Jesús ja töi mikani bobre erere nikwe nuaindre
Jesús ja töi mikani bobre erere nikwe nuaindre
“Tikwe ja miri bobre [...] ye kwrere munkwe nuendre jakrä kwärikwäri, abkokäre tikwe kukwe bä miri kore mun okwäbti.” (JUAN 13:15)
¿MÄ RABA MIKE GARE?
¿Ngöbö Monsoi töi nämene bobre ye bämikani ño kwe jämi nüke Kä tibienbätä ye känenkri?
¿Jesús nämene kä tibienbätä ye ngwane töi nämene bobre ye mikani gare ño kwe?
¿Jesús ja töi mikani bobre ye köböire dre kwin tä nemen bare?
1, 2. ¿Jesús murie keta jämi ye känenkri köbö mrä deu niarakwe kukwe meden driebare nitre apóstol kwe yei?
JESÚS murie keta jämi ye känenkri köbö mrä deu niara nämene Jerusalén ju dokwäte kwin apóstol kwe ben. Niaratre nämene mröre ye ngwane Jesús nükani krö, dän ngwan nämene kwe jabätä mikaninkä kwe mento aune toalla mikani kwe ja mrökarabätä. Ye bitikäre ñö kekani kwe ngwäte aune namani nitre ja tötikaka kwe ngoto bätete aune bärötökä toalla yebiti. Aune biti dän kwe mikaninta kwe jabätä. ¿Ni klabore nämene sribi nuainne ye ñobätä nuainbare kwe? (Juan 13:3-5.)
2 Niara arabe käkwe mikani gare: “¿Ñobtä tikwe mun ngoto bätrite ye nü gare munye ya? [...] Ti Dirikä amne ti mun Dänkien käkwe mun ngoto bätrite [...] ye kwrere munkwe ja mika bobre ni klabore kwrere, käkwe ja ngoto bätädrete jae kwärikwäri [...]. Tikwe ja miri bobre ni klabore [...] ye kwrere munkwe nuendre jakrä kwärikwäri abkokäre tikwe kukwe bä miri kore mun okwäbti” (Juan 13:12–15). Sribi nämene ni klabore kisete ye Jesukwe nuainbare kukwe kwin bämikakäre nitre apóstol kwe käne, abokän ñaka käi nikwitaninkä niaratre yebiti aune dimikani kwetre ja töi mike bobre.
3. a) ¿Jesukwe kukwe meden ketebu nuainbare bämikakäre ja töi mikadre bobre ye ütiäte krubäte? b) ¿Drebätä ja tötikai nete?
3 Niaratre ja töi mikadre bobre ye ñan nämene driere krire ietre. Nire bäri ütiäte yebätä niaratre ruäre nämene ja kwete kena ye niarakwe gabare angwane monso chi mikani täke ja ken kwe aune niebare kwe ietre: “Nirekwe monso ne kai ngäbiti ti käbiti ye abokän käkwe ti kai ngäbiti. Angwane nirekwe ti kai ngäbiti, ye abokän tä ni ti juanka kain ngäbiti. Ñobätä ñan angwane nire tä bäri chi mun ngätäite, ye abokän bäri kri” (Luc. 9:46-48, TNM). Nitre fariseo tö nämene ja tuabätä kri ye nämene gare ie, aune kä mada ngwane niebare kwe ietre: “Nire nire tö bikai kri au abko [...] mikadi bobre amne, nire nire tö ja mikai bobre abko [...] mikadi ütiäte kri” (Luc. 14:11). Jesús tö namani nitre nänkä jiebiti käkwe ja töi mikadre bobre, ja ñaka rabadre ruin bäri ütiäte ietre aune ñaka bikadre kri ni madabätä. Niarakwe ja töi mikani ño bobre yebätä ani ja tötike ne kwe nikwe ja ngwandre niara erere, aune dre kwin raba nemen nikwe aune nitre mada yekwe ye ani mike gare jai.
“TI ÑAKA RIKABA JI MADA YEBITI”
4. ¿Ngöbö Monsoi ngöräbe käkwe ja töi mikani ño bobre jämi nüke kä tibienbätä ye känenkri?
