Jesus A Isetiw Leenien Áppirú fán Iten Tipetekison
Jesus A Isetiw Leenien Áppirú fán Iten Tipetekison
“Ngang üa anomu eu lenien apirü fän itemi, pwe ämi oupwe föri usun chök met ngang üa föri ngenikemi.”—JOH. 13:15.
IFA USUN KOPWE PÉLÚWENI?
Ifa usun Néún Kot we a pwáraatá tipetekison me mwen an feitiw fénúfan?
Ifa usun Jesus a pwáraatá tipetekison lupwen a nónnóm wóón fénúfan?
Ikkefa ekkewe feiéch a feito seni án Jesus tipetekison?
1, 2. Atun ewe sáingoon pwinin án Jesus nóm wóón fénúfan, ifa ewe lesen a áiti ngeni néún kewe aposel?
LÓN ewe sáingoon pwinin án Jesus nóm wóón fénúfan, i me néún kewe aposel ra nóm Jerusalem lón eú imw lón ewe ruumw asan. Atun ar mwéngéén le fááf, Jesus a útá me pwilitawu úfan we sekit. A ri ngeni lukanapan eché taul me ninaalong och konik lón eú waspesen. Mwirin, a poputá télú pechen néún kewe chón káé me télúpwásei ngeni ewe taul. Lupwen a wes, a úféúf sefál úfan we. Met popun Jesus a féri ena sókkun angang mi tekisosson?—Joh. 13:3-5.
2 Jesus a áweweei: “Ifa usun, oua weweiti met ngang üa föri ngenikemi? . . . Ngang ämi Samol me Sense üa talü pechemi, iei usun pwal ämi oupwe talü pechemi eman ngeni eman. Ngang üa anomu eu lenien apirü fän itemi, pwe ämi oupwe föri usun chök met ngang üa föri ngenikemi.” (Joh. 13:12-15) Ren ena féffér mi tekisosson, Jesus a áiti ngeni néún kewe aposel eú lesen repwe fókkun chechchemeni me epwe álisiir le tipetekison lón ekkewe fansoun repwe feito.
3. (a) Lón ruu fansoun, ifa usun Jesus a pwáraatá lamoten ewe napanap tipetekison? (b) Met sipwe káé lón ei lesen?
3 Lupwen Jesus a télú pechen ekkewe aposel, esap ina ewe áeúin atun a áiti ngeniir lamoten ewe napanap tipetekison. Lón pwal eú atun, ekkóch ekkewe aposel ra áninifengen ika ié epwe lap me leir meinisin. Iwe Jesus a aútáái emén semirit lepekin me ereniir: “Iö a etiwa ei semirit fän itei, a etiwaei. Nge iö a etiwaei a pwal etiwa ewe eman a tiniei. Pun iö a kis me leimi meinisin, ina i ätewe a lap mwemi meinisin.” (Luk. 9:46-48) Mwirin och fansoun, Jesus a fós ngeni ekkewe Farisi, ekkewe ra ekieki pwe iir ra tekia seni ekkewe ekkóch, a apasa: “Pun eman aramas mi püsin atekiatä, epwe tekisonotiu, nge eman mi püsin atekisonatiu, epwe tekiatä.” (Luk. 14:11) A ffat pwe Jesus a mochen néún kewe chón káé repwe tipetekison. Ese mochen repwe lamalam tekia me ekieki pwe ra kon aúchea seni ekkewe ekkóch. Sipwe káéfichi usun án Jesus tipetekison pwe sipwe tongeni áppirú. Sipwe pwal káé ifa usun ei napanap tipetekison epwe efeiéchú ewe emén mi pwáraatá tipetekison me pwal ekkewe ekkóch.
“ÜSAP PWAL SAP SENI”
4. Ifa usun Jesus a pwáraatá tipetekison me mwen an feitiw fénúfan?
4 Néún Kot we a tipetekison pwal mwo nge me mwen an feitiw fénúfan. Jesus a fen nóm ren Seman we lón láng ren fansoun langattam. Ewe puken Aisea a áweweei péchékkúlen án Jesus riri ngeni Seman we. A erá: “Kot ewe Samol mi Lapalap a atufichiei le kapas pwe üpwe silei met sokun kapas üpwe achipa ngeni chon riaföü. Iteiten lesosor a föngüniei, a suki selingei pwe üpwe tufichin aüseling usun eman chon kaiö a aüseling. Iwe, Kot ewe Samol mi Lapalap a suki selingei, nge üsap lükümach ngeni, üsap pwal sap seni.” (Ais. 50:4, 5) Jesus a fókkun sani le káé seni ewe Kot mi enlet. A tipetekison me aúselingaéchú met Jiowa a áiti ngeni. Ese mwáál a pwal káéfichi ifa usun Jiowa a tipetekison le pwáraatá úméúméch ngeni aramas mi tipis.
