Isua Chuan Inngaihtlâwmna Kawngah Entawn Tûr A Siam
Isua Chuan Inngaihtlâwmna Kawngah Entawn Tûr A Siam
“In chunga ka tih ang hian nangni pawhin in tih vena tûrin ka tihhmuh che u a ni si a.”—JOH. 13:15.
ENGTIN NGE KAN CHHAN ANG?
Engtin nge Pathian Fapa chuan mihring anga a rawn kal hmain inngaihtlâwmna a lantîr?
Engtin nge Isua chuan mihring anga a awm laiin inngaihtlâwmna a lantîr?
Isua inngaihtlâwmna nun kawng chuan eng hlâwknate nge a thlen?
1, 2. He leia a nun tâwp ber zân khân Isua’n a tirhkohte hnênah eng thil nge a zirtîr?
ISUA he leia a nun tâwp ber zân a ni a, Jerusalem in chhâwng pindan chungah a tirhkohte nên hun an hmang a ni. Isua chu zanriah an ei laiin a ding a, a kawrfual a phelh a. Inhrûkpuan a veng a. Tin, chawhtawlhah tui a dah a, a zirtîrte ke chu silsakin, inhrûkpuan chuan a hrûkhulsak ṭan ta mai a. Chu mi hnu chuan, a kawrfual chu a ha leh ta a ni. Engvângin nge Isua’n chu hna tlâwm tak chu a thawh?—Joh. 13:3-5.
2 A chhan chu amah ngeiin heti hian a sawi a ni: “In chunga ka thiltih hi engtihna nge ni in hria em? . . . Kei Lalpa leh Zirtîrtu mahin in ke ka sil chuan nangni pawhin in ke in insilsak tûr a ni. In chunga ka tih ang hian nangni pawhin in tih vena tûrin ka tihhmuh che u a ni si a,” tiin. (Joh. 13:12-15) Chutianga hna tlâwm pawh thawh a inhuamzia lantîrin, Isua chuan a tirhkohte chu an rilrua an vawn reng theih tûr leh hun lo la awm zêl tûrah pawh inngaitlâwm tak ni tûra fuihtu tûr thil a zirtîr a ni.
3. (a) Ṭum hnih lai chu engtin nge Isua’n inngaihtlâwmna pawimawhzia a sawi uar? (b) He thuziakah hian eng nge kan sawiho ang?
3 Isua’n a zirtîrte ke a silsak kha inngaihtlâwmna hlutzia a târ lanna hmasa ber a ni lo. A hmaa zirtîr ṭhenkhatin inelna rilru put hmang an lantîr ṭum pawhin Isua chuan naupang tê chu a bulah dintîrin, zirtîrte chu heti hian a hrilh a ni: “Tupawh ka hming avânga he naupang tê hi lâwm apiang chu keimah mi lâwm an ni ang; tupawh kei mi lâwm apiang chu mi tîrtu lawm an ni ang; in zavaia zînga tê ber hi a ni, ropui ni,” tiin. (Lk. 9:46-48) Pharisaite’n challanna an zawng tih hriain a hnua a rawngbâwlnaah pawh Isua chuan: “Inngaihlu apiang an tlâwm ang a; inngaitlâwm chu chawimawiin an awm ang,” tiin a lo sawi bawk a ni. (Lk. 14:11) Isua chuan a hnungzuitute chu inngaitlâwm tûrin a duh tih a chiang hle a, chu mi awmzia chu mi thuhnuairawlh, mi chapo lo leh inngaihlu lo ni tûrin a duh tihna a ni. Amah entawn tum rân chungin, inngaihtlâwmna kawnga a entawn tûr siam chu ngun takin i zir ho ang u. Chu mizia chuan inngaihtlâwmna lantîrtute tân mai bâkah, mi dangte tân pawh hlâwkna a thlen dân kan hmu bawk ang.