4 Monso ngöräbe Ngöbökwe jämi nüke Kä tibienbätä ye känenkri nünanbare kwe kä kwati krubäte kä kwinbiti Rün kwe yebe, aune niara töi nämene bobre ye bämikani kwe. Niaratre nämene ja kete kwin ye tärä Isaías tä mike gare: “Jehová Gobran kri Kä Kwinbiti käkwe ti tidrä mikani kukwe dirikäre, ne kwe nitre tä nainte yei tikwe kukwe mikadre gare. Mantre jetebe niara tä nüke krö, tä kukwe niere tie ti olote ne kwe kukwe dirita tie ye tikwe kukwe nuadre. Däkien Gobranka kri Jehová käkwe ti olo gu tikaninkä, aune ti abokän ñaka bikaba kri. Ti ñaka rikaba ji mada yebiti” (Is. 50:4, 5). Jesús tö namani kukwe mikai gare jai, yebätä Ngöbö nämene kukwe driere ie ye nämene kain ngäbiti. Ni kä tibienbätä ja mike ngite ye Jehovakwe mikani tuin bobre jai ye Jesukwe tuani arato.
5. Jesús nämene kädekani arcángel akwa, ¿Diablukwe kukwe niebare ie angwane ja töi mikani ño bobre kwe?
5 Akwa angeletre jökrä ñaka ja töi mikani bobre. Ángel iti ñaka tö namani kukwe driemana jai, niarakwe bikabare kri aune kukwe jökrä nämene gare ie ye tö namani bämikai. Ye medenbätä, ja mikani kwe Jehová rüere aune kädekani Satana Diablu. Akwa, Jesús abokän kisete sribi mikani kä kwinbiti ye mikani tuin ütiäte kwe jai aune ñaka tö namani kukwe nuain nierare ja töi jeñebiti. “[Arcángel] kädianta Miguel [Jesús] nämene ja kwete Moisés ngwäkäbtä diablube” angwane ñaka kukwe ye ükaninte kwe ja töi jeñebiti, ñakare aune ja töi mikani bobre kwe aune ñaka ja namani ruin bäri kri ie. Jehová kukwe ükatekä bäri kri käkwe ñongwane kukwe ye ükadrete aune nuaindre ño kwe ye ngübabare kwe (ñäkädre Judas 9 yebätä).
6. ¿Jesús rabai Mesías ye kani ngäbiti kwe angwane niarakwe bämikani ño töi nämene bobre?
6 Jesús nämene kä kwinbiti ye ngwane dre rabai bare niarabätä kä tibienbätä ye nämenena gare ie. Niara ja tare nikadi krubäte kä tibienbätä aune niara ara Mesías käbämikani murie ketadi kukwe ye jökrä nämenena gare ie. Akwa yebiti ta Monso ngöräbe Ngöbökwe sribi ye kani ngäbiti. ¿Ñobätä? Ñobätä ñan aune niara töi nämene bobre. Apóstol Pablo kukwe ye mikani gare: “Niara nämene Ngöbö kwrere, akwa ñaka ja töi mikani kwe ja mike Ngöbö täte. Ñakare aune, ja töi jeñebiti kä kwin ye tuanimetre kwe aune ja mikani kwe ni klabore kwrere nünankäre nitre kä nebätä ye erere” (Filip. 2:6, 7, TNM).
“JA TÖI MIKANI BOBRE KWE” KÄ TIBIENBÄTÄ
7, 8. ¿Jesús nämene monsore bätä nämene kukwe driere ye ngwane töi nämene bobre ye bämikani ño kwe?
7 Pablokwe mikani gare Jesús nämene kä tibienbätä ye ngwane “ja töi mikani bobre kwe aune [Ngöbö] mikani täte kwe nememe murie ketani kribätä” (Filip. 2:8, TNM). Niara nämene monsore ye ngwane ja töi mikani bobre kwe arato. José bätä María därebare ngite käkwe niara ngübabare, akwa niaratre “nämane dre dre niere ie, erere nämane mike täte jire jökrä” (Luc. 2:51). Monsotre bati tä ja ngwen niara erere aune tätre rün aune meye kukwei mike täte ye ngwane Jehovakwe kukwe kwin mikai nemen bare kräketre.
