1, 2. Iesu ena hanuaboi ginigabena ai, aposetolo taudia dekenai dahaka ia hadibaia?

 IESU ena hanuaboi ginigabena ai, ia bona ena aposetolo taudia be Ierusalema dekenai, atai daiutuna ta lalonai idia noho. Idia aniani lalonai, Iesu ia toreisi bona ena atai dabua ia kokia. Tauele ta be ena gabana ai ia kwatua bona disi ta lalonai ranu ia bubua. Unai murinai, ena aposetolo taudia edia aena ia huria, bena tauele amo ia hakaukaua. Unai murinai, ena atai dabua ia hahedokilaia lou. Dahaka dainai Iesu be unai hesiai gaukara ia karaia?​—⁠Ioa. 13:3-5.

² Iesu ia gwau: “Umui dekenai lau karaia karana umui lalopararalaia, a? . . . Bema lau, Lohiabada bona Hadibaia Tauna, ese emui aena lau huria, umui danu ese ta ta emui aena umui huria be namo. Lau ese umui dekenai dala lau hahedinaraia vadaeni, umui dekenai lau karaia hegeregerena, umui danu unai bamona umui karaia be namo.” (Ioa. 13:12-15) Iesu ese unai manau karana ia karaia dainai, ena aposetolo taudia be mai anina bada gauna ta idia dibaia, bona unai ese idia ia durua gabeai manau karana idia hahedinaraia totona.

3. (a) Edena nega rua ai, Iesu ese ia hahedinaraia manau karana be mai anina bada? (b) Inai stadi ai dahaka do ita herevalaia?

³ To, unai be nega ginigunana lasi Iesu ese ena aposetolo taudia dekenai manau karana ia hadibaia. Nega ma ta ai, idia ese edia huanai daika be bada idia hepapahuahulaia. Unai neganai, Iesu be mero maragina ta ia abia bona ena badinai ia haginia, bena ia gwau: “Lauegu ladanai inai natuna maragina ta ia abia dae tauna ese lau danu ia abia dae, bona lau ia abia dae tauna ese lau ia siaia Tauna danu ia abia dae. Badina umui ibounai huanai ia maragi tauna be do ia bada.” (Luka 9:46-48) Iesu ia diba Farisea taudia be dagi idia laloa bada, unai dainai ena haroro gaukara ai ia gwau: “Sibona  ia abia isi tauna be do idia hamanaua bona sibona ia hamanaua tauna be do idia abia isi.” (Luka 14:11) Oibe, Iesu ia ura ena murinai idia raka taudia do idia manau. Ia ura lasi idia hekokoroku, sibona edia ladana idia abia isi, eiava idia laloa idia be ma haida idia hereaia. Hari, ita ese Iesu ena manau karana do ita stadilaia, bona do ita itaia edena dala ai ia ita tohotohoa diba. Danu, do ita itaia edena dala ai manau tauna ese ia sibona bona ma haida dekenai hahenamo ia mailaia diba.

4. Iesu be tanobada ia do mai lasi neganai, edena dala ai ia manau?

⁴ Dirava ena Natuna be tanobada ia do mai lasi neganai, manau karana ia hahedinaraia danu. Ia be guba ai ena Tamana ida nega daudau ia noho. Peroveta tauna Isaia ese Natuna bona Tamana edia hetura karana namona ia herevalaia. Ia gwau: “Lohiabada Dirava ese, dahaka do lau hereva gauna ia hadibaia lau dekenai, vadaeni unai dainai lau ese manoka taudia lau hagoadaia diba. Daba ibounai ia ese laloa goada lau dekenai ia henia noho, vadaeni iena hadibaia hereva lau kamonaia namonamo. Lohiabada ese diba bona aonega lau dekenai ia henia, bona lau ese iena hereva lau negea lasi. Lohiabada dekena amo lau raka siri lasi.” (Isa. 50:4, 5) Iesu ia ura Dirava momokanina amo diba ia abia. Ia be mai manau ida ena Tamana ena hahediba herevadia ia kamonai namonamo. Danu, ena Tamana be mai manau ida goevadae lasi taudia ia hebogahisi henidia neganai, Iesu be unai kara ia itaia.