‘KA HAWI KIR LO’
4. Engtin nge Pathian Fapa mal neih chhun chuan mihring anga a rawn pian hma pawhin inngaihtlâwmna a lantîr?
4 Pathian Fapa mal neih chhun chuan he leia a rawn kal hma pawhin inngaihtlâwmna a lantîr tawh a. Mihring anga a rawn pian hmain a Pa vâna mi nên kum chhiarsên loh an hmang dûn tawh a ni. Bible-a Isaia bu chuan Fapain a Pa nêna inlaichînna a neih thûkzia heti hian a sawi a: “Mi hah tak chu thu-a ka tihhahdam thiam nân Lalpa PATHIAN chuan zirtîrte lei mi pe a; ani chuan atûk atûk tin a kai harh a, zirtîrten an hriat anga hre tûrin ka beng hi ka kai harh ṭhîn. Lalpa PATHIAN chuan ka beng mi tihhawnsak a, kei chu ka hel lo va, ka hawi kîr hek lo,” tiin. (Is. 50:4, 5) Pathian Fapa chuan inngaihtlâwmna rilru put hmang lantîrin, Jehova thil zirtîrte chu ngun takin a ngaithla a. Pathian dik hnên aṭanga inzir chu a châkin, nuam a ti hle a ni. Isua chuan sualna nei mihringte chunga zahngaihna lantîr kawnga Pathian Jehova inngaihtlâwmna lantîr chu a va hmu chiang dâwn tak êm!
5. Vântirhkoh chungnung ber Mikaela ni mah se, engtin nge Isua chuan Diabola nêna an inhnial laiin inngaihtlâwmna leh a âwm tâwk hriatna kawnga entawn tûr a siam?
5 Mahse, vâna thilsiam zawng zawngte chuan Pathian Fapa mal neih chhun rilru put hmang ang chu an nei vek lo va. Vântirhkoh pakhat Setan-Diabola lo ni ta chuan Jehova hnên aṭanga inzir ai chuan inngaihtlâwmna letling chiah—mahni inngaih pawimawhna leh chapona—chu a inthununtîr a, Jehova lakah a hel ta a ni. Isua erawh chu vâna a dinhmun chanah chuan a lungawi a, a thuneihna chu hman khaw loh a tum lo. Vântirhkoh chungnungber Mikaela ni mah se, Isua chuan ‘diabola nên Mosia ruang thua an inhnial laiin’ a thuneihna pêlin engmah a ti duh lo va. Chutianga tih aiin, Pathian Fapa chuan inngaihtlâwmna leh a âwm tâwk hriatna a lantîr zâwk a. Lei leh vâna Rorêltu Lû ber Jehova’n A duh ang zâwng leh a duh hun taka a chinfel atân a dah a ni.—Juda 9 chhiar rawh.
6. Engtin nge Isua chuan Messia anga rawngbâwl tûra a chanvo a pawmnaah inngaihtlâwmna a lantîr?
6 Mihring anga a rawn kal hmaa Isua thil zirte zîngah chuan Messia anga he leia a nun dân tûr chungchâng hrilh lâwkna thu chipchiar takte pawh a tel ngei ang a. Chuvângin, a thil tawn tûr hrehawm tak takte pawh a hre lâwk vêk a nih hmêl hle a ni. Chuti chung pawhin, Isua chuan thutiam Messia anga he leia lo piang leh thi tûra a chanvo chan chu a pawm tho a ni. Eng nge a chhan? Pathian Fapa neih chhun inngaihtlâwmna chungchâng sawiin tirhkoh Paula chuan heti hian a ziak a ni: “Ani zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a,” tiin.—Phil. 2:6, 7.
MIHRING ANGA LO AWMIN, “A INNGAITLAWM”
7, 8. Eng kawngtein nge Isua’n a naupan lai leh leia rawng a bâwl chhûngin inngaihtlâwmna a lantîr?
7 “[Isua chu] mihring anga lo awmin, a inngaitlâwm a, thi khawp hiala thu zâwmin a lo awm ta a,” tiin Paula chuan a ziak a ni. (Phil. 2:8) Isua chuan a naupan têt aṭangin inngaihtlâwmna lama entawn tûr min siamsak a. Amah enkawl seiliantu a nu leh pa—Josefa leh Mari—chu mi ṭha famkim lo ni mah se, inngaitlâwm takin “an thu zâwmin a awm” a ni. (Lk. 2:51) An nu leh pate thu an âwih avânga Pathianin mal a sâwm tûr naupangte tân entawn tûr ṭha a va ni tehlul êm!
