Yesu Noketo Ranyisi Maber mar Bolruok
Yesu Noketo Ranyisi Maber mar Bolruok
“Asemiyou ranyis mondo un bende utim kaka asetimonu.”—JOH. 13:15.
INYALO DWOKO NADE?
Wuod Nyasaye nonyiso nade kido mar bolruok kane pok obiro e piny?
Kane en dhano e piny, Yesu nonyiso nade kido mar bolruok?
Gin gweth mage mosebedoe kuom bolruok ma Yesu nonyiso e ngimane?
1, 2. E otieno mogik ka Yesu pok otho, en puonj mane maduong’ ma ne omiyo jootene?
EN OTIENO mogik ka Yesu pok otho, kendo okawo thuolono mondo obed gi jopuonjrene e ot man e wi gorofa, e dala mar Jerusalem. Sama gidhi nyime gi chiemo, Yesu a malo kae to oketo lepe maoko tenge. Okawo nanga moro kendo otweyo e nungone. Bang’ mano oolo pi e besen kendo ochako luoko tiende jopuonjrene achiel achiel, kae to oyweyo tiendegi gi nanga ma notweyo e nungone. Bang’ mano, orwako lepe maokoka kendo. Ang’o momiyo Yesu nobolore mondo otimne jopuonjrene kamano?—Joh. 13:3-5.
2 Yesu owuon nolero niya: “Ung’eyo gi matimonu koso? . . . To ka an Ruoth kendo Japuonj, to alwoko tiendu, un bende onego ulwok tiend oweteu. Nikech asemiyou ranyis mondo un bende utim kaka asetimonu.” (Joh. 13:12-15) Kuom timo tich ma ne nenore ni ni piny kamano, Yesu nomiyo jootene puonj ma ne dhi siko e pachgi, kendo ne dhi jiwogi ginyis bolruok kuom odiechienge ma ne luwo.
3. (a) Yesu nojiwo nade e kinde moko ariyo kaka bolruok en gima dwarore e ngima Jakristo? (b) Wabiro wuoyo e wi ang’o e sulani?
3 Kane Yesu olwoko tiende jootene, mano ok ema ne ohangoe puonjo jootenego gimomiyo bolruok en gima ber. Kinde matin mokalo kane moko kuom jootene nyiso chuny mar piem, Yesu nokawo nyathi matin mochunge bute kae to owachonegi niya: “Ng’ato ma rwako nyathi matinni e nyinga, orwako an; kendo ng’ato ma rwaka, orwako Jal ma noora. Nikech ng’at ma obedo matin kuomu duto, en e ng’at maduong’.” (Luka 9:46-48) Nikech nong’eyo ni kinde duto Jo-Farisai ne gin joma manyo duong’, kinde moro kolendo, Yesu nowacho niya: “Ng’ato ka ng’ato ma pakore, chieng’ nochaye; kendo ng’ato ma chare, chieng’ nopake.” (Luka 14:11) Nenore ayanga ni Yesu dwaro ni jolupne obed joma nyiso bolruok madier, matiende ni gibed gi paro mamuol kendo gibed joma ok nyis sunga kata ng’awruok. To nikech wadwaro luwo ranyisi mare, we mondo wanon adimba ranyisi ma noketo mar bolruok. Wabiro neno bende kaka kidoni nyalo kelo gweth ok mana ne jal manyiso kidoni kende, to ne joma moko bende.
‘OK NALOKO DIER NG’EYA’
4. Wuod Nyasaye ma miderma nonyiso nade bolruok kane pok obiro e piny?
4 Yesu ma en Wuod Nyasaye ma miderma nonyiso bolruok kata kane pok obiro e piny ka. Kane pok obiro e piny, Yesu nodak kod Wuon mare me polo kuom higini tara gi tara. Konyiso tudruok maber ma ne nitie e kind Wuowi gi Wuon mare, bug Isaiah e Muma wacho kama: ‘Jehova Nyasaye osemiya dho jo mopuonjore, mondo ang’e hoyo gi weche ng’at mojony: Ochiew gokinyi pile, oywayo ita mondo awinj kaka jo mopuonjore, Jehova Nyasaye oseyawo ita, ne ok adagi, kata loko dieng’eya.’ (Isa. 50:4, 5) Wuod Nyasaye nonyiso chuny mobolore kendo noketo pache ahinya kuom gigo ma Jehova ne puonje. Ne oyie kendo ikore chuth mondo oyud puonj mowuok kuom Nyasaye madier. Nyaka bed ni Yesu noneno ranyisi ma Jehova noketone mar nyiso bolruok sama Nyasaye ne kecho oganda dhano ma joricho!
