Jisas i Soemaot Eksampol Blong Tingting We i Stap Daon
Jisas i Soemaot Eksampol Blong Tingting We i Stap Daon
“Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.”—JON 13:15.
?WANEM ANSA BLONG YU?
Bifo we Pikinini blong God i kamdaon long wol, ?hem i soemaot olsem wanem se tingting blong hem i stap daon?
Long wol, ?Jisas i soemaot olsem wanem se tingting blong hem i stap daon?
?Wanem ol gudfala samting we oli kamaot from we tingting blong Jisas i stap daon?
1, 2. ?Long naet bifo we Jisas i ded, hem i tijim ol aposol blong hem long wanem samting?
LONG naet bifo we Jisas i ded, hem i joen wetem ol aposol blong hem long wan stori haos long Jerusalem. Taem oli stap kakae, Jisas i girap, i tekemaot kot blong hem. Hem i tekem wan tawel, i parpar long hem. Nao hem i tekem wan dis, i kafsaedem wota i go long hem. Nao hem i wasem leg blong ol disaepol blong hem mo hem i waepem long tawel ya. Taem hem i finis, hem i putum kot blong hem bakegen. Wok ya we Jisas i mekem i soemaot se tingting blong hem i stap daon. ?Be hem i mekem samting ya blong wanem?—Jon 13:3-5.
2 Jisas i talem se: “?Yufala i save mining blong samting ya we mi jes mekem long yufala?” Biaen hem i ansa se: “From we mi, mi Masta mo mi Tija blong yufala, mi wasem leg blong yufala, yufala tu i mas waswasem leg blong yufala. Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.” (Jon 13:12-15) Wok ya we Jisas i mekem i daon we i daon. Hem i tijim ol aposol long wan bigfala samting, hemia se oli mas gat tingting we i stap daon. Fasin ya bambae i givhan long olgeta biaen.
3. (1) ?Wanem tufala taem we Jisas i soemaot se ol man blong hem oli mas mekem tingting blong olgeta i stap daon? (2) Long stadi ya, ?bambae yumi tokbaot wanem?
3 Hemia i no fastaem we Jisas i soemaot long ol aposol se oli mas mekem tingting blong olgeta i stap daon. Wan taem, ol aposol oli stap rao se hu long olgeta i hae moa. Ale Jisas i tekem wan smol pikinini i kam, nao i talem long olgeta se: “Man we i wantem ona long mi, nao i tekem pikinini ya, i stap lukaot gud long hem, i olsem we hem i tekem mi, i stap lukaot gud long mi. Mo man we i tekem mi, i stap lukaot gud long mi, hem i mekem long man ya we i sanem mi mi kam. Long fasin ya nao, man we i daon moa long yufala evriwan, hem i hae moa long yufala.” (Luk 9:46-48) Long wan narafala taem, Jisas i stap toktok long ol Farisi we oli ting se oli hae moa long ol narafala, i se: “Man we hem i stap leftemap hem blong i kam haeman, bambae God i putum hem i stap daon. Be man we tingting blong hem i stap daon, bambae God i leftemap hem i kam haeman tru.” (Luk 14:11) I klia se Jisas i wantem we ol man blong hem oli mekem tingting blong olgeta i stap daon. Hem i no wantem we oli gat flas tingting, mo we oli ting se oli hae moa long ol narafala. Hem i no wantem we oli mekem olsem we oli stret moa i bitim ol narafala. Naoia bambae yumi stadi gud long eksampol blong Jisas. Olsemia, bambae yumi save folem fasin ya blong hem. Bambae yumi tokbaot tu, se fasin ya i karem wanem blesing i kam long man we tingting blong hem i stap daon mo long ol narafala man.
“MI NO TANEM BAKSAED LONG HEM”
4. ?Bifo we Jisas i kamdaon long wol, hem i soemaot olsem wanem se tingting blong hem i stap daon?
4 Bifo we Pikinini blong God i kamdaon long wol, hem i soemaot se tingting blong hem i stap daon. Hem i stap longlongtaem wetem Papa blong hem long heven. Buk blong Aesea i soemaot se tufala i fren gud, i se: “Hae God i Masta blong mi, mo hem i tijim mi finis long ol tok we hem i wantem blong mi mi talem, blong mi save mekem olgeta we oli slak oli strong bakegen. Evri moning, hem i stap mekem mi mi rere gud blong harem ol tok we hem i wantem tijim mi long hem. Hem nao i mekem mi mi gat save, nao mi mi no girap agens long hem, mi no tanem baksaed long hem.” (Aes. 50:4, 5) Jisas i wantem tumas se Jehova i tijim hem. Tingting blong hem i stap daon, nao hem i lesin gud long ol samting we Jehova i talem long hem. Mo tu, hem i luk we Jehova i gat tingting daon nao i sore long ol sinman.
