Jesus Enịm Uwụtn̄kpọ Nsụhọdeidem
Jesus Enịm Uwụtn̄kpọ Nsụhọdeidem
“N̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.”—JOHN 13:15.
DIDIE KE AFO ỌKPỌBỌRỌ?
Didie ke Eyen Abasi okosụhọde idem ke ini emi enye okodude ke heaven?
Didie ke Jesus okosụhọde idem ke ini enye okodude ke isọn̄?
Nso ufọn ke nsụhọdeidem Jesus ada edi?
1, 2. Nso akpan n̄kpọ ke Jesus ekekpep mme apostle esie ke okoneyo emi ekesierede usen emi ẹkewotde enye?
JESUS okodu ye mme mbet esie ke ubet enyọn̄ ufọk kiet ke Jerusalem ke akpatre okoneyo emi enye okodude uwem ke isọn̄. Ke adan̄aemi udia mbubreyo osụk akade iso, Jesus adaha ke enyọn̄ osio ewụra esie enịm n̄kan̄ kiet. Ada ọfọn̄ ukwọhọdeidem ọbọbọ. Ekem, enye esịn mmọn̄ ke besịn ọtọn̄ọ ndiyet mme mbet esie ukot ndien ada ọfọn̄ ukwọhọdeidem emi enye ọkọbọbọde ọkwọhọde mmọ ukot. Ekem afiak emen ewụra esie esịne. Ntak emi Jesus akanamde utọ usụhọde utom oro?—John 13:3-5.
2 Jesus ama etịn̄ se ikanamde enye anam n̄kpọ oro. Enye ọkọdọhọ ete: “Nte mbufo ẹmefiọk se n̄kanamde ye mbufo? . . . Edieke ami, emi ndide Ọbọn̄ ye Andikpep, n̄keyetde mbufo ukot, mbufo n̄ko ẹkpenyene ndiyet kiet eken ukot. Koro n̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.” (John 13:12-15) Jesus ndikenyịme ndiyet mme apostle esie ukot ama ekpep mmọ nsụhọdeidem ke usụn̄ emi mmọ mîdifreke, emi edinyụn̄ anamde mmọ ẹsụhọde idem nte ini akade.
3. (a) Tịn̄ ikaba emi Jesus okowụtde ntak emi ọfọnde ndisụhọde idem. (b) Nso ke iyom ndineme ke ibuotikọ emi?
3 Idịghe okoneyo oro Jesus ekeyetde mme apostle esie ukot ekedi akpa ini emi enye ekpepde mmọ ntak emi ọfọnde ndisụhọde idem. Enyene ini emi mme apostle esie ẹkenenide m̀mê anie okpon akan ke otu mmimọ, Jesus ama anam ekpri eyenọwọn̄ edida enye ke n̄kan̄ ndien ọdọhọ mmọ ete: “Owo ekededi eke adarade ekpri eyenọwọn̄ emi ke ntak enyịn̄ mi adara mi n̄ko, ndien owo ekededi eke adarade mi adara enye emi okosiode mi ọdọn̄ n̄ko. Koro owo emi enịmde idem ke n̄kpri-n̄kan ke otu mbufo kpukpru edi enye emi okponde.” (Luke 9:46-48) Nte ini akakade, ke ini Jesus eketịn̄de ikọ ye mme Pharisee emi ẹkekerede ke imedi n̄kpọ ikan mbon enwen, enye ọkọdọhọde ete: “Owo ekededi eke emenerede idemesie ke enyọn̄ ẹyesụhọde enye ẹnịm, ndien owo eke osụhọrede idemesie ẹyemenede enye.” (Luke 14:11) Emi enen̄ede owụt ke Jesus oyom mme mbet esie ẹsụhọde idem, iyomke mmọ ẹtan̄ idem m̀mê ẹda idem ke n̄kpọ ẹkaha. Idahaemi, iyom nditịn̄ enyịn ndụn̄ọde uwụtn̄kpọ nsụhọdeidem Jesus man ikpekeme ndikpebe enye. Iyokụt n̄ko ke idịghe owo emi osụhọrede idem ikpọn̄ esidia ufọn edu emi, edi ke mbon en̄wen ẹsitiene ẹdia ufọn n̄ko.