8 Puitling a nih hnuah pawh Isua chuan ama duhzâwng aia Jehova duhzâwng dah pawimawh zâwkin inngaihtlâwmna a lantîr a. (Joh. 4:34) A rawngbâwl chhûngin Isua Krista chuan Pathian hming a târ lang a, mi rilru ṭhate chu Jehova mizia leh mihringte tâna a thiltum te hriatna dik nei tûrin a ṭanpui a ni. Jehova chungchâng thu mite hnêna a zirtîr milin a nung bawk a. Entîr nân, ṭawngṭai dân tûr a zirtîrnaa a sawi hmasak ber chu: “Kan Pa vâna mi, i hming zahawm rawh se,” tih a ni. (Mt. 6:9) Chutiang chuan, Isua chuan a hnungzuitute chu Jehova hming tihzahawmna, a nih loh leh tihthianghlimna chu ngai pawimawh hmasa ber tûrin a zirtîr a. Amah ngei pawh chutiang chuan a nung a ni. Leia a rawngbâwlna a tâwp dâwn lama Jehova hnêna a ṭawngṭainaah pawh: “[Tirhkohte] hnênah i hming ka hriattîr a, ka hriattîr leh fo vang,” tiin a sawi thei a ni. (Joh. 17:26) Chu bâkah, Isua chuan he leia a rawngbâwl chhûng zawnga a thil hlen chhuahte chu Jehova chawimawi nân a hmang a ni.—Joh. 5:19
9. Zakaria’n Messia chungchâng eng nge a hrilh lâwk a, chu chu engtin nge Isua chunga a rawn thlenfamkim?
9 Messia chungchângah Zakaria chuan heti hian hrilh lâwk thu a lo ziak a: “Aw Zion fanu, nasa takin hlim la; aw Jerusalem fanu, au chhuak rawh; ngai rawh, i lal i hnênah a lo kal e; mi fel a ni a, hnehtu a ni; inngaitlâwm takin sabengtung chungah a chuang a, sabengtung no chung ngeiah,” tiin. (Zak. 9:9) Chu thu chu C.E. 33 Kalhlen Kût hmaa Isua Jerusalem-a a luh khân a thleng famkim a ni. Chu mi ṭum chuan mipuite chuan an puante leh chhâwl thingte chu kawngah an phah a. A lo luh chuan khawpui pum pui chu a buai ta mup mup mai a ni. Chutianga mipuiin Lal anga an chawimawi hunah pawh chuan Isua chu a inngaitlâwm reng tho a ni.—Mt. 21:4-11.
10. Thi khawp hiala Isua thuâwihna chuan eng nge a finfiah?
10 He leia a awm chhûnga Isua Krista inngaihtlâwmna leh a thuâwihna chuan nghaisakna bana a thih khân a vâwrtâwp a thleng a. Isua chuan mihringte hi fiahna nasa ber hnuaiah pawh Jehova chungah an rinawm tlat thei tih rinhlelh rual lovin a lantîr a ni. Tin, mihringte’n mahni hmasial vânga Jehova rawng an bâwl nia Setana puhna pawh a dik lohzia a târ lang bawk a. (Job. 1:9-11; 2:4) Krista’n rinawmna famkim a lantîrna chuan lei leh vâna Jehova lalchungnunna dikzia leh felzia a thlâwp bawk a ni. A Fapa inngaitlâwm takin rinawmna tihnghîn rual loh a lantîr a hmuh chuan Jehova chu a hlim hle ngei ang.—Thufingte 27:11 chhiar rawh.
