Jesu Naa Lu Tomezi Mutala Wa Buikokobezo

“Kakuli ni mi tomezi mutala, kuli ni mina mu eze sina mo ni mi ezelize.”—JOA. 13:15.

MU KONA KU ALABA CWAÑI?

Mwanaa Mulimu naa ikokobelize cwañi pili a si ka taha kale fa lifasi?

Jesu naa ikokobelize cwañi ha naa li fa lifasi?

Ki lika mañi ze nde ze ne zwile mwa buikokobezo bwa Jesu?

1, 2. Jesu naa lutile baapositola ba hae tuto mañi fa busihu bwa mafelelezo bwa ku pila kwa hae fa lifasi?

KI BUSIHU bwa mafelelezo bwa ku pila kwa Jesu fa lifasi. Jesu u inzi ni baapositola ba hae mwa muzuzu wa kwahalimu wa mwa ndu ye ñwi kwa Jerusalema. Ha ba nze ba lalela, Jesu u zwisa liapalo za hae za fahalimu. Jesu u itama taulo mwa teka ni ku beya mezi mwa mukeke. Mi u kala ku tapisa mahutu a balutiwa ba hae ni ku a polola ka taulo. Ha feza, u apala liapalo za hae za fahalimu. Ki kabakalañi Jesu ha naa ezize musebezi wa kwatasi wo?—Joa. 13:3-5.

² Jesu naa talusize libaka ha naa ize: “Kana mwa utwisisa se ni ezize ku mina?” Mi naa zwezipili ku bulela kuli: “Haiba na, niha ni li Mulena ni Muluti, ni mi tapisize kwa mahutu, ni mina mu swanela ku tapisana kwa mahutu. Kakuli ni mi tomezi mutala, kuli ni mina mu eze sina mo ni mi ezelize.” (Joa. 13:12-15) Ka ku eza musebezi wa kwatasi wo, Jesu naa lutile baapositola ba hae tuto ye ne ba si ke ba libala ili ye ne ka ba tusa ku ba ni buikokobezo hamulaho.

3. (a) Ki mwa linzila mañi ze peli mo Jesu naa bonisize butokwa bwa ku ikokobeza? (b) Lu ka itutañi mwa taba ye?

³ Jesu ha naa tapisize mahutu a balutiwa ba hae, ne si lona lwa pili ha naa ba bonisize kuli ku ikokobeza ki kwa butokwa. Nako ye ñwi, baapositola ne ba kananisana za kuli ki mañi yo mutuna mwahalaa bona. Jesu a yemisa mwanana yo munyinyani bukaufi ni yena mi a li ku bona: “Mutu kaufela ya ka amuhela mwanana yo munyinyani yo ka libizo la ka u amuhela ni na, mi mutu kaufela ya ni amuhela u amuhela ni yena ya ni lumile. Kakuli ya ikeza yo munyinyani mwahalaa mina kaufela ki yena yo mutuna.” (Luka 9:46-48) Nako ye ñwi hape ha naa ambola ni bafalisi, ili bao ne ba ikunga kuli ne li ba butokwa hahulu ku fita ba bañwi, Jesu  naa ize: “Mutu kaufela ya ipahamisa u ka kokobezwa, mi ya ikokobeza u ka pahamiswa.” (Luka 14:11) Kaniti luli Jesu u bata kuli balateleli ba hae ba ikokobeze. Ha tabeli kuli ba ipahamise, kamba kuli ba nahane kuli ki ba butokwa hahulu ku fita ba bañwi, kamba ku eza lika ka ku bonisa kuli ba fita ba bañwi. Ha lu nyakisiseñi ka tokomelo mutala wa Jesu wa buikokobezo ilikuli lu kone ku mu likanyisa. Hape lu ka bona mo kalemeno kao ka buikokobezo ka kona ku tuseza isiñi feela ba ba ka bonisa kono ni ba bañwi?