8 Jesús namanina kri ye ngwane niara töi nämene bobre ye bämikani kwe, ñobätä ñan aune Jehová töi nämene ño ye mikani nuaindre käne kwe jai (Juan 4:34). Niara blitabare Ngöbö kä yebätä aune nitre dimikani Ngöbö mike gare jai aune töita dre nuainbätä Kä tibienbätä ye mikani gare kwe ietre arato. Ne madakäre, kukwe Ngöbökwe drie nämene kwe ye erere ja ngwani kwe. Ñodre, Jesukwe orasion driebare ye ngwane niarakwe kukwe ne niebare kena: “Nun Rün kä kwinbiti, mä kä ye mikadre deme” (Mat. 6:9, TNM). Kukwe yebiti mikani gare kwe Jehová kä mikadre deme ye abokän bäri ütiäte. Arato, niarakwe kukwe kwin bämikani. Ye medenbätä, sribi mikani kisete ye namanina krüte ie angwane niebare kwe Rün kwe kä kwinbiti ie: “Tikwe ma [kä] mikanina gare ietre, akwa tikwe ma mikadi gare janknu ietre” (Juan 17:26). Ne madakäre, niara nämene käre Ngöbö käikitekä (Juan 5:19).
9. ¿Zacarías dre mikani gare Mesías yebätä aune Jesukwe kukwe ye mikani nemen bare ño?
9 Zacarías ni Ngöbö kukwei niekä käkwe mikani gare Mesías yebätä: “Sión ngängän kä ngwen juto jabätä. Kukwe kwin yebätä munkwe ngwänänkä Jerusalén ngangän. Rei mäkwe kite ye ¡mike ñärärä! Niara ye kukwe ükete metre, niara ni mikaka kwäre, töi bobre aune kite mulabiti, jondron nire ye abokän burro ngäbä ririabarera täte” (Zac. 9:9). Kukwe ye namani bare kä 33 yete. Kä ye näire Jesús nikani Jerusalén bieta Pentecostés nuain jämi ye känenkri. Nitre kwati nikani ngäbiti nikani dän aune palma kä kainkä jite aune kä namani juto nitre ye jökräbätä. Nitre ye namani Jesús ye mike reire aune käikitekä, akwa Jesús ñaka namani bike kri (Mat. 21:4-11).
10. ¿Jesús Ngöbö mikani täte nememe murie ketani ye tä dre mike gare?
10 Jesús töi nämene bobre aune Ngöbö kukwei mikani täte ye bämikani kwe nememe niara murie ketani kribätä ye ngwane. Niarakwe kukwe nuainbare yebiti mikani gare kwe ni kä tibienbätä ngwan raba ja tare nike, akwa yebiti ta raba Jehová mike täte. Arato, Satanakwe niebare ni kä tibienbätä tä Ngöbö mike täte jondron täri, akwa kukwe ye ñaka metre Jesukwe mikani gare (Job 1:9-11; 2:4). Niarakwe ja ngwani metre yebiti mikani gare kwe, Jehová ye aibe kukwe ükatekä metre aune Gobranka kri kä jökräbiti tibien aune ye käkwe kä mikani juto Jehovabätä (ñäkädre Proverbios 27:11 yebätä).
11. ¿Jesús ja biani murie ketadre ni ütiäre ye köböire kukwe meden ketebu tä nitre Ngöbö mikaka täte kräke?
11 Arato, Jesús ja nire biani ye köböire ni kä tibienbätä kökanintari kwe (Mat. 20:28). Ni kä tibienbätä ja mike ngite raba kukwe ükaninte Ngöbökwe ye mike täte aune raba nüne kärekäre. Pablo kukwe ne tikani: “Ni iti kwe köböire ni mikani kwin ja nirekrä jökrä” (Rom. 5:18, NGT). Kristo ja nire biani ye köböire nitre dianinkä üai deme yebiti ye raba nüne kä kwinbiti kärekäre aune “obeja mda mda” ye raba nüne kärekäre Kä tibienbätä (Juan 10:16; Rom. 8:16, 17).
