Yesu Alitulanga Ifya Kuba Abaicefya
Yesu Alitulanga Ifya Kuba Abaicefya
“Namulanga ifya kucita, ukuti ifyo nacita kuli imwe, e fyo na imwe mulecita.”—YOH. 13:15.
KUTI MWAYASUKA SHANI?
Bushe Umwana wa kwa Lesa alangile shani ukuti ali uwaicefya ilyo ashilaisa pano calo?
Ilyo Yesu aishile pano calo, alangile shani ukuti ali uwaicefya?
Busuma nshi bwafuma muli ifi Yesu aba uwaicefya?
1, 2. Pa bushiku Yesu alekelesheko ukuba pano calo, lisambililo nshi ilyo asambilishe abatumwa bakwe?
PA BUSHIKU bwa kulekeleshako ukuba pano calo, Yesu aali na batumwa bakwe inshita ya bushiku mu muputule wa pa muulu mu ng’anda iyali mu Yerusalemu. Ilyo balelya umulaalilo, Yesu alimine no kufuula ifya kufwala fyakwe ifya ku nse no kufibika pa mbali. Abuulile itaulo no kukaka mu musana. E lyo abikile amenshi mu musambilo kabili atendeke ukusamba amakasa ya basambi no kuyakumuna kwi taulo. Ilyo apwile ukubasamba amakasa, afwele ifya kufwala fyakwe ifya ku nse. Mulandu nshi Yesu abombele uyu mulimo wa pa nshi?—Yoh. 13:3-5.
2 Yesu umwine alilondolwele ico acitile ifi. Atile: “Bushe namwishiba ifyo nacita kuli imwe? . . . E ico ine nangu nine Shikulu kabili Kasambilisha, nga nsambile amakasa yenu, na imwe mufwile ukulasambana amakasa. Pantu namulanga ifya kucita, ukuti ifyo nacita kuli imwe, e fyo na imwe mulecita.” (Yoh. 13:12-15) Ifi Yesu abombele uyu mulimo wa pa nshi, asambilishe abatumwa bakwe isambililo ilyo bashali no kulaba ilyali no kubalenga ukuba abaicefya ku nshita ya ku ntanshi.
3. (a) Imiku ibili, Yesu alangile shani ukuti ukuicefya kwalicindama? (b) Finshi twalalandapo muli cino cipande?
3 Ilyo Yesu asambile amakasa ya batumwa bakwe, te wali umuku wa kubalilapo ukubalanga ifyo ukuicefya kwacindama. Inshita imo, ilyo abatumwa bakwe bamo balekansana pa wali umukalamba pali bena, Yesu abuulile umwana umunono no kumwimika mupepi na po aali kabili abebele ati: “Onse uwapokelela uyu mwana umunono pa mulandu we shina lyandi, ninshi apokelela na ine; na onse uwapokelela ine, ninshi apokelela no wantumine. Pantu uwaiceefya pali imwe bonse e mukalamba.” (Luka 9:46-48) Apo Yesu alishibe ukuti abaFarise balefwaisha ififulo fya pa muulu, pa nshita imbi ilyo aleshimikila alandile ukuti: “Onse uwaicindamika bakamuceefya, na onse uuiceefya bakamucindamika.” (Luka 14:11) Ukwabula no kutwishika, Yesu afwaya abasambi bakwe ukuba abaicefya, e kutila, ukukanaitutumuna nelyo ukuba ne cilumba. Pa kuti twingapashanya Yesu, twalalanda pa fyo aali uwaicefya. Twalasambilila na pa busuma bwaba mu kuicefya ne fyo bambi benganonkelamo.
“NSHAFUTATWIKE IYO”
4. Bushe Umwana wa kwa Lesa alangile shani ukuti aali uwaicefya ilyo ashilaisa pano calo?
4 Umwana wa kwa Lesa uwafyalwa eka ali uwaicefya na lintu ashilaisa pano calo. Ilyo Yesu ali ku muulu, aikele pamo na Wishi imyaka iingi nga nshi. Ibuuku lya mu Baibolo ilya kwa Esaya lilanda pa fyo Umwana aleumfwana na Wishi, ukuti: “Shikulu Mulopwe Yehova umwine alimpeela ululimi lwa basambilila, ukuti njishibe ifya kwasuka uwanaka ku cebo. Alanshibusha cila lucelo; ashibushisha ukutwi kwandi ku kumfwa nga bantu abasambilila. Shikulu Mulopwe Yehova umwine aliisula ukutwi kwandi, na ine, nshapondweke. Nshafutatwike iyo.” (Esa. 50:4, 5) Umwana wa kwa Lesa ali uwaicefya kabili alebika amano ku fyo Yehova alemusambilisha. Alitemenwe kabili alefwaisha ukusambilishiwa na Lesa wa cine. Yesu afwile alimwene ifyo Yehova ali uwaicefya ilyo aleumfwila uluse abantunse abashapwililika!