“N̄KỌWỌN̄ỌKEDE NSE EDEM”
4. Didie ke ikpọn̄-ikpọn̄ edibon Eyen Abasi okosụhọde idem mbemiso enye ekedide isọn̄?
4 Ikpọn̄-ikpọn̄ edibon Eyen Abasi ama esisụhọde idem mbemiso enye ekedide isọn̄. Enye ama odu ye Ete esie ke heaven ke anana-ibat isua. N̄wed Isaiah etịn̄ nte Eyen emi ekenen̄erede ekpere Ete esie, ete: “Jehovah Akakan Ọbọn̄ Andikara ọmọnọ mi edeme mmọ eke ẹbọde ukpep, man n̄kpọfiọk nte ndade ikọ mbọrọ owo eke akpade mba. Enye edemede mi kpukpru usenubọk; enye edemede utọn̄ mi man n̄kop ikọ nte mmọ eke ẹbọde ukpep. Jehovah Akakan Ọbọn̄ Andikara esịrede mi utọn̄, ndien ami n̄kọsọn̄ke ibuot. Ami n̄kọwọn̄ọkede nse edem.” (Isa. 50:4, 5) Eyen Abasi ama osụhọde idem onyụn̄ enen̄ede akpan̄ utọn̄ okop se Jehovah ekekpepde enye. Enye ama enen̄ede oyom ata Abasi ekpep imọ n̄kpọ. Anaedi Jesus ama enen̄ede etịn̄ enyịn ekpebe nte Jehovah osụhọrede idem atua anamidiọk ubonowo mbọm.
5. Didie ke Jesus ekenịm uwụtn̄kpọ nsụhọdeidem ke ini Devil afan̄ade n̄kpọ ye enye?
5 Idịghe kpukpru angel ke heaven ẹkesụhọde idem nte ikpọn̄-ikpọn̄ edibon Eyen Abasi. Angel emi akakabarede edi Satan kpa Devil ikenyịmeke ndikpep n̄kpọ nto Jehovah, edi ama ayak n̄kụtidem ye ntan̄idem ẹnam enye ọsọn̄ ibuot ye Jehovah. Edi Jesus iketiehe ntem, enye ama oyụhọ ye itie emi ẹkenọde enye, ikonyụn̄ idaha odudu esie inam n̄kpọ ke idiọk usụn̄. Michael etubom mme angel ikanamke n̄kpọ ibe odudu emi ẹkenọde enye ke ini ‘Devil ekenenide aban̄a okpo Moses ye enye.’ Utu ke oro, Eyen Abasi ama osụhọde idem onyụn̄ ọfiọk ebiet emi odudu esie etrede. Enye akakam oyom Jehovah, Akakan Ebiereikpe ofụri ekondo, anam n̄kpọ ke usụn̄ ye ini emi Enye emekde.—Kot Jude 9.
6. Didie ke Jesus ndikenyịme ndidi Messiah owụt ke enye osụhọde idem?
6 Anaedi mme ntịn̄nnịm ikọ emi ẹban̄ade se iditịbede inọ Jesus ke isọn̄ nte Messiah ẹsịne ke otu mme n̄kpọ oro enye ekekpepde ke ini okodude ke heaven. Mmọdo, etie nte enye ama ọfọfiọk ke mme afanikọn̄ ẹyesịm imọ. Edi enye ama enyịme ndidi ndidụn̄ mi ke isọn̄ nnyụn̄ n̄kpa nte Messiah oro ẹken̄wọn̄ọde. Ntak-a? Apostle Paul ekewet ntem aban̄a nsụhọdeidem ikpọn̄-ikpọn̄ edibon Eyen Abasi: “Okposụkedi [emi enye] ekedide mbiet Abasi, [enye ikekereke] ndiwamade enye itie mbọ, man ekpedi n̄ka ye Abasi. Baba, edi enye ama asana emi ayak onyụn̄ emen mbiet ofụn esịne onyụn̄ edidu ke mbiet owo.”—Phil. 2:6, 7.
ENYE AMA “OSỤHỌDE IDEM” KE INI EKEDIDE OWO
7, 8. Didie ke Jesus ekenịm uwụtn̄kpọ nsụhọdeidem ke ini enye ekedide uyen ye ke ini utom ukwọrọikọ esie ke isọn̄?
7 Paul ekewet ete: “Ke ini [Jesus] okokụtde idemesie ke mbiet owo, enye osụhọde idem onyụn̄ akabade osụk ibuot tutu esịm n̄kpa, ih, n̄kpa ke eto ndutụhọ.” (Phil. 2:8) Jesus ama enịm uwụtn̄kpọ ọnọ nnyịn toto ke uyen. Okposụkedi emi Joseph ye Mary—ete ye eka esie—ẹkedide mme anana-mfọnmma owo, enye ama “aka iso osụk ibuot ọnọ mmọ.” (Luke 2:51) Nso eti uwụtn̄kpọ ke enye ekenịm ntem ọnọ nditọwọn̄, emi Abasi edidiọn̄de edieke mmọ ẹmade ndisụk ibuot nnọ ete ye eka mmọ!