“TITA BIKE TIDRÄ”
12. ¿Jesús nämene blite nitre madabe yebiti bämikani ño kwe töi nämene bobre aune jäme?
12 Nitre “mden mden dräre amne tribe doboko [...] kötärä” ye Jesukwe käräbare ja kokwäre. Arato niebare kwe: “Sribi tikwe [...] ye abko munkwe ka ngäbti abti munkwe ja tötika tibe, ñobtä ñan angwane ti abko moto jäme aune tita bike tidrä ni mda mdabtä, yebtä munkwe ja tötika tibe amne munkwe ja dükadi” (Mat. 11:28, 29). Niara töi nämene bobre aune jäme, ye medenbätä nitre ja mike ngite ye kräke ja töi mikani kwin kwe aune mikani tuin ütiäte kwe jai. Kukwe meden ñaka nämene nuäre nuaindre nitre ja tötikaka kwe yei ye ñaka nämene ribere ietre rabadre nuainne ja dibiti, ñakare aune nämene kukwe kwin niere ietre aune nämene dimike. Ñaka nitre ye mikani tuin ngwarbe kwe jai. Arato, ñaka ngratebarebiti kwe aune ñaka nämene ñäke tare ietre. Niara niebare ietre rabadre nökrö ken aune kukwei mike täte angwane ja rabai ruin kwin ietre, ñobätä ñan aune sribi kwe ye ñan doboko aune ñaka ribi nuainkäre. Nitre jökrä ie ja nämene ruin kwin Jesús ken (Mat. 11:30).
13. ¿Nitre nämene ja tare nike ye Jesukwe mikani tuin ño jai?
13 Nitre Israel nämene ja tare nike ye Jesukwe mikani tuin bobre jai aune dimikani kwe. Jericó ye ken nitre nibu jondron käräkä abokän ie kä ñaka nämene tuin yebe ngätäni angwane nitre ye namani ja di kärere jankunu ie. Iti kädeka nämene Bartimeo. Nitre mada mada nämene yete käkwe ñäkäbare nitre nibu yei aune ñaka rabadre blite niebare ietre. Jesús törbadre akräke, ñaka nitre nibu ye kukwei töibikadre kwe. Akwa niarakwe nitre ye käräbare aune mikani tuin bobre kwe jai, ye medenbätä kä mikani tuinta kwe ietre. Jesús ja ngwani Rün kwe Jehová ye erere, niara töi nämene bobre aune nitre nämene ja tare nike ye mikani tuin bobre kwe jai (Mat. 20:29-34; Mar. 10:46-52).
“NIRE KÄKWE JA MIKADRE BOBRE, YE ABKO [...] MIKADI ÜTIÄTE”
14. ¿Jesús töi nämene bobre ye bämikani kwe Kä tibienbätä ye köböire dre kwin tä nemen nikwe?
14 Jesús ja töi mikani bobre Kä tibienbätä ye köböire kukwe kwin mikani nemen bare kwe aune kä mikani juto kwe ni madabätä. Ñodre, niarakwe ja mikani juto biare Jehová töi mikakäre nemen bare, ye käkwe kä mikani juto Rün kä kwinbiti yebätä. Jesús töi nämene kwin aune jäme yebätä nitre apóstol aune nitre ja tötikaka ben yei ja nämene nemen ruinta kwin. Niara nämene kukwe kwin bämike, kukwe driere ietre aune dimike ye käkwe niaratre dimikani nirien kukwe ja üairebiti. Arato, Jesús töi nämene bobre ye köböire kukwe kwin nämene nemen nitre mada yekwe, niara nämene nitre dimike, kukwe dirire ietre aune kukwe kwin niere ietre. Jesukwe ja nire biani ni ütiäre ye köböire ni jökrä ja mikaka täte yekwe jondron kwin rabai kärekäre arato.