5. Ilyo Yesu aali ku muulu nga Mikaele malaika mukalamba, bushe alangile shani ukuti ali uwaicefya ilyo aumene na Kaseebanya?
5 Te bamalaika bonse abali abaicefya nga filya Umwana uwafyalwa eka uwa kwa Lesa aali. Mu nshita ya kuti alesambilila kuli Yehova, malaika uwaishilesanguka Satana Kaseebanya taicefeshe, aishileba ne cilumba no kulaimona ukuti alicila bambi, kabili apondokele Yehova. Lelo Yesu ena talefwaya ukukwata icifulo icikalamba icacilile pa co bamupeele, kabili talebomfya amaka yakwe bubi bubi. Ilyo Yesu ali ku muulu nga Mikaele malaika mukalamba, talefwaya ukucita ifyacilile pa maka bamupeele ilyo ‘aumene na Kaseebanya pa citumbi ca kwa Mose.’ Lelo ali-icefeshe kabili alekele ukuti Yehova, Kapingula Mukalamba, e o apingule umulandu mu nshila yakwe iyalungama kabili pa nshita yakwe iyalinga.—Belengeni Yuda 9.
6. Bushe Yesu alangile shani ukuti ali uwaicefya ilyo asumine ukuba Mesia?
6 Pa fintu ifyo Yesu asambilile ilyo aali ku muulu, pafwile pali na masesemo ayalelanda pa fyali no kumucitikila pano calo nga Mesia. Kanshi afwile alishibile limo amafya aali no kupitamo. Na lyo line, Yesu alisumine ukwisa pano calo no kwisafwa nga Mesia walailwe. Mulandu nshi asuminine? Ilyo umutumwa Paulo alelanda pa kuicefya kwa Mwana wa kwa Lesa uwafyalwa eka, atile: “Nangu ca kutila aali mu cipasho ca kwa Lesa, tatalile atontonkanya ukutila kuti alingana na Lesa. Iyo, lelo aisangwile uwa fye no kubuula icipasho ca busha kabili aishileba mu cipasho ca bantu.”—Fil. 2:6, 7.
“ALI-ICEFESHE” ILYO AALI PANO CALO
7, 8. Bushe Yesu alangile shani ukuti ali uwaicefya ilyo ali umwaice na lintu alebomba umulimo wa kushimikila?
7 Paulo alembele ukuti: “Ilyo [Yesu] aisangile mu mibele ya buntu, ali-iceefeshe kabili aishileba uwa cumfwila ukufika na ku mfwa, awe ukufika ku mfwa pa cimuti.” (Fil. 2:8) Ukufuma fye ilyo ali umwaice, Yesu ali uwaicefya. Nangu ca kutila abafyashi bakwe abamukushishe, Yosefe na Maria, bali abashapwililika, Yesu “alebanakila.” (Luka 2:51) Ala Yesu aba ca kumwenako icisuma ku bacaice abanakila abafyashi babo pantu Lesa akabapaala!
8 Na lintu Yesu akulile, alangile ukuti ali uwaicefya pantu abikile sana amano ku kucita ukufwaya kwa kwa Yehova, te kufwaya kwakwe. (Yoh. 4:34) Ilyo aleshimikila, Yesu Kristu alesambilisha abantu ishina lya kwa Lesa kabili aleafwa abalefwaya ukusambilila icine ukwishiba bwino imibele ya kwa Yehova ne fyo afwaya ukucitila abantunse. Na kabili Yesu alecita filya fine alesambilisha pali Yehova. Ku ca kumwenako, mwi pepo lya cilangililo, icishinka ca kubalilapo ico Yesu alandile ca kuti: “Shifwe wa mu muulu, ishina lyenu libe ilya mushilo.” (Mat. 6:9) Kanshi Yesu asambilishe abasambi bakwe ukuti balingile ukubika sana amano ku kulenga ishina lya kwa Yehova ukuba ilya mushilo. Na o e fyo alecita. Ilyo ali mupepi no kupwisha umulimo wa kushimikila pano calo, Yesu apepele kuli Yehova ati: “Nalenga [abatumwa] beshibe ishina lyenu kabili nkalenga likeshibikwe.” (Yoh. 17:26) Na kabili, mu milimo yakwe yonse iyo abombele pano calo, Yesu alelanda ukuti talecita akantu nangu kamo ku maka yakwe umwine, lelo Yehova e walemwafwa.—Yoh. 5:19.