5. Iesu be Diabolo ida ia hepapahuahu neganai, edena dala ai ia manau?

⁵ To, aneru haida be Iesu ena manau karana idia tohotohoa lasi. Unai aneru ta be ia ura lasi Iehova ena hereva ia kamonai, bona Satani Diabolo ai ia lao. Ia hekokoroku, ia laloa ia ese ma haida ia hereaia bona Iehova ia gwau-edeede henia. To, Iesu ena kara be idau momokani. Guba dekenai Dirava ese ia henia siahuna be mai moale ida ia abia dae. Bona ia ura lasi unai siahu be dala kererena ai ia gaukaralaia. Hegeregere, Baibel ia gwau nega ta Iesu bona Satani be Mose ena tauanina idia hepapahuahulaia. Unai ia vara neganai, ena be Iesu be Aneru Badana, Mikaela, to ia manau bona ena siahu ia gaukaralaia kerere lasi. Ia be Iehova, Hahemaoro Tauna Badana ia naria, Iena dala maorona bona nega maorona ai unai hepapahuahu ia hamaoromaoroa totona.​—⁠Iuda 9 duahia.

6. Iesu be Mesia ena maduna ia abia dae neganai, edena dala ai ia manau?

⁶ Iesu be guba ai ia do noho neganai, Mesia totona idia perovetalaia herevadia ia diba. Unai dainai, ia diba vadaeni Mesia ai do ia lao neganai, dahaka hisihisi do ia davaria. Ena be unai ia diba, to tanobada ia mai, gwauhamata Mesiana ai ia lao, bena ia mase. Dahaka dainai unai maduna ia abia dae? Paulo ia hahedinaraia manau karana ese Iesu ia durua. Ia gwau ena be Iesu be aneru goadana ta, to ia laloa lasi ia “be Dirava ida do ia hegeregere.” To, “ia dekenai idia noho gaudia ibounai ia rakatania bona igui hesiai tauna ena toana ia abia bona taunimanima hegeregerena ai ia lao.”​—⁠Fili. 2:6, 7.

7, 8. Iesu be ia maragi neganai bona ia haroro neganai, edena dala ai ia manau?

⁷ Paulo ia gwau, Iesu be taunimanima ta neganai, “sibona ia hamanaua bona kamonai karana ia hahedinaraia ela bona mase, oibe, hisihisi auna dekenai ia mase.” (Fili. 2:8) Iesu be ia maragi negana amo manau karana ia hahedinaraia, bona ena haheitalai ita tohotohoa be namo. Ena be ena tama sina, Iosepa bona Maria be goevadae lasi taudia, to idia ia kamonai henia. (Luka 2:51) Matamata taudia dekenai unai be haheitalai namona, badina bema edia tama sina idia kamonai henia, Dirava ese do ia hanamodia.

 ⁸ Iesu be tau badana ai ia lao neganai, dala momo ai manau karana ia hahedinaraia. Ia dekenai mai anina bada gauna be, Iehova ena ura do ia karaia. (Ioa. 4:34) Iesu ena haroro gaukara lalonai, Dirava ena ladana ia gaukaralaia, bona taunimanima dekenai Dirava ena ura bona kara ia hadibaia. Iesu be taunimanima dekenai Dirava ese ia moalelaia mauri dalana ia hadibaia sibona lasi, to ena mauri ai unai ia hahedinaraia danu. Hegeregere, ena aposetolo taudia dekenai guriguri dalana ia hadibaia neganai, ia gwauraia gauna ginigunana be inai: “Aiemai Tamana guba dekenai oi noho, namona be ibounai ese oiemu ladana do idia hahelagaia.” (Mat. 6:9) Iesu be unai bamona ia karaia bona ena aposetolo taudia ia hadibaia, gau badana be Iehova ena ladana do idia hahelagaia. Unai dainai iena tanobada maurina dokonai, Iesu ese Iehova dekenai ia gwau: “Lau ese emu ladana be idia dekenai lau gwauraia hedinarai vadaeni, bona do lau gwauraia hedinarai.” (Ioa. 17:26) Danu, nega momo Iesu ia gwau ia be Iehova ena heduru amo gau ibounai ia karaia.​—⁠Ioa. 5:19.