5. Taem Jisas i rao wetem Setan, ?hem i soemaot olsem wanem se tingting blong hem i stap daon?
5 Sam enjel oli no gat tingting we i stap daon olsem Jisas. Enjel ya we i kam Setan, hem i no wantem we Jehova i tijim hem. Hem i kam flas nao i ting se hem i hae moa long ol narafala. Fasin ya i defren olgeta long tingting we i stap daon, mo i lidim hem blong i girap agens long Jehova. Be fasin blong Jisas i no olsem. Hem i no traem kasem moa paoa long heven i bitim wanem we God i givim long hem. Mo neva hem i yusum paoa blong hem long rod we i no stret. Baebol i tokbaot wan taem we Jisas i rao wetem Setan from bodi blong Moses. Jisas, hem i enjel ya Mikael we i gat moa paoa bitim ol narafala enjel. Nating se i olsem, hem i no mekem samting we i no gat raet blong mekem. Tingting blong Jisas i stap daon, mo hem i no wantem soem hem. Hem i glad nomo blong wet long Jaj blong heven mo wol, Jehova, blong i stretem ol samting, long stret taem blong hem mo long fasin we i stret gud.—Ridim Jud 9.
6. Taem Jisas i glad blong kam Mesaea, ?hem i soemaot olsem wanem se tingting blong hem i stap daon?
6 Bifo we Jisas i kamdaon long wol, hem i save ol profet tok we oli tokbaot Mesaea mo wanem samting bambae i hapen long hem. Taswe, hem i mas save se bambae hem i harem nogud long bodi blong hem. Nating se i olsem, hem i glad nomo blong kamdaon long wol, mo blong ded olsem Mesaea. ?Wanem i givhan long Jisas blong hem i glad? Aposol Pol i talem se tingting we i stap daon i givhan long Jisas. Hem i talem se Jisas “i no ting se hem i mas traehad blong kam sem mak wetem God.” Be hem “i lego olgeta fasin ya, nao i kam olsem man blong wok nomo. Hem i bon long wol ya, i kam man. Hem i karem fasin blong man.”—Fil. 2:6, futnot, 7.
JISAS I KAM MAN, “I MEKEM TINGTING BLONG HEM I STAP DAON”
7, 8. Taem Jisas i yangfala mo taem hem i stap prij, ?hem i soemaot olsem wanem se tingting blong hem i stap daon?
7 Pol i talem se taem Jisas i kam man, ‘hem i mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long pos.’ (Fil. 2:8) Stat taem Jisas i pikinini nomo, hem i soemaot eksampol blong tingting we i stap daon. Nating se Josef mo Meri tufala i sinman, be hem i obei long tufala olsem papa mo mama blong hem. (Luk 2:51) I gud ol yangfala oli folem eksampol ya blong hem. Sipos oli obei long papa mo mama blong olgeta, God bambae i blesem olgeta.
8 Taem Jisas i kam bigwan, hem i soemaot se tingting blong hem i stap daon. Hem i ting se i impoten moa blong mekem samting we Jehova i wantem, i no samting we hem i wantem. (Jon 4:34) Taem Jisas Kraes i stap prij, hem i yusum nem blong God, mo i tijim ol man long plan blong God mo long ol fasin blong Papa blong hem. Jisas i no talem nomo wanem ol fasin we ol man oli mas folem blong mekem God i glad. Be hem tu i folem ol fasin ya. Olsem nao, taem hem i tijim ol disaepol blong hem long stret rod blong prea, fas samting we hem i talem se: ‘Papa blong mifala we yu yu stap long heven. Plis, yu mekem nem blong yu i tabu.’ (Mat. 6:9) Long ples ya Jisas i soemaot se i moa impoten blong leftemap nem blong Jehova, i bitim olgeta narafala samting. Hem tu i mekem olsem. Klosap long en blong laef blong hem long wol, hem i talem long Jehova se: “Mi mi stap talemaot nem blong yu long olgeta blong mekem olgeta oli save yu.” (Jon 17:6) Plante taem Jisas i talem se hem i no save mekem wan samting hem wan. Papa blong hem, Jehova, i givhan long hem.—Jon 5:19.
9. ?Wanem profet tok we Sekaraea i talemaot? ?Profet tok ya i kamtru olsem wanem?