9. Finshi Sekaria asobele pali Mesia, kabili fyafikilishiwe shani muli Yesu?
9 Sekaria asobele pali Mesia ukuti: “Angisha, we mwana mwanakashi Sione. Welesha ukuwelesha kwa kucimfya, we mwana mwanakashi Yerusalemu. Mona! Imfumu yobe ileisa kuli iwe. Yalilungama, kabili bali-ipususha; yali-icefya, kabili ileisa pa mpunda, pa mpunda iikalamba, pa mwana wa mpunda iikota.” (Seka. 9:9) Uku kusesema kwafikilishiwe ilyo Yesu aingile mu Yerusalemu ilyo kwashele inshiku ishinono ukuti kube Ica Kucilila ca mu 33 C.E. Abantu abengi bayanshike ifya kufwala fyabo ne misambo ya ku miti mu musebo. Mu musumba mwakabile na se ku congo ilyo Yesu aleingila. Na lintu abantu balemulumbanya abati Imfumu, Yesu ali fye uwaicefya.—Mat. 21:4-11.
10. Bushe filya Yesu atwalilile uwa cumfwila mpaka ne mfwa, alangilile finshi?
10 Ilyo Yesu Kristu ali pano calo, ali uwaicefya kabili uwa cumfwila mpaka fye na lintu afwile pa cimuti ca kucushiwilwapo. Ifi acitile alangile ukuti abantu kuti batwalilila aba cishinka kuli Yehova nangu bapite mu mesho ayabipisha. Yesu alangile no kuti Satana alibepele filya alandile ukuti abantu babombela Yehova pa mulandu wa kuti alabapeelako fimo. (Yobo 1:9-11; 2:4) Na kabili ifi Kristu atwalilile uwa cishinka alangile ukuti Yehova e walinga ukuteka no kuti ukuteka kwakwe kwalilungama. Ukwabula no kutwishika, Yehova alitemenwe ukumona ifyo Umwana wakwe uwaicefya atwalilile uwa cishinka.—Belengeni Amapinda 27:11.
11. Bushe ilambo lya cilubula ilya kwa Yesu Kristu lyalenga ukuti abamutetekela bakwate isubilo nshi?
11 Imfwa ya kwa Yesu pa cimuti ca kucushiwilwapo yalengele no kuti abantu balubuke ku lubembu ne mfwa. (Mat. 20:28) Icilubula ca kwa Yesu calenga ukuti Yehova aletwelela imembu ukubomfya amafunde yakwe ayalungama no kutupeela ishuko lya kwikala umuyayaya. Paulo alembele ukuti: “Filya abantu ba misango yonse bapingwililwe ku cilubo ca muntu umo, e fyo abantu ba misango yonse bakalungamikilwa ku bumi ku bulungami bwa muntu umo.” (Rom. 5:18) Imfwa ya kwa Yesu yalenga ukuti Abena Kristu abasubwa no mupashi bakwate isubilo lya kuba no bumi ubushifwa ku muulu, e lyo “impaanga shimbi” bakaba no mweo wa muyayaya pe sonde.—Yoh. 10:16; Rom. 8:16, 17.
“NALI-ICEFYA”
12. Bushe Yesu alangile shani ukuti alifuuka kabili ali-icefya mu fyo alecita ku bantunse ababembu?
12 Yesu aebele bonse ‘abalecula kabili abafinininwe’ ukuya kuli ena. Atile: “Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha.” (Mat. 11:28, 29) Ukuicefya no kufuuka kwalengele Yesu ukuba ne cikuuku no mulinganya ku bantunse ababembu. Tale-enekela abasambi bakwe ukucita ifyo bashingakumanisha. Yesu alebatasha no kubakoselesha. Talebalenga ukuyumfwa kwati tapali ifyo baishibe nelyo ukuti bacabecabe. Ukwabula no kutwishika, Yesu tali munkalwe nelyo uwa mutitikisha. Lelo ale-eba abasambi bakwe ukuti nga bapalama kuli ena no kulacita ifyo alebasambilisha, baali no kusanga ukutuusha, pantu ikoli lyakwe talyafina ne cipe cakwe calyanguka. Abantu fye bonse, abaume na banakashi, abaice na bakalamba, baleumfwa bwino ukuba na Yesu.—Mat. 11:30.
13. Bushe Yesu alangile shani ukuti ali ne nkumbu ku bantu abalecula?
13 Yesu aleumfwila inkumbu abena Israele abalecula, kabili alebafwa. Ilyo ali mupepi na Yeriko, asangile kalombalomba impofu, ishina lyakwe Bartimeo, ne mpofu imbi iishaishibikwa ishina. Aba baume babili impofu bakoselepo fye ukulomba Yesu ukuti abafwe, lelo ibumba lyalibakalipile ukuti batalale tondolo. Yesu afwaya, nga tabikile amano ku fyo aba baume balelomba! Lelo alibomfwilile uluse, e ico alibetile no kubondapa, batendeka no kumona. Ifi Yesu ali uwaicefya kabili aleumfwila abantunse ababembu uluse, alepashanya Wishi Yehova.—Mat. 20:29-34; Marko 10:46-52.