5. Ifa usun Jesus a pwáraatá tipetekison me mirititi aúkúkún an nemenem ewe atun ra áninifengen me ewe Tefil?
5 Esap meinisin chónláng ra tipetekison usun Jesus. Emén chónláng, ewe a wiliti Satan ewe Tefil ese mochen káé seni Jiowa. A poputá le lamalam tekia me meefi pwe a kon aúchea seni ekkewe ekkóch. Napanapan a mwáálfesen me ewe napanap tipetekison. Mwirilóón, a ú ngeni Jiowa. Nge napanapen Jesus a fókkun sókkóló seni. Ese tipeni an epwe lapóló an nemenem lón láng lap seni minne Jiowa a ewisa ngeni. Ese pwal mochen áeámwáálli péchékkúlen an nemenem. Áwewe chék, ewe Paipel a pwóróus usun án Jesus me ewe Tefil áninifengen wóón somáán Moses. Inaamwo ika Jesus, i Mikael, ewe meilapen chónláng mi watte an manaman, nge ese féri och mettóch esor an pwúúng wóón. Néún Kot na a pwáraatá tipetekison me a mirititi aúkúkún péchékkúlen an nemenem. A menemenéch an epwe witiwiti Jiowa, ewe Sou Kapwúng mi Lapalap seni meinisin, an epwe wisen apwúngú ena mettóch lón ewe napanap me fansoun mi fich ngeni.—Álleani Jutas 9.
6. Ifa usun Jesus a pwáraatá tipetekison ren an tipemecheres le wiliti ewe Messaia?
6 Lupwen Jesus a nóm láng, a fen silei ekkewe oesini meinisin mi weneiti met epwe fis ngeni usun ewe Messaia. Ese mwáál a silei pwe epwe kúna riáfféú. Iwe nge, a chúen tipemecheres le nónnóm wóón fénúfan me máló usun ewe Messaia mi Pwonetiw. Pwata? Ewe aposel Paulus a affata pwe tipetekison, ina met a álisi Jesus. A makkeei pwe inaamwo ika Jesus emén chónláng mi fókkun watte an manaman, nge ese ekieki pwe a “wewe ngeni Kot.” Nge “seni lon letipan a fangala meinisin mine a eäni, pwe a lapalapeni lapalapen eman chon angang. A wiliti ususun aramas.”—Fil. 2:6, 7.
“A PÜSIN ATEKISONATIU” USUN EMÉN ARAMAS
7, 8. Ifa usun Jesus a pwáraatá tipetekison seni le kúkkúnún me lón an we angangen afalafal?
7 Paulus a makkeei pwe lupwen Jesus a wiliti emén aramas wóón fénúfan, “a püsin atekisonatiu o eäni aleasochis tori mäla.” (Fil. 2:8) Seni le kúkkúnún Jesus, i a isetiw eú leenien áppirú fán iten ewe napanap tipetekison. A álleasochisi Josef me Maria, inaamwo ika iir rese unuséch. (Luk. 2:51) A ifa me échún ena leenien áppirú fán iten ekkewe kúkkún, ekkewe Kot epwe efeiéchúúr pokiten ar álleasochisi semer kewe me iner!
8 Lupwen Jesus i emén alúwél, a pwal pwáraatá an tipetekison ren an akakkomwa letipen Jiowa. (Joh. 4:34) Lón an angangen afalafal, Jesus Kraist a néúnéú iten Kot we me álisi aramas le silefichi napanapan kewe me letipan ngeni aramas. Jesus a eáni ewe sókkun manaw mi tipeeú ngeni minne a áiti ngeni aramas usun Jiowa. Áwewe chék, lupwen a áiti ngeni néún kewe chón káé ifa usun repwe iótek, a ákkáeúin apasa: “Semem lon läng. Itom epwe pin.” (Mat. 6:9) Lón ei iótek Jesus a affata ngeniir pwe ewe mettóch mi lamot seni meinisin, ina ar repwe elingaaló iten Jiowa we. Pwisin Jesus a pwal féri ena. Lesópwólóón ránin manawan wóón fénúfan, a tongeni ereni Jiowa: “Ngang üa asile ngeniir itom, nge üpwe sopwela ai föri iei usun.” (Joh. 17:26) Fán chómmóng Jesus a pwal erá pwe ese tongeni féri och mettóch me lúkún án Jiowa álillis.—Joh. 5:19.