9 Profet Sekaraea i tokbaot Mesaea we bambae i kamtru, i se: “!Ol man Saeon! Yufala i mas harem gud, yufala i glad. !Ol man Jerusalem! I gud yufala i glad we yufala i singsingaot from. !Yufala i luk! King blong yufala i stap kam long yufala. Hem i win finis, mo i glad tumas from we hem i winim ol enemi blong hem. Be tingting blong hem i stap daon, nao i stap raed long wan dongki. Hem i stap raed long wan dongki we i yangfala nomo.” (Sek. 9:9) Profet tok ya i kamtru taem Jisas i raed long dongki i kam long Jerusalem, bifo long Pasova long yia 33. Plante man oli sakem kot blong olgeta mo ol han blong tri oli go long rod long fored blong Jisas. Ol man Jerusalem oli glad tumas taem oli harem se Jisas i stap kam. Nating se ol man ya oli presem Jisas olsem King blong olgeta, be tingting blong hem i stap daon.—Mat. 21:4-11.
10. ?Jisas i pruvum wanem, taem hem i obei gogo i ded?
10 Taem Jisas Kraes i stap long wol, tingting blong hem i stap daon mo i obei long God gogo hem i ded long pos. Hem i pruvum gud se ol man oli save obei long Jehova oltaem, nating se oli kasem bigfala trabol. Mo tu, Jisas i pruvum se Setan i rong, taem hem i talem se ol man oli mekem wok blong Jehova blong kasem samting nomo. (Job 1:9-11; 2:4) Taem Jisas i obei gud long Papa blong hem, hem i soemaot se Jehova i gat raet blong rul long ol man. Mo tu, hem i soemaot se i trastem fasin blong Jehova blong rul, mo se rul blong hem i beswan. Jehova i glad tumas blong luk se Pikinini blong hem we tingting blong hem i stap daon, i holem strong long hem go kasem en.—Ridim Ol Proveb 27:11.
11. ?Sakrefaes blong Jisas i mekem se ol man we oli bilif long hem oli gat wanem janis?
11 Taem Jisas i ded long pos, hem i pem rod blong ol man oli kam fri long sin mo ded. (Mat. 20:28) Sakrefaes blong Jisas i openem rod blong Jehova i fogivim ol man, mo i givim janis long olgeta blong oli save laef olwe. Rod ya i stret long tingting blong Jehova. Pol i talem se: “Stret samting ya we wan man nomo i mekem, hem i mekem we God i talem se ol man oli save go fri, oli save laef.” (Rom 5:18) Ded blong Jisas i mekem se olgeta we tabu spirit i makemaot olgeta, oli save laef long heven gogo i no save finis. Mo ded blong hem i mekem se ol “narafala sipsip” oli save laef long wol ya gogo i no save finis.—Jon 10:16; Rom 8:16, 17.
‘TINGTING BLONG HEM I STAP DAON’ MO I KAEN LONG OL MAN
12. ?Jisas i mekem wanem long ol sinman, we i soemaot se tingting blong hem i stap daon mo i kwaet man?
12 Jisas i singaot ol man we oli taed mo we tingting blong olgeta i slak, oli kam long hem. Hem i talem se: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.” (Mat. 11:28, 29) From we tingting blong Jisas i stap daon mo hem i kwaet man, hem i kaen long ol sinman, mo hem i mekem i stret long evriwan. Hem i no askem long ol disaepol blong hem blong oli mekem moa, i winim wanem we oli naf blong mekem. Jisas i talem gudfala toktok long olgeta mo i leftemap tingting blong olgeta. Hem i no mekem olgeta oli harem se oli sathed mo oli nating nomo. Jisas i no mekem i strong tumas long olgeta, mo oli no harem se i had blong mekem hem i glad. Long kaen fasin, Jisas i talem long olgeta se: “Yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” Hemia i min se ol samting we man i mas mekem blong kam disaepol blong Jisas, oli no strong tumas. Sipos oli lukluk fasin blong hem mo oli traem folem, mo sipos oli obei long ol tok blong hem, bambae oli harem gud. From samting ya, ol man mo ol woman, ol yangfala mo ol olfala, evriwan oli laekem blong kampani wetem Jisas.—Mat. 11:30.
13. ?Jisas i mekem wanem blong soemaot se hem i sore long ol man we laef blong olgeta i had?
13 Jisas i sore long ol man Isrel we laef blong olgeta i had, mo hem i mekem evri samting blong traem halpem olgeta. Klosap long Jeriko, Jisas i luk tu blaenman, Batimeas mo fren blong hem, we oltaem tufala i stap askem mane long ol man. Tufala i stap singaot long Jisas blong i givhan long tufala. Ol man oli talem long tufala blong tufala i stap kwaet. Jisas i save tanem baksaed long tufala. Be hem i no mekem olsem. Hem i sore long tufala, ale i singaot tufala i kam long hem nao i mekem ae blong tufala i gud bakegen. Jisas i folem fasin blong Papa blong hem, Jehova. Hem i soemaot se tingting blong hem i stap daon, mo hem i sore long ol man we oli trabol.—Mat. 20:29-34; Mak 10:46-52.