11. Isua Krista tlanna inthawina chuan rinna nei mihringte tân eng kawng nge a hawn?
11 Nghaisakna bana a thihna hmangin Isua chuan mihringte tân tlanna man a pe bawk a. (Mt. 20:28) Chu chuan sualna nei mihringte tân chatuana nun theihna kawng a hawng a, felna thil phût chu a pe tla a ni. Paula chuan heti hian a ziak a: “Thil fel pakhat tih avângin nunna hmuh nân thiam chantîrna thilthlâwnpêk chu mi zawng zawng chungah a lo awm,” tiin. (Rom 5:18) Isua thihna chuan thlarauva hriak thih Kristiante tân, vâna thi thei tawh lo tûra nun theihna leh ‘berâm dangte’ tân he leia chatuana nun theihna kawng a hawng a ni.—Joh. 10:16; Rom 8:16, 17.
“RILRUA INNGAITLAWM TAK” KA NI
12. Ṭha famkim lo mihringte a dâwrnaah engtin nge Isua chuan thuhnuairawlhna leh inngaihtlâwmna a lantîr?
12 Isua chuan “thawk rim leh phurrit phur zawng zawngte” chu a hnêna kal tûrin a sâwm a. “Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang,” tiin a sawi a ni. (Mt. 11:28, 29) A inngaihtlâwmna leh a thuhnuairawlhna mizia chuan Isua chu ṭha famkim lo mihringte a dâwrnaa ngilnei tûr leh thleibîk nei lo tûrin a chêttîr a. Ani chuan a zirtîrte chungah thil a âwm tâwk chauh vin a beisei a. Anmahni chu a fakin, a fuih bawk ṭhîn. Ṭangkai lo leh hlu lo nia inhriatna a neihtîr ngai lo va. Tihlâwm harsa emaw, mi dangte awpbeh chîng emaw a ni lo chiang hle bawk. Chutih a hnêkin, a nghâwngkawl chu a nuam a, a phur pawh a zân avângin a hnungzuitute’n amah an hnaih a, a zirtîrnate an nunpui chuan an hahdam ang tih a tiam zâwk. Hmeichhia leh mipa, apui apangte chuan a bula awm nuam an ti vek a ni.—Mt. 11:30.
13. Engtin nge Isua’n mi hnuaihnungte chungah khawngaihna a lantîr?
13 Israel mi a nâwlpuite chu an chan a chhiat avângin anmahni a kawmnaah Isua chuan khawngaihna a lantîr a, hmangaih takin an mamawhte a ngaihsak ṭhîn a ni. Jeriko bulah kutdawh mitdel pakhat Bartimaia leh a ṭhian mitdel bawk pakhat chu a tâwk a. Anni chuan Isua ṭanpuina an ngên a; mahse, mipuite chuan ngawi tûrin an lo hau va. Chûng mitdelte ngenna ngawihsan mai chu a va awl dâwn êm! Mahse, Isua chuan a hnêna rawn hruai tûrin a ti a, anni chu a khawngaih êm êm a, an mit a tihvârsak ta a ni. Ni e, Isua chuan sualna nei mi hnuaihnungte chunga inngaihtlâwmna leh zahngaihna lantîrin a Pa, Jehova a entawn a ni.—Mt. 20:29-34; Mk. 10:46-52.
“TUPAWH INNGAITLAWM APIANG CHAWIMAWIIN AN AWM ANG”
14. Isua inngaihtlâwmna nun kawng chuan eng hlâwknate nge a rah chhuah?
14 Isua Krista inngaihtlâwmna chuan hlimna leh hlâwkna nasa tak a thlen a. A Fapa duh tak inngaitlâwm taka A thuhnuaia intulût a hmuhin Jehova chu a hlim hlê a ni. Tirhkohte leh zirtîrte pawhin Isua thuhnuairawlhna leh rilrua inngaihtlâwmna aṭangin hahdamna an hmu a. A entawn tûr siam te, a zirtîrnate, leh a fakna ṭawngkam duhawm takte chuan thlarau lama hma sâwn zêl tûrin anni chu a tiphur a ni. Isua ṭanpuina te, zirtîrna te, leh fuihna te dawngtu an nih avângin mipuite pawhin a inngaihtlâwmna chu an hlâwkpui bawk. Dik takin, tlanna chang thei mihring zawng zawngte chuan Isua tlanna inthawina aṭangin chatuana hlâwkna an seng dâwn a ni.