‘HA NI SI KA KU FULALELA’

4. Jesu naa bonisize cwañi buikokobezo pili a si ka taha kale fa lifasi?

⁴ Mwanaa Mulimu naa bonisize buikokobezo mane pili a si ka taha kale fa lifasi. Mwa lihalimu, Jesu naa pilile ni Ndatahe ka nako ye telele hahulu. Buka ya mwa Bibele ya Isaya i talusa za bulikani bo bu tiile bwa naa na ni bona Mwana ni Ndatahe. I bulela kuli: “Muñaa Bupilo u ni lutile se ni ka bulela, ili kuli ni kone ku tiisa ba ba katezi. Ka zazi ni zazi kakusasana u ni lakazisa ku utwa sa ka ni luta. Muñaa Bupilo u ni file kutwisiso, mi ha ni si ka mu fetuhela kamba ku mu fulalela.” (Isa. 50:4, 5, Bibele ye Kenile, Hatiso ya 1984) Jesu naa bata hahulu ku ituta ku Mulimu wa niti. Naa ikokobelize ni ku teeleza ka tokomelo ku za naa mu luta Jehova. Jesu hape mwendi naa boni mo Jehova naa shemubezi batu ba baezalibi.

5. Jesu naa bonisize cwañi buikokobezo ha naa si ka lumelelana ni Diabulosi?

⁵ Haki mangeloi kaufela a naa ikokobeza inge Jesu. Lingeloi le ne tilo ba Satani Diabulosi ne li sa bati ku lutiwa ki Jehova. Satani naa kalisize ku ikuhumusa ni ku ikutwa kuli ki wa butokwa ku fita mangeloi a mañwi. Satani naa si ka bonisa buikokobezo. Mi kwa mafelelezo a kwenuhela Jehova. Kono moya wa Jesu ne u sa swani ni wa Satani. Jesu naa sa bati ku fiwa maata a matuna mwa lihalimu ku fita a naa mu file Mulimu. Mi ni kamuta naa si ka bata ku itusisa maata a hae ka nzila ye fosahalile. Ka mutala, Bibele i lu bulelela za nako ye ñwi fo Jesu naa si ka lumelelana ni Diabulosi ka za mubili wa Mushe. Nihaike kuli naa li Mikaele, lona lingeloi le li maata ka ku fitisisa, Jesu ka nako yeo naa si ka eza se siñwi bakeñisa kuli naa si ka fiwa maata. Mwanaa Mulimu naa ikokobelize. Jesu naa tabela ku libelela ku Jehova, yena Muatuli yo Mutuna ka ku Fitisisa wa pupo kaufela kuli a eze lika ka nzila ni ka nako ye swanela.—Mu bale Juda 9.

6. Jesu naa bonisize cwañi buikokobezo ka ku lumela ku ba Mesia?

⁶ Ha naa sa li mwa lihalimu, Jesu naa ziba luli bupolofita kaufela bo ne bu talusa ze ne ka ezahala ku yena ka ku ba Mesia. Kamukwaocwalo, ku bonahala kuli Jesu naa ziba kuli naa ka nyanda. Nihakulicwalo, Jesu naa lumezi ku to pila fa lifasi ni ku shwa sina Mesia ya naa sepisizwe. Ki kabakalañi ha naa ezize cwalo? Muapositola Paulusi naa bulezi kuli nto ye ne tusize Jesu ku eza cwalo ki buikokobezo. Paulusi naa ñozi kuli nihaike kuli Jesu naa li lingeloi le li maata, naa si ka nahana “za ku likana ni Mulimu.” “Kono a toboha sa naa li sona mi a nga sibupeho sa mutanga ni ku to ba mutu.”—Mafil. 2:6, 7.

“SINA MUTU, A IKOKOBEZA”

7, 8. Jesu naa bonisize cwañi buikokobezo ha naa sa li mwanana ni ha naa li mwa bukombwa bwa hae?

⁷ “Paulusi naa ñozi kuli Jesu ha naa li fa lifasi, “a ikokobeza mi a ipeya ku utwa ku isa kwa lifu, mane kwa lifu la fa kota ya linyando.” (Mafil. 2:8) Ku zwa feela kwa bwanana bwa hae, Jesu u lu siyezi mutala wa buikokobezo o lu swanela ku likanyisa. Jesu naa kuteka bashemi ba hae, bo Josefa ni Maria, nihaike kuli ne ba si ka petahala. (Luka 2:51) Jesu ki mutala o  munde kwa banana. Mulimu u ka ba fuyaula bakeñisa ku utwa bashemi ba bona.

