Yezu Pesaka Mbandu na Yina Me Tala Kudikulumusa

“Mono me pesa beno mbandu, sambu, kaka mutindu mono me sala beno, beno mpi fwete sala mutindu mosi.”​—YOA. 13:15.

INKI MVUTU NGE TA PESA?

Inki mutindu Mwana ya Nzambi monisaka kudikulumusa na ntwala ya kukwisa na ntoto?

Inki mutindu Yezu monisaka kudikulumusa ntangu yandi vandaka na ntoto?

Kudikulumusa ya Yezu me nataka nki mambote?

1, 2. Na mpimpa ya nsuka ya luzingu na yandi na ntoto, nki dilongi Yezu pesaka bantumwa na yandi?

BETO kele na mpimpa ya nsuka ya luzingu ya Yezu na ntoto, mpi yandi kele ti bantumwa na yandi na suku ya nzo mosi ya etaze na Yeruzalemi. Ntangu bo vandaka kudia, Yezu telamaka, katulaka bilele na yandi ya zulu mpi kangaka sume na luketo na yandi. Na nima, yandi tulaka masa na dilonga, yantikaka kuyobisa makulu ya balongoki mpi dipaka yo na sume. Ntangu yandi manisaka, yandi lwataka bilele na yandi ya zulu. Sambu na nki Yezu salaka diambu yai ya kudikulumusa?​—Yoa. 13:3-5.

² Yezu yandi mosi tendulaka nde: “Keti beno ke bakisa mambu ya mono me sala beno? . . . Kana mono, ata mono kele Mfumu mpi Longi, mono me yobisa makulu na beno, beno mpi beno fwete yobisana makulu. Mono me pesa beno mbandu, sambu, kaka mutindu mono me sala beno, beno mpi fwete sala mutindu mosi.” (Yoa. 13:12-15) Na kusalaka kisalu yai ya kudikulumusa, Yezu pesaka bantumwa na yandi dilongi mosi ya mfunu yina bo zolaka kuvila ve ata fioti mpi ya zolaka kusiamisa bo na kumonisa kudikulumusa na bilumbu kekwisa.

3. (a) Na mabaku zole, nki mutindu Yezu monisaka mfunu ya kudikulumusa? (b) Inki beto ta longuka na disolo yai?

³ Ntangu Yezu yobisaka makulu ya bantumwa na yandi, yo vandaka ve mbala ya ntete yina yandi monisaka bo mfunu ya kudikulumusa. Kilumbu mosi ntangu bantumwa na yandi ya nkaka vandaka kutubana sambu na kuzaba muntu ya kuluta nene na kati na bo, Yezu bakaka mwana mosi ya fioti mpi zabisaka bo nde: “Konso muntu yina ke yamba mwana yai ya fioti sambu na zina na mono ke yamba mpi mono, mpi konso muntu yina ke yamba mono ke yamba mpi Muntu yina tindaka mono. Sambu muntu yina ke kuditwadisa bonso muntu ya fioti na kati na beno yonso yandi muntu kele muntu ya nene.” (Luka 9:46-48) Kilumbu ya nkaka ntangu Yezu vandaka kusolula ti Bafarize, bayina vandaka kuyindula nde bo vandaka mfunu mingi kuluta  ba nkaka, Yezu tubaka nde: “Konso muntu yina ke kudinangula bo ta kulumusa yandi, mpi muntu yina ke kudikulumusa bo ta nangula yandi.” (Luka 14:11) Yo ke pwelele nde, Yezu zolaka nde balongoki na yandi kudikulumusa mpi kukonda lulendo. Bika beto longuka mbote-mbote kikalulu na yandi ya kudikulumusa na mpila nde beto landa mbandu na yandi. Beto ta longuka mpi mutindu kikalulu yai ke sadisaka kaka ve bantu yina ke monisaka yo kansi mpi bantu ya nkaka.