8 Ke Jesus ama okokpon, enye ama osụhọde idem ada edinam uduak Abasi nte akpa n̄kpọ ke uwem esie. (John 4:34) Ke ini Jesus Christ ọkọkwọrọde ikọ ke isọn̄, enye ama esikot enyịn̄ Abasi onyụn̄ an̄wam mbon oro ẹnyenede esịt akpanikọ ẹnen̄ede ẹfiọk mme edu Jehovah ye se enye aduakde aban̄a ubonowo. Enye ama esinam se enye ekekpepde mme owo. Ke uwụtn̄kpọ, akpa n̄kpọ emi Jesus eketịn̄de ke akam emi enye ekekpepde mme mbet esie ekedi: “Ete nnyịn emi odude ke heaven, yak ẹnam enyịn̄ fo asana.” (Matt. 6:9) Ke ntem, Jesus ekekpep mme anditiene enye ete ke ndinam enyịn̄ Jehovah asana ekpenyene ndidi akakan n̄kpọ ke uwem mmọ. Ndien se enye okonyụn̄ adade nte akakan n̄kpọ ke uwem esie edi oro n̄ko. Ke ekperede ndisịm utịt uwem Jesus ke isọn̄, enye ama ọbọn̄ akam ọnọ Jehovah ete: “Ami mmonyụn̄ nnam mmọ [mme apostle] ẹfiọk enyịn̄ fo nyonyụn̄ nnam mmọ ẹfiọk.” (John 17:26) Ke adianade do, ke ofụri ini emi Jesus okodude ke isọn̄, enye ekesidọhọ ke Jehovah an̄wam imọ inam ofụri se inamde.—John 5:19.
9. Nso ntịn̄nnịm ikọ ke Zechariah ekewet aban̄a Messiah, ndien didie ke emi okosu?
9 Zechariah ama ewet ntịn̄nnịm ikọ aban̄a Messiah ete: “O eyenan̄wan Zion, dara etieti. Sio n̄kpo idara, O eyenan̄wan Jerusalem. Sese! Edidem fo ke edi ke ọtọ fo. Enye edi edinen owo emi ẹnyan̄ade; osụhọde idem, onyụn̄ awat ke ass, ke unam emi okponde ọwọrọ, kpa eyen uman ass.” (Zech. 9:9) Ntịn̄nnịm ikọ emi okosu ke ini Jesus okodorode ke ass odụk Jerusalem mbemiso usọrọ Passover eke isua 33 E.N. Ata ediwak owo ẹma ẹbri ewụra mmọ ye n̄kọk eto ke usụn̄ ẹnọ enye. Ke nditịn̄ ibio ibio, editịm ama okpon ke obio ke ini Jesus okodụkde Jerusalem. Idem ke ini ẹkedarade Jesus nte Edidem, enye ama osụhọde idem.—Matt. 21:4-11.
10. Nso ke Jesus ndisụk ibuot tutu esịm n̄kpa okowụt?
10 Jesus Christ ama osụhọde idem onyụn̄ osụk ibuot tutu esịm n̄kpa ke eto ndutụhọ. Se Jesus akanamde emi owụt ke owo ekeme ndisọn̄ọ nda ye Jehovah inamke n̄kpọ m̀mê nso idomo isịm enye. Enye ama owụt n̄ko ke Satan okososu ndidọhọ ke idịghe ima anam mme owo ẹnam n̄kpọ Jehovah. (Job 1:9-11; 2:4) Christ ndisọn̄ọ nda ke mfọnmma usụn̄ owụt n̄ko ke Jehovah enyene unen ndikara ofụri ekondo ye nte ke ukara esie enen. Esịt ama adat Jehovah ke ini enye okokụtde nte osụhọde-idem Eyen esie ọsọn̄ọde ada ye enye.—Kot Mme N̄ke 27:11.