⁸ Ha sa hulile, Jesu naa ikokobelize mwa linzila ze ñata. Nto ye ne li ya butokwa ku yena ne li ku eza tato ya Jehova. (Joa. 4:34) Mwa bukombwa bwa hae, Jesu Kreste naa itusisize libizo la Mulimu mi naa lutile batu ka za mulelo wa Mulimu ni ku ba tusa ku ziba mwa inezi Mulimu yena Ndatahe. Jesu naa si ka luta feela batu mwa ku pilela ka nzila ye tabisa Mulimu kono hape naa pila ka ku ya ka za naa luta. Ka mutala, Jesu ha naa luta balutiwa ba hae mwa ku lapelela, pili naa bulezi kuli: “Ndataa luna ya kwa lihalimu, libizo la hao li keniswe.” (Mat. 6:9) Jesu fa naa bonisa balutiwa ba hae kuli nto ya butokwa hahulu ye ne ba swanela ku eza ki ku kanyisa libizo la Jehova. Jesu yena naa kanyisize libizo la Jehova. Kwa mafelelezo a bupilo bwa hae bwa fa lifasi, Jesu naa kona ku bulelela Jehova kuli: “Ni zibahalize libizo la hao ku bona mi ni ka li zibahaza.” (Joa. 17:26) Hape Jesu naa bulelanga kuli naa sa koni ku eza nto ifi kamba ifi a sa tusiwi ki Jehova.—Joa. 5:19.

9. Zakaria naa polofitileñi ka za Mesia, mi Jesu naa talelelize cwañi bupolofita bo?

⁹ Zakaria naa polofitile ka za Mesia kuli: “Wena mwanaa Sione wa musizana u wabelwe hahulu; u lulueze wena mwanaa Jerusalema wa musizana! Bona, mulenaa hao ki yo, u ta ku wena; ki ya lukile, ya pilisa; u ikokobelize, u pahami mbongolo, mane mbongolo ye nyinyani, mwanaa mbongolo.” (Zak. 9:9) Bupolofita bo ne bu talelelizwe Jesu ha naa keni mwa Jerusalema pili Paseka i si ka ezahala kale ka silimo sa 33 C.E. Batu ba bañata ne ba yalile liapalo ni linzalu mwa mukwakwa. Mane batu ba mwa Jerusalema ne ba tabile hahulu ha ne ba utwile kuli Jesu naa taha mwa Jerusalema. Batu bao ni ha ne ba mu lumbekile ka ku ba Mulenaa bona, Jesu naa ikokobelize.—Mat. 21:4-11.

10. Jesu naa bonisizeñi ka ku sepahala ku isa lifu?

¹⁰ Jesu ha naa li fa lifasi, naa bonisize buikokobezo mi naa zwezipili ku utwa Mulimu ku fitela a bulaiwa fa kota ya linyando. Naa bonisize luli kuli  batu ba kona ku zwelapili ku sepahala ku Jehova nihaiba mwa miinelo ye taata. Jesu hape naa bonisize kuli Satani naa bulezi buhata ha naa bulezi kuli batu ba sebeleza Jehova bakeñisa kuli ba bata ku fumana se siñwi ku yena. (Jobo 1:9-11; 2:4) Ka ku utwa Ndatahe, Kreste naa yemezi tukelo ya Jehova ya ku busa ni ku bonisa kuli puso ya Jehova ki yona ye nde ka ku fitisisa. Jehova u lukela ku ba ya naa tabile hahulu ku bona Mwanaa hae ya ikokobeza ha bonisa busepahali.—Mu bale Liproverbia 27:11.