9. Ifa án Sekaraia we oesini usun ewe Messaia me ifa usun a pwénútá ren Jesus?
9 Iei án Sekaraia oesini usun ewe Messaia: “Oupwe fokun meseik, ämi aramasen Sion. Oupwe akapwas fän pwapwa, ämi aramasen Jerusalem. Nengeni, ämi King a feito remi. A pwüng o pwora, nge a tipetekison o wawa eman aas, eman nienifön aas.” (Sek. 9:9) A pwénútá ei oesini lupwen Jesus a tolong lón Jerusalem me mwen ewe Fetellapen Pasofer lón ewe ier 33. Chómmóng aramas ra ámeresi wóón ewe al úfer kewe me ekkewe palen irá. Meinisin ra fókkun meseik lupwen ra rongorong án Jesus tolong lón ewe telinimw. Nge Jesus a tipetekison inaamwo ika ekkeei aramas ra mwareiti usun néúr King.—Mat. 21:4-11.
10. Án Jesus álleasochis tori máló a ánnetatá met?
10 Lupwen Jesus Kraist a nóm wóón fénúfan, a tipetekison me álleasochis tori an máló wóón ewe iráán ninni. Iwe, a fókkun ánnetatá pwe aramas ra tongeni amwéchú ar tuppwél ngeni Jiowa pwal mwo nge fán watteen riáfféú. A pwal pwáraatá pwe Satan a chofona lupwen a erá pwe aramas ra angang ngeni Jiowa pokiten chék ekkewe feiéch ra angei seni. (Hiop 1:9-11; 2:4) Án Jesus unusen álleasochisi Seman we, a álisatá letelóón pwúngún án Jiowa nemenem me pwáraatá pwe a lúkúlúk wóón múrinnéén an nemenem seni meinisin. Ese mwáál Jiowa a pwapwa le kúna án Néún we mi tipetekison akkamwéchú an tuppwél.—Álleani Än Salomon Fos 27:11.
11. Án Jesus asor a suuki met sókkun ápilúkúlúk fán iten chókkewe mi lúkú i?
11 Án Jesus máló wóón ewe iráán ninni a pwal suuki ngeni aramas ar repwe ngaseló seni tipis me máló. (Mat. 20:28) Pokiten án Jesus asor, Jiowa a tongeni omusaaló ach kewe tipis me ren an kewe allúk mi pwúng me suuki ngeni aramas ewe ápilúkúlúkún manaw esemuch. Paulus a makkeei: “Eu föförün pwüng a angasala aramas meinisin, a pwal amanaueer.” (Rom. 5:18) Án Jesus máló a pwal atufichi ekkewe mi kepit ren án Kot we manaman mi fel ar repwe kúna manaw esemuch lón láng me a pwal atufichi ekkewe “ekkoch siip,” ar repwe kúna manaw esemuch wóón fénúfan.—Joh. 10:16, TF; Rom 8:16, 17.
A TIPETEKISON ME KIREKIRÉCH NGENI ARAMAS
12. Ifa usun Jesus a tipetekison me lukpwetete lón féfférún ngeni aramas mi tipis?
12 Jesus a etiwa meinisin chókkewe mi weiresikkis me lichippúng ar repwe feito ren. A erá: “Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi.” (Mat. 11:28, 29) Pokiten Jesus a tipetekison me mosonoson, iwe, a kirekiréch nge ese aapaap ngeni aramas mi tipis. Ese kútta seni néún kewe chón káé lap seni minne ra tufichin féri, a apúnger me apéchékkúler. Ese ámmeef ngeniir pwe iir mi tiparoch are lipwákingaw. Ese arochongaw ngeniir are áweiresiir. Nge a apasa: “Ai we waas üpwe anomu womi a mecheres, nge wosemi we üpwe ngenikemi a pän.” Me ren alon Jesus keei, wisen néún kewe chón káé ese kon lien weires ar repwe apwénúetá. Ika ra káé seni me álleasochisi minne a áiti ngeniir, iwe, repwe ngaseló. Ina popun, mwán, fefin, kúkkún are chinnap, meinisin iir ra kinamwe le nónnóm ren Jesus.—Mat. 11:30.
13. Ifa usun Jesus a pwáraatá úméúméch ngeni chókkewe mi weires nónnómun manawer?
13 Jesus a meefi attongen ekkóch chón Israel mi weires manawer me a achocho le álisiir. Arap ngeni Jeriko, a chuuri Partimeus me chienan we, iir rúúemén mi mesechun me ra kan soun tingor. Ra tittingorei Jesus an epwe álisiir nge ekkewe aramas ra ereniir repwe fanafaneló. Epwe fen mecheres ngeni Jesus an epwe éménúngaw seniir, nge a fen tonger me kériireto, iwe, a féri och manaman pwe repwe kúna sefálliir. Jesus a áppirú Seman we Jiowa ren an pwáraatá tipetekison me úméúméch ngeni ekkewe aramas mi tipis.—Mat. 20:29-34; Mark. 10:46-52.