11. Nso idotenyịn ke uwa ufak Jesus Christ ọnọ mbon oro ẹnịmde ke akpanikọ?
11 Jesus ama ekpe ufak ubonowo ke ini enye akakpade ke eto ndutụhọ. (Matt. 20:28) Emi anam Abasi efen idiọkn̄kpọ nnyịn nte ekemde ye ndinen ibet esie onyụn̄ ọnọ mme owo ifet ndidu uwem nsinsi. Paul ekewet ete: “[Oto] ke edinam edinen ido kiet ẹyebat kpukpru orụk owo ke edinen man ẹnyene uwem.” (Rome 5:18) N̄kpa Jesus anam mme Christian emi ẹyetde aran ẹnyene idotenyịn ndidu uwem unana n̄kpa ke heaven, “mme erọn̄ en̄wen” ẹnyụn̄ ẹdu uwem nsinsi ke isọn̄.—John 10:16; Rome 8:16, 17.
‘MMOSỤHỌDE IDEM’
12. Didie ke Jesus okowụt ke imenyene ifụre ifụre ido inyụn̄ isụhọde idem ke nte enye akanamde n̄kpọ ye mme anana-mfọnmma owo?
12 Jesus ama okot kpukpru mbon “emi ẹkpade utom ẹnyụn̄ ẹbiomde ndodobi mbiomo” ete ẹtiene imọ. Enye ọkọdọhọ ete: “Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo.” (Matt. 11:28, 29) Nsụhọdeidem ye ifụre ifụre ido ẹkenam Jesus ọfọn ido ye mme owo okûnyụn̄ unam asari. Enye ikọdọhọke mbet esie ẹnam n̄kpọ emi okponde akan mmọ. Enye ama esitoro onyụn̄ esịn udọn̄ ọnọ mmọ. Enye ikanamke mmọ ẹkere ke mmimọ ifiọkke n̄kpọ ndomokiet m̀mê ke mmimọ iwọrọke n̄kpọ. Enye ikọsọn̄ke ido inyụn̄ itiehe ukara ukara. Edi akakam anam mme mbet esie ẹfiọk ke edieke mmọ ẹdiande idem ye imọ ẹnyụn̄ ẹnamde se imọ ikpepde, ke mmọ ẹyekụt nduọkodudu koro ọkpọnọ imọ ememem, mbiomo imọ onyụn̄ efefere. Kpukpru owo—irenowo, iban, nditọwọn̄, ye ikpọ owo—ẹma ẹsima ndidu ye Jesus.—Matt. 11:30.
13. Didie ke Jesus akatua mbon emi uwem ọkọsọn̄de ye mmọ mbọm?
13 Nditọ Israel emi uwem ọkọsọn̄de ye mmọ ẹma ẹsinyene Jesus mbọm, ntre enye ama esin̄wam mmọ ke usụn̄ ekededi emi enye ekekemede. Usen kiet, Jesus ama osobo ye eben̄e-eben̄e iba emi ẹdide nnan, Bartimaeus ye nnan en̄wen emi owo mîsiakke enyịn̄, ke mbọhọ Jericho. Nnan iba emi ẹma ẹkpe Jesus ubọk ẹte atua mmimọ mbọm, edi otuowo emi ẹkesan̄ade ye Jesus ẹma ẹsọn̄ọ ẹdọhọ mmọ ẹkịbi inua. Jesus okpokodop uyo ebe esie, edi enye ama atuak ada ọdọhọ ẹkot mmọ ẹdi. Mbọm ama anam enye anam mmọ ẹkụt usụn̄. Jesus ama ekpebe Jehovah Ete esie, osụhọde idem, onyụn̄ atua mbon oro ẹkenyenede mfịna mbọm.—Matt. 20:29-34; Mark 10:46-52.
‘ẸYEMENEDE OWO EKEDEDI EKE OSỤHỌREDE IDEM’
14. Nso ufọn ke mme owo ẹbọ ke ntak nsụhọdeidem Jesus?
14 Nsụhọdeidem Jesus Christ ama ada inemesịt ye edidiọn̄ ọsọk ediwak owo. Esịt ama adat Jehovah ndikụt edima Eyen esie osụhọrede idem anam uduak esie. Nsụhọdeidem ye ifụre ifụre ido Jesus ama ọnọ mme apostle ye mbet esie nduọkodudu. Nte enye okodude uwem, se enye ekekpepde, ye nte enye ekesitorode mbet esie ama anam mmọ ẹnen̄ede ẹkeme ndinam n̄kpọ Abasi. Jesus ama osụhọde idem an̄wam ediwak mbon en̄wen ke ndikpep mmọ n̄kpọ, nsịn udọn̄ nnọ mmọ, nnyụn̄ nnọ mmọ se inanade mmọ. Ke nditịm ntịn̄, ke ntak uwa ufak Jesus, kpukpru mbon emi ẹbuọtde idem ye enye ẹyedia ufọn ke nsinsi.