5. Ka en Mikael malaika maduong’, Yesu noketo ranyisi mane maber mar bolruok maok okal tong’ sama ne Jachien laro kode kitundu?
5 Chwech duto ma ne nitie e polo ok nonyiso kido machalo gi mar Wuod Nyasaye ma miderma. Kar mondo obolre Jehova opuonje, malaika moro ma bang’e nobedo Satan Jachien, noweyo mondo kido moko mopogore gi bolruok kaka ng’awruok kod sunga, mondo oloye mi bang’e nong’anyo ne Jehova. To komachielo, Yesu to nonyiso ni omor gi migawo ma ne omiye e polo, kendo ok nobedo gi chuny mar dwaro tiyo marach gi teko ma ne omiye. Ka en Mikael malaika maduong’, Yesu ok nokalo tong’ kinde ma Satan ne ‘laro kode kitundu Musa.’ Kar mano, Wuod Nyasaye nonyiso bolruok. Ne oweyo mondo Jehova, Jang’ad Bura Maduong’ e piny gi polo, ema mondo olos wachno e yore owuon kendo e kinde mowinjorene.—Som Juda 9.
6. Yesu nonyiso bolruok nade kuom yie migawo mar bedo Mesia?
6 Nyaka bed ni gik ma Yesu nopuonjore kapok obiro e pinyka noriwo koda weche duto mokor mamulo kaka ngimane ne dhi bedo ka en e pinyka kaka Mesia. Kuom mano, nyalo bedo ni nong’eyo chon ni gik malit ne dhi timorene. Kata kamano, Yesu pod noyie migawo mar dak e piny kendo tho kaka Mesia manosingi. Nikech ang’o? Konyiso kaka Wuod Nyasaye ma miderma nonyiso bolruok, jaote Paulo nondiko kama: “Ne en e kit Nyasaye, to ne ok okwano bedo marom gi Nyasaye ka gi mituerokie, to notimore obet nono, kokawo kit misumba, kendo kobet e kido ma chal gi dhano.”—Fili. 2:6, 7.
KANE EN DHANO, “NOBET MAMUOL”
7, 8. Gin yore mage ma Yesu nonyisoe bolruok mare kinde ma ne en nyathi, kendo kane otiyo ne Nyasaye e pinyka?
7 Paulo nondiko niya: “Ka [Yesu] nonenore kaka dhano, nobet mamuol, kodoko ng’a ma winjo wach nyaka tho; ee, tho [e yadh-sand].” (Fili. 2:8) Chakre e tinne, Yesu noketonwa ranyisi maber mar bolruok. Kata obedo ni ne opidhe gi jonyuolne ma gin Josef kod Mariam—dhano ma joricho—Yesu nonyisogi bolruok “kendo ne owinjogi.” (Luka 2:51) Mano kaka en ranyisi maber ne nyithindo, nimar Nyasaye biro gwedhogi ka giyie bolore e bwo jonyuolgi!
8 Ka nosebedo ng’at maduong’, Yesu nonyiso bolruok kuom keto dwaro mar Jehova ema obedne motelo moloyo luwo dwaro mare. (Joh. 4:34) Kinde ma ne olendo, Yesu Kristo ne tiyo gi nying Nyasaye sie kendo nokonyo ji mang’eny ma ne dwaro ng’eyo Nyasaye mondo obed gi ng’eyo makare e wi kido mag Jehova koda dwaro mare ne dhano. Yesu bende nodak kaluwore gi gik ma ne opuonjo e wi Jehova. Kuom ranyisi, gimaduong’ ma Yesu noketo mokwongo e lamo mar ranyisi ne en ma: ‘Wuonwa manie polo, nyingi mondo obed maler.’ (Math. 6:9) Omiyo Yesu nochiko jolupne mondo okaw wach keto nying Jehova obed maler gi pek madwarore. En owuon nodak kotimo kamano. Kane ochomo giko tijene e piny ka, Yesu ne nyalo wacho e lamo kokwayo Jehova niya: “Nanyisogi [joote] nyingi, kendo nanyisgi.” (Joh. 17:26) To moloyo, kinde duto kotiyo ne Nyasaye e pinyka, Yesu ne miyo Jehova duong’ kuom gik moko duto ma ne otimo.—Joh. 5:19.