“IÖ A PÜSIN ATEKISONATIU EPWE TEKIATÄ”
14. Ikkefa ekkewe feiéch a feito seni án Jesus eáni ewe napanap tipetekison?
14 Án Jesus tipetekison a atoto pwapwa me feiéch ngeni chómmóng aramas. Jiowa a pwapwa pokiten án Néún na álleasochis. Ekkewe aposel me chón káé ra kúna ouruur me péchékkúl pokiten Jesus a lukpwetete me tipetekison. An leenien áppirú, asukul, me an kapasen apúnger a amwékútúúr le feffeitá lón ar angang ngeni Kot. Ekkewe ekkóch aramas ra pwal feiéch seni án Jesus tipetekison, pún a álisiir, asukuler me apéchékkúler. Nge ren enletin, meinisin aramas mi lúkú Jesus repwe kúna feiéch fóchófóch ren an we asor.
15. Ifa usun Jesus a feiéch seni an eáni tipetekison?
15 Nge ifa usun pwisin Jesus? A kúna feiéch seni an eáni ewe napanap tipetekison? Ewer, a feiéch. Ifa usun? Jesus a erá: “Iö a püsin atekisonatiu epwe tekiatä.” (Mat. 23:12) Paulus a áweweei pwe Jesus pwisin a kúna enletin alón na lupwen a makkeei: “Kot a atekiatai won eu leni mi fokun tekia, a pwal ngeni eu it mi iteföüla seni it meinisin. Iwe, chokewe meinisin mi nom won läng me fanüfan pwal failol repwe fotopwäsuk o asamolu ewe it iten Jesus, nge ir meinisin repwe pwärätä pwe Jesus Kraist i Samol, pwe Kot Sam epwe ling ren.” Pokiten Jesus a tipetekison me tuppwél lupwen a nónnóm wóón fénúfan, Jiowa Kot a “atekiatai” ren an ewisa ngeni an epwe nemeni meinisin ekkewe mi nónnóm láng me fénúfan.—Fil. 2:9-11.
JESUS EPWE PENAATÁ EWE ENLET ME TIPETEKISON
16. Ifa usun Néún Kot we epwe sópweló le pwáraatá tipetekison lón mwachkkan?
16 Néún Kot we epwe sópweló le pwáraatá tipetekison lón mwachkkan. Eú me lein ekkewe kél mi pin a oesini ifa usun Jesus, lón wisan we wisen King lón láng, epwe maun ngeni chón koputen Kot kewe. A erá: “Fän om manaman kopwe fetal ngeni win pwe kopwe peni let, tipefesir [“tipetekison,” NW] me pwüng.” (Kölf. 45:4) Lón Armaketon, Jesus Kraist epwe maun fán iten iir kewe mi tipetekison, pwúng me tongei ewe enlet. Nge met epwe fis lesópwólóón án Kraist we nemenem úkúkún engeréú ier, lupwen a “akufu ekewe samol, ekewe sounemenem me ekewe manaman”? Epwe chúen pwáraatá tipetekison? Ewer. Ewe Paipel a erá pwe epwe “atolonga mwün fän nemenien Saman Kot.”—Álleani 1 Korint 15:24-28.
17, 18. (a) Met popun a lamot ngeni néún Jiowa kewe chón angang ar repwe áppirú án Jesus tipetekison? (b) Ikkefa ekkewe kapas eis sipwe pélúweni lón en lesen mwirin ei?
17 Nge ifa usun kich? Sipwe áppirú Jesus me pwáraatá tipetekison? Lón Armaketon, ewe King Jesus Kraist epwe chék amanawa ekkewe mi tipetekison me pwúng. Ina popun mi lamot sipwe tipetekison ika sia mochen kúna manaw. Pwal och, ach tipetekison epwe atoto chómmóng feiéch ngenikich me pwal ekkewe ekkóch, usun chék án Jesus kúna feiéch.
18 Met epwe tongeni álisikich le áppirú án Jesus tipetekison? Ifa usun sipwe achocho le pwáraatá tipetekison pwal mwo nge lupwen a weires ach sipwe féri? Sipwe pélúweni ekkeei kapas eis lón en lesen mwirin ei.
[Sasing lon pekin taropwe 15]
Ifa usun sia tongeni kúna feiéch seni án Jesus tipetekison?
[Sasing lon pekin taropwe 16]
Sipwe áppirú napanapen án Jesus pwáraatá tong