9. Sekaraia ena peroveta herevana be dahaka, bona edena dala ai ia guguru?

⁹ Sekaraia be Mesia ia perovetalaia, ia gwau: “Umui Ierusalema dekenai noho taudia e, do umui moale, mai boiboi danu do umui moale. Umui itaia, emui King be umui dekenai ia mai noho. Ia be mai ena hamauria kara danu. Ia ese ia dekenai idia tuari henia taudia ia halusia momokani. To ia be mai manau danu, bona doniki dekenai ia guia. Doniki ena natuna ena latanai ia guia.” (Sek. 9:9) Unai peroveta herevana be lagani 33 C.E. ai ia guguru. Pasova ariana idia do karaia lasi neganai, Iesu be Ierusalema hanuana ai ia vareai. Momo ese edia dabua bona au rigidia be dala dekenai idia atoa. Ierusalema taudia idia kamonai Iesu be edia hanua dekenai ia vareai neganai, idia moale bada herea. Ena be idia ese Iesu be King ta bamona idia hanamoa, to ia manau.​—⁠Mat. 21:4-11.

10. Iesu be Dirava ia badinaia ela bona ia mase karana ese dahaka ia hamomokania?

¹⁰ Iesu Keriso be tanobada ai ia noho neganai, ia ese manau bona Dirava badinaia karana ia hahedinaraia  ela bona hisihisi auna ai idia hamasea. Ia hahedinaraia goevagoeva, herevana taunimanima be hahetoho badadia idia davaria, to Iehova idia badinaia noho diba. Danu, Satani ia gwau taunimanima be Iehova idia hesiai henia badina ia ese idia ia hanamoa. To Iesu ese unai hereva ia hakoikoia. (Iobu 1:9-11; 2:4) Keriso ese ena Tamana ia badinaia goevagoeva karana amo ia hamomokania, Iehova be mai ena maoro ia lohia totona, bona Iena lohia dalana be namo herea. Iehova ia itaia ena Natuna be mai manau ida badinaia karana ia hahedinaraia goevagoeva dainai, ia moale bada.​—⁠Aonega Herevadia 27:11 duahia.

11. Iesu ena mauri davalaia boubouna dainai, ia idia abidadama henia taudia be dahaka hahenamo do idia abia?

¹¹ Iesu be hisihisi auna ai ia mase karana ese dala ia kehoa, taunimanima be kara dika bona mase amo idia roho mauri totona. (Mat. 20:28) Iesu ena mauri davalaia boubouna dainai, Iehova ese ena hahemaoro maoromaoro hegeregerena, taunimanima edia kara dika ia gwauatao bona mauri hanaihanai idia abia diba. Paulo ia gwau: “Tau tamona ena kara maoromaoro dainai, Dirava ese taunimanima idauidau ibounai ia gwauraidia maoromaoro, mauri do idia abia totona. “ (Roma 5:18) Iesu ena mase dainai, horoa taudia be guba ai mauri hanaihanai do idia abia, bona “mamoe ma haida” be tanobada ai mauri hanaihanai do idia abia.​—⁠Ioa. 10:16; Roma 8:16, 17.

12. Edena dala ai Iesu ese goevadae lasi taudia dekenai, manau bona hebogahisi karana ia hahedinaraia?

¹² Iesu be idia hesiku bona lalometau taudia ibounai ia boiria ia dekenai idia lao totona. Ia gwau: “Lauegu huaia auna do umui huaia bona lau dekenai diba umui tahua, badina lau be manau bona lalomanada tauna bona goada matamata do umui davaria.” (Mat. 11:28, 29) Iesu be manau bona lalomanada tauna dainai, ia ese goevadae lasi taudia ia hebogahisi bona kara namo henidia. Ena hahediba taudia ia doria lasi, idia karaia diba lasi gaudia idia karaia totona. To, idia ia hanamoa bona hagoadaia. Idia ia hadikaia o hahemaraia lasi. Danu, idia ia badu o kara auka henidia lasi. To, idia ia hamaoroa bema ia kahirakahira idia lao bona ena hahediba herevadia idia badinaia, goada do idia abia badina iena ‘huaia auna be ia metau lasi.’ Unai dainai, tatau, hahine, matamatadia bona burukadia idia ura Iesu idia bamoa.​—⁠Mat 11:30.

13. Edena dala ai Iesu ese ogogami taudia ia hebogahisi henidia?

¹³ Iesu be Israela ai idia noho ogogami taudia ia hebogahisi henidia, bona ia hekwarahi ia durudia totona. Ieriko kahirakahira ai, ia ese matakepulu taudia rua, Batimeo bona ena turana ta ia davaria. Idia ruaosi be Iesu idia noia loulou idia ia durua totona, to hutuma ese idia gwau henidia do idia hereva lasi. Bema Iesu ia ura, unai matakepulu taudia ruaosi ia dadaraia diba, to ia be unai bamona ia karaia lasi. Ia hebogahisi henidia dainai, ia boiridia, edia matana ia  hanamoa bona idia itaia lou diba. Iesu be Tamana, Iehova ia tohotohoa, badina goevadae lasi taudia dekenai manau bona hebogahisi karana ia hahedinaraia.​—⁠Mat. 20:29-34; Mar. 10:46-52.