‘MAN WE I STAP DAON, BAMBAE GOD I LEFTEMAP HEM’
14. ?Wanem ol gudfala samting we oli kamaot from we tingting blong Jisas i stap daon?
14 Yes, tingting blong Jisas i stap daon, mo from samting ya hem i givim blesing long plante man mo i mekem olgeta oli glad. Jehova i glad long Pikinini blong hem we i obei gud long hem. Ol aposol mo ol disaepol blong Jisas tu oli harem gud mo tingting blong olgeta i kam strong, taem hem i givhan long olgeta long kwaet fasin mo wetem tingting we i stap daon. Hem i soemaot wan gudfala eksampol long olgeta, i tijim olgeta, mo i talem ol gudfala toktok from wok we oli mekem. Long rod ya, hem i givhan long olgeta blong oli kamgud moa long wok blong God. Hem i mekem i gud long plante narafala tu, taem hem i tijim olgeta, i leftemap tingting blong olgeta, mo i givim samting we oli nidim. Blong talem stret, olgeta man oli save kasem blesing blong olwe from sakrefaes blong Jisas, sipos oli bilif long hem.
15. From we tingting blong Jisas i stap daon, ?hem i kasem wanem blesing?
15 ?Olsem wanem? ?Taem Jisas i holem tingting we i stap daon, hem tu i kasem blesing? Yes. ?Hem i kasem wanem blesing? Hem i talem se: “Man we hem nomo i mekem hem i stap daon, bambae God i leftemap hem.” (Mat. 23:12) Pol i eksplenem se hemia nao samting we i hapen long Jisas, i se: ‘God i leftemap nem blong hem i go antap olgeta, i givim nem long hem we i hae moa long ol narafala nem. Nao olgeta long heven, mo long wol, mo ol dedman, bambae oli bodaon oli ona long nem blong hem, mo olgeta man bambae oli talemaot we Jisas Kraes i Masta blong olgeta, blong leftemap nem blong God, Papa blong yumi.’ From we tingting blong Jisas i stap daon mo hem i obei gud, Jehova God i “leftemap nem blong hem.” Hem i givim haenem long hem, i mekem se hem i gat moa paoa i winim olgeta man long heven mo long wol.—Fil. 2:9-11.
JISAS BAMBAE ‘I FAET FROM TRUTOK MO TINGTING WE I STAP DAON’
16. Long fiuja, ?bambae Jisas i soemaot olsem wanem se tingting blong hem i stap daon?
16 Long fiuja, Pikinini blong God bambae i holem tingting we i stap daon. Buk blong Ol Sam i tokbaot Jisas we i King long heven, mo wanem we bambae hem i mekem long ol enemi blong God, i se: ‘Yu go long paoa blong yu blong yu winim ol enemi blong yu. Yu mas faet from fasin ya we tingting blong man i stap daon mo from trutok mo stret fasin.’ (Sam 45:4) Long Amagedon, Jisas Kraes bambae i faet from ol stret man we oli laekem trutok mo we tingting blong olgeta i stap daon. Long en blong rul blong hem blong wan taosen yia, afta we hem i spolem ‘ol jif blong ol devel, mo ol gavman blong olgeta, wetem olgeta we oli gat paoa,’ ?wanem bambae i hapen? ?Bambae tingting blong hem i stap daon yet? Yes. Baebol i talem se bambae hem i givim kingdom i gobak long God.—Ridim 1 Korin 15:24-28.
17, 18. (1) ?Blong wanem ol man blong Jehova oli mas mekem tingting blong olgeta i stap daon olsem Jisas? (2) Long nekis stadi, ?bambae yumi tokbaot wanem kwestin?
17 ?Olsem wanem long yumi? ?Bambae yumi folem eksampol blong Jisas mo mekem tingting blong yumi i stap daon? Long Amagedon, King ya Jisas Kraes bambae i sevem nomo ol stret man we tingting blong olgeta i stap daon. Taswe sipos yumi wantem we hem i sevem yumi, tingting blong yumi i mas stap daon. Sipos yumi mekem olsem, bambae yumi kasem plante blesing olsem Jisas, mo plante narafala tu bambae oli kasem blesing from.
18 ?Wanem i save givhan long yumi, blong yumi mekem tingting blong yumi i stap daon olsem Jisas? I no isi oltaem blong mekem tingting i stap daon. ?Yumi save mekem bes blong yumi olsem wanem? Long nekis stadi, bambae yumi tokbaot ol kwestin ya.
[Kwestin]
[Tok blong pija long pej 15]
Eksampol blong Jisas we i mekem tingting blong hem i stap daon, ?i tijim yumi long wanem samting?
[Tok blong pija long pej 16]
Yumi mas folem fasin blong Jisas blong sore long ol man
