔ, waa kɛ maa kpe ɔ tsuo se ɔ, kɛ wa ma plɛ kɛ ba wa he si ha kɛɛ? A ma ha sane bimi nɛ ɔmɛ a heto ngɛ munyu nɛ wa maa kase nɛ nyɛɛ se ɔ mi.