15. Engtin nge Isua chuan a inngaihtlâwmna chu a hlâwkpui?
15 Isua chungchâng chu eng nge ni ve? A inngaihtlâwmna chu amahin a hlâwkpui ve em? Hlâwkpui ve e, amah Isua ngei chuan a zirtîrte hnênah: “Tupawh inngaitlâwm apiang chawimawiin an awm ang,” tiin a hrilh si a. (Mt. 23:12) Chu thu chu a chungah pawh a thleng dik chiah a. Paula chuan heti hian a sawifiah a: “Chu mi avâng chuan Isua hmingin mi tin—vâna mite, leia mite, lei hnuaia mite nên—an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a,” tiin. Isua chu he leia a awm laia a inngaihtlâwmna leh rinawmna avângin, Pathian Jehova chuan a chawimawi a, lei leh vâna thilsiam zawng zawng chunga thuneihna a pe a ni.—Phil. 2:9-11.
“THUTAK LEH THUHNUAIRAWLHNA” ATANA BEIIN ISUA CHU A KAL ZEL ANG
16. Pathian Fapa chuan inngaihtlâwmna nên thil a la tichhunzawm zêl ang tih engin nge lan tîr?
16 Pathian Fapa chuan inngaihtlâwmnain thil a tichhunzawm zêl dâwn a. Vâna a dinhmun sâng tak aṭanga A hmêlmate Isua’n a beih dân tûr chungchâng hrilh lâwkin, fakna hla phuahtu chu heti hian a zai a: “Thutak leh thuhnuairawlhna leh felna avângin i mawina inbelin hmuingîl takin sakawr chunga chuangin kal zêl ang che,” tiin. (Sâm 45:4) Armageddon-ah Isua Krista chuan inngaitlâwmte leh mi felte bâkah thutak ngainatute humhim nân a bei ang. A nih leh, Messia Lalin ‘rorêlna zawng zawngte leh, thuneihna leh thiltihtheihna zawng zawngte a tihbo hnu,’ a Kum Sâng Rorêl zawhah chuan eng nge lo thleng ang? Inngaihtlâwmna a la lantîr chhunzawm zêl ang em? La lantîr zêl ang, “Pathian hnênah, Pa hnên ngeiah chuan ram chu a pe ang” tih Bible-in min hrilh avângin.—1 Korinth 15:24-28 chhiar rawh.
17, 18. (a) Engvângin nge Jehova chhiahhlawhte tân inngaihtlâwmna kawnga Isua entawn tûr siam zui chu a pawimawh? (b) A dawta thuziakah eng nge kan sawiho ang?
17 Kan chungchâng hi eng nge ni ve thung? Kan Entawn tûr, Isua min tihhmuh chu zuiin, inngaihtlâwmna kan lantîr ve ang em? Armageddon-a rorêlna keng kawh tûra Lal Isua Krista a rawn kal hunah engtin nge kan awm ang? Ani chuan mi inngaitlâwm leh mi felte chauh a chhandam dâwn a. Chuvângin, chhandam kan nih nân inngaihtlâwmna kan neih a pawimawh a nih chu. Chu bâkah, Isua Krista inngaihtlâwmna nun kawngin amah leh mi dangte tâna hlâwkna a thlen ang chiahin, inngaihtlâwmna kan lantîrna chuan kawng hrang hrangin hlâwkna a thlen dâwn a ni.
18 Inngaihtlâwmna kawnga Isua min tihhmuh zui tûr chuan engin nge min ṭanpui thei? Harsatna hrang hrang kan tawng chung pawhin engtin nge inngaihtlâwm kan tum tlat theih ang? Chu mi chungchâng chu a dawta thuziakah kan ngaihtuah ang. (w12-E 11/15)
[Zirlai Atâna Zawhnate]
[Phêk 15-naa milem]
Engtin nge inngaihtlâwmna kawnga Isua entawn tûr siam chu kan hlâwkpui theih?
[Phêk 16-naa milem]
Isua’n mite a khawngaihna chu a entawn tlâk hle