14. Iesu ena manau karana ese dahaka hahenamo ia mailaia?

¹⁴ Iesu ena manau karana ese taunimanima momo dekenai hahenamo ia mailaia. Bona Iehova be Iesu ena kamonai karana dainai ia moale. Danu, Iesu ese mai manau ida ena aposetolo bona hahediba taudia ia kara henidia dainai, edia lalona ia goada. Idia dekenai haheitalai namona ia hahedinaraia, ia hadibadia, bona ia hanamodia dainai, idia be Dirava ena hesiai taudia namodia ai idia lao. Iesu ese ogogami taudia ia hadibaia, hagoadaia bona durua danu. Momokani, Iesu ena mauri davalaia boubouna idia abidadama henia taudia ibounai, be hahenamo momo do idia abia ela bona hanaihanai.

15. Iesu be ena manau karana dainai hahenamo ia davaria danu, a?

¹⁵ Iesu be ena manau karana dainai, hahenamo ia davaria danu, a? Oibe. Iena hahediba taudia dekenai ia gwau: “Sibona ia hamanaua tauna be do idia abia isi.” (Mat. 23:12) Paulo ese ia hahedinaraia Iesu dekenai unai ia vara. Ia gwau: “Dirava ese ia dekenai dagi hereadaena ia henia bona ena hariharibada amo, ia ese ia dekenai ladana ibounai ia hereaia ladana ia henia. Vadaeni guba, tanobada, bona tano henunai idia noho taudia ibounai be Iesu ena ladanai do idia tui diho. Bona namona be taunimanima ibounai ese do idia gwauraia hedinarai, Iesu Keriso be Lohiabada, unai amo Dirava iseda Tamana do idia hanamoa.” Iesu be tanobada ai ia noho neganai, ia manau bona Dirava ia badinaia dainai, Iehova Dirava ese “dagi hereadaena ia henia,” guba bona tanobada ai idia noho taudia ibounai ia biagua totona.​—⁠Fili. 2:9-11.

16. Vaira negana ai, edena dala ai Iesu ese manau karana do ia hahedinaraia?

¹⁶ Vaira negana ai, Dirava ena Natuna be manau karana do ia hahedinaraia noho. Salamo torea tauna ta ese Iesu be guba ai King dagina do ia abia, bona Dirava ena inai taudia do ia kara henia dalana ia herevalaia, ia gwau: “Oiemu hosi dekenai do oi guia, bona mai king siahuna danu do oi lao, do oi kwalimu. Hereva momokani bona manau bona kara maoromaoro gimaia totona do oi tuari.” (Sal. 45:4, NW.) Aramagedono ai Iesu be manau, kara maoromaoro bona hereva momokani idia ura henia taudia totona do ia tuari. Bona Keriso ena Lagani 1,000 Lohia Negana ena dokona ai, “gavamani ibounai, lohia taudia ibounai, bona siahu taudia ibounai be ia ese ia haorea” murinai, dahaka do ia vara? Manau karana do ia hahedinaraia noho, a? Oibe. Baibel ia gwau Iesu ese ena Tamana, Dirava dekenai Basileia do ia henia hanai.​—⁠1 Korinto 15:24-28 duahia.

17, 18. (a) Dahaka dainai Iehova ena hesiai taudia ese Iesu ena manau karana idia tohotohoa be gau badana? (b) Wiki vaira ena stadi ai edena henanadai edia haere do ita tahua?

¹⁷ Ita be edena bamona? Iesu do ita tohotohoa bona manau karana do ita hahedinaraia, a? Aramagedono ai, King Iesu Keriso ese manau bona kara maoromaoro taudia sibona do ia hamauridia. Unai dainai bema ita ura ita roho mauri, ita manau be gau badana. Danu, bema ita manau, ita bona ma haida ese hahenamo momo do ita abia, Iesu dekenai ia vara bamona.

¹⁸ Dahaka ese ita ia durua diba, Iesu ena manau karana ita tohotohoa totona? Edena dala ai manau karana ita hahedinaraia diba, ena be nega haida unai ita karaia be auka? Wiki vaira ena stadi ai unai henanadai edia haere do ita dibaia.