“ONSE UUICEFYA BAKAMUCINDAMIKA”
14. Fisuma nshi ifyafuma mu kuicefya kwa kwa Yesu?
14 Ukuicefya kwa kwa Yesu Kristu kwalilenga abengi ukusekelela no kunonkelamo. Yehova alisekelele pantu Umwana wakwe uo atemwa alitwalilile ukuba ne cumfwila kuli ena. Abatumwa na basambi balisangile ukutuusha pantu Yesu ali uwafuuka kabili uwaicefya. Ifyo alecita, ifyo alesambilisha, ne fyo alebatasha ukufuma pa nshi ya mutima fyalengele abasambi ukulunduluka mu fya kwa Lesa. Na bantu yaweyawe balinonkelemo mu kuicefya kwa kwa Yesu pantu alebafwa, alebasambilisha no kubakoselesha. Na kuba, bonse abatetekela ilambo lya kwa Yesu bakapaalwa umuyayaya.
15. Bushe Yesu anonkelamo shani mu kuba uwaicefya?
15 Inga Yesu ena, bushe alinonkelamo mu kuicefya kwakwe? Ee, alinonkelamo. Yesu aebele abasambi bakwe ukuti: “Onse uuiceefya bakamucindamika.” (Mat. 23:12) Ifi fine e fyacitika kuli Yesu. Paulo alondolwele ukuti: “Lesa na o alimusansabike [Yesu] kabili mu cikuuku amupeele ishina ilyacila amashina yonse, pa kuti mwi shina lya kwa Yesu ikufi lyonse lifukame ilya ba mu muulu ne lya ba pano isonde ne lya ba pa nshi ya calo, no lulimi lonse lusose apabuuta ukuti Yesu Kristu e Shikulu pa kuti Lesa Shifwe acindikwe.” Pa mulandu wa kuti Yesu ali uwaicefya kabili uwa cishinka ilyo ali pano calo, Yehova Lesa alimusansabika no kumupeela amaka pa fibumbwa fya mu muulu ne fya pe sonde.—Fil. 2:9-11.
YESU AKALWA PA MULANDU WA CISHINKA NO KUICEFYA
16. Finshi filanga ukuti Umwana wa kwa Lesa akatwalilila ukuba uwaicefya na ku nshita ya ku ntanshi?
16 Yesu Umwana wa kwa Lesa, akatwalilila ukuba uwaicefya na ku nshita ya ku ntanshi. Ilyo uwaimbile amalumbo alesobela ifyo Yesu, Imfumu iyaba ku muulu akacita ku balwani bakwe, atile: “Mu bucindami bobe kabiye ulecimfya; nina pali kabalwe obe pa mulandu wa cishinka no kuiceefya no bulungami.” (Amalu. 45:4) Pa Armagedone, Yesu Kristu akalwa pa mulandu wa cishinka no bulungami e lyo no kuicefya. Nomba cinshi cikacitika pa mpela ya Kuteka kwa Myaka Ikana Limo ilyo Imfumu Mesia ‘ikonaula ubuteko bonse no butungulushi bonse na maka’? Bushe Yesu akatwalilila ukuba uwaicefya? Ee, pantu “akalubwila ubufumu kuli Lesa kabili Wishi.”—Belengeni 1 Abena Korinti 15:24-28.
17, 18. (a) Mulandu nshi cacindamina ku babomfi ba kwa Yehova ukuba abaicefya nga filya Yesu aba? (b) Finshi tukalandapo mu cipande cikonkelepo?
17 Inga ifwe, bushe tukapashanya Yesu uwaba uwaicefya? Ilyo Imfumu Yesu Kristu akesa mu kupingula abantu pa Armagedone, bushe tukapusuka? Yesu akapususha fye abaicefya na balungami pantu e mibele akwata. Kanshi calicindama ukuba abaicefya nga tulefwaya ukwisapusuka. Na kabili, nga tuli abaicefya, tukanonkelamo sana, na bantu bambi nabo bakanonkelamo nga filya fine cali kuli Yesu Kristu.
18 Cinshi cingatwafwa ukuba abaicefya nga filya Yesu aba? Kuti twacita shani pa kutwalilila ukuba abaicefya nangu ca kuti limo kuti ca-afya? Aya e mepusho tukalandapo mu cipande cikonkelepo.
[Ifipusho]
[Ifikope pe bula 12]
Kuti twanonkelamo shani mu kuicefya kwa kwa Yesu?
[Icikope pe bula 13]
Tufwile ukupashanya Yesu uwali no luse