9. Zekaria nokoro wach mane kuom Mesia, to Yesu nochopo wechego nade?
9 Kowuoyo e wi Mesia, Zekaria nokoro niya: “A nyar Sayun, bedi mamor ahinya; go koko, in nyar Jerusalem: neuru, ruodhu biro iri: en kare, kendo en wuon warruok; en mamuol, koidho kanyina, oidho mana nyathi kanyina.” (Zek. 9:9) Wachni nochopo kare kane Yesu odonjo Jerusalem kapok nyasi mar Pasaka ochopo e higa 33 E.N. Ji mathoth kuom oganda ne opedho lepgi kaachiel gi bede yien e yo. Kuom adier, dala Jerusalem ne osakni kane Yesu odonjo. Kata kane oganda kok gi nyinge ni en Ruoth, Yesu to nonyiso bolruok.—Math. 21:4-11.
10. Bedo ni Yesu noyie winjo wach nyaka e thone, nochiwo adiera e wi weche mage?
10 E ngima ma Yesu Kristo nodakie e piny kae, ne onyiso bolruok kendo luwo chik nyaka e thone e yadh sand. Kuom mano, Yesu nonyiso maonge kiawa ni dhano nyalo makore chuth gi Jehova kata bed ni en e bwo tem mager machalo nade. Yesu nonyiso bende ni Satan nowacho miriambo kuom hango wach ni dhano tiyo ne Jehova mana nikech gik mabeyo ma dhano yudo kuome. (Ayub 1:9-11; 2:4) Ngima Kristo mar makruok motegno bende nosiro ratiro ma Jehova nigo mar bedo jaloch e wi gik moko duto, kendo nonyiso ni loch mar Jehova ema ni kare chuth. Nyaka bed ni Jehova ne mor ahinya kane oneno kaka wuode nomakore kode kendo nyiso bolruok madier.—Som Ngeche 27:11.
11. Misango mar rawar mar Yesu Kristo, nochiwo geno mage ne dhano ma nigi yie kuome?
11 Kokalo kuom tho mare e yadh sand, Yesu nochulo bende nengo mar rawar ne dhano. (Math. 20:28) Mani noyawo ne dhano ma joricho thuolo mar dak nyakachieng’ ka giluwo chike makare mag Jehova. Paulo nondiko kama: “Tim makare achiel keto ji duto kare, kendo miyogi ngima.” (Rumi 5:18) Tho mar Yesu noyawo ne Jokristo mowal, geno mar yudo ngima ma nyakachieng’ e polo, to kuom ‘rombe mamoko,’ thone noyawo thuolo mar yudo ngima ma nyakachieng’ e piny.—Joh. 10:16; Rumi 8:16, 17.
“ADEMBORA E CHUNY”
12. Kinde ma Yesu nodak gi dhano ma joricho e pinyka, ere kaka nonyisogi muolo koda bolruok?
12 Yesu nogwelo jogo duto ‘mojony kendo mogangore mapek’ mondo obi ire. Nowachonegi kama: “Rwakuru lota kuomu, kendo puonjreuru kuoma, nikech amuol, kendo adembora e chuny, to unubed gi kuwe e chunyu.” (Math. 11:28, 29) Kido mar bolruok koda muolo mare nomiyo Yesu onyiso ng’wono ne ji duto maok obwono ng’ato ang’ata. Ok nogeno mondo jopuonjrene otim gik ma ne ok ginyal. Ne opwoyogi kendo ojiwogi. Ok nomiyo jopuonjrene obedo gi paro ni onge gima ginyalo timo maber, kata ni gin joma nono. Ka kuom adier, Yesu ok ne ger kodgi kendo gik ma ne gitimo ne more. Ne ojiwogi koketonigi ayanga ni ka giyie ma gibedo osiepene, kendo luwo puonj mage, to ne gidhi yudo kuwe e chunygi, nimar lote ne yot. Chwo, mon, nyithindo kaachiel gi jomadongo duto ne jowinjo ka chunygi okuwe sama gin but Yesu.—Math. 11:30.
13. Yesu nonyiso nade ni okecho joma ne ojwang’ kendo ma ne chandore?
13 Kinde duto kane en gi joma ne ojwang’ kendo modak e ngima man piny e oganda mar Jo-Israel, Yesu ne kechogi nikech ngima matek ma ne gikale, kendo ne otemo ahinya mondo okonygi. Kinde moro kane en machiegni gi Jeriko, ne oromo gi jokwecho ariyo ma muofni, ma achiel kuomgi nyinge Bartimeo. Ne gigoyo koko ka giramo mondo Yesu okonygi, to kata kamano oganda nokwerogi matek mondo giling’. Mano kaka ne yot mondo Yesu owe maok odewo muofnigo! Kar mano, Yesu nowacho mondo okelgi ire, kendo konyiso ni okechogi, ne oyawo wengegi. Adier, Yesu noluwo ranyisi mar Jehova Wuon mare, kuom nyiso bolruok kendo kecho dhano modak e ngima man piny.—Math. 20:29-34; Mari. 10:46-52.