11. Sitabelo sa Jesu si tahisizeñi kwa batu ba ba na ni tumelo ku yena?

¹¹ Lifu la Jesu la fa kota ya linyando li tahisize kuli batu ba liululwe kwa sibi ni lifu. (Mat. 20:28) Bakeñisa sitabelo sa Jesu, Jehova wa kona ku swalela libi za luna ka ku ya ka likuka za hae ze lukile ni ku fa batu kolo ya ku pila ku ya ku ile. Paulusi naa ñozi kuli: “Kezo ya ku luka i liñwi i tahisize kuli batu ba mufuta kaufela ba beiwe ba ba lukile kuli ba be ni bupilo.” (Maro. 5:18) Lifu la Jesu li tahisize kuli ba ba tozizwe ka moya o kenile ba kone ku pila ku ya ku ile mwa lihalimu ni ku tusa lingu ze ñwi ku pila ku ya ku ile fa lifasi.—Joa. 10:16; Maro. 8:16, 17.

“NI WILE PILU”

12. Jesu naa bonisize cwañi buikokobezo ni musa ha naa li ni batu ba ba si ka petahala?

¹² Jesu naa memile batu kaufela ba ba katezi ni ba ba zwafile kuli ba tahe ku yena. Naa bulezi kuli: “Mu itwese coko ya ka mi mu be balutiwa ba ka, kakuli ni na ni musa mi ni wile pilu, mi mu ka katulusa mioyo ya mina.” (Mat. 11:28, 29) Bakeñisa kuli Jesu naa ikokobeza mi naa lukile, naa nga batu ba ba si ka petahala ka sishemo ni ka musa. Jesu naa sa libelelangi kuli balutiwa ba hae ba eze lika ze ba sa koni. Jesu naa ba babazanga ni ku ba susueza. Naa si ka tahisa kuli ba ikutwe kuli ne ba sina tuso kamba kuli ne si batu ba bande. Jesu naa si ya buhali kamba ya taata ku mu tabisa. Kono naa bulezi kuli: “Coko ya ka i bunolo.” Jesu naa talusa kuli ze tokwahala kuli mutu a be mulutiwa wa hae ne si ze taata hahulu ku li utwa. Ha ne ba ka ituta ku yena ni ku utwa za naa ba luta, ne ba ka omba-ombiwa. Kona libaka baana, basali, banana, ni ba bahulu ha ne ba tabelanga ku ba hamoho ni Jesu.—Mat. 11:30.

13. Jesu naa bonisize cwañi sishemo kwa batu ba ne ba kopana ni miinelo ye taata?

¹³ Jesu naa utwezi makeke batu ba ne ba kopana ni miinelo ye taata mwa Isilaele, mi naa ezize za naa kona kaufela kuli a ba tuse. Jesu ha naa zwa mwa Jeriko, a kopana ni libofu ze peli ili Bartimea ni mulikanaa hae. Bubeli bwa libofu zeo za zwelapili ku kupa Jesu kuli a li tuse, kono batu ba ne ba li ni zona ba li bulelela kuli li kuze. Ne ku ka ba bunolo ku Jesu ku fitelela libofu zeo, kono naa si ka eza cwalo. Jesu naa utwezi baana ba babeli bao makeke, kamukwaocwalo a ba biza  ni ku to ba folisa, mi baana bao ba kala ku bona hape. Jesu naa likanyisize Ndatahe Jehova ka ku bonisa buikokobezo ni sishemo kwa batu ba baezalibi.—Mat. 20:29-34; Mare. 10:46-52.

“MUTU KAUFELA YA IKOKOBEZA U KA PAHAMISWA”

14. Ki lika mañi ze nde ze ne zwile mwa buikokobezo bwa Jesu?

¹⁴ Moya wa buikokobezo wa naa bonisize Jesu ne u tahisize kuli batu ba bañata ba be ni tabo ni ku fumana limbuyoti. Jehova naa tabile bakeñisa kuli Mwanaa hae naa sepahalile. Baapositola ni balutiwa ne ba omba-ombilwe ni ku susuezwa ki moya o munde ni buikokobezo za naa ba bonisize Jesu. Ka ku ba mutala o munde ku bona, ku ba luta, ni ku ba babaza, Jesu naa ba tusize ku ba batanga ba bande ba Mulimu. Jesu naa tusize ba bañwi ba bañata ka ku ba luta, ku ba susueza, ni ku ba fa lituso ze ne ba tokwa. Mane, bakeñisa sitabelo sa Jesu, batu kaufela ba ba lumela ku yena ba ka fumana limbuyoti za ku ya ku ile.