“MONO BALUKAKA VE NA NDAMBU YA NKAKA”

4. Inki mutindu Yezu monisaka kudikulumusa na ntwala ya kukwisa na ntoto?

⁴ Mwana ya Nzambi monisaka kudikulumusa ata na ntwala ya kukwisa na ntoto. Na zulu, Yezu lutisaka bamvula mingi kumosi ti Tata na yandi. Mukanda ya Yezaya ke tubila bangwisana ya ngolo yina vandaka na kati ya Mwana ti Tata na yandi na bangogo yai: “Nkwa Kimfumu Yehowa yandi mosi pesaka mono ludimi ya bantu ya kulongama, sambu mono zaba kupesa mvutu na bantu ya kulemba. Yandi tedimisaka dikutu na mono konso suka, sambu na kuwa bonso bantu ya melongama. Nkwa Kimfumu Yehowa yandi mosi kangulaka makutu na mono, mpi mono vandaka ve nkolami. Mono balukaka ve na ndambu ya nkaka.” (Yez. 50:4, 5, NW) Mwana ya Nzambi monisaka kudikulumusa mpi tulaka dikebi ya mingi na mambu yina Yehowa vandaka kulonga yandi. Yandi zolaka kulongama na Nzambi ya kieleka. Ntembe kele ve nde, Yezu monaka mutindu Yehowa monisaka kudikulumusa na kuwilaka bantu ya masumu mawa!

5. Na kiyeka na yandi ya Mishele mfumu ya bawanzio, nki mutindu Yezu monisaka kudikulumusa ntangu yandi tulanaka ntembe ti Diabulu?

⁵ Bawanzio yonso ve monisaka kudikulumusa bonso Yezu. Wanzio yina kumaka Satana Diabulu zolaka ve kulongama na Yehowa; yandi kumaka lulendo mpi yantikaka kumona nde yandi vandaka mfunu mingi kuluta bawanzio yankaka. Yo yina, yandi kolamaka na Yehowa. Kansi Yezu sepelaka na kiyeka yina Nzambi pesaka yandi na zulu mpi sadilaka ve kiyeka yango na mutindu ya mbi. Mu mbandu, ntangu yandi ‘tulanaka ntembe ti Diabulu sambu na nitu ya Moize,’ Yezu salaka ve ata diambu mosi yina yandi vandaka ve ti nswa ata nkutu yandi vandaka Mishele mfumu ya bawanzio. Kansi yandi monisaka kudikulumusa. Yandi yambulaka na kiese yonso mambu na maboko ya Yehowa, Zuzi ya Luyalanganu ya mvimba sambu na kutwadisa yo na mutindu ya mbote mpi na ntangu ya me fwana.​—Tanga Yude 9.

6. Inki mutindu Yezu monisaka kudikulumusa na kundimaka kukwisa na ntoto bonso Mesia?

⁶ Ntangu Yezu vandaka na zulu, ntembe kele ve nde yandi zabaka bambikudulu yonso yina vandaka kutubila luzingu na yandi na ntoto bonso Mesia. Yo fwete vanda nde nde yandi zabaka na ntwala mambu ya mpasi yina vandaka kuvingila yandi. Ata mpidina, Yezu ndimaka kuzinga na ntoto mpi kufwa bonso Mesia ya lusilu. Sambu na nki? Sambu na kutubila kudikulumusa yina Yezu monisaka, ntumwa Polo sonikaka nde: “Ata yandi vandaka bonso Nzambi, yandi yindulaka ve na kubotula kimfumu, disongidila, nde yandi fwete vanda kiteso mosi ti Nzambi. Ve, kansi yandi yambulaka bima yonso mpi kumaka bonso mpika mpi kumaka muntu.”​—Bafi. 2:6, 7.

NTANGU YEZU KUMAKA MUNTU, “YANDI KUDIKULUMUSAKA”

7, 8. Na nki mitindu Yezu monisaka kudikulumusa na buleke na yandi mpi na kisalu na yandi ya kusamuna?

⁷ Polo sonikaka nde: “Ntangu [Yezu] kumaka muntu, yandi kudikulumusaka mpi lemfukaka tii na lufwa, ee, lufwa na zulu ya nti ya mpasi.” (Bafi. 2:8) Tuka buleke na yandi, Yezu bikilaka beto mbandu ya kulanda; yandi monisaka kudikulumusa. Yezu “landaka na kulemfukila” bibuti na yandi, Yozefi ti Maria, ata bo vandaka bantu ya kukonda kukuka. (Luka 2:51) Yo kele mbandu ya mbote sambu na baleke; Nzambi ta sakumuna bo na luzolo na bo ya kulemfukila bibuti na bo!