‘NG’AT MA BOLORE, NOTING’ MALO’
14. Gin gweth mage mosebedoe nikech bolruok ma Yesu nonyiso?
14 Ngima ma Yesu Kristo nodakie mar bolruok, nokelo mor kaachiel gi gweth ne ji mang’eny. Jehova ne mor ahinya neno Wuode mohero ka bolore mondo otim dwaro mare. Joote kaachiel gi jopuonjre Yesu, ne mor ahinya nikech Yesu ne en ng’at mamuol kendo modembore e chunye. Ranyisi mare maber, puonj mage koda kaka ne opwoyogi, ne ojiwogi mondo gitim dongruok e winjruokgi gi Nyasaye. Yesu nokonyo joma ne odak e ngima mapiny kopuonjogi, kojiwogi kendo miyogi gigo ma ne gichando. Ka kuom adier, nikech misango mar Yesu, dhano duto maketo yie kuome biro yudo gweth ma nyakachieng’.
15. Yesu noyudo gweth nade kuom bedo ng’at ma bolore?
15 To nade Yesu? Be kido mar bolruok nokonye e yo moro amora? Ee, nimar nonyiso jopuonjrene kama: “Ng’atno ma nodwokre piny owuon, noting’e malo.” (Math. 23:12) Wechego nochopo kare e ngima Yesu. Paulo lero niya: “Nyasaye ne oting’e malo ahinya, kendo ne omiye nying’ moloyo nying’ duto, ni mondo e nying Yesu gik moko duto ogo chonggi piny, gik manie polo, kod gik manie piny, kod gik manie bwo piny, kendo lep ka lep ohul ni Yesu Kristo en Ruoth, mondo Nyasaye Wuoro omi duong’.” Nikech ngima Yesu mar bolruok kendo chung’ motegno ka ne en e pinyka, Jehova Nyasaye noting’o Wuodeno malo, komiye obedo gi teko e wi chwech duto me polo koda e piny.—Fili. 2:9-11.
YESU BIRO LOCHO GI ‘ADIERA GI BOLRUOK’
16. Ang’o manyiso ni Wuod Nyasaye pod biro dhi nyime bedo gi kido mar bolruok?
16 Bolruok en kido ma Wuod Nyasaye pod biro dhi nyime nyiso kinde mabiro. Kokoro gima Yesu biro timo ne jowasike ka en gi duong’ momiye e polo, jandik-zaburi nowero kama: ‘Rwakri gi lep duong’, mondo ilo, kendo ikel adiera gi bolruok kod bura makare.’ (Zab. 45:4, The Bible in Luo, 1976) Kotiyo gi kido mar hero adiera koda ng’ado bura makare, Yesu Kristo biro locho konyiso bolruok e Har–Magedon. Ang’o mabiro timore e giko Lochne mar Higini Gana Achiel, koseketho “loch duto, gi teko duto, gi nyalo duto” mayudore e piny marachni? Be obiro nyiso bolruok? Ee, nimar “enochiw pinyruoth ni Nyasaye Wuoro.”—Som 1 Jo Korintho 15:24-28.
17, 18. (a) Ang’o momiyo en gima dwarore ahinya mondo jotich Jehova oluw ranyisi ma Yesu noketo mar bolruok? (b) Ang’o mwabiro nono e sula maluwo?
17 To nade wan? Be wabiro luwo ranyisi ma Yesu noketonwa mar bedo joma bolore? Be wabiro tony e lweny mar Har–Magedon? Ruoth Yesu biro reso mana joma nigi kido mar bolruok kendo mohero tim makare. Omiyo mondo omi watony e lwenyno, dwarore ni wanyag kido mar bolruok. To bende ka wanyiso bolruok, wabiro yudo gweth mang’eny kaachiel gi joma moko mana kaka Yesu bende noyudo.
18 Ang’o manyalo konyowa mondo waluw ranyisi ma Yesu noketonwa mar bolruok? Wanyalo timo ang’o mondo wadhi nyime nyiso bolruok kata bed ni timo kamano ok yot kinde duto? Penjogi ibi non e sula maluwo.
[Penjo mag Puonjruok]
[Picha e ite mar 12]
Ranyisi ma Yesu noketo mar bolruok nyalo konyowa e yo mane?
[Picha e ite mar 13]
Yesu noketonwa ranyisi maber mar kecho jomoko