15. Ku bonisa buikokobezo kwa Jesu ne ku mu tusize cwañi?

¹⁵ Jesu yena bo? Kana ku bonisa buikokobezo kwa hae ne ku mu tusize? Ne ku mu tusize. Kamukwaufi? Jesu yena kasibili naa ize: “Mutu kaufela ya ikokobeza u ka pahamiswa.” (Mat. 23:12) Paulusi naa talusize kuli Jesu naa pahamisizwe bakeñisa ku ikokobeza. Paulusi naa ize: “Mulimu hape a mu pahamisa hahulu ni ku fita mi ka sishemo a mu fa libizo le li fita mabizo a mañwi kaufela, kuli ka libizo la Jesu mañwele kaufela a kubame—a ba ba mwa lihalimu ni ba ba mwa lifasi ni ba ba mwatasaa lifasi—mi malimi kaufela a bulele patalaza kuli Jesu Kreste ki Mulena ilikuli Mulimu Ndate a kanyiswe.” Bakeñisa kuli Jesu naa ikokobeza mi naa sepahala ha naa li fa lifasi, Jehova Mulimu a “pahamisa,” kamba ku kuteka Mwanaa hae ka ku mu fa maata fahalimwaa ba ba mwa lihalimu ni fa lifasi kaufela.—Mafil. 2:9-11.

JESU U KA “LWANELA ZA NITI NI ZE LUKILE”

16. Mwanaa Mulimu u ka zwelapili cwañi ku bonisa buikokobezo kwapili?

¹⁶ Mwanaa Mulimu u ka zwelapili ku ikokobeza kwapili. Samu ye ñwi i polofita kuli ka ku ba Mulena mwa lihalimu, Jesu u ka lwanisa lila za Mulimu. Samu yeo i li: “Pahama ka bulena, u yo tula, ku yo lwanela za niti ni ze lukile! Maata a hao a ta ku tulisa lindwa ze tuna!” (Samu 45:4, Bibele ye Kenile, Hatiso ya 1984) Fa Armagedoni, Jesu Kreste u ka lwanela ni ku yemela ba ba ikokobeza, ba ba lata ku luka, ni ba ba lata niti. Kiñi ze ka ezahala kwa mafelelezo a lilimo ze 1,000 za ku busa kwa Kreste haa sa “felisize bulena kaufela, ni mibuso kaufela, ni maata kaufela”? Kana Jesu u ka bonisa buikokobezo? Kaniti u ka ikokobeza. Bibele i lu bulelela kuli Jesu u ka kutisa Mubuso ku Mulimu wa hae yena Ndatahe.—Mu bale 1 Makorinte 15:24-28.

17, 18. (a) Ki kabakalañi batanga ba Jehova ha ba tokwa ku likanyisa mutala wa Jesu wa buikokobezo? (b) Ki lipuzo mañi ze lu ka nyakisisa mwa taba ye tatama?

¹⁷ Luna bo? Kana lu ka likanyisa mutala wa Jesu wa ku ikokobeza? Fa Armagedoni, Mulena Jesu Kreste u ka punyusa feela batu ba ba ikokobeza ni ba ba lukile. Kamukwaocwalo, lu swanela ku ikokobeza haiba lu bata ku to punyuha. Ku zwa fo, haiba lu ikokobeza, lu ka fumana limbuyoti ze ñata ze si ke za tusa feela luna kono ni batu ba bañwi, sina mo ne ku bezi ku Jesu.

¹⁸ Kiñi ze kona ku lu tusa ku likanyisa mutala wa Jesu wa buikokobezo? Lu kona ku sebeza cwañi ka taata kuli lu bonise buikokobezo ku si na taba kuli ku eza cwalo ku taata? Lu ka fumana likalabo za lipuzo zeo mwa taba ye tatama.

[Lipuzo za Tuto]

[Maswaniso a fa likepe 12]

Mutala wa Jesu wa buikokobezo u kona ku lu tusa cwañi?

[Siswaniso se si fa likepe 13]

Lu swanela ku likanyisa makeke a Jesu