 ⁸ Ntangu Yezu kumaka mbuta, yandi monisaka kudikulumusa na mutindu yandi tulaka luzolo ya Yehowa na kisika ya ntete na luzingu na yandi. (Yoa. 4:34) Na kisalu na yandi ya kusamuna, Yezu Kristu sadilaka zina ya Nzambi, longaka bantu ya masonga bikalulu ya nene ya Yehowa mpi lukanu na yandi sambu na bantu. Yezu zingaka mpi na kuwakana ti mambu yina yandi longaka bantu. Mu mbandu, ntangu yandi longaka balongoki na yandi mutindu ya kusamba, diambu ya ntete yina yandi tubaka vandaka: “Tata na beto yina kele na zulu, bika nde zina na nge kusantisama.” (Mat. 6:9) Mpidina, Yezu longaka balongoki na yandi nde diambu ya kuluta mfunu sambu na bo vandaka kusantisama ya zina ya Yehowa. Yezu yandi mosi salaka mpidina. Na ntwala ya kukuma na nsuka ya kisalu na yandi ya kusamuna, Yezu zabisaka Yehowa na kisambu nde: “Mono me zabisaka bo [bantumwa] zina na nge mpi mono ta zabisa yo.” (Yoa. 17:26) Diaka, mbala mingi yandi vandaka kutuba nde yandi lendaka ve kusala ata diambu mosi kukonda lusadisu ya Yehowa.​—Yoa. 5:19.

9. Zakaria bikulaka nki sambu na Mesia, mpi nki mutindu mbikudulu yango lunganaka na Yezu?

⁹ Zakaria bikulaka sambu na Mesia nde: ‘Nge bwala Sioni, vanda na kiese, sepela! Beno bantu ya Yeruzalemi, beno tula milolo sambu na kiese! Tala ntotila na beno ke kwisila beno. Yandi kele muntu ya masonga, yandi ke kwisa ti kikesa bonso muntu me nunga na tribinale. Yandi kele muntu ya pima, yandi me vanda na zulu ya mwana-mpunda.’ (Zak. 9:9) Mbikudulu yai lunganaka ntangu Yezu kotaka na Yeruzalemi na ntwala ya Paki ya mvu 33 T.B. Bantu mingi tandaka bilele mpi balutangu ya banti na nzila. Nkutu, mbanza ya mvimba nikanaka ngolo ntangu yandi kotaka. Ata ntangu bantu yai vandaka kukumisa yandi bonso Ntotila, Yezu kudikulumusaka.​—Mat. 21:4-11.

10. Yezu ndimisaka nki na kumonisaka bulemfu tii na lufwa?

¹⁰ Ntangu yandi vandaka na ntoto, Yezu Kristu monisaka kudikulumusa mpi bulemfu tii na lufwa na yandi na zulu ya nti ya mpasi. Mpidina, yandi monisaka kukonda ntembe nde bantu lenda bikala ya kwikama na Yehowa ata na bampasi ya ngolo. Yezu monisaka mpi nde Satana kusaka ntangu yandi  tubaka nde bantu ke sadilaka Yehowa sambu na bikuma ya bwimi. (Yobi 1:9-11; 2:4) Na kulemfukilaka Tata na yandi na mutindu ya kukuka, Kristu nwaninaka lunungu mpi nswa yina Yehowa kele ti yo ya kuyala luyalanganu ya mvimba. Ntembe kele ve nde, Yehowa sepelaka ngolo ntangu yandi monaka kwikama yina Mwana na yandi ya kudikulumusa monisaka.​—Tanga Bingana 27:11.