15. Nso ufọn ke Jesus akadia ke ntak nsụhọdeidem esie?
15 Ndi Jesus ke idemesie ama adia ufọn nsụhọdeidem esie? Ih, ama adia, koro enye ọkọdọhọ mme mbet esie ete: ‘Ẹyemenede owo ekededi eke osụhọrede idem.’ (Matt. 23:12) Ẹma ẹmenede Jesus ke enyọn̄. Paul ọkọdọhọ ete: “Abasi ekemenede [Jesus] enịm ke itie emi okon̄de onyụn̄ ọnọ enye enyịn̄ oro okon̄de akan kpukpru enyịn̄ efen, man ke enyịn̄ Jesus kpukpru edọn̄ ẹkpetọn̄ọ, eke mme andidu ke heaven ye mme andidu ke isọn̄ ye mme andidu ke idak isọn̄, kpukpru edeme ẹkpenyụn̄ ẹnyịme an̄wan̄wa ẹte ke Jesus Christ edi Ọbọn̄, ẹnọ Abasi Ete ubọn̄.” Ke ntak emi Jesus akanamde akpanikọ onyụn̄ osụhọrede idem ke ini enye okodude ke isọn̄, Jehovah Abasi ama emenede enye ke enyọn̄, anam enye okon̄ akan kpukpru n̄kpọ ke heaven ye ke isọn̄.—Phil. 2:9-11.
JESUS ‘AYAWAT KE NTAK AKPANIKỌ YE NSỤHỌDEIDEM’
16. Nso iwụt ke Jesus ayaka iso osụhọde idem?
16 Eyen Abasi ayaka iso osụhọde idem. Andiwet psalm ọkọkwọ ntem aban̄a nte Jesus editiede ke ebekpo Esie ke heaven anam n̄kpọ aban̄a mme asua esie, ete: “Da uyai fo ka kakan; wat ke ntak akpanikọ ye nsụhọdeidem ye edinen ido.” (Ps. 45:4) Ke ini ẹdin̄wanade ekọn̄ Armageddon, Jesus Christ ayanyan̄a mbon emi ẹsụhọrede idem, ẹnyenede edinen ido, ẹnyụn̄ ẹmade akpanikọ. Nso iditịbe ke utịt Tọsịn Isua Ukara emi Edidem emi edide Messiah edinamde “kpukpru ukara ye kpukpru unen edikara ye odudu ẹkabade ẹdi ikpîkpu”? Ndi Jesus oyosụk osụhọde idem ini oro? Ih, koro ‘enye ayayak obio ubọn̄ ọnọ Abasi ye Ete esie.’—Kot 1 Corinth 15:24-28.
17, 18. (a) Ntak emi anade mme asan̄autom Jehovah ẹkpebe uwụtn̄kpọ nsụhọdeidem Jesus? (b) Nso ke idineme ke ibuotikọ oro etienede?
17 Nso kaban̄a nnyịn? Ndi nnyịn iyekpebe uwụtn̄kpọ emi Jesus ekenịmde ọnọ nnyịn inyụn̄ isụhọde idem? Nso iditịbe inọ nnyịn ke ini Jesus Christ Edidem nnyịn edide ndibiere ikpe ke ekọn̄ Armageddon? Nte enye awatde owụt ke mbon emi ẹsụhọrede idem ẹnyụn̄ ẹnyenede edinen ido ẹdi n̄kukụre mbon emi enye edinyan̄ade. Ntre, ana isụhọde idem man ẹkpenyan̄a nnyịn. Akan oro, nnyịn ndisụhọde idem eyenyene ufọn ke nsio nsio usụn̄ kpa nte nsụhọdeidem ekenyenede ufọn ọnọ Jesus Christ ye mbon en̄wen.
18 Nso idin̄wam nnyịn ikpebe nsụhọdeidem Jesus? Idem ke ini mîmemke utom ndisụhọde idem, nso idin̄wam nnyịn ika iso inam oro? Iyọbọrọ mme mbụme emi ke ibuotikọ oro etienede.
[Mme Mbụme Ukpepn̄kpọ]
[Mme ndise ke page 12]
Nso ke ikpanam man itiene idia ufọn nsụhọdeidem Jesus?
[Ndise ke page 13]
Jesus ama esitua mme owo mbọm, akpana ikpebe enye