15. ¿Kukwe meden kwin namani Jesukwe ja töi mikabätä bobre?
15 ¿Kukwe kwin namani Jesukwe ja töi mikabätä bobre? Jän, ñobätä ñan aune niarakwe niebare nitre ja tötikaka kwe yei: “Nire nire käkwe ja mikadre bobre, ye abko [...] mikadi ütiäte kri” (Mat. 23:12). Pablokwe niebare kukwe ye namani bare niarabätä: “Ngöbökwe niara mikani bäri ütiäte aune ja töi kwinbiti kädekani bäri kri kwe ni mada ye jökräbiti ta, ne kwe Jesús käbiti nitre kä kwinbiti bätä nitre Kä tibienbätä aune nitre tä dobote rabadre ngukodokwäbiti niara ngwärekri, aune Jesukristo ye abokän Däkien, Rün käikitakakäre ye nitre jökrä käkwe kadre ngäbiti”. Niara nünanbare kä tibien nebätä ye ngwane töi nämene bobre aune ja ngwani metre kwe, ye medenbätä Jehovakwe niara kädekani kri kä kwinbiti aune Kä tibienbätä (Filip. 2:9-11, TNM).
JESÚS NÄNDI “KUKWE METRE MIKAKÄRE GARE, NITRE TÖI BOBRE DIMIKAKÄRE”
16. ¿Ñokänti gare nie Ngöbö Monsoi töi rabai bobre kä ja känenkäre yete?
16 Ngöbö Monsoi töi bobre ye bämikai kwe kä ja känenkäre yete arato. Jesús tädi täkäni kürä gobrankäre ye ngwane kukwe meden nuaindi nitre ja mikaka rüere yebätä ye salmista käkwe mikani gare känenkri: “Mä abokän kri krubäte, mätä näin jankunu ja käne kukwe kwin nuainkäre; mätä näin kukwe metre mikakäre gare, nitre töi bobre dimikakäre aune kukwe metre nuainkäre” (Sal. 45:4). Armagedón yete Jesukristo nändi kukwe metre niekäre, kukwe ükatekäre aune nitre töi bobre dimikakäre. Rei dianinkä Ngöbökwe käkwe gobrantre mada “gadikä jire jökrä” aune gobrandi Kä Mil Krati te ye bitikäre, ¿dre rakaikä? Jesús töi bobre käkwe gobran ye “mikadita Rün Ngöbö kisete” (ñäkädre 1 Corintios 15:24-28 yebätä).
17, 18. a) ¿Ñobätä ütiäte ni Jehová mikaka täte ja töi mikadre bobre Jesús erere? b) ¿Kukwe meden ngwantarita abokän mikai gare ja tötikai ja känenkäre yebätä?
17 ¿Ni abokän töita ño? ¿Jesús ja töi mikani bobre ye erere nikwe ja töi mikai arato? Rei Jesukristo mikadi kukwe ükete Armagedón yete angwane, ¿dre rabai bare nibätä? Jesukwe kukwe ükaite ye ngwane nitre ja mikaka täte metre aune ja töi mikaka bobre ye aibe rabaite kwäre. Ye medenbätä, ja töi mikadre bobre ye ütiäte krubäte ne kwe ni rabadrete nire. Jesús ja töi mikani bobre ye köböire kukwe kwin namani kwe aune nitre madakwe, ye erere ja töi mikadre bobre ye köböire kukwe kwin rabai nikwe aune nitre madakwe arato.
18 ¿Dre raba ni dimike ja töi mike bobre Jesús erere? ¿Kukwe rabadre bare nibätä akwa yebiti ta ni raba ja töi mike ño bobre? Kukwe ngwantarita ne mikai gare jai ja tötika mada yebätä.
[Kukwe ngwantarita]
[Jondron üai bämikani página 10]
[Jondron üai bämikani página 12]
¿Dre kwin tä nemen nikwe Jesús ja töi mikani bobre yebätä?
[Jondron üai bämikani página 13]
Jesukwe nitre mikani tuin bobre jai ye erere nikwe nuaindre