11. Kimenga ya nkudulu ya Yezu Kristu pesaka nki kivuvu sambu na bantu yina kekwikilaka na yandi?

¹¹ Lufwa ya Yezu na zulu ya nti ya mpasi pesaka bantu nzila ya kuguluka na disumu mpi lufwa. (Mat. 20:28) Sambu na kimenga ya nkudulu ya Yezu, Yehowa lenda lolula bantu ya masumu na kutadila minsiku na yandi ya lunungu mpi kupesa bo dibaku ya kuzinga mvula na mvula. Ntumwa Polo sonikaka nde: “Na nzila ya diambu mosi ya lunungu Nzambi ke ndima bantu ya mitindu yonso bonso bantu ya lunungu sambu bo baka luzingu.” (Bar. 5:18) Lufwa ya Yezu pesaka Bakristu ya kupakulama kivuvu ya kuzinga mvula na mvula na zulu mpi sambu na “mameme ya nkaka,” luzingu ya mvula na mvula na ntoto.​—Yoa. 10:16; Bar. 8:16, 17.

MONO KELE MUNTU “YA KUDIKULUMUSA NA NTIMA”

12. Inki mutindu Yezu monisaka kudikulumusa mpi mawete na mutindu yandi sadilaka bantu ya kukonda kukuka mambu?

¹² Yezu zabisaka bantu yonso yina “ke mona mpasi mpi ya ke nata kilo” na kukwisa na yandi. Yandi tubaka nde: “Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na mioyo na beno.” (Mat. 11:28, 29) Kudikulumusa mpi mawete ya Yezu sadisaka yandi na kusadila bantu ya kukonda kukuka mambu na mutindu ya mbote ti ya lunungu. Yandi vandaka kuvingila ve nde balongoki na yandi kusala mambu kuluta makuki na bo. Yezu vandaka kusikisa balongoki na yandi mpi kusiamisa bo. Yandi monisaka bo ve nde bo vandaka mfunu ve to bo fwanaka ve. Yezu vandaka ve muntu ya makambu ngolo to ya nku. Nkutu, yandi zabisaka balongoki na yandi nde kana bo kwenda penepene na yandi mpi kusadila malongi na yandi, bo tabaka kupema sambu vangu na yandi vandaka mpasi ve mpi kizitu na yandi vandaka kilo ve. Yo yina babakala mpi bankento, bambuta mpi baleke vandaka kudiwa mbote na lueka na yandi.​—Mat. 11:30.

13. Inki mutindu Yezu monisilaka bansukami mawa?

¹³ Yezu wilaka bantu ya Izraele yina vandaka kunyokwama mawa sambu bo vandaka bansukami mpi yandi tulaka dikebi ya zola na bampusa na bo. Penepene ya mbanza Yeriko, Yezu kutanaka ti bifwa-meso zole, Bartimaeus ti nduku na yandi. Babakala yai zole landaka kulomba Yezu na kusadisa bo kansi bantu yina vandaka na nziunga na bo nganinaka bo mpi zabisaka bo na kuvanda pima. Yo vandaka mpasi mpenza ve na kukonda kutula  dikebi na bifwa-meso yai! Kansi, Yezu zabisaka bantu na kunata bifwa-meso yina, mpi mawa simbaka yandi yo yina yandi kangulaka meso na bo. Yezu landaka mbandu ya Tata na yandi, Yehowa, na mutindu yandi monisaka kudikulumusa mpi mawa sambu na bantu ya masumu.​—Mat. 20:29-34; Mar. 10:46-52.

“KONSO MUNTU YINA KE KUDIKULUMUSA, BO TA TOMBULA YANDI”

14. Kudikulumusa ya Yezu me nataka nki balusakumunu?

¹⁴ Kikalulu ya kudikulumusa yina Yezu monisaka nataka kiese mpi balusakumunu mingi. Yehowa sepelaka na bulemfu yina Yezu monisaka sambu na luzolo ya Tata na yandi. Bantumwa mpi balongoki ya Yezu bakaka kikesa na mutindu yandi vandaka kusadila bo mambu na mawete mpi na kudikulumusa yonso. Mbandu na yandi ya mbote, malongi na yandi mpi bansiamisa na yandi, pusaka bo na kuyela na kimpeve. Yezu sadisaka bantu mingi ya nkaka na kulongaka bo, na kusiamisaka bo mpi na kulungisaka bampusa na bo. Sambu na kimenga ya nkudulu ya Yezu, bantu yonso ya kukonda kukuka ta baka balusakumunu ya mvula na mvula.

15. Kudikulumusa ya Yezu natilaka yandi nki mambote?

¹⁵ Inki beto lenda tuba sambu na Yezu? Keti kudikulumusa na yandi natilaka yandi mpi mambote? Ee, sambu Yezu yandi mosi tubaka nde: “Konso muntu yina ke kudikulumusa, bo ta tombula yandi.” (Mat. 23:12) Polo tendulaka nde bangogo yai lunganaka na luzingu ya Yezu. Yandi tubaka nde: “Nzambi tombulaka [Yezu] na kisika mosi ya kuzanguka mpi pesaka yandi na luzolo yonso zina yina me luta bazina yonso ya nkaka, na mpila nde na zina ya Yezu mabolongo yonso​—ya bayina kele na zulu mpi ya bayina kele na ntoto mpi ya bayina kele na nsi ya ntoto—​kufukama mpi konso ludimi kundima pwelele nde Yezu Kristu kele Mfumu na nkembo ya Nzambi Tata.” Sambu Yezu monisaka kudikulumusa mpi kwikama awa na ntoto, Yehowa Nzambi tombulaka Mwana na yandi mpi pesaka yandi kiyeka na zulu ya bigangwa yonso ya kele na zulu ti na ntoto.​—Bafi. 2:9-11.

YEZU TA ‘MATA NA ZULU YA MPUNDA SAMBU NA KUNWANINA KIELEKA MPI KUDIKULUMUSA’

16. Inki kemonisa nde Mwana ya Nzambi ta landa kumonisa kudikulumusa na makwisa?

¹⁶ Mwana ya Nzambi ta landa kumonisa kudikulumusa na makwisa. Muyimbi-bankunga mosi tubilaka mutindu Yezu Ntotila na zulu, ta nwanisa bambeni ya Nzambi. Yandi yimbaka nde: ‘Mata na mpunda, kwenda na lukumu yonso sambu na kununga; kwenda kunwanina kieleka mpi kudikulumusa mpi lunungu.’ (Nk. 45:5) Na Armagedoni, Yezu Kristu ta nwana sambu na kunwanina bantu ya kudikulumusa mpi ya lunungu yina kezolaka kieleka. Ebuna, nki tasalama na nsuka ya Luyalu ya Bamvula Funda ya Kristu ntangu yandi ‘ta fwa baluyalu yonso mpi biyeka yonso mpi ngolo’? Keti yandi ta monisa kudikulumusa? Ee, sambu yandi ta vutula “kimfumu na Nzambi mpi Tata na yandi.”​—Tanga 1 Bakorinto 15:24-28.

17, 18. (a) Sambu na nki yo kele mfunu nde bansadi ya Yehowa kulanda mbandu ya kudikulumusa ya Yezu? (b) Inki beto ta tadila na disolo yina ke landa?

¹⁷ Ebuna beto? Keti beto ta landa mbandu ya Yezu mpi ta monisa kudikulumusa? Na Armagedoni, Ntotila Yezu Kristu ta gulusa kaka bantu ya kudikulumusa mpi ya lunungu. Yo yina beto fwete monisa kudikulumusa sambu na kuguluka. Diaka, kana beto monisa kudikulumusa, yo ta natila beto mpi bantu ya nkaka balusakumunu mingi kaka bonso Yezu.

¹⁸ Inki lenda sadisa beto na kulanda mbandu ya kudikulumusa ya Yezu? Inki mutindu beto lenda sala bikesa sambu na kumonisa kudikulumusa ata ntangu beto ke kutana ti bampasi? Beto ta tadila bangiufula yai na disolo yina ke landa.

[Bangyufula ya disolo ya kulonguka]

[Bifwanisu ya kele na lutiti 15]

Inki mutindu kudikulumusa ya Yezu lenda natila beto mambote?

[Kifwanisu ya kele na lutiti 16]

Beto fwete landa mbandu ya Yezu na mutindu yandi wilaka bantu mawa